أيوه خدامه

Tuesday, November 21, 2006

الصراحة راحة ... و انت مابتعرفش



صدقت المطربة العصماء عندما وقفت فى شموخ رافعة راسها و قالت لك فى وجهك : الصراحة راحة يا سيدى و انت مابتعرفش - و انا بقولهالك للمرة التانية : انت مابتعرفش
ايها الرجل الشرقى : أيوه انت.. لاهو فيه راجل تانى بيقرا دلوقتى؟ انت مبتعرفش
انت مابتعرفش تعمل حاجة خالص: مابتعرفش تعيش - مابتعرفش تتكلم - مابتعرفش تاكل -مابتعرفش تدلّع - مابتعرفش تعيش ولا تعيّش اللى حواليك !!ا
اوعى تفتكر ان موضوع ضل راجل ولا ضل حيطه ده لسه بياكل معانا - لا يا ننى عينى - خلاص فينيتو - احنا كبرنا و اشتغلنا و اتمسح بينا الأسفلت زينا زيك -
بالفرنساوى بقينا : تيت آ تيت - بالأنجليزى بقينا مان تو مان - و بالعربى : راسى براسك يابو رحاب.
دلوقتى و من موقعى هذا بقولك انت اتكشفت يابو رحاب - أصل افهمنى : انت كنت مستمد تميزك من حاجة واحدة فقط ( مش اللى فبالك ) - من الغموض اللى كان بيحيط حياتك و الحاجات اللى بتعملها و احنا كنا بناخد منك نتايج فقط - أفهّمك : كنت بتنزل على باب الله عالغابة تصطاد و ترجع بعد تلات أربع تيام جايبلى غزالتين و زرافة و أربع فراخ بريّة و شجرة موز - آكل أنا و عيالك و ننبسط و نتهنى و ندعيلك - و كنت بمنتهى الرضا أغسلك البدلة جلد النمر أم حمالة واحده و افليلك الغيارين ورق التوت -صنع المحلة- و انا طايرة بيك و ممتنة غاية الأمتنان.
عارف أياميها لما كنت بتدخل تقيّلك خمستاشر ستاشر ساعة - كان لو حد من العيال عمل دوشة أو جه يلعب جنب كهفك كنت أموته : أبوكوا تعبان و شقيان : كان بيصطاد علشانّا و من حقه يريح و ليه علينا حق السمع و الطاعة .
فبالتالى لما كنت بشوف ابتسامتك كنت بقول : و الله و ضحكلى زمانى - كنت باصه لك من تحت و انت كبيييييير أوى و يحق لك .
تَنّك ِتحرِِب : مش قادر عالمصاريف لوحدى - الصيد بقى صعب أوى - مطلوب انك تشاركينى فى القنص عشان :أبصر المركب تمشى و مدرك القفة ام ودنين يشيلوها اتنين و جرجرتنى معاك : طب يابو رحاب العيال اللى فى الكهف دول مين اللى هيقعد فى ريحهم يدافع عنهم ضد كلاب الغاية ؟: انتى برضه - طب و الصيد اللى هنجيبوا مين اللى هيطبخوا ؟ انتى - طيب و الكهف مين هيكننسه و يرشه؟ انتى .. طب و بالليل....؟ انت طبعا ؟؟!!ا
ثم ... اختلطت الأوراق و توترت المنظومة تحت مسمى "الواجب المقدس": و دى غلطتك الرهيبة : كشفت لى ورقك و ازحت الغموض الذى كان يحيط بك - بل و سلمت لى مفاتيح القياده - و كل ده ليه؟ عشان تناملك ساعتين تلاته زيادة و تلاقى وقت أكتر تقعد على قهوة المعلم ديناصور لتلهو مع رفاقك و تشرب لك "حجرين" زيادة - يااااااامفترى
- بقى بعد ده كله عايزنى أفضل القطة المغمضة اللى بتبوس ايدك و انت بتحط لها التونة فى الطبق؟ مش انت اللى طلعت لى ضوافر عشان أساعدك فى مهام الغابة؟ مش انت اللى اصريت انى أطلق شاربى و لحيتى لأتخفى بهما من الوحوش اللى فى الشغل و أتوبيس 33 ؟ الله يسامحك بوظت لى شكلى تماما - لأ و من جبروتك جاى تقوللى انا خلاص مش طايقك هروح أدور لى على أى " انثى حيوان مفترس" فى الغابة تكون حسنة المظهر و بتقدس الحياة الزوجية و ....بتعرف.
انت متخيل انك عشان مابتشارك فى مصاريف الحياة تبقى فاتح بيت و رب أسرة؟ ولا فاكر انك عشان بتيجى البيت آخر الليل تنام فى وسط ولادك تبقى هى دى المسئولية؟ ولا فاكر عشان بتقوم ب "الواجبات الزوجية" تبقى عملت فينا جميلة (حتى الأسم بايخ أوى و أبعد مايكون عن المغزى: أوجّب مع الجماعة- بايخ صحيح) - حقيقى انت مبقيتش : عارف - و ده طبيعى بسبب اختلال المنظومة.
هتقولى و انا مالى مانتو يا حريم اللى طالبتوا بالمساواة و حقوق المرأة و عملتوا مظاهرات حنجورية و ... و ... هقولك : كان يوم اسود و كات شورة غطيسة : أنا مش فاهمة ايه النظرية من الصحيان كل يوم الساعة ستة الصبح و التشبيح فى المواصلات ولا ايه المتعة فى السواقة و الباركنج - و مالوا الصحيان الضهر و قضاء اليوم بين الصديقات و الكوافير و الباديكير و البابل باث (المغطس ولامؤاخذة) بدل الدش عالواقف فى خمس دقايق- و ترجع تلاقينى منتظراك يرنسيسة و بقولك نورت - وحشتنى - و الكلام اللى مافيش منو دلوقتى ده.
بس انت طماع ... صح؟ اعترف .. عايز بلح الشام و عنب اليمن .. اديك مانولتش الا" الكاكا" الصينى .. و حقيقى أصبحت كل تصرفاتك مش مهضومة ...
سيبنى فحالى دلوقتى هذاكر للعيال و بعدين أراجع تقريرين للشغل .. و انت بقى على رأى أم كلثوم : فـ" غدا الكاكا".

55 Comments:

  • At Wednesday, November 22, 2006, Blogger ام العيال said…

    كان يوم اسود يوم ما طلبنا بالمواساه
    جتها نيله الي عايزه الجواز
    جتها نيله الي عايزه الخلف
    ال ايه اعمليلو رز بلبن
    خدي عندك و شوفي يختي :
    ال ايه 3 صحاب مصريه و انجليزيه و فرنسويه
    اتفقو يعملو اضراب و لا وحده تروح الشغل و لا تنظف و لا تاخد بالها من العيال لمدة اسبوع و تروح كده طخه الخبر المهبب لابو العيال مره وحده و بعد اسبوع يحكو لبعض الي حصل
    بعد اسبوع اتلمو
    هاه عملتي ايه (للانجليزيه)قلتلو اول يوم ماشفتش حاجه تاني يوم على طول جاب شغاله علشان البيت ما يتكركبش و قضيناها اكل جاهز
    ها و انت (للفرنسويه) اول ما قلتلو الخبر مافتش حاجه غاب ساعه و قال جزت في الفندق اسبوع علشان ترتاحي و علشان البيت كا يتبهدلش
    ها و انت ( المصريه) اول يوم ما شفتش حاجه تاني يوم ما شفتش حاجه بس ثالث يوم بديت اشوف بعيني اليمين شويه
    هههههههههههههههه

     
  • At Wednesday, November 22, 2006, Anonymous أزئوزة said…

    أولاً : إيه الأغنية اللي دخلتيها عالبوست دي ؟
    ماعرفتش اركز إلا لما ئفلتها . شتتيني ياأبلتي
    ثانياً : يابت بصي للنص المليان م كوباية حمص الشام . بذمتك مش النزول للشغل بيخليكي تشوفي ناس ، وتتكلمي مع بشر ، يعني بيوسع من دايرة الصـَدِيكات بتوع الكـَاوافيير . وياسلام بأة لو ليكي مديرة معئدة ومكلكعة .... يائلبي على مسلسل الكيد اللي هتستمتعي بأداء دور البطولة فيه . أما المدير ، فياختي ياجماله ، تعملي فيه اللي مش ئادرة تعمليه ف جوزك وعيالك . تهاوديه مرة ، وتنائريه مرة . و ف كل مرة هينخ ...إطمني . ماهو هربان م البيت والمشاكل ، فمش نائص مهاتية معاكي
    وبعد ماتخلصي الفسحة اليومية ، المسماة الشغل ، هترجعي البيت ومعاكي رصيد من النميمة ، تتسلي فيه عالتليفون وانتي بتئزئزي اللب والفُزدئ
    يعني الخلاصة : حياة اجتماعية أخرى ، موازية لحياة سبع البرمبة

     
  • At Wednesday, November 22, 2006, Anonymous shaimaa said…

    كلامك كله صح مليوووووووووون في الميه

    طلبنا بالحريه واننا نشتغل ودلوقتي بنعيط وبنقول يارتنا ما اشتغلنا

     
  • At Wednesday, November 22, 2006, Blogger يا مراكبي said…

    صحيح أنا لسة ماقريتش كل مواضيع البلوج لكني شايف إن البوست ده مرتبط تماما بأول بوست إنتي كتبتيه وكان لسة بيطرح الفكرة العامة اللي هايدور حواليها البلوج وهي حقيقي فكرة جميلة جدا .. ده غير إن البوست ده رائع بس مراتي عمالة تستقوى عليا كل ما تقرالك

    موضوع عمل الزوجة أو عدم عملها شاغلني من زمان .. وأنا عشت التجربتين مع أمي ومراتي .. والخلاصة اللي وصلتلها هي إني ماشفتش حد من الستات أو الرجالة راضي بحاله في الحالتين لأن لكل حالة مزايا وعيوب

    بس عمليا ومن غير تخلف ولا حاجة لقيت إن مزايا عدم عملها أكتر من عملها بشرط إن الزوجة ماتنقطعش عن تطورات العالم اللي بره

     
  • At Wednesday, November 22, 2006, Blogger Aoossa said…

    يا خراااااااااااااشى
    ده أبو رحاب أتبهدل فى البوست ده
    وطلع من جلد النمر وبيجرى عريان فى الشارع والعيال بيزقلوه بالطوب
    بس عارفه برضك الشغل أحسن بيخللى النفرايه مننا ليها كيان أينعم كيان مهددود بس كفايه أن الواحده دماغهل بيكون مشغول بحاجات تانيه غير الضكر هايرجع أمتى ؟
    الغدا هايعجب أهله ولا نوووووووو ؟
    البس أيه تو نايت عشان أعجبه ؟
    يا ترى بيحبنى أنا أكتر ولا جارتنا ؟
    يا ترى الشابه اللى شوفتها معاه فى العربيه نايمه على كتفه دى فعلآ مامته ولا بيضحك عليه ؟
    يا ترى القرصه اللى تحت ودنه دى قرصة تعبان ولا حيــه مولعب ؟

    نشترى دمكاغنا بقا ونشوف شغلنا ونعمل راسنا براسه (حلوه راسه دى )ونروح
    نشيش بعد الشغل ونعاكس الشوباب على ناصية الطريق
    -------------------
    أم العيال
    حلوه النكته دى
    بس يوم ما راجل يضربنى مطوتى هى اللى حاتتكلم أصلك أنا رقيقه مووووت

     
  • At Wednesday, November 22, 2006, Blogger khalid jarrar said…

    ya tamr 7inna, inti law y7o66ooki makan 7osni mbarik kan 7alleti mashakil ma9r min zaman:D

     
  • At Wednesday, November 22, 2006, Blogger حاول تفتكرنى said…

    مع تحفظى على التوجيه ، فأنى احيي الاتجاه فى هذا البوست
    التوجيه فى فقدان العمومية والموضوعيه والتوجيه فى مس حقيقة قد يتغاضى عنها الازواج اقتناعا بأستحالة وقوعها

    فكلاهما فى واقع الامر بالنسبة للآخر بلسما وجرحا, جلادا وشيطانا ، قبلة وصفعة
    تتداول عليهم الاحوال كتداول الليل والنهار والربيع والخريف

    مسكين ابو رحاب
    كان فاكر نفسه قبل اليوم المهبب انه هيتهبب يتجوز علشان يبقى سيد على اسرة ورب لها طلع عبد لاصغر واحد فى الاسرة وكل ده ومش عاجب
    يخلص شغله ويفضل متسكع على القهاوى يلعب جلبهار ومحبوسة وميرجعش إلا بعد ما يظن انها اتخمدت نامت

    مسكين ابو رحاب
    لقد تعلم منذ صغره انه راجل عيب يشكى عيب يبكى ، لحد ما جاله الضغط والسكر والقلب من كبت اللى المفروض يفضفضه ، فى حين ان الله تعالى وهبها دموع جارية تعتبر بمثابة متنفس للشحنات السالبة والضغوط الحياتية التى يتعرضا لها مناصفة

    مسكين ابو رحاب
    لو عرف يبقى نهاره اسود من المنّ ولو معرفش يبقى نهار ابوه اسود مالطين من الآنّ

    العلاقة اصبحت صعبة مركبة
    لغباء الطرفين
    البيه عاوز مراته تطبخ وتمسح وتغسل وتكوى وتربى العيال بأمره وتدبيرة ومشورته
    والهانم عاوزة تكون كل ذرة فى تفكيره وكل فكرة فى رأسه وكل نفس فى صدره وكل صورة يشوفها

    والاتنين مبيعملوش حاجة للوصول إلى هذا الهدف ، والمطلوب ان يكون كل منهما كما يريد الآخر دون عناء
    اسمحولى
    ابو رحاب سلبى جدا ومراته اكتر سلبية

    تمر حنة
    عاجبنى اوى اسلوب الفانتازيا فى عرض مقالاتك
    ربما اعود للحديث من جديد
    احترامي

     
  • At Wednesday, November 22, 2006, Blogger شــــمـس الديـن said…

    السلام عليكمو رحمةالله و بركاتة

    العيب ليس علي المراة اللي طلعت من البيت .... هي اصلا طلعت منالاول علشان سي السيد كان بيذلها بالقرش و بجد اللي مش بتشتغل و ليها قرش فعلا بتتذل ...و الكلام دا لاقياه في الستاتاللي بيشتغل و الشتات اللي قاعدين في اليبت

    ثم معلش يعني ... الست في الاول بتكون كدا و بعدين الصديقات بينشغلوا و الاولاد اللي وهبت لهم هياتها بردوا بينشغل كل واحد بيحاتة لما يكبروا و الاب لما لاشغل يباخدة و تكبر اعمالة او محاولة منه انه يحسن الدخل بينشغل بردوا و الست بتكون في وحدة رهيبة و الفراغ قاتل حقا ,و سبب مشاكل كتيرة اوي لان الست يتبقي مستني الزوج لحد ما ييجي و هو بيكون جاي تعبان

    الوضع ناتج من انه اولا الحياة غالية جدا .. و استحالة في الوقت الراهن طرف واحد يقدر يشيلها

    ثانيا عن انانية الرجل و انه اتدلع من صغرة و اتعود انه ميعملش اي حاجة في بيت امةاللي مدلعاه و مهنناه و للاسف علمتة عدم المسؤولية انه حتي يكون قادر علي انه يشيل نفسة و كمش يكون عبئ علي اللي حولية

    هي عامة وجة نظر و انا حتي لو اتجوزت استحالة اقعد في البيت لو كنت موفية بواجبات المنزل اللي هي مش بتاخد مني دلوقتي اكثر من ساعتين علي بعضهم اول عن اخر لاني المسؤولة عن المنزل وحدي لاني المؤنث الوحيد به و لكن للامانةالبقية الشعب متعاون :)

    مع خالص تحياتي :)

     
  • At Wednesday, November 22, 2006, Blogger tota said…

    الجميلة تمر حنة

    فليجنى الرجال ثمره ما زرعوه على مر السنين
    وليتذوقوا الحصاد المر الذى لطالما طعمناه

    اجمل شىء فى موضوع حرية المرأة هو سقوط المثل الشهير " ضل راجل ولا ضل حيطة " حيث اصبح ضل الحيطة اكثر فائدة

    لا انكر عليكى تعدد الفوائد ولكن ما زال الاحساس بالشقاء مؤلم يطغى على اى فائدة مرجوة

    استعدى لتلقى تعليقات ابو رحاب من كل فج عميق

    لكن تدوينة جميلة سلسة ساخرة كالمعتاد
    تحياتى

     
  • At Wednesday, November 22, 2006, Anonymous Anonymous said…

    هى الموضوعات خلصت علشان الكلام الهجص المكتوب وشوية عيال مش فاهمة حاجة تعلق
    متى يكبر المدونين المصريين ويكتبوا يرفع شان بلدهم بدلا من التافهات

     
  • At Thursday, November 23, 2006, Blogger تمر حنه said…

    ام العيال
    و ربنا ماأقصد يا لولا :الرز بلبن و الشاى أبو نعناع و الليلة اياها كانت محاولة يائسة منا لاثبات حسن نيتنا تجاه العزيز أبو رحاب - و لكن تعملى ايه؟ مصاريف و خلاص
    و اسمعى منى: اعملى الأضراب و اقعدى فى البيت و أوعدك انى هشوفلك حد يسحبك بعد العلقة أو على الأقل هستلقطلك كلب و عصاية
    متقلقيش - نفذى انتى بس اللى بشور عليكى بيه و .... خير ان شاء الله


    أزئوزة اللذوذة
    واضح انك شغالة فى حته مرحرحة و تلاقيكى عندك شوفير مخصوص و مدير لذوذ بيغنيلك طول النهار : ياسلام على أوءى و أوءك - كلامك يمثل استثناء يا قطه و لا ينطبق مع الأغلبية - ألا انتى إشتغلى ايه؟

    SHAIMAA
    انضحك علينا يا شيماااا - منه لله قاسم أمين : آل ايه اتعلموا و اتنيلوا - و كان مالها أشغال الأبرة؟؟


    يامراكبى
    أولا تحياتى لمراتك - سيبهالنا بس انت و بكرة تفتح مدونة
    أنت ليه بتقول رأيك على استحياء؟ انت شفت نتيجة عمل الأم بتخليك متلخبط و البيت بيفتقد ركن أساسى. و وسائل الأعلام و الأختلاط بالأهل و الأقارب هيخلو المرأة تعرف الكثير عن العالم الخارجى - حضرتك نورت


    AOOSA
    بصى : فيه بت فوق اسمها أزئوزة اللذوذة - ياريت تصاحبوا بعض و تحبوا بعض- و ممكن تعملوا تبادل طوابع و مطاوى -
    يابنتى هيهات : هتلاقى دماغك شغالة فى اتجاهين : الشغل و همه و فى نفس الوقت الضكر هيرجع امتى و البس ايه تونايت
    عليكى الأختيار و شوفى هتضحى بمين علشان التانى يعيش - أنا بقول نضحى بأزءوزة


    KHALED EBN jARRAR
    وحياتك عندى كان نفسى - قلت هخلع أبو رحاب و هركز شوية مع جيمى بس خطب للأسف -عموما الأمل موجود لأنه لسه مكتبش الكتاب و ساعتها ليك عليا أحليلك بقك - معندكش حد يعملله عمل؟

    حاول تفتكرنى
    لا فض فوك : انهاردة انت متألق
    الموضوع له حلول و الحلول ليها ضحايا و ده كله هيحصل مع الوقت - احنا كشرقيين لازلنا فى مرحلة انتقالية و المواقع لم تستقر بعد
    الحكاية دى مساحتها أكبر من تعليق أو رد على تعليق-
    كلامك : عنب و تركيزك عالى أوى


    شمس الدين
    الديفولت ان الست فى البيت : أيام ستى أم ام امى كانت الست بتتذل بسبب الخروج من البيت و تتعاير من الجميع و عمر ماكان جدى أبو أم امى بيعايرها - بل بالعكس كان مهننها و مدلعها و لكن الموازيين اختلت - و من الطبيعى دلوقتى اننا لازم نشتغل و الا هننذل


    TOTA
    توته القمراية: طبعا الحيطة أكثر فائده : عالأقل الحيطة هتتسندى عليها من غير ماتقولك انزاحى شوية ولا خدتى الغطا كله - الحيطة لا بتاكل و لا بتشرب و تنها تضلل عليكى طول النهار لغياب الشمس من غير ماتمن عليكى
    طب وقفى راجل كده يضلل عليكى : همّا عشر دقايق ويفهق و يعرق و ينام فيها أسبوع.


    ANONYMUS
    سعيكم مشكور يافندم - حضرتك دخلت المدونه دى غلط : فيه عالناصية مدونة عاملة صوان مفيهاش هجايص و ناس بتصوت و تلطم أكيد هتتكيف
    يا أنونيموس : معالجة العلاقة بين الأزواج و محاولات اصلاح ذات بينهم هى النواه الأولى للنهوض بالمجتمع مما يترتب عليه تنشئة جيل خالى من الأمراض و العقد يستطيعون الرفعة بشأن بلدهم
    فالكتابة فى حد ذاتها لا تنهض بالأمم و لكننا كمدونين مصريين نحاول الأتفاق على اساليب راقية تقام بها البيوت
    أما عن الأسلوب - فهكذا نتفاهم نحن المصريين بعذننا قاعدين فى الفسحة أو على قهوة أهل بقى يا أخى- أما بالنسبة للأفاضل اللى بيعلقوا فدول هما الناس اللى فاهمة أما انت ..... فيابخت مراتك بيك

     
  • At Thursday, November 23, 2006, Anonymous Anonymous said…

    السلام عليكم
    بصراحة انتي هايلة وجايبة كل الحاجات الي بتحصل بالظبط والله وبدون مجاملة وصدقيني نفسي أتعرف عليكي وأحكيلك بلاوي بس ممكن أحكيلك برضه شوية شوية واستحمليني يا أختي ماحنا ولايا ومكسورين الجناح زي بعض بس انا اجدع منك شوية وسبته لما اتأكدت انه بيستنطع عليا زي رجالة كتير اوي وعايزة اشتغل واصرف عليه وعلى البيت واعمل كل حاجة وهو يا حرام داخل بمجهوده بس وكفاية عليه كده ...ربنا يعينهم كلهم (والمعنى في بطن الشاعر) .... مطلقة مفروسة

     
  • At Thursday, November 23, 2006, Anonymous Anonymous said…

    وعلى فكرة

    شكلنا هنبقى أصحاب

    مطلقة مفروسة

     
  • At Thursday, November 23, 2006, Blogger الزعيـمة said…

    وحد قالك تتجوزي ابو رحاب ولا ابو قردان
    ما كنتوا تستنضفوا من الاول والواحده تاخد راجل بمعني الكلمة

    يعني يقدر يقوم بواجباتة كاملة ويترك لك حرية العمل لاثبات ذاتك وتطوير ثقافتك مش عشان يقبض من تعبك

    وانتى باه لك الحرية تشاركي معاه او لاء

    تحياتي لك يا تمر حنة

     
  • At Thursday, November 23, 2006, Blogger وجع دماغ said…

    والله شكلنا حنطالب بالمساواه قريب
    على العموم
    انا معك فى موضوع أننا ما بنعرفش ده
    محتاجين نفهم بعض أكتر
    يمكن لما نفهم نستريح ونريح

     
  • At Thursday, November 23, 2006, Anonymous Anonymous said…

    لسه شايفه على الجزيره الست الفلسطنيه اللى سنها فوق الخمسين..الست اللى فجرت نفسها ...ايه الروح دى ده انا لسه عيله والواحد كاره نفسه ...يعنى خلاص يارجاله مبقاش ناقص حاجه تانيه

     
  • At Friday, November 24, 2006, Anonymous أزئوزة said…

    ضحكتيني ياتمرمر
    بأة هتضحي بأزئوزة؟
    عموماً الأزائيز كتير ، والأزئوزة اللي تئصديها بهمزة عالسطر { أزءوزة }، بينما أنا بهمزة على نبرة

     
  • At Friday, November 24, 2006, Anonymous أزئوزة said…

    كلامي الآن موجه للأخ المجهول الزعلان من تافهات { هوَّ اللي كاتبها كدة ، وانا مالي } الزعلان من تافهات المدونين المصريين ، حيث قال : { متى يكبر المدونين المصريين ويكتبوا يرفع شان بلدهم بدلا من التافهات } . سؤال ياحضرة : إلا هوَّ يعني إيه يكتبوا يرفع ؟
    أصل لغة متعمقي المعرفة ، غير السطحيين ، الكـِبار ، مادرسنهاش
    وياسيدي على رأي تمرمر { اللي كيداهم } : دة مش مكانك
    دخلت وماعجبكش ، فلتقل خيراً أو لتصمت
    والخير هنا مش مقصود بيه الإشادة فقط ، ولكن عبـَّر عن رأيك من غير تجريح
    عيال تافهة مش فاهمة حاجة ، زي ماانت قلت ، خلاص ياكبير يامـُطـَّلـِع على بواطن الأمور ، ماتعبرهمش
    مالك ومالنا ؟ جاي ورا العيال ليه؟
    دة حتى المثل بيقول : اللي يمشي مع العيال .... ياسيد العاقلين

     
  • At Saturday, November 25, 2006, Blogger Aoossa said…

    Anonymous
    أنت يا حنفى
    يا تكتب فصحى يا تكتب عامى
    يا تروح على بيتكم و تنام خفيف
    أحنا شوية عيال يا حنفى
    والنعمه تيجى عندى المدونه لفتح كرشك
    أنت هتعلمنا نكتب أيه ونعلق أزاى
    طيب أفتح بلوج و ورينا فن الكتابه
    يا فندى عشان نستفيد
    على رأى المثل
    عريان الراس ويحب التأمييز
    و يقول باب الخماره منين
    ماشى يا هذا
    العواف

     
  • At Saturday, November 25, 2006, Anonymous Barracuda said…

    تمر حنة يا مدرسة ... فن ولعب وهندسة
    إخربيها .. اخربيها كمان.. قال يعني هي ناقصة ؟؟ هي الستات ناقصة تمرد ؟ ما تسيبوا العالم بايسة ايدها وش وضهر وعايشة .. دي الغباوة نعمة والنوم في العسل مصلحة وعلى رأي الشاعر العربي القدييييييييييييم اللي بيقول
    ذو العقل يشقى في النعيم بعقله .. وأخو الجهالة في الشقاوة ينعم

    أسعد الناس هي اللي مش دريانه بحالها .. أتعس الناس هما اللي شايفين واقعهم على سواده .. بدل الكلام المفخخ ده .. فكريهم ببيت صغير فوق جزيرة لوحدنا .. والعنب طالع وريحة البحر ( فايحة ) قصدي .. هالا

    اعجابي .. تحياتي
    http://enbee-world.blogspot.com/

     
  • At Sunday, November 26, 2006, Blogger توتة توتة said…

    بصي انا مش عارفة و الله احنا (الستات) عايزين ايه كده و كده مش عاجبنا و هما برده

     
  • At Sunday, November 26, 2006, Anonymous Anonymous said…

    عاشت تمر حنة حرة مستقله...
    مدونه رهيبه وممكن تتفنط رسالة ماجستير مع بحثين علميين, واحد في الاكينومست والتاني في مدخل الامم المتحده ورعاية الشباب..ده لو امرؤ القيس يصحى..ده يشيل المعلقه بتاعته ويحط مدونتك..ياشيخه ده انا قربت اعيط...
    لن اعلق على محتوى المدونه حتى لا اجرح روعة الكلمات.

    ِAnonymous :)

     
  • At Sunday, November 26, 2006, Blogger حاول تفتكرنى said…

    تمر حنة
    بلاش العنب ده ، أحسن العين عليه الايام دى
    اعجبنى اقتناعك بأن القضية صعبة ومركبة وقديمة ولكن ألم تلاحظى ان الايام بتمر !!! وده الغريب فى الامر
    فعلا القضية اكبر من ان يستوعبها مقال او رد او رد على الرد ، ولكن يكفينا الخطوط العريضة وكل واحد ودماغه وعليه تسويه اموره مع الآخر بالشكل الذى يظن أنه هيبقى افضل
    والدليل على ذلك اشتراكهم فى اشياء كثيرة اولهم الشكوى والاحساس بالظلم والصفعات المتبادلة وبرغم كل هذا القبلات الحارة

    تحياتى

     
  • At Sunday, November 26, 2006, Blogger تمر حنه said…

    العزيزة : مطلقة مفروسة
    ليه مفروسه؟ ده انتى المفروض تبقى: واحدة فهمت الفوله و تحررت من ضل الراجل- يشرفنى انك تبقى صاحبتشى و لاعبينى و الاعبك ... و عايزاكى تسيبى نفسك فى المدونه دى (مفيش حد غريب) و قولى اللى انتى عايزاه - على فكرة الرجالة اللى معانا دماغهم كبيرة أوى و ستر و غطا علينا مش زى أبو رحاب .


    الزعيمة
    ماهو بس يا زعيمة الموضوع بطيخة مقفولة و مهما استنضفتى المكتوب عالجبين لازم تشوفوا العين - كلامك حلو و صورتك حلوة و سلميلى على تطوير السكافة .

    وجع دماغ
    ربنا يكملك بعقلك .. أيوه كده ورقوا معانا و نضفوا ودانكم و استوعبوا مطالبنا - وانتوا تفهموا و تعرفوا و تبقوا زى الفل - ياريتهم كانوا كانوا كلهم زيك و سلامة الدماغ

    anonymous
    آه موضوع الست الفلسطينية ده مؤثر صحيح - بس برضوا أنا شامه ريحة أبو رحاب فى الموضوع

    أزئوزة
    ايه ده ؟ هو انتى بهمزة على نبرة؟أنا حبيتك ..
    و بالنوسبة للوقفة مع المجهول الأنونيموس بتاع : عصمااااااء فياختى نردهالك فى الأفراح و يوم طهور الولا الصغير و هتشوفى الواجب الصح .. ماننحرمش مالعين و الرمش

    aoossa
    بت يا أوسه واضح انك ناسية المثل .. ادى عيب التعليم الأجنبى - سمعت انك بتوزعى فياجرا عندك - صحيح الكلام ده؟ طب دانتى روحى روحى روحى بقى يا ناقصة ماتفتكرينيش - أنا جايه لك المطرح على طول دلدلى السَبَت

    barracuda
    انت شرير جدا و عايز تلعب سياسة حكام الدول التالته .. طبعا بتنفع بس ياويلك يا باراكودا لو الناس فهمت - هتصحى يوم الصبح تلاقى حاجات فيك ناقصة .. السكاكين الصينى مغرقة السوق . و ألا ياخويا البيت اللى فوق الجزيرة لوحدنا ده برضك أنا اللى هدفع الكهربا و التليفون ولا فيفتى فيفتى ؟

    توتة توتة
    صعب جدا ان حد يعرف الستات عايزة ايه - بس أنا أقولك.
    الستات يا توته توته - ماطولش عليكى - قولى طوّلى - عايزة دكر يشكمها و يمشيلها أمورها بس يبقى دكر على حق بمعنى : يكون عنده كل مقومات:
    ا ل ق و ا م ة
    - يعنى يكون لعب و فن و هندسة - يعنى يكون دماغ و شخصية و حنية و قسوة و حضن يضم و عصا تقويم و كلمة حلوة و سيف و درع و ثقافة و ثقة بالنفس ......
    طبعا أنا كده دخلت فى رابع المستحيلات و اعتبرى كلامى هرتله و أنا عبيطة و خلينا كلنا كده مش عارفين الستات عايزة ايه .... فرغت الحدونه

    anonymus
    الهى و انت جاهى يطعمك مايحرمك يابو لسان حلو .. ماجيستير ايه و بتاع ايه - دانا عليا دقية بامية باللحمة الضانى تدخل عالدكتوراة رأسا - اجرح ياخويا ولا يهمك


    حاول تفتكرنى
    أحيات أبوك يا شيخ تدينى اسم الصنف اللى بتستعطاه اليومين دول .. ألا الدماغ عندك اليومين دول جايبه الهوت بيرد .. القبلات الحارة .... هييييييه كل من عليها فاااان - بتفكرنا ليه بس؟؟

     
  • At Sunday, November 26, 2006, Blogger Mohamed A. Ghaffar said…

    شواهد حقيقية لمنطق مقلوب وبس

     
  • At Sunday, November 26, 2006, Blogger Sampateek said…

    لزم التنويه الي خطورة التعميم
    في رجالة زي الفل شايفة شغلهاو مراعية بيتها و الستات مشلتين و سايقين التلامة و مبيعملوش حاجة غير القاعدة قدام التي في
    و في كمان رجالة ايجز(بيضان) مرحرحين في الجلابية و مستنيين مراتتهم تيجي من الشغل تحاسب البواب علي الجرايد و البقال علي السجاير و الذي منه
    في كل مكان و كل مستوى اجتماعي في الكويس و الوحش
    ---
    انتي بقي عاملة اية؟ و ازي المذاكرة على حسك
    اختك موروطة في الميدل تيرم اجزام و ايد في الماس و ايد في الساينس و شعري واقف منهم
    ادعيلهم ينجحوا و يجيبوا فول مارك علشان يشتغلوا بقالين لما يكبروا
    الا هي كرتونة البيض بكام في مصر دلوقتي
    بحبك يا مضروبة

     
  • At Monday, November 27, 2006, Blogger karakib said…

    في ايه !!
    طب ليه كده !!؟

     
  • At Monday, November 27, 2006, Blogger No Fear said…

    السلام عليكم
    أنا مختلف معاكي في حاجات كتير
    أنا شايف أن شغل المرأة مهم
    و القرف اللي بيحصل ده ليه أسباب تانية
    بس أسلوبك ماولش حل صراحة

     
  • At Tuesday, November 28, 2006, Anonymous Anonymous said…

    تمورتي ازيك فضحتى ابو رحاب وارتاحتى يا ختى ؟
    طيب ايه رايك بقى انا اعتبر ان الزواج ده مشروع شراكة عظيم ولازم كل طرف من الطرفين يساهم في انماءه (حلوة انماءه دي )؟
    لكن للاسف الان في ضكورة بتحب تدخل المشروع ده بالمجهود فقط والشريكة النغشة براس المال والمجهود برضه وكفاية على ابو رحاب الهدة اللي بيتهدها ليلاتي لارضاء الست ام رحاب يعني هايقطع نفسه ما هو برضه بيعط بره وبيساهم في هدم قيم كتير خارج المنزل جت على اللي فالبيت وهايبني ويعمر لها يا ستي الرجالة اساسا ماتوا في الحرب وسيبينا ماشين جنب الحيط وغطونا وصوتوا

    المزاجنجى

     
  • At Wednesday, November 29, 2006, Blogger تمر حنه said…

    mohamed a. ghaffar
    مثل أى شئ آخر الآن : كل شئ مقلوب

    كلبوزتى
    ...المذاكرة على آخرها - قطع التعليم و اللى بيتعلموه و اللى مخلفينهم - ربنا يسترها عالعيال كلهم و يتوب علينا بقى
    واحشانى لايفففففففف

    karakib
    يا كركوبة أدينا بنفضفض .. ورانا ايه ورانا ايه


    no fear
    و عليكم السلام .. يا خبر أبيض يا خبر أبيض و داخل كمان بفالنة الزمالك؟ و بتقول نو فيير؟ طب أنا كمان مختلفة معاك .. ايه رأيك بقى؟ أنا اعترض

    مزاجووو المجهول
    انت لسه هربان من حكم النفقة اللى عليك و داخل متخفى؟ ماتخافش الكتف ده زاد و المتف ده ميّه
    آه حلوه انماؤه دى : انماؤ زنوا و ان شبعوا غنوا .. انت عارف لو رحت حفلات و معزمنتنيش أنا و العيال - هبلغ عنك

     
  • At Wednesday, November 29, 2006, Blogger maged stephen said…

    قالتلى عايزة أشتغل
    قلتها وماله بتحصل
    المهم بقى أهم حاجةبالنسبة لك فى الزواج ايه ؟ وسيبك من الكلام اللى كل البنات بتقوله زي يحتوينى يعنى بلاش شعارات
    قالت لى أهم حاجة عندى التفاهم
    قلت لها شغال ويوميته ماشية لكن أنت دي ضحكتك ولا مستلفاها من واحدة صاحبتك عادى الناس لبعض
    قالتلى أنا بأشتغل الصبح فى صيدلية ثم مساءا مندوبة تسويق فى شركة أدوية ولن أترك كلا الوظيفتين بعد الزواج وبصراحة كنت مخطوبة وفكييت لنفس السبب ده أصل مش بحب حد يتحكم فىّ المهم الجوازة باظت وبقينا أصحاب باقلنا 3 سنين ومش عايز أسئلة غبية من نوع طب هى ولا أتجوزت ولا أتخطبت
    ؟
    الثانية كان مشكلتها أقل بكتير قالتلى لازم أشتغل حتى لو مرتبى جنيه ومش عايز سؤال من نوع ايوه وبعدين عملت أيه


    باي باي كمبورة المهم رحت على القهوة شربت قهوة مع سيجارة وأبتديت أفكر أشمعنى قاسم أمين دونا عن البشر اللى فكر فى طريقة جديدة يخلى بيها مراته تخرج بيها كل يوم الصبح لأ لأ مش عايز تفكيرك يروح ناحية أن الموضوع فيه ريحة واحدة موزة وكان عايز يفضى الشقة بشكل منتظم علشان كان عنده بعد نظر وعارف أن البطالة هتزيد كمان نسبة الزواج هتقل وكمان ايمانه الشديد بأن العازب انسان وهب حياته لاسعاد زوجات الاخرين اللى من نوعية أنت ما بتعرفش طب ايه اللى يخليه يعمل كده؟

     
  • At Wednesday, November 29, 2006, Blogger أُكتب بالرصاص said…

    اختي تمرحنة


    انا لا يعجبني التعميم في مثل هذه الامور

    ماينفعش نجيب كل الرجالة ونوقفهم كلهم وشهم للحيط منك له

    ولا نجيب الستات ويقعدوا القرفصاء علشان كلهم متهمين


    يعني ممكن تكتبي عن حالة خاصة
    انما التعميم ..


    رافضه
    رفضا
    فاطع
    قاطع
    قاطع

    وده لا يبخسك حقك اني اثني على اسلوبك الرايق اللذيذ

    سفن اب


    واعجابي بمشاكستك
    وحسك الكوميدي
    ال



    ادبي

     
  • At Wednesday, November 29, 2006, Blogger Mohamed A. Ghaffar said…

    صدقتى للأسف

     
  • At Thursday, November 30, 2006, Blogger Sampateek said…

    اكتب بالرصاص
    انا معاك

     
  • At Thursday, November 30, 2006, Blogger تمر حنه said…

    maged stephen
    أولا يقتلنى الفضول لمعرفة حاجتين : الأولى اتجوزت ولا اتخطبت - و الثانية : أيوه وبعدين عملت ايه - وحيات أبوك ياماجد تقول لنا
    ثانيا: دعنا نتفق على تاريخ : قاسم أمين - هدى شعراوى - رفاعة الطهطاوى - الشيخ على يوسف و آخرين من المطالبين بتحرير المرأة استقوا أفكارهم من معايشة مجتمعات أوروبية لبعض الوقت - فأخذوا ما أخذوا و تركوا ماتركوا -: أما ما أخذوه فقد جاء عالطبطاب للمرأة المصرية : على مستوى شلحى و اجرى فى الشوارع و لم يلقوا بالا لتغيير مفردات المعيشة اللوكال
    فالمرأة عندما تساوت بالرجل فى موال التعليم و الشغل و الأختلاط .... كان يجب أيضا أن تعلم انه لا حق لها فى : المهر و الشبكة و الشقة و نفقة المتعة و مؤخر الصداق و و الأنفاق و القوامة و ماشابه - فكل تلك الحقوق لم تكن لها بل كانت لمخلوق أليف لطيف حليق اللحية و الشارب أسمه : حواء ,مش لصاحبك اللى قاعد جنبك على نفس القهوة بيشد فى التومباك و اسمه المرأه الجديدة
    أنا واحده من الناس متلخبطة آخر لخبطة : هو احنا دلوقتى من الناس دول ولا دوكهوما - يعنى أرفّع صوتى ولا أتخنه : مايصحش الست الدكتورة ولا الريسه وكيل الوزارة ترفّع صوتها و فى نفس الوقت ماينفعش ان أم رحاب يبقى صوتها ذكورى أجش - ياخى .. يحرق .. ينعل .. آه ياولاد ال ..( بقى بذمتك دى ألفاظ تقولها واحدة ست؟)


    أكتب بالرصاص
    وحيات أمى ما بعمم - هو انتو صنف يتعمم؟ الموضوع اننا كلنا انضحك علينا و دخلنا معمعة لسه ماحناش قدها - الواحدة مننا بيبقى دخلها مرتين قد اللى متقدملها و يقعد أبوها يشرط و يتشرط : شقة و مهر و شبكة -وده فساد فى التطبيق لنظرية خالتى انشراح : المليان يكب عالفاضى و بالتالى و من موقعى هذا أقول : الطمى يانشراح و الجاى مش زى اللى راح
    بالمناسبة : المدفع اللى انت نايم تحتة بقالك سنتين ده ماصطادش جوز حمام ولا سمانتين نطبخ عليهم الغدا - أهو يجيب تمنه

     
  • At Thursday, November 30, 2006, Blogger Ahmed Shokeir said…

    يعني اتي مش ناوية تجبيها البر

    صدق اللي قال

    الزوجة كالدائن تتذكر كل ما قدمته لزوجها

     
  • At Thursday, November 30, 2006, Blogger ahmEd_H said…

    انا ماكنش عندى مانع ان مراتى تشتغل لكن بعد ما قرايت البوست دا انا حاحبسها فى الكهف اقصد فى البيت

    و اعيز اعرف حاجه لامواخذه يعنى لما احنا مابنعرفش امال انتوا اييييه مش كفايه مستحملنكوا
    يا شيخه روحى دا الواحد عامل يتفرج على البنات بره و يقول اصبر يا واد بكره تقع فى واحده تنسيك كل الكلام دا و فى الاخر بيقع فى واحده تطلع عليه القديم و الجديد

     
  • At Thursday, November 30, 2006, Blogger bessan said…

    This comment has been removed by a blog administrator.

     
  • At Thursday, November 30, 2006, Blogger أُكتب بالرصاص said…

    أقولك الصراحة يا اختي
    انا من ساعة ما جبت الرشاش ده وانا نايم تحتيه بادور الزناد فين ، وبعدين ما انا رحت الاردن وبعدها المغرب علشان اصطاد زغاليل...انت ماسمعتيش ضرب النار

    وبعدين ...سؤال في الخباثة كده
    ممكن عنوان الواحدة اللي دخلها مرتين دي!!!
    المثل بتاع المليان يكب على الفاضي ده.ينفع في حمام شعبي...مش في الزواج
    الذمة المالية المستقلة ...مش ده كلامكم بالذمة

     
  • At Thursday, November 30, 2006, Anonymous Anonymous said…

    كفاية كده ياام رحاب

    الناس اتفرجت علينا خوشى جوه
    وشوفى حاجة تانية اكتبها
    صحيح الواحد لو ولع صوابعه شمع
    مش هاترضى

     
  • At Saturday, December 02, 2006, Blogger تمر حنه said…

    الغالى بالأوى شوكير
    لأ أجيبها البر ازاى و اسيب لمين لعبة الفار و القط الأبدية - و ألاقى مين أناغشوا؟ مانتو ينطبق عليكو المثل : مابحبه و مابعيش بلاه
    ايه اتى دى؟ ألا يجيكى اتلى ولا يجيكى اختك؟

    ahmed_h
    لو كنت مش عايزها تشتغل كان من الأول - كنت تنزل البلد و تجيبلك واحدة من ورا الداموسة و تشترط من الأول مفيش شغل يعنى ماتقعدهاش و تجيبها فيا
    و هقولك نصيحة أخت كبيرة يابوحميد - كلهن فى الأول بيبقوا بنات برة و أول مايخشوا جوه بيتبدلوا بقدرة قادر - ماتحاولش القديم و الجديد هيطلع يعنى هيطلع و هتنباس يعنى هتنباس .. يا عباس

    أكتب بالرصاص
    سمعت ضرب النار بس ماكنتش فاكرة انه الفرفر بتاعك - صلاه عالصلاه عيش انت مغربى و اردنى و فى الآخر هتقع فى الكوكو الضعيف المحلى - و بلا ذمة مالية بلا بتاع - خلاص محدش عندو ذمه

    anonymous
    وجججب يا أنونيموس - خلاص هالم الليلة و ننزل الشباب و انتوا نزلوا الشوم - و ندور على حاجة تانية نكتبه

     
  • At Saturday, December 02, 2006, Blogger Aoossa said…

    أنبى كلامك عسل نحل
    نفسى أقعدلك على باب المدونه
    بس أكل العيش هارد
    معكيش تلاته جنيه
    أجيب علبة دخان
    خرمااااااااااااانه

     
  • At Saturday, December 02, 2006, Blogger maged stephen said…

    يعنى لو بس ما كنتيش حلفتينى بالغالى
    الأولى انسحبت من حياتها تدريجيا يمكن تلاقى واحد محسوب علينا راجل يرضى يتجوزها وعايز واحدة تصرف عليه جوز الست يعنى
    التانية بقى كانت أول وأخر مقابلة من حوالى6 شهور قالتلى بتشتغل فى شركة كومبيوتر فى الدقىوانا شقتى فى المعادى اللى يضحك يا تمر حنة أنها يادوب بترد على التليفون أوبيريتر يعنى مش محصلة سكرتيرة على ما تفرج وبتخلص شغلها الساعة 5ونص فى الدقى فأقلتلها يعنى ترجعى البيت حوالى الساعة 7 مساءا ومحتاجة تقريبا ساعة تستريحى تكون الساعة بقت 8 مساء وأنا مش ناوى أتجوز علشان أبتدى أشوف مراتى الساعة 8 مساءا
    وعلى فكرة القاعدة على القهوة مع الأصحاب لذيذة جدا يعنى بنضحك على الهم اللى ما يتلم والتكلفة أقل بكتير من مصاريف الزواج وبعدين أصرارك ده بعيد كل البعد عن تصورى للأسرة ودفء الاسرة اه ياروحى على الأسرة وجمال الاسرة
    عموما ربنا يوفقك فى انسان أحسن منى من اللى بيسألوا أول سؤال اللى أنت مرتبك كام؟
    وده كانت نهاية فرقة عكاشة المسرحية
    ثانيا: أنا متفق معاك يا تمر حنة فى ثانياولم أكن أتصور أنه يعيش فى هذا البلد أى واحدة من الجنس اللطيف دماغها عالية لهذا الحد وده رأيها فعلا فتحياتى لك على الدماغ المتكلفة وعلى فكرة أنا قرأت رأيك هذا من أكتر من يوم وأنا متأسف أنى أتاخرت فى الرد عليك أعذرينى ياتمر حنة المفأجاة كانت جديرة بأن القى اليك بمصنع قبعات وبرانيط مكتوب عليها الحقونى لاقيت واحدة بتفهم فى أم البلد ديه
    وعلى فكرة انا أعنى ما أقوله يعنى ده مش مجاملة عبيطة منى لأنى مش هأستفيد أى حاجة لما أجامل واحدة لا تعرفنى ولا أعرفها لكن مش معاك فى أنك متلخبطة والمهم أنتصرى على الخوف اللى مخليكى مش قادرة تاخدى قرار أنتى عايزة تعيشى ازاى
    أما سؤالك الأخير أنت اللى هتحددى أجابته لما تاخدى قرار أنتى عايزة تعيشى ازاى
    وعلى فكرة مش باتهرب انك تعرفى رأى ماجد الشخصى اللى هو أنى المرأة مهما أسترجلت فى الكلام والتصرفات برده هتلاقيها مليانة احاسيس باللصلصة ومشاعر بالميونيز لكن تصرفاتها المسترجلة هى الى بتخلينى أشعر تجاهها بالاشمئناط النفسى مع مزيد من الانبعاج فى الشخصية ومستحيل تكون مراتى بتدخن مثلا
    انا تقليدى جدا علشان كده مش عارف أتجوز بقالى 4 سنين
    لو حد أتعور من القبعات والبرانيط أوعى تقولى ان انا اللى راميتها
    نهارك جديد بكرتونته

     
  • At Sunday, December 03, 2006, Blogger meho said…

    BEGAD ALLAH YENAWEER 3ALEEKY ,,, POST RA2EE3,,,TA7EYATEE

     
  • At Monday, December 04, 2006, Anonymous أبو رحاب said…

    من أبو رحاب
    بقى ياوليه يا ناقصه تشرشحينى على صفحات الهباب اللى اسمه بلوج ده ... بدل ما تحمدى ربك على الأمله اللى انتى فيها قاعده تهللى وتولولى زى الولاايه يامره يا ناقصه عقل ودين اتلمى وبلاش هرتله وقومى شوفى اللى وراكى بدل ما انتى سايبه البيت يضرب يقلب وقاعده طول النهار لوك... لوك... (من اللك يعنى) على النت.

    ياست الستات كتير جدا من الانسات من عينتك ويمكن احلى واروش قاعدين زى البيت الوقف مستنيين أم العدل وضل الحيطة اللى مش عاجبه جنابك

    يالا يا حلوه بلاش بصر وقومى شوفى اللى وراكى عشان تنامى بدرى بدل ما بتغلبينى الصبح عشان تصحى وماتنسيش تكوى لى القميص البمبى الفاتح عشان عندى خرا اجتماع مهم بكرة

    على فكرة انا رايح القهوة وحاتأخر اضرب حجرين يمكن أنسى الذففت اللى كتبتيه هنا.

    الواد عملها وهو نايم متنسيش تغيريله يا .... قطه

     
  • At Wednesday, December 06, 2006, Blogger spellz said…

    هاهاهاهااهاا
    مام لما قرأت البوست ايدتك و بشدة

    أما انا فاسة عندى امل احقق زاتى فبل ما ييجى وحيد عصره و يشيلنى!!

     
  • At Wednesday, December 06, 2006, Blogger تمر حنه said…

    aoosa
    تلاته جنيه تجيبى علبة دخان؟ تانيه؟ معلش بقى جيبى فرط انهارده لسه ماصطبحناش

    Maged stephen
    يعنى هاعمل ايه بمصنع القبعات و البرانيط ؟ طب ارميتى بجوزين كوارع بتلو ولا حلة ورق عنب 0 و لو حد اتعور هبقى أقول ان أبو رحاب هو اللى رمى الحلة

    meho
    يو آر ويلكم ميهو

    أبو رحاب .. المفترس
    نقدم لكم أيها الساده : الرجل المصرى العجيب : أبو رحاب = موطنه الأصلى : حضن امو - يهوى النكد و افتعال المشاكل - ينظر للمرآة نظرة دونية خالية من التعمق- يتمتع بنرجسية مفرطة و قصر نظر و صلف لا ارادى -عنده شعور غير مبرر بالتميز قدره فائقة على قلب الحقائق
    غالبا من تقترن بأبو رحاب يا اما بتموت بسكتة قلبية مفاجئة أو بتخونه و مع مين ؟ مع أقرب أصدقائه
    ممكن يصحى مراته من النوم : قومى ياولية غيرى للواد فى حين انها تعبانه و دفيانه - أنانى : تايه بين الشغل و القهاوى - من يجده يسربه فى أى خرابه و له مكافأه مجزية - مش بقوللكم الحيطه أحسن

    spellz
    يا بنتى وحيد عصره مش هيشيلك - ده هيشللك - عيشيلك يومين يا سبيلز و فكرى فى وحيد ده فى آخر ثانية يعنى قبل سن اليأس و الحاجات دى عشان تشوفيلك بيبى ولا اتنين
    قبلاتشى لماما

     
  • At Wednesday, December 06, 2006, Blogger maged stephen said…

    كوارع ايه بس يا تمر حنة
    ده التعليق اللى أنت كاتبه فيه
    صلف لا ارادى
    ولا المدبح كله يوفيك حقك
    علىّ اليمين شمال تستاهلى جايزة نوبل فى بهدلة أبو رحاب واللى يتشدد لاهله
    بس هتعملى ايه بجايزة نوبل؟
    منا عارفك هتقوليلهم اللحم الضانى أحسن على الاقل أقدر أعمل دقة بامية لأبو رحاب بس ياكشى يطمر

     
  • At Thursday, December 07, 2006, Blogger قلم جاف said…

    خارج الموضوع :

    أهدي هذه الأغنية لوزير كلكم تعرفوه وأول حرف من اسمه رابسو!

     
  • At Friday, December 08, 2006, Blogger ساكن البعد said…

    عندك حق

     
  • At Sunday, December 10, 2006, Anonymous أبو رحاب said…

    من أبو رحاب المفترى عليه...

    كما توقعت تماما انت مش بس ناقصه عقل ودين لأ وفهم.. وأدب ... الخ الخ كمان
    طبعا واضح أن سعادتك لم تفهمى ما وراء التعليق واندلقت ذى ال.... تكتبى سيل من الجعجعه الأنثويه وسواء نشرتى هذا التعليق أو لم فعلى الأقل حاولى أن تفهمى ما سأقول هذة المرة.

    أن المرأة الشرقيه عموما والمصريه خصوصا هى من تعطى الرجل فرصة قمع ارادتها والمسأله مرتبطه بالموروث الجينى للأنثى الشرقيه بمعنى أن الاستبداد الذكورى مقرون بالاستسلام الأنثوى المتوارث .
    سهله دى ... نقول كمان ..ماشى

    الحل ليس طبعا بالدعوة للتمرد والنشوذ الواضحه فى معظم كتابات سعادتك وارائك المتطرفه الشاذه فى بعض الأحيان -أذا أخذت على محمل الجد-
    وانما بالحوار الهادئ المتزن واستخدام طرق التغيير التدريجى البطئ بالنسبه للأزواج القدامى أو بوضع الأسس السليمه فى بداية الأرتباط بهدوء وثقه بالنفس.

    وأخيرا أذا لم يعجبك كلامى فامسحيه بسرعه وهنيأ لك بالأخوه المطبلين المفتونيين بكتاباتك بلا تفكير ولا حتى فهم

    تحياتى يا قطه

     
  • At Tuesday, December 12, 2006, Blogger تمر حنه said…

    ...رسالة لأبو رحاب
    أمسح كلامك ازاى و هو أكبر دليل على كلامى .. دانتا اللى كنت بدور عليك
    يابو رحاب .. أولا .. أرائى اللى تطلق عليها : متطرفة و شاذه هى نتاج ترشيح حقيقى لمعاناة المرأه المصرية (معرفش غيرها) و التى اما عايشتها أو رأيتها رأى العين – كل ماكتبت لم يكن أبدا ارهاصات مدونة فاضية أو كاتبة محترفة تنتظر مقابل – بل كل كلمة كتبتها كانت بسبب ندبة اما على وجهى أو على وجه أخرى ممن أعرف- فاياك مرة أخرى أن تتهم أرائى بالشذوذ أو التطرف – فلن تطاردنا هنا أيضا يا أبو رحاب و لن نسمح لك بفرض سطوتك على نافذتنا الوحيدة التى تدخل فى حياتنا القليل من الشمس و الهواء الصحى.
    كم عمرك أنت؟ مدى تجربتك؟ ألك أخت متزوجة برجل شرقى؟ ماأخبار الجيران ؟ زميلاتك فى العمل؟ أتمشى فى الشوارع تتابع نظرات الأنهاك البادية على وجوهنا و نحن نسرع الخطى للحاق بأولادنا وقت خروج المدارس بعد انتهاء دوامنا فى العمل أم تكتفى بمشاهدة الوجوه الناضرة على الفضائيات؟ ألم تقف فى شرفتك فى ليلة من ليالى الشتاء البارد لتستنشق نسمة هواء و رأيتنى فى الشرفة المقابلة أنشر ملابس أولادى بعد نومهم و أنا أنتفض بردا؟ ماذا تعرف يا أبو رحاب يامصرى عن مواعيد تطعيمات أولادك – أو مواعيد اختباراتهم أو سلوكهم المدرسى أو هوايتهم أو .......
    ماذا تعرف عنى؟ كم مرة أخذتنى الى الطبيب؟ كم مرة انصفتنى فى أى مناقشة؟ كم مرة أخذت برأيي فى قرار مصيرى يخصك ؟
    و تأتى الآن و تقترح الحوار الهادئ؟ طيب اذا كان الحوار الهادئ يجدى معك فلماذا اذن أنا هنا أبحث عن مأوى دونك – فى البعد الرابع الأفتراضى؟ ترى ما الذى يدفعنى لمجالسة شاشة و أجدها أجدى من محادثتك و ذلك النقاش الهادئ الذى تقترحه؟
    أياك مرة أخرى و الأدعاء بان المرأة الشرقية هى من تعطى الفرصة للرجل لقمعها – لا يابو رحاب فان أستبدادك الذكورى و تربيتك الخاطئة تصم أذنيك عن الحق و تجعل منك أنسانا فظا غليظ القلب – لديك القدرة على تحويل الحوار الهادئ الى معركة و الأسس السليمة الى معاهدات بلفورية .
    و ها أنت تكمل منظومتك المعروفة بتسفيه آراء من هم دون رأيك و تتهم ضيوفى بالتطبيل و عدم الفهم و تتهمنى بنقص الفهم و الأدب - هذا شئ ليس بجديد عليك فانت يا أبا رحاب ستظل هكذا ... و يانا يا أنت

     
  • At Saturday, January 13, 2007, Anonymous fancy said…

    حتى لو سى السيد رفض خروجك للعمل اطلاقا


    تفتكرى دة الحل

    بعد كدة هاتتحول الزوجة لكرسى فالبيت
    لاء كرسى اية الكرسى مرتاح

    هاتبئا خدامة و ياريت هاتعجب

    يا بنمتى كلامك واقعى و ردك الجميل على ابو رحاب ارفع له القبعة و انحنى امام تحليلك

    لكن مين يقدر و مين يعترف

     
  • At Tuesday, June 05, 2007, Anonymous Anonymous said…

    هي مش حرب
    سهل تحبي تقومي تتحبي
    أسهل تكرهي تقومي تتكرهي

    أنا بأقول المعروف أحسن
    لو انت صغيره صارحي
    لو انت كبيره يا تستحملي ياتهدي المعبد

    لكل فعل رد فعل
    ازرع خيار تلاقي خيار
    ازرع منجه تلاقي منجه

    أول مره أكتب في بلوجات

    بس يمكن اسلوبك
    ولا الموضوع

     
  • At Saturday, June 23, 2007, Blogger emad said…

    بجد بجد بجد

    انتي طيبة قوى

     

Post a Comment

Links to this post:

Create a Link

<< Home