أيوه خدامه

Monday, July 03, 2006

قصة ولاّ مناظر ؟؟!ا




بقالى كام يوم و فيه سؤال بيزن و لامؤاخذة فى نافوخى شويتين كده : موضوع الرقابة عالأفلام فى بلدنا دى بيخضع لأية بالظبط :
أ- أسلوب تنشئة الرقيب و ميوله الدينية و الأجتماعية و الظروف بتاعته منذ الصغر و مووده العام أثناء الحكم على الفيلم
ب - ظروف البلد و الجو العام
ج - توجيهات عليا
د - توجيهات عليا جدا

شاهدت فيلم عمارة يعقوبيان : فيلم جيد: سيناريو و حوار و تصويرو اخراج و متكلف و نجوم غالية و كله فى الأوكى ( أنا مش متخصصة) و لكنى أنا الشعب – ومن حقى أنقد لأنى أنا التارجيت و هتكلم بفلوسى:
شاهدت خير اللهم اجعله خير شوية مناظر يا جدع – و لا حول و لا قوة الا بالله – فيهم الخلاصة.
بيقولوا اننا أخيرا انضمينا للجانب المتحضر من العالم و اتقتحت لنا أبواب العالمية .. ليه؟؟ لأننا بدأنا نكشف المستور عرينا المجتمع .. زغرطوا يا حبايب أتعرينا !!!ا
هو أنا بحلم – لأ ده مش حلم ده كابووووووووس
كابوووس ليه ؟ده فيه موسيقى تصويريه جميله – و بيقولوا تقنيه عاليه (مانا ماليش فى السينما) بس فعلا الفيلم شكله حلو صناعيا – بس يا حزنى عالمضمون
ليه احنا دايما بنفتح البرميل من الناحية الغلط – دايما ناخد القعر و نسيب وش القفص .
فيلم بيظهر وساخات المجتمعات جمعـــــــــــاء مجتمعة فى عمارتنا – عفوا بلدنا :
خيانة – شذوذ – عقوق – تصابى – اقطاع – احتكار - مخدرات – ارهاب فكرى – ارهاب دينى - تعسف سلطه
يا خبر اسود و منيل – المفروض يعنى ان دى كده سينما الواقع؟؟
لاهو فعلا مصر بقت كده؟ لأ مش كده أوى مانا فيها و انتو كمان لسه فيها
جرى ايه يا علاء يا أسوانى – هيا ناقصاك انت كمان ؟؟!!
قفلتها و قعدت على تلها يا فنان ؟؟ حطيت صباعك و لا مؤاخذه عالجرح طب ماتسيبش الجرح مفتوح و بينز - عالأقل بوس الواوا يا عم علاء خللى الواوا تصح - و أقترح علينا حلول
ايه كم السواد ده؟ هى المشرحة ناقصة قتلى ؟؟ ستات زفت – رجاله زفتين
ستات تحت رجاله و رجاله تحت رجاله و اللى مزنوقة فمخزن و اللى فبير سلم و اللى بدقن و اللى بدبوره
- هى دى مصر يا عبلة ؟؟!!

نرجع للسيد الرقيب و على أى أساس بيسمح بعرض المناظر المعروضة و بناءا على ايه!!ا
فيه حاجة أسمها الرموز – يعنى مثلا : بنشوف المطره بتنطر و البرق و الرعد يشتغلوا – أو الموج بيرزع فى الصخر يعنى حصل اللى حصل و الناس بتفهم و حلو كده
أو الراجل و مراتو بيدخلوا اوضتهم و نور الأباجورة ينطفى يبقى حصل المراد
ايه بقى الفن و العبقرية انك تجيب المواضيع بالمفتشر كده ؟؟ ماحنا عارفين كل الحاجات من كتاب البيولوجى بتاع تالته أعدادى - كل حاجه وهى مش ناقصة – ماكفاية القنوات و السايتات المستورده لازم المنافسة المحلية ؟؟ يعنى لازم تقضوا على مفردات الحياء والدين و العفة عند الشباب ؟
مش كفاية جملة للكبار فقط اللى ملطوعة عالأفيش زيها زى التدخين يسبب الوفاة – قطيعة عالشكليات .
يا عم على يابو شادى يا بتاع الرقابة : الدخلة بتاعتك كانت شديدة علينا قوى – مش المجتمع بتاعنا ده اللى تعرض له الفيلم ده بالمشاهد الصادمة دى و تقوله اسقاطات سياسية و ركز فى المضمون و سيبك من الشكليات –
احنا مجتمع مقفول واخد عالرموز – أما المناظر اللى سمحت بيها جعلت الفيلم يندرج تحت تسمية : فيلم ثقافى بدليل انو لو سيادتك حضرت العرض فى السينمات العادية اللى مفيهاش متخصصين و بعيدا عن المهرجانات – كنت هتسمع بودانك التعليقات و القفشات و الضحك الهيستيرى (خاصة مع مشاهد حاتم رشيد ( الشاذ) و هو بالجلابية ) لعيال مغيبة و بعيدة تماما عن الأبعاد السياسية أو الأجتماعية و اللى بيمثلوا بتاع 80% من مجتمع الشباب
يعنى فكرتنى بالظبط بواحدة لابسة مايوه ماشية فى شارع قصر النيل الساعة أتنين الضهر – أبو مين ده اللى مش هيبحلق فيها و هيتصرف بهمجية معاها و يحسس و يعتذر !! فى حين أن الست دى نفسها لو مشيت فى الشانزليزيه بنفس الملابس و فى نفس التوقيت ممكن اتنين تلاته (من أصل عربى) هما اللى يرصدوها.
وحيات أبوك ماتخلطتش عيشا على أم الخير و تجيلنا من فوق لو العين على ايرادات الشباك - بلا ليبرالية بلا بدنجان .
القصد يا عم على : لكل مقام مقال و كل برغوت على أد دمو – عايز ترتقى بفكر الشباب يبقى دنجه دنجه – دالعيال ليلاتى بيحلموا بسوق العيش - نوكلهم الأول و نشبعهم و نجوزهم و نملى عنيهم و بعدين خش بالأفلام العالمية و الأسقاطات و الأتجاهات السياسية يا عسلية .
هزها بشـــــويش بشـــــويش خلى الشعب يعيييييييييييش
يا عاـــــــــــــــــــــــــــــــــــــــــى

66 Comments:

  • At Monday, July 03, 2006, Blogger النوبى said…

    رقابة ايه الى انتى بتقولى عليها هى تقدر تقف فى وش عادل اما والناس الى معاه على رأيك انا لما كنت فى السينما الناس كانت مبهدله الدنيا وخرجا بتلعن اليوم الى دخلت فيه الفيلم ده

    بس بصراحه الفيلم جامد اوى وبيتكلم عن حجات كتير موجوده فى بلدنا ديه
    والفيلم كان جرىء اوى اوى

    ياريت تيجى تقرى الموضوع بتاعى

    النوبى
    رئيس جمهوريه اسوان العربيه

     
  • At Monday, July 03, 2006, Blogger khalid jarrar said…

    mish bit2oolo fma9r, illy ikhtasho mato?

     
  • At Monday, July 03, 2006, Blogger still breathing said…

    ايه الجديد؟ الفيلم مضمونه معروف لأن الرواية في أيد الناس كلها من ساعة لما نزلت.... اللي بيضايق ميروحش يتفرج...بسيطة

     
  • At Monday, July 03, 2006, Blogger Epitaph said…

    للأسف القصة رغم ان فيها اشياء جيدة
    الا انها ليست من اروع ما قرأت كما صورها البعض
    والفيلم اتفق معكي ان المسائل ماتكونش علي عينك يا تاجر مما يؤدي الاخرين
    كتير من الناس رايحة الفيلم علي اساس انه مناظر
    وليست قصة سوداء عن ليل مصر
    وللحديث بقية ان شاء
    تعليقك حلو بجد يا ست الكل
    صحييييييييح شكرا ع التعليق عندي يا قمر, بجد فرحت لما شرفتيني ابقي تعالي صيف عندنا

     
  • At Monday, July 03, 2006, Blogger بعدك على بالى said…

    العزيزة تمر حنه
    ده انت لسه فى البوست اللى فات بتقولى نتحاور مع الشباب ونحتويهم و... والى اخر اللى قلتيه وانا موافقه عليه، خايفه بقى ليه من ان فيلم يخرج اجتماعيا وفنيا عن المسكوت عنه، خايفه على شبابنا انه يشوف ده ليه، طيب ماهو عارفه وعارف اللى اكتر منه واللى انتى وانا منعرفهوش بحكم تخلفناعنهم 7 الاف سنه حضارة ...
    متضايقة ان الفيلم عرى المجتمع، ماهو احنا كده فعلا، ده واقعنا المهبب، دى القاعدة وانا وانتى وغيرنا الاستثناء، فعلا هى دى مصر ياعبله،
    فى الفيلم حكايات مرعبة وشديدة المأساوية عن حياة مصر والمصريين في هذه المرحلة الصعبة من تاريخها، والمرعب حقا أن المأساوية تنبع من جرعة الصدق المباشر فى رصد الاوضاع والعلاقات وماوصلت اليه الأحوال من تفكك وتفسخ بعد ان اختلطت منظومة القيم واختلت موازين السياسة والساسة وعلى كل المستويات... الفيلم بيرصد بصدق انهيار التركيبة السكانية لسكان المحروسة كلها وليس لعمارة يعقوبيان فقط.
    الفيلم فى راى المتواضع جدا اقتحم الكثير من القضايا الشائكة والمحظورة في السينما مثل مساحة الحدود بين الحلال والحرام، ودهاليز السياسة وكواليسها، وفساد المسئولين الكبار، وجماعات تصنيع التطرف باسم الدين، والشذوذ الجنسي، وقضايا كثيرة أخرى وده دور الفن من وجهه نظرى انه يكشف ويعرى بوضوح، مش انه يقدم حل، الفن دليلنا، كاشف وليش روشته علاج، والاهم انه يقدم وبدون رقابه اللى فى راى انها رقابه مرتعشه تكيل بمعايير غير واضحه وبلا منطق، فجميل انها تسمح بهذا الفيلم حتى لو بسبب علاقات منتجه عماد الدين اديب ونفوذه، جمهورنا فى راى لازم يتصدم لازم يعتاد يشوف سينما بتحترم عقله، لاتداعب غرائزه وتسليه( مش ضد افلام التسالى والفشار بشرط تكون معموله كويس) انا مع الافلام اللى لاتجمل الواقع، مش مع الاباحية طبعا لانه فى فرق بين تعريه الواقع وتعريه الاجساد ، انا ضد اننا مانظهرش بلادنا وسخة كده، لا لازم نظهرها علشان تنظف، انا لا احب السينما التى تتجمل، بالمناسبه الفيلم ماكانش فى اى مشاهد عرى تخدش حياء احد، ولكنه واقع صادم تم ترجمتة بلغة سينمائية شديدة الرقى والحساسية..
    خالص تحياتى وعفوا للاطالة

     
  • At Monday, July 03, 2006, Blogger بعدك على بالى said…

    معلش نسيت اقول حاجه
    انتى بتكتبى هنا لانك بتعبرى عن فكرك ورايك وبدون مصادرة، مايفهم ضمنيا انك مع حرية الفكر، طيب ليه معترضه عندما يستخدم مبدع نفس الحق ومن خلال وسيطه ..

    الافكار لها اجنحه ومش ممكن تمنعيها من الطيران.... وكفايانا قهر وكبت، هو اللى حصل لطه فى الفيلم مش نفس اللى حصل لشرقاوى ؟؟؟ هى دى مصر ياتمر حنه

     
  • At Monday, July 03, 2006, Blogger khalid jarrar said…

    well, the thing is, we all know that there are alot of bad thigns in our countries, and thats all what everyone talk about everyday.

    it would be just refreshing to see a movie talking about something that is actualy positive in our countries.
    it would be really refreshing if a movie showed a religious man that doesnt turn out to be a thief or a liar.
    it would be refreshing to see a movie that gives you some hope, instead of reminding you of all the -for the lack of other words, b3d iznik ya tamr 7inna- shit that is around us all the time, we dont need someone that discribes how bad that shit smells. we all know that.
    o lamma yiji wa7id zay 3adil 2imam -illy ana bakraho b`3azarah- yi3mil film bi66areeqa di, tla2i inas tibtidi tfakkar in il `3ala6 howwa il qa3da o in il 9a7 howwa il istithna2, la2 ya sitti, il 7ilo howwa il wa3da o il wi7ich howwa il istithna2, il qa3da hiyya tamr 7inna o b3dak 3ala bali, o il istithna2 homma innas il mish kwayyiseen, ma tkhalli 3inna shwayyit thiqa binnafs ya jama3a!

     
  • At Monday, July 03, 2006, Blogger 451 فهرنهايت said…

    مبدئيا ..أنا ضد الختراع المدعو بالرقابة على المصنفات الفنية (عشان أجيب من الاّخر)
    فيه شيء اسمه حرية الاختيار ... يعني الشخص صاحب التحفظات والذي يخدش حياءه من كلمة أو منظر وقد تقوم الدنيا ولاتقعد لو وردت أمامه وأما عياله كلمة (جنس) علنا على اعتبار انها من مثيرات الغرائز
    الحساسية المفرطة التي نعامل بها الموضوعات الحساسة (هوة ايه اللي خلاها حساسة أصلا؟) ... خلقت اتجاهين متعارضين في البلاد يتجادلان بغل ونقمة يوميا
    فريق يدعو للأخلاق الحميدة وبلاش نتكلم بالمفتشر وحافظوا على الدين والشباب (باعتباره عويل وعديم الادراك) واتقوا الله فينا
    وفريق اّخر لديه نفس الحساسية لكنه يغلفها بالغلو في استعراض الثقافة المستورة الى درجة الاباحية ... ربما لمجرد الرغبة في لفت النظر وتحريك الجموع الساكنة (الحاجات دي بتجيب جمهور ياعبده)
    انا لم أرى الفيلم بعد ... لكني أناقش المبدا نفسه
    ليه دايما نطلب من (هم) أن يلغوا المناظر الوسخة ... (هم) يمنعوا الأفلام الكافرة ... (هم) يقاطعوا قنوات الكليبات السكساوي على طول ... (هم) يصادرون الروايات الكخة ذات المضامين المعارضة لمجتمعنا -اللامؤاخذة- محترم؟
    ياستي ايدك ع الريموت كنترول وغيري المحطة وملعون أبو دريم
    ياستي فلوسك في جيبك والسينما العظيمة والسينما الواطية كلاهما ع الرصيف
    هل لهذه الدرجة أصبحنا عاجزين عن التحكم في مجريات حياتنا فيكفي فيلم أو رواية أو كليب ساخن في قلبها رأسا على عقب؟
    هناك أفلام عظيمة الجودة والصناعة والأفكار ... ربما أعتبر بعضها أفلاما اسطورية ... لكن فقرة الرقابة في مجتمهنا المؤدب تعمينا عن اصطياد مابين سطورها فيختلط الفن بالاباحة بالرداءة والتشويه والعبث
    لذا نبسط الأمور في نهاية المطاف ويختزل العمل الفني الى خيارين لاثالث لهما
    قصة ... ولا - لامؤاخذة - مناظر

     
  • At Monday, July 03, 2006, Blogger Pianist said…

    انا مع رأي بعدك علي بالي في حرية الرأي لكن انا مش معاها في نقطة "من غير اباحية"
    ليه من غير اباحية؟

    النقطة التانية اننا محتاجين للفضح ولثقافة الفضح ايه المشكلة اننا نقول ان المجتمع مش بالجمال ده لأنه فعلا مش بالجمال ده ليه نخبي ونضحك علي نفسنا

    انا ماحبتش الرواية اوي وشايفها عادية ومش باتكلم علي الفيلم برضه لأنه مش الفيلم المبهر يعني لكن انا باتكلم علي الفكرة نفسها
    ان الفضح شيء مش وحش بالمرة بالعكس
    كفايانا رموز واشارات خدنا منها ايه غير الكبت والحزق والنفاق والمجاملات
    ده رأيي

     
  • At Monday, July 03, 2006, Blogger بعدك على بالى said…

    الى بيانست..
    انا لما قلت "طبعا من غير اباحية" كنت اقصد الافلام اللى لاهدف لها الا ابتذال الفن واختصاره فى بضعة مشاهد حقيرة، انا ضد ان نعرى الاجساد لنغطى النقص فى الافكار أو الموهبه، لكن لو فيلم مليان مشاهد خارجه على النص لكن مقدم فى سياق درامى وله مايبررها فما المانع ولست ضدها، وكما قال فهرنهايت واتفق معه بشده انا ضد المصادرة والمنع فى المطلق ، محدش واصى على حد، ومش عاجبك غير المحطه ...
    يمكن اخطات فى عدم التوضيح وارجو ان تكون فكرتى وصلت، فانا من عشاق السنما وارى انه من العار أن نبتذلها بهذا المسخ، المسمى تجاوزا سينما وهى منه بريئة..

     
  • At Monday, July 03, 2006, Blogger بعدك على بالى said…

    بالمناسبة الفيلم سينمائيا انا لى تحفظات حوله يعنى مش بقول انه سوبر ستار ولكنه فى المجمل يعود بنا بالسينما لاطارها السليم والحقيقى


    اسفه ياتمر طولت

     
  • At Monday, July 03, 2006, Blogger Sampateek said…

    الصديقة الغالية تمر حنة مدونتك زي السكر و اوافقك عليها مئة في المئة و احب ان اضيف الي انني لم أتحمل ان أكمل مشاهدة الفيلم و غادرت صالة الغرض قبل نهايته لاني شعرت بغثيان و الم حقيقي في جسدي و كانني قد مر علي قطار او سقطت من الدور العاشر و بالرغم انني لا انكر ان الفيلم يجسد حقيقة واقعة الا ان طريقة عرضه فيها نوع من التعميم و كان البلد كل رجالها شواذ و كل نسائها عاهرات و البقية الباقية ساقطة بين البرود الجنسي و الكبت و في اعتقادي ان الفيلم موجه الي الحكومة لتري ما وصل اليه حالة الشعب الغلبان فالبلد اصبحت مزابل من فوق(علية القوم) و من تحت مسخ(الشعب المطحون) اللي بقت حياته مفيش امسخ من كده

     
  • At Tuesday, July 04, 2006, Blogger Me2 said…

    لأ لأ لأ يا تمر حنة
    متغلطيش في الزعيم أحسن يسقطوكي في الإمتحان و يحرموكي من التدوين :)
    وإن دل هذا الفيلم على شيء فإنما يدل على حرية التعبير و اديمقراطية و الإنفتاح على العالم الخارجي
    أنا إبتديت اقرأ القصة بقالي يومين و مقدرش أقول إنها جايبة جديد
    الحاجة الوحيدة اللي شفتها جديدة... البجاحة اللا متناهية و كإن اللي كتب الرواية شاب يا عيني محروم
    عموما الإقبال على الفيلم بالشكل ده بردو هتلاقيه بسبب الحرمان
    ولو إني أشك إن فيه واحد محروم في بلدنا دي
    القصة في منتهى الإبتذال و مش لاقية فيها أي إبداع
    حتى إسلوب الكاتب عادي و مش شايفه إنه متميز في حاجة و كتير تلاقي جمل متكررة
    مش فاهمة البلد دي بتفكر إزاي
    يعني تمنع فيلم و قصتة الرائعة (شيفرة دافنشي) بسبب الإعتراض عليه ومتمنعش الإبتذال

     
  • At Tuesday, July 04, 2006, Blogger كلمه said…

    elfilm bel nesba lel nas mogarad film manazer... esra7a ya3ni elly 3ayez yefham elfilm yetfareag 3leh lewa7doh aw ye2rah elrewaya aw 3anoh ma fehem 7aga ..ya3ni e7na fahmeen 7aga mel bte7sal fel bld gatkom el2rf

     
  • At Tuesday, July 04, 2006, Blogger sha3'af said…

    أنا نفسي أشوف الفيلم من أول ما عرفت إن الرواية هايعملوها فيلم

    بس لسبب واحد : إني أشوف الخلطبيطة دي كلها ممكن تنتظم ازاي في عمل سينيمائي

    واحدة صاحبتي افتكرت ان سبب استغرابي - اللي ممكن يوصل حد الاعتراض- على تحويل الرواية لفيلم كمية ماتطلقون عليه " مناظر " أو الجزء الخاص ب حاتم رشيد مثلا أو الأجزاء المماثلة

    بس بيتهيألي الواحد لو دور كويس في السينيما العريقة بتاعتنا هيلاقي حاجات أزفت من كدة بكتير ، وبرضة بشكل واضح ومتبجح وإن ادعى التستر تحت الرمز
    يمكن بالعكس ، السينيما لما بتستعير الرموز الساذجة بيكون غرضها غالبا الاستثارة و اللعب ع المناطق دي وغالبا بشكل مالوش أي علاقة بمضمون الفيلم

    الرواية مش عظيمة ، بس منتشرة
    ويمكن تكون مجرد حكي بدائي أكتر منها رواية
    لكن بيتهيألي ان ممكن سيناريست كويس زي وحيد حامد يعمل منها حاجة

    وده يمكن أكتر فضول ليا في اني أشوف الفيلم

    وإن شاء الله يبقى لينا كلام تاني بعد رؤيته

     
  • At Wednesday, July 05, 2006, Blogger Epitaph said…

    I did watch the movie as well..it is very daring..and the cinematographers gloat at this point...hmm..I did publish my review as well...it is a very controversial movie...ashokek henak ya Tamoraa ..a7b a3raf ra2yek bardo..wadeena benwasa3 magal monkshet el Film )) salam!

     
  • At Wednesday, July 05, 2006, Anonymous أزئوزة said…

    تمرمر بعد التغيير
    دة عنوان بلوجك الأخير ، من وجهة نظري المتواضعة

     
  • At Wednesday, July 05, 2006, Blogger أُكتب بالرصاص said…

    ينهار مش فايت ...

    انا بعد ما قرأت القصة سألت نفسي ، طيب إزاي المخرج هيعالج كل المشاهد إللي علاء رسمها في روايته ؟ بالرموز ؟ بالتصوير الايقاعي ، بايه بالضبط .
    يعني مسألة الزنقور إللي في المخزن دي . قلت مستحيل تظهر او حتى يلمح لها على الشاشة ,!
    شكله عملها !!

    طبعا انا ماشفتش القيلم ، لانه معروض على بلاد جوه ، واحنا بلاد بره لسه ماجاش
    أه ...يا مانتوم مدلعين نفسكم ياولاد مصر !!!

     
  • At Wednesday, July 05, 2006, Blogger Ahmed Shokeir said…

    كالعادة دائما ياتمر حنه أختلف معاكي جملة وليس تفصيلا
    إذا كنتي بتقولي ان معظم من يدخلوا الفيلم ليس لهم بالأبعاد الثقافية والإجتماعية والسياسية الخاصة بالفيلم بقدر ماهم يشاهدون فيلم مناظر وضحك على الشاب الشاذ فذلك احد اسبابه الفكر الذي تنادي به الآن ، فهم لم يتعودوا على هذا النوع من الافلام الذي أعتقد ان اسقاطاته ليست صعبة الفهم بل فيها من المباشرة ومن الواقع مايجعلهم يتتواصلون مع مايشاهدون ولا شك ان لغة السينما اقوى لغة ميديا لتوصيل اي رسالة ، والحل بالطبع ليس المنع والرقابة وماذكرتيه عن مايوه وسط البلد يدل على انهم لم يتعودوا على هذا المنظر بالرغم من انهم يشساهدوه على البلاج بنفس الشكل ولكن باستقبال اهدأ
    مشكلة ذلك في الفكر التعتيمي وجميع الافلام التي تظهر الحياة السطحية بايجابيتها افلام فاشلة لاترقى لافلام سمير غانم من ناحية القيمة الفنية
    وماتزعليش اوي عاملين استجواب في مجلس الشعب لمنع عرض الفيلم

    والتمانين في المية اللي دخلوا الفيلم من النوعية اللي ذكرتيها هاتقل نسبتهم لو هذه النوعية من الافلام مثل يعقوبيان قدمت لان ثقافتهم ونظرتهم سوف تتغير وسوف يشاهدون تلك الافلام من زاوية اخرى تحرك عقولهم قبل هرموناتهم

    ثقافة المنع بحجة تشويه مصر اسمحيلي عفا عليها الزمن وجار

     
  • At Wednesday, July 05, 2006, Blogger Ahmed Shokeir said…

    تنويه لازم
    كتبت التعليق بالرغم من عدم مشاهتي الفيلم ولكن قرات القصة وتعليقات كثيرة على الفيلم تجعلني أكاد اكون شاهدته
    وتعليقي ناشئ عن مبدأ عام لذلك مشاهدة الفيلم من عدمه لن يغير شيئ في تعليقي

     
  • At Thursday, July 06, 2006, Blogger ملك said…

    This comment has been removed by a blog administrator.

     
  • At Friday, July 07, 2006, Blogger تمر حنه said…

    السيد الرئيس النوبى
    فعلا الفيلم جامد و بيحكى عن حاجات حقيقية – أنا شفت البوست بتاعك شكلة جميل أوى بس محتاج تمحيص فى القراءة – أنا هدخل أعمل شوية شاى و أتمعنن و أسيبلك أحلى كومنت


    Still breathing
    الرواية غير الفيلم تماما – الروايات ليها ناسها بس السينما لكل الناس
    و بعدين اللى بيضايق لازم يقول متضايق من ايه و الا هتبوظ أكتر ماهى بايظة – و لازم أروح أتفرج


    Epitaph the sugar lump
    بصى القصة كويسة بالنسبة لقصص تانية كتير و الأسلوب التكنيكى راقى الى حد لم نعهده من قبل – و لكن شفتى الضلمة؟ حسيت انو بيقتل بواقى شعاع أمل عندنا فى أى اصلاح سواء سياسى أو دينى أو اجتماعى .....

    الغالية بعدك على بالى
    ستوب عندك : ايه العلاقة بين احتواء الشباب و اغواء الشباب؟؟؟
    ايه همزة الوصل بين محاورة الشباب و بين كسر سيف الحياء؟ هو أنا عشان أحترم مشاعر بنتى الطبيعية اللى لازم أقوّمها بمنتهى الحنكة و الصبر معنى كده انى أفتحلها الجراب و أوريلها اللى فيه و أقولها عااادى يا ماما انك تشوفى المثليين بيتعرفوا ببعض ازاى و يمارسوا حياتهم الطبيعية ازاى ماهى دى الحرية يا ماما ؟؟
    طبيعى ان بنتى و ابنك يتعرفوا على مشاكل مصر من خلال عسكرى الأمن اللى رمى مراتو عالسرير و انبطح فوقها مباعدا بين رجليها و قالها هوريلك معرفش ايه؟
    من حق السنما فعلا ان تكون مرآة المجتمع و تأريخها و مصدر الهام - طبيعى أن تكشف دهاليز السياسة و كواليسها و فساد المسئولين الكبار عشان منعيشش حمير و بنتركب من اللى جوة و اللى برة - و لكن الا الدين – الفيلم فيه دعوى بالحاح الى قبول اللوطيين فى المجتمع بدليل ان خالد الصاوى كان مبدعا و رقيقا الى حد كبير و عرض ماضيه و ترك اهله له و قربه من ادريس الخادم حقيقى جعلنى انا شخصيا متعاطفة معاه جدا
    يا ست الكل السينما اللى شفتها مش مجرد متعه دى كانت السم فى العسل
    فتح طاقة جهنمية جديدة على ابنك و ده مش جديد على وحيد حامدالمعروف دوما بمهاجمة الأسلام و الأسلاميين من خلال مهاجمة كل ماهو أخلاقى بسبب أوامر ربنا .
    مش مهم الحل – يكحلوها أو يعموها فان شيئا لن يتغير – المهم الأثر – المهم ان الفيلم ده أول حلقة فى سلسلة أفلام قادمة ستأخذ من جتتنا و جتة عيالنا راقات
    أنا بفضفض فى مدونة محدودة جدا زيها زى الرواية أو الكتاب و ده عمره مابيأثر فى جيل زى فيلم متكلف 22 مليون ملطوش فى جميع دور العرض لمدة عوشروميت شهر – هيتشاف يعنى هيتشاف و بعدين أنا لانا هند صبرى و لا عادل امام لا عندى سيكس ابيل ولا كاريزما و مانيش مؤثرة و لو كان التدوين مؤثر يا ست الحبايب ماكنش حصل للشرقاوى اللى حصل
    انا مستغربة ان حياءك لم يخدش من المشاهد الأباحية – على فكرة انتى جامدة أوى

    القدير خالد جرار
    يادى النيلة رجعت تانى تمقق عنينا بالحروف الأفرنجى و مالو – أنا فاهمة انت عايز تقول ايه
    أصل يا خالد مصر لسة فيها شوية ( شيت) و لامؤاخذة لسة ماشافتهومش – عملوا استفتاء و لقوا تلاتة أربعة مصريين لسة ماكتأبوش فقالوا يالا نكأب أهاليهم – ماشى الحاضر أسود و شكلنا هنركب المرجيحة هنركبها – طب مفيش شوية بلالين و نفافيخ (طبعا مش هتفهمها) و جاتوه قبل المرجيحة؟ لأ عايزينا عالحامى
    فعلا هم عايزينا ننسى ان القاعدة تمرحنة و بعدك على بالى و ان هما الشواذ – بيسموها سينما الواقع –متقلقش هيعودونا على المناظر دى زى ماتعودنا على مشاهد القتل فى فلسطين و الفالوجا .

     
  • At Friday, July 07, 2006, Blogger تمر حنه said…

    حفار قبور المحروسة فهرنهايت
    يا راجل عايز تلغى اختراع الرقابة عموما كدة؟ طب انهى رقابة؟ الرقابة على الفكر و لا الرقابة على العرى و لا الرقابة على ايه بالظبط؟ لو مفيش رقابة تأكد ان أنت و بيتك أول ناس هتندهس – الرقابة دى ليك مش عليك واخد بالك؟
    المشكلة فى مين الرقيب؟ من أى كتاب بيقرا الممنوع و المسموح – أنهى سيستم ..
    و بعدين بص يا فهرنهايت – الغريزة دى فطرية و مواضيع الجنس فى الأصل حساسة أصلا - محدش خلاها حساسة يعنى دى القاعدة و لكننا اتعودنا على فتح الملفات الجنسية شوية شوية و أصبح المثير جنسيا بالأمس يفقد تأثيره اليوم
    و السينما عموما بوظت المتعة دى على البشرية و جعلت عدم الأستجابة عند الطرفين عالى جدا (راجع استهلاكات الفياجرا اليومية)
    و بعدين فريق الأخلاق الحميدة مالو؟ ماهو لازم يبقى فيه (هم) كمان اللى بيفكرونا بالحلال و الحرام و الحجاب قبل الحساب و ان اللواط حرام و الزنا حرام و يجب مقاطعة كل شئ سكساوى بعدما أصبح كل شئ فى متناول أى حد بس بشرط اننا نتناسى طريقتهم الحنجورية و اسلوب الكريشندو اللى بيستخدموه فى عرض أفكارهم ( بصراحة الطريقة بس هى اللى بتنرفزنى)و لكن مفيش اختلاف على الصح و الغلط
    أرجوك خش الفيلم و احكيلى بالظبط حسيت باية لما الراجل الشامى زنق هند صبرى فى مخزن الهدوم و لامؤاخذه .. (مش قادرة أكمل)
    على فكرة مش هغير المحطة لان دى طريقة المهمشين و أنا ضد سياسة المقاطعة و بعدين ما (هم) اللى فى ايدهم كل حاجة أمال أطالب مين ؟؟ أمى


    Pianist
    يا فنان يا جميل - بقى هى ناقصة اباحية و فضح؟ ده ربنا أمر بالستر
    و من موقعى هذا أحيي وزير الثقافة الفنـــــــــــان – برضك


    سارة الجميلة
    بهنيكى على حساسيتك المفرطة و سلامتك من الوقوع من الدور العاشر و نصيحت لما تخشى السينما تانى يا أوختشى انك تلبسى براشوط – موااااه

    Me2
    الله يمسيكى بالخير يا ألاء بصى سيبك من القصة و جيبى من الأخر و خشى الفيلم تلات ساعات و اقلب – الفيلم حقيقى أثر فيا و ده اللى مخوفنى منو لأنه فيلم صناعة جيده أما بالنسبة للأقبال على الفيلم فبيقولوا انو تراجع فى الأسبوع التانى – غريبة و ربنا ده فيلم مناااااااظر

    كلمة
    حقيقى جاتنا الأرف فى وشنا
    محدش فاهم أى حاجة و مش عارفين نمشى ورا أنهى سكة و لا نسكت ولا نتكلم ولا نعمل ايه!!ا
    جاتنا ستين أرف

     
  • At Friday, July 07, 2006, Blogger تمر حنه said…

    Sha3’af
    السينما دى سلاح ذو حدين – البعد الرابع – الخيال – التحليق – السحر ...... و فى نفس الوقت قدرت على مدى أكثر من 100 سنة انها تقنعنا بأشياء وهمية مثل الحب العذرى و الصور المثالية للبنى أدمين و نقيضها أيضا – السينما رسمت صورة السوبرمان و السوبر وومان و معبودة الجماهير و قاهر الجواسيس و .. و .. مش مجرد ساعتين تلاته قدام شاشة لأ ده كل فيلم بيسيب جوانا معالم و تضاريس و سهول و أودية – بتشكل معالم خريطتنا الجغرافية

    أزئوزة الشقية جدا
    مفيش تغيير ولا حاجة بس أنا فيا جوانب كتيرة : أبيحة – ثائرة – مستكينة – مؤدبة - زى ناس كتير فى الحياة
    النهاردة خالى المتحفظ هو اللى حاضر – فخمتو ؟؟؟

    Itstoolate
    و ربنا وربنا مشهد الزنقور اللى فى النخزن دى بالذات جايه جهارا نهارا ولافيه جدر بطاطا ولا رموز ولا تصوير ايقاعى
    ماحنا هنا متدلعين و حكومتنا بتنغنغنا و مش حارمانا من حاجة – يجعله عااااااامر


    الغالى بالأوى شوقير
    ربنا مايجيب اختلاف : أولا أقرا ردى على : بعدك على بالى
    ثانيا: أنا لست ضد تفتيح عقول الشباب و لكنى ضد تفتيح رجليهم – موضوع اللواط بالذات تناوله القرآن الكريم فى أكثر من سورة و فهمنا ايه حكايته و يعنى ايه و الحكاية و الرواية و لكن من غير أى أثارة للشهوه (صح؟) و كذلك موضوع الغواية فى قصة سيدنا يوسف مع امرأة العزيز - و هو فيه ثقافة أعلى من كده؟
    قشطة جدا تناول أكثر المواضيع شائكية لأى غرض : للتفهيم – للتثقيف – للمتعة البحتة (مش عيب) – للرفض و لكن العيب فى اللعب بالهرمونات يا هندزة –
    مش حلو ان يبقى عندك جيل بارد جنسيا و لا يتأثر بمشاهد من المفروض أن تثيره و ذلك بجعل هذه المشاهد عادية بالنسبة له بفعل كثرة تمريرها له و اعتياده عليها – ايه بقى رسالة الفن هنا ( الا لو الفيلم من انتاج شركة فايزر )
    أما بالنسبة للأستجواب فمن تداعيات تدهور الموقف فى بلادنا المحروسة أن الذى اعترض على بعض المشاهد هو أحد النواب و هو ليس برجل دين – المفروض ان اللى يعترض هو الأزهر أو الأخوان ( ايه اللخبطة دى ؟؟)
    تعرفش فين بيروحوله منين و النبى ياخويا؟

     
  • At Saturday, July 08, 2006, Blogger mitar2a3 said…

    tamr 7ina,

    kol elli gwaia min na7iet el film enti oltih b7azafeero!!

    all,

    ya gama3a bas nifham 7aga allah yrda 3anko .. law 7adaratko mosakafeen w bti2ro w btiktibo w 3andoko ra2y ...
    E3RAFO 7AGA WA7DA .. (MISH KOL MASR ZAIEKO) !!!!
    ya gama3a momkin gidan tawseel el ma3loma min 3'ir esarit shahwa !!
    e7na lih kolina moktan3in en el 7oria fil ra2y yatba3ha wgood 3araia w afkar shaza !!!!

    kol elli haystafeedo 70% min moshahidy el film howa el esara fakat !!, law mish misada2in shofo fikrit mo3zam el nas 3n aflam 3adil emam !!!
    mahy bardo fiha fikr w eskatat w gins .. bas mo3zam el nas shaf el gins bas !!! 3arfeen lih ?

    bil zabt zai wa7id da7'l net bas 3shan mwaki3 gins aw chat 3n gins wama aksar ha2ola2 !!

    abl manifta7 el bab 3al ba7ary lazim nishof binwagih el kalam lmeen!!
    el afkar mish lazim dayman tiwsal bil gins wil shizoz ya gid3an !!
    wi kaman mafeesh 7aga esmaha da mobdi3 w lih 7oriet tar7 afkaro !!
    ya gid3an el kalam da fi makal, fi kitab bas mish fil cinima elli fi kol karia dilwa2ty !!

    ta7ia gamda gidan liky ya TAMR .. yslam bo2ik lol

     
  • At Saturday, July 08, 2006, Blogger khalid jarrar said…

    "أنا لست ضد تفتيح عقول الشباب و لكنى ضد تفتيح رجليهم – موضوع اللواط بالذات تناوله القرآن الكريم فى أكثر من سورة و فهمنا ايه حكايته و يعنى ايه و الحكاية و الرواية و لكن من غير أى أثارة للشهوه (صح؟) و كذلك موضوع الغواية فى قصة سيدنا يوسف مع امرأة العزيز - و هو فيه ثقافة أعلى من كده؟
    قشطة جدا تناول أكثر المواضيع شائكية لأى غرض : للتفهيم – للتثقيف – للمتعة البحتة (مش عيب) – للرفض و لكن العيب فى اللعب بالهرمونات يا هندزة –
    مش حلو ان يبقى عندك جيل بارد جنسيا و لا يتأثر بمشاهد من المفروض أن تثيره و ذلك بجعل هذه المشاهد عادية بالنسبة له بفعل كثرة تمريرها له و اعتياده عليها – ايه بقى رسالة الفن هنا ( الا لو الفيلم من انتاج شركة فايزر )
    أما بالنسبة للأستجواب فمن تداعيات تدهور الموقف فى بلادنا المحروسة أن الذى اعترض على بعض المشاهد هو أحد النواب و هو ليس برجل دين – المفروض ان اللى يعترض هو الأزهر أو الأخوان ( ايه اللخبطة دى ؟؟"

    الله اكبر! الله اكبببببررر! ايه الجمال ده؟ ينصر دينك يا استازه..تمر حنننه!

     
  • At Saturday, July 08, 2006, Blogger يا مصر اكتب إليكي رسائلي said…

    أختي العزيزة تمرحنه
    وحشتيني ..

    وجيت اشقر ،وأشوف الدوشة اللي حواليكي كالمعتاد وانتي لماهم بعد الغذا زي اختي وهيا بتمارس حقها الطبيعي في كونها ماما التانيه وتلمنا وتقرص وداننا .. ورغم اني من اصلي عربي وبتمشى في اماكن كتير احلى من الشانزليزيه .. استأذنك لزيارتي والتعليق مع الأخذ في الأعتبار اني محدث تدوين ولسه يعني على الدرب احبو ..وكالعادة.. يا سكر زياده ،ومقالك عن الفيلم جيد جدا وبفلوسك ايوه ، رجي العلب وصحي الناس .. انا مش قادر اتكلم على الفيلم لأني مش شفته لسه ولا اعتقد اني ها شوفه ..لكن كلامك موجود حقيقته في أفلام كتير .. ومازلت لم اقرأ الروايه.
    سامحيني انا مش مركز بصراحه.

     
  • At Sunday, July 09, 2006, Anonymous ارحم دماغك! said…

    احم..من زمان وانا عندي سؤال نفسي أسأله لحضرتك يافندم، وحيث كتبتي التدوينة دي يبقى أسأل بقى :)

    بس مبدئيا لازم حضرتك تعرفي اني متابع مدونتك من ساعة الإطلاق ومعجب جدا بيها..

    دلوقتي أبلع حباية من بتوع الشجاعة واسأل، منغير ضرب!

    حضرتك تصنفي مدونتك رقابيا بإيه؟!

    نفسي أحطلك رابط عندي بس متردد!

     
  • At Sunday, July 09, 2006, Blogger ادم المصري said…

    يا تمر حنه .. يا تمر حنه
    الورد كله كله كسا الجناين واشمعني انتي انتي .. اللي شارده عنا
    يا تمر حنه يا تمر حنه



    رحعتلك هيييييه
    رخم انا مش كده معلش .. دمي سم مش كده حقك عليا .. استحمليني الشويتين دول

    من بوستات ستبقة ليكي اقدر احكم وبكل ثقة عمياء وابصم بالعشرة انك لا تمثلي الشعب

    يبقي ما ينفعشي تقولي حكمك وتفرضيه علينا بحجة انك الشعب ولازم اقول رايي .. ثم الشعب بتاعنا حواي سبعين مليون تفتكري كام واحد فيهم رايه زي رايك .. وتفتكري رايكوا ده يهمنا في شئء

    او يهم المنتج اللي لم الفلوس في شيء

    او يهم لجنه التحكيم العالمية في شيء

    انا حاسس لو سالتك دلوقتي ايه رايك في حسني مبارك .. هتقولي فيه قصيده مدح .. شعب ايه اللي اللي لسه بدري عليه وما ينفعشي نوريه الكلام ده

    مين اللي اداكي الحق انك تقولي للشعب يتفرج علي ايه وما يتفرجشي علي ايه

    ده علي اساس انك انتي الوحيده اللي بتفهمي في الشعب والباقي حمير مثلا .. ولا ايه مشض فاهم

    ثم طالما الفيلم مش عاجبك دخلتيه ليه اصلا ولا دفتي الفلوس فيه ليه

    ده دلوقتي في العصر اللي احنا فيه ده الواحد داخل وحافظ نص الفيلم من اعلانات الفضاءيات .. ياعني داخل وعارف كويس هو هيشوف ايه ..

    طيب ما الراجل الؤمن التقي الورع اللي بيخاف ربنا واللي خايف ع الناس ما يخشش

    ثم انتي مش عاجبك ان احنا نعري المجتمع ليه بقي انشاء الله ؟
    هو انتي من انصار ان انا نرقع المجتمع كل ما يظهر فيه عيب
    احنا دلوقتي بقينا في مجتمع عامل زي بلده البلياتشو من كترة الرقع اللي فيه

    ده الدكتور علشان يعالج المريض لازم يعريه .. ياعني مش عيب

    ثم حلول ايه اللي انتي عايزاها من علاء الاسواني
    الراجل بيقولك ان فيه فساد وبطاله وشذوذ وسرقة وبلي ازرق .. ولسه مش عارفه قاصده ايه

    ناقص يقولك كمان نحل حاجة جاة ازاي

    هو انتي م النوع اللي بيمشي بالرموت كنترول .. ؟ لازم اقوله اعمل كذا وكذا
    ولو مقلتش مش هيعمل

    ايه فين دماغك وفين شخصيتك .. واحد بيقولك فيه فساد ... عايزاه يقولك لازم نحله زازاي .. حاجة تشل صحيح

    احب اقولك ان الاديب عبارة عن مراه للواقع عمرك شوفتي واحد شكلة معفن بص في المرايه احلو ؟
    هي كده كل ما المرايه تكون نضيفة وصورتها زي الاصل بالظبط كل ما تكون غاليه

    كلمة اخيرة عايز اقولك سيبك بقي شوية من افلام الاربعينات دي والنور يطفي والباب يتقفل والرعد والبرق ... احنا بنمشي لادام مش لورا

    لو مش عجبك الكلام طبعا انا عارف انه مش عجبك هقولك في حل بسيط
    لاني عارف انك عايزة حد يقولك تعملي ايه

    ما تروحيش السيما تاني ..وبقبضية الشهر الجديد روحي اشتريلك كام فيلمن ابيض واسود من بتوع شاديه وحليم واتفرجي عليهم ... هيفيدوكي احسن من الهجص ده

     
  • At Sunday, July 09, 2006, Blogger Ahmed Shokeir said…

    معلش مداخلة بسيطة لآدم المصري وده مش رد بالنيابة عن تمر حنة فهي تقدر ترد احسن مني مليون مرة
    ولكني اتكلم عن نقطة اثرتها اخدتها بشكل عام وهي استفسارك مين اللي اداكي الحق تقولي الناس تشوف ايه وماتشوفش ايه
    ببساطة اللي اداها الحق ده اصول وقواعد التدوين اللي تخلي كل واحد يقول وجهة نظره وادت الحق للي مش عاجبه وجهة النظر دي انه يعلق ويقول
    وجهة نظر مخالفة زي انا ماكتبت
    بس خلاص

     
  • At Sunday, July 09, 2006, Blogger Elsede3' said…

    okay...
    kalamek fol we manga we tofa7a 3ala safenga
    bas 7ettet bas 80% men elshabab...wALLAHi elshabab 7elwa we mesh kol elnas keda
    zy mafeeh 7'eyar feeh fa22oos aw el3aks, mesh far2a
    bas 7atta elly beyefham law shaf manzar 7atem bel galabeyya sa3b bardo mayed7aksh, yed7ak men elham 3ala el2a2al...yed7ak we lesan 7alo bey2ool "heyya ba2et keda 7'alas"
    seebek men 7ewar el bent om mayooh di we seebek men faransa we hena...3shan mayenfa3sh tekarny di be di...we henak da mesh 3ashan elta7ador 3ala ad mahomma met3awedeen, we law et3awedna hena hateegy enty ta3taredy 3ala elta3awod da...mahom be el film da kano bey7awlo ye3awedoona bardo, walla eih????
    ana ma3lesh batkalem fe no2ta so3'antata men elmawdoo3, bas 3shan ana aslan mesh moktane3 enno yersodly meet alf 7aga wes7'a felmogtama3 we mayedeneesh ay bareket amal...eldenya mesh na2sa wALLAHI we7na 3arfeen en elkalam da kolo mawgood bas shayfeeno fe west 7abbet abyad so3'ayareen beygamelo elmawdoo3 7abba...howa ma7atesh no2ta beeda 7atta
    lamo2a7'za enny tawelt
    wa domtom

     
  • At Monday, July 10, 2006, Blogger Gbalawy said…

    بصراحه بعد رؤيتك للفلم اللى فعلا فيها كتير بصراحه مش داخل دماغى وكمان التعليقات الكتير وكمان المدونات اللى بالعبيط اللى قريتها بتنتقد الفلم واللى بتشجعه و و و و
    ابرز دليل على نجاحه وطز فيا وبصراحه كل الكم الهائل من الكتابات عن الفلم بدل على كده
    بس لازم ارفعله القبعه بجد

    تحياتى

     
  • At Monday, July 10, 2006, Blogger تمر حنه said…

    This comment has been removed by a blog administrator.

     
  • At Monday, July 10, 2006, Blogger تمر حنه said…

    Mitar2a3
    تسلم يا طرائيعو انت – و تسلم الدمغه النضيفه - بس ليه الحرو ف الأفرنجى دى؟ يعنى هلاقيها منك و لا من خالد ولد جرار ؟؟ دانا نظرى على أدى ياخويا


    KHALED JARRAR
    شفت مسرحية مدرسة المشاغبين و سعيد صالح بيقول للناظر : هيييييه يادين النبى ايه الحلاوة دى – عظمة على عظمة ياست؟ مش عارفة ليه افتكرتو


    يا مصر أكتب إليكى رسائلى
    يا غالى عليا يا زواوى ياخويا – زواوى ياخويا
    انت فين من ييجى بوستين و نص كده (وحدة زمنية مستحدثة مالهاش علاقة بالبوس و لكن باليوست) ليك وحشة و ربنا - المهم و الحاقا لمسئولياتى كأخت كبرى يجب أن أسألك ك ك : بتغسل رجليك قبل النوم؟ بتسمع كلام اللى أكبر منك؟ بتحيي العلم كل يوم الصبح ؟ و بما ان الأجابة أيون فمكافأة منى ليك أنا هخطف رجلى و أزورك فى بلوجك و أبخره عشان الحسد .


    إرحم دماغك
    بص يا مبارك (مش اللى فى دماغك) مش مهم التصنيف – مش مهم التوصيف – المهم انطلاق المخزون بداخلك و جعله يتدفق بغزارة بدون ماتقعد تبرر نفسك للآخرين – بس هريحك
    مش انت بتكون راكب عربيتك و سواق ميكروباص متخلف يكسر عليك أو يشتمك من غير سبب فحياءك يمنعك من انك تشتمه جهرا و تقوم شاتمو فى سرك؟ أنا بلوجى ده سرى و زى ماتجيب معايا
    إرحم دماغك و دماغنا و صنف زى ماتيجى معاك المهم تكون مرتاح - الشاى عالنار

    Adam el masry
    مين اللى قالك ان كلامك مش عاجبنى ؟ ده عنب و انت جميل يا آدم بس عالأقل أنا بمثل نفسى أنا و صحباتى – تصدق يا أدم أنا لسة مشكلتى مع الشغالين ماتحلتش و حياتك ادعيلى لحسن مره كنت بطبخ و فتحت باميايه لقيتها كلها بذر - أرفت أوى أوى و أغمن عليا .. أغمن عليا
    و النبى يا آدم باشا بلاش تغيب علينا لأنك ليك وحشة
    سؤال يا آدم ألا حدايق المعادى ليه ؟ عملتلك ايه؟

    Elsede3’
    كلام سيادتك تمام و أنا معاك بس هو محطش نقطة بيضا يولع هو و اللى فبالى – احنا نحطها يا باشا محدش هيلعب بينا لأننا فاهمين صح - و هننور الدنيا و ننتعش و هتبقى منجه و تفاحة على سفنجة ( يعنى ايه الكلام ده ؟ )


    gbalawy
    عارف حضرتك ليه كل الهيصة دى؟ لأن الدعاية بتاعت الفيلم معمولة صح - كل وسائل الإعلام اتكلمت عنو و البروموهات و التوك شوز - شغل امريكانى على ميه بيضا 100 100
    اذن الشركة المنتجة لم تعتمد كثيرا على المضمون بقدر ماأعتمدت على تشويق الجمهور لرؤية الفيلم ذو الضجه
    دخول الفيلم فى مهراجانات ايضا من ضمن حملته الأعلامية فسواء فشل أو نجح فقد حقق المطلوب - وهو الشباك
    تحياتى

     
  • At Monday, July 10, 2006, Blogger تمر حنه said…

    الغالى شوقير
    شكرا على وقفة الرجالة - مردودالك

     
  • At Monday, July 10, 2006, Blogger يا مصر اكتب إليكي رسائلي said…

    على مبدأ اللي اوله شرط اخره نور؟؟
    البوستين ( وحدة زمنيه مالهومش علاقة بالبوس ، ولكن بالبوست ) ههههههه تعرفي انا والله يا أستاذة ، يعني من باب الكوملمينت كنت فقط اتمنى ( أحب على أيدك ) بس بخاف التلطيش عشان شكلك ايدك سمعها تقيل شويه.. اختي تقولي اني نصاب ومش بتصدق تقديري واحترامي ليها .. لكن عموما ، نعم انا بسمع الكلام وبغسل رجلي قبل النون وما إلى ذلك .. وتشرفيني ولك ولاء الأخت .. تحياتي وارجو ادلالي بكيفية ان ADD عنوانك عندي او ياريت وأكون شاكراً عشان بدل ما ألف الكره الأرضية اجي عندك على طول.. شكرا مرة أخرى .

     
  • At Monday, July 10, 2006, Blogger Gbalawy said…

    عارفه لو لو الدعايه هى السبب وانا شايف انها احد الاسباب
    يبقى بكده صدقينى قدرنا نوصل للتسويق ودى حاجه بنفتقدها
    عارفه طبعا شعار اليهود
    خمسه فى الميه بضاعه والباقى دعايه واعلان

     
  • At Monday, July 10, 2006, Blogger ادم المصري said…

    لا والله ضحكت من قلبي

    بجد بجد بجد والله ضحكت من قلبي


    والغالي شقير ... شكرا علي وقفة الرجاله مردودالك


    بس بجد بجد والله ضحكت من قلبي .. واكتر حاجة ضحكتني ان كلامي في موضوع الخدامة ساب اثر

    هههههههههه

     
  • At Tuesday, July 11, 2006, Blogger يا مصر اكتب إليكي رسائلي said…

    يا تمر حنه ، انا مش عارف اخرج من دماغي زواوي دي ... مين دا ياربي .. مين الولا دااا
    يارب يكون كويس يارب .. وتاريخ صلاحيته مازال قائماً

     
  • At Tuesday, July 11, 2006, Blogger تمر حنه said…

    يامصر أكتب اليكى رسايل
    بيقولوا عندنا بوس الأيدين ضحك عالدقون - عشان كده أختك الغالية مابتصدقش
    انت بلوجك جميل أوى و كان نفسى أكتب فى موضوع الاء بس سبقتنى - انت قلت أحسن منى بكتير
    و على فكرة زواوى ده واحد طرشجى بس بيخلل بصل 100 100 مالوش حل- عشان كده غالى أوى حاكم ساعات النفس بتجزع و تعوذ حاجة حرشة - و بالمناسبة زواوى مش اكسبايرد و متين.
    أنا جعت عندكش حاجة حرشة؟

    gblawy
    طيب شفت فيلم حليم؟ برضه اللى شافوه بيقولوا انو مش قد الدعاية بتاعته بالمرة - بس عماد أديب المحنك بيعرف يبيع و زى مانت قلت خمسة و تسعين فى الميه دعاية
    انت عارف يا جبلاوى انه مذكور فى القرآن انهم أعلى نفيرا !!!ا و أظن ده المقصود بالدعاية

     
  • At Wednesday, July 12, 2006, Anonymous ارحم دماغك! said…

    يافندم مختلفناش، ليه وحضرتك فاكراني عامل مؤدب؟ :)
    أنا زيك بالضبط باشتم ومدونتي عندك اهيه ممكن تشوفي فيه شتايم بالكوم يعني..

    لكن لما تكون في السياق الدرامي يعني ههههههههههه..

    يعني مثلا، ابقى سرشي عندي على كلمة دعارة وشوفي انا وصفت مين بيها، كده، لكن حضرتك مش شايفة انك بتأفوري ساعات في حاجات يعني أبسط بكتير، بمعنى أصح حاطة الفتيس عالخامس وطالعة تشوطي :)

     
  • At Wednesday, July 12, 2006, Blogger النوبى said…

    تعالى اقرأى الموضوع الجديد بتاعى


    النوبى

    رئيس جمهوريه اسوان العربيه

     
  • At Wednesday, July 12, 2006, Blogger Gbalawy said…

    عارفه فى مشكله كمان مهمه جداا
    لو تفتكرى مسلسل فارس بلا جواد
    انا شايف انه تجربه جيده بس علشان الدعايه كانت كتير فالناس قبل ماتشوفوا بتسرح بخيالها وتطلب تشوف اكتر بكتير من المطلوب
    اختلف معاكى بان دول المقصود بيهم أعلى نفيرا
    المقصود بيهم عندما يكونوا على باطل من الاساس و اعتقد انه بعيد تماما عن ده
    تحياتى وابقى زورينا

     
  • At Thursday, July 13, 2006, Blogger opium said…

    يا ست تمر حنة أولا تحية كبيرة لمونتك الجميلة بس اسمحي لي أنا مش متفق معاكي في حاجات كتير اولا رواية الأسواني رواية فاشلة فنيا و هي مجرد منشور صحفي و على المستوى ده يبقى مافيش مشكلة مش بيقولوا ان الصحافة دورها تكشف المستخبي؟ هو عمل كده
    انت و انا و الناس كلها عارفين ان اللي جه في الفيلم ده موجود حوالينا و يمكن أزفت بكتير طيب ليه عايزة تعيشي في دور العميا؟
    مش خايفه على تفتيح مخ العيال لكن خايفه على تفتيح رجليهم؟يا ستي إنت مالك هي رجليهم ولا رجليكي واللي عاوز يفتح رجله هايفتحها بسبب الفيلم ده ولا غيره
    روقي يا ست تمر حنة ما عاجبكيش الفيلم شوفي غيره ..بيقولوا حليم بيض برضه ما هو احنا في زمن يبضن

     
  • At Thursday, July 13, 2006, Blogger opium said…

    لكن على الأقل الفيلم ده مش متفه و لا مطلع لنا عيال مسخ زي هنيدي و لا معاتيه رسمي زي بوحة و لا حتى عيال هبلة فاكرة نفسها دون جوانات زي احمد السقا و هاني سلامة
    اهي دي الأفلام اللي المفروض تخلي الأستاذ علي أبو شادي يضرب عليها رقابة لأنها خطر بجد و لا بتخلي العيال لا تفتح مخها و لا رجلها و انما تؤدي فورا للإصابة _ والعياذ بالله- بالعته المغولي و -ألله أكبر الشر بره و بعيد- سرطان في المخ بعيد عن السامعين

     
  • At Thursday, July 13, 2006, Blogger قلم جاف said…

    تعالوا بقى نفكر بصوت عالي :

    الفيلم مأخوذ عن أصل روائي ، والرواية لها معايير تختلف عن معايير القصة القصيرة عن معايير الفيلم عن معايير المسرحية ..

    أنا ما قريتش الرواية اللي وصل سعرها لـ 30 جنيه ، مش عارف ليه ، حاجة كدة بتفكرني بلويس فيجو لما سألوه عن تمنه اللي وصل في بعض الأوقات لتمانين مليون جنيه ، قال ما معناه : دأنا مدفعش المبلغ دة في لعيب كرة مهما كان!

    إذن مأدامكش إلا الفيلم يا حلو..

    والفيلم دالة في مزاج وانتماءات السيناريست اللي بيحط الفيلم ، اللي بيعتبر في السينما زي الملحن في الأغنية ..وهو في حالتنا دي وحيد حامد..صحفي روزجي حكومي .. بيكتب سيناريو لفيلم كتبه روائي معروفة عدائيته الشديدة للسلطة (راجعوا العربي الناصري والدستور)..

    ولوحيد حامد ماركته الخاصة والمسجلة والتلميحية في السيناريو والحوار خاصةً في أعماله الأخيرة ..

    مش عارف ليه جالي إحساس إن الفيلم و/أو الرواية أقرب لفواصل الردح منها لعمل فني بيستعرض جوانب من شخصيات تتصادم مع بعضها مكونة أحداث وعقدة الرواية ، الحاج عزام اللي كان "ماسح شوزز"- عدم اللمؤخذة ، والصحفي الشاذ أمه فرنساوية ما تسواش تلات تعريفة ، وفلان كان كذا وفلان كان كذا..

    بمناسبة الجرأة اللي قالها زميلنا النوبي ..إيه الجرأة في إنك تتناول شيء الكل عارفه؟..بنفس المعيار ممكن نلاقي فيلم ظريف لطيف حواره بلغة الشارع والشتائم البسيطة والمركبة بالأب والأم والدين..ودي لغة كل الناس عارفاها وبتتكلم بيها حتى أرقى الأوساط!

    ساعات اللي بيبان لنا جرأة دة "زعيق" أكثر منه فن بيرصد وبيحاول يفهم .. وبالتالي بيركز على اللي احنا عارفينه.. الفن الجريء بجد هو اللي بينتقد المجتمع من داخله ، اللي بيتكلم عن الاستغلال ، وإلصاق الخرافة بالدين ، وفساد الصغار اللي بيتطور إلى أن يصبح جامبو في عين العدو ، اللي بيتكلم عن ازدواجية الناس العادية مش أصحاب الذقون الطويلة والقصيرة.. اللي يجيب التطرف من جوة .. مش مشهد هستيري من عينة محمد الدفراوي في يعقوبيان "بل نريدها دولة إسلامية".. حاجة كاريكاتيرية بتفكرنا كدة براؤول جوليا في فيلم street fighter.. لما حاول يقول بصوت عالي وبلكنة شبه بريطانية أشهر عبارة في الفيلم :Game over!

     
  • At Friday, July 14, 2006, Blogger تمر حنه said…

    ارحم دماغك
    و أنا برضو بشتم مع السياق الدرامى بل انى بشطب كتير كمان من الشتايم اللى المفروض تتكتب عشان الرقابة و كده
    و بعدين هى كلمة دعارة شتيمة؟ عموما مدونتك هايلة جدا و كل سنة و انت طيب

    النوبى
    زرتك و مالحقتش آخدلك حاجة فى ايدى ياسمرانى
    أول الشهر ان شاء الله

    Opium
    لا داحنا مش متفقين على اى حاجة يا أفيونه
    بص مانكرش انها حاجة لذيذة أوى انى أتفرج على فيلم زى ده – أمتع عنيه يعنى و كده بس معرفش – يوم مايبقى عندك عيال هتخاف على ذوقهم العام و أخلاقياتهم و دينهم زيي كده؟ الظاهر اننا لما بنخلف بنبدى مصلحة ولادنا على متعتنا الشخصية – و الله أعلم

    قلم جااف
    معاك – فيه زعيق و ردح بس اللى بقوله ايه: شوية شوية ياخدونا بالراحة –و اللى جرئ النهاردة بكرة هيبقى عادى
    الزميل النوبى بيعبر عن احساس لازمه و هو بيمثل قطاع عريض من الجمهور غير القطاع اللى حضرتك بتنتمى له – الراجل شايف جرأه و أنا كمان ماكل الناس عارفة كل الحاجات بس فيه اللى يتعرض فى دور السينما و فيه اللى يتعرض فى دور دعارة
    بلاش الغيبة دى ياقلم بتوحشنا

     
  • At Saturday, July 15, 2006, Blogger msafa said…

    انا ماشوفتش الفيلم لانى بعيد عن لمركزيه بتاعتكوا بس قريت الروايه اربع مرات ... انا مش بتكلم عن الفيلم لما حنا م نتكلمش عن همومنا فى السينما نتكلم عنها فين ؟ لما احنا ما مش نناقش الواقع المر والسخيف واللى زى ..... نتكلم عنه فين علاء ايه مشكلته فى الموضوع ده علاء كتب الروايه وخللص منها يعنى طلع اللى جواه كفنان والسينما اخدت الروايه وعملته علاء نقل واقع يا ست واقع لانا ولا انتى نقدر نقف قصاده غير لما نشوفه ونلمسه اه بتتكلمى على الشباب والتمانين فى الميه طب حلى مشكلتهم حلى مشاكل التمانين دول ارجوكى سيبى الواحد من دول يبص فى المرايه علشان يعرف هو بشع قد ايه وانه لازم يتغير
    هو ده الواقع يا عبله

     
  • At Saturday, July 15, 2006, Blogger تمر حنه said…

    msafa
    لأ دانتا فاضى بقى - أربع مرات بتقرا نفس الرواية و جايلى أنا بقى !!ا
    مين قالك ان الفيلم هيخلى العيال يبصوا فى مراية و يشوفوا قبحهم ؟؟
    بأمارة ايه؟ الرواية يا حضرة الأومباشى متعاطفة معاهم تماما و بتعطى لكل شاذ العذر لتصرفاته .
    أنا نفسى بكيت مع حاتم الصحفى و هو بيكلم أبوه و أمه فى الصور - و هو بيلومهم على تركه وحيدا للخدم يلعبوا فيه البخت . و ان كان في الموضوع حسنه يبقى عكس مانت فاهم يا أومباشى مسافةو هى اننا نهتم بالولاد و لانتركهم للأغراب و غير كدهو باقى الفيلم وجه أسود قبيح كسير الأسنان أعور العينين فى حقبة زمنية عرجاء تحتاج الى الجبر ليس الا !!!ا

     
  • At Sunday, July 16, 2006, Blogger أحمــــــــدبــــــــــلال said…

    أن مع الرأى ان الفيلم موجه الى الحكومة أكثر منه الى الشعب
    و الشعب متعود على لغة الاشارة و الرموز الشهيرة
    بس أنتى بتوجهى فيلم الى أكثر كمية مواطنين فى مصر
    الشباب
    اللى أساساً أتعودا على الظهور العلنى
    فهو يتفرج على أفلام أباحية أساساً و لن يضره أن يرى دراعو لا رجل عريانة
    أو حتى يسمع كلمة قبيحة
    لأن الشارع ملئ بها دائماً

    أنا مش عاوز رقابة على الافلام كفاية كده رقابة علينا أحنا بلغنا سن الرشد و بقينا بنكتب للكبار فقط

    و دخلت الفيلم علشان أعرف الدوشة الكتير اللى فى الرواية هايلمها أزاى فى فيم مدته تقل عن 3ساعات
    أرحمينا يا تمر حنة
    و قليلهم كفاية رقابة
    أحسن بهدلتنا قوى الرقابة دى



    ملحوظة :
    تقززت جداً من جمهور السينما فى ضحكهم و سخريتهم فى مشهد رحيل عبده عن حاتم فالكل تناولها بشكل كوميدى
    للأسف

     
  • At Tuesday, July 18, 2006, Blogger مسجل خطر بجد مش هزار said…

    http://dnafsany.blogspot.com/
    ياجماعة ياما لسه هنشوف مستغربين ليه

     
  • At Friday, July 21, 2006, Blogger All about you said…

    قرأت لك بلوج "الساعة كام فى ايدك يا فندي" و "بره و جوه فرشتلك" و عجبني اسلوبك جدا يبفكرني بلبلاك كوميدي بس لما قريت البوست دا كان لازم اختلف معاكي فى كل اللى انتى كتباه..الفكر اللى انتى بتتكلمى عنه لازم يتغير و كل واحد لازم يقوم بدوره فى التغيير دا ووظيفة السينما انها تعرض حقاءق و اوضلع غل و انتى عارفة و انا عارف ان كل اللى اتقال فى الفيلم دا صحيح جداااااااااا...الناس عارفة كل الاوضاع دى و بتتعامى بس الحال دا دوامه لخطر من مواجهته..لازم يحصل حاجة تخلي الاوضاع دي تتغير..و مش من وظيفة الكاتب انه يطرح حلول لاوضاع بقى لها اكتر من نص قرن و كلنا عارفين الحلول طريقها منين...و يجعله عامر.

     
  • At Friday, August 04, 2006, Blogger dr hatem el bitar said…

    تسلم ايدك حبيبي موقع جميل
    وتستحق التقدير
    واتمني لك مستقبل باهر ومزيد من التقدم
    ياريت نكون اصحاب منتظر ايميلك وبناء جسور الصداقة بينا
    ويا ريت تشوف موقعي وتقوللي رايك
    www.timo1.jeeran.com/timo/
    www.hatom1.jeeran.com/bitar/
    http://coolman0120c.jeeran.com/timo.html
    http://www.enashir.com/blogs/timo/
    وانا اقبل بتبادل الاعلانــــــــــات
    وارجو ان تنشروا مواقعي بموقعكم الجميل
    mboile: 002-010-5684344
    للتفاوض بخصوص الاعلانات ارجو اضافتي على المسنجر
    timo_dentist1@yahoo.com
    والايميل التالي
    sambo200437@yahoo.com
    my foto
    http://www.realpics.net/user_photos/37801/22_492364.jpg

     
  • At Friday, August 04, 2006, Anonymous Anonymous said…

    Here are some links that I believe will be interested

     
  • At Saturday, August 05, 2006, Anonymous radwa fouad said…

    habeebet alby.....rekaabet meeeen ya otta....hanedhak 3ala nafsena leeeh ya tamr.....aywa hya dy masr......

    radwa

     
  • At Sunday, August 06, 2006, Blogger تمر حنه said…

    دكتور حاتم البيطار
    كنت أفضل أن تستأذنى قبل أن تنشر مدونتى كاملة فى مجموعتك على الياهو
    و الغير مقبول أكثر انك غيرت اسمى و جعلته بنت مفترية!!ا
    أنا مستاءة

     
  • At Wednesday, August 09, 2006, Anonymous Anonymous said…

    Here are some links that I believe will be interested

     
  • At Thursday, August 10, 2006, Anonymous Anonymous said…

    Very best site. Keep working. Will return in the near future.
    »

     
  • At Wednesday, August 16, 2006, Anonymous Anonymous said…

    Hey what a great site keep up the work its excellent.
    »

     
  • At Saturday, February 03, 2007, Anonymous Anonymous said…

    Looking for information and found it at this great site... » » »

     
  • At Tuesday, February 06, 2007, Anonymous Anonymous said…

  • At Wednesday, February 14, 2007, Anonymous Anonymous said…

  • At Saturday, March 03, 2007, Anonymous Anonymous said…

    Looking for information and found it at this great site... » » »

     
  • At Saturday, March 17, 2007, Anonymous Anonymous said…

    What a great site video editing programs

     
  • At Monday, August 06, 2007, Anonymous محمود said…

    الفلم دا اسمه الحقيقى دعارة يع قو بان

    شوفوا فى كام سنه فرق بين هذا الفلم وفلم العزيمه علشان نعرف احنا بنطور ولا بندهور

     
  • At Monday, November 12, 2007, Blogger بت خيخة وأى كلام said…

    يخرب مطنك يا تمر حنة
    تحفة يا بت البوست والله
    ودى كانت وجهة نظرى انا كمان ان الفيلم ما هو الاعبارة عن مشاهد جنسية من كل نوع النوع الشرعى والشاذ والحرام والمزنوقى
    ماشفتش اى اسقاطات سياسية
    لا انا اللى غاظنى ان سمعت واحدة قربتى بتقول ان واحدة صاحبتها قالت على الفيلم انه عادى مافيهوش حاجة عيب
    قلتلها يبقى اكيد صاحبتك كل اللى بتشوفه افللام سكس علشان كدة بالنسبة ليها عمارة يعقوبيان فيلم عادى
    ربنا يستر على عيالنا

     

Post a Comment

Links to this post:

Create a Link

<< Home