أيوه خدامه

Friday, June 23, 2006

الساعة كام فى إيدك يافندى؟

الساعة كام فى ايدك يافندى؟" " طب ارجع بات مطرح ماكنت"
"البيت ده محترم و له تقاليده و لن أسمح طول مانا عايش ان النظام يتلخبط"
" ياهانم بنتك راجعه الساعه حداشر من بره و أنا ليا كلام تانى معاها"
" مانتا فاشل و أنا قلت لك ابعد عن الشلة البايظه الى انت ماشى معاها و الا هيكون ليا تصرف تانى"
" و كمان بتشرب سجاير يا كلب – دانت لسه بتاخد مصروفك منى" بالذمه سمعنا الجمل دى كام مره من بابا؟
كام مرة اتحرمت من المصروف – كام مرة اتلطخت قلم على سداغك؟ كام مرة والدتك قالتلو سماح المرة دى عشان خاطرى ؟؟!!!!!ا
غير طبيعى .... نفس السيناريو لكل الآباء و نفس العند من كل الأبناء – مش عايزين يفهموا ان الممنوع مرغوب – و ان ممكن من كتر مابيمنعونى انى ماحطش ايدى فى النار حطيتها بالعند فيهم.
دى نفس القصة القديمة – سيدنا آدم ماكلش غير من الشجرة الوحيده اللى المفروض مايقربهاش لكن نقول ايه ؟؟
طبيعى ان بابا عايزك تبقى سون ديفو (بدون عيوب) و شئ طبيعى انو عايزك تبقى مؤدب و محترم و رجل منذ نعومة أظافرك و عايز البنت تبقى طوع و منكسرة و مؤدبه جدا.. جدا.. جدا (بموت فى كاريكا) – و لكن اللى بيحصل ان التطبيق بيختلط على السواد الأعظم من الآباء و بيوصل بيهم الأمر أحيانا الى ( و العياذ بالله) أنا ربكم الأعلى أأمر فأطاع .
ليه كده؟؟ أنا أبويا لوكان شاف فى ايدى فنجان قهوه و أنا مراهقة كات ليلتى تبقى كوبيا! و بدون وعى أدمنت القهوة لما قرب يجيلى قرحة !! و مره بجرب سيجارة حلوانى كده و اتقفشت و من اللى شفتو نزلت اشتريت علبه بالعند فيه !!!
يا أبويا يا حبيبى لاهو انت فاكر ان الرذيله لا ترتكب الا بعد الساعة حداشر ؟ هأ هأ طب تعالى نشوف كام بنت فى الثانوى و الجامعة انهارده نازله من بيتها الساعة سبعة صباحا" تجرى عشان يا كبدى تلحق المحاضرة الأولى و لو بس بصيت فى شنطتها هتلاقى بيبى دول (مالوش ترجمة )
كام بنت بتنزل الصبح و أبوها بيدعيلها : ربنا يسهلك يا بنتى و ينجحلك المقاصد و مقصوفة الرقبة رايحها تقابل زميل و فى البوك(كلمة بلدى موت) بتاعها ورقة بعنوان : عقد زواج عرفى !!!!!!!!!!!!!!!!!!
أهو : ماجبتش حاجه من عندى نقرا الأحصائيات الرسمية ....
على فكرة الشياطين مابتفتحش بعد الساعة حداشر بس – الشياطين توينتى فور سيفين- مابيقفلوش.
العيال مابتغلبش – سن المراهقة ده منيل أوى و بيبقوا فاكرين انهم لو فردوا دراعاتهم هتساع الدنيا و مافيها – هما فعلا شايفين كده .
طيب واحد من الجمهور يسألنى و يقوللى ايه الحل يعنى نسيبهم على حل شعرهم؟ نطلقهم فى الشوارع عشان ترتاحى؟؟
أنا بقى أقولو لأ بس لازم شوية نتغير – لازم نركب الموجه لازم لو جالك الطوفان تنخ و تشيل ابنك على راسك
لو عملنا احصائية ولو بين الزملاء هنا :
كام واحد و واحده حب قبل سن خمستاشر سنه؟ منتظره ردود
كام واحد و واحده شرب أول سيجاره أو نفس شيشه قبل هذاالسن ؟ منتظرة ردود
كام واحد و واحده شاف فيلم فيه مناظر أو مجلات من اللى و العياذ بالله قبل هذا السن ؟ منتظرة ردود
كام واحد و واحده مارس علاقة كامله قبل سن العشرين ؟ مش منتظره حاجه و انتو و ضميركم
هيا نتكاشف – هيا نخلع الأقنعة لأننا فعلا يهمنا جيل جاى نضيف
ليه يا أمهات لما تيجي بناتكم اللى فى الجامعة و تصارحكم : انى أعرف ولد زميلى بيحبنى و أنا مياله ليه ماخدتيهاش على جنب فى حضنك و قولتى لها و مالو أنا عايزه أشوفو و أشوف مامته و أتعرف على أهل اللى خلفو امو (مش نهارك مطين دانا هطلع ميتينك انهارده يافاجرة – ده الرد الديفولت)
ليه ماتقوليش هاتيه البيت يقابلك هنا – ماهما هيتقابلوا هايتقابلوا – عايزين يحسوا بحاجات حلوه بتزغزغ الحته الجوانيه ( اللى فوق ناحية الشمال و انت طالع) - ليه ماتلاقيكيش جنبها تفطميها عالصح و الغلط و الحلال و الحرام – ليه ماتعلميهاش ازاى تصون كرامتها و ايه اللى ليها و اللى عليها ؟؟؟؟؟؟
أنا عارفة ان دى مش ثقافتنا و هتشتم لما أشبع دلوقتى بس برضو الأقمار الصناعية مش ثقافتنا – هيفا وهبى مش ثقافتنا – قناة أكس أكس معرفش كام مش ثقافتنا – أفلام ايناس الدغيدى مش ثقافتنا – البت اللى بتحمى الحصان و جابته أرضا مش ثقافتنا (على فكرة الحصان بيتعالج فى مستشفى بروك الخيرى و فاقد القدرة على الصهيل أدعولوا)
احنا دلوقتى بنتجرجر الى هاوية سحيقة محيقة بالأنفتاح على الأعلام الغربى - ديك النهار زميله بتحكيلى على سايت كلو عبارة عن كليبات لبنات صغيرة بتفض غشاء بكارتها بمعرفتها اصطناعيا و بيصوروها احتفالا بهذا الحدث المشرف!!!!!!!!!!!!!!!!!!!!!!!!ا
ها لسه لنا كام سنه عالموضوع ده؟ تفتكروا كام؟
حدش راح مارينا يا شباب – مارينا دى قطعة ساحلية تنتمى لمصر؟ اللى ماشيه هناك و صرتها مش باينة (لأ صرتها ايه دى الصرة دى فى القاهرة – كل حاجة مش باينة) بتحتقر احتقار شديد و البنات بيبصولها و يشاوروا و يكتموا الضحك .
غلفوا الدين و الفضيلة للشباب بطريقة سلسة و لذيذه تتماشى و الأطار اللى احنا فيه – حببوهم فى ربنا و الدين و الحياه و الحب و التفاؤل و قبل ده كلو حببوهم فيكو !!اكفايانا "أخرج من بيتى يا كلب" و" تسع سنين مفيش مصروف" و الهم الأزلى ده الله يمسيك بالخير ياللى قلت : نسك على بناتنا بس نسلمهم المفتاح.

45 Comments:

  • At Friday, June 23, 2006, Blogger Gid-Do - جدو said…

    اضم صوتى لصوتك وعن تجربة ـ ومن تجربتى كتبت
    البنات ممكن الرجوع اليها لمن يريد

     
  • At Friday, June 23, 2006, Anonymous أزئوزة said…

    ف الواقع ياست تمرمر كلامك عين العفل . بس هوَّ لسة في أهالي بيئولوا ماتتأخروش ، وماتلبسوش ، وماتحطوش ، وماتشيلوش ؟ ياي ... واضح إنك مصاحبة ، أو مطلعة على تفاصيل حياة ناس دَئَّة ئديمة ، منفصلين عن الواقع .

     
  • At Friday, June 23, 2006, Anonymous أزئوزة said…

    تعليقي دة موجه لجدو ... صاحب السبق ف التعليق عل البوست . جدو ، أنا دخلت على البلوج بتاع حضرتك ، وفشلت ف التعليق على البلوج الخاص بصور مصر ... لإني مش بلوجر ، ومسموح فقط للبلوجرز بالتعليق . فممكن أكتبهولك هنا ؟ بعد إذن تمرمر طبعاً
    أنا عايشة ف مصر ياجدو .... و بسافر ف الصيف لواحدة صاحبتي ف دان هيج ( لاهاي ) بهولندا ، أهه منها عطعطة مع صاحبتي ، ومنها شوبنج ، ومنها إجازة صيفية للاستجمام ، وأخذ هدنة من العيال وابوهم . نرجع لموضوعنا .... أنا باعشق مصر ... باموت ف دباديب أمها ( إلا بالمناسبة ، هيَّ مين امها ؟ أنا اللي اعرفه إن مصر هيَّ أمي ) ، و بتأكد من مكانتها ف ئلبي ، لما بسافر لصاحبتي ف هولندا . مكانتها العالية بالرغم من شوارعها المزدحمة ، وناسها اللي مابيحترموش أي نوع من أنواع القوانين ، و بالرغم من نبرة التشدد اللي أصبحت واضحة في مختلف المجالات ، وبالرغم من ... ومن .... ومن . مصر جميلة ، وصور حضرتك خير شاهد . أنا لو عايشة برة مصر ... وشفت الصور دي ... هاعيط .

     
  • At Friday, June 23, 2006, Blogger moony said…

    gamda awy ya tamr el blog dah we fa3lan ana mesh 3arfa homa el 2abahat we el 2omhat mabizha2osh men nafs el klam we ely shaifen eno malhosh ay lazma we eno mesh bigeab ay ta2sear.

     
  • At Saturday, June 24, 2006, Blogger أُكتب بالرصاص said…

    بادئ ذي بدء ، أحيكي على البلوج ، وعلى المقالة ، لانك حطيتي صباعك(لامواخذة) على الجرح .

    وزي ما فهمت من موضوعك ، ومغزى كلامك ، اننا نتناول القضية بشيء لا هو من الافراط ولا من التفريط ، ولازم نسك ، مش على البنت بس ، ولكن على الولد كمان ، لكن مع مساحة من الحرية والثقة ،
    التربية شيء مش سهل ، والعملية مش خلف عيال وارمي في الشارع أو هات لبس وأكل وأعلف ، لأ.. التربية لازم متابعة وملاحظة وتوجيه وثواب وعقاب ، على مدار تونتي فور أور

    والموروث الأخلاقي اللي بينمو في العقل الباطن للولد والبنت في مرحلة الطفولة هو اللي بيحميه في مرحلة المراهقة ،

    وبالتوفيق



    ملحوظة : ( ديك النهار) !!!
    الكلمة دي ماسمعتهاش من زمن طويل ، من ايام جدتي الله يرحمها .
    انت عمرك كام سنة ؟!

     
  • At Saturday, June 24, 2006, Blogger ايهاب العدل said…

    اممممممممم
    هى دى الوسطيه بأه ؟
    انك تجيبي واحد يقابل بنتك فى البيت ؟
    دى اسمها علوقيه لا مؤاخذه مش وسطيه

     
  • At Saturday, June 24, 2006, Anonymous Epitaph said…

    انا معاك يا ريس.....
    روحي شوفي فيلم اوقات فراغ مثلا...و حتلاقي بالنص اللي انت بتقولي عليه (كتبت عليه تعليق لو تحبي تشرفينا يا ست الستات(
    الموضوع كبير كبير كبير
    الحب و الدين و الامان ضاعوا من البيت

     
  • At Saturday, June 24, 2006, Blogger سلامـــــــــــــه said…

    فعلا يا تمر حنه
    كلامك كله تمام وانا معاكي في كل اللي اتقال
    لازم تكون في شويه ثقه متبادله بين الاهل وبين اولادهم
    والا هيكون هناك حاجز كبير وكل يوم عن يوم بيزيد ؛ لان الولد مش عارف يكلم ابوه في مشاكله .. تجنبا لمشاكل اكتر ممكن تحصل لو هو كلمه
    وبرضه البنت مش عارفه تتكلم في البيت عن مشاكلها
    بس احقاقا للحق ..
    انا شفت فعلا بيوت كتيره جدا متفتحه..والناس فعلا قدرت تتغير وتفهم ازاي الحياه ماشيه , وازاي هم يقدروا يراقبوا ولادهم بشويه ثقه
    واعرف اهالي اكتر عندهم ثقه في ولادهم وبناتهم
    ومع اني بعاني من المشكله المطروحه .. الا اني واثق ان الواقع الجاي بيقول لنا ان المجتمع المصري مجتمع واعي ولازم هيعرف - عن قريب - ان اسلوب الامر والنهي مش هو الاسلوب اللي هينفع ان ولادنا يتربوا بيه
    ولو المجتمع منجحش انه يتغلب علي المشكله دي .. يبقي كل الابناء هيتغلبوا هما علي مشكله الاهل .. هيتغلبوا عليها بالتجاهل .. هيعملوا زي ما انا عملت .. بقالي اكتر من 4 سنين اهلي ميعرفوش عني اي حاجه , مع اني عايش معاهم في نفس البيت
    لاازم الاهل يغيروا نظرتهم , والا ينسوا ولادهم

     
  • At Sunday, June 25, 2006, Blogger النوبى said…

    بجد الموضوع ده من اهم المواضيع الى انتى كتبتيها
    وكل الكلام الى انتى قولتيه صح ميه فى الميه
    وده عن تجربه ده الواحد ياما طلع ميتينه بس امى مكنتش بدافع عنى لا ديه كانت بتسخن الموضوع ( وسلميلى على البوتجاز )

    وانا اتمنى ان كل اب وكل ام تغير فكرتها عن التربيه

    وبصراحه الحته الى عجبانى اوى بتاعت الحصان يشيخا مش تقوليلنا من بدرى ان الحصان فى المستشفى على الاقل الواحد كان قام بالواجب

    اتمناليك الكتابه بشكل جيد دائما

    النوبى
    رئيس جمهوريه اسوان العربيه

     
  • At Sunday, June 25, 2006, Blogger MrMr said…

    اولا اسم البلوج جامد موووووووووووووووت و صاحبته طبعا
    ;)
    المراهقين بقي دول يعني ...........مش عارفه اقول ايه
    مش بيعجبهم العجب
    يعني انا مثلا لما كنت في ثانويه عامه و اهلي عادي كده يسيبوني اعمل اللي عايزاه كنت باروح اشتكيهم لصحبتي(دول مش مهتمين بيا حتي مش بيقولولي روحي ذاكري) المره الوحيده اللي علقوا علي موضوع المذاكره ده كانت من ابويا و فاكره بالنص كلامه
    ايه يا بنتي انتِ مش بتذاكري غير رياضه؟
    و علي فكره ماشربتش سجاير غير بعد ما بقي عندي 22 سنه و كانت مره ماتكررتش
    يا رب كل المراهقين يطلعوا من الفتره دي علي خير

     
  • At Monday, June 26, 2006, Blogger تمر حنه said…

    جدو
    البلوج نور بوجودك - انت يمكن وجودك فى بلاد العم سام هو اللى مخليك متحمس لتجربة الوعى و الفهم
    قريت بوستك الجميل عن البنات الحلوين بوسلى جاسمين

    الشرباته أزئوزة
    تصدقى انى فعلا كنت معاشرة ناس دقة قديمة لما طلعوا روح اللى خلفونى - فعلا منفصلين عن الواقع - بس ربنا بيستر يا أزئوزة و لسة فينا نفس ندخل عالتدوين و نقول - بس مين يسمع و مين يقرا - بوسيلى نفسك

    MOONY
    فعلا مابيزهقوش - ربنا يستر

    ITS TOOLATE
    بداية كده الكلام مش مريحنى بنسأل عن سن و حركات مش تمام - أنا برضو سمعت ديك النهار من جدتى - خلاص !!!ا

    المحترم ايهاب العدل
    اسمحلى أهنئ سيادتك بالأنضمام الى نادى الآباء المخدوعين فى الأرض
    سميها علوقية - سميها شذوذ - سميها زى ما تسميها - بس يا هوبا يوم ماتعرف من برة ان بنتك بتقابل زميل لها بدون علم سيادتك ياريت تقول : الله يمسيكى بالخير يا تمر حنه

    EPITAPH
    جميل أسمك أوى و لونى مش فاهماه و مفيش وقت أفتح القاموس
    بس أنا زرتك فى مدونتك الرائعة و دماغك جايه على هوايا و عنب - بس أنا ماليش فى السياسة
    أنا من بتوع : كل حاجة زى الفل و الرغيف كبير و المواصلات سهلهههههههه - تعيش الحكومه و تحيا الوحدة العربية أهئ اهئ اهئ

    ALBELKALEMA
    أربع سنين و أنت عايش معاهم فى بيت واحد و ميعرفوش عنك حاجة لأنهم مش عايزين ينزلوا لحضرتك
    أربع سنين و مفيش تواصل - كان عندك 18 سنه و قفلت على نفسك من غير حضن ولا سكن ولا ضهر يااااااااه -
    أربع سنين و هما مش عايزين يتنازلوا عن موقف الرقيب المباشر - موقف أمن الدولة المنزلية و بالطبع عملت حاجات كتير محتاج تعترف بيها - تقولها - تاخد رأى خبير من دمك و مش لاقى
    لا تعليق و العاقبة عندكم يا ايهاب العدل

    ابن النوبه الجميل
    تقريبا الحصان ممنوع عنه الزيارة و بيتغذى عن طريق انبوب وريدى داخل من ودانو لانهم لقوا ان الودان هى المنفذ الوحيد السالك
    بلاش تشعر بالذنب تجاه الحصان انا سمعت انه هو اللى سعى للمشاركة فى الكليب - يستاهل

    Mrmr
    ماهو ده اللى بنقولوا يا مرمورة - ان الكبار يسقعوا ودانهم شوية و يحاولوا يعيشوا دور العبط مع العيال دول لحد ماتخلص الفترة دى - ماهى فترة و تعدى
    نورتى البلوج

     
  • At Monday, June 26, 2006, Anonymous Epitaph said…

    عزيزتي تمر حنة
    :) Epitaph
    هو ما يكتب علي شاهد القبر
    احمم
    كل مشاهير و غيرهم (عادة منتشرة في الغرب) بيكتبوا علي شاهد المقبرة مقوله تشتعهر بعد ذلك
    ادي يا ستي الاسم
    اما موضوع السياسة فأنا ماليش فيها برده :) الرغيف كبير يا باشا
    يا ستي اهو الواحد بيفضفض
    ولو ملكيش في السياسة عندنا كلام تاني
    ينفع اقتصاد؟

     
  • At Tuesday, June 27, 2006, Blogger @hmed said…

    بعدى على البلوج من وقت للتاني لما احس انى مخنوق اوى ومش عارف اعمل إيه ومش لاقي حاجة أعملها أساساً !
    الحقيقية بلاقى هنا ابتسامة غصب عنى بتطلع .. بكل العفوية والبساطة اللى مكتوب بيها كل تدوينة .. واللى نفسي يوم من الأيام أقدر أكتب زيها .. انا مش بعلق على التدوينة دى تحديداً قد ما انا بعلق على المدونة ككل .. قليل أوى البنات اللى ممكن نلاقيها بتفكر بالأسلوب دا .. صحيح ليا اعتراض على بعض (المفردات) اللى أحيانًا بتكون ضرورية فى السياق، بس دا يمكن (بمناسبة أسئلتك اللى فى التدوينة دى) متربى بزيادة عن اللزوم .. وأى لفظ ((خارج)) بيخدش وداني .. طبعاً مع إيماني إن العربية الفصيحة او حتى العامية الراقية ممكن تعبر برضه .. بس يمكن مش بنفس التأثير !
    المهم عشان ما اطولش عليكى .. دا عنوان مدونتي لو حبيتى تعدى فى يوم من الأيام:
    http://enashir.com/blogs/taekwo

     
  • At Tuesday, June 27, 2006, Blogger khalid jarrar said…

    العزيزة تمر حنه،
    نسيت اباركلك عالنيو لوك السوبر كول..إشته والله :))

    انا متفق معاكي من حيث تعريف المشكلة بس مختلف معاكي تماما و جذريا في اسلوب الحل المقترح.

    انا رأيي ان درهم وقاية خير من قنطار علاج، و الدرهم المقصود هو الدين.

    انا كلي إيمان و تصديق بأن بنت تربت على حفظ القران و تعلم السنة على طريق سليم، هي محصنة الى حد كبير من الوقوع في اخطاء الشيطان ابو التوينتي فور سيفين المذكور آنفا من قبلكم هاها:))

    ما اروع ان يكون المعلم هو نفسه اب حكيم و ام تربت بنفس الطريقة المذكورة و اختارها انسان متدين عشان دينها و اخلاقها فخلفت و جابت بنت على نفس الطريق الجميل النظيف؟

    انا ارى ان كللللل القضية او اغلبها تبدا عند اختيار الزوجة اللي هي مستقبلا حتكون ام بناتك يا محترم، اختار زوجة تعرف تربي، تكون هي قدوة للاولاد و البنات في المستقبل.

    اما هو اللي راح دب فوحدة خطبها لانها بتشبه هيفا وهبي و لابسه زيها، فاكر ان هو امن المستقبل و ملك النعيم؟

    التغيير ممكن و الناس بتتغير فعلا، لكن انا اقصد المبدا يعني.

    فالوصفة السحرية بنظري: اختار زوجة صالحة (اظفر بذات الدين تربت يداك) و عيش معاها عيشة ترضي ربنا و ساعدوا بعض تقربوا من ربنا و تحفظوا القران، و بعدين لما تخلفوا يعني، كملوا المسيرة، و وفروا للبنت التربية الدينية الحنونة، و اعطوها حجم الرقابة المطلوب (لاحزي اني الت اعطوها مش افرضوا عليها لان الرقابة حق من حقوقها قبل ان تكون من واجبات الاهل) و اعطوها مع و بعد ما سبق الثقة.

    ما تعتقديش يا تمر حنة ان بنت تربت بهاي الطريقة و تربت انها تكون مثقفة و متفوقة لانها متدينة و لازم تكون في المقدمة، تعتقدي كم احتمالية وقوعها في الخطا؟
    معدومة؟ اكيد لأ (القلوب بين اصبعين من اصابع الرحمن يقلبها كيف يشاء)(كل ابن ادم خطاء و خبر الخطائين التوابون)، متدنية؟ اكيد آه.
    زهئتي؟:)
    طب خليني اكمل بس انا قريحتي انفتحت :)

    العلاقات بين الشباب و البنات حرام شرعا (متفقين ولا نتناقش في النقطة دي؟).
    فلو البنت بطريقة من الطرق دخلت بعلاقة مع اي شب، مطلوب نوضحلها الخطأ في الموضوع، شرعيا و عمليا, و نحاول نحسم الموضوع بطرح امكانية الزواج (خطبة-كتب كتاب..اتسيترا) او الدفع لانهاء فوري للعلاقة، حفاظا على التنين، الشب و البنت. (هو احنه ليه متصورين ان الشرف مسئلة محصورة بالبنت و ان الشب معندوش شرف و عفة يخاف عليهم؟)

    و تكملة الخطبة العصماء لهذا اليوم تحتوي كلمات منها (ذئاب بشرية) و (الحب اعمى و اطرش و حمار مبيفهمش و لا بقيم الناس صح ولا بشوف عيوبهم) (اضرار معنوية للطرفين بسبب العلاقة لو ما كانش في امكانية للزواج) و... انا تعبت و على رأي الفيلسوف اليوناني القديم شعبليوس: بس خلاص!

    طولت عليكي، مليون آسف :)

     
  • At Tuesday, June 27, 2006, Blogger khalid jarrar said…

    انا عايز اضيف و انور المحكمة لو سمحتيلي:))

    الدعاء!
    الدعاء مسئلة غاية في الأهمية، ندعي ربنا سبحانه و تعالى يحفظ اولادنا و يجعلهم من الذرية الصالحة، و نسأله الإعانه على تربيتهم و حفظهم، هو حد فاكر انه هو يئدر بفهلوته و شطارته يربي اولاده؟ مستحيل، لازم يكون التوفيق من رب العالمين.

    و في كمان كلام بس انا تعبت :)

     
  • At Wednesday, June 28, 2006, Blogger تمر حنه said…

    Epitaph ...
    أوخشى بلاش فضفضة اليومين دول - ابراهيم عيسى بتاع الدستور كان برضو بيفضفض و أتطس سنه

    @hmed ...
    شكرا عالكومبليمنت يا أحمد - بص يابوحميد أنا عايزه أقولك انو سبب انشائى لهذوها المدونة انى - بالرغم من انى المفروض برضو متربية - بس للأسف بمشى فى الشارع و كنت بروح مدرسة و جامعة و فى الشغل احتكيت ببشر و سمعت و أرتوت ثقافتى بألفاظ من اللى بتخدش الحياء و وجدت فى بعضها أحيانا المفيد المختصر !ا
    لو بعض ألفاظى بتخدش ودانك بلاش تقولها بصوت عالى اقراها فى سرك و سلامة عينيك.
    أنا دخلت البلوج بتاعك و استمتعت جدا بفنك الجميل بس ليه حزين كده؟

    khalid jarrar ...
    حمدالله عالسلامه .. افتقدناك يا زميل الكفاح
    صلى بينا على رسول الله: مش انت شايف معايا اننا كأمة عربية فى النازل فى كافة المجالات : اقتصاديا -تنمويا- اعلاميا - ثقافيا - سياسيا .. الخ
    مش انت شايف ان احنا بقينا ملطشة كافة الأمم
    مش حاسس معايا اننا بقينا ممسحة العالم سواء من حكامنا أو من أعدائنا؟
    صرنا الأضعف بلا منازع - و المنحنى بقى فى الناااازل !!ا
    يا عزيزى الغرب و اعلامه أصبح الأعلى نفيرا دخل بيوتنا رغم انوفنا - مفردات جديده أصبحت مستأنسة جدا بالنسبة للشباب و البنات ماكان يخدش الحياء بالأمس أصبح عادى جدا اليوم.اذا و مع كل المستجدات علينا + النتيجة اللى وصلنا ليها يبقى أكيد فيه حاجه غلط - و فى كيفية تلقينا للمستجدات التى لا مفر منها.
    اللى بقوله اننا نجرب نغير من أسلوبنا فى تربية الأجيال الجديدة و نتعامل شوية بذكاء و خضوع للواقع بعيدا عن الخطب العصماء و العنف الأعمى
    لم ألمح من بعيد أو قريب الى التخلى عن الهوية الدينية بدءا من أختيار الزوجة أو الزوج مرورا بكل مراحل التربية - و اذا كان فيه مجال للزواج أو كتب الكتاب .. اتسيترا يبقى يا دار مادخلك شر و لكن موضوع الدفع لأنهاء فورى للعلاقة بالعنف ده هو اللى ماكو زين
    أرجوك اقرأ تعليقات الشباب فوق و شوف بيعانوا قد ايه من عدم تفاهم اهاليهم معاهم -مش عارفه الكلام هرب منى ليه ......
    نورت - تشرب شاى؟

     
  • At Wednesday, June 28, 2006, Blogger ايهاب العدل said…

    يا سيدتي الفاضله لماذا تهملين كل مراحل التربية بدءا من الطفولة وتقفزين فجأه الى سن المراهقه وتفترضين سوء الخلق الواصل الى حد العهر ؟
    تتكلمين عن الاحتواء والمصارحه والاب والام يخدوا العيال فى حضنهم .. تمام .. طب الاحضان والمصارحه المقترنه بالتربيه السليمه دى مينفعش تبدأ من سن الطفوله بحيث لا تصل الامور الى ما تكلمتى عنه ؟
    أم أن البنت سواء حازت على قدر من التربيه أم لم تحز فحتما ستخرج والبيبى دول فى شنطتها ؟
    ان كنتى تتكلمين عن مشكله ناتجه عن سوء التربيه من الاساس فأنا أؤيدكي تماما أما ان كانت هذه دعوه عامه كما فهمت عند قراءتي الأولى فعفوا كلهن لسن عاهرات

    لو الشاي كشري اعملي حسابي

     
  • At Wednesday, June 28, 2006, Blogger ayhm jzzan said…

    والله معاك حق
    تحية

     
  • At Wednesday, June 28, 2006, Blogger sarah said…

    NICE POST

    :)

     
  • At Wednesday, June 28, 2006, Blogger khalid jarrar said…

    عزيزتي تمر حنه،
    انا متواجد دائما، لكن بطل من ورا الستارة و بتطمن انكم بخير و بمشي:)

    انا متفق معاكي...تغيير اسلوب التربية واجب، ليتغير اسلوب التربية من انه يهدف لانشاء بنت "مؤدبة و محترمة" الى انه يهدف لانشاء بنت متدينة بصدق، موصول قلبها بالله، يغنيها ايمانها عن العطش العاطفي الذي يرميها لحضن لا يحل لها.
    طب صلي عالنبي كده يا تمر حنه:)
    زيدي النبي الصلاه.
    ربنا ينور عليكي يا رب، طيب انا حد سمعني ألت حلوف؟
    انا ما جبتش سيرت عنف :) انا بؤول دفع لإنهاء العلاقة من خلال تبيين حرمتها و مساوئها.
    يا تمر حنه، يا زينة الستات، احنا لازم يكون تصرفنا مع هاي الحالة مبني على فهمنا لخطورتها، فيه بالمناسبه كتاب رائع لابن القيم اسمه اغاثة اللهفان من مصائد الشيطان فيه كلام حول الموضوع ممكن يكون مرجع مفيد للاطلاع، أنيويز، أوليلي لو سمحتي لو بنتك -على فرض اختصرنا السنين و قفزنا لمراهقتها- لا سمح الله اكتشفت انها على علاقة مع شب، ايه اقتراحك فالأضية؟ كيف تتعاملي مع الموضوع بطريقة حكيمة من وجهة نزرك؟

    اتنين سكر لو سمحت :*)

     
  • At Thursday, June 29, 2006, Blogger تمر حنه said…

    إيهاب العدل
    و النعمة و النعمة أنا بتكلم عن التربية السليمة من أول مالطفل بيتولد و أن أبوه و أمه ناس كويسة و متدينة و محترمة و بتعرف تربى و لكن تأثير المجتمع (راجع ردى السابق على خالد جرار) بتزغلل عنين العيال و مهما مسكت بيد من حديد بيحاولوا يفلفصوا مننا -فلازم نمسك أيوه لكن بيد من حرير مع الألتزام بتذويب كل القيم الجيده فى بونبونات قبل الأكل و بعده كل يوم من غير مالعيال يحسوا لأنهم جميعا عندهم حساسية ضد النصح المباشر
    لا مؤاخذه يا هوبه الكشرى خلص ينفع بفتله؟

    khalid jarrar ...
    انت منين من العراق؟ شكلك كده من باب الشعرية أو الزاوية الحمرا - طب صلينا على النبى
    السيناريو المتوقع حدوثه لو حصل و بنتى جات تقولى انها تعرف شاب ( و هعتبر نفسى محظوظة لو صارحتنى و عرفت أربى ) أولا لازم امسك أعصابى تماما و ماردش الرد اليفولت اللى كان ممكن يتقاللى و انا مراهقة لو صارحت أمى ( راجع البوست) و هاخدها فحضنى و انا من جوايا بغلى و بولع و هى مش لازم تشم ريحة الشياط :
    ها يا حبيبتى أحكيلى ايه الموضوع ؟ مين بقى و ايه الحكايه و عرفتيه ازاى - و نشوف لو يصلح للجواز من ناحية الأخلاق و الدين و الأهل فورا أجوزهالوا لأنى بصراحة نفسى أخلص من قرفهم
    و فى حالة لو الموضوع مش نافع عمرى ما هبين لها ان الرفض منى أنا لأن العند هيركب هنا - أنا هساعدها نكشفوا - هنحطوا فى شوية أختبارات بحيث ان هى اللى تقول لأ مش أنا اللى أقولها - صدقنى التعامل مع الجيل ده محتاج ذكاء شديد و غير مباشر
    و بعدين صلاة الحاجة راحت فين ده ربك ستار قوى يا خالد

    الشاى عالناار ..

     
  • At Thursday, June 29, 2006, Blogger khalid jarrar said…

    جميل جدا، كده متفئين و كله سكر و عملين زي السمن عالبتنجان الاسود :)))

    ان شا الله يا رب الذرية الصالحة ليكي و لكل المسلمين يا تمر حنه:))

    انا اصلا فلسطيني، اردني الجنسية، سعودي المولد، والدتي عراقية و قضيت ال14 سنة الاخيرة في العراق، من
    لغاية 28-7-2005 1-7-1991
    حتى اضطررت مرغما ان اغادر العراق، و الحمد لله الذي لا يحمد على مكروه سواه.

    :) يعني ايه باب الشعرية و زاوية الحمرا؟

     
  • At Thursday, June 29, 2006, Blogger sendrlla said…

    موضوعك جميل جدا وياريت كل البيوت تكون فيها نوع من الديمقراطيه ونوع من الحريه المقننه لان دا بيساعد كتير الابناء على التوسع الفكرى وانا فعلا بشوف موضوع التفتح دا عندى فى البيت ودا بيساعدنا كتير لعدم ارتكاب الخطأ لآن لما باجى اعمل حاجه بسأل فيها ماما وبعد كده بقيت بعرف من نفسى الصح من الغلط ومش بخبى اى حاجه عنها ولازم تعرفوا ان انتو الجيل الجديد اللى ممكن يكون اكتر جيل عن من الموضوع المطروح وكلنا تقريبا فى سن مش صغير فلازم كلنا ننوى فى بيوتنا بعد كده ان شاء الله نطبق كل القوانين اللى تساعد ولادنا على عدم المعاناه من المشكله لدرجه ان احنا مش نفتح بلوجر نلاقى عليه الموضوع مطروح بالعكس نقرب منهم ونعرف عنهم كل حاجه من غير ما يحسوا وتانى مره موضوعك جميل

     
  • At Friday, June 30, 2006, Blogger يا مصر اكتب إليكي رسائلي said…

    يا تمر حنة انتي يعني اقولك ايه بس انا بقالي كتيييييييييييير مشتاق لأخواتي البنات حرام عليكي ولما قريت اللي كتبتيه كنت كأني قاعد ادام محاضرات واحدة منهم ، اكبر مني كلهم يا دي النيلة أعمل ايه لازم اطيع واسمع ازيز ا لمناشير وهيا بتنزع مني اخر جذور الصبر والأمل ، وفي الأخر الاقيهم يقولوا لي احنا مش بنزعلك احنا بنفهمك والله وحشتوني لأنك بقيتي رقم تلاته من اخواتي ، وعلى فكرة ، كل كلامك صح وعندك حق فيه . تحياتي ليكي ولكل الأصدقاء وارجوكي مش تروحي على مدونتي الأيام دي عشان لسه مش كويسه ... ايوه اوعديني .. هاااااا؟
    تحياتي وتمنياتي

     
  • At Friday, June 30, 2006, Blogger CAESAr-DIABLo said…

    تمر ..بجد كل مرة بدخل فيها البلوج بتاعك ببقي مبسوط قوي .. إنت حد عبقري بيعرف يعبر عن مشاكل عايشنها و الناس بتهرب منها حتي الشباب ..انت بجد عبقرية

     
  • At Friday, June 30, 2006, Blogger تمر حنه said…

    This comment has been removed by a blog administrator.

     
  • At Friday, June 30, 2006, Blogger تمر حنه said…

    khalid jarrar ...
    يا باشا باب الشعرية و الزاوية الحمرا من أحياء القاهرة الشعبية اللى فيها الناس ميه ميه - رجاله مجدع و ستات بألف راجل


    sendrlla
    شكرا ليكى و أن شاء الله الناس تفهمنا و يبقى بكرة أحلى

    يا مصر اكتب إليكي رسائلي ...

    مفيش فايده وراك وراك .. تسيب اخواتك هناك بنصايحهم بمللهم تلاقيهم هنا فى البلوج سعد باشا قال مفيش فايده - بص بقى صلح البلوج بتاعك لأنك شوقتنى جدا أشوفه بس أنا بوعدك مش هروح الا لما تقولى


    CAESAr-DIABLo ...
    ايه يابنى الرعب اللى فى البلوج بتاعك ده ؟؟؟ أنا قلت أطل عندك تهت : خلفية سودهو وشوش غريبة و معرفتش أسيبلك كومنت بجد طلعت أجرى أصلى مابفهمش فى السورياليزم بتاعكم ممكن أرد هنا؟ ممكن طبعا - شكرا
    عادى جدا ان أبو الهول يتطربق - و ايه يعنى !!ا و ممكن جدا الأهرامات كمان و مالو !!ا - و ممكن جدا ان الأنسان الكبير سنا و مقاما يتهد و يقع قدامك - ماهو فى النهاية انسان يعنى دم و لحم و مثانه و مجرى بول و حاجات كده - ممكن يكون بيمر بأزمه - ممكن يكون تعب من لعي دور الكبير - ممكن يكون لقى عند شخص جاهل و واطى شوية بهججة هو نفسو فيهم بس هيرجع تانى
    سيزر - أوعى تراهن على حد و لا حتى نفسك لأنها غالبا أول من سيخذلك - الحقيقة الوحيدة فى الحياة هى الموت و الباقى عبث فعلا عبث

     
  • At Saturday, July 01, 2006, Blogger khalid jarrar said…

    آي سييي!
    الف تحية للرجالة المجدع و الستات المية مية...و دئي يا مزيكة :))

     
  • At Sunday, July 02, 2006, Anonymous أزئوزة said…

    إيه ياتمرمر .... مختفية فين ، وليه ؟ كل يوم أفتح أشوف هل من جديد ؟ ألائيكي مختفية !!! القريحة عايزة شحن ؟ و لاَّ الزناد مش مقدوح ؟ لا لا ياتمرمر عايزاكي تشدي حيلك ، لحسن وحشني كلامك

     
  • At Sunday, July 02, 2006, Blogger khalid jarrar said…

    ro7ti fen? :*(

     
  • At Monday, July 03, 2006, Anonymous raniaٌ said…

    اوعي يكون فهمي نظمي رسمي عمل فيكي حاجة ولا مس شعراية من راسك.شاورميلنا انتي بس عليه و شوفي اللي حيجراله.عيييب يا تمارا انتي وراكي رجالة...اقصد حريم ياكلوا الزلط.

     
  • At Monday, July 03, 2006, Blogger تمر حنه said…

    الغالية بالأوى أزأوزة
    أدينى بقدح و ربنا أدعيلى انتى بس

    الزميل خالد جرار
    العراق - الزاوية الحمرا - حارة كتكوت
    أنا جيت أهو - رجليا جابتنى تانى

    المجدع رانيا
    منتحرمش من حبايبنا و وقفتهم جنبنا - شايلينك لعوزة يا ست الستات

     
  • At Sunday, July 16, 2006, Blogger أحمــــــــدبــــــــــلال said…

    حبيت و عندى 12سنة
    شربت سجاير و عنندى14سنة
    شيشةو عندى14.5سنة
    صور و مجلات من أياها و أنا عندى11سنة
    أفلام من أياها برضه و انا عندى13سنة

    علاقة كاملةلم يحث حتى الأن و لكن ممكن تسمحى و أعلن عن علاقة بدون الفعل الرئيسى عدة مرات تتعدى العشرين مرة و أنا عندى 18سنة

     
  • At Sunday, July 16, 2006, Anonymous monaiem said…

    هو في مشكلتين في الحقيقة
    الأولي - أن الأخلاق لا تفرض علي أحد, و لا حتى علي أولادنا
    الثانية - أن الأخلاق لا تجزأ, يعنى مش هينفع نتغاضى علي جزأ في سبيل الجزء الأخر
    كان الله فى عون الأباء و الأبناء تحت وطأة الأعلام المدمر

     
  • At Sunday, July 16, 2006, Blogger monaiem said…

    هو في مشكلتين في الحقيقة
    الأولي - أن الأخلاق لا تفرض علي أحد, و لا حتى علي أولادنا
    الثانية - أن الأخلاق لا تجزأ, يعنى مش هينفع نتغاضى علي جزأ في سبيل الجزء الأخر
    كان الله فى عون الأباء و الأبناء تحت وطأة الأعلام المدمر

     
  • At Tuesday, July 18, 2006, Blogger مسجل خطر بجد مش هزار said…

    وحياة ربنا معاكى حق فى كل كلامك وسعيد جدا انى دخلت البلوج ده
    http://dnafsany.blogspot.com/

     
  • At Friday, July 21, 2006, Blogger المزاجنجي said…

    تمورة هانم ايه العظمة دي اسمحيلي ارفع لك العمة (اصلي مش بالبس قبعه ) يا بنتي والله اللي بتقوليه صح ومليون فالمية سليم يا عم ايهاب انت راجل محترم وفاضل وهاتربي عيالك بما يرضي الله بس انت معاهم بره البيت ومع ولاد الكلاب زمايلهم اللي بيهدوا اللي انت بتبنيه في شهور في ثواني يا سيدي انا قعدت اكتر من شهر اشرح لبناتي ازاي لازم نحب بعض كا مسلمين ومسيحين لغاية لما انا زوري نشف والعيال نافوخها طق وبعد شهر فوجئت ان عند البنات فالمدرسة فيه فتنة طائفية وبيضربوا البنت المسيحية زميلتهم وده بسبب بنت اهلها مربينها غلط على الكرة والحقد وعرفت تاكل دماغ زمايلها ووصل الامر ان انا رحت للمديرة علشان تشوف لها حل المهم احنا بنبني فالبيوت وبيجوا اللي يهدوا من ورانا وممكن البنت تكون ملتزمة ومتدينة ويدخلها ابن الكلاب من باب الدين لغاية ما يطلع دينها ودين اللي جابوها فيا عم ايهاب انزل الشارع واتعامل مع المراهقين وانت تعرف ان تمر حنة داست على الدمل اللي هايجيب لنا الغرغرينا وممكن يوصل اجسامنا لحالة التسمم السريع يا اخونا صاحبوا ولادكم وبناتكم واياكم والعند العند بيورث الكفر والفجر والكوارث كلها انا باشرب سجاير من سن 12 سنة عند ولو اني كنت وعدت ابويا اني ابطلها وكنت راجل وبطلت بس عمي الله يرحمه صعب عليه ابويا وحس ان انا باثبته واوحى له بانه لازم انضرب وانضربت وعاندت وشربت سم هاري والان جلظة فالقلب وعدة ذبحات صدرية وخمس عمليات فالقلب ... وعلى راي حكيم (آه يا قلبي ) تمرحنة والله انا مش باشحت على نفسي بموضوع المرض ده لا تفهميني غلط بس لو هاتعملي حسابي معاكوا فالشاي ياريت بقسماطتين كمان معاك اخوك مريضض ويستحق المساعده هههههههههه ولكم ارق واعذب تحياتي

     
  • At Tuesday, August 08, 2006, Anonymous Anonymous said…

    Here are some links that I believe will be interested

     
  • At Saturday, August 12, 2006, Anonymous Anonymous said…

    Great site loved it alot, will come back and visit again.
    »

     
  • At Thursday, August 17, 2006, Anonymous Anonymous said…

    Keep up the good work. thnx!
    »

     
  • At Monday, September 11, 2006, Blogger Queen Zulaikha said…

    I know that you wouldnot like my coments, maybe you wouldnot even publish it at all. But i really donot like that way you express your thoughts. it is your right to do what want in your own blog, i know. But when you claim to be patriotic or religious or rational or moral protector, at least try to be convincing by usuing a decent language. And when u want to discuss political or religious or moral issues try to be convincing by discussing opinions and arguments not only to curse this and that! Anyway, r u really veiled? if so then i think u make me sure of my impression! And If u believe in freedom, at least allow others to express their thoughts free too, donot judge a film as bad because its speaking about freedom in a different way than what u believe.
    anyway,, i should wait to see what would u say about my comment, then maybe i ll change my mind maybe not!!

     
  • At Friday, July 27, 2007, Blogger Nostalgia said…

    يسلم كلامك يا رب ..
    للأسف ناس كتير محتاجة تفهم أن الفكرة مش ف الساعة حداشر الي بتتحول لساعة سندريلا ..
    وكأن الواد لو مجاش الساعة حداشر هتجتمع الذئاب البشرية لتبدأ الحفلة

    تسلمي يا رب دايماً

     
  • At Sunday, December 23, 2007, Anonymous الاسيوطى said…

    هاى يا جاعة انا الموضوع عجبنى بجد وتسلم الايادى الى تعبت والانامل الذهبية الى كتبت بعد تحياتى احب اعرفكم ان الموضوع عجبنى جداً وكل مشكلة انطرحت وانكتبت فيه حصل زيها معايا ماعدا شرب السجائر انا شاب سنى 19 سنة ولااكن اعتبر نفسى اعقل من رجل عنده 40 سنة لاانى لم اشعر بفترة المراهقة مثل باقى الشباب لاانى اجلس مع اصحابى ومع الناس فى الشارع والعمل وكل مكان اجد ان التفكير نابع من عقل طفل وليس عقل مراهق او عقل متفتح بالنسبة لشاب عنده 19 او 18 سنة انا كتير اتهذئت من والدى بسبب عدم المذاكرة واكتر لما كنت بسهر او بطول خارج البيت شوية كانت بتبقى ليلة كاحلة والمصيبة الكبيرة لما كنت اول مرة ابات خارج ( البيت من غير معرفة والدى )
    انا فاكر اليلة دى كويس (ومش هنساها(
    ليلتها كنت راجع الصبح وانا بقفل الباب لقيته بيقول مين وانا وفجاة فى وجهى (والدى)ساعتها حسيت عدة احاسيس وهى (التعاسة .والحظ السئ والضجر والملل . طبعاً كنت تعبان وعاوز انام . وكنت عاوز الموضوع ينتهى ) وحسيت ان الموضوع مش هينتهى الا بعد اسبوع الحمد لله كان نازل الشغل واتصل باختى علشان تستلمنى طبعاً ده بعد الكلاام الى يحبة قلبك اختى جات وفهمتها وجكتلها انى كنت عند اصحابى وهى طبعاً عارفانى كويس وبابا طبعاً عارف سلوكى ولااكن طبعاً الموازين انقلبت لما شافنى فى الصبح وانا راجع لما رجع بقى كان موال استمر ساعتين طبعاً لولا تعب مكنش هيسكت .بس من ساعتها بقيت اسهر بره عادى المهم اقول المبرر وانا طالع اعمل ايه وكدا . وللاسف ان المشكلة بتبتدى تتحل بعد الغلطة الاولى طيب ليه ميكونش من المرة الاولى يا بابا هروح عند صحابى وكدا ويشوف ويدرس الموضوع . وبعدين يقرر اروح ولا لا ولااكن للاسف وكانة عارف انا هقول ايه قبل ماقول هروح عندى واحد صحبى يقولى ومين يستناك ومين مش عارف ايه طيب تعمل ايه ابقى روح بالنهار وكان النهار ده مخصص للعمل وابليل الى يخرج يبقى خرج عن قوانين الطبيعة والبشر والناس ويريت كل اب وكل ام يدرسو الموضوع ويشوفو اولاادهم عاوزين ايه (ومع العلم ان الممنوع مرغوب )ولااكن انا متاكد ان لولا المواعظ والحكم الى بسمعها من والدى كنت هبقى زى اى مراهق طائش .واسمعو الكلاام ده او اقرئوه المهم يصل الى عقولكم .. وانا متاكد طبعاً انه هيوصل من امثال سليمان الحكيم
    من يوبخ مستهزئاً يكسب لنفسه هواناً ومن ينزر شريراً يكسب عيباً .
    لا توبخ مستهزاً للا يبغضك وبخ حكيماً فيحبك اعط حكيماً فيكون اوفر حكمة علم صديقاً فيذداد علماً.
    ان كنت حكيماً فانت حكيماً لنفسك وان استهزات فانت وحدك لتحتمل.
    كثرة الكلاام لا تخلو من المعصية اما الضابط شفتيه فعاقل.
    كالخل للآسنان وكالدخان للعين كذلك الكسلاان للذين ارسلوه.
    الى متى تنام ايها الكسلاان متى تنهض من نومك. قليل نومٍ بعد قليل نعاس واطي اليدين قليلاً للرقود فياتى فقرك كساعٍ وعوزك كغاز.
    الرجل اللثيم الرجل الآثيم يسعى باعوجاج الفم يغمز بعينه يقول برجله يشير باصابعه فى قلبه اكاذيب يخترع الشر فى كل حين يزرع خصومات لاجل ذلك بغته تفاجئه بليته فى لحظة ينكسر ولا شفاء.
    المستقيمين يسكنون الارض والكاملين يبقون فيها اما الاشرار فينقرضون من الارض والغادرون يستاصلون منها .
    ارجو ان يكون كلاام فيه حكمة لعقولكم

     
  • At Friday, April 25, 2008, Anonymous Anonymous said…

    أنا ولد والحمدلله معانتش أوي من اللي بيتقوليه وبس فاهمه وحاسه وعارف هو بيعمل ايه في نفسية الانسان باختلاف نوعه ومستغرب (ما شاء الله من جرئتك) وفي نفس الوقت معجب بيها جدا أنا عايز أقولك أن أنا مرتبط ببنت ومش هقدر أقولك أحنا بنعد نخطط قد ايه عشان بس نتكلم في التليفون والله العظيم, تخيلي بقى ايه اللي ممكن يحصل لما بفكر أقابلها أنا هديلك ايميلي واتمنا نكون أصدقاء لأننا دخلت على الموقع ده بالصدفه
    أنا حتى معرفش اسمه أناايميلي هو mido1midomana@yahoo.com
    سلام وربنا يكرمك واتمنا تدعيلي ربنا يفك زنئتي ويحققلي حلمي لأن الدعاء بظهر الغيب جميل

     
  • At Friday, November 14, 2008, Anonymous Anonymous said…

    أنا بدرس في مصر لوحدي بعيد عن أهلي من و انا عندي 17 سنة لحد دلوقتي و عندي 23 و بأمانة و مش بجمل نفسي لاني معرفكيش و انتي متعرفنيش عمري ما حطيت سيجارة في بقي و لا شربت شيشة و لا اي حاجة من الحجات دي ابدا و لا حتى على سبيل التجربة و عمري ما دخلت في علاقة حب مع اي ولد رغم ان ليا زمايل كتير من المدرسة او الكلية بس العلاقة دايما ليها حدود و دايما حاطة الخطيين الحمر دول قدامي عارفة ليه عشان ابويا و امي كانوا دايما يقولولي حاجة واحدة اللي ياكل على درسه ينفع نفسه كانوا يقعدوا معايا يقولولي يا بنتي السجاير اخرها كذا كذا و انتي حرة ان شاء الله تيجي تشربيها في البيت و عشان طريقتهم المحترمة دي في الكلام عمري ما لمستها لا قدامهم و لا من وراهم و قالولي يا بنتي لو عجبك حد تعالي قوليلنا ولو داخل جد اهلا و سهلا بيه بس انا مرتبطش بحد لاني ملقيتش الحد اللي بتمناه لان أغلبية الشباب دلوقتي للاسف بقا هايف عايش عشان السجاير و البنات و انا مبقولش اني ملاك طبعا ليا غلطت اوقات بقصر في الصلاة و اوقات بنتظم اوقات اعمل اللي عليا و اوقات اكسل بس عارفة ايه الصح و دايما برجعلوه و بادعي دايما ربنا ميحطنيش في موقف اتعدى فيه الخطيين الحمر انا رأي ان المفروض يبقى في منطقية في التربية يعني تقعد تتكلم مع ابنك بالمنطق و شكرا

     

Post a Comment

Links to this post:

Create a Link

<< Home