أيوه خدامه

Monday, April 16, 2007

و نقول آلوووو

ASAHI-NET.OR.JP
و نقول ألووووو ...
ألووو هاى أوسامة .. عامل ايه؟ أنا جينا
هاى يا جينا و أنا أوسامة
هاى أوسامة .. عامل ايه؟ واحشنى موت طحن تقطيييع
مرسى يا جينا .. ربنا يخليكى
أنا مبسوطة أوى يا أوسامة انى عرفت أكلمك .. دانا بمووووت فيك
ربّنا يخليكى يا جينا ... عندك كام سنة؟
تمنتاشر سنه
بتدرسى؟
أكيد ..أنا فسنة أولى انجليش أكاديمي .. بيزنس أند أدمينستريشن و عندى مشكلة جامدة أوى
أنا محتاجة أوى سدر حنين أفضفضلة .. و انت قريب أوى منى
خير يا جينا؟ أولا أنتى مخطوبة؟
لأ أنا مرتبطة .. كنت أعرف واحد من سبع سنين و كنا بنحب بعض خالص و اتفقنا عالجواز .. أصله كان راجل أوى .. و عنده 127بيضه .. راجل أوى .. مش قادرة أقولك أد ايه..
أد ايه يا جينا؟
مش قادرة .. مش قادرة
وبعدين؟
لقيته بيحب أنتيمتى و لقيت على موبايله ماسجات منها .. و لما واجهته أنكر و قال انها هى اللى عايزه تكلمه بالعافية و حاول يفهمنى أنو برىء
و بعدين؟
فى الوقت ده أنهرت .. و هو كان عنده صاحبه الأنتيم – بصراحة شاب ممتاز : ابن ناس و بيروح جولدين جيم و عنده 132 بيضه – هو مرة قبل كده كان بص لى .. و كانت عينيه بتقول حاجة .. اتصلت بيه و طلبت انه يقابلنى عشان يساعدنى فى المشكلة .. بصراحة ارتحت له أوى أوى و قابلته بعد كده كام مرة
طب و الأولانى يا جينا؟
كنت بارتاحله برضه و بقابله .. عادى
أوكى .. مفهوم مفهوم .. و بعدين؟
و بعدين التانى أبتديت أتعلق بيه جدا و مكنتش بعرف أعيش من غيره .. و فيوم جاتلى مكالمة من واحده بتقوللى انه مش بيحبنى و بيهرج معايا و كده .. قمت اتصدمت جدا جدا
(يبدأ صوت أوسامه فى التوتر) و التانى كمان صدمك يا جينا؟ ها و عملتى ايه؟
التانى كان عنده ابن خاله خرج معانا مرة و كان بيبصلى بصات غريبة كده و مرة ادانى موبايله .. فكلمته عشان أتأكد من التليفون اللى جالى ... بصراحة كان راجل أوى أوى .. مش قادرة أقولك أد ايه؟
أوسامه:و عنده كام بــ ... سورى عنده عربية أيه؟
عنده لانسر فضى بس بصراحة راجل أوى مش قادرة أقولك أد ايه
معلش يا جينا يا ريت تقوليلنا بالتقريب كده .. أد ايه .. انتى أثرتى المستمعين .. أقصد أثرتى فضولهم
مالوش حل يا أوسامه .. حسيت ان ابن خالة التانى قريب منى أوى و بصراحة اتعلقت بيه و مبقيتش عارفة اعيش من غيره....
طب و التانى يا جينا؟ برضه كنت اتعلقت بيه أوى هو كمان
يعنى كده فى تلاته معلقينك بيهم أوى ؟
أرجوك ماتفهمنيش غلط يا أوسامه- كل واحد كان بيملى عندى فراغ معين
واضح يا جينا انك فراغاتك زيادة
المهم ... اتقدم لى فى الوقت ده ابن صاحب بابا .. بصراحة شاب ممتاز .. ماكنش عندى حجه عشان أرفضه
قوليلى يا جينا: انتى عندك بابا؟ يعنى موجود و عايش معاكو؟
أيوه طبعا .. أنا بحب بابا و متعلقة بيه جدا ..
هو كمان؟
المهم يا أوسامه .. العريس اللى متقدم لى ده مش قادرة أرفضه بيشتغل فى السعودية و جاهز و عنده 180 اس ال كى.. بيضه برضك و أهلى بيضغطوا عليّا .. و فنفس الوقت مش قادره أسيب التانيين .. كل واحد متعلقة بيه بطريقة شكل و كل واحد بيدينى حاجة ناقصانى .. بصراحة يا أوسامه مش عارفة أعمل ايه؟
أوسامه : تقريبا بصى يا جينا .. العريس الوحيد اللى يصلحلك هو أبو الهول .. فيه تنوع و متكامل بس للأسف ماعندوش ولا بيضه .. هو عنده مركب شمس كحلى .. و نسمع : كان فيه بنت اسمها تررررررم
ملحوزة:
أسامة منير مذيع برنامج : أنا و النجوم و هواك و المشار اليه هنا .. ماهو إلا بديل لأم غير واعية و أب غير متواجد .. و جينا ماهى الا عينة عشوائية من " بنات اليوم " اللواتى لم يتدربن على تقييم أنفسهن و تحديد أولوياتهن ..
فجينا تتخبط .. جينا ضحية للفراغ و الخواء العقلى و النفسى الذى فرضه عليها نظام تعليمى و تربوى مستورِدا للزَبَد الذى يجب و أن يذهب جفاء و طاردا لما يجب أن يمكث فى الأرض لينفع الناس .
و وجود أمثال أسامة منير و من قبلة بثينة كامل صاحبة برنامج أعترافات ليلية مجرد مرآة عاكسة لأوضاع قائمة بالفعل وهم غير مسئولين عن جيل ممسوخ .. و لكنهم يحاولون تقمص أدوار بديلة لأقرب الناس المسئولين عن هؤلاء الشباب - و الذى يُظلم كثيرا بوصفه ب "الفاجر " أو ال"مش متربى" فالوصم بعدم التربية هنا يجب ألا يوجه للشباب بل يستلزم توجيهه لآخرين أساءوا القيام بواجباتهم لتربية هؤلاء.
و من هنا فأنا لا أطالب بالقصاص من أسامة منير أو من جينا و لكننى أطالب بالقصاص من كل من : أم جينا - أبو جينا - وزير التربية و التعليم - وزير الثقافة -وزيرى الإعلام المصرى و اللبنانى- وزيرة القوى العاملة - وزير البحث العلمى -وزير البيئة - سائقى الميكروباصات -و آخريييييييين .... و القائمين عليهم .. ودمتم
ملحوزة تانية
ال 127 بيضه و ال 132 بيضه دول سيارات .. و النعمة أوتوموبيلات.. بتنتجها شركة النصر للسيارات و غالبا بتكون بيضاء اللون .. بلا جهل أوتوموتوفى وقلة ميكانيكا

Labels:

80 Comments:

  • At Monday, April 16, 2007, Blogger Noony said…

    يا دي الخيييييبة
    هي دي البنات اللي عايزة تتوئد بجد
    وللأسف موجودين كتير..واللي بيشجعهم برنامج زي برنامج عم الحاج أوسامة دة...الحمد لله أنا مش بسمعه بس سمعت عنه بلاوي..والبنات اللي بتتصل عايزين ضرب النار والولاد كمان دماغهم مليانة صراصيييييير فافي كمان

    قال فراغ وبتاع وهي اللي بتتصل بيهم وتجري وراهم..هي دي الحرية..وعادي جداً متعلقة بباباها ..بالمرة طبعاً

    بس برضه مننساش إن زي مافي البنات دي في بنات تانية محترمة ..عكس النوعية دي تماماً

    ربنا يهدي الجميع يا رب
    هو مفيش رقابة على البرامج دي ولا اية النظام؟

    بحيي فيكي مواضيعك الهادفة

    سلامات
    نوني

     
  • At Monday, April 16, 2007, Blogger الربان said…

    ونقول آلووووو.......حلوة الفضفضة دي ...هههه اقصد البوست ...

    سلوكيات جديدة و غريبه في مجتمع يعاني من الجهل و المرض و الاميه الثقافية...

    ربنا يستر علي مجتمعنا من انتفاضة تأكل الاخضر و اليابس .

    ومرة تانية آلووووووووو

     
  • At Monday, April 16, 2007, Anonymous مفروسة said…

    إذاعة هايفة والله بتعلم الشباب الهايفة كتر واللى بيغظنى ويحرق دمى الرسائل القصيرة والرسالة بـ 3 جنيه حار ونار فى جتتهم وكلام فاضى فى كلام فاضى ربنا يرحمنا يارب

     
  • At Monday, April 16, 2007, Blogger Mohamed said…

    متألقة دايما .. مش قادر أقولك أنا كنت بضحك إزاي .. لا مش قادر أقولك قد إيه .. كتير خالص ..
    عامة هو في فعلا ناس عايشين في عالم تاني من صنف صاحبتنا اللي عندها فراغات كتير ..
    تفتكري هي بتاكل كرانشي؟
    تحياتي ليكي..

     
  • At Monday, April 16, 2007, Blogger Mohamed A. Ghaffar said…

    ان مكنتش لسه حصلت لحد دلوقتى ، يبقى هتحصل قريب او حصلت ولسه موقعناش عليها

    الخلاصه غير مستبعده على الأطلاق

    عجبنى اسلوبك اوى ومنعنى من الضحك حجم الماساه

     
  • At Monday, April 16, 2007, Anonymous كان said…

    كنت عاوز اقول حاجة واحدة بس ..إن ال slk
    مفيش منها 180
    اقل حاجة 200 و دلوقت كمبروسور كمان..فبيتهيألي ده هيكون ارجل واحد فيهم.و عموما فيه برضه ناس اقل من كده بكتيير و رجالة برضه..انتو بس فاهمين غلط

     
  • At Monday, April 16, 2007, Blogger Ahmed Shokeir said…

    :)

    طبعا ماكنتش هافهم البوست ده لولا إني في مصر من مدة وسمعت البرنامج ده اكتر من مرة آخرها إمبارح بالليل، بس واضح من البوست إن البرنامج كده على طول
    تعجبت كثيرا عندما إكتشفت أن هناك من لديه 127 بيضة قبل مازادوا وبقوا 132 بيضة
    والعينة اللي حضرتك إنتقيتها بصراحة موفقة جدا فهي تجيب الشلل والزهق والحرحر كطبيعة معظم المتصلين ، كان فيه واحدة من اسبوعين بتحكي إزاي خربت بيت واحد واخدته من مراته وبتتلذذ جدا وهي بتحكي تفاصيل كل موقف كان الراجل بيفضلها على مراته

    آه بالمناسبة بيكلم واحدة امبارح عندها اربعين سنة بيسألها في بداية الحوار إنتي مرتبطة ..مخطوبة؟ .. جته خبطة

     
  • At Monday, April 16, 2007, Blogger fad-fadat nour said…

    لا للأسف مش حاينفع ابو الهول برضه يا جينا ... اصله متعلق بواحدة عندها تيوتا زرقا - غير انه مرتبط ب الست ام الهول

    اضحك الله سنك يا تمر حنة

     
  • At Monday, April 16, 2007, Blogger مصر هى أمى said…

    سيبك من قصة البت ديه اللى تفقع الواحد

    هيا العيال كلها اللى هيا تعرفهم عندهم عربيات امل مين اللى زاحم مترو الانفاق والميكروباصات هيا كل شباب البلد عندهم عربيات كده ليه والواد الاخير كمان عنده مرسيدس ايه الفوارق الطبقية ديه اشمعنى انا عندى عربية لادا كحيانة وتعبانة يعنى على كده مينفعش اتقدم لواحدة ولا ايه

     
  • At Monday, April 16, 2007, Blogger raspoutine said…

    طبعاً انا ليا الشرف انى اكون اول كومنت ودى اول مرة ازور المدونة دى بس والله فكرتها جامدة اوى والبوست ده خلانى اضحك من قلبى وطلعنى من حالة الملل اللى انا كنت فيها
    احييكى على الدقة فى نقل المشهد الاذاعى ده
    وبشكرك كمان


    ايمن فاروق

     
  • At Monday, April 16, 2007, Blogger خالد وليس بخالد said…

    والله يا استاذة/
    الواحد مع العالم بتوع الاف ام والكليبات والافلام والاغاني
    مش بيلاقي حاجة يصبر نفسها بيها على البلاوي بتاعتهم دي
    الا قول الله -عزوجل-
    (إن الذين يحبون أن تشيع الفاحشة في الذين ءامنوا لهم عذاب أليم في الدنيا والآخرة)
    فاذا كان اللي بيحبوا ان الفاحشة تشيع هيبقى ليهم عذاب اليم
    امال بقا اللي بينشروها هيبقا مستنيهم ايه هناك؟؟

    ربنا يحسن ختامنا
    و ل ا ت ن س ى بر ا ل و ا ل د ي ن

     
  • At Monday, April 16, 2007, Blogger maged stephen said…

    الموزة دى أكيد كذابة وهى مش محتاجة صدر يعنى لو كانت محتاجة صدر كانت هاتتصل بكنتاكى مش أسامة وحتى أسامة صعب يساعدها على الأقل هيخاف من الايدز وكمان دى بتعد البيض يعنى ممكن من عطسة يتفاجأ أن عنده طفل متعدد الجنسيات ولما سألوها بتحبى السود والا البيض قالتلهم السود زى اللى من السودان لكن البيض لأ علشان هيبقوا بيضان وكويس أنه بقى فيه برنامج مخصص لأى واحدة مابتقولش لأ بس ممكن أستنتج أن البرنامج ده وراه حزب كبير بيكره قولت لأ

     
  • At Monday, April 16, 2007, Blogger bahry said…

    منك لله كنتي حدوديني في دهيه انا مكنتش قادر امسك نفسي من الضحك وانا بنقرا البوست ده في الشغل
    بصراحة تحفة
    بس انتي زوديها شوية في موضوع الكلوسترول ده

     
  • At Monday, April 16, 2007, Blogger The Groom said…


    ههاهاههاها صباحه عسل

    هاهاها بوست ظريف أوي يا أختي

    ربنا يهدي جميع الناس يا رب

    تلميحاتك كانت زيادة سنة بس مقبوله مش مشكلة

    تحياتي لك من ماناساس البلد

     
  • At Monday, April 16, 2007, Blogger واحد زهقان said…

    انا لا بطيق اسامة وصوته اللي طالع من قعر كباية دة...ولا بطيق الناس اللي بتكلمه ولا الناس اللي بتسمعه

    ومن بعد ماتنقل للتليفزيون لبرنامج البيت بيتك...بطلت اتفرج على البرنامج دة كمان

    انا خايف افتح التلاجة يطلعلي بصوته دة ويقولي الو...انت مرتبط!!؟
    ساعتها ممكن اروح فيه في داهية

     
  • At Monday, April 16, 2007, Anonymous Anonymous said…

    ايه ده هو فيه برنامج بالشكل ده عندنا!!!!!! على كدا انا متخلف اوى بقى اهى دى الحضارة والرقى ولا بلاش ونعم التربية ونعم الاحلاق عاش المربى عاش تفتكروا اللى زى دى ومن عينتها كتير اوى اللى كانت بتعرف شباب وبتخرج معاهم من 7 سنين يعنى كان عندها 11 سنة دى لما تتجوز وتخلف هاتجيب ولاد يبقى شكلهم ازاى طبعا قمة فى الفساد والانحلال ده جيل المستقبل يا سادة قمة المأساة قال الله تعالى( واذا اردنا ان نهلك قرية امرنا مترفيها ففسقوا فيها فدمرناها تدميرا) وش بيبكى

     
  • At Monday, April 16, 2007, Anonymous Anonymous said…

    ايه ده هو فيه برنامج بالشكل ده عندنا!!!!!! على كدا انا متخلف اوى بقى اهى دى الحضارة والرقى ولا بلاش ونعم التربية ونعم الاحلاق عاش المربى عاش تفتكروا اللى زى دى ومن عينتها كتير اوى اللى كانت بتعرف شباب وبتخرج معاهم من 7 سنين يعنى كان عندها 11 سنة دى لما تتجوز وتخلف هاتجيب ولاد يبقى شكلهم ازاى طبعا قمة فى الفساد والانحلال ده جيل المستقبل يا سادة قمة المأساة قال الله تعالى( واذا اردنا ان نهلك قرية امرنا مترفيها ففسقوا فيها فدمرناها تدميرا) وش بيبكى

     
  • At Monday, April 16, 2007, Blogger حــلم said…

    انا داخلة اقوللك ان البوست دة جامد بجد
    انتى دايما جامدة
    :)

    على فكرة أوسامة بدأ يغزو الشاشات
    :)

     
  • At Monday, April 16, 2007, Blogger karakib said…

    بالنسبة لأبوها هو أكيد عنده معرض سيارات
    و الحقيقة هي عرفت رجالة أوي كتير و ده أن دل علي شيء فهو يدل علي مدي تقديرها للرجولة الحقة ... و هو ده محمد أبو سويلم بتاع البوست اللي فات اللي قال كنا رجالة و وقفنا وقفة رجالة ... بس الحقيقة كلهم وقفوا مع جينا شوية و رجعوا قعدوا تاني في العربيات البيضا ... و أنا من موقعي هذا خلف شاشة الكنبيوتر ... ايوا الكنبيوتر .. أحب أقول لجينا
    أنا ليا واحد صاحبي راجل أوي و عنده هيونداي اكسيل بيضا ... و أهه تجديد

     
  • At Monday, April 16, 2007, Blogger Horas said…

    بالفعل انت فقر وشر البيلية ما يضحك يا ست تمر حنه
    تعرفي كل الي بيحصل في العرب والمسلمين منهم من أعمالهم لان المسألة مبقتش حكومات ورؤساء ده من القاعدة من تحت
    الموضوع أصله ابتدي من قاعده الهرم من من قمته ومن أعمالكم سلط عليكم وعلي رأي المثل
    أبوك البصل وأمك الثوم منين تجيب الريحة الحلوة يا مشموم
    ودستور يا سيادنا

     
  • At Monday, April 16, 2007, Blogger khalid jarrar said…

    y3ni first i wanna say that i check your blog everyday, and usually more than once a day.

    amazing walla, amazing. tislam 2eedik. you sound lke you are 20 walla, i cant belive you are a mother and a doctor!

    and i second what one of the commentors said, i never heard of a SLK 180, fee 200 o fee 320 kama, ifra7i ya tamr 7inna :D

     
  • At Monday, April 16, 2007, Blogger الأرمـوطــي said…

    مبدئياً الموضوع مش بالبيض بس فى عوامل تانيه كتير ..............بس بجد دمك زى العسل زى معوتينا وانا ليا رجاء عندك انك تكترى من بوستاتك لانى معجب بكلامك جداً
    سلام

     
  • At Tuesday, April 17, 2007, Blogger None said…

    ماشاء الله ماشاء الله
    ايه الجمال والحلاوة دي
    يعني البت علي كدا عرفت اول واحد وهي عنها 11 سنه
    لأ وقعدت تعد وتتفحص ..امال ايه... هي اصلها بتحبهم رجاله اوي ..اوي ..مش قادرة اقولك قد ايه ..مش قادرة

    والله يا تمرمر يا أوختشي ..انا اخري مع الراديون كان اذاعة ام كلثوم والشرق الاوسط والقران الكريم ..ماتبعتش انا الحجات اللي تجيب شلل رعاش دا ..عشان للأسف عندي مرارة واحدة ..مش 127

     
  • At Tuesday, April 17, 2007, Blogger Incomplete said…

    هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
    البرنامج ده فقع أصلاً ياتمرمر
    جيتي على الجرح ياأوختشي
    ساعات بيبقى نفسي اتصل بيه والله واطلع ميتينه على الهوا.. بس للأسف ولحسن حظه عمر النمرة ماجمعت
    لأ وكمان بيغني بروح مامته ومنزل لي
    شريط
    أنا حاسه أصلاً ان كل اللي بيكلموه دول متأجرين كمان... زي بتوع هالة كده
    مافيش مشكلة ان حد يحل مشاكل الناس العاطفية.. بس مش بالإسلوب القبيح ده
    شكرام ياقمر على البوست اللذيذ
    :)

     
  • At Tuesday, April 17, 2007, Blogger Sampateek said…

    مان كان البنت تفضل تبص من تحت عقب الشباك على ابن الجيران و هو و لا يعرف انها بتحبه
    و يتجوز و يخلف و هو ميعرفش
    دلوقتي البنت من دول يندب في عينها رصاصة

    ترقبي مني بوست عنك غدا
    ارجوكي تيجي تاخدي حسنتك
    تحياتي و قبلاتي و اشواقي

     
  • At Tuesday, April 17, 2007, Blogger Mohamed A. Ghaffar said…

    كل سنة وانت طيبة وعيد ميلاد سعيد وعمر مديد بالسعاده والخير

     
  • At Tuesday, April 17, 2007, Blogger Epitaph said…

    looooooooooooooooooool

    Usama Mounir wely beytseloh beeh yemawteo...Thank God I don't listen to him..nor negoom F.M.

    P.s...Happy Birthdaaaaaaay :)))))))))

     
  • At Tuesday, April 17, 2007, Blogger aimam_77 said…

    اختى العزيزة
    انها اول مرة لى فى قراءة المدونات ولكنى فوجئت انة لازال هناك قلوب تنبض وعقول تفكر وتبدع وتكتب لتعبر
    لكن لى تعليق صغير - نعم نحن نعيش حالة اجتماعية غريبة قد تكون محبطة فى بعض الأحيان ولكن دائما هناك جانب مشرق ينبع من ديننا وقيمنا لذا استمرى فى ابداعاتك بعيدا عن الشوائب والتلميح بما هو بذىء
    وفقنا الله وإياكى الى كل خير

    أحمد

     
  • At Tuesday, April 17, 2007, Blogger ana ga3an said…

    حقيقي العربيات البيضة انتشرت في البلد
    البلد اتمليت بيض
    لا انفلونزا نافع ولا كبد وبائي
    العيب مش علي اوسامة ولا العيب علي البت
    العيب علي ابو 128 بيضة
    اللي ساب ابو 132 بيضة يعلق الحتة بتاعتة
    هذا وبالله التوفيق

     
  • At Tuesday, April 17, 2007, Blogger Ma-3lina said…

    ياه فكرتينى بايام زمان لما كنت بسمع الهطل دا علشان اضحك على اللى بيحصل بس بطلت علشان حسيت نسبة زكائى قلت و مرارتى ابتدت تنقح عليا

    يالا ربنا يهدى الجميع

     
  • At Tuesday, April 17, 2007, Blogger bastokka طهقانة said…

    من حق البنت انها تختار انسب راجل لها بس من غير ما تلف مع ده و ده يعني
    و تعمل تفتيش شخصي لكل واحد و تقلبه

    اللي زي دي عمرها ما تقنع ابدا بنصيبها و تفضل طول الوقت بتبص على الاحسن و الاغنى و الاقوى
    و اخرتها واحد معاه ميكروباز يصبحها بعلقة و يمسيها بعلقة
    يلا ما علينا سمعت ان الانهاردة عيد ميلادك و بتاع كل سنة و انتي طيبة يا ستي
    ها الراجل جابلك اية؟ و لا حلقلك كالعادة
    يلا نعيما على كل حال
    قال يا مستنية السمنة من بطن النملة عمرك ما حتقلي

     
  • At Tuesday, April 17, 2007, Anonymous Ghost said…

    وهاانت ياعزيزى الجعان الجربان
    اوضح واصدق دليل على انتشار البيض فى هذا الكون

    نسيت

    تهنئه حاره بمناسبه فوزك بجائزه ابضن مدون للسنوات التسع القادمه

    عزيزى اسامه
    انت ابضن مدون انجبته البشريه

    شكرا على المداخله

     
  • At Tuesday, April 17, 2007, Anonymous Ghost said…

    طبعا ياتمر حنه مكونتش حاتأسف ع الكلام لو مكنتيش عملتى مراجعه قبل النشر

    لكن اسف الكلام مش بيمسك خالص طبعا

    وياريت تضربى نموذج ف حريه التعبير عن الراى وتنشرى التعليق اللى فات

    او لا تنشرى الاثنين م الاصل لانى حازعل
    لانك لو نشرتى دا ومسحتى تانى يكون شكلى ايه؟؟؟؟؟؟؟؟
    محدش حايفهم انا باعتذر عن ايه
    واضح؟؟؟؟؟؟؟

     
  • At Tuesday, April 17, 2007, Blogger Mariam said…

    و الله جميل قوي الي انت كتباه ده و مش قدرة أقولك قد ايه ضحكني و حزني في نفس الوقت...
    ضحكني لأنه كوميدي...حزني لأنه حقيقة !!!
    البنات بقوا تافهين و البرنامج تافه و لا بيفيد و لا حاجة...
    و أسامة ده الي كل شغلتوا يتنحنح في الراديو و ياريتوا بيقول حاجة مفيدة, انشاء الله حتى في الحب...
    أنا في مرة قررت اسمع البرنامج ده عشان أعرفه ايه حكايته, لأن الحمدلله ربنا مديني واحدة صاحبتي بتحبوا..ما علينا أنا كل الي سمعته هي مكالمة واحدة و جبت أخري...مقدرتش بجد تنحت من كلام البنت و من رد أخينا عليهاو قفلت الراديو...
    ربنا يكون في عون أهالي الينات دي بجد...
    ربنا يهديهم و يهدينااااا

     
  • At Tuesday, April 17, 2007, Blogger خضرة بنوتة بابي هسين said…

    آه وي

    بس انا ماي فيانسيه عنده كل البيض اللي في البلد

     
  • At Tuesday, April 17, 2007, Blogger david santos said…

    The language cannot be an impediment to the of clarification so that a terrorist as Bush can continue to lie


    لغة لا يمكن ان يكون عائقا امام توضيح ذلك ان الارهابي بوش ان تواصل الكذب

     
  • At Tuesday, April 17, 2007, Blogger ياسمين said…

    انا أول مرة آجى مدونتك وعجبتنى جدا جدا وهتلاقينى عندك على طول بعد كدة
    طب وفيها ايه لما بنت تعمل كدة وتقيس الراجل بعدد الـ ..... ماعلينا
    هو الست يعنى بيقيسها الراجل بإيه
    خليها يا بنتى تتمتع بحياتها شوية بكرة تتجوز برضه وتعيش اسوأ ايامها مع راجل يعاملها على انها واحدة من حريمه
    ولا هو حلال ليهم حرام لينا
    :)))))))))))))
    هو الزمن اللى عجيب ولا احنا
    تحياتى وأحب انى اشوفك فة مدونتى قريبا

     
  • At Tuesday, April 17, 2007, Blogger ody911 said…

    ههههههههههههههههههه


    قبل ما أقولك إنتى البوست تحفة وموتنى من الضحك


    أحب أقولك كل سنه وإنتى طيبة

    طبعا عرفت من عند كلبوزة


    آه البوست بتاعك تحفة


    وعادى بقة
    اودى

     
  • At Wednesday, April 18, 2007, Blogger كراكيب عادل said…

    ونقول الووووووووو كل سنة وانتي طيبة

    ويسعدك يا سمباتيك علشان عرفتنا عيد ميلادك

     
  • At Wednesday, April 18, 2007, Blogger ShAb 3AdY said…

    بس ال 132 بيضة تبقى شكلها وحش اوى

    عارفة بقى لو عنده 128 بيضة يا سلام عليه

    لقطة فظييييع و هيبقى راجل بس مش اوى يعنى

    و يا سلام لو عنده بقى 126 بيضة

    هتخلى جينا يجيلها شلل خماسى دفع رباعى

    على فكرة البوست حلو جدا , انا اول مرة ادخل البلوج بتاعك بس بجد البلوج جميل

    و كل سنة و انتى طيبة و عقبال مليونين سنة انا عرفت من كلبوزة

     
  • At Wednesday, April 18, 2007, Blogger shayma said…

    ايه المصايب دى يا ربى
    ونرجع نقول البلد جرالها ايه الله يحرق الدماغ الفاضيه
    بس سيبك انتى دمك زى العسل:) سلامى

     
  • At Wednesday, April 18, 2007, Blogger None said…

    تمر حنه الجميله

    كل سنه وانتي طيبه ياقمر
    كل سنه وانتي منورانا وبلوجك منور بيكي دايما


    امووووووووووووووووووه

     
  • At Wednesday, April 18, 2007, Blogger YHY said…

    الوووووو
    فكرة جميلة وبوست هايل
    انا اول مرة اشوف مدونتك وتستاهل ان الواحد يزورها على طوووول
    وكلام جميل وكلام معقول مقدرش اقول حاجة عنه :D
    yhy
    يوسف المصرى

     
  • At Wednesday, April 18, 2007, Blogger YHY said…

    الوووووو
    فكرة جميلة وبوست هايل
    انا اول مرة اشوف مدونتك وتستاهل ان الواحد يزورها على طوووول
    وكلام جميل وكلام معقول مقدرش اقول حاجة عنه :D
    yhy
    يوسف المصرى

     
  • At Wednesday, April 18, 2007, Blogger essam said…

    يا تمورة رائعة كعادتك رغم المصيبة الموجودة فى البوست لكن عيونى دمعت من الضحك وعلى رأى الحكمة شر البية ما يضحك وكلما كثر شرها زاد إضحاكها اما المفاجأة اللى تموت من الضحك فهى فوز المذيع ده بلقب أحسن مذيع فى 2006 !!! ومش عاوز حد يموت من الضحك إحنا برضه منستغناش عن أى حد دخل البلوج ده فضلا عن أصحابه طبعا

     
  • At Wednesday, April 18, 2007, Anonymous طهقان said…

    بوست رائع
    والبرنامج دا انا مش باسمعه ...

    لكن

    شكله كده يفقع ال



    مرارة


    يا جماعة حد يشوف لاسامة النحنوح دا عروسة ...

    وهي تطهق عشته


    تمرحنة


    إزيك

     
  • At Wednesday, April 18, 2007, Blogger hesham said…

    تحياتى ع البوست اللذيذ

    يضحك اول مرة اقراه
    و يغيظ فى تانى مرة
    و يخلى الدمعة هتفر من عنيا فى تالت مرة

    مش عارف اقوللك ايه الصراحة

    الهيافة فى بلدنا عندنا منها اكتفاء ذاتى بالاضافة لفائض للتصدير

    و الحياء اتعدم و اصبح عملة نادرة عند البنات قبل الولاد

    ولاحظى انا بتكلم هنا عن الحياء مش الانحراف

    يعنى البت دى مثلا انحرفت و مشيت مع تلاتة و لسة هتمشى مع غيرهم

    ما علينا

    لكن ان يكون ماعندهاش ذرة حياء و تتصل وتحكى لنا كده عادى خالص

    هو ده اللى يحرق الدم

    اذا بليتم فاستتروا

    ولا حول ولا قوة الا بالله

     
  • At Wednesday, April 18, 2007, Blogger إياكش تولع said…

    على كدة اللى زى حالاتى و بيروح الشغل بمينى باص نمرته (واحد) ما يتجوزش من أصله!!!

    كل سنة و انتى طيبة يا عسل و عقبال ميت سنة

     
  • At Thursday, April 19, 2007, Anonymous Anonymous said…

    عودة تانى للمداخلة بعد التحديث بتاع تمورة والملاحيز بتاعتها اعتقد ان المسئولية الاكبر تقع على الاسرة هى دى اللى مفروض تربى وتغرس القيم والفضائل والايمان عند الاولاد لكن واضح من النوذج ده وزيه كتير اوى ان مافيش اب ولا ام ربوا اللى زيها التربية مش انهم يأكبوا ويشربوا ويكبروا ويصرفوا على ولادهم بس دى اى حد ممكن يعملها حتى الحيوان بيكبر ولاده وبيكبرهم لكن الناس دى هى المسئولة عن التفاهة والهيافة والحالة اللى بقوا ولادهم فيها تصدقوا انى سمعت من فترة ان فيه احد المواقع الجنسية على النت فيه حوالى تلات الاف بنت مصرية وحوالى 100 الف مصرى مشتركين فيه وطبعا اللى زيه كتير شفتوا التدهور والانحلال اللى بقينا فيه ده طبعا غير مواقع الشات اللى على النت وعلى الفضائيات تفتكروا كام واحد من الشباب دول قرا كتاب ولا اتفرج على برنامج جاد ولا حتى قرا صحيفة ولا موضوع ادبى ولا سياسى لكن من المؤكد انهم حافظين اغانى المطرب فلان وعلان وعارفين اخر البوماتهم ايه ماقدرش انكر ان فيه شباب كتير واعى ومثقف وواعى لكن دايما اللى بيبرز النماذج اللى زى دى احنا باختصار بقينا فى عصر من الاضمحلال الثقافى والاخلاقى وكل سنة وانتى طيبة يا تمورة

     
  • At Thursday, April 19, 2007, Blogger AbdElRaHmaN Ayyash said…

    ههههههههههههههههههههههههههه
    مش ممكن
    خطيرة بجد
    جميلة اوي اوي
    دي تاني تدوينة النهاردة اقراها عن البتاع اللي اسمه اسامه ده
    وقلت في المدونة بتاعة همسة قلم الرد ده http://hamset-qalam.blogspot.com/2007/04/blog-post_18.html

    اهه ينفع هنا برضه
    ------
    :)
    ده الطبيعي و الله يا استاذه
    بجد ربنا يستر
    لما الناس تتصور ان ده هو الصح
    يا ماما ده بيطلع في التليفزيون
    يبقى معصوم ان شاء الله
    يا حلااوه
    انا اول مره كنت اسمع عنه في فيلم (A)
    بس بغض النظر عن اسامة كشخص .. احنا عندنا ظاهرة اسامة منير
    الام تقول لبنتها روحي وخللي بالك لبابا يعرف
    الاب يقول لصاحب بنته خللي بالك من بنتي دي زي اختك
    الاصحاب اياهم يقولوا للاتنين ياد ده الدكتور القرضاوي حلل الخروج بين الاتنين المخطوبين في مكان عام
    وانتو مخطوبين واكتر
    انت مش تعرفها من سنة بحالها
    يا استاذه اسماء التمييع ده هو السائد
    حاجه تخنق

     
  • At Thursday, April 19, 2007, Blogger إبـراهيم ... معـايــا said…

    ههههههههههههههههههه
    هههههههههههههههههههههههههه






    .
    .
    ههههههههههههههههههههه

    ...

    هوا المشكلة إني عندي بررررد ، فالضوحـك بيطلع بصعوبة


    حقيقي إنتي فناااانـة مش خدااااااامة

    كلله كوم ، والحتة بتاعة (بابا كمان متعلقة بيه قوي) دي كوووم

    .
    .
    ولا تفسيرك للعربية 128 الـ ( بيضا ) يا خراااااااابي تحفففـة بجد

    و ف الآخـر تعليقك ع الموضوع كلله بالأحمـر ، حقيقي بوست راااائع


    إنتي متألقة يا تمر حنـة


    تحيااااااااتي

     
  • At Thursday, April 19, 2007, Blogger A.SAMIR said…

    بوست جميل فعلا
    انا اتكعبلت في المدونة هنا بالصدفة....بس قررت ماسيبهاش
    مدونة اكتر من روعة وبوست جميل
    تحياتي

     
  • At Thursday, April 19, 2007, Blogger وجع دماغ said…

    طيب وبعدين
    احنا اصلا محتاجيين كشعب اعادة تربية أخلاقية وسياسية
    أحتا محتاجين نتربى من الأول
    كلنا كبار وصغار
    لأننا كدا تقريبا وصلنا للبدروم هو فىحاجة أسفل من كده

     
  • At Thursday, April 19, 2007, Blogger Amr Ahmed said…

    وكالعادة
    بوست اكثر من تحفة

    احلي حاجة انك بتختاري اشياء
    فعلا الواحد عاوز يتكلم فيها

    وبالذات البرنامج التنح ده
    اللي البنات فيه بيتسوهوكوا ويتدهولوا
    تلاقي البت بتتكلم من ورا ابوها

    دي حاجة تمرض يا شيخة
    ويقولك حسني ماسكنا ليه

    طول مافيه شباب زي دول

    هيثم جمال مبارك
    هيحكمنا

     
  • At Friday, April 20, 2007, Blogger خواطر شاب غاضب said…

    يا جماعه كل واحد حر في تصرفاته
    فيه ناس بتحب اسامه منير
    و فيه ناس بتكره مش لازم نحجر علي راي حد و نتهمه بالتفاهه لمجرد انه بيعمل حاجه هو مقتنع بيها

     
  • At Friday, April 20, 2007, Blogger raspoutine said…

    كنت فاكر انى اول كومنت اتريه لغيرى مش ليا اتريه لغيرى مش ليا

     
  • At Friday, April 20, 2007, Blogger None said…

    هههههههههههههههههههههههههههههههههههههههههههههههههههههههههههههههههههههههههههه

    تحديث العربيات دا يجنننن

    الناس كلها ياتمرمر يا اوختشي بقت نيتها وحشه موووووووووت موووت مووت صراحه

     
  • At Friday, April 20, 2007, Blogger david santos said…

    We go all to today start to fight for the end of the wars, the badness and the tyranny. We go to start to fight for the peace, the friendship between the peoples, the tolerance and solidarity. We go all to fight so that the 2007 either year that it justifies to have civilization in our Planet.

     
  • At Friday, April 20, 2007, Blogger Anima said…

    ههههههههههههههه
    ضد الحكومة

    ايه يا بنتي ده؟ بتخرجي فيلم اسمه جينا و الرجال و لا ايه؟

    فراغ ايه و زفت ايه ما كلنا عندنا فراغ و ما بنعملش زيها

    يا دي الخيبة

     
  • At Friday, April 20, 2007, Anonymous Anonymous said…

    يعني ممكن نقول ان امثال هذا الاوسامه وهذه البثينة امثال مرفوضه لان تعطي صلاحية الرد علي مشاكل الشباب فما بالك لوكان هولاء الشباب أمثلة تافة وتعير عن مدي تخلف اجيال كامله نتيجة غياب الواعز الديني والتربية التي انعدمت فبها الرقابه الابويه ناهيك ان يكون الاب بلا اخلاق ولايعير ادني انتباة لمثل هذه الاشياء
    جينا هذة ممكن ان تكون الفتاة التي تعبر عن عينه من جيل كامل لا تقيس الامور الا من منظور (هو عندة كام بيضة ) يعني العربيه بتاعته موديل كام
    والمذيع اوسامة دليل علي التفاهه والخيابه ليست وليدة اليوم ولكنها من اجيال
    والقصه كلها بتسأل سؤال مهم جدا
    فين الرقابه علي كل هذة التفاهات والبذاءات
    اين اولوا الامر؟


    ارجو الا اكون قد اطلت
    تحياتي

     
  • At Saturday, April 21, 2007, Blogger توتة توتة said…

    عايزة اقولك ان البرنامج ده بيفقعني

     
  • At Saturday, April 21, 2007, Anonymous Anonymous said…

    بصراحة وبدون تكلف ومقدمات انتي مالكيش حل أنا فعلا لما أحب أضحك من قلبي بقرأ البلوج بتاعك انتي وأبو الليل وده مش معناه ان الموضوعات هايفة بالعكس انتو الإتنين بتعملوا المعادلة الصعبة موضوعات جدية وأراء سديدة مفلفة بطريقة كوميدية طحن

     
  • At Sunday, April 22, 2007, Anonymous السوهاجى said…

    معقولة محدش فاهم المقصود بكلام تمر حنه؟
    أظن انها تقصد أن الهجوم على أسامة منير و بثينة كامل غير مبرر تماما
    و كذلك الهجوم على البنت أيضا خطأ
    فأسامة يود انقاذ الجيل من الضياع و الأولاد ضايعين نتيجة سلسلة أخطاء مجتمع ممسوخ .. و محدش فاهمه - أسامه و بثينة بيحاولوا يفهموهم و ينقذوا مايمكن انقاذه
    أستاذه تمر أظن حضرتك اتكلمتى على الموضوع ده فى بوست سابق اسمه : الساعة كام فايدك يافندى -و كان بيحذر من عدم التواصل بين الأهل و الأبناء

    أرجو أن أكون قد أوضحت وجهة نظر صحيحة يا أستاذة الأساتذة.

    خالص احترامى و تقديرى و مودتى

     
  • At Sunday, April 22, 2007, Blogger قاسم أفندي said…

    اولا كل سنة وانتي طيبة ولو اني واخد علي خاطري يعني شوية .. عملتي عيد ميلاد في سمباتيك كافيه ولا حد عزمني ولا حتي دقت حتة من التورتة .. لكن ما علينا وكل سنة وانتي طيبة ونقول الووو
    بجد البوست رائع يا تمر والحمد لله اني معرفش لا أوسامة ولا نجوم اف ام دي اصلا وحتي ال 27 اللي كانت عندي كانت حمرا .. أيوة حمرااااا
    تحياتي
    :)

     
  • At Sunday, April 22, 2007, Blogger صاحب البوابــة said…

    اضحكتينى

    حقيقة ما يحدث الآن لهذا الجيل

    هو صورة مباشرة

    لثقافة التفاهة والاسفاف

    الذين يحاولون نشرها منذ زمن

    واعتقد انهم قد نجحوا هكذا

    تحياتي

     
  • At Monday, April 23, 2007, Blogger may said…

    انتي كده طلبتي القصاص من الناس كلها
    هوا الغلط فعلا مش علي حد غير الام والاب
    لان لو في ام واب واعيين لولادهم وبناتهم بالتحديد مكنش هايبقي في برنامج زي برنامج عمو اسامه منير
    احنا مش هانلوم اسامه منير ولاحاجه لاه هوا مالوش اي ذنب
    الذنب علي الناس دي بجد
    ياريت الناس تفوق لاولادها اكتر من كده
    كفايه اوي اللي بيحصل الايام دي
    هايحصل ايه اكتر من كده
    يارب استر علينا اميييييين

     
  • At Monday, April 23, 2007, Blogger Integrated Functions said…

    عزيزتي تمر حنة

    بوست روعة

    أسلوبك رشيق

    شكراً على خفة الدم اللي أسعدتني

    بتمنالك التوفيق دايماً

    وتحياتي ليكي ولقلمك النابض

     
  • At Monday, April 23, 2007, Blogger Esmeralda said…

    امال الناس فاكرة ايييييييه
    هو ده العادى دلوقت
    انتيمى و انتيمتى
    و عادى يعنى ( الكلمه ديه بقت بتحرق دمى )

    ايه المشكله انى احكيله احنا صحاب بس مفيش حاجه

    و عادى يعنى

     
  • At Tuesday, April 24, 2007, Blogger yamen said…

    تحفة بصراحة..

    و مع الاسف ضحكت..مع انها مصيبة و حاجة تغم

    بس زي مابيقولوا ..

    هم يضحك وهم يبكي

    تحياتي

     
  • At Tuesday, April 24, 2007, Anonymous طهقان said…

    هي تمرحنة راحت فين ؟

     
  • At Thursday, April 26, 2007, Blogger فارس وحيد said…

    للأسف هي دي حقيقة الأجيال الجديدة
    والإعلام بيساعد عليها، لما بتاع ستار أكاديمي يكسب قد كده مال وشهرة، ويبقى بطل قومي ولاعب الكرة يبقى رمز مصر.. وكاترة الجمعات والقضاة ينضربوا في الشارع
    لازم يكون ده حالنا
    بوست رائع جدا
    تحياتي

     
  • At Thursday, April 26, 2007, Blogger zordeak said…

    ههههههههه

    عندك حق اوى اوى

    انا كتبت قبل كده عن اسامة منير برضه


    زى ما انتى قلتى

    الكارثة مش فيه

    هوا بينى وبينك وجوده يعتبر كارثة

    لكن الكارثة الاكبر فى اللى خلوه يطلع

    وفى اهل الناس اللى بيتصلو بيه

    وفى اللى ماسكين البلد اللى خلو دماغ الشباب فاضية للدرجة دى


    حسبنا الله ونعم الوكييل

     
  • At Thursday, April 26, 2007, Blogger Sampateek said…

    اخبارك اية؟
    بطلتي تدوين و متفرغة للراديو و اس اس من من و لا اية

    نشري

     
  • At Thursday, April 26, 2007, Blogger الدرويش المرووش said…

    صحيح
    شر البليه ما يضحك

     
  • At Thursday, April 26, 2007, Blogger الأرمـوطــي said…

    انا جيت اعزمك مخصوص على حفلة لرامى صبرى يوم الاحد الجاى لمذيد من التفاصيل ادخلى مدونتى
    سلام

     
  • At Thursday, April 26, 2007, Blogger Horas said…

    يا بنتي انت بتكتبي البوست وتهربي رحتي فين بصحيح

     
  • At Tuesday, May 08, 2007, Anonymous mai said…

    عرضك ظريف للواقع

    وفعلا بحس دائما ان البرنامج بتاع اسامة مستفز

    اما اعترافات ليلية انا كنت صغيرة ساعتها بس لغاية دلوقتى انا فاكرة قصة واحد جه له الايدز وبدا يعيش لوحده وكان عايز مساعده فى انه يتاقلم مع الوحدة والمرض

     
  • At Wednesday, May 09, 2007, Blogger شيماء الجيزى said…

    يعنى عرضتى الموضوع بفكره رائعه
    بجد مشكله بتمر بكتير من البنات
    الى مش لاقيين حد يوجههم
    تمر حنه انتى رائعه
    انا زورتك قبل كده بس دى اول مره اعلق
    تريبا انا كان عندى نقص انى معلش عندك
    تحياتى الحاره ليكِ
    سلاماتى

     
  • At Friday, July 13, 2007, Blogger tayehfelmadina said…

    قلتى الى كان نفسى اقولو من زماااااااااااااان الله يخرب بيت الاب الغير متواجد و الام الملهيه عن بناتها و اولادها و لله الامر من قبل و من بعد

     
  • At Tuesday, October 28, 2008, Blogger Blank-Socrate said…

    حرام صدقينى انك تبطلى كتابه
    تحياتى

     

Post a Comment

Links to this post:

Create a Link

<< Home