أيوه خدامه

Monday, May 29, 2006

ينصر دينك يا أستاذ ................نفيسة

يحكى يا ساده يا كرام انه فى سالف العصر و الأوان ...
قام حريق فى حمام عام - غالبا كان موسم جرد ..
والستات اللى بيستحموا طبعا كانوا فى المغطس و آخر انسجام..
لما مسكت النار فى هدومهم المتعلقة و انفجرت الغلاية كالبركان ..
حصل حالة هلع و جريو شمال و يمين و عملوا زحام
شوية ستات هربوا عرايا إلى الطريق العام ..
و الشوية اللى اتكسفوا كلتهم النار و أصبحوا ركام
الناس اللى واقفه تتفرج فى الشارع قالوا : حقيقي اللى أختشوا ماتو – و ده آخر كلام
مش عارفة ايه اللى خلانى أفتكر الحكاية دى لما شفت هند الحناوى واقفة فى قاعة المحكمة و هى سعيده منتصرة فى حضن والديها
و الستات بتزغرررررررررد و أنا بعيططططططططططط
حاولت كتير جدا أتعاطف مع هند لأن الأيام دول و احنا عندنا بنات و محدش عارف المكتوب
و لكنها لم تعطينى الفرصة.
هند و والديها لم يطلبوا التعاطف أى حد – هما عملوا كامبين منظم تماما و لعبوا على أوتار معينه – منها حق الأنسان فى عرض وجهة نظره أيا كانت , حقوق الأنسان و الكلاب و من كان منكم بلا خطيئه, كفاية عالبت الحالة النفسية اللى هى فيها , حرية المرأه , حرية الفضائيات و سلملى على ايناس الدغيدى و أخواتها.
على ما يبدو ان هذه الأسرة الصغيرة لم تتأئر البته بالأفلام العربى القديمة التى حفرت نقر و زرعت مطبات فى وجداننا جميعا – البت من دول لما كات بتروح جونينة الأسماك خلسه مع زميلها عشان يشرحلها محاضرة فسيولوجى ولا يفهمها سكشن اناتومى و بالكتير يشربوا اتنين لمون كات يا حبة عينى ترجع البيت و وشها زى اللمونه و لا ينكن تبص فى عنين أبوها و تمتنع عن الطعام من فرط فداحة فعلتها – و لو واحد ابن حرام زنقها فى ميكروباص ولا نزل بيها الزراعات و حبِلّّّها – تفضل ترزع فى بطنها و تنط من فوق الدولاب عشان تنزل اللى فبطنها و ممكن تنتحر عشان محدش يعرف -مع ان اللى جرالها غصب عنها مش برضاها – على كده هنادى اللى خدها الوبا راح دمها هدر ياولداه
أما هند و اللى خلفوها فباتوا يحاولون اثبات حالة الوطء بكافة الطرق , و يجمعوا شهود الدنيا و الآخرة لأثبات ان الولا المنيل ابن الفيشاوى كان يعاشرها معاشرة الأزواج و انها كانت بتروحلو شقة أبوه حتى تقيم معه علاقة حميمية – أأأأأأحا- و السيد الدكتور والدها هو اللى كان بيلم لها الأدله و البراهين!!!!!!..
ايه الهباب ده انتو واخدين مصر على فين يا ولادها؟؟؟ للدرجة دى ؟؟ للدرجة دى ؟؟؟
أنصاف المتدينين أمثالى يعرفوا ان الحد الشرعى لثبوت واقعة الزنا على البكر هو الجلد أما الثيب فعليها الرجم – ماكنتش أعرف يا دكتور نفيسة ( حمدى سابقا ) ان مناسبة اثبات الزنا بيوزعوا فيها شربات و لا حول و لا قوة الا بالله.
أحمد الفيشاوى خرا و غلطان لكن الواد قال أنا لغوصت معاها و غلطت و ماتكلمتش الا لما البت فضحت نفسها الأول و جرجرتنى معاها – أنا سمعتوا بيقول أنا غلطان و كل ابن آدم خطاء – مهما كان زبالة بس اتعاطفت معاه – مالكل بيلغوص و بيستغفروا و يتوبوا الى الله – بس البت دى ( آه يانارى يندب فى عينها رصاصة هى و امها و أبوها) فضحت روحها و ربنا بيزعل قوى من اللى يستروا و يصبح هو يفضح روحو.
كل ده عشان السيد الأستاذ الدكتور كات نفسو عزيزة قوى و مارحش للعربيد فاروق الفيشاوى (هو اللى قال عليه كده) و ماستعطفوش وطلب ان الواد يكتب عالبت و يصلح غلطتو و الله حليم ستار – قال سيبوا بنتى فى حالها كفاية العذاب اللى هى فيه و انا هاخدلها حقها – و بعد ما أثبت نسب لينا (اللى مالهاش أى ذنب فى الليلة دى) رايحين يرفعوا دعوى طلاق من أحمد للضرر – شفتوش تعريص على ميا بيضة قبل كده؟؟؟ أديكو شوفتوه !!!!
ملحوظة للدكتور : الحل عند واحدة سمعت عنها باين بتشتغل قابله أو دايه اسمها نوال السعداوى بتكتب المواليد على اسم أمهاتهم ماكنتو تروحولها مالأول و هى تخلصكوا من المصاريف دى كلها – حاكم الطيور عل أشكالها تقع .

38 Comments:

  • At Monday, May 29, 2006, Anonymous Anonymous said…

    ايه جدعان عاملين تتكلموا عن الشرف
    عند ناس غلطت واعترفت بغلطها وسايبيين اللى كل يوم بيغلطوا
    كل بنت هي هند الحناوي
    ممكن تمشي الكورنيش
    والواد يقفش فيها في السيما
    ويسحبها بصنعة لطافة لشقة ابوه
    انتوا
    جايين عليها كده ليه
    ع الاقل هي بتقول اتجوزت عرفي
    لو مكنتش اتجوزت
    ففي علاقة
    وناتجها طفلة المفروض تنسب للبغل اللي عمل كده
    ولا كنتوا عايزينه يفضل يغرر ببنات الناس التانية كمان
    ويبقة لاحمد الفيشاوي كل يوم عيل غير شرعي
    وهي تسكت وتداري على فضيحتها
    وتجهض نفسها
    او تنسب البنت لواحد غير ابوها
    هتقولوا مكنتش تغلط م الاول
    طيب انا معاكوا
    بس هي غلطت واللي حصل حصل
    وكل يوم بنغلط
    وكل يوم في بنت مسحوبة لنفس الطريق
    والسبب قلة الجواز او الولاد اللى معندهاش اي مسئولية
    او الرجالة اللي عاوزين يعملوا فيها شهريار
    وكل يوم ينام مع واحدة وفي الاخر يدبحها
    ويروح في الاخر يتجوز الشريفة العفيفة
    ارحمونا بقة من الازداوجية دي
    تلاقي كل واحدة فيكوا
    كانت بتعمل كده قبل الجواز
    وكانت كل شهر تبقة قلقانة لا الدورة متجيش وتطلع حامل
    من كان منكم بلا خطيئة يبقة يحاسب هند واهلها

     
  • At Monday, May 29, 2006, Blogger أجدع واحد في الشارع said…

    انا مع الانميموس في كل كلمة
    متغاظة من ايه
    انا شاب وعارف كل البنات كده بس بيعملوا خضرة الشريفة
    واللى يعترف بغلطه احسن من الكداب

     
  • At Monday, May 29, 2006, Anonymous Anonymous said…

    فى مثل تانى بيقول: اكفى القدرة على فمها تطلع البنت لأمها.. وهند طلعت لأمها الدكتورة سامية والاستاذ نفيسة (عجبتنى دى قوى) المشكلة بقى فى لينا اللى مش حتختلف فى تصورى كتير عنهن مش بس علشان لأن دى العقلية اللى حتربيها ولا علشان عقدة "اللقيطه" اللى حتفضل تطاردها طول عمرها، ولا بس علشان شوال الوساخه اللى حتورثه من آل الفيشاوى بحكم الجينات الوراثية...
    ربنا يرحمنا وقادر يخيب ظننا، ويخرجنا من ام الدنيا دى على خير

     
  • At Monday, May 29, 2006, Blogger karakib said…

    مش فاهم انا هو ليه مش راضي يعترف بيها !!!
    ليه !!
    هاتجنن ليه بيعمل كده ؟؟
    طب هو غلط
    و هي غلطت
    العيله دي ذنبها ايه !!؟؟؟
    و تتفضح فالدنيا كلها كده ليه !!؟؟

     
  • At Monday, May 29, 2006, Anonymous Anonymous said…

    I agree to what the anonymous said as lots of girls do the same as but I also don't like what she did, she made a mistake, it's a fact, she could have kept a low profile instead of putting the story everywhere in the media. This is too vulgar.

    by the way, are you Dalia?

     
  • At Tuesday, May 30, 2006, Anonymous Anonymous said…

    سبحان الله أنا حاسة غن تمر حنة هي أبو الليل بس متخفي

     
  • At Tuesday, May 30, 2006, Anonymous Anonymous said…

    طب ممكن تطرحيلنا الحل البديل الأمثل من وجهة نظرك؟
    كان المفروض هند تروح لأيَتُها دَكتور في الخباثة ، وتجهض نفسها ؟
    ليه هو كمان مايتحملش الغلط معاها ؟ هما مش ناموا مع بعض ، لامؤاخذة؟ ولاَّ هند نامت وصحيت ترمي بلاها عليه؟ ليه النتيجة مانتشاركش فيها ، زي ماتشاركنا ف الفعل؟ هي مش جبانة وسلبية ، هي أنثى بتنادي بحق ، المفروض إنه متاح للجميع ، دون تمييز على أساس الجنس ( الجنس هنا ياأبلتي أئصد بيه النوع ، لحسن تفهميني غلط )

     
  • At Tuesday, May 30, 2006, Blogger Unknown said…

    والله هند وباباها ومامتهاوبنتها بجد صعبانين عليا جدا
    لو كانوا عايشين في اي بلد محترم كان هيتقدر موقفهم ومش هيتحكم عليهم بكل البهدلة دي
    الناس دول شرفاء بجد
    بمفهوم الشرف الحقيقي
    مش مفهومه المرتبط بحتة لحم في جسد كل بنت مش بيرتاح المجتمع غير لما يقطعها بسنانه تحت مرأى وسمع كل كدابين الزفة

     
  • At Tuesday, May 30, 2006, Blogger Ahmed Rashwan said…

    إلى متى سننصب أنفسنا آلهة وقضاة وجلادين على أهل الأرض أجمعين؟؟
    متى سننظر إلى أنفسنا؟؟
    متى سنفيق من الرغبة العارمة في نفي الآخر وجلده وحرقه وصلبه؟؟
    اتركوا الآخر وتوجهوا إلى أنفسكم يرحمكم الله

     
  • At Tuesday, May 30, 2006, Blogger قلم جاف said…

    مع احترامي للكل .. تمر حنة محقة في ما تقول..

    1-أنا مذهول إن فيه ناس بتقول إنها مثقفة وبتكون أسر على طريقة المدعو الحناوي.. المثقف يعرف حقيقة الأسرة ككيان له شخصيته ، ولكل فرد فيه مسئوليات وأدوار محددة كي تسير المركب بلا مشاكل..

    أنا لم أر أباً في عائلة الحناوي ، كما أني لم أر أباً في عائلة الفيشاوي..

    وربما حتى يرضي المحافظين قال وبكل بلادة وبعد صفارة الحكم أنه لا يقر هند في مسلكها ذلك..

    2-نيجي لحكاية السكشن والليمونة..

    الإعلام والفن كانا من الطبيعي أن يتناولا مثل تلك الأمور لا لشيء إلا لإظهار الواقع ليس إلا.. لكن الإلحاح الزائد حول تلك المسائل حولها إلى من واقع مرفوض إلى أصل مفروض..

    الحب (بمعناه السينمائي السطحي السمج) والمشي مع البنات بقى هو الأصل في الأشياء.. والبنت اللي ما تتحبش ولا حتى تتعاكس مشكوك في أنوثتها ..

    وعليه ، حتى ولو فيه أب بيقنع ، وأم بتحاور ، حيعمل إيه الكلام دة في ناس مش مقتنعة ان اللي بتعمله مشكوك في صحته إن ما كانش غلط؟

    مدونة جيدة جداً وعند مستوى الدعاية المصاحبة لها ، وهذه من المرات النادرة التي أرى فيها شيئاً على مستوى ما يقال عنه.. خالص تهانئي..

     
  • At Tuesday, May 30, 2006, Anonymous Anonymous said…

    يا أحلى مساء على تمر حنة بس ممكن أسأل سؤال عابر
    اشمعنى تمر حنة و ايه علاقتها بالخدامة

     
  • At Tuesday, May 30, 2006, Blogger Ahmed Shokeir said…

    حلو
    أنا اللي نقطني بأه في الموضوع مابعد النطق بالحكم ، الواد قال انا هاطلب الاحتفاظ بالبنت عشان العيلة دي مش هاتعرف تربي البنت عنده حق اذا كانت البنت المهندسة بتروح تنام معاه في الشقة وطبعا ولا زواج ولا زفت وكم من الاخطاء ترتكب باسم ياعرفي يبقى هاتربي البنت ازاي ،اما البنت عند ماما سمية فاكيد هايعرفوا يربوها فبابا الفيشاوي الكبير فالتقوى والصلاح باينين على جبهته والفيشاوي الصغير داعية رائع تدمع معه القلوب وبيأكد انه اقام علاقةجنسية معها بس في الحرام من غير جواز وكإن دي حاجة تشرف ودي كلها حاجات تؤكد انهم هايعرفوا يربوها، امال لو ماكنتش متدين ياروح ماما سمية
    بصراحة الموضوع كله مقرف ولك الله يالينا يابنت حواء وآدم

     
  • At Tuesday, May 30, 2006, Blogger شغف said…

    حسبي الله ونعم الوكيل!

    ربنا يرحمنا م الناس اللي بيعرفوا " يلبسوا الحق بالباطل " بمنتهى البساطة والوقاحة
    ويتقال عنهم في الاخر شجعان ومثقفين / لا ومطلوب التعاطف معاهم كمان!

    وفعلا احنا مش مفروض اننا ننصب نفسنا قضاة وجلادين ، لكن لما حد ييجي بكل وقاحة ويعترف بجرائمه علنا وبكل تبجح و اصرار / وكأنها شيئ من حقه / ويفرض رؤاها البشعة على مجتمع بأكمله ليلا ونهارا

    فبيتهيألي انه مش محتاج قاضي ، لان أفعاله مجرماه
    وللاسف مافيش حتى الجلاد اللي ممكن يعاقب ، لان خلاص بقت سداح مداح / وان كنت لا اعرف الترجمة الحرفية للتعبير


    وفي الاخر ........ متشكرين يا تمر حنة

     
  • At Wednesday, May 31, 2006, Blogger Manora said…

    الموضوع كله يقرف
    بس انا متفقه مع كل الى قال ان تصرفها صح
    يعنى اه هى غلطت مليون غلط هى و النيله احمد الى التقوى بتشر منه
    لكن لينة ذنبها ايه؟
    امها عملت الصح انها تنسبها لابوها
    حتى لو كان معندوش لا دم ولا اخلاق
    بغض النظر انه لا حد من الاسرتين هيعرفوا يربوها اصلا
    فانا بقترح يدوها لعيله محدش فيها اتجوز عرفى قبل كده !!!
    دى حاجه تقرف

     
  • At Wednesday, May 31, 2006, Blogger بعدك على بالى said…

    تمر حنة


    اتمنى انك تزورينى على
    http://ba3dakalpalee.blogspot.com/

    ماما

     
  • At Wednesday, May 31, 2006, Blogger admelmasry said…

    بالأفلام العربى القديمة التى حفرت نقر و زرعت مطبات فى وجداننا جميعا – البت من دول لما كات بتروح جونينة الأسماك خلسه مع زميلها عشان يشرحلها محاضرة فسيولوجى ولا يفهمها سكشن اناتومى و بالكتير يشربوا اتنين لمون كات يا حبة عينى ترجع البيت و وشها زى اللمونه و لا ينكن تبص فى عنين أبوها و تمتنع عن الطعام من فرط فداحة فعلتها – و لو واحد ابن حرام زنقها فى ميكروباص ولا نزل بيها الزراعات و حبِلّّّها – تفضل ترزع فى بطنها و تنط من فوق الدولاب عشان تنزل اللى فبطنها و ممكن تنتحر عشان محدش يعرف -مع ان اللى جرالها غصب عنها مش برضاها – على كده هنادى اللى خدها الوبا راح دمها هدر ياولداه




    هل تعتقدي ان اشخاص في عام 2006 .. قد تؤثر فيهم تقافة الاربعينات ؟

    هل تعتقدي ان القيم التي كان يتبعها هؤلاء موجودة الان .. لو كانت موجوده فهل ممارستها يتم بصورة طبيعية بين الناس ؟

    ماذا تقرأين ؟
    ماذا تشاهدين ؟
    ماذا تسمعين ؟

    اظنك من جمهور الافلام القديمة الابيض والاسود والتي ينتهي فيها الفيلم عادة بجواز البطل من البطلة في حفل عائلي سعيد وتصبح النهاية سعيدة

    احب ان اقول لك سيدتي ان الحياة ليست كذلك

    فدائما الواقع اشد خيالا من الخيال ذاته

    فذلك لا تغضبي لمحاولة هند الحناوي ان تاخد حقها وبالطريقة الشرعية السليمة
    ان اري ان هند الحناوي بنت مصرية قد يقع في مثل ظروفها اي بنت اخري

    ولكن لا اري لاي بنت اخري الشجاعة للاعتراف بالخطاء

    فالاعتراف بالخطاء هو اول طريق للندم

    تخيلي معي ان هند الحناوي هي مصر بلدنا اللي احنا عايشين فيها

    وان فيه واحد عرر بيها وضحك عليها وخلف منها سفاحا

    اسمع حال لسانك يقول : هذا ما يحدث بالفعل منذ خمسة وعشرون عاما


    انظري ماذا اصبحنا وماذا حدث لنا لمجرد انه وجدت اناس تفكر بمثل المنطق الذي تفكريبه

    وقالت نكفي علي الخبر ما جور
    وربناامرنا بالستر
    وناس جالت نجوزهاله

    وادي الي حصل سيدتي

    لو كانت مصر عملت زي هند ما اظنش انه فكر يعمل كده من خمسة وعشرين سنه

     
  • At Thursday, June 01, 2006, Blogger daktara said…

    حقيقي اللى أختشوا ماتو
    اللي انا فعلا عايز اعرفه هي بعد النطق بالحكم كان رد فعلها هي وامها وابوها ايه متهيألي اكيد قالوا
    yes yes he fucked her he fucked her
    مع الاعتذار للجميع لكن ده اكيد اللي حصل ده ان مكانوش قالوها بالعربي وبالفصحة وبالبلدي كمان في وسط الشارع

     
  • At Thursday, June 01, 2006, Blogger هشام علاء said…

    انا متفق مع شوكير فى ان الموضوع كله مقرف
    البنت سافلة و بجحة
    و الواد ندل و مش راجل
    و الاسرتين مفككتين و رايحين فى ستين داهية
    والنموذج فى حد ذاته شاذ
    و انا ما بلمومش على الست هند علشان رفعت قضية و لا لجأت للقضاء علشان تاخد حقها لكن ما يدهشنى فى الواقع هو انعدام الحياء و البجاحة و الوش المكشوف الذى يجعل الاسرة كلها بلا استثناء تتكلم فى جميع و سائل الاعلام بالسهولة دى كأنها قضية على حتة ارض مش على شرف بنتهم
    فأنا بقول لهم انا لا برميكوا بحجر ولا حاجة لانى بالتأكيد عندى خطيئة و لكن ياناس ياهوووووه

    اذا بليتم.....فاستتروا
    و
    ان لم تستح..فافعل ما شئت

    و فى النهاية انا مابتعاطفش مع اى حد فى الليلة دى كلها غير الطفلة المسكينة اللى جت لاب و ام ماينفعوش ببصلة

     
  • At Thursday, June 01, 2006, Blogger بعدك على بالى said…

    بحبك ياتمر حنة وشكرا على المرور واكيد حنتواصل دايما واكتر

     
  • At Friday, June 02, 2006, Blogger ...دنيتي said…

    بجد البلوج بتاعك جااااااااااااااامد
    جدا جدا
    بس انا رأيي سواء هند او الفيشاوي الأتنين زبالة هما وامثالهم رجالة وستات

     
  • At Friday, June 02, 2006, Blogger Khalid said…

    mabrook ya tamr 7inna, bittawfee2 fiblogik il gameel.

    ana bas motafaji2 inno 7ad yi6la3 min il 3adam yiktib bil qowah di, lithalik i agree that tamr 7inna can be abother famous blogger, and abo illel is a possibilty :)

    anyways, sam7eena law kona `3al6aneen, mabrook marra tanyah, keep up the good work.
    :)
    khalid*

     
  • At Friday, June 02, 2006, Blogger بعدك على بالى said…

    انا سايبه لك رسالة عندى ياريت تشوفيها... مهم جدا ...

    منتظرة مرورك

     
  • At Monday, June 05, 2006, Blogger عبدالله مفتاح said…

    انصاف متدينين بتقول الالفاظ دي
    سبحان الله على تدين القرن العشرين

     
  • At Wednesday, June 07, 2006, Blogger SOLITUDE® said…

    الغريب بقى في الموضوع كله
    ان الدكتورة المحترمة تمر حنة زعلانة اوي من هند وعاملة فيها خضرا الشريفة
    مع انه كلامها كله فيه الفاظ مينفعش تطلع من بنت متربية
    بتقول احا وتعريص

    يا اختي احا عليكي وع اللي جابوكي
    بقى بتتكلموا في الشرف وانتو بتقولوا الكلام ده؟!!!!!

    واللي يفقع اكتر ان كل واخد مبيفهمش في حاجة بيتكلم كده وخلاص
    يعني انتي يا دكتورة لما تلاقي واحد خريج حقوق بيتكلم في الاناتومي والفسيولوجي مش هتتفعي وتقولي ايه التعريص ده؟؟؟
    اهو انا دلوقتي مفقوع من كل واحد بيتكلم على الحكم رغم انه لا درس شريعة ولا قانون، بس هي عادتنا ولا هنشتريها، مصريين بقى ولازم ندلو بالجردل بتاعنا في اي حاجة نعرفها او منعرفهاش

    حاجة بضااااااااااان

     
  • At Thursday, June 15, 2006, Anonymous Anonymous said…

    من الاخر لو كانت بنت ناس غلابه شويه كانت عدت وابوها يعدي بس هيا جت مع ناس دورت علي حق بنتهم وفي الاخر كله نيله بس اهي مصلحه للعيال المتشرده في الشوارع بيشموا كوله لان ده اساسهم ودي اباهاتهم وامهاتهم دفنوا راسهم في الطين وبرضه هي متربتش وهو جبان ومنافق ومترباش برضه ومن ده لده ياقلبي لاتحزن بس احنا قلنا فايده لمشاكل من النوع ده كتير وادب للي بيحاول يلعب ببنات الناس بوهم الجواز العرفي ومشي حالك حالك يمشي

     
  • At Monday, June 19, 2006, Blogger MAKSOFA said…

    تلك القصيدة من قصائد نزار قباني
    والتي تلاها القاضي الذي حكم بنسب لينا الي والدها أحمد فاروق الفيشاوي
    ولكنها من ديوان( أحلي قصائدي )وليست( طفولة نهد )كما أشيع
    حبلي

    لا تمتقع

    هي كلمة عجلي
    أنني لأشعر أنني حبلي ..
    وصرخت كالملسوع بي .. (كلا )..
    سنمزق الطفلا ..
    وأخذت تشتمني ..
    وأردت تطردني ..
    لا شيء يدهشني ..
    فلقد عرفتك دائما نذلا..
    وبعثت بالخدام يدفعني ..
    في وحشة الدرب
    يامن زرعت العار في صلبي
    وكسرت لي قلبي ..
    ليقول لي :
    ( مولاي ليس هنا ..)
    مولاة ألف هنا ..
    لكنة جبنا ..
    لما تأكد أنني حبلي ..
    ماذا ؟ أتبصقني
    والقيء في حلقي يدمرني
    وأصابع الغثيان تخنقني..
    ووريثك المشؤوم في بدني
    والعار يسحقني ..
    وحقيقة سوداء ..تملؤني
    هي أنني حبلي ..
    ليراتك الخمسون تضحكني..
    لمن النقود ..لمن ؟
    لتجهضني ؟
    لتخيط لي كفني ؟
    هذا أّ ذن ثمني ؟
    ثمن الوفا يابؤرة العفن ..
    أنا لم أجئك لمالك النتن ..
    وشكرا ...
    سأسقط ذلك الحملا
    أنا لا أريد لة أبا نذلا ..

     
  • At Monday, June 19, 2006, Blogger MAKSOFA said…

    أذكركم بقول السيد المسيح في قصة مريم المجدلية
    من كان منكم بلا خطيئة فليرجمها بحجر

     
  • At Sunday, July 02, 2006, Blogger كلبوزة لكن سمباتيك said…

    كنت بسمع من ستي اللي هي جدتي زمان تقول اللي اختشوا ماتوا لكن نفسي احلم بستي اللي هي جدتي و اقولها لا يا ستي اللي اختشوا انقرضوا و اللي مختشوش اتنصفوا
    ------------------
    تحياتي لصديقتي الحبيبة تمر حنة

     
  • At Thursday, July 13, 2006, Blogger Adel said…

    انت فتحتي طرنش وساخة ومش عارفين نعمل ايه البجاحة بقت عرف واللي اختشوا ماتو وللعلم هي ما تهونش الا على الغلبان لو البت دي اهلها بسطاء كانوا لموا الموضوع لانهم مش هايلاقوا اللي هايقف معاهم لكن ولاد العز الفلوس مقوية فلبهم جاتهم وجع في قلبهم

     
  • At Friday, July 14, 2006, Blogger وجهة نظري said…

    والله يا سيدتى كلامك صحيح.... واخدين البلد ورايحين على فين بجد؟؟؟ كل واحد طالع يفتى نازل يفتى والناس ماباقتش فاهمه حاجه! أنا سيبت البلد من 8 شهور ومتابع الأخبار على النت، اللى بيحصل دا يا اما أنا كنت عاسش فى بلد تانيه يا اما أنا مسطول

     
  • At Sunday, July 30, 2006, Blogger الساحر said…

    صباح الدماغ العالية

    قدام اللى بتكتبية

    محرج اكمل
    البوج اللى لسا ما كتبتش فية كلمة

    حرام عليكى قتلتى موهبة شابة
    صراع اجيال بقى
    خدينا جنيك يا ست

     
  • At Sunday, July 30, 2006, Blogger الساحر said…

    This comment has been removed by a blog administrator.

     
  • At Sunday, July 30, 2006, Blogger الساحر said…

    اما الست هند

    والمحترم ابوها
    الراجل من قبل ما ينطق ومن غير ما ينطق
    شكلة واضح
    ...................................................................................................




    قال اية

    كل اللى يهمة حق لينا

    يا ترى لينا لما تكبر بعد الشو الرهيب اللى اتعمل لها دة

    مستقبلها هيكون اية

    خاصة انها هتكون تربية جدو

     
  • At Wednesday, August 09, 2006, Anonymous Anonymous said…

    Here are some links that I believe will be interested

     
  • At Wednesday, August 16, 2006, Anonymous Anonymous said…

    Interesting website with a lot of resources and detailed explanations.
    »

     
  • At Friday, November 17, 2006, Anonymous Anonymous said…

    اللي يعري طيزة يستحمل التدقييييررر

     
  • At Sunday, July 15, 2007, Blogger tayehfelmadina said…

    اولا احب احيكى يا تمر حنه على ال بوست دا ...انا كان نفسى اقول الاحا دى للدكتور نفيسه فى وشه الحقيقه و لكن فى زمن العولمه و الخصخصه و فلسفه الفكر الجديد بقت كل الدنيا سداح مداح و محدش عارف دا ايه ولا دا مين و كلو هايص على كلو انا مش مع الى بيقول المفروض نتعاطف مع هند لأنها فى الاصل زنت و ربنا سترها و فضحت نفسها ..صلى الله عليه و سلم قال اذا بليتم فاستتروا ...هيا بأه من بجاحتها بتطالب بأثبات نسب البنت لاحمد الفشاوى مع انه اصلا لا يجوز ...لله الامر من قبل و من بعد


    حدثنا الضحاك بن مخلد عن ابن جريج عن عمرو بن شعيب قال : { قال رسول الله صلى الله عليه وسلم : من عهر بامرأة حرة أو أمة قوم فالولد ولد زنا , لا يرث ولا يورث } .
    المصدر : كتاب الفرائض
    رقم الحديث بالكتاب : 365/7

     
  • At Saturday, August 30, 2008, Blogger Karim Ibrahim said…

    بجد فعلا تعريص على ميه بيضة

     

Post a Comment

<< Home