أيوه خدامه

Saturday, December 02, 2006

سلامة قلبك .... يا وطن






قلبى عالوطن مجروح .. أماالوطن فقدمات اكلينيكيا منذ زمن. واااه وطناه ..... واااااااه وطناه
العين تبكى و القلب يدمى .... قتلوك يا كبدى .. قتلوك ياحته منى - ياناس ياللى بتشّرحوا ا فيه - كفاياكم بقى .. ارفعوا سكاكينكم .. خلاص ماعدش قادر يقوم - ماعدش قادر يقول آه.
ياناس ياللى بتقتلوا وطنى خلاص الكيل طفح .. محدش يقول لى كله تمام .. محدش يطلع و ايده ورا ضهره ماسك سكينته اللى متعاصه دم و يقول لى ... عزيزتى المواطنه اتطمنى - افهم : مش مصدقاك.. مش متطمنه.. مابثقش فيك..
أما افتح التليفزيون و ييجى الباشا بتاع المرور قدام المذيع (على قناة المحور) و يصر ان الحركة المرورية زى الفل و انه بنفسه بيتابع أمن و سلامة السيارات و انه مفيش عربية بتترخص بدون اجراء اختبارات نسبة العادم و كل السيارات بتبوظ بعد الفحص مباشرة للأسف - لما يقول بنزل بنفسى أسحب رخص السيارات اللى بتستعمل آلات التنبيه بدون سبب و خصوصا الأفراح - لما يقول انه الشارع المصرى مروريا بخير مع وجود طايفه عويلة اسمها : سواقين الميكروباصات اللى حقيقى لو ليّا ويل عليهم أعدمهم رميا بالرصاص فى ميدان عام يبقى ايه؟؟؟ يبقى كداب .. كداب .. كداب - لأ .. و قاتل و مسئول عن أذية أولاد وطنى - عارفين ده بياخد كام فى الشهر؟؟ اللى يعرف ياريت يقول - أنا بسمع أرقام فلكية ممكن تستّر أربعين عروسة فى الشهر
.
لما ابنى اللى فى رابعة ابتدائى فى مدرسة لغات دافعة فيها دم قلبى أضطر أديله دروس خصوصية فى كل المواد عشان يبقى بنى آدم - يبقى نظام التعليم فاشل و عقيم و اللى وضع النظام ده لازم يتعلم من أول و جديد

لما أعوز أستخرج ورقة رسمية لأى سبب :هى حاجة من اتنين : يا اما أبقى "لطيفة جدا " مع الموظف و أدلع فيه يا أما أبرز له اللى فيه القسمه و تخلص الشغلانه يبقى : سحقا للنظام الأدارى
لما يبقى لى مستحقات تبع أى وزارة : موظفوا الحكومة يبقى لهم نسبة محدده منه- عينى عينك - مقابل اعتماد مستحقاتى و صرفها يبقى ايه؟

لما بلد فيها أكتر من تلت آثار العالم و مالهاش وزارة آثار و ليس لها ترتيب حتى على مستوى الدول السياحية - و كل الذى يشغل السيد وزير الثقافة الرايق جدا الأفتاء الدينى : شعر المرأه و تاج الزهور اللى فوق راسها و الحجاب الداخلى و الخارجى و التيوبلس - واضح انه فعلا فاضى - ماتسيبوه يتنحى و يتفرغ للرسم و التأمل

لما مجلس الشعب يسيب البلاوى المتلتلة اللى خانقانا و دابحة الوطن و كل "عضو" ماسك ميكروفون و بيحزق أوى :مش من حق الوزير الفنان اهانة الدين ... الوزير مسئول عن تصريحاته الشخصية ....الوزير .... لاهو انتو لسه صاحيين من النوم دلوقتى ؟ طب لا هو السيد وزير الأعلام ما أهانش الدين لما بيعتمد على الغوازى فى أعلامنا المغوار فى جميع الشهور و خاصة شهر رمضان المعظم ؟ دمكوا حمى قوى من كلام الفنان- اللى من حوله ألف علامة استفهام من عشرين عام و نيف؟ لاهو الرشاوى اللى عينى عينك دى مش اهانه للدين يا مجلس الشعب؟ لاهو قتل النفس التى حرم الله الا بالحق ( عن طريق المياه الملوثة و عوادم السيارات و المحاصيل المسرطنة ) مش اهانه للدين يا حضرات "الأعضاء" - لاهو كذب جميع المسئولين علينا كل طلعة شمس مش حرام يا باشواااااات؟

لماواحدة زى سعدية جاد المولى جايه شايله ضناها على قلبها من الصعيد و جايه تعالجه فى معهد الأورام لأنه عنده سرطان و بيضيع أمام عينيها و مالوش سرير ينام عليه و تفرش له بطانية فى ممر الدور الخامس - أطفال مجانى- و طول الليل شايله الدريب اللى فيه الكيماوى - فى حين لو ابن واحد منكم طلعت له فسفوسه فى "....." ياخده يطير بيه على جوستاف روسى حتى نقر عينه - مش ده اهانة للدين يا مشايخ.

لما بنت عندها اتنين و تلاتين سنه لا تملك حتى تمن فستان فرح و تلاجه نص عمر و مصابة بكل أمراض الدنيا النفسية من جراء كبت عدم الزواج و انتم أيها الساده الأعضاء مايتبقى من موائد أفراح بناتكم يلقى فى مقالب الزبالة - مش اهانة للدين يا ممثلوا الشعب الأفاضل؟

معقول مش حاسيين بالوطن للدرجة دى؟ مش حاسيين بغليان؟ بلاش تقروا صحف المعارضة - اتكلموا مع الناس اللى فى الشارع - الناس اللى اختاروكوا - روحوا الجامعة و شوفوا الأمن المركزى بعتاده لقمع صراخ أولادنا ولا انتوا مابتعدوش من هناك؟ و بتاخدوها دايرى للتجمع الخامس؟

أرفعوا معاولكم عن عظام وطنى - اتركوه بقى .. اتركونا نمسح دمعاته و نضمد جراحه
أنا مفيش فى أيدى أى حاجة ... بس بقولها أهو و الله على ما أقول شهيد : سأختصم أمام الله يوم المشهد العظيم يوم تشخص فيه الأبصار .. سأطالب بحق أولادى و أولاد الناس الغلابة اللى عايشين على أرض وطنى ... سأطالب بحق سعدية جاد المولى و ابنها .. سأطالب بحق كل شاب قتلتوا فيه الحياه و سلبتوه حقه المشروع فى ممارسة حياته كأنسان محترم أو حتى كحيوان من حقه افراغ شهوته شرعا .. سأطالب بالثأر منكم لدفع بناتنا للزنا و الزواج العرفى ....فلنلتقى هناك حيث لا ينفع لا مال ولا كراسى .

Labels:

25 Comments:

  • At Saturday, December 02, 2006, Blogger maged stephen said…

    مش عارف اكتب لك تعليق بس هأرجع لك تانى

     
  • At Saturday, December 02, 2006, Blogger يا مراكبي said…

    جايز مايكونش في إيدك الفعل لكن إنت معاكي الكلمة .. هي صحيح أضعف الإيمان .. بس أحسن من لا شىء

    يوم الحساب مش بعيد أوي زي ما هما فاكرين والإختصام قدام ربنا هايكون رهيب .. بس هما مش مهتمين .. ماشي .. يمهل ولا يهمل

    تحياتي من واحد مسافر وسايب أب مسن كان نفسه يقعد مع أولاده وأحفاده بعد المعاش .. بس مش قادر يقوللي خليك هنا جنبي ماتسافرش

     
  • At Saturday, December 02, 2006, Anonymous Anonymous said…

    طب ياتمرمر ممكن أضيف كام حاجة صغنتتة أنا كمان ؟
    إشمعنى انتي يتحرئ دمك وانا لأ ؟
    لما اركب عربة السيدات ف مترو الأنفاق ، و ريحة البطاط تبأة مفحفحة و هايغمى عليَّ ، يبأة إيه الحل ؟ بلاش حموم ياستي منك ليها ، بس حتة شابَّة م الصيدلية ولاَّ العطار هتحل المشكلة
    ولاَّ اما اروح السنترال ، و ائـَفْ ف الطابور ، و واحد يجي باستهبال يحسد عليه ، يدخل أدامي ف الطابور ، بحجة إنه مش هيعطلني ، دة بس هيسأل الموظفة سؤال !!! ياحضرة من فضلك خد دورك ف الطابور . يروح مبجح و مطنطن بالكلام ، ويحكيلك قصة حياته وعذاباته المستمرة مع سنترال الهرم وسنترال المريوطية . ياعم وانا مالي بدة كله ؟ يروح مفاجئك بخطة المثل الشهير : كلم ال.... تلهيك ، اللي فيها تجيبه فيك !!! ولاَّ طنط الخدامة ؟ أوه ... دي بأة يتفرد لها بوست لوحده ، زي ماانتي عملتي . ياتمرمر كل دة موجود ، بس وماله ؟ مص هيَّ أمي . ياجمالها

     
  • At Saturday, December 02, 2006, Anonymous Anonymous said…

    كلبوزة لكن سمباتيك
    سلامته الف سلامة
    الوطن الغلبان اللي مش عارف يلاقيها من الحكومة و لا من الشعب و لا من ازمة الضمير

    اسكتي مش انا متمرمطة في البيتا بلوجر الجديد
    سرقوا هدومي و مش عارفة ادخل اسيب كومنت باسمي
    --
    بيتا اونطا عايزين فلوسنا

     
  • At Saturday, December 02, 2006, Anonymous Anonymous said…

    السيدة تمر حنة

    الحق الحق وصف تشريحى لمعاناة مواطنى الطبقه المتوسطه تحسدى على دقته

    أما من حيث قدرتك على الفعل فهى عظيمة ، ان تمكنتى من تعلميك ابنك (غير تعليمه ابو 4000ج من غير الدروس الله يكون فى عونك)أن يقيم دولة الله فى نفسه والا يحيد عن الحق لو فيه حتفه اطال الله عمره وانت كونى انت واباه قدوتة فى ذلك

    لا يغير الله ما بقوم حتى يغيروا ما بانفسم ، وكيفا تكونى يولى عليكم

     
  • At Saturday, December 02, 2006, Blogger مُصْعَب إِبْرَاهِيم said…

    قلب الوطن مجروح

     
  • At Saturday, December 02, 2006, Anonymous Anonymous said…

    موجعة اوي
    عشان ده اللي قايمين نايمين علي ده الحال

    حاجة تحزن

    وحاطين ايدنا علي خدنا
    :(

     
  • At Saturday, December 02, 2006, Blogger FATMA said…

    كل حتة في الوطن مجروحة و موجوعة

     
  • At Sunday, December 03, 2006, Blogger Enbee said…

    كله مظبوط وكلامك مرآة للواقع المصري المشهوه ..ورغم كل المصايب اللي الناس عايشاها ليل ونهار اقتصادية واجتماعية وثقافات العشوائيات اللي بتتسرب من الاعلام وبقت هي القاعدة لما سمعة المصري في الخارج بقت زي الزفت - العنب العنب والرقاصة اللي رقصها يخلي الواحد عايز يرجع .. تلاقي المصري ما يرحمش المصري اللي زيه ... تلاقي الظابط في نهاية السنة لما يلاقي انو ما حققش التارجت بتاعه من ضبط المجرمين والقضايا ( علشان يتخلص من معاناته هو كمان ) تلاقيه يلم أي حد من الشارع تحري ويلبسه قضية - حمل سلاح - مخدرات أي قضايا تكون عنده مقيدة ضد مجهول علشان يطلع قدام القيادة الباشا الهمام حامي حمى الديار المصرية ويترقى ...أخويا كان هيروح في داهية في واحدة من دول لولا معجزة إلهية أنقذت مستقبله من الضياع ويطلع الضابط قريب جيرانا - في صدفة ما بتحصلش غير واحد في المليون - ... مصر حالتها ساءت لدرجة إن حتى المشي جنب الحيط ما بقاش ينفع

    تحياتي ...

     
  • At Sunday, December 03, 2006, Blogger moony said…

    ياه انا كنت لسه بينى وبين نفسي قبل مدخل البلوج بتاعك عماله افكر في حال البلد والشباب الغلبان و مصيرنا .ودخلت عندك و قريت اللي كتباه زوتي همي وحسيت ان الكل فعلا قرب يطرشق اذا مكنتش في ناس طرشقت فعلا.

     
  • At Sunday, December 03, 2006, Blogger admelmasry said…

    انا قولت اجي اسلم عشان واحشنتيني ياجميل


    بجد بجد ماليش وحشة ؟

     
  • At Sunday, December 03, 2006, Blogger elkamhawi said…

    ممكن تتلم بشاش ومكركروم انا جربت وبرده مفيش فايدة مفيش فايدة

     
  • At Monday, December 04, 2006, Anonymous Anonymous said…

    That almost brought tears to my eyes.

     
  • At Monday, December 04, 2006, Blogger Adel said…

    اختشي سودتيها اكتر ما هي سودة تشكري اصلها كانت ناقصة تفكرينا



    عارفة اكتر حاجة مزعلاني ايه ان انا طالع لي بدون ارادة مني يعني غصب عنى دقن وشنب ومن ده كتير كلنا شنبات بس للاسف لبسنا الطُرح منهم لله
    اشوف فيهم يوم
    قادر يهدهم
    عاوزة منى ايه تاني انا هاجي في العزاء بتاع الوطن وارقع لك كام صوت اهو يبقى اسمنا عملنا حاجة بدل ما احنا حاطين ايدينا على خدنا


    امسحي دموعك يا امال








    لا دي من السيجارة
    شادية

     
  • At Monday, December 04, 2006, Anonymous Anonymous said…

    والله حرم كفاية كده
    اكتب وانا ابكى ولم اسط

     
  • At Tuesday, December 05, 2006, Blogger ام العيال said…

    ليه يا تمرمر عامله في نفسك كده
    ما تهريش في نفسك و لا يستهلو و تلاقيهم و لا عابلهم الي بيحصل في الشعب الغلبان ده
    يوم القيامه يوم العدل و القصاص
    وكل الي لي حق حياخدو
    المأساه لما تكون البهدله على ارضك ف بلدك و من ناسك
    دي كارثه
    بس برضو في امل و فيه ناس كويسه
    و ربني رحمه وست كل شئ

    ازاى ابو رحاب
    رضيتي عنو و لا

     
  • At Tuesday, December 05, 2006, Blogger tota said…

    تمر حنة

    عارفة المرارة لما تملى الحلق وتبقى هو ده طعم الدنيا
    عارفة لما تكونى فاكرة ان الوطن اللى الجروح ملته وانهكه التعب لسه فى امل انه يعيش
    عارفة لما يبقى جواكى رفض فظيع لموت حد غالى عليكى ومش مستوعبة غيابه

    عارفة كل ده حسيته مع قراءة كلماتك
    بس اللى فزعنى ان معدش عندى امل
    بصيت لجسد وطنى لاقيت انفاسه بتنسحب بهدوء ونظرة العين كان كلها لوم وكانها بتقول انا اتعذبت قدامكم ومحدش مد ايد وساعدنى كل ايد كنت فاكرة انها هتساعدنى كانت بتغرز خنجر علشان تعجل بموتى

    عارفة يعنى ايه ان الوطن يموت جواكى
    ؟؟؟؟؟؟؟؟؟

     
  • At Tuesday, December 05, 2006, Blogger Ahmoss said…

    This is really Sad ,,, But I want to ask you a very imp question.
    How can we change those facts , is it by changing ourselves or changing the government ??

    Regards

     
  • At Tuesday, December 05, 2006, Blogger الزعيـمة said…

    كلنا تعبانين ومش هاين علينا الحالة الوصلنالها

    كنت ناصرية ولا احب عصر السادات مع انى لا عشت دا ولا دا

    بس الوقتي لو جه الاحتلال الانجليزي حتي حعمله فرح واعتبرة انتصااااااار

    خلاص بجد الدنيا فعلا سوده اصل مفيش حاجة كويسة وحاجة وحشة عشان نتصبر بالكويس ونحاول نصلح الوحش
    كلللللللة وحش الوقتي

    من اقتصاد لمجتمع لسياسة لحتى الدين
    مفيش حاجة ماشية صح زي ما يرضي ربنا

    يلا يا تمر حنة حطي همك على هم الـ 75 مليون
    ولا تلاقيهم بقوا 80 مليون الوقتي

    مش عارفة بتخلفوا على اية وليكوا نفس ازاى

     
  • At Tuesday, December 05, 2006, Blogger قلم جاف said…

    يحدث في مصر فقط :

    -الحكومة المصرية تدعم الدروس الخصوصية ، فمن غير أن تدري الوزارة الرابسوفية ، فإن كتب الوزارة هي نفسها المادة الخام للدروس الخصوصية ، الكتاب المدعوم بأموال الضرائب ينقله المدرسون بحذافيره مع كتب أخرى ويباع كمذكرات بالشيء الفلاني!

    -الحكومة المصرية كانت هي الداعم بشكل غير مباشر لتربية الفراخ في مصر .. لييييه؟ لأن الخبز المدعوم الذي يفترض أن يكون مخصصاً للآدميين يشتريه العديد من الناس كغذاء رخيص ومدعوم للفراخ!

    -طريق المنصورة دمياط من الطرق المسلية واللذيذة جداً ، ولا تستغربي لو وجدتِ فيه عدداً من أعمدة الإنارة الكهربية بجانب بعضها - ليلاً - غير مضاءة ، وربما كان بعضها - لسنوات - خال من المصابيح!

    -وزارة البيئة لا تعرف شيئاً عن حفلات الحريق اليومية للمخلفات الحيوانية على الطرق الزراعية في مصر .. بسبب هذه العادة المتخلفة أصبح "دوار الطريق" - القيء أثناء السفر - مثل الأنفلونزا تماماً..

    -لا يتعامل البيروقراط ولا السائقون بجدية مع مسألة السلامة والأمان في سيارات الأجرة .. ورغم تكرار حوادث السير إلا أن هذا لم يحرك ساكناً لدى السلطات ، حتى وإن حرك فسيعتبر السائقون ذلك "ظلماً وعدواناً" من الحكومة عليهم!

    -من المشاهد العادية في مصر أن تخلو بعض العيادات والمستشفيات من الأطباء في قسم معين .. رغم أنهم في "البيت بيتهم" يقولون أن الأطباء كثيرون جداً وعلى قفا من يشيل ويتضرب عليه!

    سنموت ضحكاً ربما على فضائح كتلك نعيش فيها لتقتلنا!

     
  • At Tuesday, December 05, 2006, Blogger الأميره أوسه said…

    الله يرحم الوطن
    ياترى الأجيال الجديده حظها هايكون أيه
    أبو الهول متخيلاه بيهز دماغه وبيقول
    مفيش فايده
    يا خساره يا بلد
    يا خسارة أحلام معرفناش نحقق منها أى حاجه
    وأيام بنعيشها أبيض وأسود
    مفيش ألواااااان يا سعاااااد

     
  • At Wednesday, December 06, 2006, Blogger تمر حنه said…

    عذرا بنو وطنى - ماليش نفس أكتب - ماليش نفس أرد على تعليقات - احنا كلنا مشتركين فى ذات المعاناه و دمنا اللى بينزف كله فصيله واحده
    مش شايفة غير بصيص نور جاى من بعييييييد
    ايه ياترى؟ ياترى ألمانيا بتفكر تحتل مصر؟ جايز؟
    ياترى الدنمارك ؟ ياريت
    اسمعوا آخر خبر :
    ادارة المرور بوزارة الداخلية تستعين ببيت خبرة أجنبى لحل مشكلة الأختناق المرورى بالقاهرة الكبرى
    ماحنا بنقول كده :
    نستعين بالله ثم نستعين ببيوت خبرة أجنبية فى كل حاجة و خلوها بمزاجكوا - و ان جالك الغصب خدوا بالرضا
    و اهو بالمرة نحسن النسل و الأجيال الجاية تطلع بشعر أصفر و عيون زرقا - بركاتك يا لويس يا تاسع عشر يمكن تطلع أفكه من أبو رحاب

     
  • At Wednesday, December 06, 2006, Blogger وجهة نظري said…

    أعيط والا أصوت.... انتى اتكلمتى عن نص الحقيقة... النص التانى ان البلد كلها بتمثل على بعض، أحزاب مزيفه، الى جه بالأنتخاب مزيف والى جه غصب عننا مزيف, الحكومع مزيفه والشركات مزيفه والهيئات مزيفه والشعب بقى عامل زى قطيع الخرفان, شمال شمال، يمين يمين .... دا كله كوم وسمعتنا فى العالم كوم تانى خالصصصصص..... دا حتى الكويته والسعوديين بيتريقوا علينا دلوقتى!!!! شوفتى المصيبه السودا؟؟ والمضمون واحد, والمقصود من كل دا واحد... والنتيجه المطلوبه واحده والناس كلها عارفاها ولما نتنطط مش حتتغير.

     
  • At Thursday, December 07, 2006, Blogger قلم جاف said…

    الاستعانة بالإنجليز والفرنسيس صار لها ما يبررها ..

    فللأسف ، لا يزال لدى البعض من مرضى جنون العظمة في النظام البيروقراطي المصري وخارجه الجرأة على القول بأننا نقوم بكل شيء "على أعلى مستوى" .. فالمستشفيات على أعلى مستوى بدليل أنني ذهبت لأحد أكبر المستشفيات الجامعية في مدينتي قبل أيام لخلع ضرس لأجد قطناً ملوثاً بالدماء موجوداً على "الشيزلونج" الذي يفترض بي الجلوس عليه لخلع المحروس!.. والظريف في الوضع أنهم يطالبونني بشراء جوانتي بخمسين قرش.. ليه؟ الله أعلم!

    ويطلعلك كل شوية في التليفزيون واحد زي مجاذيب الحسين يقول : اتقوا الله في مصر ، مصر مستهدفة ، لدينا كوادر على أعلى مستوى!

    لو بقى خدنا على كلام البيه المجذوب المحترم حنلاقي إن البناء على أعلى مستوى ، الصحة على أعلى مستوى ، التعليم على أعلى مستوى .. واحنا بقى اللي ولاد (#@$@#$) ومبنفهمش وبنتبطر على نعمة الأعلى مستوى!

    أن يأتي من يأتي كاتباً في "عموتشه" - عفواً عموده في "الصفيحة" التي يكتب فيها مستنكراً وشاجباً للحملة الفرنسية على الشوارع المصرية ، وهذا ما لا أستبعده .. فهذا هو حقاً "أعلى مستوى" في الاستعباط ولي الحقائق والكذب على خلق الله..

    تاريخياً : الأجانب صمموا شوارع مصر الجديدة التاريخية ، وبورسعيد القديمة ، ورأس البر .. اللي بنتعايق بيها أدام الأجانب ونقولك أبصار إيه حوار الثقافات وتلاحم الحضارات ، البيروقراط بقى صمموا إيه إن شاء الله؟

    وإلى أنصار بيروقراطستان أهدي أغنية محمد محيي : حاولت تعمل حاجة؟ قدرت تعمل إيه؟

     
  • At Saturday, December 09, 2006, Anonymous Anonymous said…

    دعوة لرد الاعتبار للشعب المصري وشهدائه في الذكري الثلاثين لانتفاضة يناير 1977

     

Post a Comment

<< Home