أيوه خدامه

Wednesday, October 25, 2006

الغازيّة لازم تنزل

كل عام و أنتم بخير .. خلص رمضان .. و المولد انفض
معلش ياريت بلاش حد يقوللى كل سنة و انتى طيبة – أصلها بقت لغوة الكناسين اللى أصبحوا يمثلو بتاع نص البنى آدمين و بقت تجيبلى هسس

فيما يلى جولة سريعة على الفضائيلت فى الشهر الكريم:

الفضائية المصرية
- لقاءات مستمرة مع الأوكش : الحمد لله رب العالمين ربنا وفقنى أوى فى مسلسل رمضان و كفاية عليا حب الناس و هو ده النجاح الحقيقى و التواصل مع الجمهور فى الشارع هى دى الجايزة الحقيقية – ثم تعدل حمالة البلوزة أو ترفع الشال على كتافها – طب و لابساه ليه لما هو بيتزحلق – حاجة كده زى : طب تشده ليه ؟ عشان يلسعنى
المذيعة : لاحظنا فى الفترة الأخيرة انك تحولتى من الرقص الى التمثيل –
الأوكشة: الفنان فى الأصل حالة – يعنى مفيش فرق بين موهبة الرقص أو التمثيل أو الغناء لأن الفن حالة متكاملة ركك الواحدة منّا تندمج و أديلو ادى أديلو ادى : تمثيل رقص غنا – كلو تلاقى.
المذيع: طيب فنانتنا المحبوبة – فيه اتهام بيقول انك ممكن تقبلى أى دور فيه قبلات أو لبس عريان مما يتنافى و قيم الشهر الفضيل – ماردك على هذا الأتهام؟
الأوكشة : اطلاقا أنا ضد كل هذه الأشياء و بحترم الشهر أوى و لكن أحيانا الحاجات دى بتخدم الدور و بتكون فى السياق الدرامى للموقف – و بعدين دى بتكون أوامر المخرج – و المخرج فى العمل الدرامى بيكون هو القائد – يعنى ممكن فى المعركة الجندى يرفض ينفذ أوامر القائد الأعلى؟ (تصفيق حاد)
المذيع : بنحترم فيكى دايما طاعة الأوامر و ده مش جديد على فنانتنا المحبوبة.

المحور
- اتصل و أربح عمرة : اتصل من اى محمول (حتى لو مش بتاعك) أو من أى خط أرضى و جاوب:
فيلم اسماعيل يس فى دمشق بطولة :
- أحمد أدم
- علاء ولى الدين
- أسماعيل يس
اتصل حالا و أربح عمرة – و كل ماتتصل أكتر فرصك فى الفوز تزيد ( امسح الريالة من فضلك)

روتانا سينما
- حمّل على تليفونك المحمول أحدث نغمات رمضانية :
- - الدعاء المستجاب للشيخ الشعراوى
- - سورة الأخلاص و المعوذتين
- - مزيكا على خطى الحبيب
- - رمضان جانا
- - يا ليلة العيد
- اتصل من أى محمول على الأرقام التالية 000000

روتانا زمان
فيه تحت كده لو خدت بالك شريط للشات :
الأمور: طالب فى علوم المنصورة يرغب فى الصداقة الطاهرة مع مطلقة أو أرملة ** البرنس: ياناس ياعسل البرنس وصل مين عايزة تتدلع؟ **لمياء الحزينة: صالح من الأسكندرية عندك كام سنة ؟ أنا 21 و بدرس فى معهد خاص – و انت؟ ** ملكة الشات: الواد قلبو بيوجعه و عايز حد يدلعو **ليدى المعادى : شبابيك 40 سنة اتشرفت بمعرفتك انت و صحابك أنا قلبى يساع مالحبايب ألف – صباحو قشطة بالعسل** طارق الشريف: أنا فاضى و محتاج علاقة عميقة .. رغده ياترى لسه فاضية؟

دريم تو (برنامج دينى)
و اتصال و نقول ألو يا صباح : أنا عايزة أسأل الدكتورة سعاد : أنا كنت قاعدة مع خطيبى فى رمضان و تلامسنا و نزل حاجات كده – الدكتورة سعاد: يابنتى حددى مذى ولا منى؟ البنت: بقولك خطيبى لمس أيدى و حسيت بحاجات كده - الدكتورة سعاد: شفت يا أستاذ أحمد: مش عارفين حتى الفرق بين المذى و المنى – أستاذ أحمد: معلش يادكتورة ياريت توضحى أكتر عشان السادة المشاهدين و ياريت يا صباح توضحى للدكتورة هو مسك دراعك كلو ولا حته منو؟

قناة اقرأ
اتصل من أى محمول على الهاتف الأسلامى – سعر المكالمة 2 جنية فقط للدقيقة – قرررررب قبل مايفتى
الأتصالات تتم فى منتهى السرية و الأمااااان
ملحوظة : يوجد تفسير أحلام كمان ... أبشرررررررر

ام بى سى
الشيف: انهارده هنقدم للفطار موس فرامبوازيه بالكريمة اللبانى و الكروت سلاتيه و طبعا دى وجبة سهلة و اقتصادية و فيها فوايد كتيرة و سريعة تناسب السيدات العاملات
المقادير: نص كيلو فرامبوازية طازج و لو مش الموسم فيه فرامبوازيه معلب
ربع كيلو سكر بنى نقى
كوب سلاتويه بفلافور الساتيدل
ذرة كوناتسير
أربع حبات كروت سلاتيه
باكت ذبده لورباك أو كاتييه بيضا و كوب كريمة لبانى فريش
الطريقة : تخلط كل هذه المكونات فى الكيتشن ماشين مدة عشر دقايق و بعدين تحطيها فى صينية قطرها عشرين إنش و توضع فى المايكرو ويف فورتين مينيتس و بعدين نشغل الأوفين بتاع الميكرو ويف عشان الوش يحمر
بعد ماتطلع من الفرن نرش على وشها شوية فرواتيه باودر بالفلافور المفضل و بالهنا و الشفا

أظن بقى ان كده المولد خلص و الغازية لازم تنزل ... تعالوا زورونااااااا


Labels:

51 Comments:

  • At Wednesday, October 25, 2006, Blogger Abo Rashed said…

    انت نسيتى تتكلمى عن تامر وشوقية لما إتشافو فى سكة الهلالى وانتهت بيهم الحكاية فى حدايق الشيطان وللأسف الحكاية كلها كان المتهم فيها أبى

     
  • At Wednesday, October 25, 2006, Blogger Ghada said…

    مسخرة الفرامبوازية ده!
    :)))

    هيه حاجة تعل فعلا..

     
  • At Wednesday, October 25, 2006, Blogger mitar2a3 said…

    di akla di 7ilw wala mokabilat ?LOL

     
  • At Wednesday, October 25, 2006, Anonymous Anonymous said…

    دة مش تنزل وبس
    دة تنزل ونخدها علي الاسم ونعملها محضر
    فعل فاضح
    لكي الله يا مصر

     
  • At Wednesday, October 25, 2006, Blogger يا مصر اكتب إليكي رسائلي said…

    أختي العزيزة يا تمر حنة وبعدين طيب ..بقا انا واقف على الناصية من صباحة ربنا ـ ومش سامع صوت التلف ازرون على رأي سمباتيك علشان ـ اجي اصبح اول واحد .. ينفع طيب كدا

    انا لي سوالين : الاول: مين الأوكشه عشان خاطري انا ، مش انا اخوكي ؟

    التاني : أيه الفرق بين قناة روتانا ودريم ، من ناحية التمويل يعني وإعداد البرامج .. ومين اللي بيصرف على القنوات دي ؟

     
  • At Wednesday, October 25, 2006, Blogger ماشى الطريق said…

    الله ينور
    ايه الحلاوة دى
    صباح خفة الدم بجد

     
  • At Thursday, October 26, 2006, Blogger caesar said…

    يا حبيبي المحشى استوى احدفلى 2 ف الهوا

     
  • At Thursday, October 26, 2006, Blogger Prometheus said…

    Great Post...
    bas howa sa7ee7 mesek dera3ha kollo walla 7eta menu?

    i share mitar2a3 his coriousity about elfarmoiset walla ma3rafsh eh.. wennaby hatelna eltargama!

     
  • At Thursday, October 26, 2006, Blogger Mahmoud Serag said…

    عجبنى البوست جداً
    تسلم ايدك يا تمر حنة

    و يبدو أن الوحى واقف على باب البلوج عندك :) اسمعى وصلة الدش دى



    الدِش دَش
    و الكلام فيه إستهانة
    و الناس تبحلق تتهبل
    خليك معانا
    ملعون ابوه
    هذا المايوه
    اللى بترقص بيِه فلانه
    و الرقص قال موهبه
    و الاسم قال فنانة
    و مسابقة تانية مذهلة
    من غير سؤال
    مش مشكلة
    بس اتصل
    يبقى المراد خلاص وصِل
    يعنى الحكاية
    مش مسابقة و أسئلة
    هى عصابة
    و السرقة دى مدبرة
    نقلب نلاقى
    داير حوار
    و ضيوف بكرش
    محاسيب كبار
    يتخانقوا قدامنا
    و لكن من ورانا
    الكبير هو الدولار
    م الخنقة اغير القناة
    اطفال بتشحت الحياة
    عواطفنا صارت
    سلعة متباعة
    و فلوسنا منهوبة
    اعلان و شماعة
    بيبعوا فينا و يشتروا
    و سنين و برضه يسجلوا
    اعلان جديد
    لاجل الحساب
    يعلا
    يزيد
    و يزيد كمان
    الامتهان
    و الناس تتوه
    تنسى المهانة
    تقعد و تسمع لغوهم
    خليك معانا



    أذيع ؟
    :)

     
  • At Thursday, October 26, 2006, Anonymous Anonymous said…

    This comment has been removed by a blog administrator.

     
  • At Thursday, October 26, 2006, Blogger واحد من الناس said…

    كالعاده لازم ارد متأخر
    بس مش مهم
    انتي عارفه بقا العيد والزيارات

    انتي بقا كنتي فاضيه في رمضان تتفرجي على كل ده
    هههاهها
    عالعموم كل سنه وانتي طيبه

     
  • At Thursday, October 26, 2006, Blogger واحد من الناس said…

    كالعاده لازم ارد متأخر
    بس مش مهم
    انتي عارفه بقا العيد والزيارات

    انتي بقا كنتي فاضيه في رمضان تتفرجي على كل ده
    هههاهها
    عالعموم كل سنه وانتي طيبه

     
  • At Friday, October 27, 2006, Anonymous Anonymous said…

    كل اللى المكتوب معروف المفاجاة عندى
    الاميرة اوسا طلعت راجل واسمه حنفى
    وسلملى على المترو

     
  • At Friday, October 27, 2006, Blogger شــــمـس الديـن said…

    لا اسكت الله لك حسا

    يعجبني فيك السخرية للازعة من هؤلاء اللي فاكرين نفسهم عباقرة و بيضحكوا علي نفسهم بس و جعلوا من نفسهم حدوتة ممللة و مكررة

    انا علشان كدا بطلت اتفرج علي تلفيزيون من زمان :) كويس انك عرفتيني انه لسة زي ماهو

    مش هقول لك كل سنة و انت طيبة و لكن هقول لك عيدك مبارك و سعيد و جمال كمان

    تحياتي
    نعيمة عبد النعيم ;)

     
  • At Friday, October 27, 2006, Blogger بنـت ســعد said…

    هم يضحك وهم يبكي

    يلا.. لسه الأسوأ قادم .. فلنستمتع الآن بالسيئ اذن

    تحياتي

     
  • At Friday, October 27, 2006, Anonymous Anonymous said…

    جامد أوي موضوع الالفرامبوازية ده انتي تحفة

     
  • At Friday, October 27, 2006, Blogger ادم المصري said…

    ههههههههههه
    كل سنه وانت بخير

    ايه رايك بقي ما قولتش كل سنه وانتي طيبة اهوة ؟


    هههههههههههههه

     
  • At Friday, October 27, 2006, Blogger BaTaBeeT said…

    :D
    enty de7k :D

     
  • At Friday, October 27, 2006, Blogger BaTaBeeT said…

    fe3lan 3andek 7a2 f 7war el chat bta3 rotana zaman./ana barakez m3ah aktar mel film :D

     
  • At Friday, October 27, 2006, Anonymous أزئوزة said…

    شفتي بأة إن الإذاعة ألطف؟
    دة بهاء جاهين كان دمه شربات ف فوازير أمال فهمي السنة دي
    ومحمد هنيدي ف رمسيس رمسيس ، اللي كان بيتذاع ف الشباب والرياضة ، كان فئري ولطيف
    ويحيى الرخاوي ئال كلام ف الصميم ، وكله قنابل موجهة ، ف برنامج السلام عليكم ، على البرنامج العام
    أما الشرق الأوسط ، فكان فيها برنامج مسلي جداً ، إسمه : الزمالة من نيتشجان ، كله نتش وفشر
    أنا استمتعت بتحابيش رمضان وانتي لأ ... أئة أااائة

     
  • At Saturday, October 28, 2006, Blogger Aoossa said…

    أنتى عسل يا تمر حنه
    بس أيه أصناف ألأكل الغريب دى
    وبعدين أيه المنى والمزى
    ده دوا ولا مشروب جديد
    المهم فى واحد عندك سايب تعليق
    أنى أسمى حنفى
    الناس بتحلم بيا شوفتى جمالى وحلاوتيش
    عيد سعيد
    هاتى واحدة بيتفور بقا
    همممممممممممم
    جميل جدآ

     
  • At Saturday, October 28, 2006, Blogger تمر حنه said…

    abo rashad
    المهم دلوقتى كتبو العيل باسم مين؟ قولهم مايقلقوش الجى ان ايه هيخلص الليلة

    ghada
    لاهو ايه بقى اللى مش مسخرة يا أوخشى هى جات عالفرامبوازيه يا دودو - نفضى

    mitar2a3
    اهئ اهئ - حاولت أعرف سدقنى حاولت بس تعمل ايه فى التعليم المجانى

    anonymus
    غالبا نزلت و اتاخدت تحرى بس مش عايزة اقولك عالبهدلة اللى الساده الظباط بهدلوهالها - فغالبا فضلت الأعتزال المبكر

    يامصر أكتب ليكى رسايل
    بص يا زواوى كلهن أوكش يعنى عيشه منفده على أم الخير
    روتانا بتاعت الوليد بن طلال -طويل العمر يزهزه عمره - ربنا يحميه و ينصره على من يعاديه - هاهى
    بقيادة الفاضلة هالة سرحاااان
    أما دريم فصاحبها أحمد بهجت و ده كان البداية للسيدة الفاضله - أول السلم يعنى

    ماشى الطريق
    و عليك - منور بالأوى

    caesar
    أيوه كفاية عليك المحشى ياخويا - خليك بعيد عن الأصناف النضيفة دى مالك انت و مال الفرامبواز كرواتيه و لعلمك الصنف ده مايعملهوش فى مصر غير عيلتين : عيلت سلطح ملطح و عيلتنا - اتعلموها بقى

     
  • At Saturday, October 28, 2006, Blogger tota said…

    تمر حنة اللذيذة

    بصراحة اخذت وعد عند كلابيظو انى مش هتابع التليفزيون فى رمضان وتمسكت بهذا الوعد قدر الامكان
    لكن من البوست استنتجت الصورة المتكررة

    الممثلة فكرتنى بمشهد هنيدى فى جائنا البيان التالى وهى ترد اذا كان البوس هادف انا معنديش مانع

    مش عارفة بصراحة كان قصدها ايه

    اما بقى الوصفة الفظيعة دى عندى استفسار هى المكونات نجيبها منين اساسا من الاجزخانة ولا منين بس علشان اعمل الوصفة دى

    نسيتى حاجة مهمة تبرعات المستشفى اللى فى كل القنوات هى لسه قدامها كتير ولا التبرعات دى بتروح فين ولا ايه الحكاية دى اللى بقت شبه كل سنة وانتم طيبين فى رمضان بالذات

    ربنا يصبرنا على حالنا

    بوست لذيذ ونقد لاذع فى صورة كوميدية

    تحياتى

     
  • At Saturday, October 28, 2006, Blogger عمر said…

    الله يخرب عقلك... هاهاها! دانتي مصيبة يا تمر حنة!! بقالي نص ساعة باضحك

    يخيبك يا بت ضحكتيني وانا متدهول

    صحيح ربنا تاب عليا السنة دي من التلفيزيون لأني في قارة تانية أساسا، لكن انتي اديتيني المختصر المفيد.. مش عارف أشكرك ولا أدعي عليكي! بس بوست مسخره! يخرب بيت دماعك

     
  • At Saturday, October 28, 2006, Anonymous Rania said…

    Maskharraaa,begad zay el 3assal,bass ya khossarra magebteesh seeret el shallal el ra3ash wel anchelostoma ellee gabhalna mohalhal 7aleeem.

     
  • At Saturday, October 28, 2006, Blogger كراكيب نـهـى مـحمود said…

    ايه انتي خلصتي كده فين باقي الممثلات اللي لبسوا حجاب وعملوا غزو للشاشة السنة دي بعرض ام ابراهيم الخياطة وازياءها
    كل سنة وانتي طيبة

     
  • At Saturday, October 28, 2006, Anonymous سحابة said…

    طب تصدقي كنت مستنية بقيت البرامج
    بجد مكنتش عيزاكي تخلصي
    :D
    ربنا يسعدك
    إنتي عسولة أوي

    صدق الي قال هم يضحك وهم يبكي
    أنا بريح دماغي خالص ومبفتحش الطلفزيون لاصيف ولا شتا
    مش طالبة تخلف يعني
    الواحد بيحافظ علبرجين الي عنده بالعافية
    تسلمي :D

     
  • At Saturday, October 28, 2006, Blogger قلم جاف said…

    اللي مسلي أكثر من شريط الشات بتاع روتانا شريط الشات بتاع عين .. مجموعة من الشباب الرايق المصري والسعودي والتونسي يتبادلون الهجوم الكروي لدرجة السباب على الشريط!

    واللي مسلي أكثر لدرجة الفقع القاتل إن بعض شيوخ قناة الناس عملوا همة الأخرين رنات للمحمول (ليه ما تدخلش في محمولك رنة تذكر بيها ربنا وتدخلك الجنة- دة نص الإعلان اللي شفته في قناة الناس امبارح).. رنة لمحمد حسان ورنة لمحمد حسين يعقوب .. آه ورب الكعبة!

    وفي القنوات المصرية إشادة بحدائق الشوشو اللي لا قبله ولا بعده ، وبالسوبر مان جمال سليمان اللي بيتحدى أي ممثل مصري يعمل دوره (تصريح منسوب له وأتمنى أن ينفيه)والذي نزل من الفضاء الخارجي لينقذ الدراما المصرية ، ودة يتسق مع كلام الصحف اللبنانية والسورية اللي مصوراه كأنه البطل اللي غزا إسرائيل وانتزع البطولة المطلقة لمسلسل مصري من أيدي الممثلين المصريين العلوش الأوغاد..

    عايزة تريحي شوية .. هاتي قناة ام بي سي 2 علشان تتفرجي على أفلام الرعب ومصاصي الدماء والشياطين اللي كانت القناة مصفداهم فيما يبدو (بما إني ما كنتش بتفرج عليها في رمضان) تضامناً مع الشياطين المصفدة في رمضان!

    وطبعاً في أي قناة خليجية ، تريشليون إعلان عن العطور لها علاقة بالأغاني ،و بحليمة بولند (لو هية اللي بتسرسع في حفلات روتانا بشكل مرضي يبقى العالم دي مختلة عقلياً).. وإعلان لمستشفى سرطان الأطفال يناشد فيه المعلنون جموع المصريين بالتبرع ولو بجنيه.. حتى الشحات الوقح اللي كان بيشحت في مدخل عمارتنا بصوت عالي في نص رمضان ما بيقولهاش!

    وبمناسبة العيد ومن قبله رمضان .. أهدي الجميع أغنية جورج وسوف الفلسفية الجديدة ذات السؤال المحير على حق : هي الأيام بتيجي .. ولا الأيام بتروح؟

     
  • At Sunday, October 29, 2006, Blogger Amenhotep®© said…

    GREAT POST!!i kept laughing for some time,great job!!

     
  • At Sunday, October 29, 2006, Blogger أُكتب بالرصاص said…

    ينهارك أبيض بالكريم شانتيه والشيك ميلك :))
    ده انا ضحكت ضوحك!!!

    اولا
    الفضائية المصرية ، فعلا الحوار العقيم ده والاستعباط للمشاهدين لم يتغير من خمسين سنة
    من ايام هند رستم لما كانت بتقول إني باحترم الجمهور، ومش باعمل حاجة اخجل منها قدامي عيالي

    بالنسبة لقناة المحور ، فعلا بأحس انها بتتعامل مع المشاهد على انه بريالة
    واحيانا كثيرة وانا باتفرج عليها
    احسس على شفايفي


    اللي حصل في دريم ده ...بجد والا تهيسة من تهيساتك ؟

    ارجوك ..اوعي تقولي بجد حصل !!!؟

    بالنسبة للوصفة بتاعة الام بي سي
    منهم لله
    فكروني بالذي مضى وفات

     
  • At Sunday, October 29, 2006, Blogger Sampateek said…

    اختشي حبيبتي
    مينفعش الغازية تنزل اصل عقبال عندك اشترت غسالة اطباق بالقسط و عليها شيكات لصاحب معرض السيارة الفورد فلازم تفضل تهز في وسطها و تدوخ في نفوخنا علشان تجيب السبيج اللي تروش بيه عن نفسها
    رمضان انتهى صحيح لكن وش الدماغ ده مخلصش و مش حيخلص الا لما احنا نرفضه بنفسنا و نبطل نشوفه نقاطعه يعني
    انما سيبك انت وحشتيني و وحشوني العيال و سي نظمي و خالتي وطنية
    اشتريت نص دستة براشوتات جداد انما اية
    واو لزوم العيد
    ابعتلك واحد تنطي بيه من البلاكونة؟
    اموووووووه
    و النبي اموووووه

     
  • At Sunday, October 29, 2006, Blogger حاول تفتكرنى said…

    بالعكس يا الفاضلة
    الغازية يدوب لسة طالعة ومش هتنزل ولا ترحل

    سيدتى
    لا اعرف كيف جمعت كل افكارنا عبر سنوات فى موضوع واحد وكأنك كتبت مقالك بمداد مما نحسه يخنقنا من زمن

    فالسؤال الذى حيرنى كثيرا - فى رمضان منذ زمن هو ترى فوازير شريهان لهز العقل ام هز الوسط ، وما علاقة كل هذا بشهر رمضان ، وكيف نرى الممثلون - ونحن صفوة بالنسبة لهم يتفننون فى وصف عبقرية الدور الذى قاموا به وكيف يتحول الاحتفال بالعيد احتفاء بالارتيست فقط ، وكيف تتحول برامج رمضان كلها حول شخصيات بعينها - الفانانون فنرى الفنان الفلانى على الشاشة ثلاثون يوما كل يوم فى برنامج مختلف عن سابقة حتى البرامج الفكاهية

    والحمد لله انى هجرت المشاهدة من زمن بعيد ، فلدى الوقت لان اشاهد حلقة فى مسلسل لا اشاهد باقى حلقاته

    اظاهر انها عدوى
    لقد نقلت لنا بمهارة الفناتازيا المضحكة المبكية عما يتوقعه السادة مصمموا الرسائل الاعلامية اي كانت عن عقول المشاهدين

    سيدتى الفاضلة
    لا اعتقد ابداً أنهم بمعزل عنا ، ولا اعتقد ان هذا توقعهم عن عقوةلنا واتجاهاتنا وثقافتنا
    بل هناك قول واحد ( فتش عن المصلحة ) وطالما ان ه ليس بمعترض فطظ فى الرسالة الاعلامية ومتلقوها ومصممها كمان
    المهم شركات زيرو تسعماية تجيب فلوس ، والاكوشة ( جبت منين اللفظ ده ) تأخد فلوس وتجيب اعلانات

    عشان كدة الغازية مش هتنزل ابداً
    وهيكون شعار البد دى بعد كدة قول استفان روستى ( الكونياك مشروب البنت المهذبة )

    ولكن اخير اسجل اعجابى الشديد بمهارتك فو طرح الموضوع وبكل معطياته فى هذه الصورة
    تحياتى

     
  • At Sunday, October 29, 2006, Anonymous Anonymous said…

    nice post

     
  • At Sunday, October 29, 2006, Blogger يمامة said…

    دمك خفيف جدا
    تحياتى

     
  • At Monday, October 30, 2006, Blogger تمر حنه said…

    عبد ربه التايه
    ماهى محددتش كلو ولا حته منو – قووم ايه الست الدكتورة اتعفرتت و زعقت لنا – بس جارى الأتصال بصباح القاطنة بدير النحاس لتحديد موضع المسكه بالظبط و الكشف على خطيبها لبيان مدى خطورته على البنت – ربنا حليم ستاااار يا تايه


    Mahmoud serag
    `ذيييع و نص يابو حنفى تسلم ايدك انت – ماهو لو الوحى عندى هنا يبقى أوعى تمشى
    تحياااتى


    واحد من الناس
    ماهو يا واحد الله يسامحهم مش سايبينا فى حالنا – كل حته تليفزيوناااات و اعلانات و قرف يالا أهم هايهدوا

    Anonymous
    طب يا بنى برضه معروف ان أوسه راجل و راجل أوى بس المفاجأه ان اسمه حنفى – أنا كنت فاكره ان أسمها عدلى – شكرا للتوضيح


    شمس الدين
    و أنا بقولك عيدك مبارك و نظيف و آخر جمال .. كله عز و سرور .. بقى فيه عيد أحلى من كده يا نااااس


    بنت سعد
    فعلا يا بنت كل المؤشرات تشير ان الأسوأ قادم .. تحياتى

    Anonymous
    يا سيدى الأفرامبوازييه ده جامد صحيح .. بس ياريت لو عرفت عنو حاجة ايميل مى بليز

    أدم المصرى
    و انت بخير يا أدم ,, جرب الوصفة بتاعت الأفرامبوازييه .. و قولى .. قولى ايه رأيك رأيك جرب و اوصفلى


    Batabeet
    طب تسدق يا بطبوط انى بفتح بس عشان الشات- و انسى الفيلم . الأفلام اللى تحت أفكه و أجدد


    أزئوزة
    أصلى يا أزئوزة أنا من جيل الأف أم .. ميه فاصله سته – لأ و اللذيذ فى الموضوع انهم بيجيبوا لهم الشيخ خالد الجندى و بيتكلم معاهم برّاحه على مستوى: حبايبى الحلوين انتوا عارفين اللى بيكدب بيجرالوا ايه؟ بيخش النار الكبيرة و بيتلسع يااح .. معنى كده نبقى حلوين و مش نكدب .. تعالوا زورونا .. باى باى

     
  • At Monday, October 30, 2006, Blogger تمر حنه said…

    Aoossa
    بيتيفور ايه يا بنتى؟؟ بقولك فرامبوازيه و حركات و تقولى بتى فور .. لأ يا ستى احنا عملنا السنه دى كالونتيه سواريه و فروندل تيلاتييه بنكهة البرتقال – أبعتلك منو؟

    Tota
    تتشركى فيّا .. تشبكى عليّا .. آه ماهى الست سقطت فى الكيميا – أصل الكيميا غدارة و من ساعتها و هى بتشتغل فى الأحيااااء
    يا توتا دول لمولهم ييجر مليار ولا حاجة – و لسة ...أصل شركة الأعلانات خدت الكامبين بتاع التبرعات مقابل 25% من التبرعات – تخيلى؟؟

    عمر
    قارة تانية؟ تانى سافرت المنصورة يا عمر؟ يالا ربنا يرد غيبتك عشان تفوق من الدهولة – ألف سلامة

    Rania
    لأ يا رانيا مانا بشر برضك ماستحملش اعلانات و نسلسلات مع بعض – رمضان الجاى نقضيها مسلسلات ان شاء الله


    كراكيب
    أنا لمحت مسلسلين عالطاير كده – يخرب بيت الجلاليب و الريميل و الآىلاينر – مأفورين بزيادة ماعدا سهير البابلى الوحيده اللى غاسله وشها – عارف اللى عين فى الجنة و عين فى النار !!ا

    سحابة
    و الله ارتحتى فعلا من التشتيت بس تسدقى الطلفزيون ده بقى أفيونه – أراب تووب عليّا

    قلم جاف
    ماهومن الهم ياقلم – الكورة أصبحت ظاهرة جديرة بالتأمل زيها زى تليفزيون رمضان – أفعصها لعيب بياخد خمسين و ستين ألف جنيه فى الشهر غير الهدايا و المنح و بهدين بقولك عاملين الرنه المعوذتين – يعنى القرآن شايف الأستهبال - أما بالنسبة للظاهرة السوبرمان جنال سليمان فأنا ما أسعدنيش الحظو ماشوفتش المسلسل بس كل النسوان بتموت فيه و عشان كده انت مفروس – صح؟ بالمناسبة كل اللى بيحصل ده و فى جميع المناحى قمة العبثية الهيامونية اللى بتبشر بان الأنهيار التام جاى جاى و الأيام بتيحى للعالم كله و بتروح علينا احنا بس – حسبى الله و نعم الوكيل

    Pharaoh
    شانك يو فيرى ماتش مستر فيروه و بليز جيفيت باكشيش – تشترى كالب؟؟

     
  • At Tuesday, October 31, 2006, Blogger 451 فهرنهايت said…

    يخرب عقلك .... انتي كنتي هادية خالص في رمضان ..ايه اللي جرا؟

    وحشتني هذه البوستات اللذيذة

    حكاية كنت قاعدة مع خطيبي دي مجرمة بجد !!!
    :))

    كل سنة وانتي طيبة معى دريم .. ومع روتانا واقرأ وجميع القنوات المحلية والفضائية

     
  • At Tuesday, October 31, 2006, Blogger Hope said…

    Hilarious. LOL.
    kollo koom we shereet chat el rotana koom! Unbelievable!
    I am too busy to watch any TV, and now I will not feel bad about it.

     
  • At Wednesday, November 01, 2006, Blogger Epitaph said…

    looooooool

    البتاع ده حلو و لا حادق
    ههههههههه


    بيتعمل ازاي تاني بقي يا ستي؟؟

    كل سنة و التلفزيون طيب
    :))

    الارسال اتقطع و لا ايه؟

     
  • At Friday, November 03, 2006, Blogger مـحـمـد مـفـيـد said…

    عزيزتي تمر حنه
    قد فقد الشهر روحانيته وبهجته من زمان بفعل كل ما ذكرتيه سالفا واصبح شهر لعب ولهو
    احييكي علي تحليلك الرائع

     
  • At Saturday, November 04, 2006, Anonymous احمد فتحى - تمثيلية السهره : شاطىء الشمس الاندلسى said…

    This comment has been removed by a blog administrator.

     
  • At Saturday, November 04, 2006, Blogger تمر حنه said…

    أكتب بالرصاص
    أولا ليلتك بيضه النهارده و فايقه لك
    ثانيا : احنا محتاجينلك فى جوقة المولد ناقصنا نشان البومبه و عايزينك بالبندقية بتاعتك و احنا هنجيبلك بعشرة جنيه بمب و صواريخ بكار و النحلة و شوية دباديب
    ثالثا و هو المهم :كل كلمة كتبتها أنا شوفتها بنفسى مع انى مش متابعة جيده للمهوبصة التليفزيونيه – موضوع دريم ده و المصحف سمعته بنفسى و كانت الدكتورة سعاد صالح هى الضيفة مع أحمد عبدون – و كتر ألف خيرهم عرفنا ان المذى هو الناتج عت شهوة طيارى ولا يستوجب الغسل و المنى من علاقة كاملة و يستوجب الغسل و كان فيه حاجة تالته ماقدرتش أكملها لان الفجر كان دخل و استعذت بالله من الشيطان و قلبت عال أم بى سى تو
    منتظرة ردك بخصوص المولد ( هنجيبلك جلابية جديدة )

    كلبوووزة
    كل سنه و انتوا بألف هنا يا ست الحبايب – أول مرة أعرف انك هباه – التقسيط ده انا و انتى اللى نعرفوا – و لكن الغازية بتاخد مقدم يا قطه – كااااش أند كارى و بالمناسبة محتاجه لنص دستة براشوتات بمناسبة الأعياد و ياريت يكونوا من الستانليس اللى مابيلزقش و لو مالقيتيش مفيش مشكله هبقى أدهنهم سمنه و أرش عليهم حبة دقيق و كلو هيبقى فى السليم أموااااااااااااااااااااااااااااه

    السيد الفاضل حاول تفتكرنى
    يا سيدى انها شبكة عنكبوت نسجت بمهارة حولنا من كل اتجاه لتحديد اقامة عقولنا و كل ماقلته انت ليس من قبيل الصدفة أو الفانتازيا و لكن بتخطيط شديد الحنكة للعب بأفكار و هرمونات جيل أمه كامله بداية بنيللى ( سنة 1977) و أخيرا و ليس آخرا الفاضلة دينا –
    أتظن ان موعد اذاعة أفضل المنكرات عالتليفزيون و تزامنه مع صلاة التراويح من قبيل الصدفه؟؟ اتظن ان فى الصيام شئ اسمه فيلم الظهيرة لتسلية الصيام؟ وزراء الأعلام بالتنسيق مع الشياطين (محليين و عالميين) برعوا و لأول مرة فى خطة طويلة المدى و يستحقون التهنئة على نجاحاتهم المتكررة – و للأسف بدأت بدايات النهاية أمام سينما ميامى بوسط البلد و .......البقية تأتى
    ملحوظة :الأوكشة هى الفتاه الجميلة المتساهلة او التى تستحق ان يطلق عليها كلمة أنثىمن حيث المظهر و المضمون ( المصدر: عبد المجيد الصحاح أخو مختار الصحاح – موزع و منتج و تاجر أحذية)

    يمامة
    أنا دمى مش خفيف – أنا بفضفض بس بتوه فى الكلام عشان أنا بيت فتاة مؤدبه

    فهرنهايت 451
    منك لله انت السبب فى اللى أنا فيه – أنت و شوكير- ماكنت قاعدة فحالى و أهم كلمتين كنت بفضفض فيه أنونيموس عندك – لأ لازك تكتشفنى و تصر انى افتح دكانه لحسابى بدل مانا مدايقاك فى المطرح – ليك وحشه و بتغيب ليه؟
    بالمناسبة أخبار النيابة ايه؟ يارب تكون ماشى تمام أحسن من الأمتياز و بيقبضوك بعملة السنبلاوين – ألا بقت بكام؟

    Hope
    بص ولا تشغل روحك ولا تقرف نفسك سيبنى أنا أنقلّك أحوال كل حاجة – هديك موجز عن اللى بيحصل فى الحياة : تليفزيون – دش – داخلية – خارجية – حروب نووية – أسلحة ردع – خليك انت فى شغلك و ماتحملش هم

    Epitaph
    لأ يا نونو لا حلو ولا حادق ده سوكرودايل أفيك تروا بيتي كوشو أبيراتيف – ايه الجهل بتاعك ده – اتنجرى بقى عشان أشوفلك جوازة حلوة كده و تشرفينى فى الأوساط المسكفة يا عسسسسسسسل

    محمد مفيد
    بالظظظظبط تحول من شهر بهجة الى شهر بهججة – ازيك يا أستاذ محمد

    أحمد فتحى
    أحمد يا فتحى ده مش كومنت دى مدونة كاملة - معلش يا احمد أنا مضطرة أحذفها و ده مش اهانة لحضرتك لا سمح الله و لكن لأن الكومنت ده مالوش دعوة بالموضوع
    أحمد اذا كنت محتاج فتح مدونة فده فى منتهى السهولة = ولازم يبقالك مدونتك لأنك عندك انتاج هايل و غزير
    تحياتى

     
  • At Sunday, November 05, 2006, Anonymous احمد فتحى - مطلوب للإيجار said…

    شكرا ياتمر حنه على نصيحتك بس والله انا ماليش نفس اعمل حاجه وكل مااطنش واعمل مش واخد بالى من اللى بيحصل الاقى ايدي بتكتب ، والاقى مدونتك فى وشى افش غليلى فيها وياريت بيتفش

    باقول لك ايه .. فكرتينى .. ماتيجى نتشارك على بلوجايه كبيره كده فى اكبر سنتر وسط النت ومايهمكيش الايجار والايراد بالنص ياستى

    معلهش .. انا كده ..لما اكون مغلول تلاقينى باقول حاجات بايخه

    تحياتى

     
  • At Sunday, November 05, 2006, Blogger تمر حنه said…

    لأ و الله ولا بايخة ولا حاجة بس يا جدع أنا مستخسرة قلمك
    بقولك ايه استنانى كده كام يوم و انا أستلقطقاك مدونة نص عمر حالة فابريكة

     
  • At Tuesday, November 21, 2006, Blogger Khalid M Nour said…

    تمر حنه
    يعطيك العافية
    بصراحة مدونتك عبارة عن حديقة لطيفة جدا تموت من الضحك والغيظ فى وقت واحد معا..
    استراحة مجانية رائعة يا ستى والواحد مليان قهر من اللى بيحصل فى الدنيا دى لكن بس يعمل ايه؟؟؟
    لكن يا جماعة نحن ناسين حاجة مهمة جدا وهى انه الزمن اتغير ونحن مسجونين فى زمن ولى وفات..
    اصحي للون يا تمر حنة ...
    لك تحياتى

     
  • At Tuesday, December 12, 2006, Anonymous Anonymous said…

    this is a nice post,
    mohammed

     
  • At Saturday, March 31, 2007, Blogger الأرمـوطــي said…

    ياعينى والله كانى بسمع ام كلثوم في فكرونى ولا فيروز فى بعدك على بالى مش عارف اوصفلك سعادتى لما بقراء كلامك كانك بتقولى الى جوايا انا حاسس انى فى حالة من النشوة والله مببالغ بقالك كتير مبتكتبيش لية انا بستنى بوستاتك ميهمكيش من شوية الالاضيش الى بيقلوا ادبهم انتى ليكى قارئ اسمة الارموطى بيستناكى

     
  • At Saturday, March 31, 2007, Blogger الأرمـوطــي said…

    ياعينى والله كانى بسمع ام كلثوم في فكرونى ولا فيروز فى بعدك على بالى مش عارف اوصفلك سعادتى لما بقراء كلامك كانك بتقولى الى جوايا انا حاسس انى فى حالة من النشوة والله مببالغ بقالك كتير مبتكتبيش لية انا بستنى بوستاتك ميهمكيش من شوية الالاضيش الى بيقلوا ادبهم انتى ليكى قارئ اسمة الارموطى بيستناكى

     
  • At Monday, October 29, 2007, Blogger أحمـــــد علـــــــى said…

    تحفة كالعادة.. من ألذ البلوجات اللى زرتها فى حياتى
    طعمها عامل زى الـ "موس فرامبوازيه بالكريمة اللبانى و الكروت سلاتيه" بالظبط
    تسلم إيدك على الطبخة دى

     
  • At Tuesday, November 13, 2007, Blogger hosam said…

    الفرامبوازيه ده حاجة بجد ولا اسم انتى اخترعتيه
    اصل انا مش من هنا
    عموما بوست جميل

     
  • At Wednesday, October 08, 2008, Anonymous Anonymous said…

    3ala fekra
    ehna delwa2ty 2008
    we ramadan el sana deh
    dah nafs elly hasal feeeeh


    shokran 3ala el makala

     

Post a Comment

Links to this post:

Create a Link

<< Home