أيوه خدامه

Friday, July 28, 2006

عينكو عالدكانة ياخوانّا

ياصحابى ، ياأهلى و يا جيرانى - معلش هستأذن كام يوم كده فيه سبوبة أخلصها و آجى على طول.
السبانخ فى التلاجة و الشاى فى الرف اللى فى الوش و السكر فى النملية.
فيه أربع مانجيات مرقداهم فى الدولاب محدش يهوب ناحيتهم - ممكن تفتحوا البطيخة اللى تحت البوفية بدل ماتحمض.
و النبى بس حد يلم الغسيل من فوق السطوح و يكهرب الباب عشان ماتسرقش - بصوا اللى عايز يقيل ولا حاجة الملايات كده كده هتتغسل بعد مارجع مفيش مشكله بس أنا خدت المخدات معايا (ممكن تستخدموا قالبين طوب من اللى تحت السرير)!ا
و النبى عينكم عالدكانه لحسن أرجع ألاقيها هى رخرة دخلت فى معمعة الضرب و تزورنا كونداليزا فى الحتةو انا لسة مانجدتش الأنترية.
آه قبل مانسى - هتوحشونى

Friday, July 21, 2006

ست الحسن ..أم فيونكات

أيظن أننى لعبة فى يديه .. أنا لا أفكر فى الرجوع اليه
اليوم عـــــاد .. عـــاد .. ليقول لى أنى رفيقة دربه


ما يعود وأنا مالى – هو أنا فاضياله ؟ أستنى بس و سيبنى كده أستوعب اللى بيحصل
حب أيه دلوقتى يا عين أمك - ماتفتح الجزيرة كده و تمللى عينيك – صاروخ عربى يسقط فى حيفا!!
صدق أو لا تصدق – بس هتصدق : وصل و ربنا وصل و فى مقتل كمان
اسرائيل بتهر – بيجروا – بيعيطوا – ايه ده ؟؟ زينا كده؟ زى بتوع فلسطين و لبنان
أيوه و الله العظيم ده لايف
ايه ده يعنى هيطلع لهم ليفون الدره زى محمد الدره؟ أيوه
يعنى هيحسوا بمعنى اليتم و الترميل؟ أيوه
يعنى طلع فينا يا عرب دكر و ماوطاش؟ ايوه

و بأننى الحب .. الحب الوحيد لــــــديه

والله دى مشكلتك و سيبنى أركز فى المهم
يعنى فيها ناس رفضت تقعد على ترابيزة الأجتماعات و تشرب الميه المعدنيه مع رئيس الوزراء الأسرائيلى و الرئيس المصرى و العاهل الأردنى فى شرم الشيخ ؟ أيوه
طب يمكن يعنى عشان شرم الشيخ حر و هيقعدوا فى بورتو مارينا؟ لأ و الله و ماقعدوا ولا هيقعدوا طب ازاى؟

حتى فساتينى التى أهملتها .. فرحت به رقصت على قدميه

ماحصلش و لا هيحصل .. أصبر لما نسمع المهم .. بلا فساتين بلا برباتوزات
هو الخبر ده صح و لا أنا مش فاهمة : اشتباكات بين رجالة حزب الله و الجيش الأسرائيلى على حدود لبنان و تدمير مروحية اسرائيلية و ثلاث دبابات و فى الوقت نفسه رفض الرجل : حسن نصر الله تسليم الأسيرين الأسرائيلين الا بعد عقد اتفاقية تبادل أسرى يرتضيها حزب الله؟

طب مجموعة التمانية يا كبدى اللى بيتفسحوا فى موسكو طار من دماغهم كاسين الفودكا و مزة الكافيار؟ يا كبدى خسارة المصاريف مش كان طقم أنترية البت فاتن أولى ولا يستروا بيهم بت يتيمة ينوبهم ثواب !!
يعنى ياخوانا التمانية الكبار بقوا تسعة؟ ولا أنا بهبل؟ لأ ده مفيهاش غير حزب الله – دى صواريخه موديل الحرب العالمية التانية و لا خدش معونة شتا من أمريكا – بس الدكر التانى نجاد بتاع ايران اللى حالق راسه و مقطع بطاقته وقف مع أخوه – يعنى دول ناس فهموا يعنى ايه " ان تنصروا الله ينصركم "؟.
ألا هم بيعملوا كده ليه؟ صحيح انا ناسية – ماحنا خدنا على مناظر الجنازات اللى فى غزه لكن لسه متعودناش على جنازات الحاخامات – و ان شاء الله هنتعود.

سامحته و سألت عن أخباره .. و نمت لى ييجى ساعه تحت قدميه

اه يا رقة – ماهو ليه حق يديكى بالجزمة و يعتبرك لعبة فى ايديه أسفوخس عالوطيان
سيبك من اسمه ايه ده اللى جاى و شايل كام ورده فاكر ده يرجع ليالينا – أصلنا بايننا كده هننضف و نغير شكل الأرض – ألا هو البيان السعودى مالو خايس كده ليه؟ كل همهم ان الشيعة ماتقواش شوكتها فوق السنه ؟؟؟!!!! و مش مهم ان اسرائيل تقوى شوكتها فوق أم راسنا
و نحن نناشد و نشجب و نحسس و نعتذر عـــــــــادى أيوه عادى
والولية كوندليزا خايس يا حبة قلب أمها بتحذر هيزبولاه من الأستمرار فى ضرب الأسرائيليين العزل أل يعنى اللبنانيين مش عزل (ماهما كمان مشغولين ببهججة الوطن- يعنى هيحاربوا بوائل ولا بيورى- ازاى نصر الله ينسق معاهم يعنى؟) و بتحضر عشان تجرى تحمينا ماحنا لسه قاصر – و هما خبرة سبع تلاف سنه – هتموت من هيزبولاه و هتولع من ايران أند سيريا – يكش يبتليها بجوز سوابق بيضرب برشام و لا بانجو يضربها كل يوم علقة عالصبح و ياخد منها الدولارات اللى فى البوك بتاعها و يبيع السنسلة بتاعت أمها و خشب المطبخ – قادر يا كريم- أشوف فيها يوم القوقا وش القرد هى و اللى قانيها ابن أم بوش .

الشاطر حسن ده باينه بحق و حقيق يا عيال – حاجة تانية غير بن لادن اللى جايب لنا الكلام و قلب الليلة لأرهاب بيدفع تمنه كل عربى – بيشتغل كده بدون تكتيك الصراحة - مايكيفش
المهم و على رأى اللى قال : دع الأيام تفعل ماتشا
و انت يا بتاع الكام وردة تعالى أتعلم يعنى ايه رجالة لحسن دى أول مرة نبقى رجالة و نقف وقفة رجالة .
و النبى يارب مايتحول الشاطر حسن فى الآخر لست الحسن و الجمال لحسن كلهم … ست الحسن و الجمال أم فيونكة على جنب لحسن قلبى واكلنى على سوريا

تحديـــــــــــــــــــــــــــــــــــــــــــث : اشمعنى يعنى سوريا اللى هخاف عليها طب ماحنا أولى

فى مناقشة لى مع صديقتى قالت لى معلش انها جت فى لبنان – خليها تنضف – فيها دعارة و فيها نسوان بتشرب أرجيلة – فيها بورنو كليبس – لبنان هى اللى صدرت لنا الحواجب و الشفايف !!ا قلت لها انتى عارفة لو بالمقياس ده يبقى ماسخم من ستى الا سيدى
هما عندهم هيفا و احنا عندنا بوسى سمير و دينا و .. يا خبر اسود داحنا عندنا السبق و الريادة – داحنا عندنا من أيام الأبيض و أسود – طيب دلوقتى هما بينضربوا فى الجنوب و حزب الله بيرد فى حيفا احنا لو انضربنا فى شرم الشيخ ولا القاهرة – لا قدر الله – مين اللى هيرد و فين؟؟؟ هم عندهم حزب الله بيحارب بجد و فيه أخد و رد لكن أحنا؟ هنحارب بحزب وداد؟ ماظنش ان وداد عندها صواريخ ولا بمب العيد حتى.
يا بلد طمنينا – يا وزير الدفاع احنا عندنا ايه؟ مركزنا ايه؟ لبس العسكرية أصبح راكور فقط فى الأوبريتات بتاعت أكتوبر ولا لسه ليه وجود ؟

ربنا لا تسلط علينا بذنوبنا من لا يخافك و لا يرحمنا و لا تؤاخذنا بما فعل السفهاء منا - آمين

Labels:

Sunday, July 16, 2006

بره و جوه فرشتلك ... !!ا

و كالعاده عشان الكلام يبقى على ميا بيضه من أولها :
لا ينكر فضل التكنولوجيا و التطور العلمى المذهل الذى يمن به الغرب علينا كل طلعة شمس الا كل جاحد فالتكنولوجيا لها الفضل فى التقائى بناس أفاضل أمثال حضراتكم و لها الفضل فى تخفيف الام المرضى المعذبين و لها الفضل فى تيسير التنقل من مكان لآخر و هكذا دواليب .. دواليب – ماشى؟

و لكن هناك ايضا سايد ايفيكتس (آثار جانبية يعنى) لهذه التكنولوجيا و ده كان موضوع لقائنا الأسبوعى أنا و صحباتى المفتكسات و احنا بنراقب العيال فى حمام السباحة و الشمس بتنقر فى نافوخ اللى خلفونا و على مايبدو ان الشمس سيحت فيوزاتنا و عملت شورت .
دار الحديث التالى:
فاتن: الله يلعن أبو التكنولوجيا .. أنا حقيقي مش ملاحقة ..
أنا : فيه ايه يا بت – من امتى كان ليكى فى التكنولوجيا دانتى كبيرك حلة محشى
هى: المنيل على عينو ( طبعا تعنى جوزها) تنو يزن يزن – عايزين كمبيوتر – انتى لازم تمسكى ايدك فى المصاريف شويه – اللى ميعرفش كمبيوتر يبقى أمى ( قطعت و قطعت سيرتها) و تنو يلف و يدور و يطبطب و يدلع (بموت فى نانسى) و فى ليلة مشئومة وجب معايا صح و بعدها أقنعنى انى أصرف نظر عن تنجيد الأنتريه و أخد الألف و خمسميت ملطوش بتوع الجمعية.
أنا : مانتى طول عمرك برياله .. ها و بعدين
سماح: طب أهو عالأقل وجب صح .. الدور و الباقى عاللى بياخد الفلوس و سايبنى أغنى ظلموه.
أنا : بس يا قوقا .. خلينى فى فاتن دلوقتى
فاتن : من كام يوم قلقت فى نص الليل - أبص الاقى الراجل وش الفجر قاعد قدام الكمبيوتر و بيقول بيعمل شاتنج و أبص ألاقى صورة واحدة شكلها على مايبدو صينية أو فليبينية – واحده من اللى عنيهم عامله كده وقاعد مريل عليها باينها فاتحالو كاميرا ولا ايه
أنا : ( بصفتى الناصحة اللى فيهم) آه دى ايشيان يا فاتن – طب لما جوزك بيحب الصنف ده لازم ترضيه و تحاولى تلبييو رغباته.
فاتن : ( تنظر الى اللا شئ باهتمام ) طب أنا ماشية بقى رايحة مشوار مهم.
بعد أسبوع فى نفس المكان
سماح : مش اللى جايه دى تشبه فاتن صاحبتنا
أنا : لأ طبعا دى شكلها شغالة فليبينية جايه مع عيال ولا حاجه
تقترب السيده : سلامو عليكم
أنا: مين فاتن؟ ايه اللى نيلتيه فى نفسك ده؟
فاتن : الله يخرب بيتك - شايفه آخرة افكارك الزبالة – دهولت نفسى و صبغت شعرى أسود نيله و سيحتو عند الكوافير و رسمت عنيا على فوق
أنا : طب و ايه النتيجة؟؟
فاتن : الراجل من يومها بيضحك ضحك هيستيرى من أول مايشوفنى و مش قادر يمسك نفسو و أنا بالعند فيه خربتلو الكومبيوتر – بس عندى مشكلة تانية
أنا : خير يا أمى؟
فاتن: تعرفيش بيبيعوا حصنه (جمع حصان ) فين؟؟
أنا : ليه ؟
فاتن : أصلوا اليومين دول مركز مع الديش و مشغللى طول النهار الفيديو كليب بتاع نجلا اللى بتحمى الحصان و عينيه طالعه عليها
أنا ( سحبت شنطتى بطريقة هيستيرية ماهى مش ناقصة قرف) : كفاية عليكى البغل اللى عندك ابقى اشترى خرطوم سته متر و حميه فى الجنينة.

Monday, July 03, 2006

قصة ولاّ مناظر ؟؟!ا




بقالى كام يوم و فيه سؤال بيزن و لامؤاخذة فى نافوخى شويتين كده : موضوع الرقابة عالأفلام فى بلدنا دى بيخضع لأية بالظبط :
أ- أسلوب تنشئة الرقيب و ميوله الدينية و الأجتماعية و الظروف بتاعته منذ الصغر و مووده العام أثناء الحكم على الفيلم
ب - ظروف البلد و الجو العام
ج - توجيهات عليا
د - توجيهات عليا جدا

شاهدت فيلم عمارة يعقوبيان : فيلم جيد: سيناريو و حوار و تصويرو اخراج و متكلف و نجوم غالية و كله فى الأوكى ( أنا مش متخصصة) و لكنى أنا الشعب – ومن حقى أنقد لأنى أنا التارجيت و هتكلم بفلوسى:
شاهدت خير اللهم اجعله خير شوية مناظر يا جدع – و لا حول و لا قوة الا بالله – فيهم الخلاصة.
بيقولوا اننا أخيرا انضمينا للجانب المتحضر من العالم و اتقتحت لنا أبواب العالمية .. ليه؟؟ لأننا بدأنا نكشف المستور عرينا المجتمع .. زغرطوا يا حبايب أتعرينا !!!ا
هو أنا بحلم – لأ ده مش حلم ده كابووووووووس
كابوووس ليه ؟ده فيه موسيقى تصويريه جميله – و بيقولوا تقنيه عاليه (مانا ماليش فى السينما) بس فعلا الفيلم شكله حلو صناعيا – بس يا حزنى عالمضمون
ليه احنا دايما بنفتح البرميل من الناحية الغلط – دايما ناخد القعر و نسيب وش القفص .
فيلم بيظهر وساخات المجتمعات جمعـــــــــــاء مجتمعة فى عمارتنا – عفوا بلدنا :
خيانة – شذوذ – عقوق – تصابى – اقطاع – احتكار - مخدرات – ارهاب فكرى – ارهاب دينى - تعسف سلطه
يا خبر اسود و منيل – المفروض يعنى ان دى كده سينما الواقع؟؟
لاهو فعلا مصر بقت كده؟ لأ مش كده أوى مانا فيها و انتو كمان لسه فيها
جرى ايه يا علاء يا أسوانى – هيا ناقصاك انت كمان ؟؟!!
قفلتها و قعدت على تلها يا فنان ؟؟ حطيت صباعك و لا مؤاخذه عالجرح طب ماتسيبش الجرح مفتوح و بينز - عالأقل بوس الواوا يا عم علاء خللى الواوا تصح - و أقترح علينا حلول
ايه كم السواد ده؟ هى المشرحة ناقصة قتلى ؟؟ ستات زفت – رجاله زفتين
ستات تحت رجاله و رجاله تحت رجاله و اللى مزنوقة فمخزن و اللى فبير سلم و اللى بدقن و اللى بدبوره
- هى دى مصر يا عبلة ؟؟!!

نرجع للسيد الرقيب و على أى أساس بيسمح بعرض المناظر المعروضة و بناءا على ايه!!ا
فيه حاجة أسمها الرموز – يعنى مثلا : بنشوف المطره بتنطر و البرق و الرعد يشتغلوا – أو الموج بيرزع فى الصخر يعنى حصل اللى حصل و الناس بتفهم و حلو كده
أو الراجل و مراتو بيدخلوا اوضتهم و نور الأباجورة ينطفى يبقى حصل المراد
ايه بقى الفن و العبقرية انك تجيب المواضيع بالمفتشر كده ؟؟ ماحنا عارفين كل الحاجات من كتاب البيولوجى بتاع تالته أعدادى - كل حاجه وهى مش ناقصة – ماكفاية القنوات و السايتات المستورده لازم المنافسة المحلية ؟؟ يعنى لازم تقضوا على مفردات الحياء والدين و العفة عند الشباب ؟
مش كفاية جملة للكبار فقط اللى ملطوعة عالأفيش زيها زى التدخين يسبب الوفاة – قطيعة عالشكليات .
يا عم على يابو شادى يا بتاع الرقابة : الدخلة بتاعتك كانت شديدة علينا قوى – مش المجتمع بتاعنا ده اللى تعرض له الفيلم ده بالمشاهد الصادمة دى و تقوله اسقاطات سياسية و ركز فى المضمون و سيبك من الشكليات –
احنا مجتمع مقفول واخد عالرموز – أما المناظر اللى سمحت بيها جعلت الفيلم يندرج تحت تسمية : فيلم ثقافى بدليل انو لو سيادتك حضرت العرض فى السينمات العادية اللى مفيهاش متخصصين و بعيدا عن المهرجانات – كنت هتسمع بودانك التعليقات و القفشات و الضحك الهيستيرى (خاصة مع مشاهد حاتم رشيد ( الشاذ) و هو بالجلابية ) لعيال مغيبة و بعيدة تماما عن الأبعاد السياسية أو الأجتماعية و اللى بيمثلوا بتاع 80% من مجتمع الشباب
يعنى فكرتنى بالظبط بواحدة لابسة مايوه ماشية فى شارع قصر النيل الساعة أتنين الضهر – أبو مين ده اللى مش هيبحلق فيها و هيتصرف بهمجية معاها و يحسس و يعتذر !! فى حين أن الست دى نفسها لو مشيت فى الشانزليزيه بنفس الملابس و فى نفس التوقيت ممكن اتنين تلاته (من أصل عربى) هما اللى يرصدوها.
وحيات أبوك ماتخلطتش عيشا على أم الخير و تجيلنا من فوق لو العين على ايرادات الشباك - بلا ليبرالية بلا بدنجان .
القصد يا عم على : لكل مقام مقال و كل برغوت على أد دمو – عايز ترتقى بفكر الشباب يبقى دنجه دنجه – دالعيال ليلاتى بيحلموا بسوق العيش - نوكلهم الأول و نشبعهم و نجوزهم و نملى عنيهم و بعدين خش بالأفلام العالمية و الأسقاطات و الأتجاهات السياسية يا عسلية .
هزها بشـــــويش بشـــــويش خلى الشعب يعيييييييييييش
يا عاـــــــــــــــــــــــــــــــــــــــــى