أيوه خدامه

Friday, July 28, 2006

عينكو عالدكانة ياخوانّا

ياصحابى ، ياأهلى و يا جيرانى - معلش هستأذن كام يوم كده فيه سبوبة أخلصها و آجى على طول.
السبانخ فى التلاجة و الشاى فى الرف اللى فى الوش و السكر فى النملية.
فيه أربع مانجيات مرقداهم فى الدولاب محدش يهوب ناحيتهم - ممكن تفتحوا البطيخة اللى تحت البوفية بدل ماتحمض.
و النبى بس حد يلم الغسيل من فوق السطوح و يكهرب الباب عشان ماتسرقش - بصوا اللى عايز يقيل ولا حاجة الملايات كده كده هتتغسل بعد مارجع مفيش مشكله بس أنا خدت المخدات معايا (ممكن تستخدموا قالبين طوب من اللى تحت السرير)!ا
و النبى عينكم عالدكانه لحسن أرجع ألاقيها هى رخرة دخلت فى معمعة الضرب و تزورنا كونداليزا فى الحتةو انا لسة مانجدتش الأنترية.
آه قبل مانسى - هتوحشونى

28 Comments:

  • At Friday, July 28, 2006, Blogger Ahmed Shokeir said…

    شكلك كده رايحة الساحل الشمالي مع نظمي

    اجازة سعيدة وماتخافيش ع الدكان

    هاجي كل يوم أرش ميه لغاية ماترجعي بس ماتنسيش أم الخلول

     
  • At Friday, July 28, 2006, Blogger khalid jarrar said…

    ma tit2akhareesh :*(

     
  • At Friday, July 28, 2006, Blogger القلجاوى said…

    وسننتظر
    وسننتصر
    وستعودين
    فنكون نائمين
    لتوقظين
    الغافل والمسكين
    ولتبقين
    ابد الابدين
    فرحة نادرة
    فى زمن الغافلين
    يابنة الموج وحليفة الصقور
    وسننتظر
    " ال ايه خدامة "

     
  • At Saturday, July 29, 2006, Blogger الغـــــــــــــريب said…

    تروحى وترجعى بالسلامه
    أما بالنسبه للبطيخه أنا قطعتها وقسمتها كام شقه وأديت كل مواطن شقه
    ، والدكان فى عنيا والست كونداليزا عدت النهارده أشترت باكو معسل وحتة جبنه ورغيفين وكانت شيله معاها شاش وقطن وحطا على دماغها حلة ميه بتغلى وبتقولك فى مــخاض لشرق أوسط جديد .. المهم أنا فهمت من الكلام أن فى واحدة بتولد بس مين مش عارف تبقى أسأليها لما ترجعى بالسلامه ، والغسيل أتللم وأتشال فى التلاجه مطبق . سلام بقا عشان فى مدونين واقفين على باب الدكان أكرم يارب

     
  • At Saturday, July 29, 2006, Anonymous cortex said…

    ملشي يا ابلتي

     
  • At Saturday, July 29, 2006, Blogger أُكتب بالرصاص said…

    إجازة سعيدة ،

    بس اياك ما طوليش الغيبة زي كل الناس اللي بيروحوا ويقوا راجعين
    ولا حد بيرجع

    المشرحة مش ناقصة قتلى

     
  • At Saturday, July 29, 2006, Blogger Ø²Ø¨Ø§Ø¯ÙŠ said…

    معلش أنا جيت وخدت الأنبوبة بس لغاية ماترجعي بالسلامة عقبال عندك أحمد شكير بعت لي إتنين كيلو لحمة وقلنا نطبخ النهاردة .. وعلي فكرة أخدت علبة السمنة النباتي اللي في النملية .. آه وسامحيني لقيت إتنين جنية في الفازة اللي جنب الباب .. خدتهم .. سلف وحياتك
    وأبقي قولي لنا أمتي ح تييجي علشان أنور لك لمبة السلم

     
  • At Saturday, July 29, 2006, Blogger المزاجنجي said…

    تمورة والله وعيشتك ارتاحت يا اختي ومسافرة.... على فين العزم ان شاء الله يا ريت تكون مرسى مطروح علشان تجيبي لنا معاكي شوية لب ابيض وشوية اعشاب من بتاعة المغص والاسهال وعموما الدكان فعنينا وانا شيعت الواد حمادة يبيت لك فيها هو جماعة من اصحابه وهما عيال مؤدبة خالص ما لهومش غير في البانجو والكحوليات ونزلنا الغسيل من على السطح ان ومجموعة من الاخوان وحطيت لك الطشت والمشابك ورا باب الحمام ونزلت وابور الجاز نمرة خمسة من السندرة ملقيتش الانبوبة جنب المنيل البوتجاز وسخنا ميه واستحمينا وقال ايه يا اختى صفيحة المية بتاعة الحموم اللي عندكم مخرومة دا حمادة اللي بيقول وطلعنا من تحت السرسر كيلو رز شكلة كان قرب يدود من الركنة وكان في قزازة شربات متاخد نصها وبرضة حمضانة رميناها في بطننا ولا لقينا بطيخ ولا يحزنو والمانجة كان جنبها شرابين ريحتهم يا ستار رمينا المانجة برضة وقبل ما تيجي اروح انا وكلابيظو وناخد معانا حد وننضف لك الشقة والدكان وامر يا قمر

     
  • At Saturday, July 29, 2006, Blogger Epitaph said…

    ترجعي بألف السلامة
    ويا ريت
    تجيبيلنا حنة حمرا من هناك..و تسألي علي دوف و نيفيا الاصلي هه واخدة بالك :) الكريم و غسول الوجه بكام
    ومفيش مانع من شوية ماسكات طبيعية و زيوت يعني...دلع نفسك

    اما الدكان و البطيخ و المانجه
    حنبقي نشقر عليهم
    :)

    حتوحشينا

    اه صحيح
    عايزة شوية صدف و قواقع من ع البحر

     
  • At Sunday, July 30, 2006, Blogger Sampateek said…

    هههههههههههههه
    و الله انتم ناس سكر
    عملتم فيلم هندي
    الست عندها طهور مش اكتر
    و بعدين ايه حكاية السبانخ دي
    مش انا قلت ميت مرة بلاش تطبخي حاجات غامقة للراجل و بعد كدة تقوليلي اتدهول ما هو من الللي بتاكليهوله
    يلا حصل خير
    ترجعي بالسلامة يا اختي
    و متنسيش ترجعي البراشوت اللي استلفتيه من اسبوع
    مزنوقة فيه عندي فرح
    خالص اسمه اية ده

     
  • At Sunday, July 30, 2006, Blogger زنفل المعجباني said…

    و الله أنا من رأي كلبوزة
    السبانخ دي مش من "وأم" سي نظمي
    يعني الراجل يقطع نفسه و اللا ياكل برة. بس أنا شايف إن الموضوع لا هو طهور و لا ساحل شمالي. دي شكلها قضية خلع على سي نظمي و أنا باقول نهدي النفوس يا تمر حنة هانم و اهو شحط داخل عليكي على رأيك و خيلة كدابة في البيت كده و بريستيج في النادي. ده رأيي بصفتي بريستيج و شحط . ترجعيلنا بألف سلامة و سامحيني أنا اللي دقت المانجاية الكبيرة

     
  • At Sunday, July 30, 2006, Blogger khalid jarrar said…

    تمر حنه...
    انا شفت شكير بياكل الشكلاتة اللي تحت السرير...شفته بعيني اللي حياكلها الدود!
    و انا التله: يا اخي اتركها دي تمر حنه شايلاها عشان لما تكون دبريسد تاكلها، و هو بصلي و الي : دبرشن ايه يواد يعبيط، و اكلها و ضربني بوشه عايدي كمان :*(

     
  • At Sunday, July 30, 2006, Blogger النوبى said…

    متخفيش المحل فى عنيا
    وهرشلك ميه كل يوم ادام المحل كمان
    بس العيال ولاد ام محسن جارتكم بيجننونى بلعب الكوره
    ************
    اوعى تتأخرى علينا والمصلحه بالنصف دنا اخوكى برضو
    *************
    سلام مؤقتا
    النوبي
    رئيس جمهوريه اسوان العربيه المتحده

     
  • At Tuesday, August 01, 2006, Anonymous أزئوزة said…

    يعني ياتمرمر عندك تلاجة ونملية ، ومانجة وبطبخ ، وباكورة مقتنياتك : الأنتريه ، وجاية تسأليني إيه هو َّ الكاجو ؟

     
  • At Tuesday, August 01, 2006, Blogger ادم المصري said…

    ازيك
    وحشتيني

    بس هو فيه ايه
    شايفك انتي اللي بتعملي كل حاجة

    امال فين الخدامة

    هي طفشت ؟
    ماهو كلو منك في حد يأمن للخدامين اليومين دول
    تلاقيها طمعت في الباقي طفشت

     
  • At Wednesday, August 02, 2006, Blogger تمر حنه said…

    الغالى شوكير
    أنت فينك يا غالى؟ مين عينيا هجيبلك أم الخلول و ريتسا (فاكرها) و الحساب يجمع

    khaled jarrar
    حاضر مش هتأخر - أنا سايبالك نور السلم مولع لو حبيت تيجى - بس خللى بالك من السلمة المكسورة

    السيول السميرية
    سأعود ان شاء الله و سنبقى ليوقظ احدنا الآخر يابو سمرة - أبقى أمن عالشبابيك و الأبواب - ولاد الحرام كتير يابو سمرة


    الغريب القريب
    ياجميل مانتحرمش من قسمة الغرماء بتاعة اليطيخة و يالا ناكل لما نشبع و القشر لكونداليزا الكلب - ابقى قولها ماتنساناش فى السبوع و لا احنا مالناش الا فى الطهور وبس؟؟


    cortex
    يالا مش هتأخر ان شاء الله

    itstoolate
    لأ دانا مباقليش الا الدكانه يعنى أسيبكوا و أروح فين ؟؟ رزقنا على الله أبعت يا جااااابر



    زبادوووووو
    واحشنى يا زبدياية - يعنى شفناك لما المطرح خلى و التركة اتوزعت - على فكرة الأتنين جنيه أنا كنت سايباهم لشوكير لأننا داخلين جمعية و هو هيقبضها أنهاردة - و قول لشوكير اللى ياكل لوحده يزور و خليه يفتكرنا النوبه الجايه بماسورة

     
  • At Wednesday, August 02, 2006, Blogger تمر حنه said…

    من زماااااان
    بقى ياراجل رميت المنجه دانا كنت حاطة الشرابات جنبها تمويه يعنى عشان الحراميه يفتكروا ان فيه فيران ميته - القصد البستله ماكنتش مخرومة و وحيات امى لو ماخليت حمادة يسد الخرم لأسيحلة فى الحارة كلها أنا سايباهالو سليمة و هو اللى خرمها - انما طلعت عينو
    لو عالبانجو و الكحوليات مش مشكلة - الحكومة هتحميهم الوكسة لو العيال اتهفوا فى نفوخهم و فكروا ينزلوا يصلوا فى الجامع اللى ورانا أخوانا هيأطروهم و مش هيسيبونا فحالنا - و النبى دانا بجرى على كوم لحم - أقولك يجيبوا حريم أضمن

    epitaph
    للأسف البطيخ و المنجه و الغسيل راحوا : الغريب وزع البطيخة و من زماان هبد الأربع مانجيات - عليه العوض و منو العوض - أنا سألتلك عن الدوف و الكريمات و الحاجات بيقولولك كلها مغشوشة و جربت شوية حنا حمرا شعرى شااااط و بقيت مهزأة الشواطئ هنا - بصى يا أبىتاف مالقيتش غير بانجو بيور - أجيبلك كشكول؟ الباكيتة باربعة جنية و يلفوا تلات سجاير و سمسون - قلتى ايه ؟ نخلص؟

    كلبوزتى السمباتيكه
    آدى اخرتها دانا عشان أجى و اتواصل معاكوا يا مزاغيد عشان واحشينى اضطريت أدخل من محل تأجير العجل هنا - بقى بعد كل هذوها المعاناه بتشرديلى؟ استى لحسن صاحب المحل بيحضر المنفاخ و بيبصلى شذرا مع انى دافعة له ربع ساعة مقدم.
    اسكتى مش نزلت البحر بالباراشوت و طلع مخروم يا فالحة مش قلتلك اعمليلو اختبار البانيو عند بتاع الكاوتش؟؟ و السمك دخل و اتحرش و الغطاس اتدخل و عملولى تنفس اصطناعى و كانت ليلة

    زنفل المعجبانى
    وانا أقول المانجاية الكبيرة راحت فين - عموما ألف هنا و شفا المهم بس تسيب الدود فى مكان أمين لأنى بعملوا ريسايكلينج و العيال مصممين يستخرجوا منه حرير - فاكرينوا دود قز - هطل زى اللى جايبينهم
    يا زنفل احنا مانخلعش يابا احنا نلخلخ بس و اللى مش عاجبه يخلع بكيفو
    صباحك مانجه على كيوي


    khaled jarrar
    معلش يابو الخلد حقك عليا و ليا كلام تانى مع شوكير اصله من ساعة ماسافر الخليج وهو مش حاسس بحبايبة و ولاد حتته و نسى أيام الفقر لما كنا بنطلع اتوبيسات سوا و شغالين على خط المرج - الوراق (هشرحلك يعنى ايه بعدين) ليه ياشوكير ؟ فين العروبة ياجدع - بقى حتة كادبورى تخليك تبيع أخوك؟ ماتزعلش يا خلودة انا جايبالك معايا شوية أقلام رصاص و اساتيك و شنطة المدرسة كادو من خالتك تمورة- و النبى ماتعيط لحسن دمعتك عزيزة عليا يابن قلبى

    أحلى رئيس جمهورية نوبى
    المرا أم محسن دى شكلى كده هطسها فى يوم بمية ناار هيا و عيالها - الولية الناقصة اللى مابتراعيش حق الجيرة
    أنا سمعت ان كان عندهم امبارح زغاريط زغاريط زغاريط - كان فى حاجة اشاء الله؟ يارب يكون محسن اتجوز اصلو روحى روحى روحى - و انت كمان و النعمة يانوبى - عينى ياجدع السبوبة اللى فى السكة بالنص - بس ادعيلى ان ربنا يعمىهم عنى حاكم الدفاس و أبو دومة راحوا فى الحادثة و ربنا يستر انا و العيال اللى بنصبر البضاعة


    أزأوزتى القمررررر
    أسكتى مش انا سمعت و أنا هنا ان نظمى سرق القايمة و هيسترجع النملية ؟ شوفتى يا أوخشى و النبى لو ليكى حد فى مباحث الهرم خليهم يجرجروة عالقسم لحد أما أجى ولا حطى لو حتة حشيش و بلغى عنه - و حساب الحشيش عندى يا أوخشى


    admelmasry
    و النبى انت اللى وحشتنى بغلاستك و رخامتك - افتقدك كتير ياجدع -
    بص البت طفشت و وحيات عينيك يا أدومة تشوفلى واحدة من حداكم فى الحدايق
    ماقلتليش بقى انت حدايق المعادى ليه ياظالم؟؟
    بجد ليك وحشة

     
  • At Wednesday, August 02, 2006, Blogger ادم المصري said…

    والله بجد فرحتيني

     
  • At Wednesday, August 02, 2006, Blogger Sampateek said…

    ادي اخرة سوء الاستخدام يا امي البراشوت مش لنزول البحر
    ده لحضور الافراح و دخول السينما فقط
    انما نزول البحر حلاوته يبقي سلبوته لا سمكة تنحشر و لا غيره
    و بعدين انا مسلفاكي البراشوت سليم اية خرمه؟ ادي اخرة العنف
    اوعي يا اختشي يكون الواد المرت هبدك صاروخ
    في هذا المزنق نرفع عليه قضية نفقة و نعمله تحليل التي ان تي
    كل حماية و انت طيبة
    الميم عليها شدة
    اوعي تخرمي الشدة كمان
    خالص تحياتي

     
  • At Thursday, August 03, 2006, Blogger المزاجنجي said…

    تمورة حمد الله على السلامة تصدقي ان انت فقر وربنا عملتي جو مالوش اي تلاتة لازمة فالحياة بس والله بجد روش واما عن الظغاريط اللي كانت عند خالتي ام محسن عقبال عندكم محسن انوا بيطاهروه هههه وبعدين حمادة حلف لي بالطلاق وحياة عياله انه ما خرم لا صفيحة ولا قلة وهي اللي مخرومة من الاول وبطلي تلاكيك والعيال اخرهم دماغ بانجو ونص اربع حروف ويتقلبوا زي الخرفان ؟؟ وربك يسترها

     
  • At Saturday, August 05, 2006, Blogger Epitaph said…

    بصى يا أبىتاف مالقيتش غير بانجو بيور - أجيبلك كشكول؟ الباكيتة باربعة جنية و يلفوا تلات سجاير و سمسون - قلتى ايه ؟ نخلص؟

    ؟؟؟؟؟؟؟؟

    ايه ده؟!

    لا يا ستي انا عايزة بيرة سخنة!

    هههههه

     
  • At Sunday, August 06, 2006, Blogger Ø²Ø¨Ø§Ø¯ÙŠ said…

    هاااي عليكم
    أنا جاي بس أضرب غطس سريع وأشوف التعليقات اللي كل يوم بتحلو زيادة
    فعلا التعليقات كلها تموت من الضحك والفرفشة خاصة أبيتاف الأخير و من زماااان وكلبوزة وطبعا تعليقات تمر حنة الشريرة اللي تدخل تسخن الدنيا وتولعها وتخرج تاني .. فعلا يا تمر حنة دمك خفيف جدا وحس عالي قوي للفكاهة الجميلة

     
  • At Tuesday, August 08, 2006, Blogger تمر حنه said…

    كلبوزتى السمباتيكه
    أنا بعتذر عن حادث الأعتداء على البراشوت و أنا عارفة أخلاقك انك ماتقبليش العوض - أسترى عليا و اوعدك انى لما أروح بورسعيد أستقضى لك براشوت استيراد استعمال برةولا أشوفلك واحد فى الحرفيين بدال ما نعمل عمرة و نخرط بساتم و شمايز و الهيصة دى - عندى يا كلبوزة

    من زمااااان
    بص بقى يا مبارك - أنا واحدة باقبل العوض غير كلبوزة - و النعمة و النعمة الولا حمادة هو اللى خرم البستلة - كلها يومين و تحليل الحامض النووى اللى عملتوا هيظهر و هنعرف مين اللى خرمها - فبدل الهتايك لم الموضوع و ابعت هاتلى بستله محترمة ميد اين شاينا و ياريت بالمرة تفتكرنا فى الفوانيس و اتنين كيلو قطايف - رمضان كرييييم ولا نسيح لبعضينا و المعارضة تاخد خبر ؟؟!!ا

    epitaph the sugar lump
    و أنا أقول البت بتجيب الكلام العالى بتاع البلوج منين - أتاريكى بتضربى بيرة سخنه؟ عموما ده مش هيقلل من أحترامى ليكى فأنتى فى القلب - و سخنة سخنة بس تكتبى

    زبادوووو
    كويس انك انت اللى فتحت الموضوع ده = أنا شايفاك فنان و بترسم و كده فلو تعرف أى مخرج فى مسرح من مسارح الدولة يكتشفنى و يدينى أى دور ولو كوميدى صامت اهى تبقى سبوبة - أصل البت كلبوزة مداينانى بعمرة (بفتح العين) للباراشوت بتاعها و من زمااان خرم البستلة و الست ابيتاف هانم عايزة بيرة و آل ايه سخنه - طبعا انت عارف ان السولار غلى و البيرة محتاجة غلية - أرجوك حطنى فبالك

     
  • At Sunday, August 13, 2006, Anonymous Anonymous said…

    Hey what a great site keep up the work its excellent.
    »

     
  • At Friday, August 18, 2006, Anonymous Anonymous said…

    Your are Excellent. And so is your site! Keep up the good work. Bookmarked.
    »

     
  • At Friday, October 20, 2006, Anonymous Anonymous said…

    كويتى طالب فى جامعة القاهرة سنة اولى مستجد يطلب التعارف مع بنت جامعية جميلة ومحتشمة ويفضل ان تشاركنى السكن مجانا للدراسة والسوالف وقت الفراغ بريدى
    zawaj2@yahoo.com
    lusts2002@hotmail.com
    http://iloveyou2000.blogspot.com

    http://q8topic.blogspot.com

     
  • At Sunday, December 10, 2006, Anonymous Anonymous said…

    الســـلام عليكم ورحمة الله وبركاتة
    أحــب أعرفكم أحبتي في الله بنفسـي
    معكـم أخوكم في الله
    ابـن الإســــلام
    وأحب أول تعارف بينـــا يكون
    بداعيــة لله عز وجــل
    وهي ان تزوروا موقعنـــا المتواضع
    مواقـع الغربــاء
    ويشرفنــا عنجد التشرف بالتسجيل معنا
    ونكون أفضــل داعيـــة للإســـلام
    أخوان وأخوات هيــا ما زلتم ما
    سجلتوا هذا هو رابط التسجيـل
    http://www.al-ghorabaa.com/vb/register.php
    انا في انتظاركم
    أسستودعكم الله الأن
    محبكم في الله
    ابن الإســــلام

     
  • At Sunday, December 10, 2006, Anonymous ابن الإســـلام said…

    الســـلام عليكم ورحمة الله وبركاتة
    أحــب أعرفكم أحبتي في الله بنفسـي
    معكـم أخوكم في الله
    ابـن الإســــلام
    وأحب أول تعارف بينـــا يكون
    بداعيــة لله عز وجــل
    وهي ان تزوروا موقعنـــا المتواضع
    مواقـع الغربــاء
    ويشرفنــا عنجد التشرف بالتسجيل معنا
    ونكون أفضــل داعيـــة للإســـلام
    أخوان وأخوات هيــا ما زلتم ما
    سجلتوا هذا هو رابط التسجيـل
    http://www.al-ghorabaa.com/vb/register.php
    انا في انتظاركم
    أسستودعكم الله الأن
    محبكم في الله
    ابن الإســــلام

     

Post a Comment

Links to this post:

Create a Link

<< Home