أيوه خدامه

Monday, October 09, 2006

مسحراتى البلوجراية

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

*
مشيت فى ليلة
و القمره هالله
على شط ترعة حدانا واسعة
شميت روايح
آدى طمى نيلى
و ادى ساقية دايره بتجيب فى ميه تسقى الغيطان
**
و شفت غيط
ياجمال عيدانو
بيقولوا قطن
تيلته طويله
سمعنا عنو فى كتاب زماان
**
و شفت جامع و كنيسة جاره
حمدان و جرجس قاعدين فى قهوة
عمك حمادة هنا فى الميدان
**
و شفت فوق سطح سلامة طبق كبير
مفيهوش عجين ولا قمح غله ولا شوفان
آل ايه سلامة رهن قيراطه للواد كوهين أس المصايب الألعبان
و قبض بداله طبق و حله
و نص متر سلك بدواية و جهاز مشفر من اليابان
نسوان تشيب و عيال بتلعب على الحبال آخر جنان
و دى واحدى فاجرة بنص أجرة بتقول تعالى هديك حنان
و شاب أعوج عندو سوالف راسم حواجبه بيرقص بوسطه
كما النسوان
**
و سلامة فارش لامم عيالو وكمان بهانه حوالين جهازه ليلاتى لما يقول الآدان
الفرن مطفى و الجرن خالى و زريبته فيها نعجة وحيدة
ناقص تلالى : عايزة عشايا دانا ضرعى للبن عطشان
**
من دار سلامة لدار تهامى لدار عتمان
نفس الطبق راشق
زى خنجر فقلب عاشق
خللى الأراضى بقت شراقى و خللى غيطانّا مالهاش عيدان
**
خلانا نشحت من ده و دوّه
و ملى حللنا مالأمريكان
**
خللى سلامة بقى سميحة و خللى طه بقى حنان
هقول صراحة
و انا عينى باكية
و وشى مخزى
غيطك يامصر عايز صوان
**
المشي طاب لي والدق على طبلي
ناس كانوا قبلي قالوا في الامثال
الرجل تدب مطرح ماتحب
وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي حته من كبدي حته من موال
اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

اهداء لروح عمنا : فؤاد حداد
ملحوزة:
الزجل السابق من "نظمى " أنا, كتبته فى الفراندا كرد فعل مباشر و عميق نتيجة لتفاعل الرز بلبن مع الشاى أبو نعناع !!ا

Labels:

51 Comments:

  • At Monday, October 09, 2006, Blogger الأميره أوسه said…

    الله يرحمه فؤاد حداد
    تعيشى وتفتكرى وتفكرينا
    فعلآ الأرض بارت وعاوزه صوان
    و عم جلال فات غيطه وجرى ورا النسوان
    همل الزرع و حياته جنان فى جنان
    لبس جينز وركب باروكه وطقم سنان
    يعوض الله يا تمر حنه لما العزيز يتهان
    واللئيم يبقا ريس علــ الغلابه
    يحكم ويتحكم فى ناسها
    من شمالها لجــنوبها عند سد أسوان
    ويعيش شبابك يامصر فى ظل خوف وهوان

    أوسه حداد

     
  • At Monday, October 09, 2006, Blogger Mahmoud Serag said…

    شبابنا أخضر
    لسه بيطرح
    فى الخوف سنابل
    ترسم حروف
    زى القنابل
    يفوق و يصحى
    كل اللى نايم
    و الصوت بيعلى
    زى النسايم
    نغم و مصرى
    بينادى مصرى
    يقوم يصلى
    يتفك أسرى

    ***************************
    جميلة
    جداااااااااااااااااااااااا
    جداااااااااااااااااااااااا

    تسلم ايدك يا تمرحنة ، كلامك ده دليل على ان مصر مليان بالخير باولادها ، ولادها اللى زيك و زى اللى حتلاقيهم دلوقتى فى التعليقات ، يا رب دايما الكتف فى الكتف لحد ربنا ما يقدرنا و يتفك أسرنا جميعاً من السجن اللى عايشيين فيه .

    و رحمة الله على العبقرى فؤاد حداد

     
  • At Monday, October 09, 2006, Blogger Mahmoud Serag said…

    زمان كان فيه ابراج حمام على الاسطح لكن فى ظل السلام الحالى مات الحمام على الرسم و صدرنا جثته و استوردنا بداله الفضائيات .

     
  • At Monday, October 09, 2006, Blogger FrEe.PhArAoH said…

    مش عارف .. الكلام دا مؤثر اوى

    خللى سلامة بقى سميحة و خللى طه بقى حنان
    هقول صراحة
    و انا عينى باكية
    و وشى مخزى
    غيطك يامصر عايز صوان
    غيطك يامصر عايز صوان
    غيطك يامصر عايز صوان

    الله يرحم فؤاد حداد .. مشكوره ع الكلمات

    تحياتى

     
  • At Monday, October 09, 2006, Blogger Gbalawy said…

    ودا واحد مخدر ماشى بيقرا
    مين اللى كاتب قالوا دى تمرا
    تمرادى مين دى تمر حنا
    ...............

    الله الله ياست قولى كمان قولى

    بس خلى بالك من الواد اللى فى البلوج اللى جنبك
    بيلم الغله يوماتى مش زيك يا خايبه
    مستنيه العيد

     
  • At Monday, October 09, 2006, Blogger محمد البرلسى said…

    وكل شبر وحته من بلدي حته من كبدي حته من موال
    الله عليكى يا خا له
    كلامك بيريحنى قوى
    تحياتى

     
  • At Monday, October 09, 2006, Blogger الســـاحر said…

    حلوة ..جميله بجد
    الى الامام
    وحلوة اوى اصحى يانايم
    وعجبانى اوى
    اغنيه محمد منير
    ربنا يوفقك
    وياريت تشرفينى بالزياره

     
  • At Monday, October 09, 2006, Blogger ام العيال said…

    الله يرحمو
    بس بمسي

     
  • At Tuesday, October 10, 2006, Blogger تمر حنه said…

    أوسه حداد
    يادى النيلة عليكى يا أوسه حد جاب سيرة اللثيم دلوقتى؟ يعنى أروح منك فين؟
    طب افتكرى بقى قرص الحلاوة بتاعى يبقى بالمكسرات

    mahmoud serag
    تسلم ايدك انت يا حوده : كلنا ايد واحدة يا بهجت - كلنا بنكمل بعض
    دى اسمها الخد و هات - تتلاقى فين الا فى مصر ياجدع؟ دحنا فله و الله العظيم


    free faraoh
    الف رحمة و نور على فؤاد حداد - بس يا فرعون موضوع سميحة و طه و الصوان ده بتاعى أنا - حسيت انو لو لسه عايش و شاف اللى بيحصل هيقول الكلام ده
    أنا طايرة مالفرح عشان فهمت انو كلامه
    ألف شكر

    gbalawy
    و ده واد بديوى
    عشق الصحارى
    مايهابش أبدا
    من ليل واديكى
    نام تحت تله
    و فوق الحجارة
    كاتب بدمه
    اسمه فسماكى
    يا واد يا جبلاااوى

    القادم من الريف
    مدونتى ستر و غطا عليك يا بلدينا
    وقت ماتضيق بيك يابنى و تتوحشك البلد تعالى لخالتك - خير ربنا كتير

    الساحر
    جايالك هوا يا ساحر - بس مش فاهمة مال أغنية منير و مال الليلة دى؟ يسترك فهمنى

    أم العيال
    يسعد مساكى - بقولك ايه قريتى ردى على كومنتك فى البوست السابق؟ ده مهم جدا - أرجو من كل المكمنتاتيه الستات يقروا ردى على أم العيال فى البوست السابق و يدونى نتايج - آه العبرة بالنتايج

     
  • At Tuesday, October 10, 2006, Blogger كلبوزة لكن سمباتيك said…

    ختشي و حبيبتشي تمرمر
    حلوة الشغلانة دي نسرح انا و انت بطبلة و نصحي البلوجرية و اهو نلم لنا طبق طبيخ علي شوية عيش ناشف للفراخ علي بنطلونين كستور و تقضى
    ---
    حلوة طحن
    تسلم عنيكي و ايديكي
    قبلاتشي

     
  • At Tuesday, October 10, 2006, Blogger تمر حنه said…

    كلبوزتى
    فكرة جامدة طحن , و ماتنسيش تجيبى الشمعدان بتاع زمان بتاع أفراح سنباط من قعر الدولاب لجل مانتكعبلش فى الضلمة و نسلى الساده البلوجارية الأكابر .... شرفتى يا هانم

     
  • At Tuesday, October 10, 2006, Blogger FATMA said…

    الله يرحمه فؤاد حداد و تعيشي و تفكرينا يا تمر عسل قصدي حنة

     
  • At Tuesday, October 10, 2006, Blogger FATMA said…

    الله يرحمه حداد و تعيشي و تفكرينا يا تمر عسل قصدي حنة

     
  • At Tuesday, October 10, 2006, Anonymous Anonymous said…

    أنا كنت فاكر إن المدونة دي إقتباس من شعر فؤاد حداد
    كويس إنك نوهتي إن المدونة من "نظمك" يعني من إبداعك إنتي.. إبداعك الذي يفاجأنا كل مرة بطرق جديدة
    معشر البلوجرية لديهم مسحراتية ما تتفكش لا بأربعة و لا بعشرة
    الله يمسيكي بالخير يا تمووورة

     
  • At Tuesday, October 10, 2006, Anonymous Anonymous said…

    :)) جميلة انتي كدة دايما ماشاء الله

    like your new style in writing..you always surprise me with your innovative talents...my dear!!

    تحياتي يا عسل

     
  • At Wednesday, October 11, 2006, Blogger Adel said…

    والاه طالعه من حلقي مُرة
    وناديت يجي مليون مَرة
    يا ولاد بلادي يا حبة فؤادي
    دي العيشة مُرة
    تعالوا نبني
    نعلي بيتنا
    نحلي قوتنا
    لا الدور يفوتنا
    نصحى بمزاجنا ولو لمَرة
    لا مسحراتي ولا مطبلاتي
    سهركوا زاد يا ولاد ليلاتي
    مين هايرعى الزرع بره

     
  • At Wednesday, October 11, 2006, Blogger Adel said…

    سوري تمرمر نسيت اوقع انا اخو البت اللي فوق دي انا عادل حداد ههههههههههههه عند فيكي وفلياليكي الغامقة ما احنا كمان بنرص كلام اهوه

     
  • At Wednesday, October 11, 2006, Blogger tota said…

    تمر الجميلة
    هو مش جديد عليكى انك تختارى الكلمات اللى تكتبيها واختيارك لفؤاد حداد واهدائك لروحه منتهى الاصالة والرقة اسلوبك يحلى الكلام ولو الكلام بالميزان لطبت كفتك من زمان

    تحياتى

     
  • At Wednesday, October 11, 2006, Anonymous Anonymous said…

    عزيزتى ... كلنا مثرثرون ، وماهى إلا ثرثره ، والنيل ماض فى طريقه والمثرثرون مازالوا يتناوبون الثرثره اجيالا منذ آلاف السنين دون كلل او ملل ، ولكن اللافت للنظر فى هذا الجيل ان الجميع يثرثر للجميع والجميع لايستمع للجميع وكأنهم فى انتظار من يهمه الأمر ليأمر بما يصلح به الأمر ، واننى كذلك اثرثر :"من ذاك الذى يهمه أمر هذا الوطن ؟ ومتى سيأتى لأشى له بما حل بهذا الوطن من كوارث اثناء غيبته التى طالت ؟..ومازلت اثرثر وادعو الله ان يأتى قريبا ولا اقول يعود لانه لم يكن هنا قبلا ليعود ، اتمنى ان يأتى...اتمنى...!

     
  • At Thursday, October 12, 2006, Anonymous Anonymous said…

    من رائعة عبد الرحمن الشرقاوى :

    الحسين ثائرا:

    ما عاد في هذا الزمان سوى رجال كالمسوخ الشائهات

    يمشون في حلل النعيم وتحتها نتن القبور

    يتشامخون على العباد كأنهم ملكوا العباد

    وهم إذا لا قوا الأمير تضاءلوا مثل العبيد

    صاروا على أمر البلاد فأكثروا فيها الفساد

    أعلامهم رفعت على قمم الحياة

    خرق مرقعة ترفرف بالقذارة في السماء الصافية

    يا أيها العصر الرزي لانت غاشية العصور

    قد آل أمر المتقين إلى سلاطين الفجور

    قل أي أنواع الرجال جعلتهم في الواجهات ؟

    *************************

    الحسين شهيدا:

    فلتذكروني لا بسفككم دماء الآخرين ..

    بل اذكروني بانتشال الحق من ظفر الضلال ..

    بل اذكروني بالنضال على الطريق ، لكي يسود العدل فيما بينكم ..

    فلتذكروني بالنضال ..

    فلتذكروني عندما تغدو الحقيقة وحدها حيرى حزينة

    فإذا بأسوار المدينة لا تصون حمى المدينة

    لكنها تحمي الأمير وأهله والتابعين

    فلتذكروني عندما تجد الفصائل نفسها أضحت غريبة

    وإذا الرذائل أصبحت هي وحدها الفضلى الحبيبة

    وإذا حكمتم من قصور الغانيات ومن مقاصير الجواري

    فاذكروني

    فلتذكروني حين تختلط الشجاعة بالحماقة

    وإذا المنافع والمكاسب صارت ميزان الصداقة

    وإذا غدا النبل الأبي هو البلاهة

    وبلاغة الفصحاء تقهرها الفكاهة

    والحق في الأسمال مشلول الخطى حذر السيوف !

    فلتذكروني حين يختلط المزيف بالشريف

    فلتذكروني حين تشتبه الحقيقة بالخيال

    وإذا غدا البهتان والتزييف والكذب المجلجل هن آيات النجاح

    فلتذكروني في الدموع

    فلتذكروني حين يستقوي الوضيع

    فلتذكروني حين تغشى الدين صيحات البطون

    وإذا تحكم فاسقوكم في مصير المؤمنين

    وإذا اختفى صدح البلابل في حياتكم وارتفع النباح

    وإذا طغى قرع الكنوس على النواح

    وتلجلج الحق الصراح

    فلتذكروني

    وإذا اختفى نغم الإخاء

    وإذا شكا الفقراء واكتظت جيوب الأغنياء

    فلتذكروني

    فلتذكروني عندما يفتي الجهول

    وحين يستخزي العليم

    وعندما يستحلي الذليل

    وإذا تبقى فوق مائدة إمرء ما لا يريد من الطعام

    وإذا اللسان أذاع ما يأبى الضمير من الكلام

    فلتذكروني

    فلتذكروني إن رأيتم حاكميكم يكذبون ويغدرون ويفتكون

    والأقوياء ينافقون

    والقائمين على مصالحكم يهابون القوي
    ولا يراعون الضعيف

    والصامدين من الرجال غدوا كأشباه الرجال

    وإذا انحنى الرجل الأبي

    وإذا رأيتم فاضلا منكم يؤاخذ عند حاكمكم بقوله

    وإذا خشيتم أن يقول الحق منكم واحد في صحبه أو بين أهله

    فلتذكروني

    وإذا غزيتم في بلادكم وانتم تنظرون

    وإذا اطمأن الغاصبون بأرضكم وشبابكم يتماجنون

    فلتذكروني

    فلتذكروني عند هذا كله ولتنهضوا باسم الحياة

    كي ترفعوا علم الحقيقة والعدالة

    فلتذكروا ثأري العظيم لتأخذوه من الطغاة

    وبذاك تنتصر الحياة

    فإذا سكتم بعد ذلك على الخديعة

    وارتضى الإنسان ذله

    فانا سأذبح من جديد

    وأظل اقتل من جديد

    وأظل اقتل كل يوم ألف قتلة

    سأظل أقتل كلما سكت الغيور وكلما أغفا الصبور

    سأظل اقتل كلما رغمت أنوف في المذلة

    ويظل يحكمكم يزيدها ... ويفعل ما يريد

    وولاته يستعبدونكم وهم شر العبيد

    ويظل يلقنكم وإن طال المدى جرح الشهيد

    لأنكم لم تدركوا ثار الشهيد

    فاذكروا ثار الشهيد .

     
  • At Thursday, October 12, 2006, Blogger Khalid said…

    ara7ti blogana il motawadi3 bi ziyaratikom il kareema ya sis :D

     
  • At Friday, October 13, 2006, Blogger admelmasry said…

    والله بصراحه مش عارف اقولك ايه

    نظمي دا شكلة بركة

    انا اقدر اقولك : اني

    مل الصفات عاجزة تحدد ملمحك
    وانا كل مرة بالمحك
    باشوف جديد


    بصراحه احتارت واحتار دليلي معاك

     
  • At Friday, October 13, 2006, Blogger ihapoof said…

    تسلم ايدك يا حاجه

    nice post

     
  • At Friday, October 13, 2006, Blogger ام العيال said…

    يختي عملت و لافيش فايده
    تجيش اعمله عمل
    بس الدنيا رنضان و السحره بيقفله
    طب اعمل ايه
    عملتلو رز بلبن قال ايه بتاع مامتو احسن اعملها عمل هي كمان
    و كده تفضحيني ادام البوجريه
    طب و الله لردهالك

    سلاااااااااام

     
  • At Saturday, October 14, 2006, Blogger Mahmoud Serag said…

    أم العيال
    =========
    انتى متاكده انك مشيتى على الوصفة ؟ طب قولى لنا عشت روح أغنية
    "أنا بستناك و ليلى شمعة سهرانة فى ليلة حب ..
    و أهلا أهلا حلوة - أهلا أهلا أهلا حلوة شايلاها عيون بتحب
    و قلب حرير ..حرير
    شايلاك مطرحك فى القلب
    أنا بستنااااك أنا"

    و الا خدتى البنادول و المهدئ

    احنا عاوزيين نتأكد من الوصفة
    علشان لو فيها حاجة غلط
    انا شايف نتايج كويسة مع تمر حنة زى فؤاد حداد بالضبط
    :)

     
  • At Saturday, October 14, 2006, Blogger تمر حنه said…

    توته توته
    أحلى بنوته - انتى اللى عسل و تعيشى و تفتكرى

    زعبوط
    آآآه من ضميرى - القصد
    و هى الحياة ايه غير زعبوط و هزتين
    منور منور منور
    انا كمان بحب ليلى غفران
    كيفك - اشتقتلك - دير بالك عاحالك

     
  • At Saturday, October 14, 2006, Blogger تمر حنه said…

    EPITAPH
    و النبى كنت عايزة رِأيك فى حتة الزجل البلدى دى - طمى و نيل و عتمان و جو
    لو تعرفيلنا عنوان القديرة خضره محمد خضر - و تيجر معايا أنا و كلبوزة تسحبينا فى الموالد و ليكى 7 فى الميه من الأيراد و جلابية تفتا

    احبيب عادل حداد
    و انت كمان و النبى محتاجينك فى مشروعنا أنا و كلبوزة و ابيتاف - ماهو لازم يبقى معانا واحد عترة يدافع عننا من الواغش بتوع الموالد - لو موافق نتكلم فى عشرة الميه من الأيراد و ازازة كونياك - نخلص؟

     
  • At Saturday, October 14, 2006, Blogger Adel said…

    تمر مر هانم انا فعلا معاكي ومع كلابيظو ولازم فعلا نشوف لنا واحد عترة علشان اللي بيحصل فالموالد ...مصيبة لا تكوني فاكرة ان انا العترة
    وبلاش كونياك يا اختي انا عاوز كِاموس او بونابارت ولو حداكي أولد بار يالهوي احنا فرمضان يا ست انت وقعتينا في شر اعمالنا اللهم اغفر لنا جميعاً
    سلام بقى اروح اكيس العدة لخالتي خضرة

     
  • At Saturday, October 14, 2006, Blogger واحد من الناس said…

    الأرض قالت آه الفاس بيجرحنى

    رديت وأنا محنى آه منك انتـى آه

    الأرض قـالـت حـنّ
    طـيرّتنـى فـتـافـيت
    رديـت وقـلبـى يئـنّ
    وانا مين يجيب لى مُغيت
    منـك ومـن عشقـك
    يـا للى عشـان رزقـك
    عمـرى فى يوم ما بَوِنّ

    الله يرحمك يا صلاح يا جاهين

     
  • At Saturday, October 14, 2006, Blogger ام العيال said…

    mohamed serag
    و الله مشيت على الوصفه
    بس الاغنيه دي حرفتها شويه ممكن ده السبب؟؟؟

     
  • At Sunday, October 15, 2006, Blogger تمر حنه said…

    مزاجنجى
    أوكى بلاش موضوع العترة ده نظرا لحالتك الصحية - يبقى لازم يا خفيف تدخل كشف هيئة عشان تتشرك - اللجنة بتاعتنا فير مفيهاش وسايط
    لا تقوللى التصاق فخدين و لامؤاخذة ولا تقوس فى العمود الفقرى
    و تبعا لكشف الهيئة هنحدد وظيفتك فى جوقة البلوجارية مؤقتا استلم انت قسم تكييس العدةبتاعة الست خضرة ده اذا كان لسه عندها عدة

    واحد من الناس
    ألف رحمة و نور


    أم العيال
    هىهىهى حرفتيها ازاى يا أمو العيال أصلها ماينفعلهاش غير تحريف واحد؟؟ عموما لو حرف مكان حرف برضك مش مشكله و شفتى أخوكى محمود سراج بيطمن عليكى ازاى؟ الهى يخليكوا لبعض و قلبكوا على بعض ياولاد
    بقولك ايه تشتركى فى جوقة البلوجارية؟؟ شوفيلك شغلانه معانا هنحتاج واحدة لفقرة الغريب بتاعة المنشار - ها ايه رأيك و القبض مقدم و أهى حاجة تنفع العيال

    الغريب القريب
    و أنا برضو انسى أخويا الصغير؟ وجب انت الحاوى بتاع مولد البلوجارية
    بص ياريس دورك هييجى على طول بعد الغازية على أساس ان الناس لسة متووله من الرقص و انت عليك تطلع الأرانب من البرنيطة و تشرب شوية هبهب و صلى عى رسول الله - لا غش ولا تدليس
    التعبان هنا فى الكيس
    و شجع يا جدع شجع و اللى يحب النبى يقول هييييييه
    بس لازم نعمل اعلان للمتطوعات لفقرة المنشار - تفتكر مين يا غرباوى؟

     
  • At Sunday, October 15, 2006, Blogger الأميره أوسه said…

    أنا متطوعه لفقرة المنشار
    وكمان ممكن أعمل فقرة الشجيع
    الناس يربطونى بالحبال
    وتصقيفه حلوه
    ياجدعان مع ربع جنيه مخروم
    محدش يقرب أنا هافك الحبل بنفسى
    و ممكن أشرب لتر جاز وأطلع نار من مناخيرى
    ده أحنا نكسر الدنيا
    ده أنا تربية موالد
    وأسألوا الأخ شكوكو

     
  • At Sunday, October 15, 2006, Anonymous Anonymous said…

    باتوجه بالشكر لزعبوط باشا ، لإنه نوَّرني ف حكاية " نظمي " . أنا مافهمتش الملحوزة بتاعتك { ئال يعني فهمت البلوج نفسه } وئعدت عيني رايحة جاية عالملحوزة ، إني أستوعبها ؟ أبداً . لحد مازعبوط ، ربنا يكرمه ، فهِّمهالي

     
  • At Wednesday, October 18, 2006, Blogger ام العيال said…

    اه و النبي
    اصل الحاله ضنكمنشار منشار
    بس بشرط يكون بالكهربا
    وبقول ايه بلجاريه دي تقرب حاجه لبلغاريا؟؟؟
    اه امال ايه دول تؤام معلش نسيت اصلي شاربه شاي من ابو نعناع و هامله دماغ

     
  • At Wednesday, October 18, 2006, Blogger ام العيال said…

    اوسااااااااااااا
    منشار ايه الي انت عايزن تتطوعيلو
    احنا موش رايحين الجيش
    و بعدين ستي تمر حنه قسمت الشغلانات خلاص
    ايوه خليكي في فقرة التنين بتاعت نار من مناخيرك دي اهي حاجة موديرن شويه

     
  • At Friday, October 20, 2006, Blogger يا مصر اكتب إليكي رسائلي said…

    يشرفني ان اتقدم بخالص التهاني وأطيب التمنيات القلبية بمناسبة عيد الفطر المبارك اعادة الله علينا وعليكم وعلى مصرنا الحبيبة بكل خير .. مع خالص تحياتي وكل عام وانتم والأسرة الكريمة في أسعد حال

     
  • At Sunday, October 22, 2006, Anonymous Anonymous said…

    بعد كل الكلام ده
    اكيد النايم صحى
    بس نام تانى من الغيظ
    !!!!!!

     
  • At Sunday, October 22, 2006, Blogger كلبوزة لكن سمباتيك said…

    اللهم ان لي احبة قد قصرت بحقهم و انشغلت عن وصلهم فعطر ايامهم بالايمان و تقبل منهم و منا صالح الاعمال ..امين يا رب العالمين و كل عيد و انتم من السعداء المغفور لهم
    تحياتي

     
  • At Sunday, October 22, 2006, Blogger تمر حنه said…

    أوكى يا أوسة
    كونسيدر ايت دون – بس سيبك من موضوع الحبال عشان ناشرين عليهم اللحفه لحد العيد و ركزى بقى فى النار اللى من مناخيرك
    بصى الموضوع ممكن نختصروا لوصلة غاز طبيعى فمناخيرك بلا جاز بلا لغوصة


    حاول تفتكرنى
    ياترى هتشارك معانا فى الجوقة؟ يعنى مالآخر فيه موهبة ؟


    أزئوزة
    مش مهم تفهمى حاجة – المهم محتاجينلك فى العيد الصغير فى مولد فى طنطا – فاضية؟ لو دايسة معانا يبقى حضرى المنطلون الفيسكوس النبيتى و الباروكة الصفرة و ابقى نيمى العيال بدرى


    Ceasar
    ابن حلال و النعمة لحسن كنت حاملة هم المشوار – أخبار الحنطور ايه ؟ المشوار بتاع طنطا أول جمعة بعد العيد – ياريت تحمى الحصان بقى

    أم العيال
    يا ستى أنا وعدتك بفقرة المنشار خلاص – أوسة هتعمل فقرى التنين – بس بفكر انك انتى و أوسة تشتركوا مع بعضيكون فى اسكتش صغنن كده من بتوع زمان اللى كنتوا بتقولوه فى مهرجانات وزارة السكافة: أهلا بيكون أهلا بيكون ياللى احنا جينا عنديكون

    يامصر أكتب ليكى رسايل
    و انت طيب و بألف خير يارب

    الأب الروحى
    سيبه نايم – ماهو نوم الظالم عباده

     
  • At Sunday, October 22, 2006, Blogger كلبوزة لكن سمباتيك said…

    happy mashroom day
    بالانجليزي يعني عيد فطر سعيد
    هع هع هع

     
  • At Sunday, October 22, 2006, Anonymous Anonymous said…

    ولو ان مروري متأخر جدًا بس بجد رائعة
    وحلو جدا البلوجر وتركيب صورة المسحراتى


    والاحلى النظم


    دمتي بخير وعيد سعيد

     
  • At Sunday, October 22, 2006, Blogger أُكتب بالرصاص said…

    تمرحنة
    كل عام وانت بخير

    عساكم من العايدين

    هو في ايه في طنطنا؟
    انا كنت نايم
    :)

     
  • At Monday, October 23, 2006, Anonymous Anonymous said…

    يا ريت تشرفينا النهارده بمناسبه عيد ميلادى

     
  • At Monday, October 23, 2006, Anonymous Anonymous said…

    يبدو أنكم فقدتم الوعي من قديم ولم تصبحوا في الحياة


    اصحوا يا شباب وبنات الضياع

    دي مش دعوة دي هزة تفوقكم يمكن تفتكروا إن فيه إسلام

    وإن فيكم مسلمين

    وإنكم لازم تفتكروا الحاجتين دول بالذات علشان لما تنزلوا تحت


    فوقوا الله يكرمكوا الأمة هيحصلها إيه أكتر من اللي حاصل

     
  • At Monday, October 23, 2006, Blogger من القلب said…

    كل سنة وانتى طيبة
    و عيد سعيد

     
  • At Tuesday, October 24, 2006, Anonymous Anonymous said…

    العيد يعود
    والقوم مزيد
    القوم بعيد عن فعل الكلمه

    والفعل قدير بالارض تميد
    الفعل قدير بالارض تميد بعروش الحكم واذناب الطغمه

    قد قال حكيم فى الكلمه :
    الكلمة نور
    ودليل تتبعه الأمة
    الكلمة زلزلت الظالم
    الكلمة حصن الحرية

    نشهد ان الكلمة نور
    وان كثير الكلمات قبور

    والفعل هو ايضا كلمه
    لكن ليس ككل الكلمات

    به تحيا أمه .. او تطعن فى القلب تموت
    به تسمو أمه .. او تهوى للدرك الاسفل
    به ترفع هامه .. او تركع فى قيد الرق مذلل
    به تنطلق الخطوه .. او تتعثر فى ذل الحاجه للأرزل

    الفعل هو ايضا كلمه
    لكن ليس ككل الكلمات

    به تنشد حرا .. او تبكى فى كهف مظلم
    به تنزع حقا .. او تترك فى ايدى لصوص
    به تحمى وطنا .. او تجبن فى وجه طـغاه
    به تغدو حرا .. أو تمسى سجينا كل صباح

    الفعل هو ايضا كلمه
    لكن ليس ككل الكلمات

    الفعل دليل على صدق الكلمه
    والصدق حياة الاحرار

    فلنفعل شيئا ولنحيا حياة الاحرار
    لنحرر وطنا من بغى وجور الاشرار
    ونهدم اسوار السجن
    ونحطم قيد الاسر وحصون الفجار

    لنفعل شيئا
    ولينهض شعب على فعل الكلمه
    ونعيد بناء الامه على صدق الكلمه
    وتعود مدينتا لتبقى مصر الاحرار

    الفعل هو حقا كلمه
    لكن ليس ككل الكلمات
    الفعل حياة او وأد حياه
    قد تشعل نارا او توقد نورا للخير طريق
    قد تقتل شعبا او تحمى امه من فعل الطامع والزنديق

    الفعل حياة او وأد حياه
    وسواه من الكلمات سكون

    فلنفعل شيئا
    فلنفعل شيئا ليعود العيد ومعه مزيد
    معه مزيد من عشاق الفعل وعلى نور الكلمه .

    وكل عام وانتم بخير
    احمد فتحى

     
  • At Wednesday, October 25, 2006, Blogger تمر حنه said…

    كلبوزة لكن سمباتيك
    رمضان خلص و مالكيش حجة - ياريت تحضرى الشمعدان و توديه للكهربائى عشان محدش يتكهرب زى السنة اللى فاتت و ياريت تحوليه غاز طبيعى عشان قلق بتوع البيئة - المولد قرب

    nirfana
    ياختى عذرك معاكى و متأخر متأخر المهم انك وصلتى بالسلامة - نورتينا

    أكتب يالرصاص
    يا لهوى هو انت كل ده نايم؟ بقولك فيه مولد فى طنطا بعد رمضان و محتاجين واد فتوة مجدع و الولا مزاجنجى اعتذر و قال ان تخصصه تكييس عدة
    لو لسه باقى حبة رصاص فى المدفع يسترك تعالى معانا المشوار ده و ليك اتنين و نص فى الميه

    caesar
    أفهم من الحتة الدراويشى دى انك جاى معانا و هتحمى الحصان؟ أنا جبت لك جلابية جديدة كستور على دبلان معتبرة لزوم الألاجة

    الغريب القريب
    وجججججب - بس المنشار على حسابك مالوش دعوة بالمساريف بتاعتنا بس المستشفى و المكروكروم و الخياطة بتوع أوسة على حسابنا

    واحد من الناس
    كل سنة و انت طيب و أجيلك و أجيب معايا التورتة والجاتوة بتوعى مش هكلفكوا حاجة و ياريت تكونوا عاملين جاتوه و بسلة

    anonymus
    أحنا أولاد الضياع؟ انت فاكر انك كده حلو و هتفوق العيال؟ لو فعلا قلبك على الدعوة ياريت تغير أسلوبك لانه مخيف و منفر

    nolovenolife
    و انت بألف صحة و سعادة يارب

     
  • At Monday, December 18, 2006, Anonymous Anonymous said…

    Hi Tamerhina.
    Thanks a lot for all the nice word that you have done in your blog,realy it's a great job.
    God Bless You.
    Younes From Morocco
    ynaoumi@hotmail.com

     
  • At Sunday, April 01, 2007, Blogger تمر حنه said…

    يونس من المغرب
    حضرتك منورنا و مشرفنا يا أحلى أهل و اخوات
    أختك تمرحنه

     
  • At Monday, August 27, 2007, Anonymous Anonymous said…

    يا سلام علي الجمال يا توتو بقولك ايه ما تسلفيني الفرانده بتاعتك دي شويه اصل انا خلاص اليومين دول مكتئبه اوي والله كلامك اللي بيخفف عني شويه

     
  • At Sunday, March 14, 2010, Blogger mostafa said…

    Elnahrda 14 Mars 2010.
    se7eet akra2 modawanat el
    mesa7raty
    we ad eh ya ostaza tamr eslobek we taswerk ra2e3 .
    7ases belzabt en enty assety soora men el wake3 bema2ass, ezay? mates2lenesh. assety el a7dath wl nas wel makan 7ata e hawa assetyh be
    ma2ass kbeer we 7ateteh fe loo7a gameela.

    Talant gmed masha2 allah 3alke
    ra2etek westar2etek men 3een el 7asood wemen 3een elle shafooky wala saloosh 3al naby.

     

Post a Comment

<< Home