أيوه خدامه

Saturday, December 09, 2006

ابقى أغسل المواعين .... يا هركيليز




ألف مبروك .. أخيرا وقفت المرأة المصرية موقف رائع و مشرف ...
وقفت فى وجه الرجل الطاغية المفترس .. فى شمم و إباء وعزة نفس .. قائلة :
الحلة عالوابور عشى عيالك .. أنا رايحه بيت أبويا مش راجعالك
هنيئا لك أختاه .. فقد كتبتى أول سطر فى وثيقة حريتك بحروف من ذهب

أيام زمان كان ميثاق الزواج الغير مكتوب : أغلِبِيه بالعيال .. يغلبك بالمال أما دلوقتى الكلام ده مش مظبوط :
الحقيقة ان الراجل هو اللى بيربط الست بالعيال – يبقى بعد الدخله لو اتأخرت الست فى الخلفة ست شهور مش طايقها و مش طايق الدنيا كلها – عايز بطنها تقب و لامؤاخذه - و ياخدها يتمشى معاها افرنجى على كوبرى عباس و كأنه هيكليز اللى بهيظ الفهايص (عباره يطلقها الشاب الروش افتخارا بنفسه ومعناها : انا اللى جعلت الجميع يغيب عن الوعى) و بعد الوضع و مجابهة الحياة الأسرية الجديدة و افتقار هيركليز الى حتة ناشفة فى البيت كله يستكنيص فيها يبدأ فى العط الخارجى هروبا من قلبة المخ .. تتخيل المسكينة انها : زينه و انها يجب أن تبدأ خطة انتقامية مضادة لجلب زوجها تارة أخرى للعشة و تستمع بمنتهى البلاهة لنصائح مامتها و خالاتها و تسرع بمخاوية الواد عشان مايطلعش وحيد و تكون بهذه الفعلة الشنعاء كمن يطفئ النار بالبنزين .
غالبا بقى العيل التالت بييجى نتيجة غلطة حسابات أو حمل عالشريط – دايما بيقولوا كده- و الحياة تبدأ تأتم (لفظ يعنى الغلاسه والرخامه واللون القاتم للحياة)
المهم ماطولش عليكوا – قولوا طوّلى – هيركليز يبتدى يعمل مقدمات ثم يبلغ فرار و يدور بقى على طموحاته الحياتيه المختلفة المناحى خارج الاطار الأسرى :
عايز يبتدى حياته العملية من أول و جديد بس عدم الأستقرار اللى فى البيت موتره
أو عايز يتعرف بأوكشة يفهمها و تفهمه لأن زينة خلاص اتهطلت من قلة النوم و العيال طيروا البرج اللى ناقص فى نافوخها-
ممكن كمان يحاول يجرب حياته برة البلد دى لأن البلد دى مابتقدرش الأفذاذ اللى زيه و يقدم على هجرة و ده طبعا يا كبدى كله شقا عشان العيال و أمهم اللى تحولوا الى مستهلكين و موارد الدولة كلها مش مكفياهم– باختصار ذرائع الحاج هيركيليز مابتخلصش و قدرته على اعطاء المبررات تبهرك – بل و تجعلك تطلع آخر اتنين جنيه شايلهم للمواصلات فى جيبك و تدسهم فى ايده عن رضا و اقتناع و انت عينيك تفيض بالدموع .
و يبدأ هيركليز فى الحلاقة للماضى (لفظ لا يعنى الذهاب الى الحلاق لقص الشعر ولكنه يفيد تجاهل الماضى بمفرداته و كأنه لا يستحق)
أما العيال فى هذه المرحلة فلن يمثلوا عبئا أو حجر عثرة فى طريق انطلاقاته : فهو ممكن يسافر و يبعتلهم كل شهر اللى فيه القسمة و هو مطمئن تمام الأطمئنان ان زينة شايلاهم فى عنيها بل وممتنة غاية الأمتنان للراجل الشقيان عشان خاطرهم – و هو فى الحقيقة يبدأ حياته من أول و جديد على ميه بيضا ( لفظ قهاوى يفيد ان الشاى معمول أمام عينيك منذ أول مراحله-على نضافة) كأى شاب بِكر سوبر فريش- و غالبا ماتدفعه الوحدة القاسية أو رغبته فى أخذ الجنسية الى قرار سياسى .. ياحرام بياخده و هو مضطر: انه لازم يتجوز – هيعمل ايه؟ مرغم ياحبة عين أمه.
ابّان هذه الحقبة تصل زينة الى أقصى درجات التعب النفسى و ينتابها شعور حاد بأن الحياة فى الأمبلايز (مصطلح بمعنى أن الموضوع الذى سعت من أجله لم يتم ، او تعبت علي الفاضى ، وتقال " الحياة في الامبلايز " اى ان الحياة خربانة وفاشلة) لا عارفة ترمى الحمل على حد و لو طلبت الطلاق مين اللى هيتجوزها و يشيل هم ولادها ؟ حتى الخروجة أو المصيف بيتحولوا لمسلسل شقاء و شيل و حط .. تعمل ايه زينة الحزينة .. تروح فين و تيجى منين؟
الحل هو : الحلة عالوابور عشى عيالك – لازم يرجع يشيل مسئولية عياله – و ان مارجعش روحوا له – فهيركليز يشعر ان مسئولياته تجاه أولاده تنحصر فى شيئين : أولهما : المساعدة المهولة فى تكوين الجنين فى بطن الأم – و الله يشكر و كتر خيره و الثانية : مبلغ مساعدة شهرى يمثل جزء يسير من دخله أما باقى مفردات التربية فهى مسئولية زينة الحزينة – يا زينة كفاياكى تضحية و فوقى – بيت أبوكى يساعك أما أنت ياهيركليز فياريت تغسل المواعين بعد ماتعشى العيال
.
ملحوزة : هيركليز ده يمثل نسبة ضئيلة من الرجال – فهو حقا معدوم النخوة.

45 Comments:

  • At Saturday, December 09, 2006, Blogger عمر said…

    الحركة الشعبية لتطوير الدكر ("يا لهوي يانا")

    البيان التأسيسي

    نحن مجموعة من دكرة مصر المتدهولة قد هالنا ما آل إليه حال الدكر المصري من خيبة تقيلة يعلمها القاصي والداني

    وقد اتفقنا جميعا علي اختلاف اهواءنا وادمغتنا علي ان هذا الهوان ما هو الا نتاج سنوات طويلة من الخضوع للقهر الأنثوي التآمري الكيدي

    وعلي هذا قررنا توحيد صفوف الدكرة في بر مصر ، سواء من أهل بحري أو من الصعيد أو من العريش الحرة أو من بورسعيد.. في وجه الخطر الداهم يجمعنا شعار واحد (يا لهوي يانا) صرخة مكتومة تنطلق من الأعماق إلي الآفاق معلنة نهاية عصر الاستعباد والتفافنا حول مطالبنا المشروعة بكل بقي لنا من قوة:

    أولا: استعادة هيبة كل دكر فيكي يا مصر من أتخن برم إلي أهفأ هفأ

    ثانيا: منع النساء من ممارسة العادات التالية:
    - استخدام الشبشب قدام الأولاد
    - استخدام مصطلح (ما تهز طولك) لو فيه ضيوف في البيت
    - في حالات الاخفاق المتكرر، يحظر حظرا تاما استخدام تعبيرات (يا خيبتك التقيلة) أو (يا وكستي) حفاظا علي مشاعرنا المرهفة.. وبعدين عيب كدة يعني ما يصحش
    - تستبدل كلمة "امك" بكلمة "تانت" في جميع الاستخدامات (مثال: يا حيلة أمك--- تصبح: يا حيلة تانت)

    ثالثا: يحظر علي الرجال القيام بالأعمال التالية والتي لا تتناسب مع دكورتهم:
    - تقميع البامية
    - تخريط الملوخية
    - أخذ الغسيل فمين (يجوز أخذه فم واحد)
    - كل ما سبق باستثناء طبعا إذا المدام أصرت.. كما انه ليس هناك مانع من تنقية الرز لزوم عمايل المحشي

    هذا ونهيب بكل الأنظمة الأنثوية السلطوية أنه لا تراجع عن تلك المطالب ونقولها بكل عزم وقوة: هأو.. فلا تخدعنكم المظاهر بعد اليوم فنحن حلوين قوي وميت فل و14 وساعة الجد بنقول يا فكيك

     
  • At Saturday, December 09, 2006, Anonymous فلة said…

    هههههههههه
    حلوة الفكرة وعاجباني خالص
    ح ابقى اخليه يغسل المواعين
    ويقعد لي في البيت
    مانا مش فاضية عندي شغل بردو

     
  • At Saturday, December 09, 2006, Blogger khalid jarrar said…

    la2 ba2a ya tamr 7inna, awwalan yis3id 9aba7ik :)
    thaniyan, waradat typo basee6a fee post 7adritik 2olti ملحوزة : هيركليز ده يمثل نسبة ضئيلة من الرجال – فهو حقا معدوم النخوة.
    o il 9a7ee7: yomathil nisba min il "thokoor", howwa min imta kol thakar ragil?
    la yastawiyan!
    mathal 3iraqi ma 7addish 7a yifhamo: ishjab ichillaq liddolma?

     
  • At Saturday, December 09, 2006, Blogger Epitaph said…

    ههههههههه

    حلو التهديد ده
    اغسل المواعين بعد ما تعشي العيال

    منكم نستفيد برضه


    بس ايه القرار الجمهوري اللي عمر عامله ده
    ههههههه

     
  • At Saturday, December 09, 2006, Blogger يا مراكبي said…

    ياخواننا ماتخاقوش قوي كده .. تمر حنة بتتكلم عن حالة خاصة جدا ونادرة جدا .. أنا ماشفتش منها في حياتي غير يادوب 100 حالة من ال 120 اللي أنا أعرفهم (باهزر طبعا).. بس حقيقي أحلى حاجة في البوست ده هي المفردات الحديثة المستخدمة مع شرح لمعاني الكلمات .. أنا هاسجل كل الكلمات الجديدة دي تمهيدا لإصدار قاموس في المستقبل مع حفظ حقوق المؤلفة

     
  • At Saturday, December 09, 2006, Blogger tota said…

    تمر
    الوصف الدقيق الواقعى لحالات متكررة يمثلها هركليز مؤلم جدا
    واعزار هركليز غير مقنعة ومبرراته للبحث عن زينا اخرى ليس لان زينا اصبحت مشغولة عنه وانها فرطت فى حقها كأنثى لتصبح فقط اماً
    فسقوط المسئوليه عليها وحدها ليكتفى هو بدور المحفظة هو ما دفعها بسهولة لتصبح هكذا مما يعطيه المبرر ليحقق هدفه بسهولة
    والحق ان هركليز بنزعته الذكورية يميل ان يحصل على اكثر من زينا للمتعة وهذا هو المغزى الوحيد لكل تصرفاته
    الحل اللى اقترحتيه هايل وعلى زينا ان تعرف متى تستخدمه ليعلم هركليز انه ليس الاقوى وان القوة مش فى العضلات
    زينا ممكن تسيب الحلة على الوابور ومش مهم الاكل يتحرق ما عدتش تفرق كتير

    تحياتى على البساطة والموضوعية

     
  • At Saturday, December 09, 2006, Blogger yasser_auf said…

    الله يكرمك يعني ريسيت علي اننا الي حنغسل المواعين و كمان اما الوابور يا شجرة الدر ... و نعشي العيال يا حتشبسوت ... صدق من قال انكم عاوزين حش رقبيكم و بعدين مالهم العيال يعني هو الراجل كان جابهم لواحدة ما انتم جبتوهم معاه برضة ... بطلوا شقاوة باليلي و اتشاقوا علي قدكم لا ترهقوا صحتكم و لا رجالتكم بكتر العيال تعيشوا مرتاحين و بعدين اية حكاية عند ابويا دي طب ما تاخدي خلفتك معاكي يا اختي ... سيباهملي لية
    انا و عن تجربة حية قالتلي عند ابويا ( بس اخدت الولد لانة كان لسة بيبي ) و الله و لا عربتها ... هي كمان ما عبرتنيش ... و لا سائلت و انا مسالتش ... الي ان هدائت الامور ... و لما جة والدها يتدخل و عاوز يعملي عمدة و يلملي اهل الخير كلا بكلمة ... قلتلة بالحرف الواحد يبقي نويت علي خراب بيت بنتك ... عاوزة ترجع اهلين و سهلين ... عاوزين لمة و طهرو نفرج علينا فية الناس ... قلي ابعتلكم العفش علي فين و نظرا لان بنتة اعقل منة اتكلمنا و تحدثنا و صفينا الموقف ... بس ما اتكلمتش انا و اهلها من يوميها ....مع العلم ان مشكلتنا كانت اني مرتب عنها منظم عنها ... و مع الاسف كنت براعيها زيادة عن اللزوم عملا بالمثل بنات الناس موش خدامين اهلك و الي ما ترضهوش علي اختك ما ترضهوش علي زوجتك ... و من يوميها كبرت دماغي و سبتلها البيت يضرب يقلب ... بقيت تتكسف علي دمها و ابتديت تتغير هي للاحسن

     
  • At Saturday, December 09, 2006, Blogger ana ga3an said…

    مدونة دمها خفيف جدا علي فكرة
    واكتشفتها مؤخرا للاسف
    و ان شاء الله اكون من زوارك الدائمين
    شوفي يا ستي وما سيدك الا انا
    يتسأل الكثير من نساء العصر الحديث عن اسباب خيانة الرجل
    فهنا من تقول ان الراجل خاين بطبعة
    و اخريات يقلن ان الراجل ميملاش عينة الا التراب
    فاذا كان التراب من الاشكال التي نراها هذة الايام فليغور التراب و مرحبا بالطين واه يابووو
    اما اسباب خيانة الرجل كما اجمع العلماء

    اولا: اذا رجع البيت و فايح منة ريحة حلوة
    (و انتي متعودة تحطي ريحة بصلة المحب كولونيا) غممزة

    ثانيا:اذا وجدتي علي ياقة القميص احمر شفايف
    (و سيادتك من معتادي وضع السمنة البلدي و الاوطة البايظة)

    ثالثا: اذا وجدتي شعرة صفرا علي كتفة
    (و اغلب الظن شعرك ولا االلاعب الفذ شطة ايام موضة المفلفل و تقومي بتربية بعض الحشرات المنزلية بشعرك علي سبيل الترفية) تويت

    رابعا: اذا عاد الي البيت و حطيتي الاكل علي السفرة و قال انا مش جعان
    فهناك احتمالين
    1: ان يكون اكل مع صحابة في الشغل نص بطن وبعد كدة راح عند امة و اكل باقي البطن
    2:ان يكون طبيخ حضرتك من النوع الحصاوي بمعني تكوني طابخة قفا حمار بالباشاميل(و دة الاحتمال الارجح)

    خامسا: اذا جاء معاد النوم و اخد مخدة و لحاف و نام في اودة العيال
    (ربما يكون هربا من كونشرتو الشخير الالكتروني التي تصاحبها بعض الروائح مجهولة المصدر)

    سادسا و اخيرا اذا لم تكتشفي بعد كل هذا اذا كان يخونك ام لا
    اسألية السؤال الابدي.. لسة بتحبني زي زمان؟
    و اذا كانت اجابتة ان قام بخلع حذاءة ووضعة في فمة وحاول القفز من البلكونة
    صارخا ... يا رب الموت او عنبر الكسور القصر العيني
    فاعلمي يا سيدتي ان زوجك هو اخلص رجل في الوجود فهنيئا لك
    لقد اصبحتي ارملة

     
  • At Saturday, December 09, 2006, Blogger حاول تفتكرنى said…

    مش هتروح بيت أبوها
    مش لانها مربوطة بالعيال
    بل لأتها أم

    فالامومة يا سيدتى أعظم وأطهر وأنقى وأصدق ما فى المرأة
    تحياتى

     
  • At Sunday, December 10, 2006, Blogger أُكتب بالرصاص said…

    طيب
    إذا كان هيركليز ده نسبة ضئيلة
    ليه نسلط عليه الضوء
    ونكبر الموضوع ليصل لدرحة التعميم



    كنت عايز اطعاطف مع عواطف
    -عواطف دي مرات هيركليز-

    بس ماقدرتش

    واللي تسيب الحلة على النار
    يبقى يا بيت ابوها
    يا الضرب بالنار

     
  • At Sunday, December 10, 2006, Anonymous Anonymous said…

    خليني اقول حاجه.....المرأة هي سيدة المنزل ... و في استطاعتها تطفش الزوج أو تخلي المنزل جنة الله في ارضه بالنسبة للزوج....

    و الست اللي زوجها يطفش منها و يعط بره...علي حد قولك...تبقي خايبة و لا تلوم الا نفسها.

     
  • At Tuesday, December 12, 2006, Blogger تمر حنه said…

    الحركة النسائية المعلنة لقمع الحركة الشعبية لتطوير الرجل:
    نما الى علمنا نحن النسوه انه هناك قلة منشقة من دكرة مصر قامت بحركة نمردة و اسمتها :" يالهوى يانا " بقيادة الجنرال عمر – و نحن نسوة مصر المحروسة نحذر كل دكر من أن تسول له نفسه و الأنضمام الى حركة : يالهوى يانا لما تحويه من أفكار ليبرالية سفسطائية من شأنها زلزلة كيان الأسرة و الأطاحة بكل مجد وصلت اليه حركة المجد الأنثوى فى البلاد– و لكن و بعد ضغوط شديدة قررنا نحن النسوة وضع تعديل طفيف فى الدستور كما يلى:
    - يمنع استخدام الشباشب بصباع أمام الأولاد و لا مانع من أبو وردة( فالورود تعبير عن المحبة)
    - فى حالات الأخفاق المتكرر لن نستخدم الألفاظ المراد حذفها"ياخبيتك التقيله و جات الحزينة تفرح و الناس خيبيتها السبت و الحد و ....ياعنتر" و لكن – لظروف اليأس و الغضب- يجوز التعبير باستخدام الأشارات بالوجه أو المصمصة بالشفاه و استخدام الهاتف الفورى لتجريس المنيل على عينه .. عفوا الرجل الخافق
    - لا مانع من أخذ الغسيل فم واحد و لكن لا تنازل عن استخدام الكرور و الزهرة .
    هذا و نهيب بالساده الذكور بعدم الحياد عن بنود الأتفاقية المعلنة و الا و وحيات قلبى و افراحه سوف نطاردكم فى كل مكلن – صحرا ان كان أو بستان و نشبحكوا و نعاملكم معاملة الكفار حتى نسترجع كرامتنا المهدرة و لن نتراجع حتى يسقط منا آخر مشبك و ايد هون فى المعركة : الله .. الوطن .. انشراح

    فله
    برافو فله كيب أون

    Khalid ben Jarrar
    يسعد مساك .. طبعا لا يستويان يابن جرار .. ياحومتى المثل بتاعك ده محتاج ترجمة فورية – بس شكلك كده بتتكلم صح – أدام قلت دراع مرسى تبقى بتتكلم صح

    Epitaph the sugar lump
    عمر ده يا بنتى نواه ولازم نشبحه لحسن يفتح عنين الرجالة ....تيجى نعمل حركة مناهضه لحركته نسميها : ألطمى يا انشراح اللى جاى مش زى اللى راح؟

    يامراكبى
    الألفاظ دى عادى جدا يا مراكبى أمشى فى الشارع و انت تسمعها ... سلامى للوالد

    Tota
    تحياتى ليكى انتى يا توتا يا جميلة – ها معانا فى حركة انشراح بتاعت اللى جاى و اللى راح؟ داخلة بكام نفر؟

     
  • At Tuesday, December 12, 2006, Blogger maged stephen said…

    الى كل تمر حنة
    ما عدا أنت يا جميل أنا اللى عارف أنك دماغك متكلفة وعالية ومش زيهم مش زيهم
    مع أن أى حد يقرأ البوست يقع فى التصور الغلط أنك زعيمة الحركة النسائية وأن خالتك تبقى انشراح بجد لكن هأقول ايه بقى مزمزيل زيك بتاعة مدارس بتكتب عن أبو رحاب وتوصفه بالصلف الاارادى معقولة خالتها تبقى انشراح برضه؟ معلش اللى ما يعرفش يقول عدس
    رسالة الى كل أمرأة
    عودى للأنوثة والرومانسية زى البنت كالابالا الرقيقة اللى كانت بتحب أحمد ولما ودعها علشان رايح الحرب فضلت تعيط وتعيط وتغنى له بصوت يقطع قميص النوم
    حبيبى ياحمد ياللى عالترعة
    ياعينى ياحمد ياللى عالترعة
    قلبى يدعيلك ليل ونهار
    خايفة عليك من ضرب النار
    يا روحى ياحمد
    ياللى عالترعة

     
  • At Tuesday, December 12, 2006, Blogger عمر said…

    بيان عاجل

    نحن دكرة الحركة الشعبية من أجل تطوير وتظبيط وتسليك الدكر المصري قد نما إلي علمنا قيام بعض قيادات حركة الأنثي الفتاكة بمبادرة لتقريب وجهات النظر فيما بين الطرفين.. وعلي هذا توجه الحركة مزيد الشكر للقيادات الأنثوية القاتلة علي مبادرة الشبشب أبو وردة والتي وأن دلت فإنما تدل علي مشاعر رقيقة وأحاسيس مرهفة.. ونقول لكل انثي سلطوية منخرطة قشطة بيس يا وومان ولنسعي جميعا من أجل إيجاد سلام عادل شامل كامل وحلاوتك يا عنبة وانت قاعدة عالكنبة

    وعلي هذا فاننا ندعو جميع الدكرة المختلة الي رفع درجات التأهب والتمسك بشعارنا الخالد: اللي بيعرف يجري يبقي يحصلني

    ويالاااااااااااهوي

     
  • At Tuesday, December 12, 2006, Blogger Aoossa said…

    الكلام ده أكيد على حنفى
    أيوه هو حنفى
    طول عمره عامل فيها حنفى
    و أنشراح مسكينة مش لاقيه حضن براح
    ولا عارفه ترتاح
    وبناء عليه تقرر الأتى
    تقسيم الاعمال بين الطرفين بالتساوى
    عل سبيل المثال الست تولد الراجل يجرى يرضع على طول
    محدش يقول أزاى مليش دعوه
    هى تغسل و هو ينشر ويلم الغسيل ويطبقه
    و يوم الخميس هو يروح للكوافير
    يوضب حاله كده وينضف نفسه
    و يحط شوية برفان
    عشان شكله يفتح النفس
    ويستناها بقا لما ترجع من على القهوه
    أيه بلاش تعمل دماغ يوم الخميس
    مش كله عشانه
    وأنشراح بتوعد حنفى أنها هتكون رقيقة فى التعامل معاه ومش هتبهدله
    أنشراح طول عمرها قلبها كبير
    و حنفى كمان مــخه على أده
    العوافش

     
  • At Tuesday, December 12, 2006, Blogger Epitaph said…

    هههههههههه يا تمورة
    الموافق ع البيان المعلن يتفضل برفع يده

    موافقة

    و زغرطي ياللي مانتيش غرماااااانة

    هههههه

    احلي حتة عجبتني

    الله..الوطن..انشراح
    ههههههههههههه

     
  • At Tuesday, December 12, 2006, Blogger شجره الدر said…

    جامد البوست ده
    بس ياتمرمر الاخ هركليز اكيد مش ناوى يغسل المواعين بعد اما يعشى العيال لانه بصراحه اكيد هايجيبلهم علب كشرى او طواجن مكرونه بقى
    والاخت زينا تيجى من بره تلاقى البيت مقلوب والعلب عفنت فى سله الزوبالات
    والاخ ناسى الزبال بييجى امتى

    حقيقى هركليز هيبقى منظره يجنن وهو ماسك الواد الصغير وبيحاول ياكله كشرى من المعفن ابو ربع جنيه ماهو هايسترخص بقى

    بس احسن يستاهل
    وابقى هههههه عشى العيال

     
  • At Tuesday, December 12, 2006, Blogger تمر حنه said…

    Yasser_auf
    و مالو ياسى ياسر لما تغسل المواعين – مش انت و ولادك اللى وسختوها – مش كفاية اننا أحنا اللى بنطبخ؟ يعنى لو عايز اللى تغسل لك المواعين و تحط العشا هقولك : أعرف مخدماتى كده و رخيص و بياخد شهر رهن و شهر تأمين – و لو ماعجبتكش الخدامة تبقى ترجعهاله و تقوله لقيتها بتنفس – بعذنها أنبوبة
    و بعدين ازاى تتكلم عن حماك كده؟ الراجل اللى ربالك أم العيال و شقى عليها و حافظ لك عليها و انت كنت بتتصرمح؟ ياسر انت أولادك هيعملوا فيك نفس الشئ و هيسيبوك و انت كهنة تتنشق على ريحة أولادك و أحفادك – يابن آدم أفعل ما شئت كما تدين تدان - و هو ذنبه ايه مش المحروسة بتاعتك هى اللى سخنته عليك؟


    Ana ga3an
    ايه ده ايه ده؟ دانت شركت الدنيا خالص و ماليش نفس أنا كمان أرصلك مثالب الرجل المصرى اللى زى الفله و بيقوم الصبح شكله يفتح النفس المقفولة و شعره مسبب و ريحته كالونيا و لا لابس فالنه حمالة واحده و منطلون بيجامه مخطط مربوط بدوبارة و صوته واطى و كريم بسخاء و بيحترم مراته و بيفتحلها باب العربية - حقيقى مش فى مود رديح دلوقتى – بس ليك يوم يا ... جعان


    حاول تفتكرنى
    جيت لمربط الفرس – الأمومة و التى اصبحت سلاح على جيد المرأة – و على المرأة أن تختار بين أمومتها و هوانها – و كعادة المرأة المصرية الطيبة الأصل فهى حتما ستفضل أمومتها و لكن يجب أن يفاجأ الرجل يوما ما باختلال المنظومة – و هذا حتى – ولأقل تقدير- لكى يقيم الرجل المجهود البدنى و العقلى الشديد اللازمين لأداء هذا الدور – بل ستذهب لبيت أبوها يوما ما حتى تستحوذ على شئ من تقدير الرجل و الأعتراف بفضلها عليه و على أولاده.


    أكتب بالرصاص
    لاهو هيركليز أتجوز على زينة؟ - هو نسبة ضئيلة فهلا و مرتبطو بامراض نفسية و يطلق عليهم الرجال السيكوباتيين و اللا انتمائيين – بس بقولك ايه ممكن تصطادلى أبو قردان من جنب الجونينة بالرشاش اللى معاك ده لحسن بيقولوا انه يجنن عالمولوخية؟


    Anonymous
    يييييه الكلمتين دول قدام أوى يا أنونيموس – أرجوك راجع تدويناتى السابقة – و حيات قلبى و أفراحه بنحاول معاكم لكن تعمل ايه ؟ برة و جوه فرشتلك و انت هابئ و ايه يعدلك؟


    Maged ebn Stephen
    يا ماجد ما الأغنية دى هى اللى ضيعت أحمد – أصله كان راشق الآى بود بتاعه فى ودانه و كان سايق الأتوبيس اللى واخد الجنود للجبهة على الترعة و لما وصل للحته اللى بتتمايل فيها كالابالا – بتاعت يا روووحى ياحمد – فقد السيطرة على الأتوبيس كومبليتلى و حود عالمالح و اراحوا الجنود و اتهزمنا - من هنا تغير منظور كالابالا للرقة و ابتدعت أغنيتها الوطنية الشهيرة : ياللى عالترعة حود عالماليح – ياللى عالترعة حود عالماليح ... و انت تعرف باقى الأغنية .. بتروح أفراح بلدى ؟


    الجنرال عمر
    اذ نتقدم بالشكر لدكرة الحركة الشعبية و ندعهوهم لوقفة اعتصامية فى ميدان التحرير الجمعة الجاية بعد الصلا و سوف نستمع لمطالبهم و اذا لم تعجبنا فلسوف نتحرش بهم – بيس يا مان و على فكرة عنبة قاعده جنبى و بتشكر حدشرتشك على اهتمامك و بتقولك ان المنيل على عينه جوزها رزعها علقة و رهن الكنبة على أربعتاشر جنية تمن خمس عرانيس و سمسون فياريت تغير هذه المقوله الى : يا حومتك يا عنبه .. المضروب رهن الكنبة.


    Princess aoossa
    برافو .. برافو أوووسه - طب بجد مايتشاركوا فكل حاجة : باستثناء موضوع الرضاعة لأنه مفيش أحسن من لبن الأم و خاصة فى مرحلة السرسوب – و مالو لما يتزوق و يلم الغسيل و يسيبها تروح الكافيهات مع صحابها يعلّوا زى الرجالة مابيعملوا ؟ و حيات أمى انتى من الأحرار يا أوسه و احتمال نعملّك مقام أبان الفترة القادمة – أنا حبيتك ممكن نبقى صحاب و نتبادل الطوابع و السواطير؟


    Epi the sugar lump
    ابى أرجوكى الموضوع مش هزار و دخل خلاص فى حيز التنفيذ – فيه واد فوق اسمه ماجد ستيفن ممكن نستقطبه معانا – شكله هينفعنا فى الخناقات و يجيب حق البت عنبه و عمر ديته نص كباب و كوز بريل و يبيع القضية خللينا نلعب عالمضمون

     
  • At Wednesday, December 13, 2006, Blogger maged stephen said…

    يا تمر حنة هو فيه أحلى من البلدى مالناش دعوة بالرجالة اللى عاملة زى القرع
    لو كنت تعرفى عمر يا ريت تنصحيه لأنه واضح أنه مش عارف مصلحته
    مش عارف أن نسبةنون النسوة الى الرجالة وصلت 6 الى واحد يعنى لو نزل التحرير مش هيلحق يجرى أصلا
    المهم أنا عامل دماغ كابتشينو لأ لأ مش عامل نسيج الخلاصة الأبيات اللى جايه كتبها واد شاعر بمغص أتمنى أنها تعجبك ولو ما عجبتكيش عادى يعنى نرجعها

    الله يرحم عذابنا وغرامنا وحبنا وشوقنا
    على رأى شاعر رقيق ذوقه أحلى من ذوقنا
    قال
    القلب يعشق قبل العين أحيانا
    اذا راّى من بعيد اى بستانا


    أقترح اضافة الابيات اللى فاتت الى منهج محو الامية الخاص بالارتقاء بالرجل اللى لغاية انهاردةمش عايز يبذل أى مجهود علشان يشوف المرأة كنظير ومعين له كما خلقها الله
    ومش عارف لحد أمتى هيفضل قابل يتقال عليه أن عنيه تندب فيها رصاصة؟
    وأننى أناشدك بالغاء فكرة التحرش بالرجالة فى التحرير يوم الجمعة لأنى بصراحة مش معقول ابدا ما انتى عارفة اللى هيحصل كل واحدة هتروح تكتب بوست زيك والعنوان أنت مابتعرفش

     
  • At Wednesday, December 13, 2006, Blogger حاول تفتكرنى said…

    الفرق كبير بين العاطفة والظروف
    الظروف تختل
    أما العاطفة لا
    فإن اختلت العاطفة تبعا لاختلال الظروف
    يبقى الخلل اصاب الجميع
    هو وهى ، فلن تجدى قضية نتحدث فيها
    ولن نفرق بين ما هو كائن والواجب ان يكون
    سيكون الاختلال قاعدة نبرر بها اى شى غير طبيعى نقوم به

    وقتها فقط
    تروح بيت ابوها هو الاولى بها

     
  • At Friday, December 15, 2006, Blogger eldoctor said…

    مع انى ضحكت على التدوينة .. الا انى مش موافق على اللى فيها ..
    سيدنا الرسول صلى الله عليه و سلم كان فى خدمة أهل بيته .. وكان يخيط ثوبه و يخصف نعله ...
    الرجل لا يعيبه أن يعين فى بيته ..


    ملحوظة : انا حاطط لينك للمدونة بتاعتك عندى .. واختلاف الرأى لا يفسد للتدوين قضية

     
  • At Sunday, December 17, 2006, Blogger tawahan said…

    كان هركيليز راجع البيت الساعة 12 بالليل تعبان وطالع عين امه -سورى قصدى تانت- ومش شايف قدامه,, وهو طالع على سلم العمارة كل اما يحط رجله على السلم "طاخ" ..الراجل استغرب, الكلام ده فى المسلسل مش فى الحقيقة,, طول ما هو طالع طاخ طاخ طاخ ,, الراجل شك فى نفسه لحد اما وصل العشة اللى ساكن فيها فوق السطوح لقى بسلامتها انشراح بتدق كفتة,, وقاعدة على الارض ورابطة راسها واديلو ادى اديلو ادى...
    هركيليز: يا نهار ابوكى اسود يا وليه, انتى جبتى لحمة بالاتنين جنيه وربع اللى اديتهوملك الصبح, دى اخر فلوس معايا
    بصيت له انشراح وعنيها بطق شرار: امال عايزنا نقضيها السنة دى من غير لحمة,, وبعدين دا هو صباع واحد
    هركيليز: نفسك فى الصباع اوى؟؟
    انشراح:يا شيخ بلا نيلة دا انت خلاص سلمت نمر
    هركيليز: يا وليه انتى مش بتقنعى ابدا, غيرك بيبات فى الشارع
    انشراح: قطعت قلبى والنبى,, بدل البوقين دول بتوع كل مرة كت على السعودية ولا شوف اى مركب رايحة ايطاليا نط فيها بدل مانت قاعد جنبى زى اختى
    هركيليز: ولما اتقفش ولا المركب تغرق واموت,, ارضى وبلاش طمع
    انشراح: على الاقل حتوفر تمن اللقمة اللى بتاكلها, قال على راى المثل "اكل ومرعة وقلة صنعة"
    هركيليز: لا وانتى الصادقة "سبع صنايع والبخت ضايع"
    ---------------------------------------
    -يلا يا جمماعة وصلنا جهزوا نفسكوا
    -وصلنا فين
    -وهو احنا رايحين فين؟ جنوب الوادى؟؟ ايطاليا طبعا
    -وهى فين دى؟؟
    -الناحية دى.. حتفضلوا تعوموا كده وتوصلوا بالسلامة انشاء الله
    -بس انا مش شايف ارض
    -متستعجلش على رزقك.. دا انت حتشوف اللى عمرك ما شوفته
    -وانا مبعرفش اعوم
    -كل حاجة معمول حسابها.. خد العوامة دى,, وبعدين هى كلها عشرين عقدة بحرية كلام فراغ يعنى.. يلا بس علشان خفر السواحل.. يلا يابنى انت وهو يلا
    هووووب... تششششششششش
    ----------------------------------------
    ترررم ترررم
    -مين
    -انا انشراح يامه
    -ياحبيبتى يابنتى.. تعالى ادخلى.. مالك كده ياضنايا مقطعة نفسك من العياط
    -هركيليز الدون قليل الاصل الواطى يامه
    -ماله يابنتى؟؟
    -من ساعة ما سافر ايطاليا ولا بعت ولا جواب ولا اتصل.. تلاقيه شافله واحدة خوجاية عينيها ملونة وشعرها اصفر.. كل الرجالة ناقصين, حتى ابويا.. مش ابويا ناقص يامه؟؟
    -ايوة يابنتى ناقص طبعا.. ناقص وستين ناقص.. وانتى عملتى ايه وجاية كده وش الفجر؟؟
    -بعتله جواب وقولتله" الحلة ع الباجور عشى عيالك.. انا رايحة بيت ابويا مش راجعالك"
    -ايوة كده اديله على دماغه علشان يعرف قيمتك..المهم انتى جبتى دهبك وصيغتك لحسن لما يجى يطمع فيهم وياخدهم؟؟
    - وهو الجربوع ده معاه يجيبلى صيغة.. انا جبت صباع الكفتة

     
  • At Sunday, December 17, 2006, Anonymous كلبوزة لكن سمباتيك said…

    ازيك يا مرمورة عالة اية يا اختي و ازي العيال و سي نظمي
    التدوينة جامدة كالعادة بس انت عارفاني على الحياد لما فطسته
    بس مفيش مانع لو حتعموا تنظيم نسائي اجي اسفلت اي واحد منشق يزعلكم
    و اهو كله بثوابه
    قبلاتشي

     
  • At Wednesday, December 20, 2006, Anonymous زهرة said…

    ملحوزة برضه : هركليز نسبه مش قليله !!..مش قليله خااالص

     
  • At Thursday, December 21, 2006, Blogger يا مصر اكتب إليكي رسائلي said…

    يسرني ان اتقدم بخالص التهاني وأطيب التمنيات بمناسبة عيد الأضحى المبارك اعادة الله علينا وعليكم بالخير واليمن والبركات ، وكل عام وانتم والأسرة الكريمة بخير

     
  • At Thursday, December 21, 2006, Anonymous أزئوزة said…

    غلطتك ياخيبة ... مش يازينة
    هيَّ روشتة سهلة أوي ، تتلخص ف المَن . أيوة ياأوختي .. مِنِّي عليه ف الروحة والجاية
    أنا اللي حبلت ؛
    آه ياضهري ؛
    الواد بيجري ولاكإنه أبو تريكة ف ماتش كورة جوة بطني ؛
    نفسي غامـَّة عليَّ من إبنك ؛
    والأوبة الكبيرة أوي بأة .... الطـَلئ ، وعملية الولادة نفسها
    دة انا اللي طلع عيني ف الحزء ؛ هوَّ انت هامَّك حاجة؟
    وآه لما حامَّولي الطلئ ، روحي ساخت مني ، وانت ئاعد تشرب سيجارة ... إلخ إلخ
    ساعتها يازينة الستات يانوَّارتهن ، هيحس بتأنيب الضمير من عملته السودة ( عملته السودة تتلخص ف الحَبَل . مش هوَّ اللي عايز ذرية ؟ ) و هيختشي
    وماتخافيش ياحلوة ، تأنيب الضمير مش بتاع وئتها وخلاص ، دة هيستمر لحد ماالبت أو الواد يئعدوا ف الكوشة ؛ ودة بفضل سياسة المَن اللي مش هتتخلي عنها

     
  • At Thursday, December 21, 2006, Blogger شادي فايد said…

    عايز كل الناس تعرف مدونتك
    ضيف نفسك في ارشيف المدونات العربية
    http://arabblogs.blogspot.com/
    ارسل لنا اسم مدونتك و عنوناها و اسمك

    في كومنت على

    http://arabblogs.blogspot.com/2006/12/blog-post.html

    ابعت نفس الرسالة دي لكل اللي تعرفهم

     
  • At Monday, December 25, 2006, Blogger عمر said…

    تمر حنة: انتي رحتي فين؟ طمنينا عليكي

     
  • At Saturday, December 30, 2006, Anonymous mafadee7@hotmail.com said…

    والله يا تمرياختى الرجاله من عينة هركليز دى هى رجاله عاوزةالحرق و السلخ و السحل بالقباقيب كمان


    ودا ميمنعش ان فى ستات تستاهل كده واكتر من كده

    انما بردووووووو


    الرجاله اكتر


    جتها نيلة اللى عاوزة جواز

     
  • At Saturday, December 30, 2006, Anonymous Anonymous said…

    كل سنه وانتي طيبه

     
  • At Saturday, December 30, 2006, Anonymous Anonymous said…

    كل سنه وانتي طيبه يا بنتي ..ابو الصادق..

     
  • At Saturday, December 30, 2006, Blogger Sampateek said…

    تعالي
    صوتي
    عندي

     
  • At Saturday, December 30, 2006, Blogger بعدك على بالى said…

    كل سنة وانت طيبه وعيد سعيد وعام اكثر هدوءا ونجاحا
    تحياتى

     
  • At Sunday, December 31, 2006, Blogger khalid jarrar said…

    feeeeeenik?:*(

     
  • At Sunday, December 31, 2006, Blogger قاسم أفندي said…

    عزيزتي تمر حنة
    كل سنة وانتي طيبة
    بأضم صوتي لصوت خالد وبقول فينك برضه؟؟ طولتي الغيبة علينا
    لعل المانع يكون خير وميكونش أبورحاب عرف طريق المدونة أو تكون الحركة الشعبية لتطوير الدكر أثرت علي نشاطك المعهود .. ولا في هدنة اليومين دول بمناسبة الأعياد؟

     
  • At Monday, January 01, 2007, Blogger Epitaph said…

    kol sana wenty tayba ya tamrty ya gameela...el mail beta3ek tah meny wana m3zela ya7'ty,.,,:D m3elesh sama7 el noba di..w kol sana wenty tayyba :D wa7shany!!

     
  • At Wednesday, January 03, 2007, Blogger Ahmed Shokeir said…

    تمر حنة

    فينك ؟؟؟

     
  • At Saturday, January 06, 2007, Blogger khalid jarrar said…

    alright now i am really worried
    feeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeeneeeeeeeeeeeeeeeeeeeeeeeeeeeeeeek? :***(

     
  • At Saturday, January 06, 2007, Blogger كوكو الضعيف said…

    هرقليز زعلان .... اه واللهي ..هو قاللي انه زلعان تحبوا احلفلكم ؟
    طيب وحياة عبله وغلاوتها علي قلبي هو ..
    اه اولا عايز اقول البوست ده هايل ودمه خفيف طحن بس فيه شوية مغالطات .
    ربنا لما خلق الرجل والمرأه خلقهم مختلفين . صح ؟؟
    يبقي كل واحد ليه دور مختلف عن التاني . صح ؟؟
    الرجل اقوي يبقي مطلوب منه ان يعمل ويصرف علي عبله وليلي وزينه وكل نون النسوة
    المرأه ارق تبقي هي عليها انها تهتم بالاسرة وبالاولاد
    منذ فجر التاريخ وتلك هي سنة الحياه ... يبقي مسالة خروج المراه للعمل ومساواة الرجل بالمرأه في الحقوق والواجبات دي مسأله ليست صحيحه ولا تهدف الي الحفاظ علي السلام الاجتماعي
    لما المراه تخرج للعمل يبقي مين اللي هيربي الاولاد
    لازم واحدة ست بحكم طبيعتها الانثويه
    طيب لما الراجل يقعد في البيت ويربي العيال ؟
    يبقي في حاجة غلط
    وهينتج عنها حاجات كتير غلط
    اي علاقه بين رجل وامراه يجب ان يحكمها التفاهم والاحترام المتبادل
    وانا شخصيا اذا شعرت ان علاقتي بشريكتي تفتقد الي هذين العنصرين يبقي قلة العلاقه احسن
    وبعدين الرجل ممكن يعمل حاجات كتير في البيت بشرط
    انه لا يشعر انه مجبر علي ذلك .
    وانه يكون بيحب شريكته في البيت
    اذا توفر هذين الشرطين : اعتقد ان المساله هتمشي لذيذه ومحدش هايشتكي من حد
    عزيزتي تمر حنه
    اسلوبك دمه خفيف جدا
    وكنت محتاج فعلا اني ابتسم
    بشكرك
    والي بوستات اخري ان شاء الله
    وانا معاك يا عمر علي فكرة بس في شباشب جديدة دلوقتي في السوق لازم تضمها لاتفاقية السلام ان شاء الله

     
  • At Monday, January 08, 2007, Blogger Fancy said…

    و الله كلامك عاجبنى اوى لانة واقعى اوى

    بس ياريت لما اقولة الحله عالنار و اكل العيال
    مايكونش نهايتى سودة و مالحئش اوصل بيت اهلى

    جبـــــــــــار

     
  • At Sunday, January 14, 2007, Blogger إبـراهيم ... معـايــا said…

    يا لهوي ياااابت يا تمر حنة ، ياا زينة ، يا كل نساء مصر متحدين

    حقيقي عمار ياااااا تانزانيا ، و زنجبار !!!

    مدونتك لذيذة قووووي يا تمر حنة


    إبقي فكريني أعدي عليها كثير

    بس خفي علينا شوية ، ده احنا بنحبكو والله !!!!

     
  • At Friday, January 19, 2007, Blogger Nah·det Masr said…

    عزيزتي تمرحنة، انتي فاهمة الموضوع غلط؛ الستات هما اللي بيصروا على الخلفة بدري رغم ان معظم الرجالة بتبقى مش عايزة عيال في الأول علشان تعمل كارير وتتمتع بالحياة ولكن نعمل ايه في الستات وامهاتهم!

     
  • At Tuesday, March 20, 2007, Anonymous Anonymous said…

    وماله نغسل المواعين بس بعد مانغسلو .. نعملو .. اه .. اللى اوله شفط اخره نط

     
  • At Wednesday, July 18, 2007, Blogger kawasse said…

    يا اخت تمر حنه حرام حرام شو النساء مظلومين يا حرام

     
  • At Sunday, August 26, 2007, Anonymous Anonymous said…

    ايه هو انت عايزه تخربي علي الوليه ولا ايه تروح تقعد عند ابوها وتسيبه انتي فاكره انها كده بتلوي دراعه لاااااااااااا مش هركليز هيبعت لها العيال وهيقول لها مش هتعتبيها تاني وهيروح يتجوز وبرده مش هيطلقها عشاااااااان ما يدفعش نفقه شفتي باه يا ستي هركليز

     

Post a Comment

Links to this post:

Create a Link

<< Home