أيوه خدامه

Sunday, July 16, 2006

بره و جوه فرشتلك ... !!ا

و كالعاده عشان الكلام يبقى على ميا بيضه من أولها :
لا ينكر فضل التكنولوجيا و التطور العلمى المذهل الذى يمن به الغرب علينا كل طلعة شمس الا كل جاحد فالتكنولوجيا لها الفضل فى التقائى بناس أفاضل أمثال حضراتكم و لها الفضل فى تخفيف الام المرضى المعذبين و لها الفضل فى تيسير التنقل من مكان لآخر و هكذا دواليب .. دواليب – ماشى؟

و لكن هناك ايضا سايد ايفيكتس (آثار جانبية يعنى) لهذه التكنولوجيا و ده كان موضوع لقائنا الأسبوعى أنا و صحباتى المفتكسات و احنا بنراقب العيال فى حمام السباحة و الشمس بتنقر فى نافوخ اللى خلفونا و على مايبدو ان الشمس سيحت فيوزاتنا و عملت شورت .
دار الحديث التالى:
فاتن: الله يلعن أبو التكنولوجيا .. أنا حقيقي مش ملاحقة ..
أنا : فيه ايه يا بت – من امتى كان ليكى فى التكنولوجيا دانتى كبيرك حلة محشى
هى: المنيل على عينو ( طبعا تعنى جوزها) تنو يزن يزن – عايزين كمبيوتر – انتى لازم تمسكى ايدك فى المصاريف شويه – اللى ميعرفش كمبيوتر يبقى أمى ( قطعت و قطعت سيرتها) و تنو يلف و يدور و يطبطب و يدلع (بموت فى نانسى) و فى ليلة مشئومة وجب معايا صح و بعدها أقنعنى انى أصرف نظر عن تنجيد الأنتريه و أخد الألف و خمسميت ملطوش بتوع الجمعية.
أنا : مانتى طول عمرك برياله .. ها و بعدين
سماح: طب أهو عالأقل وجب صح .. الدور و الباقى عاللى بياخد الفلوس و سايبنى أغنى ظلموه.
أنا : بس يا قوقا .. خلينى فى فاتن دلوقتى
فاتن : من كام يوم قلقت فى نص الليل - أبص الاقى الراجل وش الفجر قاعد قدام الكمبيوتر و بيقول بيعمل شاتنج و أبص ألاقى صورة واحدة شكلها على مايبدو صينية أو فليبينية – واحده من اللى عنيهم عامله كده وقاعد مريل عليها باينها فاتحالو كاميرا ولا ايه
أنا : ( بصفتى الناصحة اللى فيهم) آه دى ايشيان يا فاتن – طب لما جوزك بيحب الصنف ده لازم ترضيه و تحاولى تلبييو رغباته.
فاتن : ( تنظر الى اللا شئ باهتمام ) طب أنا ماشية بقى رايحة مشوار مهم.
بعد أسبوع فى نفس المكان
سماح : مش اللى جايه دى تشبه فاتن صاحبتنا
أنا : لأ طبعا دى شكلها شغالة فليبينية جايه مع عيال ولا حاجه
تقترب السيده : سلامو عليكم
أنا: مين فاتن؟ ايه اللى نيلتيه فى نفسك ده؟
فاتن : الله يخرب بيتك - شايفه آخرة افكارك الزبالة – دهولت نفسى و صبغت شعرى أسود نيله و سيحتو عند الكوافير و رسمت عنيا على فوق
أنا : طب و ايه النتيجة؟؟
فاتن : الراجل من يومها بيضحك ضحك هيستيرى من أول مايشوفنى و مش قادر يمسك نفسو و أنا بالعند فيه خربتلو الكومبيوتر – بس عندى مشكلة تانية
أنا : خير يا أمى؟
فاتن: تعرفيش بيبيعوا حصنه (جمع حصان ) فين؟؟
أنا : ليه ؟
فاتن : أصلوا اليومين دول مركز مع الديش و مشغللى طول النهار الفيديو كليب بتاع نجلا اللى بتحمى الحصان و عينيه طالعه عليها
أنا ( سحبت شنطتى بطريقة هيستيرية ماهى مش ناقصة قرف) : كفاية عليكى البغل اللى عندك ابقى اشترى خرطوم سته متر و حميه فى الجنينة.

35 Comments:

  • At Sunday, July 16, 2006, Anonymous Anonymous said…

    سلام
    غلعت أما لقيت نصيحتك مش تمام؟؟ ليه لازم الست دايما تدوخ السبع دوخات على رضا من أسميته بغلا؟؟ ليه مش بنشوف تنفيذ لكلام العباس رضي الله عنه بأنهن ينظرن منكم ما تنظرون منهن؟؟ بلاش توم كروز ولا رشدي اباظة ولا براد بيت(انا اساسا بحب السمر)
    لو طلبت بس يغسل سنانه يدور اسطوانة احمدي ربنا
    كان طقم الانتريه منفعه عامة للأسرة كلها ولينا لو صدف ورحنا زرناها أصل رضاهم وهم عايشين فيه غلابة كثير

     
  • At Sunday, July 16, 2006, Blogger مـحـمـد مـفـيـد said…

    والله دمك زي العسل وقاعده الشمس باين خلت دماغك لسعت

     
  • At Sunday, July 16, 2006, Blogger قلم جاف said…

    شيء روش طحن إن اتنين قرروا بمحض إرادتهم يتجوزوا ويقعدوا بالسنين بوزهم في بوز بعض ما يبقوش عارفين همة عايزين إيه من بعض..

    هوة عايزها نانسي عجرم وهية عايزاه رشدي أباظة.. ولا هي نانسي أباظة ولا هو رشدي عجرم!

    رحم الله عبد المنعم مدبولي .. اللي استمرت جوازته الوحيدة أكثر من نصف قرن من الزمان! برضه رجالة وستات زمان كانوا أوضح من حيث الرؤية عن ما الحال عليه دلوقت .. والصراحة .. راحة (بدون إكمال الأغنية)!

     
  • At Sunday, July 16, 2006, Blogger mitar2a3 said…

    finaly there's a new post to read,
    i'm checking ur plog everyday asly :D

    i'm enjoying reading ur posts, waitting always the new one ok, so don't be so late plz

     
  • At Sunday, July 16, 2006, Anonymous Anonymous said…

    keep the good work. I am sure it takes you a lot of time to prepare for this blog. Good luck. I wish my computer could write in Arabic. Is there a chance to update your site more frequently? Once a week is not enough. I have just sent your website link to my wife so that she can enjoy reading your blog. I like her (my wife) AS IS with no change, and she does the same too for me.

    regards
    AE

     
  • At Sunday, July 16, 2006, Blogger soosa el-mafroosa said…

    ما هي لو صحبتك دي اتعلمت الكومبيوتر و دخل عليها جوزها مرة لقاها بتعمل شات مع واحد فرنساوي والا امريكاني ..كان لم نفسه عدل

     
  • At Monday, July 17, 2006, Blogger Gbalawy said…

    شربات ياتمر حنه والله
    بس بصى بقى ارضاء الزوج من اصعب واعقد الاشياء بس برده مش مستحيل
    المشكله ان زوغان العنين للازواج بتهيئلى ده شىء فطرى بس ربنا يحصن اعيوننا جميعا

     
  • At Monday, July 17, 2006, Blogger Adel said…

    تمورة منك لله خربتي عقل الوليه وكويس ان الراجل رمرام ومزاجه في الاسيان ولا كانت تبقى مصيبة لو مزاجه جه على الافريكان كان زمانها رشت نفسها دوكو اسود بس اقولك على حاجة فودنك بصفتي راجل ولا تقوليش لحد الراجل عيل والست البورم لازم تكون امه اللي تعرف تدادية وتلاعبه وتلمه وده شيء بسيط انا واحد من الناس لا بتنفع معاية لا اسيان ولا افريكان ولا اوربيان ولا اميريكان انا اموت في السمن البلدي والركة بقى على اللي بتعرف تحلب الجاموسة وتعمل السمنة والجبنة والذي منه واضح ان لسعت نافوخك وصلت لي هههههههههه

     
  • At Tuesday, July 18, 2006, Blogger أُكتب بالرصاص said…

    بغض النظر عن القصة والهدف والمغزي

    الاسلوب رائع والتعليقات الجانبية اروع
    خفة دم مصرية

    قطعوا ياختي الرجالة وقطعت سيرتهم

     
  • At Tuesday, July 18, 2006, Blogger القلجاوى said…

    أنا كت فاكر نفسى فاهم حاجات كتير ، بعد اللى قرأته بمدونتك ، عرفت أننى فى أول الطريق ، لالالا ، هناك الكثير الذى يجب أن أتعلمه ,اتقنه ، حتى أكون بهذا المستوى من الكتابة والتعبير ، أحسدك ، ده حقيقى ، يمكن حكاياتك مش حقيقية ، لكن أنا أحس وغيرى بوجودها ، يبقى برافوا عليكى ، وعلى العموم عنوان المدونة هو اللى شدنى اليها ، أيوه خدامة ، أذا فأليك أقول ،
    لو كلهن مثلك ، ، لكان يجب علينا أن نقوم بالواجب ليل نهار
    ... سلام ياستاذه ،،، قال خدامه قال

     
  • At Tuesday, July 18, 2006, Blogger تمر حنه said…

    anonymous1
    ماهو ده كان رأيي برضك ان طقم الأنترية كان أبدى برضك من الكمبيوتر - ربنا يستر عالبانيو شكلها ناوية ترهنه و تجيب الحصان

    محمد مفيد
    - وحياتك دى لاسعة من زمان مش مسألة شمس - مانتو كده شغلتكوا فى الحياة تجننونا

    قلم جاف
    تيجي نحاول نعرف ايه اللى حصل من زمان لدلوقتى؟ نحاول نرصد أسباب عدم الرضا اللى بين الأزواج حاليا؟ موضوع مش بطال - صح؟ طبعا صح - شكرا

    mitar2a3
    ان شاء الله هحاول أزود الأنتاج شوية بس
    ادعيلى


    anonymous2
    حضرتك شرفتنا - و على فكرة البلوج ده فيه ناس حساد بالهبل فبلاش تسيح لنفسك هنا - بلاش يعنى تقول انك بتحب المدام و سعيد معاها و الكلام ده - دارى على شمعتك تقيد و أحب أقولك : انت من الأحرار يا أنونيموس

    soosa el-mafrosa
    و النبى بلاش النصايح دى لحسن مرة قولنا لواحدة صاحبتنا تعمل نفسها بتتكلم فى التليفون و لما جوزها يدخل تقفل مرة واحده (عشان يغير) تانى يوم جات بأربع أسنان أمامية طايرين - ماهو حاكم لما الغباء بيستحكم - بعيد عنك - الرجاله بيبقوا ... ولا بلاش

    gblawy
    و ربنا ياجبلاوى أخلاقك العالية دى بتخجلنى جدا - ربنا يتولانا كحريم

     
  • At Tuesday, July 18, 2006, Anonymous Anonymous said…

    بقالي زمان مقرأتش مقال ساخر بالطريقة الجميلة دي
    وخفة الدم دي


    انا عندي سؤال
    ليه هم ما بيعملوش حاجة عشان يرضونا
    يعني الست لازم تلبس له، وتتعطر، وتتغندر عشان ما يلفيش على غيرها
    طب مهي معندهاش غيره، يعني محتاجه منه يلبس لها أكتر..


    صح؟ ولاّ انا لسعت بردو؟

     
  • At Wednesday, July 19, 2006, Blogger غادة الكاميليا said…

    يخربيشك يا تمر حنه يا عسل
    أنا هموت من الضحك والله كنت مخنوقه وانتي ضحكتيني يسلم تمك يا عسل
    ألا هو الأخ هيعقل امتى
    أل ويا مآمنه للرجال يا مآمنه للقرد في السنغال
    على رأي واحده صاحبتي

     
  • At Wednesday, July 19, 2006, Blogger layal said…

    أتمني ان نتبنى جميعا كمدونين كلمه واحده بتاريخ واحد نحدد فيه رأينا للعالم اجمع
    اتمني ان ندون مدونه واحد بتاريخ 27/07/2006
    كلنا كمدونين نكرر عباره واحده
    كلنا مع لبنان وفلسطين ضد اسرائيل والمحتلين
    بالعربي بالانجليزي المهم نسمع صوتنا للعالم
    وان لم نستطيع حمل السلاح فالنحمل الكلمه
    وبأي لغة نستطيع نشرها
    بالإنجليزية
    We are with Lebanon and Palestine against Israel and occupiers
    والفرنسية
    Nous sommes avec tous le Liban et la Palestine contre l’Israel et les occupants
    والألمانية
    Wir sind zusammen mit dem Libanon und Palästina gegen Israel und Besatzer
    والإسبانية
    Somos todos con Líbano y Palestina contra Israel e inquilinos
    والصينية
    我们都是同黎巴嫩和巴勒斯坦对以色列占领者
    واليابانية
    私達はイスラエル共和国および占有者に対してレバノンおよ
    びパレスチナとのすべてである
    تحياتي للجميع

     
  • At Thursday, July 20, 2006, Blogger lastknight said…

    السيده تمر حنه .. خفة دمك و عمق تعبيرك مذهلين .. أول مره أزور مدونتك .. و أنشاء الله تتكرر الزياره دائما .. فكرتينى بطليقتى .. كانت الحقيقه أم هايله و مازالت .. لكن فى محاولاتها للنجاح كزوجه .. كانت عبيطه قوى شبه صاحبتك كده .. أعترف أنى كنت باخونها تقريبا بصفه يوميه .. لكن أعترف كمان أنى فى آخر سنتين تقريبا ماخنتهاش كتير .. و يمكن عشان كده اتخنقت منها و طلقتها .. لما كنت بالعب بديلى كنت باقدر أصبر على عمايلها السوده .. عموما .. بما أن الرجل بطبعه رمرام ( حقيقه علميه ) أعتقد أن الست العاقله الراكزه يجب أن تتجه للطناش أكثر منه لأجراء محاولات متهوره للحفاظ على الزوج .. و فى مرحله من المراحل الزوج لوحده هايزهق من العك و يبطل .. و يرجع عادى خااالص ..
    أنتظر زيارتك لمدونتى رغم تقل دم مواضيعى .. و أتمنى أن أقرأ الجديد من أنتاجك قريبا

     
  • At Thursday, July 20, 2006, Anonymous Anonymous said…

    loooooooool ya gameela
    انا ضحكت بالاوي

    رأيي انها بكل هدوء و برود
    تقعد ع الكمبيوتر هية كمان
    مش لازم شات زيه
    بس عشان توريه لو هية عايزة
    تقدر

    :)

     
  • At Friday, July 21, 2006, Blogger تمر حنه said…

    من زمااااااان
    مسيرى أتعرف على المدام و أقنعها بتلبية رغباتك الدفينة – ممكن تصحى يوم تلاقيها تحت الشباك على كارو هى و تلات أربع ستات بلدى و بيغنولك ياللى عالترعة حول عالمالح – أظن هتبقى أسعد راجل فى الدنيا


    الرثيس الأسمرانى
    دانت خسارتك فى الرجالة – تعالى يانوبى انضم لحزب أيوه خدامه و هنصرف لك كل يوم سلطانية رز بلبن و علبة كليوباترا على حساب الحزب

    Itstoolate
    مشكرين بس طبعا الهدف و المغزى هما البهريز فى الحكاية – الرجالة بيحبوا التغيير و يوم ما يلاقوا اللى هما عايزينوا بيحولوا لحاجة تانية

    السيول السميرية
    و النبى يا بو سمرة تحسدنى على ايه بلا خيبة – بس يمكن المعاناه بتصنع الرجال – إحم-الستات
    الكلام ده كبير علينا أوى – تحب الشاى بفتله و لا كشرى؟

    منار منجد
    طبعا لسعتى و ده أحلى حاجة فى الدنيا – بس متقلقيش هيرضونا – دلوقتى بقينا كسيبة و فيه خلع و حاجات تانية
    أنا سمعت انهم هينزلوا فى الأسواق بدلة رقص رجالى بزراير شمال عشان يرقصولنا – أصبرى يا أوختشى

    غادة الكاميليا
    و ربنا صاحبتك بتفهم ألا انتى عارفة ان فى السنغال مهر العروسة ببقى كبد حيوان برى !!! أهو عرف يجيبوا كان بها معرفشى تبقى خلصت الليلة بدرى بدرى – ألا تذكرة القاهرة السنغال بكام؟

    Layal
    كفاية بقى مناشدات و اعتراضات و لأت
    قلنا لا لأسرائيل و هى مبهدلة فلسطين و لبنان
    لأ لأحتلال امريكا للعراق و برضط دخلوا
    لأللنظام و أهو موجود – لألألأ مبتعملش حاجة – علمى بس انتى أولادك يبقوا زى حسن نصر الله و اسرائيل هتطلع من لبنان على طول

    Last king
    بص: مش هلومك – مش هعاتبك بس هسيبك للزمن يامفترى يابو عين زايغة
    أيوه بانوا على أصلكوا بانوا
    عايزه أعرف منك حاجة : دلوقتى بعد ماطلقت الوليةالهايلة المثالية و الجو خلى لك : و بعد زوال أشد أسباب خياناتك و هو الرغبة فى عمل شئ ممنوع – هل تستمع بالخيانة زى الأول؟؟
    أكتب لنا مذكراتك فى مدونتك و سميها : نصايح عربيد فى البحث عن المفيد
    للأسف التلج خلص ينفع فحم؟

    Epitaph
    ايه ده – لحقتى تصيفى و ترجعى ؟؟ ولا داخلة من سايبر؟ أنا مرة فى المصيف خدت اللأبتوب بتاعى و دخلت من دكان تأجبر عجل من تليفونه – شكلك داخله من محل فطاطرى- صح؟

    All about you
    You know why?! I am an aries man ;)

     
  • At Saturday, July 22, 2006, Blogger lastknight said…

    عرفتى بقى أن أغلب الستات عبط و مش بيشغلوا دماغهم .. ؟ أولا أنا ماكنتش عبيد أنا كنت زوج خاين ..بس .. ثانيا زهقت من العك قبل ما أطلقها بسنتين .. لكن كمان زهقت من غباوتها كزوجه .. حياتى حاليا و على مدار ال6 سنين الماضيه ..زى الفل .. بالعكس .. لما يارتبط بواحده عاطفيا ماباخونهاش .. هاتسئلينى السؤال الغبى بتاع طيب مابتتجوزش ليه .. أقولك متردد لأن الست المصريه بتبقى هايله جدا قبل الجواز .. أول ماتتجوز تتنيل تقلب زى المتحولين بتوع الكرتون كده .. و تتحول لنموذج شبه صاحباتك واللى شبههم .. سيدتى .. شوية جد بقى .. الخيانه أو العين الزايغه مرض .. يقتله تماما دواء واحد .. أسمه الحب .. هلى سمعتى عنه من قبل ؟ هل تعلمين ماهو الحب ؟ ماهى واجبات المحب و حقوقه ؟ سيدتى .. لو تحبى تاخديها بجد شويه .. افتحى موضوع مناقشه عن الحب .. و نصائحى وقتها ستكون مفيده ..

     
  • At Saturday, July 22, 2006, Blogger تمر حنه said…

    all about you
    Sure I know, I sneaked into your blog while u were sleeping :)

    last king
    تصدق مش عارفة ليه احترمتك !!ا أنا أحب الصراحة لأن الصراحة راحة يا سيدى و انت ...!!امش هكمل
    حب ايه بقى اللى هنشوفوا و نشوف واجبات المحب و حقوقه- هو الراجل المصرى ليه فى الموضوع ده؟ الراجل العربى عموما ليه فى الفطار و الغدا و العشا و فين الشرابات يا ولية - و القميص يا هانم مش مكوى ليه - ليه فى صحابه و مزاجه و سهراته - ليه فى الخناق عالمصروف - ليه باختصار فى النكد (راجع بوست أيوه خدامة) يابنى دى احصائيات .
    تعبتونا و قصرتوا عمرنا و أفقدتمونا الثقة فى انفسنا كنساء و قتلتوا فينا أنوثتنا. يا بيه ياللى بتتكلم عن الحب كام مرة طبخت لعيالك و كام مرة سيأت الفسحة لأن مراتك ضهرها واجعها ؟؟!!ا
    كام مرة وديت العيال تمارين النادى و لا كام مرة عملتلها ماساج قبل ماتنام؟؟
    طبعا ليك حق تروح كل شهر تدور لك على واحدة فريش بحالة الفابريكه ايديها ناعمة و نافخة شفايفها لأن اللى معاك طبيعى من احباطاتكم تكون كل حاجة عندها محتاجة نفخ .

     
  • At Sunday, July 23, 2006, Blogger lastknight said…

    يعنى عندى حق .. الست المصريه لا تجد فى نفسها مهارات غير مخاطبة أحشاء الرجل و بعض أعضاؤه الحميمه .. لكن مشاعره , تفكيره ,أنسانيته , وحتى نزواته .. لأ .. مابتعرفوش .. أسألك سؤال مباشر جدا و تعالى نناقشه علنا .. لو جوزك قرر يشرب كاسين .. تتصرفى أزاى ؟ ياترى يشربهم فى البيت معاكى ؟ ولا يشربهم فى البيت و هو قاعد لوحده زى البوبى و أنتى مقاطعه مجلس الخمر ؟ ولا من الأساس تقوليله النجاسه ماتدخلش بيتى و يروح يشرب كاسينه فى أى حته بره البيت ؟.. عاوز ردك بصراحه زى ماباتكلم بصراحه .. و بناء عليه .. هافهمك قصدى أيه

     
  • At Sunday, July 23, 2006, Blogger تمر حنه said…

    last king
    معاك ان معظم المصريات - بعكس اللبنانيات و المغاربة على سبيل المثال- يخاطبن أحشاء الرجل بل و يفشلن فى كثير من الأحيان فى مخاطبة أى حاجة تانية - بس مافكرتش فى السبب؟ غصب عنهم - أكفى القدرة على فمها و انت تعرف - أمها ربتها غلط و أمه بوظت الدنيا - ثم ان الراجل المصرى فرعون بطبيعته و ملئ بالعقد المستحكمة
    ممكن فى شغله يبقى عسل و ابن نكته و الصدر الحنين لكل الزميلات - و لكنه بيجدها مرجله انه يدخل البيت شاهر سيفه فى وجه أم العيال و فوقى و اعرفى بتكلمى مين
    فى معظم الأحيان بتنجح اللعبة و بينجح معاها قتل شهوة الحياة عند الزوجة
    بص ممكن تكون حالتك مختلفة - ممكن تكون فيك عناصر مش مصرية بيور ( تبقى بزراميط يعنى) و يكون لك جد طليانى و لا بلجيكى و الست بتاعتك مصرية ميه الميه - فلم يحدث المراد بينكما
    أما بالنسبة لموضوع الكاسين فبيتهيألى انو مش عشان أرضى معاليك قوم أغضب ربنا - أسمحلى يا ملك ماتسواش - بس لو ليك فى المعسل مفيش مشكلة تترص الشيشة فى البيت - و اهو لو حرام بنحرقه و لو حلال أدينا بنشربه - حق روقه و لا مش حقها؟؟

     
  • At Sunday, July 23, 2006, Blogger كلبوزة لكن سمباتيك said…

    lastking &تمر حنة
    أساسا الراجل اللي عينه زايغة ميلزمنيش
    لاني مش بحب الشخص الطفس
    اللي يأكل في البيت نص بطن و يطلع برة يضربله طيق كشري من هنا و سلطنية طرشي من هنا و يحللي ببلوزة
    و لو جوزي اتهطل و بقي كده يبقي سكة سكة اللي يروح ميرجعش
    لان أنا كده و بحب نفسي كده و هو اتجوزني كده
    و لو اعرب في يوم من الايام عن حلمه في اني اغير لون شعري او اخسلي كام كيلو فانا معنديش مانع اللون شعري و عنيا و اي حاجة تانية
    اعمله روبي و شكيرا و سامية جمال
    من باب التسلية و المتعة فقط
    لكن فكرة انه يفكر يضربله كاسين دي فكرة فاجرة
    لا في البيت و لا في الغيط ولا تحت بير السلم
    لان كل شئ مقدور عليه الا غضب الله
    اسعده و ادلعه و احميه اوكي لكن اعصي الله علشان جنابه ينبسط لا و الف لا
    يا لاست كينج الست اللي توافقك علي كاسين و تفرحك بيهم ممكن لما تروح الشغل تبسط غيرك بحجرين مادام مبدأالخوف من ربنا انعدم
    اعتقد ان طلاقك لزوجتك كان افضل قرار اتخذته فهيا ملهاش ذنب تعيش مع راجل زيك
    تمر حنة
    قولي لصاحبتك تبسطه بس بالعقل

     
  • At Monday, July 24, 2006, Blogger lastknight said…

    الى تمر حنه و كلبوزه ..
    مصريتان طبق الأصل .. لا تعليق ألا تستاهلوا اللى بيحصلكم .. على فكره أنا مصرى جدا .. صعيدى من قنا .. و خلانى من المنيا .. يعنى مأصل فى مصريتى .. و الراجل المصرى صاحب مزاج جدا جدا جدا .. و شهوة الحياه عنده راقيه و متفوقه جدا .. و بيعرف ينبسط و يبسط اللى معاه جدا .. لكن خلونى أسأل السؤال بصوره تانيه .. لو الراجل قرر يتجوز عليكى .. واحده و اتنين و تلاته .. المسأله شرعا حلال .. و من غير سبب ألا أنه بيحب النسوان .. الشرط حسب نص الآيه ( انكحوا ماطاب لكم من النساء مثنى و ثلاث و رباع ) ماطاب حسب النص القرآنى .. يعنى من غير سبب ألا أن الراجل تعجبه ست تانيه و تالته و رابعه .. و بالتالى جوازه عليكى حلال .. ياترى فى الحاله دى هاتبقى مبسوطه أنه عمل الحلال و ماشربش كاسين ؟ و على فكره أنا ماباشربش لا كاسات ولا شيشه .. لكن طبعا بما أنكم ناقصات عقل و دين ( و صدق رسول الله ) افتكرتوا فورا أنى باشرب .. أو هاقبل أشرب.. أنا مزاجى بعد شغلى النسوان و بس .. و برضه بسبب التخلف المطبق أول فكره خطرت فى يالكم تشتموا فى جنسيات عربيه تانيه مسلمين و يمكن ايمانهم أكتر منكم .. البنانيين و المغاربه .. عموما .. انا عارف أنكم مش ممكن تفوقوا من الغيابات اللى أنتوا فيها ألا لما تلاقوا نفسكم حاصلين على اللقب الموضه فى 2006 .. طبعا عارفينه .. قرار الطلاق كان بسبب الغباء المستحكم .. هاهاهاه مش عارف ليه بتفكروتى بيه كل ما أنساه

     
  • At Monday, July 24, 2006, Blogger كلبوزة لكن سمباتيك said…

    الي المصري الصعيدي التيواني
    لاست كينج
    الشهوة ضعف و لا رقي في الضعف
    و المصري الصعيدي الأصيل لا نسوانجي و لارمرام
    نعم لشرع الله في زواج الرجل من اكثر من واحدة
    وأنا سعيدة انني أمرأه مسلمة ناقصة عقل و دين
    أحسن ما أكون ست ساقطة بتصاحب رجالة متجوزين
    معلش يا لاست كينج انت معذور عينة الستات اللي تعرفهم فهموك ان الشهوة رقي و المرافقة أحلي من الحلال
    ابقي سلملي علي خلانك

     
  • At Monday, July 24, 2006, Blogger كلبوزة لكن سمباتيك said…

    الغالية تمر حنة
    الحمد لله اننا طلعنا نسخة طبق الاصل اصل اللي ميعرفهوش البلوجرية هنا اننا اصدقاء في الحقيقة
    و نسيت اكملك المثل
    برة و جوه فرشتلك و انت مايل و ايه يعدلك
    و لان الشئ بالشيئ يذكر
    قالوا
    ديل الكلب عمره ما يتعدل و لو علقه فيه قالب
    علي فكرة البراشوت نشف و رحت بيه فيلم حليم يا دي النيلة علي جود نيوز دول مفروض يسموهم باد مود
    ----
    اوعي يكون عندك (تنفيض )النهارده
    و لا رحتي (تحلقي)عند الكوافير
    هههههههههههههه
    تحياتي

     
  • At Wednesday, July 26, 2006, Blogger تمر حنه said…

    last king
    بص و من الأخر : اللى مبوظ الدنيا أمثالك اللى ماسكين فى أيدهم سيف أسموا الطلاق - بتخوفوا بيه ستات خايبه زيكم - و فى المقابل يستحملوا بلاويكم
    يا ماااامااا - العو
    فى رأيى ان الطلاق أحلى جايزة ممكن تاخدها الست مقابل الهوان النفسى و المعنوى من الأرهابيين اللى أنت واحد منهم
    مجرد كلمة : "تستاهلوا الطلاق " دى تدل انك سادى و نازى و كل ماتمتلكه كلمة فى فمك : روحى و انتى طالق - أم المرجلة يا عترة يا بتاع الصعيد
    لأ لو فعلا اللى بتعاشر رجالة زيك أشرفلها تخلعك و تتنازل عن تمن بهدلتها السنين اللى فاتت معاك و مع أولادك
    بكرة لما الشهوة تنطفى و تكبر و تعوز اللى لا مؤاخذة يشطفك هتلاقيها بتقولك هاهاها -فاكر لما سيبتنى بالليالى أعيط عشان النسوان : شوفلك واحدة منهم تعينك عالليالى السوده - يابنى أفعل ماشئت فان الديان لا يموت .

     
  • At Wednesday, July 26, 2006, Blogger تمر حنه said…

    كلبوزة لكن سمباتيك
    أوخشى لو عندك براشوط زيادة ابعتيهولى فى أتاتشمنت عشان عايزة أهرب عالسينما بكرة

     
  • At Wednesday, July 26, 2006, Blogger lastknight said…

    الى كلبوظه و تمر حنه
    واضح أنى جيت على الوجع .. عموما براحتكم .. عن نفسى و عن أغلب المصريين جدا .. مزاج الراجل فى النسوان حلال .. و الشهوه مش عيب .. الشهوه نعمه .. و ياريت التخينه اللى عامله مسلمه قوى ترجع حديث الرسول عليه الصلاة و السلام .. حبب ألى من العباده الصلاه و حبب الى من زينة الدنيا الطيب و النساء
    يعنى الراجل اللى يحب النسوان مش كخه .. لآ .. ده راجل صاحب مزاج و يعرف يتمتع بالدنيا و يحيى سنه عن الرسول عليه الصلاة و السلام فى كثرة النساء .. الباردين اللى زى حضراتكم بس هم اللى بيشوفوا المتعه حرام و عيب .. و كخ .. عموما خليكم .. الرجاله الى بجد بياخدوا أمثالكم يخدموا فى البت و يربوا العيال بس .. و المتعه بيلاقوها فى الستات اللى بجد .. و كله بالحلال يا تخينه أنتى وصاحبتك ..مابنغضبش ربنا و الحمد لله .ز
    و غصب عنكم .. بنحب النسوان الكتير .. و بنستعمل الستات الغبيه للخدمه و بس .. و اللى مش عاجبها غيرها ألف ..

     
  • At Wednesday, July 26, 2006, Blogger تمر حنه said…

    last king
    جيم أوفر - كفاية لحد كده انت بتجرح و مش بتعرف تتحاور .. ولا كلمة تانى شرفتنا

     
  • At Wednesday, July 26, 2006, Blogger lastknight said…

    اتقمصتى ؟؟ عموما المسأله لا تعنينى .. أنا حياتى متوازنه بشكل جيد جدا .. أنا بس تأثرت بالبهدله اللى صاحبتك عملتها فى نفسها ..و قلت افهمكم حاجه لوجه الله لكن أذا كان تعدد الزوجات مقبول بالنسبه لكم .. يبقى ايه لزوم شغل الأراجوزات و تغيير الشكل و اللون .. خليها زى ماهى .. و الراجل لو عجبته واحده مختلفه يتجوزها و خلاص ...و ينتفى الغرض من الشكوى من أساسه .. ولا أيه ؟
    عموما كتاباتك جميله .. و لو سمحتيلى أبقى أمر عليكى من وقت لآخر ..و طبعا تشرفنى زيارتك لمدونتى .. و أن كانت مواضيعها لا تمت بصله لموضوعاتك
    و أذا كان كلامى فيه جرح لمشاعركم .. أرجو قبول اعتذارى
    و الشرف لينا يا مدام

     
  • At Wednesday, July 26, 2006, Blogger كلبوزة لكن سمباتيك said…

    تمر حنة
    الباراشوت تحت أمرك يا حبيبتي
    ان شاء الله تنبسطي
    عجبتني قوي حتة لما تحتاج حد يشطفك دي
    ههههههههههههههههه
    يا ماما تعالي شطفيني
    ههههههههههههههههه
    يا بنتي هيا جت علي دي اللي متعود يعيش بنجاسته طول الوقت مش حتفرق معاه اتشطف و لا لأ
    ابقي اتصلي يا تمرمر
    قبلاتي لك

     
  • At Friday, July 28, 2006, Blogger تمر حنه said…

    الغريب
    انت فقط الملك الأخير - حقا انت من تستحق هذا اللقب
    انا قرأت القصيدة أرجوك أقرأ تعليقى المذيل بانبهارى
    خالص تحياتى

     
  • At Friday, July 28, 2006, Blogger Ahmoss said…

    You are so funny but I got a question.
    Are you that funny with Mr. Nazmy?
    I always said that the funny woman is that one who can keep the man for the longest time.
    Wala enti funny henna bass?

     
  • At Sunday, July 30, 2006, Blogger الساحر said…

    حرام عليكى عندك امكانيات رهيبة
    وحرام الجمهور اللى مش قادرعلى الكمبيوتر اوالنت يتحرم من كتابات

    ك

     
  • At Saturday, August 12, 2006, Anonymous Anonymous said…

    Interesting website with a lot of resources and detailed explanations.
    »

     

Post a Comment

<< Home