أيوه خدامه

Wednesday, August 02, 2006

انى أتنفس تحت الماااء - انى أغرق الحقوونى

فريسكا بندق – أيوة السميط السخن.

ملخص النشرة : استشهاد ثلاثة جنود من مقاتلى حسب الله و مجزرة اسرائيلية جديدة فى قانا .

أنا دانا أنا دندن ، فتح عينك تاكل ملبن – أنا هايفا أنا مين زيى أنا ؟؟!!

يتلو علينا القارئ الشيخ عبد الباسط عبد الصمد ماتيسر من سورة الأنفال.

كابتن كابتن ليك طول هنا؟ – الصن بلوك الجديد ده فظيع فيه جليتر تتصورى؟ لأ بجد من مصر ولا من هنا؟
بين شطين و ميه عشقتكم عينيا – أنا بكره اسرائيل –

شوفتوا عمارة يعقوبيان : فى نفس واحد زبالة – تحفة

تانكينى ايه يابنتى ؟ شوفتى النيولوك بتاع عمرو؟ مالوش حل .
المزه دى جامدة كيك .

أصوات متباينة – أذواق مهلهلة عيال مفحوتة مالهومش ملامح .

روتانا – ميلودى ارابيا : ننقل لكم شعائر صلاة الفجر لايف من مكة المكرمة ثم ننتقل الى اوض النوم و الشموع الحمراء.

ستات شقيانة بتجرى ورا عيال بترضعهم و تحميهم و رجالتهم خايسة عايزة النسوان الصابحة اللى منفوخة على 28 .
نسوان بحواجب عالفتلة واقفة قدام كاميرات بالبيكينى فى فخر و ازدهار : مدام فلان القرناقوطى- و الباشا فين ان شاء الله؟ مريح شوية فى الشاليه

لو سمحت القبلة منين؟ قبلة؟ بس هتصلى فين؟ مفيش غير المطبخ خشى صلى فى المطبخ- يا شباب حد يعرف القبلة هنا ازاى – لا و الله صلى أى اتجاه ده ربنا غفور رحيم - انتو بتحبكوها كده ايه؟؟!!

عمو عمو بكام ربع الساعة السكوتر بالكهربا - نهارك أبيض يا مان الأكستاسى بالعبيط فى العجمى تعالى معانا هتبقى ليلة فحت و هنكحرتك.

لأ سقارة ايه يا بنتى هينكين أنضف طبعا – جربتى ال آى دى - فودكا يا ماما بس بتشتغل مع البيرة نااار

أسكتى مش بيبو فرقع جيجي – لأ ماتقوليش يااااااااى دى كانت حامل منو مرتين الصيف اللى فات –لأ متقلقيش هتعمل عملية عند دكتور منصور و ترجع زيرو تانى – أوكىىى

اللهم أنصر المجاهدين فى لبنان و فلسطين و العراق –آآآآآآآآمين
اللهم أهزم اليهود و لقهم الردا و أجعلهم لكل حبيب فدا- آآآآآآآآآآمين
اللهم انصرنا على الأمريكان و اليهود و شتت شملهم و خرب ديارهم – آآآآآآآآآآمين
أنا ايه اللى جابنى هنا؟ هو ده بحر الظلمات؟ يرد صوت من الخلفية ( زى بتوع اعلانات طارق نوور) : لأ يا مدام و فيه كمان بيسين الظلمات – يا لطيف اللطف يارب
تظبيطه لا بد منها
أخوانى أحبائى بنو وطنى:
على مايبدو ان محدش هرش الفوله و لا الصرخة اللى طالعة من البوست - أنتو فاكرين انى متضايقة من الدوشة و الراندامية المفرطة؟؟ هأو لاهو أنا جايه من الدنمارك؟
الدعاء اللى فى الآخر ده مش أنا اللى بقولوا - ده الدعاء بتاع صلاة الجمعة اللى عندهم و اللى كان الأمام بينحر فى قلبه و يدعيه - و اللى كانوا بيأمنوا وراه كانوا البشرية اللى بحكى عنهم - الرجالة اللى بشورتات و كروش مدلدلة و العيال بتوع العجمى و الأكستاسى . أيوه هما بعينهم .
فى يوم من الأيام أستغربت هما الناس بتدعى على اسرائيل ولا بتدعيلها !! كنت ابتديت أيأس من الأستجابه ، ولكن بمناظرة الواقع و الوهن السائد و مراقبة البشرية و عمايلها : اكتشفت انها ساعة و بتنفض و لسان حالنا : احنا عملنا اللى علينا و الباقى بقى على ربنا .
وصلت الفولة ياخوانّا - عرفنا ليه بننذل؟؟

Labels:

25 Comments:

  • At Wednesday, August 02, 2006, Blogger أُكتب بالرصاص said…

    :))))))))
    يا نهار اسود ومنيل بستين نيلة على دا بوست!!!!!!

    لا حول ولا قوة إلا بالله

    الولعة وقعت على البنطلون مش تفتح وانت بترص الحجر

    هاتلي شيشة تانية ، دي مكتومة ، ومتنساش معاك سجادة الصلاة

    صوتي ياللي ماتنش غرماني

    وادخل جوة أنت يا مينا دلوقت لأحسن تتبل

    في ايه ؟؟ نا برضه الظاهر جيت غلط

    بس والله ضحكة في وسط الهم ، مش عارف هأضحكها تاني امتى

    .

     
  • At Wednesday, August 02, 2006, Blogger khalid jarrar said…

    ehhh..
    eh?

     
  • At Wednesday, August 02, 2006, Blogger true love said…

    ردا على ايوة خدامة .. الان فى الاسواق ايوة مرمطون ...

    زورونا تجدوا مايسركم.. خالص تحياتى


    http://aywamarmadon.blogspot.com/

     
  • At Wednesday, August 02, 2006, Blogger ادم المصري said…

    واضح انك لا دكتورة ولا حاجة

    وحكاية انكبتدوري علي خدامة انا ابتديت اشك

    طريقة الكلام في البوست ده والبوست السابق لا ينم اطلاقا عن عن واحد هاي كل شغلتها انها تدور علي خدامة تكمل معاهل الشهر

    اظاهر انك من شبرا واخوكي اسمة حسن وعلية ......


    انا طبعا بهزر
    هههههههههههههههههههههه


    ادم المصري
    اول دكتور احه

     
  • At Wednesday, August 02, 2006, Blogger Ø²Ø¨Ø§Ø¯ÙŠ said…

    نفسي أعرف أنتي بتصيفي فين دي المية في البسين مضروبة وإلا أية
    أدي أخرة الوقوف في الشمس حافي
    بس بجد هرتلة ميا ميا تبوظ أجدع دماغ منك لله نسيت ورقة طلبات البيت مش عارف فين ومش فاكر منها غير العيش الفينو

     
  • At Wednesday, August 02, 2006, Blogger القلجاوى said…

    هذه الكتابة الرائعة وهذا الضجيج ، هذا الخليط المتتزج بالحياه
    ، هذا الادهاش فى الخلط وتراكب الاصوات والالوان ، والمشاهد والزوايا والاحساسات المتداخلة ، فيه حاجة تضيئ فى كتابتك ظلام يحيط بنا
    انتى هايلة
    وبعدين تقولى " أيوة خدامة "
    لا يأتينى سوى هذا البيت من الشعر قاله نزار فى تأبين طه حسين
    " ما أنت أعمى أنما نحن جوقة العميان "
    وسلام " ال أيه خدامة "

     
  • At Wednesday, August 02, 2006, Blogger El Masry said…

    nice one......sounds like U got a head full of bees ..like the rest of us lately....errrrr..nope like the rest of us since we got into that world ;)

    ana mosh sa3eed

     
  • At Wednesday, August 02, 2006, Blogger Sampateek said…

    ايوة ايوة فهمت
    ازاي مستنيين النصر و احنا امة ما يعلم بيها الا ربنا
    ازاي وسط البوظان اللي حولينا متوقعين استجابة
    احنا منستهلش النصر
    احنا نستاهل الحرق بجاز وسخ
    ------
    وحشتيني يا تمر حنة
    عندك حق يا اختشي ناس مش عارفين القبلة منين يعني عمرهم ما ركعوها
    لو انخسفت بيهم الارض ميستغربوش
    ربنا ينجينا
    ----
    ترجعي بالف سلامة يا غالية

     
  • At Thursday, August 03, 2006, Blogger ام المريله الكحلى said…

    دوشتينى ايه الجنان ده ده مصيف ولا مروستااااااااان
    دانتى كده يبقى عايزا علاج اعصاب ياماما ربنا معاكى
    كده مش حلو ومش جميل

     
  • At Thursday, August 03, 2006, Blogger الغـــــــــــــريب said…

    أنتى فكرتينى لما كنت بروح شاطىء سيدى بشر زمان أو الشاطبى
    زحمه ودوشه وكل الشماسى لازقه فى بعض
    كأننا عيله واحده وكبيره جايز مفيش خصوصيه لكن كان فيه حــميمــيـه بين مختلف الناس
    دلوقت خلاص الدنيا زحمتها بقت دوشه

    ترجعى بالسلامه
    متنسيش البساريه

     
  • At Thursday, August 03, 2006, Blogger بعدك على بالى said…

    بالأمس كان بعض الكلام بكاء.. اليوم صار كل الكلام ...
    رصد جميل شديد المرارة لحالة السمك لبن تمر هندى التى نحياها رغم إطار السخرية الذى يغلفه ...

    تحياتى

     
  • At Friday, August 04, 2006, Blogger Me2 said…

    mesh oltelek t7oty sun-block :)
    7amdella 3ala elsalama

     
  • At Friday, August 04, 2006, Anonymous أزئوزة said…

    ياتمرمر ياحبيبتي
    مِن فات داره ، إتئَّل مئداره
    تستاهلي عشان فُتِّي البلوج

     
  • At Friday, August 04, 2006, Blogger tota said…

    تمر حنة الجميلة
    وصلت الاستغاثة وجيت جرى الحقك
    مش عارفة حتى اوصلك وبصرخ واقول راجل واحد يرميلها طوق نجاه
    افتكرت كلمة من زماااااان فى مدونته حودة وملقتش حد غير كلهم حودة
    اصبحنا بلد حودة وامثاله يعنى سقط الرجال وانتهى عصر الرجال المحترمين واهلا بعصر الشاب الهىء والمايتى زنجر يا مان
    وهى صحيح القبلة منين ؟ يعنى بحرى ولا قبلى ولا هى ليه ؟ لخبطينى يا شيخة

     
  • At Saturday, August 05, 2006, Blogger الغـــــــــــــريب said…

    توته
    ليه سقط الرجال وانتهى عصر الرجال
    فيه رجاله طبعا يمكن مش كتير بس موجودين
    يمكن سافروا
    هاجروا
    تاهوا
    بس راجعين

    لو حد شاف تمر حنه يسلملى عليها

    بعدك على بالى
    تمر حنه كان قصدها تفرفشك على ماعتقد
    لكنك مازلت فى احزانك
    أختى العزيزه
    أحزانك
    أحزانى

     
  • At Saturday, August 05, 2006, Blogger Epitaph said…

    اولا اولا اولا
    حمد لله ع السلامة
    وحشينيييييييي موووت
    وطبعا راجعة بالضربة القاضية
    وطبعا طبعا
    طول ما الناس بتبعت ماشجات شات علي روتانا و ميلودي لنصرة لبنان و هيفا بترقص فوق دماغهم
    يبقي ربنا حينصرنا ان شاء الله

    صحيح الصن بلوك طلع من مصر ولا من برة؟
    والجليتر باين اوي اوي؟
    :) صباح الفل

    احنا مالناش خروج من البيت اصلا

     
  • At Saturday, August 05, 2006, Blogger KING TOOOT said…

    للناس وشوش العجب و كل وش لناس
    ناس لابسه وش دهب وناس لابسه وش نحاس
    وناس وشوشها تشوفها م الكرب مقتولة
    ولما تقرب تلاقي وشها ألماظ
    وعجبي
    KING TOOOT

     
  • At Saturday, August 05, 2006, Blogger بعدك على بالى said…

    تمر حنة الرائعة

    دمتى لى سندا

     
  • At Sunday, August 06, 2006, Blogger كلمه said…

    looool
    gamed 2wyyy..... elfekra en de mesha wel sana yet2al feha elklam da .... wla de a5er sana haneb2a keda....de manzoma metrateba ... wel 3eeb mesh feko ya kawerkat ...el 3eeb fel nezam (elrayes barayez fe film sakafy)

    el3arab ba2o garab ... ba2o mnyleen be 60 nela.... w laaaazem net3edel elawel ba3deen nedawar 3la sela7 elrad3 ...wa ela hanerka3 kollna 3la rokabna w n2olohom plz plz ...dont fuck me

    nice post ..i liked ur way of writing this time more than ever
    w yeg3alo 3amer

     
  • At Tuesday, August 08, 2006, Blogger قلم جاف said…

    This comment has been removed by a blog administrator.

     
  • At Tuesday, August 08, 2006, Blogger قلم جاف said…

    سؤال أهبل وعبيط:

    مش غريبة إن الناس تنزل في مظاهرة طالبة العزة للبنان ، في الوقت اللي هية فيه متمسخرة في الشغل وفي البيت وفي كل حتة ومنطقة؟ .. على رأي محمد صبحي في وجهة نظر "كنت أجيبه لنفسي الأول"!

     
  • At Tuesday, August 08, 2006, Blogger Mamdouh Dorrah said…

    انتي حطيتي ايدك علي جرح كبير اوي

     
  • At Wednesday, August 09, 2006, Blogger BackBone said…

    ya benty mesh hya dy el nas elly hat7areb, elly by7areb mabyro7sh el b7r.
    ana seme3t keda fel madrasa.


    cortex:
    enta mot2ked enha 7atet edyha 3al gar7??? mesh 3aref leah 7asesha 3ala 7eta tanya fewest el za7ma dyh.

    ana 2sdy 3al ramla y3ni.

    ana bharag ew3a tez3al.

     
  • At Sunday, August 13, 2006, Blogger المزاجنجي said…

    الله وماله يا اختي وماله يا ست العاقلين شرفتي وانيستي وانت عاملة ايه دلوقتي حمد لله على السلامة انا ممرر لك تاج يا ريت تردي عليه

     
  • At Wednesday, August 29, 2007, Anonymous انوشه said…

    والله عندك حق يا توتو احنا بقينا عاملين زي اللي رقصوا علي السلالم

     

Post a Comment

Links to this post:

Create a Link

<< Home