أيوه خدامه

Friday, June 09, 2006

مش كل الستات شوربة


أولا – عشان يبقى الكلام على ميا بيضة – خيانة الرجل لزوجته أو خيانة الست لزوجها – اسمها زنا : زين نون ألف – و دى من أكبر الكبائر و اللى مايتوبش قبل ما يتوفى فسوف يحاسب حسابا عسيرا و لا يوجد هناك معاذير فالحرام بّين و الحلال بّين والحدود الشرعية بعيدا عن القوانين الوضعية( الأب ديتيد) أوجبت أقامة الحدود على الزانى و الزانية.
كما ان الزنا محرم فى جميع الشرائع السماوية ( متفقين؟ )

طيب دلوقتى الست ذلك الكائن الهلامى اللى قلنا عليه قبل كده فى أول تدوينه - و اللى جوزها ردئ الخلق جلنف انانىو فوق كده خاين- لو ماعرفتش تشتغل خدامه أو أى عمل آخر شريف بتعمل ايه؟ لو ماأسعدهاش الحظ ببلوج للفضفضة أو بدماغ حلوة كده لسه ماباظتش ؟

بصوا بقى: الستات أنواع – النوع الشكاى الممل و دى شويتين و كلو بينفضلها فتبتدى تكلم روحها قدام المراية و بعدين فى الشارع و بعدين تصاب بهلاوس سمعية و تشوف ناس بتكلمها فى الهوا و بتاخد و تدى معاهم وبعدين تبدأ فى أكل المشابك و بوز اللحاف و تنتهى معلقة كاتانيللا (شبشب) فى رقبتها و دايره فى شوارع العاصمة حافية القدمين (بموت فى كاظم) و هى بتتلفظ بعبارات من نوعية : نظمى ياللى امك ماتقولش لأه سيبتلك العيال فى الشقة ( و كورس أولاد الشوارع بيردوا وراها :ا لأااا لأااا ) أو مثلا جدر البطاطا هو السبب و هراس جاى و حاجات كده يعنى و فى الأخر يتقبض عليها بتهمة تفجير كنيسة أو تقطيع الأعضاء التناسلية لمية و خمسين شخص فى نفس التوقيت( يعنى برضو بتفيد الدولة).

النوعية التانية الست العاقلة أوالست البير ( السواد الأعظم من السيدات المصريات) : دى بقى العاقلة الراسية بتاعت الجواز ستره و أهو برضو ضل راجل و لا ضل حيطه و أهو برضو شحط داخل علينا و حركات من دى
الست دى مابتتكلمش أصلا و تانها مربوطه فى الساقية و هى وكاتمة فى قلبها لحد ماقلبها بوووووم يطق و يا يجيلها هارت أتاك بسبب أرتفاع ضغط مفاجئ يا انفجار فى المخ و العياذ بالله أو بارانويااااااا شيزوفرينياااا

النوعية التالته و الأخطر و اللى كترت أوى اليومين دول : الست الخاينة ( اللعوب) (راجعوا صفحات الحوادث و القضايا اليومية): الست دى بتتسم بقدر ضئيل جدا من مخافة ربنا - و ليها برضو حيثيات للخيانة من وجهة نظرها – ماهو اللى بيعمل أى حاجة غلط لازم يكون مقتنع تماما بان ده هو الصح زى الحرامى و بيسميها اعادة توزيع ثروات: يعنى أنا بشقى أكتر من الناس دى يبقى المفروض انى أعيش أحسن منهم - أو الموظف المرتشى اللى بيعوض من أصحاب المصالح قلة مرتبه و بيسميها أكرامية نظير تعبه أو الدكتور أو الصنايعى أو مدرس الدروس الخصوصية ............. و ياما بنشوف كل ساعة
فالست من دول بيبقى جواها رغبة جامحة فى أخذ حقوقها المسلوبة بمعرفتها :الحقوق المسلوبة من كرامتها : يبقى لازم امرمغ كرامة اللى خلفوه فى الوحل – و حقها فى الدفء اللى محتاجاله : يبقى لازم أتدفى لأن لبدنى على حقا – و من تقتير الزوج (و دى
حالة واطية شويتين تلاته فبتاخد أجر نظير الخيانة) و من الأهتمام و من الدلع و من ومن ومن.
و مش لازم تكون واحدة فاجرة أو من بيئة واطية أطلاقا – اللى بيعملوا كده ممكن يكونو بنات سفرا و ناس أسامى و ممكن تكون
محجبة أو مخمرة ( لابسة خمار يعنى )
الست بطبعها كائن عظيم الكيد ( ده وصف قرآنى جاء فى سورة يوسف) يعنى ممكن الأسية توصلها لقرارات هى نفسها ماتحسبلهاش حساب
ممكن جدا و هى بتخون تعرض فى دماغها شريط 8 مم سكوب ألوان فيه بعض المشاهد من حياتها مع جوزها - صورته و هو بيتريق عليها قدام الناس– صورته و هو داخل مكشر كل ليلة رازع الباب وراه – صورته و هو بيديها ضهره ليلاتى و يقوللها ماتعقلى ياوليه بلاش الهيافه دى – صورته و هو بيضربها على وشها بالقلم أو مجرجرها عالسلم بقميص النوم فى نص الليل يالا روحى على بيت أبوكى اللى بلانى بيكى – صورته و هو بيسفه من أهلها - ساعتها هتبتسم ابتسامة المنتصر و تقول ده راجل مايستاهلش الستر و ممكن تكون هيا أصلا بل و غالبا لا ترغب فى مثل هذه الخيانه و تجد ان مؤشر الحقد تجاه جوزها ينخفض بحده ليه بقى : مانا كده كده بتعاقب فعشان ماحسش بالظلم خليها بسبب – العيال الصغيرين بيفكروا كده برضو – تأبى مثل هذه المرأة بان تصف نفسها بالمومس( مع انها أصبحت على شاكلتها ) لأنها لم تتقاضى أجر بل كل ماتريده هو الزج بشرف الراجل المفترس الى منطقة شائكة
و فى هذه الحالة يصبح تقبلها لسفالات زوجها متاحا جدا و بصدر أرحب من ذى قبل.

يارجال العالم رفقا بالقوارير – حرام عليكو بقى أرجوكم الست مش ملطشة ولا حقل تجارب لتجاربكم –
لحد امتى هتنفخوا فى الزبادى ؟ مش كل الستات شوربة .



41 Comments:

  • At Friday, June 09, 2006, Blogger النوبى said…

    على فكره انتى كل يوم اعجابى بيزيد بكتابتك
    بس انا شايف انك بتدفعى عن خيانه الزوجه الى زوجها بيضربها وبيهنها الى اخره انا من وجهت نظرى انى كده مش مبرر للخيانه


    اتمنالك دائما الكتابه بشكل جيد


    النوبى
    رئيس جمهوريه اسوان العربيه

     
  • At Friday, June 09, 2006, Anonymous يحي said…

    جميل انك لم بتكلمي مش بتتشنجي وتكلكعي الحركات..
    لكن خلينا نعترف ان الملل دائما بيكون هو المسيطر علي الحياة الزوجية..
    كون الست أو الراجل يخون ..فده أمر وارد جدا ..وأقرب الي المتزوج من حبل الوريد..وده لأننا بنمارس حتي الزواج بدون ثقافة,بندلق كل عواطفنا في فترة التعارف والخطوبة...ونتفاجأة بعد أسبوعين من الزواج ان العريس مش هو الفارس اللي الخيال.وان ست الحسن والجمال مش عروسة البحور,وبتعبير أدق الأمر بيتحول الي مجرد وظيفة أعتادية بيمارسها الزوجين
    أنا مش بعذر ...لكن بحاول ابص من زاوية تانية..الموضوع اكبر من اننا نحصره في كام نموذج

     
  • At Friday, June 09, 2006, Blogger still breathing said…

    مش عارفة ليه الموضوع ده دايما يثير اشمئزازي

    المفروض ان دي كبيرة من الكبائر و بيتهز ليها عرش الرحمان بس بقي الموضوع عاااااادي جدا بنسمع عنه زي أي حاجة تانية

    اللهم عافينا

     
  • At Friday, June 09, 2006, Blogger Me2 said…

    للأسف رجالة كتير بتعتبر إن من حقها الخيانة ما دامت زوجاتهم مش بتديهم اللي هما عاوزينة
    وبينسوا إنهم بردو ليهم واجبات زي ما ليهم حقوق
    و الخيانة بيعتبروها حق شرعي!!!!! و دي حاجة تجنن أي ست عاقلة
    دلوقتي الزنا بقى حاجة عادية جدا بين الرجالة و بيتندروا بيها!! ولما تيجي الست تفكرهم بربنا يقولولها متفتكريه إنتي الأول و إدي جوزك حقه!!! طب هما عملوا إيه؟؟ في رجالة بتطلب المستحيل علشان يدوا نفسهم الحق في الخيانة
    بقت حاجة تقرف

     
  • At Friday, June 09, 2006, Blogger Ahmed Shokeir said…

    ماهو كده مش هاينفع ... مش دايما خيانة الزوجة نابع من الزوج البارد أو الخائن أو اللي مابيعرفش

    أحيانا أخرى بتكون خيانة الزوجة غير مبررة بالمرة بتكون حاجة في دمها، فراغة عين تقوم بممارستها إذا كانت السبل متوفرة من رجل حليوة يتمتع برجولة خاصة لمكان آمن لزوج أمير عينه مش زايعة يعطيها الأمان الكامل التي هي ليست أهلا له ، وطبعا الشماعة الجاهزة .. مش بيحسسني بيه .. مش بيحسسني إني ست .. مش مدردح .. والراجا من كل هذا براء ولكنها فراغة عين وقلة تربية
    صدقيني خيانات كثيرة مقززة تتم ومن الزوجات ليس لها أي مبرر حقيقي

    ولك الله يارجل

     
  • At Friday, June 09, 2006, Anonymous Epitaph said…

    جميل اوي الموضوع

    وجاي في الوقت اللي فعلا انتشرت الخيانة بشكل غريب و مقزز و سريع

    بس مين السبب

    ?الراجل لوحده
    هو اكيد غلطان
    من ساسه لراسه كمان
    لكن ده سبب كافي ان الست تحط من قدرها في لحظة ضعف و تخون?

    طيب هل ساهمت الست في دفع الاخ نظمي ؟لفعل ذلك

    اه
    نكدية و زنانة و متعرفش تقيم الوقت اللي تتكلم معاه فيه
    ساعات الست مش بتعرف تستخدم ذكائها
    وطبعا مش كلهم

    ونيجي للراجل
    هو راخر
    بينسي ان في كائن رقيق مش عارف يعبر عن احتياجاته العاطفية و النفسية
    و لو عرفت هو بيعتبرها تفاهات


    الست تتخنق منه
    هو مش طايق نفسه
    ينغمس في العالم المادي

    و يتعلق بقشة الخيانة
    ال هي دي اللي حتعيشه اللي ماشفهوش مع مراته

    و الست الهانم ال ايه كرامتها
    و الاختيارات اللي انتي قولتيها
    و نصل الي الست الهانم اللي تخون

    طب ما هو كان من الاول
    اتنين غلطوا
    يخدوا علي دماغهم بقه
    و نقص الايمان
    و انغماس في الملذات
    والمفاهيم الكرامة و الحرية المغلوطة
    و و و و

    حاجة تقرف مش كدة؟

     
  • At Friday, June 09, 2006, Blogger still breathing said…

    مفيش مبررات
    لما ربنا يحرم حاجة يبقي معني كده ان كلنا نقدر منعملهاش

     
  • At Friday, June 09, 2006, Blogger khalid jarrar said…

    tamr 7inna ma barrara il khiyanah abadan, abadan.
    lakin shar7at asbab 7aqeeqiyyah to2addi lilkhiyanah.

    tamr 7innah, 7ayati min `3erik...shorba!
    ;)
    me*

     
  • At Saturday, June 10, 2006, Blogger Pianist said…

    اول مرة اجي هنا وعجبني جدا بلوجك .....
    اللي بيوصل لكده غالبا عدم فهم من الطرفين دي نقطة
    وده بيبقي نتيجة لتقليد في المجتمع انا باعتبره دعارة مقننة وهما بيسموه جواز صالونات
    النقطة التالتة ان الطرفين مشتركين في صنع الازمة مش الراجل بس
    لكن في الحالات اللي زي دي بيبقي الطلاق مريح ومافيهوش اهانة لحد
    ياما تطلب الطلاق ياما يطلقلها لو هو اللي قرر يخون

     
  • At Saturday, June 10, 2006, Blogger تمر حنه said…

    ابن النوبة الجميل:
    ماعاش ولا كان اللى بيدافع عن الخيانة- بس أنا بوضح اللى بيدور فى الفص الخلفى الجوانى أوى لبعض المقهورات فى أرض المحروسة - بس الى زيك أقصد الرجاله الرومانسية الحنينة اللى بتكتب القصايد بدمها لا يمكن يتخانوا ماتخافش أنت من الأحرار يا نوبى

    يحيي:
    أنا الحمد لله متشبعة تشنجات و تكلكعات فى الحياة الواقعية لذلك فى مدونتى أفضل انى أمشى حافية و متحررة من جميع الأساتك
    موضوع الملل الزوجى ده حكاية تانيه محتاجة لشرح و تحليل واسع و ده مش موضوعنا - أحنا هنا بنتكلم عن التسلسل المنطقى الذى يدور فى أنفخة السيدات المقهورات اللواتى يعانين من فشخة العواطف و تشريد الكرامة و امتهان الأحاسيس و مفيش قدامهم غير التلات حاجات اللى قلتهم لو عندك حل رابع ياريت تشارك بيه

    still breathing
    يارب يعافيكى و يعافينا أجمعين

    me2:
    الديفولت بتاع الرجالة هو الخيانة الزوجية الا من رحم ربى و بعض مواليد برج العقرب و دى مش المصيبة هنا لأن الراجل كائن لا يرضى بواحدة ولا اثنتان بل ثلاث - أظن ان دى قدرة فسيولوجية خلقة ربنا - بس المشكلة فى الستات لما تخون لأن الستات الطبيعيات فسيولوجيا بتحس بالدنس لما تخون و لذلك لو خانت فمن أحد التبريرات للخيانة هو ماذكر فى البلوج

    الغالى شوقير
    طبعا فيه ستات عينها زايغة و بتخون دون أى مبرر و يندب فى عين البعيده رصاصة - مش سيدنا الحبيب حذرنا من خضراء الدمن - اللى هى المرأة الحسناء من منبت السؤ - أهى دى لا جوزها بهدلها و لا فتح بقو و أمير الأمراء بس هى اللى ست مش كويسة
    أتفق معاك فى هذا بس ده مش موضوعنا هنا - أنا بتكلم عن الست اللى بتخون و هى مضطرة و فى التدوينة دى تحذير للرجالة - حاجة كده زى شوفتو اللى مبيشربش اللبن بيجرالوا ايه !!!أ


    epitaph:
    للأسف الجواز دايرة مفرغة لازم نفهم بعض كويس أوى أوى و نشوف الحلو قبل الوحش - يوم ماهنشوف الوحش تبقى باظت
    لازم تفهمى ان بعض الستات ممكن تحط من قدرها بأيدها أكرملها من ان أى حد تانى يحط منه
    مبنعرفش نعيش لازم نتعلم من شعوب غيرنا ونذاكر تجاربهم فى الأيثار و أحترام الأخرى أو الأخر و التنازل شوية عن النعرات القبلية التقليدية - فى حدود القيم طبعا-
    هى : نكدية و زنانة
    هو: أنانى و متسلط و جلنف
    النتيجة : قلتها أحسن

    القدير خالد جرار:
    جميل انك متفهم المبررات بس هقولك نوعية رابعة من الستات - لم أغفل عن ذكرها و لكن ماحبتش أرعب الرجالة : الست الدموية و دى معندهاش الا سواطير و سكاكين و مية نار -
    تحياتى لشعب العراق و أسأل الله أن يفرج كربتكم
    و حياتى من غيرك .....زبادى

    Pianist:
    نورت البلوج يا مايسترو
    كلامك زى الفل و عنب - بس يا مايسترو للأسف فى بلادنا المحروسة لسة كلمة طلاق تقيلة شويتين و الشر برة و بعيد تعنى موت حكمى للست - ممكن بسبب كلام المجتمع و مصمصة الشفايف و لقب مطلقة - أو لأسباب اقتصادية - أو لعرف سائد و متداول و مسيرى أجيب قراره

     
  • At Saturday, June 10, 2006, Blogger أبو أمل said…

    موضوع مثير وجريء وكتابة حرة جديرة بمطالعتها
    واحمدي ربنا انك قادرة تعبري عن نفسك بعيداً عن المتلصصين
    والسميعة

     
  • At Saturday, June 10, 2006, Blogger khalid jarrar said…

    ya satir! la2 min `3er damawiyyah law sama7ti!:)

    ameen, inshalla ta7reer il 3iraq, o min ba3dha ta7reer il ordon o ma9r o ba2i iddowal!
    :*)
    willa into fakreen inn il khawana o ilmonba6i7een ra7 ykoonoo mawjoodeen lil2abad?!
    7asha lillah.
    toshkari ya tamr 7inna, rabbina yikrimik o tbahdili kol irriggala illy ti3rafeehom adir ya kareem! :D

    me*

     
  • At Saturday, June 10, 2006, Blogger هوميروس said…

    اول مرة اجي عندك بس ان شاء الله هاجي علي طول المدونة جميلة عشان كده تستاهلي اغنية ياتمر حنه

     
  • At Saturday, June 10, 2006, Anonymous Anonymous said…

    tab3an 3ala el raghm en amssal el ostaz fahmy nazmy rasmy da law kan fe3lan khayen ,yestahel el fedee7a, bass el wa7ed yerga3 yeool bardo eno bey3amel rabena w mabey3amelsh bany adam.
    akeed el sabr da lo agr kebeer w meen 3aref mosh yemken rabena yehdeeh aw yehedo ,ayohma akraab.
    el set el doghree 7atantasser fel nehaya sada2eeneee mahama taal el zaman.w ya bakht mn bat mazloom.

     
  • At Sunday, June 11, 2006, Blogger Ø²Ø¨Ø§Ø¯ÙŠ said…

    الاخت العزيزة تمر حنة
    بعد التحية
    جاء في مقالك العبارة التالية " لحد امتى هتنفخوا فى الزبادى ؟ مش كل الستات شوربة " .. واحب ان اوضح لك وللجميع .. ان انا مافيش حد بينفخ في .. هذا والله أعلم

     
  • At Monday, June 12, 2006, Blogger تمر حنه said…

    أبو أمل
    أنا بحمد ربنا على التعبير و المساحة و المعلقين الأفاضل اللى زيكم
    ربنا يخليلك أمل

    القدير خالد جرار
    أظن ان التخلص من العدوان الأجنبى أسهل بكثير من التخلص من العدوان المحلى- أصعب شئ على الشعوب لما يكون المحتل ابن بلدهم
    انت ليه مش بتكتب حروف عربى بدل تمقيقة العينين اللى احنا فيها دى؟


    هوميروس
    شمعتك نورت البلوج شرفتنا
    تشرب شاى؟

    زبادى
    هههههههههه ماعاش ولا كان الى ينفخك
    يجعل كلامنا خفيف عليهم

     
  • At Monday, June 12, 2006, Blogger khalid jarrar said…

    هاهاها:*)
    و هاي كتبنالك بالعربي يا ستي، شو تؤمري كمان؟ :)
    متفق معاكي!
    ربنا عالزالم و المفتري!
    :))

    لو سمحتي يا تمر حنه (اسم جميل جدا بالمناسبة) احكيلي مين اللي دلك على عالم المدونات عشان اشكره؟ :)

     
  • At Tuesday, June 13, 2006, Blogger بعدك على بالى said…

    اولا انا لا اقر الخيانه ولا ابررها طبعا لكن مين من حقه يحاسب ؟ وهل بيضع كل حيثيات الحكم قدامه قبل ما ياخد نفس عميق ويطالب بالحد...

    الجواز عمره ماكان ورقه، واكم من "زنا" و"دعارة" بتمارس تحت ستار الشرعية وهى منها بريئة ، ومرة تانيه لا ابرر الخطيئة ولست معها لكن محدش بياخد باله ان "المحك" صعب وقاتل، ومحدش فينا معصوم، وفى لحظة بوابه السقوط مفتوحه، وده يرجعنى للسؤال اللى كنت طرحته فى مدونتى من قبل، هل احنا كويسيين (بدون رذيله او انحراف) لاننا من داخلنا كده، ولا لأننا بنخاف ربنا سواء حبا لوجهه تعالى او طاعة فقط خشية العذاب، ولا لأننا مااتحطناش فى المحك ، يعنى هل جت الفرصه وتمنعنا للاسباب السابقة، ولا ايه بالضبط..
    المؤكد الوحيد انه من لم يوضع فى المحك فده فضل كبير من ربنا لانه محك صعب ومرعب، وربنا يعفينا منه

     
  • At Tuesday, June 13, 2006, Blogger shady said…

    جعلونى مجرمه
    ماشى يا فريده

     
  • At Wednesday, June 14, 2006, Blogger غادة الكاميليا said…

    بجد يا تم كل مرة بتقولي حجات روعه وحقيقيه بس أنا برده مع شوقير في بعض الحاجات بس ميمنعش إنه رفقاً بالقوارير أحسن ننكسر ويكونوا هما السبب تحياتي الخاصه ليكي يا قمر

     
  • At Wednesday, June 14, 2006, Blogger hesham said…

    بسم الله ما شاء الله عليك يا تمر و على جمال و سلاسة الاسلوب و القدرة على نقل الواقع

    اما بالنسبة لموضوع الخيانة ده فانا بما انى لسه ما اتأهلتش فما اقدرش افيدك قوى يعنى بس لا املك سوى

    لا حول ولا قوة الا بالله

    و

    بيتهيألى ان المرأة عامة كائن حساس جدا ويحتاج للاحتواء الى اقصى الحدود

    فالرجل بيده الكثير من خيوط العلاقة على ما اعتقد الا فى بعض الحالات النادرة جدا اللى بتكون الخيانة فيها فى طبع هذه المرأة وبرضه ان كيدهن عظيم

    ممكن رئيى يكون مثالى او يفتقد للخبرة و لكن هذا احساسى

    و الله اعلم

     
  • At Wednesday, June 14, 2006, Blogger CAESAr-DIABLo said…

    انتي عبقرية علي فكرة .. انا مش عارف أقولك ايه ..عقلية ملهاش حل ...مدونه عبقرية و بتتكلمي في حاجات انا بفكر فيها و ليا فيها نفس الاراء ..

     
  • At Wednesday, June 14, 2006, Blogger mindonna said…

    هممم جبتي الكلام المفيد يا تمر حنة

    فعلا الست دايما دوافعها ف الخيانة أو الإنحراف غالبا نابع من انها اتعرضت لإساءات مختلفة سواء لو كانت فتاة اتعرضت لإساءات من الأسرة أو زوجة من زوجها
    فبتعمل الغلط بدافع من الإنتقام

    الستات فعلا قوارير بتنكسر بسهولة من
    أي حاجة حتي بدون علمها و بيكون رد فعلها علي طريقة : عليّ و علي أعدائي
    :(
    و الناس اللي افتكرت ان كلامك تبرير للخيانة الزوجية يبقي مش فهموا وجهة نظرك أكيد
    انتي بتوضحي أسباب الخيانة ، بانها ممكن تيجي بأسباب من كلا الطرفين ، مش من الطرف اللي خان بس

     
  • At Friday, June 16, 2006, Blogger تمر حنه said…

    الغالية بعدك على بالى
    السؤال اللى انتى بيدور فى بالك كتير اليومين دول : هو احنا حلوين لأن مفيش ؟؟ طب ياترى لو فيه هتبقى وحشين؟؟ الحقيقة ان العفة و الخطيئة وجهان لعملة واحدة - يعنى موجودين متلازمين و الفرق بينهم رفه - اللى عايزه تخون هى اللى بتوجد الأسباب و تهيأ الظروف - هى اللى بتفتعلها لأنها معرضة لضغوط حالتنا الثالثة
    الظروف موجودة دائما ماهى خيانة الست بتكون مع رجل - و الرجاله مرطرطين .
    سيدنا آدم لما خرج من الجنة بسبب التفاحة ماكنتش طالبه معاه بس " الظروف" : الشيطان زينها له و زن كتير و الوسواس اشتغل و ده كان أول درس فى أسباب الخطيئة - ربنا يكفيكنا شر الشياطين و شرور أنفسنا!!ا

    شـــــــــادى
    اسمالله علييييييك - جعلونى مجرمة - فاكر الفيلم ؟ و فاكر لما كلنا تعاطفنا مع الأسطى فريد لما بقى مجرم بعد مالدنيا اتقفلت فى وشه؟ هى دى التيمه اللى أقصدها - الله يفتح عليك
    فريده

    غادة الكاميليا
    طبعا كلنا مع شوقير يا غادة - أصل شوقير ده راجل فله و أكيد اللى تعاشره لازم تحط شرفه فى عنيها
    من غير ماتشوفيها و لا تعرفيها هو وصل لنا أد ايه هى ست رائعة - آه لو الرجاله يعرفوا اننا ممكن تكتفى بكلمة "مراتى " و هى طالعة من فم رجل يقولها بافتخار!!!!ا


    أخويا هشام
    ستـــــــــوب .. أربط عندك و نصيحة من واحدة أجرها على الله .
    كلامك عنب و صح و لا مثالية و لا حاجة
    خليك كده برة كلكعة الراجل الشرقى عموما و التعالى الذكورى - طبطب و دلع و احتوى و حتما بدا هتعمر بيت و أحلى بيت ان شاء الله

    CAESAr-DIABLo
    أنا أبعد مايكون عن العبقرية و لكن شكرا على ثقتك فى ارائى
    you made my day


    MENADONAالجميلة
    سعيدة جدا انك جبتى اللى فلى بالى و فهمتى البعض انى هنا مش عشان أدافع عن الخونة و لكن عشان أوصل لمسامع للرجل صرخات مكتومة لزوجات بتموت فى اليوم بدل المرة ألف بهذا الدنس اللى بتعمله و هى مغيبة عن الضمير و الدين و الفطرة بدافع الأنتقام المخفى
    آآآه لو الذكور فهمونا و فهموا مطالبنا البسيطة جدا كانت الحياة بقت ديزنى لاند و النعمة

     
  • At Friday, June 16, 2006, Blogger abdallah ahmed , عبدالله احمد said…

    يسلم دماغك

     
  • At Saturday, June 17, 2006, Blogger marktwain said…

    دعون نتفق ان الخطأ هو خطأ سواء من قام به رجل أو امرأة
    اما الخيانة الزوجية فهى شئ قديم ولكن كان في الخفاء اما الان فحدث ولا حرج
    من المسؤول عن الخيانة الرجل ام المراة فهذا لا يهم لان تبرير الخطأ اكثر جرما من الخطا نفسه

     
  • At Sunday, June 18, 2006, Blogger تمر حنه said…

    marktwain
    انت بتقول ايه؟؟؟
    لا يهم من المسئول؟؟ تبرير الخيانة أعظم جرما من الخيانة نفسها ؟؟!!!ا
    لا يهم من المسئول عن قتل الفلسطنيين؟ - لايهم من المسئول عن اجتياح العراق؟
    لا يهم من المسئول عن اعتقال و اغتصاب المتظاهربن؟
    لا يهم من المسئول عن نشر دعارة الأغانى على الشاشات الوطنية؟
    لا يهم من المسئول عن البطالة؟
    لا يهم من المسئول عن كسر أقلام الشرفاء؟
    لا يهم من المسئول عن ستـــار أكاديمى؟
    لا يهم من المسئول عن تفجير الكنائس؟
    لايهم من المسئول عن ضياع ابنى و ابنك؟
    لا يهم من المسئول عن "الواوا أح"!!ا؟
    لا يهم من المسئول عن قتل معنوى لكائن اسمه المرأه هى أمك و أختك و بنتك؟
    تبرير كل هذه الجرائم أعظم جرما منها؟
    أرجوك برر لى كل الجرائم السالف ذكرها
    و اذا وجدت تبريرا مناسبا أنشره قول لألألألألألألألألألألألأ
    يمكن يوم يطلع علينا شمس - يمكن يوم نبقى أنضف - يمكن
    عموما فحالة الخيانة هذه تحديدا هى لون من ألوان الأنتحار للمرأة - فحضن رجل غريب لمرأه شريفه هى ... قبر

     
  • At Tuesday, June 20, 2006, Blogger littilemo said…

    والنعمه انت انقلاب فى عالم التدوين

     
  • At Sunday, July 02, 2006, Blogger Sampateek said…

    اسلوب رشيق ينافسني كمدعية للسمباتيك و خفة دم تنافس وزني الثقيل و افكار جريئة استوقفتني كثيرا
    و راي اننا لو اطلقنا الحرية لبناتنا فسوف نضرب انفسنا بالكتنلة لانهن لسن مؤهلات لاستخدامها و بالتاكيد سوف يسئن استخدام الحرية و وقتها لا نلوم الا انفسنا
    اعتقادي هو اكسر للبنت ضلع يطلع لها اربعة و عشرين
    خالص تحياتي للصديقة الجميلة تمر حنة

     
  • At Thursday, July 13, 2006, Blogger المزاجنجي said…

    تمر حنه هانم الاول يخرب عقلك انت مش ممكن بس هل انت فكرتتي تستطلعي راي الحريم في موضوع الخيانة ده ولا دي من واقع نمذج او اتنين او تالاتة حتى تعرفيهم ؟ عموما انا لا ادافع عن الخيانة لكن لا انكرها وممكن ما تكونش اسبابها الزوج او الزوجة او الحالة المادية زي ما الكل بيقول اصلها احتاجت فباعت نفسها ولا هو ممعاهوش فراح رمى نفسه في حضن غانية قد امه علشاصرف عليه لكن احب اوضح لك ولو اني شايف انك ماشاء مطلعة بشكل لذيذ في عوامل نفسية وكبت واثار تربية ممكن تخللي الرجل او المرأة اذا جت لهم الفرصة يخونوا يعني ممكن عيوب تربية وياريت ما نجيبش سيرة الوازع الديني لاني ا حريم ورجالة والله بيبقوا هايتقابلوا علشان يخربوا الدنيا وبيفتكروا الفرض ويقوموا يصلوا الاول فالدين مش هو الاساس في التربية لاننا اخدنا الدين عادة وليس عبادة موضوعك شائك ومتشعب بجد انت فتحتي باب حوار ممكن يجر وراه بلاوي بس اجمل ما في الموضوع انك بنت بلد ولذيذة وان كنت كاتب عن واحدة من اللي بنتكلم عنهم دول في مدونتي قصيدة اسمها عشقتك لانك مثلي حالة يا ريت تزورينا وحدانا الشاي والسكر فضلة خيرك

     
  • At Tuesday, July 18, 2006, Blogger مسجل خطر بجد مش هزار said…

    معاكى حق

     
  • At Monday, July 31, 2006, Anonymous Anonymous said…

    Here are some links that I believe will be interested

     
  • At Wednesday, August 09, 2006, Anonymous Anonymous said…

    Here are some links that I believe will be interested

     
  • At Thursday, August 10, 2006, Anonymous Anonymous said…

    Very pretty design! Keep up the good work. Thanks.
    »

     
  • At Tuesday, August 15, 2006, Anonymous Anonymous said…

    I really enjoyed looking at your site, I found it very helpful indeed, keep up the good work.
    »

     
  • At Saturday, August 19, 2006, Blogger كنوز said…

    hei just want to say good blog nice keep up good work great really

     
  • At Sunday, November 26, 2006, Blogger Mohamed A. Ghaffar said…

    حاضر هنرفق بالقوارير ، بس يا ترى مين اللى هيرفق بينا لما احط لك لسته زى اللى انت حطيتهيا فى الشريط ال 8مم اللى هيدور فى دماغها قبل متخون

     
  • At Monday, February 05, 2007, Anonymous Anonymous said…

  • At Friday, August 31, 2007, Anonymous انوشه said…

    زيك يا توتو وبرده ياتوتو مش كل الرجالةبينفخو في الزبادي زي ما انت قسمتي الستات لنوعيات برده الرجاله نوعيات والنوع الغالب منهم اللي بيخلي الواحده تكره روحها وبيحسسها انه جبر بخاطرها لما اتجوزها ودايما محسسها انها في اي وقت ممكن يرميها هي وعيالها ويروح يتجوز مثني وثلاث ورباع زي ما دايما بيقولو اسلوبك رائع يا تووتو وبيدخل قلبي طوالي من غير لا احم ولا دسستور وعندك حق في ان الست اللي بتتجنن اليومين دوا وتمشي في الشارع بتبقي مفيده للبلد عشان لو اي قضيه مستعجله المجانين دلوقتي يتخاف عليهم يعني انتهي عهد المجانين في نعيم ا

     
  • At Friday, August 31, 2007, Anonymous انوشه said…

    علي فكره انا قريت تعليق النوبي هو بيقول انتك بتدافعي عن خيانه الزوجه المقهوره بالعكس هو فهمك غلط انا فهمت ان انت بتتكلمي من وجهه نظرها هي لانها بتبرر الغلط اللي بتعمله بالعكس انتي كلامك من الاول للاخر ضد الخيااااااااانه وهو ده اللي انا متاكده منه لاني حاسه انك ست اخلاااااااااااااااااق

     
  • At Monday, September 17, 2007, Anonymous Anonymous said…

    بصي سيبك انتي كل اللي اقدر اقولهولك انك دمك شربات وياري تفضلي محافظة علي روح السخرية الجامدة دي

     

Post a Comment

Links to this post:

Create a Link

<< Home