أيوه خدامه

Saturday, August 26, 2006

بإنتظار أيام العربدة





هل انت راضى عن مدونتك؟
للحق المدونة ولدت بشكل غير اللى فبالى تماما . يوم كتبت لأول مرة لم أقصد التواصل بل قصدت البوح – وددت أن أفسح المجال لأفرازات طبيعية دون مجاملات أو انتقاء ألفاظ (أنظر التدوينة الأولى) كنت سعيدة جدا لأنى أستخدم ألفاظ دخيلة على الذوق العام و الآداب الرفيعة و فى نفس الوقت تعبر عما تعجز عنه الألفاظ المنتقاه . باختصار ظننت انى وجدت مضمارا أكشف فيه عن الجزء الأبيح الذى يحوم حبيسا بداخلى.
و لكن – حدث مالم يكن فى الحسبان – وجدت جمهورا راقيا يصفق و يهلل و ينتقد ، وجدت رقابة على خواطرى و لغتى كرقابة الناس اللى برة – كنت أحسب ان التدوين هو البوح أكثر منه التواصل لأن البوح يعنى : التحرر من الأساتك و مساحيق التجميل – يعنى الظهور بالوجه المغسول من دون البان كيك و الآى لاينرأحيانا يكون جميلا و لكنه غالبا ما يكون قبيحا أتحرج من مواجهة الآخرين به و لكنه وجهى الحقيقى ، أما التواصل فانه يعنى أطراف كثيرة و للكل حقوق عليك – حقوق الجيرة التدوينية ، حقوق الدين و الأنسانية ، حقوق المجاملات ، حقوق رد الزيارة و اتفضل اشرب شاى و والنبى لتبيت عندنا و هكذا.
ظننت انى سوف أهرب من العشر دقايق بتوع السلم – فلقد كرهتها كثيرا فى البيت : طيب احنا ماشيين بقى : و يقف الضيوف استعدادا للأنصراف .. ما لسة بدرى يا حاجة سعاد .. لا معلش بدرى من عمرك يا حاجة سميرة لازم نروح بقى عشان ألحق أعشى الحاج .. طيب و النبى تعالوا زورونا .. انشاء الله ربنا يطمن عليكوا .. ماتنسيش يا حبيبتى الخميس الجاى فاتحة هدى .. ربنا يتملها على خير يارب .. بس المهم انو يطلع ابن حلال .. آه و النبى طيب و أمير .. المهم ان هدى تكون مبسوطة .. آه الحمد لله بس ادعى لأحمد انو ينجح ده على أعصابه .. يارب ياختى يارب .. اللهم آمين و يبدأ البوس و العناق مرة ثانية - كل ده و انا واقفة مستنية الضيوف يتكلوا على الله و الأسانسير مفتوح و الناس بترزع عالباب تحت – دى كلها مجاملااات مالهاش أى لازمة –نفس الشئ يحدث هنا و هناك : أقنعة و ألبسة ثقيلة فى صيف قائظ الحرارة و أساتك كاتمة على الأنفاس و مكياج كامل قبل النوم كمثل فنانات السينما المغوارات.
بدأت المدونة و أنا متطلعة و راغبة لأسلوب أفلام يوسف شاهين الذى يعترف انه ليس من المهم ان يفهم الجمهور أى شئ أو يبتهج من الفيلم و لكن المهم ان يُبدع يوسف شاهين بطريقته الخاصة و سوف يفهم الناس بعد مائة عام أو لا يفهمون ،و لكنى وجدت نفسى أتعامل مع المدونة بأسلوب نادية الجندى نجمة الشباك و عينى صارت على شباك الأيرادات – انزلقت فى طريق نجمة الجماهير !!!!
أحيانا يكون السباب على طرف بنانى و أنا أكتب – و لكن بعد مد جسور صداقة و أحترام بينى و بين الكثير من المدونين أتراجع لكى لا أخذل أحد – كنت أفضل الا أرد على أى تعليقات حتى أهرب من ميدان المجاملات الذى يخنقنى و لكنى وجدتنى قد أخذل بعضهم – و كأنى أهرب من الرد على التليفونات ثم أكاد أرى نظرات العتاب فى عيون بعضهم – و هذا مالا أطيقة .
و لكنى لا أنكر ان المدونة أصبحت من المتع القليلة جدا فى حياتى الزاخمة بالمسئوليات الجسيمة و التى لا مجال فيها للرفاهية أو التحرر من العيون التى تحسب كل لفظة و خطرة – نفسى أرجع أعربد تانى و أطلع اللى جوايا و ألغوص فى الطبق من غير شوكة و سكينة !!! ياترى هينفع؟

19 Comments:

  • At Sunday, August 27, 2006, Blogger ...دنيتي said…

    طبعااااا
    طلعي كل اللي جواكي
    انا متابعاكي من اول بوست كتبتيه و اللي بتكتبيه من الحاجات اللي بتسيب اثر جوايا وعمري ما حسيت انه كلام ملوش مبرر وجرأتك دي حاجة تحسدي عليها
    كتير وانا بكتب حاجة ببقى نفسي أأبح عشان اطلع اللي جوايا بس معرفش
    واكيد انتي عارفة انتي ايه عند البلوجرية بأي اسلوب كان
    المهم انك بتكتبي مواضيع جامدة جدااا
    وسيبك من اي نقد هدام على رأي بتوع السيما

     
  • At Sunday, August 27, 2006, Blogger admelmasry said…

    اول مرة اكتشف فيكي الانسان المتخفي داخل كم الاقنعة الهائلة والتي نسجتها حوله الظروف

    لكل انسان لحظات زهق وضيق .. واحيانا لحظات انكسار .. قليل منا من يعترف انه انهزم في وسط الطريق .. وعليه ان يجد طريقا اخر كي يواصل المسيرة وعلّه ينتصر في يوم ما

    انا لم اقرا اول بوست كالمة .. ولكن اللغة سلسه وبسيطة ولم اجد فيها القبيح

    القبيح اذن انتي لا تعرفيه بعد .. فهناك افظع من ذلك الاف المرات وقد تعرض له علي صفحات مدونتي

    تعليقات مجهولة واخري لمدونين .. اعترف بالفعل صابتني لحظات انهيار وليس ضعف

    ولكن ها انا الان اقف علي اعتاب العام الاول لمودنتي وقريبا انشاء الله ساقيم لها عيد ميلادها الاول

    تحياتي لك
    ادم المصري
    اول دكتور احه

     
  • At Sunday, August 27, 2006, Blogger الأميره أوسه said…

    تـــــــــــــمر حنــــــــــــه
    بصى يا حبيبتشى
    أعملى اللى أنت عايزاه دى مدونتك وبراحتك خالص
    أقولك سر أول واحد عرفنى عالم التدوين كان الغريب اللى فوق خالص ده
    بصى فوق أول تعليق يا أمــى
    طيب ورانى أيه عارفه
    أول حاجه عرفنى على مدونتك
    وقرتها كلمه كلمه
    وحسيت أد أيه أنت مثقفه
    بس يرضه بنت بلد وغارقه فى المحليه
    ومن هنا فكرت أعمل مدونه
    لأنى فى حياتى العمليه جد جدآ
    وصحابى يتعدوا على صوابع الرجل الواحده
    وكانت فرصه أنى أطلع همى وأقول براحتى
    واللى بيفكر أن شخصيتى الحقيقيه زى كتاباتى يعنى بشخر وكده يبقا مسكين
    أنا بفضفض بدل ماتجنن
    واللى مش عاجبه ميتعبش نفسه بالزياره
    أنا بصراحه فتحاها غرزه شخصيه
    لتناول الأفكار الممنوعه مش ندوه ادبيه
    وأنا أساسآ مليش فى البطيخ
    أحنا بنحاول نتكلم كلام مش بيتقال فى الحقيقه عشان أحنا لسه فى عهد الحريم
    بس أنا برفض أكون من الحريم
    أيوه وطـــظ فى الأستاذ نظمى واللى على شاكلته
    أخترناكى ياتمر حنه
    لتكونى المتحدثه بأسم لجنة حقوق النسوان
    وكلبوزه النائبه
    وشهرزاد دكتورة الجمعيه
    وأنا أمسك الصندوق بتاع التبرعات
    وتبقوا قبلونى لو شفتوا منى مليم
    العواف يا جميل

     
  • At Sunday, August 27, 2006, Blogger MechanicalCrowds said…

    This is some powerful stuff. It's not easy digging inside yourself and putting it out without fascades.... Hats off to you for being free of society's inhibitions.

     
  • At Sunday, August 27, 2006, Blogger daktara said…

    تحياتي الشديدة لك علي ردك في المدونة السعودية سوالف احمد
    بجد رد جميل للغاية نشكرك جميعا عليه

     
  • At Sunday, August 27, 2006, Anonymous Anonymous said…

    مش عارفة ايه موضوع الاقنعة اللي ماشي اليومين دول في المدونات
    مع اختلاف اوجة نظر تداوله
    حلم..تكلمت عن الاقنعة الحياتية..اسلحة الحياة
    وانا لي قصة اخري مع كرنفال الحياة و قناعي الاثير
    والان تمر حنة تطلع لنا بالقناع الجديد

    اكتبي اللي انتي عايزاه
    انها مساحتك للبوح و الكلام والحرية
    اكتبي
    لان في جميع الاحوال ستجدي من يقرأ لكي
    دعي عالم المجاملات جانبا
    وفضفضني
    كوني مطربة علي خشبة المسرح العريق
    مندمجة في الغناء
    ولا تري الجماهير
    ولا تسمع التصقيف
    انما تشدو بأقوي الاغنيات
    وتتألق في الموال
    :)

    حد فاهم حاجة؟

     
  • At Sunday, August 27, 2006, Blogger Adel said…

    تمورة في ايه مالك ايه اللي مضايقك ما ملعون ابو اللي مش هايعجبة كلامك يبطل يقراه هو انت بتترزقي من ورا الكتاية دي سوري يعني (دكتوراه ادم المصري ) اللي بيدينا حاجة ياخدها ما احنا طول النهار مقيدين في سعادتك وحضرتك ونيافتك وعظمتك عاوزين نقول ابوك لابو اللي جابوك لازم يكون في مساحة تنفس ولو ما حدش قرات لنا المهم التنفيس لحسن الكتمة صعبه اوي والمجاملات ما لهاش داعي ممكن اوي تقولي عادل انت ابن ستين كلب وكلامك عبيط زيك عادي انت حرة في رايك طيب ما انا الواد اللي هاك على جهازي قالي ان انا حمار ولا انكسقتش اقولها في البوست بتاعي لكن مش ممكن فالبيت لا لمراتي ولا لعيالي يعرفوا ان انا حمار وانكسف اقول لهم لانهم هايستغلوني بدل المواصلات فعيشي يا مه وملعون ابو اللي يضايقك وبعدين فين الاباحة اللي بتقولي عليها ولا انت معتبرة ان اسم نظمي ده ابيح وفين شلة النادي النسوان الضرب بتوعك ولا خدامتكم المهتراءات وحشتني مواضيعك اللاسعة اكتبي بالطول وبالعرض واللي يزعل يشرب من الحنفية بقت ميتها اسوء من مية البحر وانا برضة زعلان منك علشان انت شردتي لي كان ممكن البوء الحمضان اياه بتاع الشات ده ينكتب بيني وبينك بس عادي انت عسولة برضة شردي اللي يعرف مراتي يروح يقول لها شفتي انا دكر ازاي وبجد فكيها يمكن ربك يساويها وتحياتي لك يا قمر

     
  • At Sunday, August 27, 2006, Blogger Mostafa Maher said…

    السلام عليكم

    شوفي يا استاذة ... انا اول تدوينة قريتهالك طلعتلي بالصدفة وانا بعمل سيرش على جوجل ... و كانت هي اول تدويناتك ... قريتها و عجبتني جدا و قعدت اتفسح فباقي المدونة و لقيتها لذيذة فعلا و لاحظت انك بسم الله ما شاء الله ليكي جمهور ابن حلال اوي . ما علينا سيبك من الار دا .. اعتقد بالنسبالي .. انا قريت اول تدوينة ليكي و كانت فيها الفاظ فاللذيذ ... و من رأيي ان الواحد لما بيقلع برقع الحيا او زي ماتقولي يتخلص من قناع اللي اسمة ايه و يكون على طبيعتة .. بيترسم فدماغ اللي ادامة شخصية الكاتب .. بدل مايكون بيحافظ على قواعد اللغة العربية و يتجمل و يتحفلط بتبئا صورتة زي القناة الخامسة في تليفزيون قديم من غير اريال قبل ما يشيلوها.
    و بعدين إلا ما حد بيحمد ربنا على حاجة ابدا... دانا الكام زبون اللي كانوا بيجوا يعبروني .. طاروا بعد فترة انقطاع كدا.
    اول مرة اتجرأ و ارد عندك... كل مرة اقول ملوش لزمة يلا اديني رديت :D
    القصد يعني عربدي و اتحفينا بكل ما يخطر ولا يعدي فمخ و فكار سعادتك..
    و هذا رأيي و الله أعلم

     
  • At Sunday, August 27, 2006, Blogger كلبوزة لكن سمباتيك said…

    تمرمر ازيك يا حبيبتي
    وحشتيني موت طحن تقطيع
    و عايزة اسال علي نظمي و العيال بس مش قدام البلوجرية بقي
    :)
    بحبحي يا اختي و لا يهمك و اللي يعرف باباكي الباشا يبقي يروح يقوله
    ان قلت متخفشي و ان خفت متقلشي
    و يجعله عامر
    اوسة انا راضية بالنيابة بس متنسينيش في نص التبرعات لحسن البراشوت اتخرم و عايزة اجيب دستة
    ههههههههه
    بحبكم

     
  • At Tuesday, August 29, 2006, Blogger كلمه said…

    de 3la fekra talet modwena enhrda 2al2y fehaa 7wr eel2kne3 w 3d elsra7a m3 elnafs wel gaw da ... fe 2eh ya ged3an
    y gmaaaaaaaaaaaa3a e3mlo elly nefsko feh ...dee elmodwna bta3etko y3ni 2oolo elly neefsko feh ... kol waa7ed ro7 fe r2yoh w fel tree2a elly bytklm beeha ... de 7aga mtz3lsh

    7ta elly mesh be7eb ye2rah elkalam da my2rash .... howaaaaaa elly 5sran ... 5leh bel kena3 elly 3leeh ... w yar tambasat

     
  • At Wednesday, August 30, 2006, Anonymous Anonymous said…

    كلبوزة لكن سمباتيك
    كدة تدَّلعي تمرمر بالدلع اللي أطلقته عليها ، دون الإشارة إلى المالكة الأصلية؟
    طب احتياطي بأة م الوأتي ، أنا حاجزة لك إسم دلع ، حقوق الملكية الفكرية ، مسجلة باسمي ، ألا وهو : كَلَبْظَس
    بفتح كلٍ من الكاف واللام والظاء ، وتسكين الباء . أما السين ، فتمت الاستعانة بها ، عوضاً عن الزين ، لصعوبة نطقها عقب الظاء . بس خدي بالك ، الظاء هنا ماتنطيئهاش بإخراج اللسان ، إنطئيها بالعامية . كزين مفخمة يعني. حركات وكدة

     
  • At Thursday, August 31, 2006, Anonymous Anonymous said…

    tamooooora 7abibty...!!
    how are you dear??! I need you in something urgent,,and wish to contact you on mail...if you don't mnind,,can you contact me soon on my e-mail address displayed in my profile ??

    Thankss ya Sugar lump enty :)))

     
  • At Friday, September 01, 2006, Blogger bent abdelwahab said…

    !! طبعا ينفع ! لغوصي براحتك
    I enjoy reading your posts. Your writing style and language, though a bit strong, are in no way offending.

     
  • At Monday, October 09, 2006, Anonymous Anonymous said…

    الانسان

    هذا اللغز , لن نستطيع ابدا ان نحلة ما حيينا

    الانسان في الاول بيكون عايز يبقي لوحدة ,بيكتب في ورق في كراسة لوحدة و محدش بيشوفها غيرة ...و رغم انه حقق انه يكون لوحدة الا انه بيزهق ...و بيدور علي مجال تاني علشان يوهم نفسة انه لوحدة ...بس فطرة الانسان انه مخلوق اجتماعي , و بيحس انه انسان لما بيلاقي ان اعمالة بتتقري و حد بيشوفها حتي لو كان عايز يبقي لوحدة .. بيتخنق من الوحدة و بيتخنق من الزحمة ... بس هوا هيموت لو عاش لوحدة ... لكنة يصرخ طلبا للهدوء ...حاجة غريبة , مش كدا !؟:)
    عامة انا لسة بكتب لنفسي و لكن اكيد في يوم من الايام هزهق و اعمل لنفسي مدونة و لكن محدش هيعرف انه انا اللي كنت برد علي الناس لانني كل يوم في مدونة شكل و بإسم شكل :) :)



    هوات عامة انا قدرا كنت شوفت اول مقالة ليكي , و مش في المدونه , كانت في موقع و بردوا مكتوبة باسم تمر حنة .. اه فعلا فيها واقعية لكن لا ادري يمكتن الالفاط مناسبنيش شوية رغم ان ليها جمهورهاالعريض .. انا ممكن اعبر عن ادق تفاصيل ما اشعر و لكن باسلوب اخر ...و لكن هذا ما يميز تمر حنه عن احد اخر ... و علي كل هوا النزول اللغة لارض الواقع بقي شائع جدا في الايام دي :) يعني متاخديش في بالك


    اما عن اول كتاباتك التدوينية ...اري انها عبارة عن رحلة تطور و نضوج في الشخصية , من انسانة ثائرة الي انسانه حكيمة و تزن الامور بعين المجرب و المحتك في الحياة و متبعة مذهب "اللي تغلب به العب به " يعني العند في وجة ادم لن يولد شئ و لن يجعلك تصلي لما تريدين اذا فلنجرب حيلة اخري تمارسها حواء منذ الازل - و هي ناجحة جدا علي فكرة - للحصول علي ما يريد الجميع و ايضا يتجعل المنزل اكثر دفئا ...

    و اتمني ان تقرأي هذا التعليق لانه اتحط في مدونة قديمة
    عامة تحياتي لك- و برغم تحفظي في اسلوب معين -و لكن الاختلفات العابرة لا تفسك للود قضية المهم انها ليست اختلافات لا رجعة منها ...

     
  • At Tuesday, October 10, 2006, Blogger تمر حنه said…

    نعيمة عبد النعيم
    قريت التعليق
    و فى موضع دراسته - تحياتى

     
  • At Saturday, March 17, 2007, Blogger Blank-Socrate said…

    انت لسه مجهوله كانسانه ممكن اكون باقابلك كل يوم و انا و انت منعرفش كانسانه روتينيه فى حياتى الروتينيه لكن هنا انا باعرف فكر اسمه تمر حنه و انا باحبه جدا و احترمه جدا دا فكرك انت هو اللى كلنا نعرفه و اكيد لازم فى اوقات تكونى عاوزة تصررخى عاوزة تلعنى كل حاجه لكن بعد لاحظات يعود الهدوء و السلام لعقل و قلب تمر حنه
    و كلنا هنقبل دا يا ريت تشركينا كل مشاعرك و افكارك و اكيد صورة تمر حنه هتفضل تمر حنه اللى جواكى و الانسان اللى دايما حلو و عاقل دا انسان ماشين مكنه .... ممكن نشاركك الاوقات العصيبه و لو سمحت خلى تمر حنه اللى مش معروفه هى مين فى نساء مصر تنطلق كل افكارها هنا انت تمر حنه لو مش عارفه اقرى البلوج كامل

     
  • At Wednesday, August 29, 2007, Anonymous Anonymous said…

    يا ختشي لغوصي ولا يهمك انبي تلغوصي والله انت زي العسل في كا الحالات سواء بالاسلوب النحوي ولا بالاسلوب العامي اللي لا يخلو من الاباحه احنا خلاص بنحبك وقابلين منك كل حاجه وبرده هنقولك راينا وخليك ابيحه براحتك ولا يهمك ياختشي فكي كده وررحرحي

     
  • At Monday, October 29, 2007, Blogger أحمـــــد علـــــــى said…

    تقريبا كلنا كدة.. بس مش عارف ليه.. متكتبى زى ما انت عايزة.. أنا كنت باعمل كدة لغاية ما عملت مدونة باسمى الحقيقى وصورتى ..اضطريت أكتب اللى يرضى اللى حواليا والى يعرفونى.. ورجعت قلت دماغك.. أنا باكتب لنفسى قبل أى حد .. بحب وباكره وباكتب وأقول.. هيا ناقصة خنقة حتى فى البلوجات؟؟
    اكتبى ولا يهمك وقولى اللى فى نفسك وعلى رأى واحد صاحبى قلتله " لو شلنا قلة الأدب من أميات نجيب سرور هنلاقيها بتمثل الواقع بالظبط" رد وقالى " ونشيل قلة الأدب ليه إذا كانت جزء من الواقع؟ " رد فيلسوف الغبرة تالتنا وقال " فى الحقيقة الواقع جزء من قلة الأدب"
    قوووووووووووووووولى ولا يهمك

     
  • At Sunday, November 04, 2007, Anonymous Anonymous said…

    سلام
    بجد يخرب عقلك انت دماغك دي جامده وفعلا من أحسن المدونات اللي دخلتها ياريت تسيبك من الناس وكلام الناس وانطلقي بحريه انا بحس ان بعض اللي بيردو عاوزين يظهرو من خلالك بس مييين دا انت الاستاذ عموما انتي عسوله بجد ودماغك هايله اه صحيح انتي مرتبطه
    طيب خلاص وصل

     

Post a Comment

<< Home