أيوه خدامه

Friday, May 26, 2006

أيوه خدامه

هو فيه ايه؟؟ الله يخرب بيت الجواز لبيت اللى بيتجوزوا .. دى بقت حاجة تقرف.
البنت من قبل ماتبلغ الحلم و هى كل اللى فدماغها الفستان النيلة الأبيض و الطرحة و كل أحلامها فى اليقظة و المنام الراجل اللى حتتنيل و تتجوزوا و الست من دول أول ماينكسر فى أيدها قرشين تجرى تجيب طقم الصينى و الأركوبال للبت أم تلات سنين.
بردت نارهم و كتبوا الكتاب و ضربو النار و قالوا لابوها ان كان جعان يقوم يطفح و الذى منو و شافت اللى كان نفسها تشوفو – ماشى كده؟؟؟؟ و بعدين ايه ...
و بعدين تتحول المدام من دول ( ماهى كان نفسها فى اللقب ده من زمان) الى شئ هلامى لا يمكن توصيفه تحت أى كاتيجورى :
كل صباح يا فتاح يا عليم تلبس أى حاجه من قعر الدولاب و طيران عالشغل و هى بنص دماغ – مواصلات أو عربيتها أو شعبطه فكل الركايب تؤدى الى روما
بعد الدوام تجرى طايره يا حبة عينى عشان تلحق الغدا بتاع اللافندى و لو كان فيه حتة عيل أو اتنين فتلمهم فى سكتها من عند أمها أو من حضانة الأيواء ثم تدلف الى سوق الخضار تجيبلها كيلو بسلة و فرخه و طيران عالبيت بهدومها و عرقها عالمطبخ لأن الباشا فى طريقه الى العش الجميل – لا لحقت تغسل وشها و لا تتكلم مع عيل و اللى هايقولها أى حاجه مصيره قلمين أو شبشب طاير
يدخل الوحش فين الغدا – لسه عالنار؟ دانا على لحم بطنى من صباحية ربنا و هى ياعينى بتحايلو معلش يانظمى سوانى و هيكون جاهز بعذنها لسه مخلصه سيشن المساج اللى بيرخى العضلات
ياكل سى نظمى و يتكرع و يدخل ينام و مش عايز أسمع حس حد من عيالك انتى فاهمه؟؟ من عينى يا خويا يالا ياعيال نتحبس فى الحمام لحد ما يصحى !!!
صحى الباشا : فين الشاى؟؟ ماتقوم يا فندى تعملو لروحك دى الوليه من ساعة مانمت و هى حمت و غسلت المواعين و غسلت لبستك و نشرت و رضعت و ذاكرت للواد الكبير و انت قافل على روحك و مشغل التكييف و بتحلم فى الظلام
القصد يقوم من النوم و يروح يتصرمح و المسكينه ماعندهاش قله تكسرها وراه بس أكيد انها سوف تلحقه باللفظ المتداول بيننا معشر النسوه : غور داهية لاترجعك و تخلصنا منك
و يرجع الباشا الساعه اتناشر من أى مصيبه : قهوه , نادى , أمه , عزا , واحدة تانيه ...... المهم انه عمل اللى هو عايزو وراجع يكمل عالفرخة المسكينة اللى لا يمكن تقدر ترفع أى حاجه حتى حواجبها و يبدأ فى المطالبه بحقوقه الشرعيه – نهار أسود ماحنا عارفين انها شرعيه بس فين الأنسانية؟
و كالعاده تنتهى القصة انها زبالة و مابقتش رومنسيه ...... طب منين يا دلال؟؟؟ و كل ده بربعميه و خمسين جنيه فى الشهر و مفيش حتى 10% أول مايو
بصو بقى احنا بصراحه زهقنا من النداءات الأنسانية بتاعت القناة التالته و الأستغاثات للسيد وزير الداخلية و نتف ريش الرجاله فى المحافل النسائية الخاصة .
الله يلعن أبو نظمى و اللى على شاكلته – بصو يا ستات أنا هطلق – و مالو الطلاق ده حتى موضة شتاء و خريف 2006 و ناوية أشتغل خدامه .. أيوه خدامة على رأى لبنى عبد العزيز فى غرام الأسياد .
دى الخدامة ستى و ستك هاروح أشتغل عند أسره صغيره بسبعميت جنيه واكله شاربه نايمه محترمه – يستجرى حد يفتح عينو فى الخدامه دى كات بهدلتو – يستجرى حد يقولها كسرتى الماج بتاعى ولا حرقتى لى القميص يا ست يا عره – يستجرى حد يقولها هتجوز عليكى لأنك ست كسر؟ و هاخد يوم الجمعه داى أوف مانا معايا سبعميت جنيه بوكيت مانى أقابل صحباتى سمر و ميرفت و نروح الكافيه بتاعنا نديها لاتيه و تشيز كيك و احنا هوانم و أمرمط بكرامة الويتر الأرض –بفلوسى يا كلاب – أما المحروس نظمى فناوية اسيبو مع العيال أهو برضو أولى بلحمه.

Labels:

59 Comments:

  • At Friday, May 26, 2006, Blogger Ahmed Shokeir said…

    مبروك المدونة الجديدة

    ده إنتي حقنة بحق وحقيق .. بس براحة ع الرجالة شوية مش من الاول كده ضرب نار

    ده انتي بوست والتاني وكله هايكون متطلق ، وبعدين باين عليكي معبية وشايلة من زماان .... تريبل برده

    الله يخرب بيتك يا نظمي هاتقوم علينا الستات ، ماتقوم تعمل الشاي بدل ماتجيبلنا الكلام ولا إنشالله ماطفحته

     
  • At Saturday, May 27, 2006, Blogger adhm said…

    نظمى بيسلم عليكى وبيقولك
    اية اللى كان مشحتفك على الجواز من الاول
    ولزمتة اية تروحى انتى وماما افراح المعارف واللى مش معارف يمكن ربنا يسهل وتنزاحى من فوق دماغ بابا اللى طلعت روحة علشان يوقع سى نظمى اللى مش عاجبك
    ولية ما عرفتيش نظمى على حقيقتة الا بعد ما مضى على القايمة اللى بالشىء الفلانى
    عموما
    كلمة اخيرة
    اللى يحبنا مايضربش نار فى فرحنا علشان العروسة حامل وان اللة حليم ستار

     
  • At Saturday, May 27, 2006, Blogger littilemo said…

    هع هع
    صحكتينى يا بنت الايه

     
  • At Saturday, May 27, 2006, Anonymous Anonymous said…

    إبنتى العزيزه
    من زمان لم أضحك بنفس الطريقه ؛أنا باتخيل بنتى وهى عندها ولد وبنت وبتتكلم مع صديقاتها بنفس طريقتك ؛ وطبعاً لن أعطيها عنوان البلوج بتاعك رغم خفة الدم اللى فيه لحسن تبقى كارثه لو رجعتلى البيت تانى ؛ والغريب إن اللى بتقوليه على نسبه عاليه من الأزواج صحيح
    ربنا يوفقك

     
  • At Saturday, May 27, 2006, Blogger shady said…

    هى فعلاً عيشه تقرف الكلب الجربان
    وبصراحه الست اللى بتشتغل مفروض جوزها يلم نفسه ويعرف إن الروس اتساوت
    وحقه الشرعى ده كان زمان يا مشمش

     
  • At Saturday, May 27, 2006, Blogger ماشى الطريق said…

    هو إنتى بس اللى شايلة أوى كده من جوزك ولا كل الستات
    علشان لو كده خلاص مش عايز اتجوز

     
  • At Saturday, May 27, 2006, Blogger CAESAr-DIABLo said…

    هههههههه ..بصراحة تدوينة حلوة اوي .. وعندك حق في كل اللي انت قلتيه .. المشكلة ان البنات هم اللي بيدوا الفرصة لنظمي انه يعمل كده .. ولازم كل بنت تفوق من اوهام الجاهلية دي بقي و تعرف انها انسان زيها زي الراجل وممكن احسن ..بحكم مشاعرها و إحساسها .. بس طبعا لا حياة لمن تنادي

     
  • At Saturday, May 27, 2006, Anonymous ماما said…

    الاول ممممممممممممممممه بوسه كبيرة والف مبروك على البلوج الرائع، بجد ضحكت جدا وانا من زمان ماضحكتش كده، ونفسى تكتبى يومياتك مع نظمى اللى هى يومياتنا كلنا تقريبا مع فروق طفيفة...
    بس عندى ليكى سؤال انتم حتقعودوا فى اى كافية لانى ناوية انضم لكم، وابقى اسالى لى الهانم اللى حتشتغلى عندها مفيش واحده فى صحباته عاوزة خدامة بس ياريت من اللى بيكونوا بيقضوا الصيف فى مارينا او اى داهيه فى الساحل( بلاش اوروبا انا متواضعه) اهو منه نشتغل ونصيف برضه وابقى شفت معاهم اللى عمرى ماشفته، بالذات مارينا وتبعاتها اللى ابن ... كان مفهمنى انها محمية طبيعية واللى بيروحها بيجى له جرب...
    تحياتى ياتمر حنه سابقا وايوة خدامه حاليا...

     
  • At Saturday, May 27, 2006, Blogger 451 فهرنهايت said…

    مبروك ع المدونة
    كل دة؟!!!0 ... نجحتي في أن تجعليني أكره نظمي الكسول المرفه ذو القلب العنيد , والكف الحديد .. ع الخدود يهفهف
    ربنا يستر على الأزواج من كم الغل اللي كونته زوجاتهم تجاههم
    ويارجال العالم .... ارتجفوا

     
  • At Saturday, May 27, 2006, Blogger sha3'af said…

    هههههههههههههههههههههههههه

    دي عبرة لمن لا يعتبر

    للبناااااااااااات اولا واخيرا

    لو يفكروا شوية قبل اقتحام خطوط النار المسماة بالزواج!!!!!!!!!!

    أنا -على فكرة - هاأخبي المداونة بتاعتك في لينك عندي ، عشان لما آجي أتخانق تاني مع ماما ، يبقى ده سلاح جديد - فريد من نوعة - أقدر أبرزهولها

     
  • At Saturday, May 27, 2006, Blogger haybaaaaan said…

    يخرب بيت نظمي اللي زعلك ده و يخرب بيت اي حد يزعلك انا عامه ماسميش نظمي ولا ناوي اتجوز
    منك للع عملتيلي رعب بس الصراحه عجبتيني و لا يهمك بلا نظمي بلا بتاع هو ده اسم اصلا
    اال نظمي اال

     
  • At Saturday, May 27, 2006, Blogger Ø²Ø¨Ø§Ø¯ÙŠ said…

    أولاً مبروك علي البلوج اللي ح يولع الدنيا دة .. انا كنت جاي اهدي النفوس لكن الظاهر كدة الموضوع كبير والكلام علي الرجالة كدة مش ولا بد .. ويظهر كدة اننا ح نبتدي نفتح ملف الستات اللي في البيوت بس من نوع نظمي كدة .. خليها تولع ولازم نجيب لنظمي حقه لأنه إتمرمط خالص

    تحياتي للبوست الجميل ابو دم خفيف

     
  • At Saturday, May 27, 2006, Blogger Mr Mozz said…

    Ha ha ha,

    I stopped writing a while ago because I was feeling awful, but never stopped reading and was still feeling Awful.

    Then I saw you post and I stopped it, I now feel fine, Happy somehow. Thanks a lot, Keep it up.
    Cheers

     
  • At Saturday, May 27, 2006, Blogger KareemFromEgypt said…

    nice post

    keep up the good work

     
  • At Saturday, May 27, 2006, Anonymous Anonymous said…

    حلووووووووووووووة فشخ
    بجد ضحكتينى
    فعلا هو ده تصورى عن الجواز واللي بيتجوزووووووووووه
    ملعون ابوك يا نظمى
    واحا بالقوي

     
  • At Saturday, May 27, 2006, Blogger Geronimo said…

    مبروك على البلوج الجامد

     
  • At Saturday, May 27, 2006, Blogger change destiny said…

    ما هي لو من الأول اديت نظمي بالجزمة و عرفته انها بني آدمة زيها زيه و انها مش محتجاله و متشحتفة عليه مكنش كل دة حصل

    أصل بعيد عنك من يوم ما اتولدت و هما بيقنعوها انها من أول يوم لآخر يوم في حياتها حتفضل قاصر ... و هي حتى لو اتعلمت و اشتغلت و استقلت بتفضل مقتنعة بكدة .... لكن لو بصيت حوليها حتلاقي نفسها بني آدمة و حترمي نظمي في الشارع و تعيش حياتها

    اطلقي يا بنتي ولا يهمك ... بلا هم

     
  • At Sunday, May 28, 2006, Blogger islam yousef said…

    الجواز ستره
    مش برضه كده؟

     
  • At Sunday, May 28, 2006, Blogger still breathing said…

    hehe the comments r as good as the main post...
    i'm not planning to get married and u just confirmed my theory even more.

    keep the ball rolling :)

     
  • At Sunday, May 28, 2006, Blogger ميشيل حنا said…

    خدك ربنا يا نظمي.
    قادر يا كريم.

     
  • At Sunday, May 28, 2006, Blogger أجدع واحد في الشارع said…

    الله والله مفيش اجامد من كده
    مبروك على البلوج ده

     
  • At Monday, May 29, 2006, Blogger حــلم said…

    مبروك البلوج
    يا رافعة راية المرأة المظلومة

    بس سؤال صغير

    هو دة اللى بتقوليه فى وش نظمى
    يعنى دى لغة حوار فى البيت

    وللا هو لغة حوار داخلية وتنفيس

    أصل لو انت بتكلميه كدة

    هاستغرب انك جبتى عيل واتنين وما اتطلقتيش من زمان

    بصى

    كلنا معبييييين اوى
    بس اهدى كدة وروقى
    وما تخليش الدنيا سودة قدامنا اكتر ما هى

    لونيها شوية
    :)
    بدل ما اولادنا كلهم يبقوا من اولاد الشوارع

     
  • At Monday, May 29, 2006, Blogger ام المريله الكحلى said…

    انتى تحفه
    عسل موووت
    وبجد تعرفى عندك حق كل البنات (سابقا)الستات حاليا بيقولوا نفس الكلام
    لا اله الا الله
    طب نتجوز ليه على كده بقى
    بس تعرفى كل واحده منهم بتفتكر انها هاتكون حاجه تانيه
    احلى حاجه بقى ان اللى تقرا المدونه دى هاتعرف انها ولا هاتبقى تانيه ولا تالته
    ومسيرها فى الاخر تطالب بعلاوه
    او .....تشتغل خدامه
    ولا عزاء للانسات
    -------------
    مبرووووك

     
  • At Tuesday, May 30, 2006, Anonymous أزئوزة said…

    تمر حنة
    وانا بائرا المدونة بتاعتك إنتي والمخفي نظمي ،و فاتحة جنبي إذاعة الأغاني ، لئيتلك ياشابة سي محمد رشدي بيئول إيه ؟ بيئول : ئلبي يائلبي يابو الحيارى ، والله لاعملك شارع وحارة . مش عارفة ليه حسيت إنه له علاقة بيكي !!! تكونيش بتحبي نظومة نظمظم ؟ واللون دة كله مجرد حركات ؟
    دي نئطة . النئطة التانية ، ومعلش هتستغربيها شوية .... بأة تمر حنة تصاحب سمر ومرفت؟ أمال كيداهم و نبئة يصاحبوا مين؟

     
  • At Tuesday, May 30, 2006, Blogger النوبى said…

    اولا مبروك على البلوج المولع

    وعلى فكره انتى عندك حق فى الكلام الى كتبتيه واكيد انتى مريتى بتجربه صعبه جدا

    بس ملحوظه

    لو كل الرجاله كده كان على الاقل كل واحد فينا هيكون ابوه وامه مطلقين بعض

    ومش هتكون فيه حياه وكلمه اسره هتنقرد من كل الواميس الى عرفناها

    ياريت تخلى املك فى ربنا كبير وبلاش حكايه الخدامه لانك اكيد مقامك اكبر من كده


    وسبيلى نظمى ده وانا اخليه عيشه

     
  • At Tuesday, May 30, 2006, Blogger قلم جاف said…

    أنا برفض إن البنت تبقى خدامة لجوزها ، لكن في نفس الوقت أرفض إنها تعامله على إنه خدام أبوها!
    والنماذج دي موجودة ، ودي موجودة .. والاعتدال بيتوه في النص وبنعرفه وبننكره..

     
  • At Wednesday, May 31, 2006, Blogger manora said…

    الف الف مبروك على البلوج ده
    صراحة مشفتش حد ولع كده من اول بوست
    الله اكبر عليكى يا ستى
    وبلاها نظمى الى مزعلك ده
    و ان كنت متفقه مع الى قال انه ممكن يكون حب متدارى
    اكتر منه كره بجد
    وعلى رايك الطلاق فعلا موضه الايام دى

     
  • At Wednesday, May 31, 2006, Anonymous Anonymous said…

    This comment has been removed by a blog administrator.

     
  • At Thursday, June 01, 2006, Blogger daktara said…

    خدامة خدامة بس اعيش

     
  • At Thursday, June 01, 2006, Blogger hesham said…

    اولا يا ستى مبروك على البلوج الجامد ده
    اللى اتوقعله نجاح باهر

    بس تعالى هنا
    مش كل الرجالة نظمى ولا كل الستات خدامات
    حتى لو كان النموذج ده منتشر
    اكيد فى نماذج تانية الراجل فيها بيساعد مراته و بيقدر مجهودها ومشاعرها

    انا لسه ماتجوزتش ولا ارتبطت
    بس لو حصل عمرى ما هاعامل مراتى بالاسلوب ده
    و لو على الشغل تسيبه و ترتاح فى بيتها وتتفرغ لبيتها طالما مافيش حاجة مادية ملحة
    اما بقى لو صممت تشتغل من منطلق
    المساواة و الراس بالراس
    فخلاص
    تشيل بقى وتستحمل
    وكل ده لازم يبقى بالاتفاق فى الاول و قبل الارتباط
    و اللى اوله شرط اخره نور
    والعقد شريعة المتعاقدين

     
  • At Friday, June 02, 2006, Blogger عاشق الليل said…

    This comment has been removed by a blog administrator.

     
  • At Friday, June 02, 2006, Blogger عاشق الليل said…

    This comment has been removed by a blog administrator.

     
  • At Friday, June 02, 2006, Anonymous sanka follah said…

    enti we2e3ti walla el howa elli ramaki .. walla yabini mana shayefa..wallahi ana mesh mesada2 en el kalam dah be7sal 3ala wa7ada masreya..kolena 3areef en el sawateer betishta3'al wa2t el lezoom

     
  • At Monday, June 05, 2006, Blogger Me2 said…

    ده غير إن نظمي قاعد قدام الكمبيوتر ليل نهار ولو مسك مفك ربنا يستر عليكي و على الجيران ولو خلص فنجان القهوة اللي قدامه من غير ما يتحط واحد بداله يبقى قامت الحرب العالمية ولو التلفزيون اللي شغال عمال على بطال و مش بيشوفة إتغيرت القناه فيه يبقى ليلتك كحلي و غير كده متمسكيش التليفون و متخرجيش من البيت إلا وهو موجود و إبقي قابليني إنك تشوفي الشارع إلا كل 3 شهور علشان تجيبوا التموين .. مش خروجة تبوسي إيديكي عليها وش وظهر

     
  • At Wednesday, June 07, 2006, Anonymous Rania said…

    يا سلااااااااااااااام.انتي فين من زماااان.بس الطلاق مش حل يا حلوة.الحل دعوة كدة لربنا يصلح لنا الاحوال.بجد بجد بجد ضحكتيني. استمري.علي راي المثل:اللي يشوف بلاويالناس تهون عليه بلوته

     
  • At Wednesday, June 07, 2006, Anonymous Anonymous said…

    كل الناس ضحكت على ايه؟؟
    دي بت بضان وسافلة
    العيب على ابوها اللي معرفش يربيها وجوزها الخول اللي معرفش يقطع لسانها

     
  • At Friday, June 09, 2006, Blogger Maat said…

    looool
    hahahhaha

    bosy 3amatan ana 3andy khetta mabda2eya f mawdoo3 el gawaz dah, law fe3lan etgawezt f yom men el ayam, w law tele3 bel manzar dah (w dah tab3an e7temal kebeer) i'll figure out a way to get him killed...i won;t kill him...7aram....bas han2eto la7ad maymoot, fe aswa2 el zoroof law ma3reftesh akhaleeh ye2abel wagh kareem hakhla3o. w ba3deha haroo3 a3od fel nady ma3a as7aby neshrab 2ahwa w sagayer....wala balash sagayer, ana bakhaf 3ala se7etty.

     
  • At Sunday, June 11, 2006, Blogger Sarwa said…

    ده انتى مصيبه
    نظمى صابر عليكى لحد دلوقتى ليه
    لابجد انتى هتللكى,متخلعى امه وربنا يخليلنا محكمه الاسره

     
  • At Wednesday, June 21, 2006, Blogger ايهاب العدل said…

    قلة الأدب هى أقصر الطرق للشهرة وقد اخترتي بالفعل اقصر الطرق

    يمكن دمك خفيف ويمكن دكتورة بجد ومتجوزه بس الأكيدانك قليلةالأدب

     
  • At Monday, June 26, 2006, Blogger Elsede3' said…

    looooooooooooooooooooool
    wALLAHi heyya shoota we gat fel blogat kolaha
    elnas kolaha betetkalem 3an elgawaz mesh 3aref leeh
    fokeek...gawaz eih we neelet eih...leeh ya3ny we 3shan eih???3shan el7ob???bala 7'ara
    3shan el...gettng physical ya3ny???elnet mezabata elgamee2...welly mazabatetoosh elnet, zabato elly anyal men elnet
    bala ham

     
  • At Saturday, July 01, 2006, Anonymous Anonymous said…

    بغض النظر عن المعجبين والساخطين واضح كلامك من قلبك جدا!! كان الله في العون
    عارفة الزعلانين زعلانين ليه؟ عشان مش لازم حتى نشتكي لأن الشكوى تجرح آذانهم وتعكر صفو المزاج فالحل اشتغلي من سكات ولو كان عاجبك
    انا مثلك مش عاجبني أبدا لكن ما أهون من يستطيع الفكاك من حمى استغلاله بالطلاق هناك حالات لا يحررك من هذه العبودية إلا رحمة رب العالمين
    نقي يا أختاه واشتكي نحن من وراك نزيد على الملايين
    ضحكنا من غلبنا لأن شر البلية ما يبكي قال مش مؤدبة!! عشان بتشتكي تحت اسم مستعار تنثر كلامها في الفضاء لعيون لا تملك لها حتى الدعاء انما إيه لابد من أن يؤدي المجمتع دوره ويذبحنا حتى آخر قطرة دماء
    الله المستعان وانا طول عمري بحب التمر حنة اللي بجد فاختيارك للاسم موفق

     
  • At Saturday, July 01, 2006, Blogger mshayal said…

    well all ur posts are damn good and o yeah funny however ur type worse than nazmy yours or at least u become like him
    onething more gulf gurl try to add some more respect to what u write ,it will make it more valuable

     
  • At Sunday, July 30, 2006, Blogger الساحر said…

    يخرب البيت النسوان اللى من عينتك يا شيخة
    دا احنا فى خطر حقيقى

    لا وانتى الصادقة الظاهر ان احنا اللى هنشتغل خدامة

    واسترها يارب من الحريم
    زمان كان فى سواطير
    يا ترى بتجهزو اية

     
  • At Sunday, July 30, 2006, Blogger الساحر said…

    وعلى فكرة فى ستات كمان العن من نظمى
    خدى عندك
    دى حقيقة

    واحد ورطوة فى جوازة عائلية
    شكلها اعوز بالله
    فترة الخطوبة حس ببوادر خنشرة
    كدب نفسة
    وقال حرام بكرة الجواز والحب
    يعدلها

    واتنيلو

    اقولها

    مافيش حاجة اسمها طبيخ
    تانيها يشترى الاكل اللى على مزاجها

    تالتها مش عاجبها الاكل اللى بيحبة

    حد كان قال لاهلك تاكلية
    هب تلكيكا

    ولمت اهلها اللى صمموياخد شقتة فى نفس الشارع اللى ساكنين فية

    شفتو التخطيط

    هب العلقة التمام

    وعلى امك يامرسى

    يا لهوى المدام حامل فى تؤام

    العيال

    عافين قالت اية

    ما يتولدو هديهملك فى كيس اسود

    واتولدو

    تؤام

    هية وبعدين

    اتلم الشمل عشان خاطر التؤام

    وكانت الكارث

    الخلفة المنيلة

    المدام بعد التؤام

    خلف بعد سنة ثلاثة فى بوكيت واحد

    يعنى المدام المفروض ترضع خمسة

    وطبعا مع مفترية زى دى

    المحروس هيرضع بدالها

    دة طبعا جزء من كل لا لوقت لذكرة

    واسترها علينا يارب

     
  • At Saturday, August 05, 2006, Anonymous RADWA FOUAD said…

    BOSSY BA2AA....ANA MAGNOOONA ZAYEK WE AKTAR.....BASSS KEFAYA KALAAAM....SEBBEEEEHHH...MAL3OOON ABO OMNMMMO....EL GAWAAAZ EBN SETEEEN KALB....WANA TOOOL 3OMRY A2OOOL KEDA...ANA ETGAWEZT...BASSS DY KESSA TAWEELA AWY...GOOOOZY..BANY AAADAM BEMA3NA EL KALEMA...BEGAD....ENSAAAN....LAKEN BARDO..EL GAWAAZZ ABR LE AY WAHDA....SEBEEEE...WE BALASH KALAAAM KETEEEER....BASS BRAVOO 3ALEEEKY ..I LOVE IT

    RADWA

     
  • At Sunday, September 03, 2006, Anonymous Anonymous said…

    والله فرحان بيكى يابنت بلدى


    كل التقدير والاحترام


    وتحيه خاصه لقلمك الحر الجرئ

     
  • At Friday, September 22, 2006, Anonymous Anonymous said…

    This comment has been removed by a blog administrator.

     
  • At Sunday, January 28, 2007, Anonymous Anonymous said…

  • At Thursday, February 15, 2007, Anonymous Anonymous said…

    Hi. Use this BD search Find all you need in your area!
    for fun

     
  • At Friday, February 16, 2007, Blogger Blank-Socrate said…

    اكيد دا مرفوض و معاناه و دا مش انسان يا ريت الكل شاب او فتاه يحاول ان تركيزه فى الاختيار يكون على الانسان مش امكانيات الانسان الماديه ليه الانسان يعيش كحيوان ناطق الفترة الطويله دى من العمر يا ريت كل اللى لسمه متدبسش يفكر مره و اتنين انا كدا ممكن اتجوز واحدة سيئه تدمرنى كل مخها فى نشترى و عاوزين و رفاهيه و تكون فارغه من جوة و حتى مشاعرها مش انسانيه حتى لحظات الحب تكون زى ما بنشوف و سورى فى الكلمه عاوزة اكشن تفاعل بدنى مش روحى المشكله مشكله انسان سواء ذكر او انثى لكن الظروف هنا فى مجتمعنا خلتكم مظلومين اكتر شويتين اســـــــــــــف للاطاله

     
  • At Wednesday, February 21, 2007, Anonymous Anonymous said…

    Hello. Use this search engine for best result: TFOsearch Find all you need in your area!
    Enjoy

     
  • At Saturday, June 09, 2007, Blogger روح الفؤاد said…

    اذيك يا تمر حنة
    الصراحة انا بقالى كم يوم بتصفح فى مدوناتك وبنزل منها عندى بالمنتدى طبعا جميع الحقوق محفوظة لتمر حنة المصريه وطبعا ما تتخيليش انا مبسوووطة كتييييييير بالروح المصرية وخفة الدم المصرية وبالرغم من انى مصرية لكن مش عارفة ابقى ذيكم كدا
    خفيف تعليقاتكم ومصطلحاتك تجننننن
    مواضيعك جرييئة وهادفة وفى الصميييم
    مش هعرف اعلق على مدوناتك لانه ثقافتى على ادى ومع انى مصرية لكن روحى مش حلوة ذيك كدا يا عسلية وسلمى لى على نظمى وابو عيلاء وابو رحاب
    هههههه ماشى يا اوكة
    روح الفؤاد

     
  • At Wednesday, August 29, 2007, Anonymous انوشه said…

    سكر يا بت وزي العسل ايه الجمال ده والله عندك حق
    يعني بلاش اتجوز يا اختشي
    انا هعمل بنصيحتك وبلاش اتجوز انا طالع عيني دلوقتي امال لما اتجوز هعمل ايه بلا وكسه خليني كده احسن بس انت عسل يا توتو ربنا ما يحرمنا منك ابدا

     
  • At Sunday, November 11, 2007, Blogger بت خيخة وأى كلام said…

    تصدقى ان دى برضه الفكرة اللى دايما تيجى على بالى كل ما اعوز اطلق
    ايوة كنت هشتغل خدامة بس انا كنت اجدع منك كنت هاخد الف وخمسمية جنيه
    بس للاسف اتنيلت على عينى ورجعتله تانى بعد ما خلااص كنا اتطلقنا
    عمركيش شوفتى غباء اكتر من كدة
    على فكرة انا قريتكام بوست كدة واسلوبك جميل يا تمر حنة
    يلا سلام من اختك بت خيخة وأى كلام

     
  • At Wednesday, July 30, 2008, Blogger ستات موجوعة said…

    بوست من اجمل ما قرأت لإمراة مدونة

    نقلت البوست في مدونة ستات موجعة بذكر اسم المدونة واسمك

     
  • At Friday, January 09, 2009, Blogger Conquer worm said…

    الا من حق
    هوا لازم كل مرة اسمه يكون نظمى مفيش مرة يكون نظيم او منظم حتى.
    ياشيخة حرام عليكى حرام فى غلابة كتير برده واسمهم نظمى.
    مالاسماء كتيرة
    ماله سعفان خفى شوية وحيات ابوكى مع انه شخصية زبالة ونت ستين .........
    خلى الشخصية ثابتة والاسم متغير ومع السلام عليكو بقا

     
  • At Wednesday, June 23, 2010, Anonymous Anonymous said…

    To be a good lenient being is to procure a amiable of openness to the in the seventh heaven, an skill to group aleatory things beyond your own manage, that can take you to be shattered in uncommonly extreme circumstances on which you were not to blame. That says something remarkably important about the get of the principled passion: that it is based on a trust in the unpredictable and on a willingness to be exposed; it's based on being more like a weed than like a prize, something somewhat fragile, but whose mere special attraction is inseparable from that fragility.

     
  • At Wednesday, July 06, 2011, Blogger الكلمة نــور وبعض الكلمات قبور said…

    الناس اللى بتشتم فى صاحبة المدونة المفروض تبقى فاهمة ان دى ممكن واحتمال تبقى قصة أو خاطر خيالى ليس له وجود وتبقى شخصية نظمى من الخيال وبعدين ياللى بتشتم هو لسه فيه حد اسمه نظمى فوقوا يا بشر اقرا عاجبك اهلا وسهلا مش عاجبك يسيب المدونة واتكل على اللى خلقك عاوز تكتب نقد مرحبا بس بلاش الفاظ تجرح مبتعرفش تكتب غير بالشتيمة اللى هى اسهل طريقة للحوار يبقى مش ذنبنا يا معلم ذنبك انت .. انت اللى مبتعرفش تناقش

     
  • At Monday, May 20, 2013, Anonymous Anonymous said…

    أنا فقط أحب المعلومات مفيدة لك العرض على المواد الخاصة بك. وسوف المرجعية مدونة الخاص بك و اختبار مرة أخرى هنا في كثير من الأحيان . وأنا واثق إلى حد ما وسوف تعلم أشياء جديدة كثيرة هنا السليم ! حظا سعيدا لل التالي! فيما يتعلق

     

Post a Comment

Links to this post:

Create a Link

<< Home