أيوه خدامه

Sunday, June 04, 2006

.........بس لينا الحلاوة



لو عملنا احصائية لعدد الشغالات اللى دخلوا بيتى أو بيوت صحباتى فممكن يحصل للبعض حالة ذهول.
مئات من الشغالات على كل لون يا باطسطا.
الشغالة اللى أصبحت دعوة ليلة القدر لكل الستات : اللهم أرزقنى بشغالة لهلوبة و شاطرة و مش حرامية و منكسرة و تكمل معايا أربع تشهر على بعض ثم : اللهم نجح أولادى و استرهم دنيا و آخرة.
حقيقي مابقلناش كلام طول النهار الا عن الشغالات :
طبعا هيهات انى أفتكرهم كلهم لأن منهم اللى قعدت أربع ساعات و منهم بالكتير اللى قعدت أسبوع
أصل فيه دلوقتر مكاتب مخدماتيه : الشرف للتخديم – الأسلامية للعمالة – التوحيد لجليسة المسنات – الرضا و النور لعاملات النظافة أل يعنى اسم يوحى بالنورانية فنروح و نبوس الأيدين و ناخد البركة و ندفع العمولة .
المهم انى اكتشفت انها تجارة على كبير أوى بيعملوا ايه بقى البشرية دول؟ بيتبعوا نظرية الشغالة الأستك ( ايوه اللى أشده يلسعنى) :
مساء الخير يا هانم و بعدين يعمل كويستشينير :
المخدماتى : طلبات سيادتك : حضرتك متجوزه؟؟
أنا : أيوه متنيلة
المخدماتى : فيه أولاد؟
أنا : أيوه فيه زفت
المخدماتى : ربنا يخللى كام ان شاء الله؟
أنا : قرد و قرده
المخدماتى : حضرتك بتشتغلى؟
أنا :( بخجل شديد) : أيوه دكتورة
المخدماتى : ( وقد تغيرت لهجته ) طيب انت عايزه ايه دلوقتى يا ست؟
أنا : محتاجه سيدة طيبة و الله هاعاملها زى أختى أو بنتى – الكتف ده زاد و الكتف ده ميا و اللى تؤمر بيه
المخدماتى : يعمل نفسه بيركز : انت كده محتاجه البت صباح استنى بقى لما أسحبهالك من اللى عندهم انتى أولى – المطلوب شهر للمكتب و شهر لأم البنت و شهر لأم البطل (معرفهاش) و شهر خلو رجل و 200 جنية حلاوه و 100 جنيه فتله.
أنا : ( بدأت فى التلعثم ببلاهه و الريالة كيلو قدامى) طيب يعنى سيادتك حضرتك السيدة الفاضلة صباح مرتبها كام؟
المخدماتى : بصى يا داكتورة عشان وشك السمح وأنا اعتبرتك زى أختى الكبيرة ( داهيه تغمك يا بعيد) و وحيات دا الصباح الطاهر - صباح دى مابتطلعش بأقل من 750 جنيه بس عشانك انتى بس و العيش و الملح و ايمانت المسلمين و المسيحيين و رحمة الميتين و الصاحيين مانتى راده لى كلمة :هاخد 650 بس ليا حلاوة اكسترا
( يعنى بالمكسرات ياخى)
و فى الأخر لازم نرضخ لطلباتهم و نكتشف فى الأخر انو ماعندوش فى الأوفيس الا البت صباح دى اللى بتدور عالجميع و فيها كل المواصفات لكل الناس - و فجأه بعد ماتيجى الصبوحة تفتكر بعد يومين انها لازم تروح البلد لأنهم حجزوا أمها فى المستشفى ( عشان جالها آلام طلق لحمل راقد من أربعتاشر سنه) أو فيه جلسة محكمة أو رايحة تكشف أشتشارة فى البلد عشان الدورة مابتنزلش أديلها ست شهور ( والله ده كلامهم) و كلمتها لاينكن تنزل أبدا و تروح صباح و تروح الفلوس و يوعدونا بغيرها و أدى وش الضيف.

شفتوا بقى لو ماكناش اتعلمنا كان زماننا مش محتارين فى موضوع الشغالات ده - روح ياقاسم يا أمين الله يسامحك


27 Comments:

  • At Sunday, June 04, 2006, Blogger بعدك على بالى said…

    جامعية جميلة تجيد الإنجليزية والكمبيوتر وقيادة السيارة تبحث عن وظيفة «خادمة»!

    عندما تكون شروط الوظيفة المطلوبة أن تكون الفتاة حاصلة علي مؤهل عال ولا تزيد علي ٣٥ عاما وتجيد الإنجليزية والكمبيوتر وعندما يبدأ راتب هذه الوظيفة من ألفي جنيه، يتبادر إلي ذهنك أن الوظيفة الخالية مديرة أو رئيسة قسم في شركة بترول، أو سكرتيرة في شركة استثمارية علي أسوأ تقدير، لكنك بالتأكيد ستفاجأ عندما تعلم أن المطلوب هو خادمة خبيرة بشؤون تنظيم المنزل للعمل لدي أسرة عربية سورية مقيمة في القاهرة.


    غرابة الإعلان التي دفعتنا للاتصال للتحقق من بياناته وضعتنا في مصادفة أكثر غرابة حيث أكد أحمد صبيح مدير مكتب الخدمات صاحب الإعلان أنه تقدم لشغل هذه الوظيفة عشرات الفتيات الحاصلات علي مؤهلات عليا ــ تجارة وآداب «لغات» وحقوق وخدمة اجتماعية وزراعة ــ وأغلبهن لهن خبرة بالعمل في هذا المجال من قبل، والقليل منهن أغراهن المبلغ الكبير فتركن كل شيء وسعين وراء المادة نظرا للظروف الاقتصادية السيئة التي حالت دون حصولهن علي وظيفة تناسب مؤهلهن.

    ده والله نص خبر نشرته جريدة المصرى اليوم فى عدد 1/6 ومتهيالى لايحتاج لتعليق...

    ثانيا: عزيزتى تمر حنه ( مجادلات عبثية)

    من منا لا يرغب فى وقف "الإستنزاف" والعبث الحياتى، من منا لايرغب خاصة اذا كان "مشخص المرض" وعارف الحل اقصد الدواء.. ان تعرف وتدرك لايعنى انك تستطيع التنفيذ .. الثورة "منحة" لانملكها كلنا...
    بالمناسبه .. الانتحار "جرأة" لا يملكها معظمنا، وإن كنا نمارس بعضا من أشكاله فى حياتنا دونما الاعتراف بذلك..
    وأنا واحدة من هؤلاء..

    تحياتى لاهتمامك بالرد ...

     
  • At Sunday, June 04, 2006, Anonymous Anonymous said…

    و الله يا تمر حنة خفة دمك دى تخلى أى عاقل فى الدنيا يعيشك ملكة علشان هشر دقايق بقعدهم معاكى بس مسن ده الى فى الزمن ده يعرف بعيش فرخة

     
  • At Sunday, June 04, 2006, Blogger قلم جاف said…

    بعدك على بالي :
    رأي آخر قاسي ومؤلم نفسي تسمعيه وتستحمليه من غير ما تمسكي الماوس وتحدفيه في خلقتي..

    سيبك من الخدمة..

    فيه بنات كتير بيكلمونا وبيصدعونا عن إثبات الذات والتعليم والبنت زي الولد.. وفي الآخر تقبل على نفسها إنها تلغي شخصيتها تماماً وتشتغل سكرتيرة عند مدرس من بتوع الدروس الخصوصية أو من أصحاب السنترات عقبال أمالتك .. بتعمل إيه السكرتيرة دي؟ معرفش!.. الخلاصة إنها بقت أباجورة .. مجرد وش متلصم وصوت يترفع عند الكلام في التليفون..

    ليه التناقض دة؟

    ليه ما شفناش ناس من اللي بيتكلموا الكلام المجعلص الحنجوري دة اشتغلوا بوابين ولا سواقين تاكسي (رغم بشاعة ظروف سواق التاكسي المصري داخل المدن).. ولا الكلام حنجوري ماركة السعداوي والفعل صفر على أقصى الشمال؟..

    ومحدش يقول لي الحوجة ، أمال الشباب اللي طلع عين اللي جابوه في النظام التعليمي الـ (.....) ومطالبين بالصرف على نفسياتهم وفتح بيوت يقولوا إيه؟

    حتى اللي بيقبلوا يشتغلوا خدامات ، أو بالاسم الأنيق المعدل : مدبرات منزل.. إلا تلاقيهم سايبين كل الحمل على أمهاتهم الشقيانين طول النهار والليل ومبيشيلوش ورقة في البيت.. وفي نفس الوقت عندهم استعداد للخدمة في بيوت غيرهم بس بالفلوس.. مش دة تناقض برضه؟

    نقطة أخيرة : لما تشوفي في الإعلان "جامعية جميلة ...الخ" اعرفي إن المطلوب .. ببساطة شديدة:



    حتة أباجورة!

    تحياتي لك ولتمر حنة اللي ما شفتهاش بترد في المدونة الشديدة دي إلا قليلاً..

     
  • At Sunday, June 04, 2006, Blogger ادم المصري said…

    لو عملنا احصائية لعدد الشغالات اللى دخلوا بيتى أو بيوت صحباتى فممكن يحصل للبعض حالة ذهول.
    مئات من الشغالات على كل لون يا باطسطا.
    الشغالة اللى أصبحت دعوة ليلة القدر لكل الستات : اللهم أرزقنى بشغالة لهلوبة و شاطرة و مش حرامية و منكسرة و تكمل معايا أربع تشهر على بعض ثم : اللهم نجح أولادى و استرهم دنيا و آخرة.
    حقيقي مابقلناش كلام طول النهار الا عن الشغالات :
    طبعا هيهات انى أفتكرهم كلهم لأن منهم اللى قعدت أربع ساعات و منهم بالكتير اللى قعدت أسبوع


    اسف .. حضرتك هو الكلام ده في مصر ؟
    القاهرة ؟
    فين ؟
    انت اصلا من هناولا من هناك ؟
    بتاكلي ايه الصبح ؟
    فول وطعمية ولا حاجة تانية ؟
    بتركبي ايه لما تروحي الشغل ؟
    الاوتوبيس .. او العربية العادي ياعني االي بنشوفها دي ؟
    ولا سيادتك ليكي طيارة مخصوص ؟

    غريبة ان واحدة في الوقت ده بالذات وقت فيه الناس بيحاربوا علشان يعرفوا يعشوا ولادهم بالليل .... وتتكلم عن خدامة

    خدامة مين ؟
    وليه قلتي ان الستات في مصر ما بقلهاش غير الكلام في الموضوع ده ؟

    علي كده انا عيلتي ما فهاش ستات

    انا واحد عادي ساكن في منطقة شعبية اسمها حدايق المعادي

    ما اعرفش حكاية الخدامين والمخدمين والحجات دي

    يمكن في في مصر زي ما بتقولي .. يمكن المشاكل اللي بيعاني منها الشعب الان تلقصت في مشكلة الخدامة

    يمكن المصريين الان اصبحوا شعب مرفه لدرجة انوا ما يقدرش يعيش من غير خدامة

    بس تصدقي حدائق المعادي دي انا طول عمري وانا فاكرها حتة من مصر


    ممكن يكون لسة التقدم والرفاهية دي لسة ما جوش عندنا ؟

    ادينا مستنيين

    اصل احنا بقي مشاكلنا غير مشاكلكوا خالص
    احنا مشاكلنا تنحصرفي عدة امور تافهة جدا بالنسبة لفخامتكوا

    مثلا مشكلة العيش .. دي من اعوص المشاكل عندنا

    ولا مشكلة الانابيب لما تفضي

    ولا مشكلة المية اللي بتقطع

    ولا مشكلة الشوارع البايظة

    ولا مكلة البيوت الضيقة

    مستهيقلي ما تعرفيش انتي حاجة عن المشاكل دي

    معلومة احب اضيفهالك

    هي دي مصر
    مصر لا تعاني من نقص الخدمات بقدر ما تعاني من الفقر والجهل والمرض

    ارجوا الا اكون سببت لك ضيقا او حرجا

     
  • At Sunday, June 04, 2006, Blogger بعدك على بالى said…

    الاخ قلم جاف...ليه الحدة دى والهجوم من غير ما تتاكد انا بقصد ايه...

    عموما تااى انا كتبته دة مش راى، ده خبر منشور لقيته فى المصرى اليوم وشفت انه تعليق مناسب من وجهه نظرى، بمعنى،انا مش بتريق على اللى بتدور على اى مهنه شريفه تعملهان انا نشرى للخبر ادانه لمجتمع مصاب بشيزوفرنيا ومش قادر يحط البشر فى اماكنها الصح، تفتكر اى ام او اب حيكون سعيد بعد ما يصرف الوفات على ولاده، يكون حفى وداخ بيهم علشان يوصلهم لبر الامان ويتخرجوا من الجامعه/ ويرقيه بعد كده بيشتغل سواق تاكسى او مديرة منزل او فى بنزينه او جرسون ... ومع احترامى لكل المهن دى الا انى بحط نفسى كأم مكان كل ام واب، هو ده المستقبل اللى انا وابنى حلمنا به؟؟؟؟
    اكيد لا ، واكيد يشتغلوا احسن من انهم يقعدوا على القهوة،او يتسكعوا فى الشوارع والباقى معروف ادمان وانحراف او اى مصيبه ...انا مش بسخر من اللى بيقبلوا ده، انا مقهورة من المجتمع اللى بيقتل ولاده ويسحلهم وبكل الطرق..
    تفتكر البنت اللى كان نفسها بحكم اجادتها للغات ومعاها رخصة سواقه وتعرف كمبيوتر.. نموذج زى دى بتشير لانها من وسط اجتماعى معقول.. نموذج زى دى ماكانتش تحلم تشتغل فى الخارجية مثلا او فى بنك او او ... تفتكر حتكون سعيدة وهى بتودع احلامها علشان تكون واقعية..
    على فكرة انا مش مختلفة معاك خاصة فى موضوع البنات اللى مش بيشيلوا ورقه فى بيوتهم ويشيلوها فى بيوت تانيه علشان الفلوس،عارفه انهم زباله بس مش بدينهم تعرف ليه، لانهم اتربوا غلط، وللاسف احيانا احنا كاهل ومن فرط حبنا لاولادنا مش بنحملهم اى مسئوليه بدافع الحب، بلاش نتعبهم والنتيجه اللى انت عارفها...
    عموما مرة تانيه انا مش بدين البنات اللى قرروا يبقوا اباجورات فى اى مكان... انا بدين مجتمع بيقتلنا كل يوم ... وبكل الطرق
    تحياتى لك..
    وعذرا ياتمر حنه

     
  • At Sunday, June 04, 2006, Blogger تمر حنه said…

    قلم جاف
    بغض النظر عن كم السعادة و حبى للحياة و احساسى انى لسة موجودة عالخريطة لما بشوف تعليقات على أفكارى و ترهاتى - الا انى مش عايزه أعلق مش عايزه أجادل و لا أجامل لأن الجدل و المجاملات و الأستنكارات بيحتلوا السواد الأعظم من حياتى الواقعية
    صدقنى يا قلم الموضوع مافيهوش قرننه ولا ثقة بالنفس بس عايزه أريح شوية
    لقيت هنا المكان الى بقعد فيه حافية و من غير أساتك كاتمه على مراوحى
    مش عايزة أختلف مع زملائى - مش حابه أعمل عداوات أو كلاشات و أظن ده من حقى ولا ايه يا فندم؟؟

     
  • At Sunday, June 04, 2006, Blogger قلم جاف said…

    الزميلة العزيزة بعدك على بالي : ربنا يجعل كلامنا عليكي خفيف .. وأنا معجب بأسلوبك من غير حاجة..دة أولاً..

    ثانياً : المجتمع كله بما فيهم احنا واقعين في متناقضات ورثناها واتعلمناها وبنحاول عن طريق الوعي السليم نخلص منها.. مش ذكور المجتمع بس همة اللي عايشين حالة تناقض.. الإناث أيضاً .. بين الآراء المتحررة والاستسلام لدور الأباجورة.. استسلام بمحض الإرادة وليس وليد الزنقة المالية والحاجة لإثبات الذات..

    فيه بنات كتير بيقدروا المبالغ الباهظة اللي أهاليهن صرفوها عليهن..أنا شخصياً أعرف طبيبة جربت العمل في العديد من المجالات لإثبات الذات لا تمت لمجال دراستها بصلة وأعجبت جداً بجرأتها وشجاعتها اللافتتين في المضي من محاولة إلى أخرى.. روح قتالية يجب أن تتوافر لدى الشبان والفتيات على حد سواء.. وفي المقابل في بنات بتشتغل وبتتعلم سعياً لخطف العريس..وبيلعبوا على وتر "حسن المظهر" اللي سي المجتمع عايزه وبيطلبه في إعلانات الشغل وناقص يطلبه في صورة صور في السي فيهات..

    أنا مش بأدين البنات اللي بقوا أباجورات غصب عنهم .. أنا بأدين البنات اللي بقو أباجورات عن اقتناع!

    خالص تحياتي وتقديري.. ومرة أخرى يجعل كلامنا عليكي خفيف :-)

     
  • At Sunday, June 04, 2006, Blogger ميشيل حنا said…

    بلوج زي العسل :)
    أعظم حاجة ممكن تتقري عن بلاوي الشغالات الفصل الأخير من رواية ذات لصنع الله إبراهيم. فيها تشريح كامل وشامل لعمايلهم.
    ياريت تقري الرواية.

     
  • At Monday, June 05, 2006, Blogger النوبى said…

    يخربيت دماغك بالزمه انتى بتجيبى الكلام ده منين
    بس على فكره انتى شكل ملدوعه اوى من حكايه الخدمات ديه
    على فكره انتى حببتينى فى حكايه الخدامه
    انا هروح اشتغل خدام احسن من البهدله الى احنا فيها
    بس هو فى حاجه صغيره انا معنديش وسطا اقدم بيها

    بصراحه انا معجب بكتابتك اوى

    النوبى
    رئيس جمهوريه اسوان العربيه

     
  • At Monday, June 05, 2006, Blogger عبدالله مفتاح said…

    مدام انتو ناصحين كده يا بنات ليه لما الراجل يقول لمراته متشتغليش وخليكي في البيت معززة مكرمه بتقولو عليه متخلف
    انتو لا عجبكوا كده ولا كده؟
    انتو عاييزين تشتموا وخلاص؟
    لا قعده في البيت عاجبه ولا شغل عاجب
    الراجل يعمل ايه عشان يرضي الست
    حاجه تخنق

     
  • At Monday, June 05, 2006, Anonymous Anonymous said…

    دكتوره و متنيله و قرد و قرده كمان لا دا انتي حالتك صاعبه

     
  • At Monday, June 05, 2006, Blogger ام المريله الكحلى said…

    دكتوره
    بس اشوفك ولا حظى يوقعنى فى دكتوره عسل كده
    انا على العموم مش حاسه بمشكله الخدامات دى لانى مش من الطبقه اللى ممكن تجيب خدامه
    دا هى اوضتين وصاله وانا واخويا وامى
    بس لو كده بجد دى تبقى ازمه
    تمر حنه
    موضوعاتك سكر يالا بقى مستنيا الموضوع الجديد

     
  • At Monday, June 05, 2006, Blogger Ahmed Shokeir said…

    دي مافيا على كده مكاتب التخديم دي

    بس أنا كنت فاكر إن معظم مشاكل الشغالات بتكون من جوز الست ابو عين زايغة المعفن اللي بيبص للشغالة .. ويدخل وراها المطبخ في غفلة من الزمن قال عشان يشرب ميه ساقعة

    أنا ماجربتش الموضوع إن يكون فيه شغالة درءا للشكوك أصل العملية مش ناقصة وكمان المدام بتجيب شغالة من نوع يوم في الشهر وطبعا مابتجيبش تاني من الخناقة اللي بتدبها معاها مراتي عشان بتكون واقفة على إيدها وتخليها تعيد الشغل تاني ، اصلها حنبلية جدا تبقى الشقة زي الفل وبتبرق وتقولي الشقة بقت زي الزفت ومليانة تراب وعايزة تتنضف

     
  • At Monday, June 05, 2006, Blogger Ahmed Shokeir said…

    ده حتى بعد ما أنا سافرت بأيام دبت خناقة مع الست اللي بتمسح العربية ومشيتها وجابت بتاعت العمارة اللي جنبنا بدالها مع إنها بقالها سنين بتنضف العربية وأنا موجود ، فلما هيا بقت بتستخدمها ربنا ماقطعش ليها عادة

     
  • At Tuesday, June 06, 2006, Blogger 451 فهرنهايت said…

    طب ليه حكاية الخدامة دي من أصله ... مالواحد أحسن يعتمد على نفسه و(ماحك جلدك مثل ظفرك) و(اللي ماحطكش كحل في عنيه ماتلبسهوش شراب في رجلك)
    ياترى ماذا تفعل اّلاف الستات العاملات المتنيلات منهم واللي مش متنيلات؟ طب دول لاقدرة لهم على دفع أجر خدامة (يتقولي 650) .. هما بيقبضوا كام أصلا؟
    دول ازاي بيروحوا الشغل وييجوا ويغسلوا وينضفوا ويطبخوا ويذاكروا للعيال ويضربوهم على مؤخراتهم لو مش مذاكرين .. وتلبي طلبات البغل الاسترالي القابع كالجلطة على قلبها
    دي مايفضلش عندها مساحة لنفسها حتى انها تعيش أو تحب أو حتى تفكر , وماأعتقدش انها تسمع عن حكاية مكتب المخدماتية دي
    ولا أقولك ... بلاش كلمة خدامة دي من أصله ... اسمها الروش التاني (مدبرة منزل) أشيك وأخف وطأة وأليق على ال750
    جنيه دول
    معقولة ممكن أعيش للزمن اللي أبقى فيه من علية القوم ويكون عندي مدبرة منزل اسمها أم سحلول تخش عليا بفنجان قهوة وأنا غارق وسط معملي وأبحاثي وتجاربي .. ومراتي تتخانق معايا لأنها بتغير عليا من أم سحلول العجوز البايتة ذات السبعين خريفا
    هه ... قادر على كل شيء

     
  • At Wednesday, June 07, 2006, Blogger Ghada said…

    هههههههههههه، أنا أول مرة أدخل البلوج عندك هنا

    عاجبني اللي بتكتبيه جدااااً، لأنه صادق جداااً :D

    كيب أوون

     
  • At Wednesday, June 07, 2006, Blogger hesham said…

    وجهة نظر برضه

    اسلوبك فى الكتابة جميل جدا
    بصرف النظر عن الموضوع

     
  • At Thursday, June 08, 2006, Blogger ادم المصري said…

    اظاهر كده ان كلامي كان تقيل


    معلش

     
  • At Thursday, June 15, 2006, Anonymous أزئوزة said…

    تمر حنة القريبة من مشاكلي وهمومي : تكونيش عايشة معايا ف البيت ؟ أنا باتكلم عن مشاكلي مع المخفيات اللي مابيطمرش فيهن ولا ف أهاليهن ، الخدامات . لكن مشاكل نظمي دي سيبيها على جنب. الشر برة وبعيد . نرجع للخدامات . أنا ياحبيبتي لو ئعدت أحكيلك وابؤللك عاللي ف صدري من قصص وروايات ... مش هتلائي وئت تفنكري ( تفكري يعني ) ، تفنكري تكتبي لنا إيه النهاردة . وهتتفنجري ( تنفجري يعني ) م الغيظ ، منهن ومن نطاعة أهاليهن .
    ختاماً : مالائييش واحدة فلبينية سلف عندك ياأختشي؟ أو عند حد من صاحباتشك؟

     
  • At Sunday, July 02, 2006, Blogger Sampateek said…

    صحيح يا ادم المصري عندك حق اغلب الشعب المصري معندوش شغالة و يتمني يكون عنده الجرأة ليقبل ان تعمل احدي بناته في وظيفة شغالة و لكن نظرا لسوء سمعة هذه الوظيفة فلا احد يقدم عليها الا المقطع بطاقته و ميهموش كلام الناس و لكن صدقني في ستات كتير اغلبهم من العاملات في امس الحاجة لشغالة و يبذلون الغالي و الرخيص من اجل ان ترضي الست الشغالة و تتعطف و تفضل مشغلاني عندها ست هانم يعني هم اللي بيشغلونا مش احنا اللي بنشغلهم و بعدين يا سيدي الرسول صلي الله عليه و سلم كان عنده خادم مستغرب ليه يكون عندنا احنا يا ستات خادمة نعاملها كاحد افراد البيت
    الصديقة الحبيبة تمر حنه كالمعتاد بتدوسي علي الجرح و ربنا يخليكي لما تلاقي المخدماتي الطيب ابن الحلال اللي يبعتلك صباح ابقي وصيه يبعتلي شادية لحسن اختك مزنووووووووووقة
    خالص تحياتي

     
  • At Sunday, July 30, 2006, Blogger الساحر said…

    احلق ظلبطة
    وامش فى الشارع مارشادير

    بس تقوليلى انتى دكتورة فى اية؟

     
  • At Friday, August 04, 2006, Anonymous Anonymous said…

    Here are some links that I believe will be interested

     
  • At Saturday, August 05, 2006, Anonymous RADWA FOUAD said…

    YEHRA2 EL GAWAAAZ 3ALLY 3AAAYEZ YETGAWEZZZ...REGALA WE ABLEEEHOM EL SETTTAAAAT....YA OMMMY MABEYFHAMOOOOSSSHH....AGHBYAAA...YEGOOO 3AND MAWDOOO3 EL GAWAAZZZ WEL HATAL YAKOL DEMAAGHOM....YA WELAAAD EL 3ABEEETA...WE TELA2YYY KOLO SHAGHAAAL COMMENTS WE EEEEH...METMAZEG AWY MEN EL BLOG BETAAA3EK ..WE TELA2EEEH ETDAWAR YEROD 3ALA KHATEEEBTO....GATKOM NEEELA ...BOKRA TEDRABOOO NAFSOK MEEET SARMA ...im a happily married woman 3ALA FEKRA...EHSOBOOOHA BA2A...
    RADWA

     
  • At Wednesday, August 09, 2006, Anonymous Anonymous said…

    Here are some links that I believe will be interested

     
  • At Friday, August 11, 2006, Anonymous Anonymous said…

    I say briefly: Best! Useful information. Good job guys.
    »

     
  • At Wednesday, August 16, 2006, Anonymous Anonymous said…

    Looks nice! Awesome content. Good job guys.
    »

     
  • At Friday, April 27, 2012, Anonymous Anonymous said…

    الشغل مش عيب ولا حرام لكن العيب في مدة الايد واللي بتشتغل خادمه او مدبرة منزل بتاخد اجر حلال مقابل جهد وتعب وخدمه زي اللي بتشتغل في مصنع او مدرسه وده قرار الانسان واختياره ولا بد من احترامه ع العموم انا مليش علاقه في الموضوع اصلي كنت بدور على سكرتيره اونلاين
    مواصفات الوظيفه :
    اتقان لغه انجليزيه فرنسيه كتابه ومحادثه
    معرفه جيده في استخدام الكمبيوتر
    الدوام من :- فترتين
    التاسعه ص - الواحده
    الخامسه مساء - الثامنه
    جمعه وسبت عطله رسميه
    المرتب : 1200 ج
    اوفرتايم عطل رسميه 800 ج

    http://sowalive.com
    يرجى التواصل مع مدير الموقع
    مشاري

     

Post a Comment

Links to this post:

Create a Link

<< Home