حقك عليا .. ماتزعلشى
طب و مقام الشهر الفضيل ماتاخد على خاطرك منى
دانتا نور عينى
خلاص بقى ماتزعلش
تعالى نقعد فى الفراندا دا الهوا الليلة يرد الروح يا حبة عينى
ايه يعنى لما أفضفض بكلمتين واقفين فى زورى – مش لازم أقولك اللى مزعلنى عشان أصفى
هو انا ليا مين غيرك يعنى ؟
طب دانا عاملالك الرز بلبن اللى بتحبه ...
طب تعدمنى لتاكل الطبق ده – دانا عاملاهولك بايدى ... يا سيدى
دانا كنت عايزاك تاخد بالك بس انى تعبانة مالشغل و العيال .. و شغل البيت – مانا برضك بحس
كنت عايزاك تعذرنى لو ليلة دخلت من برة و مالقتنيش متوضبالك زى مابتحب
كنت عايزاك تطبطب عليا لو لقيتنى رابطة راسى مالصداع
كل اللى أنا كنت عايزاه شوية حنية .. حنية يا راجل من بتوع زمان .. فاكرها يا حبة قلبى؟
هو أنا ليا بركة الا انت ؟ هى الضحكة بتطلع من قلبى الا معاك؟
طب و مقام الشهر الفضيل لتضحك بقى .. يووه مستخسرها فيا؟
أهو بتضحك .. و ربنا بتضحك ..ماتكتمهاش .. افرجها بقى عشان ربنا يفرجها
طب قوم البس جلابيتك – دانا غاسلاهالك و كاوياها بنفسى و معطراهالك
قوم يا خويا .. يابويا .. ياسندى .. ياحبة قلبى من جوة
يالا كل الرز بلبن بقى عشان أجيبلك الشاى أبو نعناع المعتبر
دانا مش عايزة غير ريق حلو .. كلمة حنينة .. ايدك على كتفى كفاية عليا
قوللى سلامتك .. تسلم ايدك .. متحرمش منك .. بس قولها من قلبك
على فكرة انا دمى خفيف و النعمة .. أخف من دم صحابك بتوع القهوة .. انكشنى بس و اتفرج
ادينى انت الأمان كده و أنا أعيشك فى جنة .. و أخليلك بيتك ده بيرقص مالفرحة
لأ مش بيتك .. أخليلك دنيتك كلها ترقص
يالا تعالى .. و رحرح مش بقولك الهوا يرد الروح !!
يالا تعالى .. و رحرح مش بقولك الهوا يرد الروح !!
Labels: ماتيجى فريحى....
posted by تمر حنه @ 2:36 AM
55 Comments:
At Saturday, September 30, 2006,
Anonymous said…
هههههههههه
حنة
يا بخته بيكى يا حنة
ولا الست امينة فى زمانها
بس تصدقى؟؟
انا نفسى حسيت بالراحة لما قريت كلامك دة..حسيت بريحة زماااان وجمال زمان
قبل الست ما تخنشر ويطلعلها شنب
اصل اختك من انصار صنف الرجالة
اصلهم يا حبيبتشى نعمة
واللى يكرهها يعمى
هو كدة حيحس بيكى
من غير صوت عالى
ولا شخط
ولا نطر
ولا دوشة
قلبك الحنين حيضرب على باب عقله
قوليلى
عندك لسة طبق رز بلبن؟
انا باموت فيه
At Saturday, September 30, 2006,
Adel said…
تمرمر ليلتك كحلي غامق في رمضان يا وليه وعاوزة الراجل ياكل رز بلبن ويشرب شاي بنعناع ويرحرح ؟اعتبر ده اغراء لسي نظمي ولا ايه ؟؟؟ وعموما كل سنة وانت طيبة
At Saturday, September 30, 2006,
LAMIA MAHMOUD said…
اية بس الجمال ده .. تصدقي بغض النظر عن كل اللي قعدنا نقوله والكلام الكبير .. بس بجد الواحدة لما بتحب بجد حتقول الكلام ده كله واكتر منه
ومنكم نستفيد يا اخت حنة .. كده حنظبط اجدعها شنب
At Saturday, September 30, 2006,
tota said…
تمر حنة الجميلة
عارفة تفضل حواء على قد ما تعمل وتسوى قلب حنين من جوه ترضيها كلمة واحدة وايد تطبطب على كتفها او تمسح دمعة من عنيها
قد ايه بتكون ناعمة
يا تمرمر برقتك ونعومتك دى يعنى اى قلب فى الدنيا يرسم مليون بسمة على شفايفه
يا ريت كل حواء تتعلم من رقتك وكل ادم يحب حنيتك ويفهم يتعامل ازاى
تحياتى يا جميلة
At Saturday, September 30, 2006,
محمد البرلسى said…
والله انتى وليه عسل
ولا امى فى زمانه ياااااه فكرتينى با لذى مضى تعرفى انا حاسس دلوقتى ان الدنيا لسه فيها خير وهواها يرد الروح بعد كلامك يا ام روح حلوه
At Sunday, October 01, 2006,
تمر حنه said…
شهروزة
آه عتدى رز بلبن و قمر الدين مطبوخ كمان
تفتكرى سكة الرز بلبن دى هتجيب معاهم؟
ادينا بنجرب - ألا معندكيش فكرة القمر الدين المطبوخ ليه نفس النتيجة و لا ممكن يجيب له حساسية؟ أقولك خلينا فى الرز بلبن لحد ماشكارة الرز اللى عندى تخلص
المزاجنجى
شفت .. أول ماتنشكحوا لسانكوا يتعوج
ولية ؟؟!!ا
و بعدين الكو ده مش بتاع نظمى - آدم هنا أسموا أبو حماده - آدم الجميل الحونين- و مالو الكحلى- ده حتى لون حلو وفرايحى - ليك فى الرز بلبن؟
lamia mahmoud
آه يا لوما ماهو الرجاله دول فى النهاية عيال - يعنى بالونة و قالب شاكاليطا و الزبون يسلم - ظبطى يا أوخا ظبطى و ربنا يهدى العاصى
mehro
جرى ايه يا مهرو يعنى لازم نبذل مجهود أكتر من الرز بلبن؟ ممممم يعنى القمر دين المطبوخ فى نظرك يجيب أكتر؟ ولا تحب "نسفلت" عتبة البيت قبل ماتدخلوا؟ فاهمنى يا أبو الأمهار؟؟
tota
و ربنا انتى اللى جميله و موودى حلو كده و انتى حلوه و الجناحين بتوعك دو يفرفروا أجدعها شنب -
يارب الجنحه دى تفضل مرفرفة على طول يا توتى
القادم من الريف
مش بقولك يا بلدينا انكوا لما بتنشكحوا لسانكوا بيتقلب - برضك وليه
عالعموم هنعتبرها قعدة مصالحة خاصة و هنتجاوز شويتين - المهم انكوا تبقوا حلوين معانا كده - و أوصيك خيرا بالطبطبة
At Sunday, October 01, 2006,
الأميره أوسه said…
و أنا كمان وأنا كمان
ممكن أطبطب عليكى
وأقولك كلمه حنينه ومن قلبى كمان
تسلم أيديكى وعنيكى على كل كلمه كتبتيها ودايمآ منوره الدنيا
بس بلاش رز باللبن أو قمر الدين
أقولك على وصفه أغليله قرفه
أيوه قرفه أغليها كويس وشربيهاله وأدعيللى
شوفت اللوك الجديد بتاعى وأنا بحط روج
At Sunday, October 01, 2006,
Anonymous said…
خدى بالك، كده ناس كتير حاتحسد سى نظمى، فى ناس مش لائية لا الرز بلبن ولآ الشاى ابو نعناع المعتبر، علقى خمسة و خميسة على البلوج
At Sunday, October 01, 2006,
Adel said…
تمر مر هانم واضح ان الناس انشكحوا نيابة عنك خايف عليكي من الحسد روحي علقي لك فردة صندل من بتاع العيال على باب البلوج وبعدين هو كلمة ولية دي وحشة يا ماما كلكم ولاية ربنا يسترها معاكم ومع ولايانا احنا كمان والولية هي مهيضة الجناح ولا انت مفترية سؤال بريء؟
At Sunday, October 01, 2006,
Anonymous said…
تمرمر
الشيستم دة بينفع وبيسمَّع على طول ، بس مين ياحبيتي اللي فايئ وعنده طولة بال له؟
مابتصعبش عليكي نفسك؟
At Sunday, October 01, 2006,
Me2nour said…
لو الست معملتش كده و أصرت إنها مغلطتش و يضرب سي نظمي راسه في الحيط متبقاش ساعتها ست تبقا ساعتها ست أبوها
يا ريت الستات تفهم إنه مش عيب أبدا بل بالعكس واجب عليها تراضي جوزها لما يزعل حتى لو هو اللي غلطان
ده من ذكاء الزوجة و بتتحسبلها عند جوزها و متفتكروش إن الرجالة بتنسى... لأ هم بس ليهم إهتمامات مختلفة و إسلوب مختلف
عدي عليا يا تمرمر و نزلي كتاب الرجال من المريخ و النساء من الزهرة لو مقريتيهوش
رمضان كريم
At Monday, October 02, 2006,
تمر حنه said…
AOOSA
ياختى ماتحرمش من حنيتك ماهو القوارير
لبعضيها برضك - أما عن موضوع القرفة فباذن الله بعد رمضان لازم نتحاور و نعرض وجهات النظر المختلفة فى جدواها و سندلو بجرادلنا فى هذوها المواضيع نظرا لأهميتها الشديدة . أمواه
ANNONYMUS
الله أكبر الله أكبر - امبارح كان الخميس و اللى غيران منا يقلدنا
مزاجووو
شفت برضو اننا صنف حونين و جميل و مشاعرينا عالية بالأوى
شفت الحلاوة- و بعدين الصندل ده تعلقوا عالتاكسى أما البلوج ده كلاس - ممكن يعنى أعلق فردة السابو الجديد بتاعى السيمون اللى من ألدو
أزئوزتى
بينى و بينك يا أوخشى المرارة مابتستحملش الجو ده كتير , و لكن أحيانا الموضوع بيتطلب مننا شوية مسايسة و ذكاء هذا اذا كان هناك رغبة فى الوصول الى هدف ما . ممكن يكون الهدف اثبات القدرة على الأستمرار - أو رغبة على المحافظة على ذلك الرجل بعينه أو مرام مادى أو مصلحة العيال و أخيرا و ليس آخرا الهدف الأسمى ... و الله يعطيهم العافية
me2
لأ يا قمر مقريتش النساء من المريخ و الرجال من الزهرة هنزله من عندك 0 بس قريت كتاب النساء من المنيا و الرجال من بنى سويف أحطلك اللينك بتاعه و تنزليه؟؟
At Monday, October 02, 2006,
كلبوزة لكن سمباتيك said…
تمورة النورة كونورة
ازيك يا ضنايا عاملة اية انبي وحشاني موووت و نفسي ابوسك و اقعد ارغي معاكي للصبح
هو اية اللي حصل في الدنيا و اية النعومية اللي خرت عليكي فأجة دي
ماهو علشان كدة بيترسم عليكي من طيبتك و حنية قلبك
يا بنتي بيقولوا في المثل عبر ال**رة ينجعص لورا
و الحرفين الناقصين حبعتهملك في جواب مسوجر
اديله جامد لياخد علي الدلع معندناش رجالة ترحرح
بقولك اية متجبيه و تيجي تعملي عمرة و تخدي لون
ههههههههههه
بحبك موت يا مضروبة
اموه
At Monday, October 02, 2006,
تمر حنه said…
كلبوزة النوووزة
مش بقولك الحياة معاكى ألذ ألذ ألذ
حاضر نجيبوا و نيجى ناخد لووون و زى مايطلع اللون ده : بنى .. كحلى .. مخطط و زى ماتيجى
At Monday, October 02, 2006,
ام العيال said…
ست تمرمر
و النبي تقوليلي هيه وصفة الرز بلبن دي جابت نتيجه؟؟
دا انت و لا نانسي عجرم
يا طبطب يا دلع
يا بختك يا سي حنفي
At Tuesday, October 03, 2006,
Anonymous said…
ennaby yamma tedeeny wasfet el rozz belaban di .ya tara khafeefa walla eih,asl abou el 3eyal falsa3 men khamshashar sana keda we yenken law 3ereft a3mel el wasfa di yerga33???????
mesh ayza 2ahwa 3araby? tab fein el thermos???
At Tuesday, October 03, 2006,
Ezz said…
يا ست تمر حنة يا اميرة يا طيبة، كل سنة و أنتي طيبة و رمضان كريم. دي طبعا مش الزيارة الأولى ولكنه التعليق "الأول" الأول دي فكرتني بالأول بتاعت أنور وجدي في عاد لينتقم.. المهم.. الموضوع ده بجد مهم و سيبك من الرز بلبن او القمرالدين ..بجد هو الراجل مننا ليه ما بيتفكش كده مع مراته زي ما بيتفك مع صحابه؟ و بجد الراجل ساعات مش بيفهم إن مراته محتاجه كلمة طيبة تنسيها هم اليوم وقرفه بس برضك يا ست تمر حنه" أعلى الخالق مراتبك" الراجل برضك بيبقى محتاج إن مراته تسمحله بمساحة إختلاء مع نفسه.. يعني الراجل بجد .. لأ أنا بتكلم عن نفسي و مش هأتكلم بإسم الرجالة .. بارجع البيت و ببقى محتاج أتفرج على التليفزيون أو أقرأ كتاب و موضوع الكلام مع الزوجة ده ساعات بيقى متعب في ستات كده ولا أيه.. أنا مراتي ساعات بتبقى في الفورمه الصح يعني تكلمني في موضوع و بأتفاعل معها و ساعات بيحصل العكس.. بس سيبك أنتي القعدة عللى البلكونه و كوباية الشاي المنعنع دي ترد الروح و تخلي الواحد يرحرح بجد. و ربنا يخليلك أدم.... عز
At Tuesday, October 03, 2006,
Anonymous said…
تمر حنه
.
.
نفسي اعيط
At Tuesday, October 03, 2006,
سالفة قلب said…
الله كلام جميل كله حنيه
استمتعت بقرائته
تحياتي
وكل سنة وانتي طيبة
At Tuesday, October 03, 2006,
أم أحمد said…
أختي الفاضلة انتي اسلوبك رائع فعلاً الواحدة مننا مش عاوزة غير قلب حنين يقدرها ويطبطب عليها
كل سنة وانتي طيبة
أم أحمد
At Tuesday, October 03, 2006,
Anonymous said…
Wednesday(October, 4th) is my 16th anniversary. And even after this long time of living together, We still fight,,,, But she does know that I can't live without her. Marriage is a very strong relationship, and things like ROZZ Bellaban, well make things go smoother and more enjoyable. Ramadan Kareem. AE
At Tuesday, October 03, 2006,
واحد من الناس said…
كل عام وانت بخير يا ارق و احن تمر حنه
لو كل الي بيتجوز بيسمع كلام حلو زي ده يبقى انا عايز اتجوز من بكره وياريت تشوفيلي عروسه بس تكون حنينه زيك
وقد صدق المثل القائل إن كل فلسفة الرجال لا تعادل واحدة من عواطف المرأة
At Wednesday, October 04, 2006,
تمر حنه said…
أم العيال
الوصفة سهلة ..جوى جوى
بص ياموالعيال:-
أولا: تنيمى العيال(ممكن تديهم منوم فى السريع) مباح
ثانيا: حمام فى السريع كدة من غير أى مغالاة فى الأمبرفام ولا رموش اصطناعى لا لا لا مش عايزين أفورة
ثالثا: تحضرى كوبايتين رز نضيف - علبة لبن كامل الدسم - نص كوباية سكر
رابعا: احلى حلة عندك تحطى فيها الرز و شوية ميه و نار هادية يا قمر لحد مايتشرب الميه و بعدين تحطى اللبن نقطة نقطة و تقلبى عالنار و بعدين السكر
خامسا: و الأهم : وشك مفرود - بقك مفشوخ و طول مانتى شغالة تغنى أغنية: أنا بستناك و ليلى شمعة سهرانة فى ليلة حب ..
و أهلا أهلا حلوة - أهلا أهلا أهلا حلوة شايلاها عيون بتحب
و قلب حرير ..حرير
شايلاك مطرحك فى القلب
أنا بستنااااك أنا
عيشى الروح دى و لو مش قادرة عالحاجات الصعبة دى ممكن تديها واحد بانادول أكسترا و واحد مهدئ نضيف عشان تتفاعلى
بلغينا بالنتيجة ياقمر
أمىىىىىىىىى
و أنا بقول البلوج مالو منور كده ليه
لأ بصى بقى يا أمى انتى حالتك مختلفة ممكن نحضر أرواح ينكن يرجع و يلبسك بس المشكلة انو لو جه هيلاقى المطرح مغلق - أو جالو أمر ازاله
حبيبشى حالا أبعتلك الترموس مع الولا فرج ماتحرمش مالعين و الرمش - أحلى أمووواه - و النبى تقوليلها : اتى يابت
At Wednesday, October 04, 2006,
Anonymous said…
ya ommy el matra7 asasann ba3a amr el ezala wel tankees gebteloo mobayyad ma7ara we 3amalto ceramic elly mesh la2yaha ba2a el fallaya ashan galset ta2amol yom el gom3a fo2 el sot7. leky fel gaz?
At Wednesday, October 04, 2006,
تمر حنه said…
EZZ
طبعا آدم و حواء محتاجين المساحة اللى انت عايزها - محتاجين للسر الكبير فى العلاقة ألا و هو : الشوق
أنا كنت عملت مشروع كدة على قدى لازم تقراه و تدلو بدلوك فى بوست اسمه : المختصر المفيد فى علوم التجديد
أهلا بيك فى مدونتك و ياريت ماتكونش الأخيرة
الأمضاء : حسن الهلالى
ANONYMUS
يقطعنى شكلى جيتلك على جرح و نفسك صعبت عليك - و النبى سد سد و ربنا يهديلك العاصى
سالفة قلب
هلا و غلا و الله - اتشرفنا بزيارتك يا ست الكل
بس انتى سالفة القلب ده من مين عشان أنا كمان عايزة أستلف واحد
مدونتك رائعة - أدعو جميع أصدقائى لزيارتها - جمييلة
SAHAR
انتى اللى جميلة و طيبة يا أم أحمد - كل سنة و انتى طيبة
ANNONYMUS
كل سنة و انتو طيبين و مبسوطين مع بعض و ربنا يبعد عنكو شياطين الأنس و الجن
واحد من الناس
و النبى كان على عينى - بس أنا ماليش فى موضوع الخاطبة ده - بس فيه واحدة حبيبيتنا أسمها كلبوزة لكن سمباتيك شغالة فى الموضوع ده -
انت بس تروح لها و تقولها خاتى تمر حنه بتسلم عليكى و بتقولك شوفى لى مصلحة نقاوة من نوع15 على 378 أبيض و هى هتقوم باللازم
At Thursday, October 05, 2006,
Gbalawy said…
اه منك انتى ياواعيه عرفتى تطبقى المثل اكله رز بلبن يطلع معاكى البلكونه
At Thursday, October 05, 2006,
Anonymous said…
السلام عليكم ورحمة الله
أختي الكريمة تمر حنة
أرجوا أن تشرفينا بزيارة مجموعتنا التدوينية " شباب عايزة تتجوز "
و تشاركينا في حل هذه المشكلة الإجتماعية المستعصية
و أدعوك إلى الإنضمام مجموعة عملنا التدوينة لدعمنا في قضيتنا العادلة و دفع كفاحنا نحو حياة كريمة عفيفة سعيدة
و تفضلي بقبول فائق الإحترام و التقدير
http://elzawaj.jeeran.com/
كتبه / جندي الفضيلة
مصر - القاهرة
for_elzawaj@yahoo.com
At Friday, October 06, 2006,
Mahmoud Serag said…
بالفعل اتفق مع من نصحك بموضوع فردة شبشب على باب اليبت ده علشان الحسد لانى فعلا حسدته ، و مش قادر غير انى أرد بلسانه .
أم العيال الغالية انا عارف انت قد اية بتتعبى فى البيت و وجع دماغ العيال و قرف الدروس و المذاكرة ، لكن انت كمان عارفه الحياة صعبة بره قد اية و انى لما برجع من الطاحونة مفيش حاجة بتنسيهانى غير لما بشوف ضحكتك و لا برتاح الا على كتفك ، هو انا لى غيرك ، زعلانة من قعدة القهوة الشوية اللى بقعد فيهم مع اصحابى اللى مش عاوزيين منى حاجة غير انهم يسندو عليا و اسند عليهم طيب مش السنين اللى عشناه انا و هما مع بعض تديهم فى حق برضك ؟ ، و انت عارفه انهم عمرهم ما خدونى منك ، و لا حد فى الدنيا يقدر يخدنى منك ، انا برضه مليش فى النهاية غيرك انت و العيال اللى بكل تعب قلبهم لما بيكبروا و ينجحوا قدام عينيا بيصبرونا و العيال دول اية مش انا و انت برضه ، انا اللى زعلنى منك انى جاى و مستنى ضحكتك الحلوة اللى متعود عليها ، جاى بحلم باللحظة اللى حرتاح فيها من كل الهموم و حرجع عيل على كتف امه ، جاى بحلم بكل ده لاقيتك زعلانة و بتشكى ، طيب هو انت عاوزانى ابرر لك و الا اقولك انا عملت كده علشان و علشان ؟ هو انت مش حافظانى و عارفه انا بعمل كده ليه ؟! انا اللى زعلنى انك مفهمتنيش أو مستحملتنيش ف ساعة ، ساعة قدامها سنين عشناه مع بعض فيها الحلو و المر ، على كل حال انا كنت عارف انك حتيجى و تقولى اللى قولتيه ده علشان انا عارفك حنينة و ميهونش عليك و انا مش زعلان و الا حاجة ، انا كنت مستنى ايدك تطبطب على و تقول الكلمتين الحلوين دول علشان نقعد ناكل مع بعض الرز بلبن اللى بحبه من ايديكى ، تسلم لى ايديك و ربنا يخليكى لى ، قومى بقى هاتى لنا طبق و معلقتين .
At Friday, October 06, 2006,
تمر حنه said…
الغريب القريب
فاهماك؟ الا فاهماك - انت عارف حل المشكلة هى اننا ندى لبعضنا الأمان - أقول كلمة و مش خايفة من ردة الفعل - يقوللى كلمة و مش خايف أفهمها غلط
المفروض مع بعض نغمض عننينا و نحكى كأننا فى مدونة , أيوة زى مابنعمل هنا نتحرر من الأساتك مع بعضينا و نرحرح - فاهمنى انت؟
المهم بقولك ايه بلاش موضوع التمليس عالشعر اليومين دول لحسن ياخويا عاملة حمام توم بالنخاع لمنع سقوط الشعر هههها - انما ايه تاكل صوابعك وراه
omm- el kholool
يا أمى ألف بركة - تارينى كنت سامعه عندكو امبارح زغاريط زغاريط زغاريط
يا حبايب الست أم الخلول دى حبيبة و بنت حبيبة و النبى نروح لها و نبارك و نضرب نااااار لحسن دى ست الكل و النعمة و حلالة المشاكل و العقد بصحيح
gbalawy
آه يا جبلاوى حاكم كنت بسمع ستى أم أم أم أمى و هى بتقول لأم أم أمى أكليه البالوظه و لما مالقتش بالوظة فى كارفور رحت جايبه له رز بلبن و بالعند فيك طلع الفرندا - ماهو الرز بلبن ليه سبع فوايد هقولك عليهم بعدين
caesar
طب و ربنا سدقتك .. طب كلمتين و قلتهم خسرت ايه بقى - أكيد اللى هتسمعهم هتبقى فوريرة و تبادلك المعروف بمثله - بطلوا بخل بقى حتى فى الكلام يا آدم؟
و بقولك ايه المقدمة دى بقى عشان تقوللها عندى السكر و الضغط و الأنسولين و الكلام ده؟ بطل كهن بقى و ابقى أخصم منها كل شهر تمن انبولتين الأنسولين الزيادة بتوع طبقين الرز بلبن !!ا
جندى الفضيلة
شكرا على دعوتكم الكريمة و أتشرف بالأنضمام اليكم - بالمناسبة المحامين بتوعكوا كويسين ؟؟ أصلى مقطعة بطاقتى من زماان
At Friday, October 06, 2006,
تمر حنه said…
This comment has been removed by a blog administrator.
At Friday, October 06, 2006,
تمر حنه said…
MAHMOUD SERAG
ياخويا مانحرمش من دخلتك عليا و بدعيلك : الهى يرقى راجل البيت -
يعلى مقامه
و يوثق حزامه و يركب جحش فوق الجحش
ملحوظه : أيام ما اخترعوا المثل ده كان الجحش أرقى وسيلة مواصلات - شوف انت بقى لما تركب جحش بدورين (زى بتوع لندن) تبقى غالى عند أم العيال أدايه
At Saturday, October 07, 2006,
Mahmoud Serag said…
أستمتعت بردك تمر حنة
و أول مرة أسمع دعوة الجحش أبو دروين
و منها كانت كلماتى فى بوست بمدونتى و إهداء لتمر حنة
At Sunday, October 08, 2006,
Ahmed Shokeir said…
ايه ده ايه ده
اللي يشوف البوست ده مايشوفش اول بوست كتبتيه فيه نقلة مية وتمانين درجة
لا لا فيه تحسن كبير اوي برافو
بس مش عارف حاسس انك بتقوليه الكلام ده وانتي بتكزي على سنانك ، كنت متوقع انك في اخر البوست الأدرينالين عندك هايرتفع وهو عمّال يَتَمنع وهاترمي طبق الرز بلبن في وشه وانتي بتقوليله كلام عيب يحاسب عليه القانون
At Sunday, October 08, 2006,
-- said…
يخرب بيت شيطانك يا شيخه:D
At Sunday, October 08, 2006,
مجدى سرحان said…
تصوير رائع
مؤلم
ومخزى
يقول ببساطه
أن المرأة
تظل اما طوال الوقت
وفى حرمان دائم
من ان تعثر على اكتمالها
الند
الحقيقى
والجميل
ربما تفارق الدنيا دون اثر لخطوة له على طريقها
وسط كل هذا الضجيج
لكنى اقول لها
وحدك
ترتبى العالم
تعجنيه بصبرك واحتمالك
وحدك
تحملى كل هذه الأثقال
على كتفيك
كونى عادلة إذن
وارضعيه
المحبه
علميه
أن ترى عيناه
كائنات اخرى
كائنات
بقلوب تشبه قلبه
وبرغبة فى الحياة
تشبه رغبته
كائنات
ليست خادمات
تقديرى
وإعزازى
وودى
At Monday, October 09, 2006,
تمر حنه said…
Ahmad Shokeir
يووه يا سى أحمد أهو انت دايما كده قلبك اسود
مش عارفه أراضيك ازاى يعنى فرشتلك بره و جوة - حتى فرشتلك الفرندا و انت ايه يعدلك؟- شفت أدينا بنمدلكم ايدينا بالسلام و انتو مفيش فايده
برضو كده؟؟ عموما المثل بيقول الراجل يطفش و الست تعشش
سعد
عارف ليه ؟؟ عشان طالع مالقلب و لازم يدخل القلب
سعد سعد يحيي سعد
زعرورة
و انتى طيبه يا هانم - أى خدمة
:)
مجدى سرحان
بالطبع أنا وحدى أستطيع أن أرتب عالمك يا آدم - أستطيع أن أريك كل الكائنات التى تدهشك كل الأوقات
لدى من الصبر و الحنان الفطرى ما يملأ جوفك و يشبعك و لكن أرجوك أرفع معاولك عنى
أرفع سهامك و منجنيقاتك عن مرمى حصونى
لا تهدم متعتى العظمى فى رؤية نظرة الدهشة والأعجاب بى - لا تمسك لعابك اذا ماسال نوبة من فاهك المفغوراندهاشا بألعابى السحرية
لا أريد سوى هذا , فهل هذا ثمن باهظ لترى كائناتى المتوارية؟
صدقنى يا آدم هذا هو الثمن
طاقاتى تتفجر من نظرة عين و ابتسامة رضا
فلا تبخل بها علىّ
حواااااااااء
At Monday, October 09, 2006,
SaSo said…
ماشى ياست حلو الرز بلبن وحلو التغيير ال180 درجه ده ده يوم المنى يوم ماتتصالحى انتى والاستاذ بتاعتك
بس انتى بتجيبى ورا ليه؟
رمضان بقى؟كل سنهة وانتى طيبه
At Monday, October 09, 2006,
تمر حنه said…
سعد
انشر يا سعد - زييييع
At Monday, October 09, 2006,
admelmasry said…
خلاص والله مش زعلان
At Monday, October 09, 2006,
Anonymous said…
والله برافوعليه نظمى
انه قدر يوصل فى العلاج معاك للنتيجة ده انا بعلاج ناس من الاستبحس اللى عندك وموصلتش للنتيجة الحلوة
At Tuesday, October 10, 2006,
3rby said…
هو ده نفسه اللي كاتبه عنه في اول موضوع في الارشف؟
At Wednesday, October 11, 2006,
littilemo said…
صراحهه ابداع ما بعده ابداع
At Wednesday, October 11, 2006,
أُكتب بالرصاص said…
يا سلااام
ليلي..
قصدي حوا لما تبقى عايزة حاجة ، تقدر تعملها
بأيديها تخلي عم حنفي حياته جحيم ويلعن اليوم اللي ابوه اتجوز فيه امه
وبايديها برضه يفتكر نفسه شهريار
ويتنفقخ فيها
وينزل يمشي في الحارة ولا ديك البرابر
يعني ..
يا حوا
مش الطيب احسن
!!؟
والله احنا زي العيال
كلمتين حلوين يخلونا
في الهوا دوبنا
تحياتي يا تمر حنة
At Thursday, October 12, 2006,
تمر حنه said…
آدم المصرى
و النبى خليك فى الدكتوراه بتاعتك - آدى اللى انت فالح فيه
ايش أخششك انت فى الرز بلبن و الشاى أبو نعناع دول ليهم ناسهم
anonymus
لأ لأ اقف معووج و اتكلم عدل - احنا اللى بدعنا الأستبحس و احنا اللى بنعالجه - و لا نظمى و لا طلايله
مابلاش الأنونيموس ده و تعالالى راجل لراجل فى الميدان كده - نعرف بس بنكلم مين
3rby
أيون - هو بعينو بتاع أول بوست فى الأرشيف - نظومه نظمظم - ياختى جمالو حلو - يختى شبابو حلو
littlemo
ياااه - و النبى ليك وحشة
طب بالأمانه زعلانه منك
مفيش ازيك يا أبلتى - كل سنة و انتى طيبة
حتة كينافة للبت الزوغايره - ولا حتة هريسة؟
ياريت يامو بلاش تغطس كتير - انت مهندس ايه بقى؟
أكتب بالرصاص
معلوم الطيب أحسن - بس اهدوا انتوا علينا و بلاش تكسير فى مجاديفنا
واحنا نقدر نعيش من غيركوا : دانتو الحله و احنا غطاها
دانتو القفف و احنا ودانها
منتحرمش منكو - قادر يا كريم
At Thursday, October 12, 2006,
أُكتب بالرصاص said…
حلل
!؟
قفف
؟!
الملافظ سعد يا عبعال
:)
At Friday, October 13, 2006,
يا مصر اكتب إليكي رسائلي said…
انا الطرشجي اللي نسيت اسمه ، اسمه تاني اااااااااااه ، زواوي زواوي .. وحشتيني ، أكبر حضن حضن حضن كبير قوووي ـ انا اخ ما حدش من اللي ها يقروا البوست دا يغير يعني ..
وحشتيني حقيقي ، اقصد الكلام معاكي .. مش اني اسمعك بتتكلمي .. دا بسمعه كل يوم تقريبا .. انا مدمن تمر من ايد منقوش عليها حنه ..
بس المرة دي مش عارف ليه نفسي اتكلم يعني ... عارفة يمكن عشان عجبني المبادرة منك .. في كتير مخهم ناشف ..ولا يمكن عشان طريقتك اللي توصل للقلب ..عشان من القلب .. وفي كتير ما يعرفوش أيه اساسا اللي في قلوبهم عشان يقولوه .. ولا يمكن انك في رقي توسلك ( شكلة ضعف ) تأمري القلب أن يكون طوع (سر قوته)وحشني اني اقعد ادامك على السفرة ـ اخ صغير ، وتمدي ايدك بنايبي في الحلو كله ..ووحشني انك تلاقي رقرقة الدمع في عيوني وتقولي لي .. ماتخافش ، انا ها اصلح كل شيء تاني ... وحشتيني اختي ... وحشني اشوفك وانا مبتسم بعد من قدر ثقتي فيكي وفخري بيكي..وترقص الدنيا حوليا.. وحشتيني
At Saturday, October 14, 2006,
تمر حنه said…
أكتب بالرصاص
يووه بضحّك معاك
يا مصر أكتب ليكى رسايل
يا غالى عليا يا زواوى ياخويا - زواوى ياخويا
يا أجمل هدية من أمى و ابويا
ياخويا ماتشوفش وحش ولا ردى و مانحرمش من سؤالك عليا - و النبى ياخويا ماتغبش علينا كتير البلوج مالوش طعم من غيرك
At Friday, October 20, 2006,
Anonymous said…
كويتى طالب فى جامعة القاهرة سنة اولى مستجد يطلب التعارف مع بنت جامعية جميلة ومحتشمة ويفضل ان تشاركنى السكن مع الاكل والشرب مجانا وبدون اى مقابل . اللهم
للدراسة والسوالف وقت الفراغ بريدى
lusts2002@hotmail.com
http://iloveyou2000.blogspot.com
http://q8topic.blogspot.com
At Saturday, October 21, 2006,
تمر حنه said…
anonymus
جرى ايه ياروح خالتك - متدينة و محتشمة تشاركك فى السكن و تاكل و تشرب بدون أى مقابل؟؟
الصراحة لولا الشهر الفضيل كنت عرفت أرد عليك صح
اللى تشاركك فى الزريبة دى هناك عندكو لكن عندنا ماتلاقيش
أجرى ياض على بلدك و سيبنا فحالنا - هى المصايب اللى عندنا مش مكفية لما هتجيلنا مصايب من برة؟؟
ليه ياربى تخلينى أقرا الكومنت ده فرمضان و العشرة الأواخر؟ اللهم انى صايمة
At Monday, October 23, 2006,
Ahmed Shokeir said…
هو الجدع ده جالك ، جته نيلة تاخده
ماهو جالي في مدونة نضاره شمس وسايب تعليقات كده وانيل من كده إبتدي يعاكسني ويقول عليا انه حاسس اني انسانة حساسة جدا والعاطفة عندي عالية جدا لدرجة اني شكيت في نفسي وفكرت اكتب عنه وقلت بلانيلة إحنا في ايام مفترجة ومسحت أم الزبالة اللي كاتبها
At Wednesday, October 25, 2006,
تمر حنه said…
الغالى بألاوى شوكير
ياخويا هل هلالك - انت فين ياهندزة؟
ياسيدى أهو كتر خيره خلانا نشوفك - و أنا أنسى أفضالك؟
كل سنة و انت طيب و العيال و امهم بخير
ياترى نزلت فى أجازةالعيد ولا لسه؟
ربنا يطمنا عليك
At Monday, November 20, 2006,
maged stephen said…
تفتكرى المرأة المصرية زى ما بتوصفيها كده بالبساطة دى كم أتمنى
لأ وترضى كده بأبسط الأشياء عموما أنا شايف أن الأغلبية أتغيرت للأسوأ زى ما أغلب الرجالة أتغيرت للأسوأ وزى ما حاجات كثيرة فى حياتنا الحالية أتغيرت للأسوأ
أرجو تقليل عدد مرات أكل الرقاق علشان الرقة دى تقل شوية
وعلى فكرة أنا بحب أغنية رقّ الحبيب ورقعنى بقّّلّة علشان بتأكد تعريفى الشخصى للحب:وهو: الحب هو قمة المقدرة على الضعف تجاه الاخر
لكن طبعا مش لدرجة الرقع بالقّّلّة
At Monday, August 27, 2007,
Anonymous said…
ياسلام انا متاكده ان الوصفه دي هتجيب نتيجه طبعا هي الكلمه الحلوه تاثيرها سااااااااااحر وبيعمل المستحيل وكفايه في لحظات الصفا اللي بتبقي زي السفنجه اللي بتشرب كل المشاكل بتاعه اليوم وكل حاجه تتنسي بس كل واحده بس تيجي علي نفسها وتمسك لسانها وتتكلم كلمتين حلوين مع بعلها وتقوله انت وبس ومفيش غيرك يا ابو محمد
At Thursday, April 16, 2009,
Anonymous said…
حلو قوي البلوج دة يا حنة ،بغض النظر انكمشبتكتبيبقالك فترةواناكل فترةبدور علىالجديد بتاعك بس كلما احس نفسيزهقانة اقراه تاني وتاني، عارفة ايه اللي مأثر فيه قوي يا حنة موضوع الحنية دة لآن بجد الست محتاجة ايه غير شوية حنية وطبطبه على كتفها و هي تهد الدنيا،بجد لما الحياة بتبقى ناشفة قويكدةمش بيطريها غير حبة حنية،
At Friday, December 17, 2010,
Anonymous said…
وأخيرا ، حصلت على ما كنت أبحث عنه! أنا بالتأكيد تتمتع كل قليلا من ذلك. سعيد أنا تعثرت في هذه المادة! ابتسامة لقد قمت بحفظها للتحقق من الاشياء الجديدة التي ترسلها.
Post a Comment
<< Home