أيوه خدامه

Monday, February 19, 2007

سيستم الألفطة .. للرجالة المتظبطة

حبيباتى .. أخواتى .. بنات جنسى .. بما انى واحدة مشاغبة و من الستات المقرفة اللى بحب أشاكل نظمى و أبو رحاب و هيركليز و الرجالة الوحشين دول .. فقد تفتق نافوخى عن سيستم جديد هاحكلكوا عليه .. و سميته" سيستم الألفطة للرجالة المتظبطة" .. يعنى سيستم عنب هنريح و نستريح ..
فقد استنفذنا الكثير من الكهرباء فى السساتم (غير البساتم) التقليدية زى أسلوب : القفة أم ودنين و أسلوب أطبخى ياجارية .. حتى أسلوب" إلهى و انت جاهى ماترجع" و" داهية تشيل الأبعد" .. و فى النهاية برضك لا بيتعدلوا ولا بطيخ .. فككوا بقى يا أخوات من الحوارات التراديشيونال دى و هيا بنا نلعب:
الرجل مهما كان مركزه أو طول شنباته .. فيوجد بداخله طفل (مش بالمعنى اللفظى طبعا.. ركزوا معايا و مش عايزين هطل) لآ و طفل عربيد كمان .. طفل بمعنى انه بينضحك عليه .. أيوه همّا بيحبوا كده مش زيّنا نحقق و ندقق و ندوس عالميت لحد ما.. يهوّى – همّا أطيب مننا : كلمة فضحكة فحدوتة قبل النوم و حدوتة بعد المعرفش ايه .. و خلاص بقى فجيبك – طيب ايه اللى بيمنعنا من ممارسة الأسلوب ده عادةً ؟ اسمالله عليكوا – بنبقى مش طايقين شكله و لسان الحال بيقول مايستهلش ده مايل و ايه يعدله.. صح؟؟
لأ يا قطط .. منظور جديد .. فكر جديد .. رؤية أفضل للمستقبل .. فكوا الكرافتات :
هننام مغنطيسياً: كل واحدة فينا هتسرح شوية فى بعض الأشياء : الطلاق .. نظرة المجتمع المتدنية للمطلقة .. و حتى لو رفسنا نظرة المجتمع فى ظل السموات المفتوحة : فرصة الجواز مرة تانية و فى أيدك عيلين تلاتة بعيدة شويتين .. ولو قلتى مش مهم جواز تانى فالوِحدة مُّّرّة ياصاحبى و الحياة ناشفة و عايزة ونس .. برضه الأولاد محتاجين حمار يركبوه .. سورى أب يحميهم و يشكمهم فى ظل العولمة و غفلة شرطة المخدرات و الآداب العامة .. صدقينى لو رحلتى هتفرحيلك كام يوم و بعدين هتجيلك شوية أمراض نفسية أبسطها : انفريوريتى كومبلكس .. هلاوس سمعية ..حنين للنكد .. شروخ فى الزور من هت العيال ..
طيب .. تعالوا ناخدها تحدى و نرفع شعار :" ياللى اديت لحياتى فحبك طعم و ريحة .. مش هتنازل عنك أبدا دانا تلقيحة"

أولا: شحن نفسى مستمر .. طول مانتى فى البيت فى الشارع فى الشغل : أبو عيلاء ده سيد الرجالة – أبو عيلاء ده فل الفل – أبو عيلاء ده سبعى – أبو عيلاء ده جملى ..هو فيه زى أبو اللوووول و هكذا حتى تصدقى كل الحوارات دى.

ثانيا: تغاضى تماما عن ريحة شراباته .. لون غياراته .. شخيره بالليل .. حسه الكوميدى المتدنى .. صوته العالى .. مامته .. اخواته الحيزبونات .. نسيانه لجميع المناسبات المفرحة .. طريقة أكله .. ولا كأنك شايفه حاجة : انتى ست فى مهمة قومية و يجب أن تضحى يا زينب .. من أجل كرامة المرأة .. من أجل أبنائى .. و فوق ذلك كله : من أجل مصر (مع تحيات الحزب).

ثالثا: شوية تنازل بقى يا بيضه عن بعض الحقوق : مانتى كده كده متنازلة و ان جالك الغصب خدوا بالرضا : استخدمى بعض الألفاظ الجديدة : مفيش مشكلة يا حبيبى – أنت تعبان و شقيان مالصبح ربنا يكون فى عونك .. بطلى مصمصة و قلبة وش و نعى فبختك و بلاش سيرة الناس اللى خيبتهم السبت و الحد – خللى خيبتك اتنين و خميس مع الحلاقين يا أوكّة.. لأ بجد ماتقفيش عالواحدة و كبرّى .. كبرّرّرّى بلاش أتامة و انسى دور أم الغضب و اهو يكفيه شرف المحاولة.

رابعا: روحى للمزيّن يا زينب ..سياسة التجديد هى سياسة المرحلة : بصى عالأوكش بتوع الكليبات و اتعلمى .. فورشه كده و فورشه كده مش عيب .. و ابقى خنصرى تمن الليالى دى من المصروف – عادى يعنى و عليّا الفتوى دى – حقيقى أبو عيلاء هينبهر و هيشوفك أوزى حتى أسألى خالتك هدى.

خامسا: أول الشهر .. دخول المدارس .. الأعياد .. المصايف .. و مثل هذه المناسبات المكلفة – بلاش بواخة و إلحاح و همز و لمز .. بصى السيناريو ده : أبو عيلاء .. عامل ايه ( أوعى تتكلمى زى اللمبى لتضيعينا) .. حبيبى.. روح قلبى .. نور عينى .. الجمعة الجاية فرح بنت أخوك .. وطبعا لازم أشرفك .. أمّال ايه مش أنا حرم أبو عيلاء .. أحلى راجل .. أجمل راجل.. ( تقمصى دور الصحف القومية ) ولازم أدخل مأنجة دراعك كده و انت فخور بيّا .. و حياتك يابو لولو (غير بتاع السمين اللى فى الناصرية) انا شفت فستان حلو قوى يليق بمراتك حبيبتك بأربع تلاف جنيه .. أنا عارفة انو غالى بس أنا ليّا مين يعنى غيرك و لو مرات أبو عيلاء مالبستش الغالى مين يعنى هيلبس؟ أترك لكِ الأجابة على اس ام اس : مين اللى هيلبس؟ – بس ماتجيبيش سيرة مدونتى الله يراضيكى و يخليهوملك .

سادسا: انزلى من على ودانه شوية فى أمور الصيانة المنزلية و عوأ العيال و متبقيش من الكفار .. يعنى غير طبيعى كل ليلة تستقبليه بالموشح الأسرى اياه : بقولك ايه .. الأنبوبة خلصت و السيفون بيشر و الإريال اتعوج و السرير بيزيأ و الواد طردوه مالمدرسة و البت بتغيب بالليل .. ماهو لازم يفرنقع .. و النعمة لو لقى متوى تانى ليدعك الفانوس و يسيبهالك مخضرة .. و استعملى طريقة لطيفة لطلباتك .. و كثير من المقدمات .. بلاش ضغط عالافندى .. و خليكى خفيفة ياااااازينب.

سابعا: تابعى معاه مشاكله – حسى بيه – و اديله اهتمام و انتى بتسمعى يعنى لاتتاوبى ولا تعلّى التليفزيون ولا تسفهى من كلامه .. حسسيه انك بالروح بالدم نفديك يابوعيلاء .. و ياريت لو تنحازى لآراؤه شوية و تثنى على سعة أفقه و بعد نظره و فكره الثاقب (مش عيب .. رؤساء تحرير و بيقولوا كده .. هم أحسن منك؟) .

ثامنا : و أخيرا .. شوية حنيه يازوبه .. الرجاله بييجوا عالحنّية .. أنترى فوسط كلامك مصطلحات حنينة : ألف سلامة يا عنيّا .. هتوحشنى .. ان شالله أنا ياقلبى .. ياستى تخيلى انه الولا عيلاء ابنك ثم تعاملى مع الهدف ..

و ادينا بنجرب .. ورانا إيه .. ورانا إيه .. ماشى يا ستات .. نلتزم بالخطه .. نطول بالنا .. فى الأول ممكن مايبقاش فيه نتايج سريعة و هيبقى فيه جس نبض من الطرف الآخر ولازم نعرف ان دى خطه طويلة المدى ... على بركة الله.......هجوووووووووووووووم

Labels:

53 Comments:

  • At Monday, February 19, 2007, Blogger maged stephen said…

    أنا من أول تعليق عندك
    كتبت وقلت
    أنك دماغك متكلفة
    وطبعا بتأكدى أنى رأى صح الصح
    طيرتى الحجرين من دماغى
    روحى يا شيخة وتعالى بسرعة

     
  • At Monday, February 19, 2007, Blogger Ayat said…

    أستاذة و رئيسة قسم .. معاكى حق فى الحتة بتاعة ان الراجل جواه عيل (وبراه وغلاوتك) دى .. بس فيه حاجة بقى خطرت على بالى .. إفرضى ابو عيلاء عجبه الدلع وساق فيها وراح مصدر العبيطة تماما لأم عيلاء .. تعمل ايه ساعتها؟ يعنى استحلى انه يدلع من غير مايدلع .. وانتى عارفة الصراحة راحة وهو مابيعرفش على رأى الخالة مروة .. تعمل ايه ساعتها أم عيلاء؟!! خصوصا انها لو انقهرت على روحها ورجعت تقلب وشها تانى مش هياكل معاه خصوصا انه عرف انها تقدر تدلعه على طول .. وانتى عارفة جواه عيل والعيال بتشبط وهاتك يا نكد .. يبقى إزى الحااال؟!! نورينا يا أختشى يخليهملك وتفرحى بيهم :) .. تحياتى يا أستاذة

     
  • At Monday, February 19, 2007, Blogger Khalid said…

    good mornin ya doc:)you are unbelievable wallahi. you shoud have your own talk show.
    "tamr7inna hard talk" or maybe "tonight show with tamr 7innna" something like that:)
    ta7iyyat katheera o ta9feeq shadeed.
    naharik fol ya doc:)

     
  • At Monday, February 19, 2007, Blogger شجره الدر said…

    جامد السسيستم ده ياختشى
    بس اصلك عارفه من ساعه ما حوروا المثل بتاع ضل راجل ولا ضل حيطه
    وبقت ضل حيطه لان الحيطه مش هاتسيبك وتمشى وتقعدى طول حياتك تجرى ورا ضل
    وانا اصلا شيلت صنف الرجاله كلو من السيستم
    يعنى ياحب وغرام يابلاش احسن
    هو ديته 30 يوم جواز
    ونقلبووووه
    زى وحدووه كده
    يعنى بالخلع بقى بالطلاق
    بالاكياس
    كلو ماشى
    وتذكر انت فى قلبى
    وابقى سلميلى على ام عيلاء وبلاش ابوه

     
  • At Monday, February 19, 2007, Blogger bastokka طهقانة said…

    مفيش فايدة يا اوكة
    زينب عملت اللالي
    عارفة اللالي؟
    صبغة صبغتله دهان دهنتله عدسات لصقتله فساتين لبستله و هو مهدود و ايه يعدله
    لا نافعة معاه لا الفطة و لا حنتفة و لا سأسأه و لا مهيصة
    كئيب كئابة الدرفيل اللي عايش في الصحرا
    اقولك اية؟
    تعالى زوري طهقان و طهقانة و انت تفهمي

     
  • At Monday, February 19, 2007, Anonymous Anonymous said…

    ياختي وماله أبو عيلاء ؟ دة فل الفل ، بس بشرط : ألا وهو وجود النت . الإنترنت قادر على جعل الواحدة تتغاضى عن دم أبو عيلاء الوائف ، وعن تكشيرته ، وعن زعيئه وشخطه ف العيال عشان مائصـَّوش ضوافرهم وماغسلوش رجليهم ئبل النوم وسنانهم !!! وعن وعن .... إلخ
    فليحيا النت ، حامي البيوتات

     
  • At Monday, February 19, 2007, Blogger مصر هى أمى said…

    ايوة خدامة
    افتكر ديه اول مرة ازورك
    بس بعد البوست ده مش هتكون اخر مرة
    صحيح فكرة حلوة اوى ان الست تعمل كده لجوزها بس ايه المانع انه يكون كده حقيقى مش تمثيل بصى انا راجل وبقولهالك وحقيقة الست لو ريحت الراجل ( ريحت بمعنى بسطته مش ريحته يعنى قتلته ( لو بسطته قيراط هوا هيبسطها طول الوقت وعموما جربوا وانتوا هتشوفوا ان الرجالة كويسة

     
  • At Monday, February 19, 2007, Anonymous Anonymous said…

    أولا احب اقولك ان ديه أول مرة اعلق على مثل هذا النوع من الكتابات والحقيقةالبوست بتاعك هايل وانتى تتمتعى بخفة دم محصلتش ده غير ان نصايحك جايه فى وقتها تمام وماله يا حبيبتى نيجى على روحنا شويتين ونشوف النتيجه ايه .... يمكن ينصلح حاله ... واوعدك ابلغك بالأخبار
    تحياتى ليك يا جميلة

     
  • At Monday, February 19, 2007, Blogger admelmasry said…

    هههههههههههه

    يا بنت الذين ؟

    طب اقولك ايه بقي المرة دي ؟

    هههههههههههههه

    لا تعليق

     
  • At Monday, February 19, 2007, Blogger يا مراكبي said…

    نوافق ونؤيد ونشجع ونبايع .. دي مش كورة .ز دي مزيكا

    ثواني أنادي الحاجة مراتي تيجي تقرأ وأرجعلك تاني

     
  • At Monday, February 19, 2007, Blogger قاسم أفندي said…

    والله مش بطالة الخطة دي بس ميكونش ليها جزء تاني
    عيل عيل بس أدلع .. الله
    امضاء
    أبو عيلاء
    بجد بجد أنتي مسخررررررررة

     
  • At Monday, February 19, 2007, Blogger تمر حنه said…

    Maged stephen
    جرى ايه يابن ستيفن .. هو سلمنا عِلِى عليك ..ولا انت نسيت العنوان؟ و كلنى بكلمتين عشان أسكت .. عالعموم ماتاكلوناش بشوكه و كلونا بالمعلقة

    Me
    يوووه يا مى !!! يعنى انتى خايفه تضحكى له ماتعرفيش تكشرى تانى؟؟ مش دى الروح المطلوبه – خشى برجالتك و كلك تفاؤل .. خللى بالك النفساوية مهمة جدا فى خطتنا دى و ماتيأسيش

    Khalid ben Jarrar
    نهارك قشطة يابن جرار يا غالى .. بص يا خالد نهار ماتخطب تجيبلى العروسه أرسيها على كل حاجة .. سيبهالى انت بس و مش هتندم

    شجرة الدر
    يا شجرة السكه اللى ماشية فيها دى آخرتها مش حلوة ( و انتى عارفة القبايب بتلسوع فى البرد ) و أم عيلاء بتسلم عليكو نفر نفر

    Bastokka
    ايه الباساتوك ده .. اللى ماشى يتوك ده .. ايه يا باساتوكتوك .. يسرى ولا تعسرى – كلنا طهقانين و مزفتتين مش طهقان و طهقانه بس – بس وربنا جربى بس .. و بعدين أنا ملاحظة انكو بتحتكوا ببعض كتير
    محتاجين مسافة .. شوية هوا بس عشان النفس و عشان التجديد
    خدى منى و جربى – و ادعيلى

    أزئوزة
    برافو أزئوزة .. تخلصتى من عقدة الأتامة .. سقفولها – يبقى نقطة جديدة هنا : لازم يكون عندك .. أختى المواطنة – هواية مفيدة ترفع من معنوياتك و تفرغى فيها غيظك – و لتكن الأنترنت
    و لكن احرصى أختاه ألا تزيد مدة جلوسك عالكومبيوتر عن 22 ساعة يوميا حتى تجدى الوقت الكافى لزوجك و أولادك ..

    مصر هى أمى
    أنا مفتكرش .. أظن انك شرفتنا قبل كده .. بص الموضوع هيبتدى كده و كده .. و لما يحصل المراد من رب العباد هنستحلى اللعبة و هنكمل – ولو مارتجعتوش يا رجالة هنريحووووكوا – راحة أبدية

    Emo
    و احنا مستنيين النتيجة يا ايمو .. بس احيات أبوكى ماتجيبيش سرتى تحت أى ضغط سواء معنوى أو جسدى

    ادم يابن المصرى
    بص يا آدم .. الوثيقة اللى بين ايديك دى كنز الكنوز و سر الأسرار .. اطبعها و كبرها و بروزها و حطها تحت السرير .. نهار ماتتجوز بالسلامة خد العروسة من أول ليلة .. تخش أوضتها تلاقى الوثيقة متبروزة و متعلقة .. تقراها و تحفظها عن ظهر قلب .. مع تمنياتى بحياه سعيدة

    يامراكبى
    ايه ده .. المراكبية جايه؟ سلملى عليها .. بس أمنتك لو شفت حبايبى لا تسلم و ترد عليّا

    قاسم أفندى
    أبو عيلاء أفندى .. مش مطمنه لكو برضه .. الفار بيلعب فى عبّى ..كلمة فى سرك : بكره النكد بكره"

     
  • At Tuesday, February 20, 2007, Blogger الدبور said…

    اكتر حاجه عجبتني في البوست كلمه رفسنا دي
    مش حاسه انها مش مناسبه وتمشي مع كائنات اخري اكتر من البني ادمين
    وانا معاكي ان شعار المرحله اللي جايه هو التجديد و التغيير
    وابوعيلاء ان شاء الله هينبسط و ينشكح
    انت جبتي الفكرة دي منين ؟
    اصلها جامده جدا

    نهارك و نهار ابو عيلاء لذيذ
    الدبور

     
  • At Tuesday, February 20, 2007, Blogger tota said…

    تمرمر
    انتى بتلعبى فى المنتخب من امتى
    شكلك من ايام الجوهرى

    المخطط الاجرامى فظيع يا تمورة وابو عيلاء هيسلم النمر بعد اول طلعة

    وزينب نوياها نوياها
    الا بالحق يا تمورة
    المخطط ده هتطبقه زينب على ابو عيلاء
    طيب ملقيش عندك واحد فاضى اصل اللعب على دكة الاحتياطى فى الموضوع ده مش هينفع
    لازم بقى نزل الملعب علشان نمشى على الخطة الهجومية
    مش هنفضل متفرجات على طول بقى وخاصة بعد التشجيع ده كله

    تحفة كعادتك
    تحياتى

     
  • At Tuesday, February 20, 2007, Blogger أبو محمد said…

    برغم اعجابى بكتاباتك الا انه لايليق تشبيه الزوج بالحمار حتى من باب الهزار ولا ايه ياأم العيال

     
  • At Tuesday, February 20, 2007, Blogger مصر هى أمى said…

    ايوه خدامة
    صدقينى لو عملتوا كده الحياة هتبقى كويسة
    ثم ايه هنريحوكووا راحة ابدية طب استنى عليا لما ادخلها الاول بعد كده ابقى ريحينى بس انا والله كويس وناوى اعامل مراتى كويس بس هيا تتنيل وتيجى الاول وبعد كده نبقى نشوف

     
  • At Tuesday, February 20, 2007, Blogger جبهة التهييس الشعبية said…

    اوعي اوعي اوعي

    اللي بتعمل بنصيحتك بتاخد على قفاها بالشبشب

    اسأليني أنا

    اسكتشي اسكتشي اسكتشي

    مش انا عملت زي ما بتقولي واخدت احسن خازوق متقلوظ

    بصي

    نصايحك دي ح تخرب البيوت

    اسمعي علكي تستفيدي

    شوفي يا ستشي

    الرجالة بيحبوا النكد

    ايه بقى

    تلاقيه ماشي يشتكي لطوب الارض

    دي بتنكد عليا

    دي خانقاني

    لاااااااااما اقدرش اتأخر

    دي عليها لوية بووووووووز اعووووووذ بالله

    بس وربنا وربنا وربنا وربنا وربنا


    لو ما عملتيش كده

    لياخدك على قفاكي ويمرمط بيكي البلاط

    اقول لك حاجة

    ولو انها صخصية شوية

    بس انا ما يهونش عليا خراب البيوت

    انا اصلي كنت عاملة الملاك الذي ينقصه الجناحين

    ومبتسمة على طول

    ومطنشة على طول

    وعاملة نفسي مش واخدة بالي من الفشر والكدب على طول

    وعلى راحتك يا حبيبي

    وعنيا يا سيد الرجالة

    وكل شوية يطلب مني طلبات فوق طاقة البشر

    وبقيت الدادا والسكرتيرة والخدامة ومديرة الاعمال وووووووو

    ما تعديش

    اخرتها ايه

    انفجر في وشي وقال لي: مااااااااالك

    ما بتزعليش ابدا؟

    مالك كل ما اطلب منك حاجة تعمليها وانت مبتسمة وسعيدة ولا كأني باطلع ميتين اهلك


    عمال اطلع في دين امك وانت فيه ايه؟

    مش بتعترضي ليه؟

    وراح مطلقني

    بالشفا

     
  • At Tuesday, February 20, 2007, Blogger جبهة التهييس الشعبية said…

    بمناسبة المزين

    انا كنت باعمل في نفسي ولا اللي بتعمله هيفاء وهبي

    واقول له مش ملاحظ حاجة؟ يقول لي: عادي ما انت بتنضفي البيت كل يوم....

     
  • At Tuesday, February 20, 2007, Blogger جبهة التهييس الشعبية said…

    بمناسبة المزين

    أنا كنت باعمل في نفسي اللي بتعمله هيفاء وهبي

    وارجع من عند المزين وانا على سنجة عشرة

    مش ملاحظ حاجة يا حبيبي

    يقول لي بمنتهى الرخامة: عادي ما انت بتنضفي البيت كل يوم فيه ايه جديد؟


    ومرة برضه اتخانق معايا خناقة لرب السما

    ليه؟

    اسمعي: انت بتلحقي تعملي ده كله امتى

    امتى نضفتي وطبختي وعملتي الشغل بتاع المركز - اصل ياختشي كان عنده مركز اسم الله لحموم الانسان - وكمان عاملة شعرك ومتسنجفة

    إنتي إييييييييييييييييه

    اففففففففففففففففففففففففففففففففففففففففففففففففف

    ها

    لسة متمسكة بنصايحك

    اوعي وشك بقى

     
  • At Wednesday, February 21, 2007, Anonymous Anonymous said…

    يا سلام لو شوفتم المنظر من الناحية التانية

    لو شوفتك ابو عيلاء فاكر ايه
    لو شوفتوه ازاى ماشى يتبختر وراسه فى السماء وداخل بيته دخله الاسد على عرينه

    لو شوفتوه وهى فاكر ام عيلاء بتلف فى فلكه وبتقدس طلعته وبتلهج بتبجيله

    ياسلام وهو قاعد مع اصحابه بيحكى على مراته اللى بتقوله كل يوم يا سيدى وتاج راسى وتقلعه جزمته وتكبسه له رجله

    ولا لما بيحكى على الفحوله والرجوله والمعركه اليوميه اللى بيخرج منها مكسر القوضه وهادد الحيطان

    بس نعمل ايه
    الستات افترت فعلا
    وبكره يا ام عيلاء تعرفى قيمة ابو عيلاء

    ويسلط عليكى ابو عيلاء
    مبارك

     
  • At Wednesday, February 21, 2007, Blogger أميرة البلطجية said…

    خلاص يعني؟
    ستات مصر قالوا كلمتهم
    موافقين يا ستات؟
    موافقين
    على بركة الله
    (رغم اني لسه معنديش راجل..بس مش مشكلة..اهي معلومة ليا وللزمن)

     
  • At Thursday, February 22, 2007, Blogger karakib said…

    بعد البوست ده .. احب أهنيء كل الرجاله المتجوزين
    شوفوا بقي يا جدعان
    كل واحد يخش بيته يقول لمراته عايز أشرب نسكافيه و لما تبتسم قولها بلبن العصفور و لو ابتسمت زي ما المدونة بتقول اسألها انت بتضحكي ليه
    لو الحيله الأولي ما نفعتش و فضلت مبتسمه نجرب واحدة تانيه لو سمحتي يا ... كل واحد يملا النقط بمعرفته عايزك تقشري عشر برتقالات أنا جعان ! لو عملت كده فعلا
    يبقي خليها تاكلهم
    فرصة يا جدعان بقي
    يا سلام بقي لو شوية ميه سخنه أحط رجليا فيهم و لو سخنه تبقي تقول لها سخنه أوي برديها و لما تبرد سخنيها
    لما نشوف بقي أخرتها ايه
    قال يبتسموا قال
    كل يوم من ده !! علشان يبقوا يبتسموا و هما بيمثلوا عالرجاله كويس

     
  • At Thursday, February 22, 2007, Blogger Amr Ahmed said…

    ههههههههههههههههههههههههه

    يخرب عقلك

    والله العظيم عسل

    مع اني راجل

    بس التكنيك ده فل اوي


    تحياتي علي البوسة الرائع ده

     
  • At Friday, February 23, 2007, Blogger تمر حنه said…

    الدبور
    نهارك ألذ يا دبووور ... و مالها نرفس يعنى؟ مانتا بتقرص..... حد كان قالك حاجة؟

    TOTA
    لأ ياتوتا .. نت قبل الجوهرى توعى على الخطيب و جمال عبد الحميد و زيزو و الناس دى؟ وياما دخل فينا اجوان و حان الوقت للتهديف .. يومين كده و نرجع تانى يجيبوا فينا اجوان .. نستلقطلك مركز ونج لفت فاضى ..؟

    أبو محمد
    دعنى أعبر كما يروق لى .. مش انت و ابوعيلاء .. الله انتوا ليكو أكل ولا بحلقه؟

    مصر هى أمى
    خش و انت نيتك حلوة كده .. و سدقنى هتبقى عيشه فل .. ربنا يرزقك

    جبهة التهييس الشعبية
    أولا : النصايح دى مش لأول جوازة .. دة لتانى جوازة لأن دايما الأولانية بتبقى سخام
    ثانيا: فيه رجاله واطية كده كتير .. و فيه رجالة أقل وطيانا.. القصد .. ننسى خاااالص أم اسمالله عليه ده .. عادة لما بتبقى الجوازة الأولانيه كحلى مع واحد مريض زى ده .. التانية لازم تكون أحلى – على الأقل من منطلق المقارنة
    انتى وقعتى فواحد عنده مشاكل نفسية أول مرة .. و ده مش الديفولت .. ده مريض يابنتى .. ننساااه خالص ,, مش هنقصد اننا ندور على حد تانى لأن الأنتظار بيبقى متعب كتير .. دللى حالك يا تهييس .. و خللى بالك انك كنتى بتعملى كده فى الأول و انت لا تدركين أصول اللعبة .. اللعبة انك تبقى عارفة انك بتلعبى .. انك انتى اللى تقولى ستوب .. كهربا .. شد الكبس ......ماتخليش حد يقوهالك .....

    HARMLESS
    مايفتكر ..ولا يحكى .. ولا يولع .. يعيش أبو علاء فى النووو وير !!!! لو عندو شعور بالنقص هيتعدل جدا عشان يفضل متمتع بضعف زينب .. ولو معندوش عقد هيعاملها بما يرضى الله...

    أميرة البلطجية
    أسمك جميييل و رومانتيك صحيح ..و على فكره لو لسه معندكيش راجل .. منصحكيش بالسيستم ده .. الكلام ده لما الحياه تأتم و تغمق بس ...

    KARAKIB
    قلبى وربى غضبانين عليك يا كراكيب ... يا رجاله ياولاد ال .....وال ,,,,, و ال,,,,, هه بس .. والهى و انت جاهى ,,,,

    AMR AHMED
    طب احنا لسه ماعملناش حاجة و مسكتلنا سيجار و سرحت و عشت الدور ....

    CAESAR
    أولا : مين شيرى أجروف دى .. يعنى كات صنعتها ايه؟؟؟؟ مش لاقيالها أتر فى السموات المفتوحة
    ثانيا: بس ياللى كليوباترا جابتك برمش و كنت بتجيلها من روما على ملا وشك .. و على فكره كليو كانت ماشيه عالسستم بتاعى و جابتك يا سيزر .. آل شيرى آل داحنا اللى بدعناها ياخواجة

     
  • At Friday, February 23, 2007, Blogger Blank-Socrate said…

    بس سيبك انت بتلفوا تلفوا و تجوروا ناعم مع ابو عيلاء و بصراحه هو ملهوش الا ام عيلاء و يا رب اتشنكل فى ام عيلاء فاضيه فى اقرب وقت .....

     
  • At Friday, February 23, 2007, Anonymous Anonymous said…

    طيب يا ستي و اللي مش متجوزة زي حالاتي؟

     
  • At Saturday, February 24, 2007, Blogger عمر said…

    تمر حنة: والله انت دماغك عالية جدا... بس بيني وبينك بقي انا الخطة دي مش داخلة دماغي.. حاسس كدة انك حطانة كلنا - الرجالة يعني - في قفة واحدة وانا مش بحب قعدة القفف.. والله يا تمر مش كلام جرايد ولا مجلة ميكي صدقيني مفيش أحسن من الصراحة والثقة والتفاهم، كل الرجالة وكل الستات عايزين يرضوا رغباتهم ويبقوا سعدا، مفيش حد مش عايز يحس بالاهتمام والراحة والرضا.. واحنا العيشة في بلدنا بقت صعبة.. لو كل واحدة خدت جوزها علي قد عقله وكل واحد خد مراته علي قد عقلها يبقي حيثقوا في مين في الآخر؟ برده حيفضلوا حاسين بعدم الرضا والراجل يا حينحرف يا حيتقشف والست برده يا حتنحرف يا حتتمرد.. كل بني آدم نفسه يكون سعيد وكل بني آدم ضعيف أمام رغباته ولازم نتعامل مع بعض بشيء من التفهم والصراحة

    والسلام عليكم ورحمة الله وبركاته

     
  • At Sunday, February 25, 2007, Blogger سكينة said…

    سعيدة بتجاوزك للغمة في حياتك وتجدد طاقتك التي بدأت بيها المدونة
    نسيت حاجة في غايةالأهمية كل خطة لا بد لها من مدة زمنية محددة
    ويلزمها أيضا باك آب للطوارئ
    فكرني كلامك بخلاصة المحاربات القدامى بره وجوه فرشتلك وأنت مايل وإيه يعدلك
    عموما سأراقب نتيجة الخطة على نفسيتك من خلال كتاباتك
    ركزي معي في أول حرفين من اسمهم رج اسم الله عليك يعني حاجة كده مش ثابتة ولا ليها راس ولا رجلين
    وانا عموما تبع جمعية جايين نهدي النفوس
    :)

     
  • At Sunday, February 25, 2007, Anonymous Anonymous said…

    تمرمر
    إنتي الدَكتورة النفسانية بتاعتي ... أنا نصـَّبتك وبوَّأتك . ينفع ياست الدَكتورة أجرب ف الواد ابني الشيستم دة الأول ؟ ولو نِفع معاه ، هاكون تمرست على تنفيذه ، فهاجرَّبه مع ابوه. ممكن؟

     
  • At Sunday, February 25, 2007, Blogger جبهة التهييس الشعبية said…

    الحرية للعريف الوطني محمد خلف

     
  • At Sunday, February 25, 2007, Blogger جبهة التهييس الشعبية said…

    ������ ������ ������ ���� ��

     
  • At Sunday, February 25, 2007, Blogger bastokka طهقانة said…

    ربنا يهدك يا تمروتا
    ما نابني غير 200 جنية وقعوا على الارض

    بقولك هوبلس كييييس

    مش بس هوبلس ده تيوبلس

     
  • At Monday, February 26, 2007, Blogger Ma 3lina said…

    كالعادة مقالة رائعة مسخرة سراحة
    عليكى حبة قوانين و نصايح فى الجوووووون


    على فكرة مجلة حريتى نشرتلك مقالة اغسل المواعين يا هركليز عدد الاسبوع ده

    بس مش كتبوا اسم المدونة معرفش ليه

    ماا علينا المهم مبرووووووك

     
  • At Monday, February 26, 2007, Blogger تمر حنه said…

    Blank-socrate
    امال ايه .. مالكومش الا أم عيلاء .. و احنا مالناش الا أبو عيلاء (كده و كده يعنى)

    Anima
    ولا كأنك سامعة حاجة ... عيشى عادى خالص .. مالكيش دعوه باللى بنقوله هنا عشان تبقى داخله فريش
    طلع ابن ناس كويسين و أمه كانت فاضية تربيه .. بيتقى الله .. حاسس انو اتجوز و مسئول .. فرحان بيكى ,, بيحترمك ,, يبقى خليكى أحسن منو
    طلع لامؤاخذه سكه و مضروب و مش متربى يبقى ركزى معانا شوية ,, بس ياعالم على ماتلاقىه هنكون احنا فيييييين –

    عمر
    جرى ايه ياعمر .. انت فاكرنا فين هنا؟ ياكش تكون فاكرنا لابسيين برانيط و خريجين سوربون .. لأ اصحى انت أكيد فمصر واللى بتقوله ده عايز ثقافات عالية جدا و مساواه و كلام أيّاه بعيد عن السامعين
    الداء موجود موجود .. و احنا هنا بنلم الجروح و نخيط على وساخة.. تفاهم ايه و صراحة مين ؟؟ دى ثقافة أمه ياعمر.. مش هقولك الراجل تربيته زباله .. لأ واحنا كمان .. ماحنا لو بنعرف ناخد حقوقنا من حبابى عنيهم باللتى هى أحسن و من غير مانبقى نسوان كئيبة و نكدية .. و..و ماكانوش اتنمردوا
    ثم تعالى هنا .. انت عامل البلوج بتاعك ملاكى .. يعنى ايه أروح و اخبط و محدش يفتح ؟؟ ماكنش العشم يا حسييين

    سوكيننه
    أولا مش فاهمه أول حرفين من ايه ؟؟ أسامى مين؟ رسينى عالفولة - مانا من القدامى زى مانتى راسيه و المكنه عايزة تشحيم
    عندك حق : المدة الزمنية المحددة حسب ماتزهقى .ز حسب ماتلاقيه اتمرع و ساق فيها الهباله عالشيطنه و انجعص و دلدل رجليه بزيادة .. ساعتها بقى سنود لقواعدنا سالمين و نرجع لنغمة .. الحلة عالوابور عشى عيالك . وحسب تقديرى لن نتحمل أكتر من أسبوع عشر تيام .. فله؟؟
    أما بالنسبة للباك أب الخاص بالطوارئ فأظن ان الكالميبام 3 مجم مناسب جدا و القليل من البانجو لزوم التتنيح.

    أزئوزة
    شكرا عالتبويء .. طبعا ممكن تجربيه على ابنك فى بعض الجوانب .. فسوف تستفيدى كثيرا من السلبيات و الأيجابيات (باستثناء مشكلة التبوء الليلى اللارادى ..)

    Bastokka
    ازاى .. مش ممكن .. أكيد غلطتى فى حاجة .. تكونيش عايرتيه بحاجة؟ مانا عارفاكى دمك حامى .. و بعدين و مالو لما الولا يضيع الفلاشة بتاعت البروجكت ولا الهباب؟ مش قلنا نورق اليومين دول؟ لو كنتى لونتى أصفر اقلبى و اديها بنى لون العيشه و اللى عايشينها – ألا يعنى ايه بروجكت؟

    Ma-3lina
    يعنى و بعدين فى موضوع النشير ده من غير مايقوقولنا .. المهم هبعت أجيب المجلة و نشوف حكايتهم ايه

     
  • At Monday, February 26, 2007, Blogger كلبوزة لكن سمباتيك said…

    الاقيش عندك فانوس ايجار ادعكهوله انا و يروح يريح شوية فيه

    ما تسيبوه يتهوا يا امي كابسين على مراوحه ليه


    اوعي تيجي عندي البلوء
    قطيعة تقطع الصحوبية

     
  • At Monday, February 26, 2007, Blogger Memo said…

    صراحه تحياتي عالمدونه اللي جابت الوضع علي حقيقته دي
    عشت زخرا
    و بعدين كلامك يدل
    على عامل خبره عريض مع الصنف
    اللهي يصبرك
    و يجبر بخطرك يا بنتي
    و اوكد تحياتشييييييييي

     
  • At Tuesday, February 27, 2007, Anonymous Anonymous said…

    يخرب عقلك يا تمر حنة اهو كدا الشغل ولا بلاش هنيالك يا ابو عيلاء يا رب السيستم ده ما يهنجش تبقى مصيبة وحطت على دماغك يا ام عيلاء حقيقى روعو روهة يا ام عيلاء تحياتى

     
  • At Tuesday, February 27, 2007, Anonymous Anonymous said…

    يخرب عقلك يا تمر حنة اهو كدا الشغل ولا بلاش هنيالك يا ابو عيلاء يا رب السيستم ده ما يهنجش تبقى مصيبة وحطت على دماغك يا ام عيلاء حقيقى روعو روهة يا ام عيلاء تحياتى

     
  • At Thursday, March 01, 2007, Blogger ام العيال said…

    wel naby eh
    ageb bal menen
    mosh kefaya el rozbelaban
    tab garaby enty el awel
    we 2olily el natiga

    al 7esy beh
    ana men ye7es beyaaaaaa

     
  • At Thursday, March 01, 2007, Anonymous Anonymous said…

    إشطة يا مان..عالسيستم التمام..

    وياستي الرجالة أعيل مالعيال..اذا كان يريحكوا..
    واء..
    وااااء..
    وااااء..
    أيوها خدمة!!

     
  • At Saturday, March 03, 2007, Blogger -_- said…

    ده انتى شكشك كارهانا مووت

     
  • At Saturday, March 03, 2007, Blogger جبهة التهييس الشعبية said…

    بما انك المتحدث الرسمي باسم النساء

    والمدافع الاول عن حقوقهن بين المدونات

    فقد كتبت بعض المطالب الانثوية في مدونتي المتواضعة

    واشرت الى جانبك الكريم

    وارجو من سيادتك الزيارة والافادة

     
  • At Saturday, March 03, 2007, Blogger admelmasry said…

    ايييييييييييه؟
    وحدووووووووووووووووووه

    انتي فين ؟
    والله ليكي واحشه برده

     
  • At Saturday, March 03, 2007, Anonymous Anonymous said…

    اسلوب جميل وساخر بس طالع من نفسويه عدائيه تتصور ان مشكله بسيطه هي مشكله البشريه كلها وان بعض الرجال الغريبه هم صوره لكل الرجال بصي ياام اشرف الوضوح والصراحه والحب والتقدير والتفاهم لو ماكانوش بين الزوج والزوجه يبقي يكون بين مين ومين ياام اشرف الله يكون في عون ابو اشرف وربنا بقه يتولي اشرف ده اذا كان فيه اصلا وعجبي

     
  • At Monday, March 05, 2007, Blogger الحصان الأسود said…

    سيبك انتي انا مش عاجبني في البوست دة كلة غير الايدين الحلوة اللي تنباس اللي في الصورة

    ولا ضوافرها يا خواتي ضوافرها حاتجنني

    ههههههههههههههههههه

    زي احمد بدير في فيلم المغتصبون

    ههههههههههههههههههههههه

    بصراحه شردتي للرجالة بكلامك

    يا بنت خفي شوية مش حاتلاقي اللي يتجوزك

    و حاتروحي تعملي جمعية للستات المجانين
    لمناهضة الرجالة

    يا أما حاتصاحبي ايناس الدغيدي

    تحياتي

     
  • At Wednesday, March 14, 2007, Anonymous Anonymous said…

    حضرتك عاملة هدف قومي ... مش هأقول تافه ولا هايف .... بس فعلا نفسك الناس تتغير ولا فيه كلمتين حزقينك ومزنوقة فيهم
    ولا فيه واحد بهدلك شويه وبتطلعي بلاويكي علي الناس
    انا فعلا قريت كذا مقال يمكن اطلع بفايده مش لاقي ... مع ان اسلوب الكتابه والامثلة والشرح والتعليق كله متميز....بس كله في الاخر فعلا علي الفاضي

     
  • At Wednesday, March 14, 2007, Blogger FATMA said…

    جامده بجد الوصايا دي

     
  • At Sunday, March 18, 2007, Blogger البنت الشلبية said…

    مع انى لسه متجوزتش لكن فى رأيى ان الرجالة ميعجبهمش العجب,,بس مفيش مانع ناخد فكرة ,وطبعا مش هتكلم عن اسلوبك فى كتابة البوست,,يجنن وتحفة بجد

     
  • At Thursday, March 22, 2007, Blogger Love & Feelings said…

    يا ختششي كده ينفع و كده ينفع على رائي يسرا مع اني لعيبته كل الالعاب كيك على عالي و كيك على واطي لحد الاستغمايه و من سعتها ماشفتوش.. بس برضوا اكيد في امل و لازم يكون علشان تنجح خطة الهجوم
    معاكي على طول الخط

     
  • At Tuesday, May 01, 2007, Blogger Masry said…

    انتي فيين من زمان
    يا ريت تنشري نصايحك دي علي نطاق واسع

     
  • At Friday, May 11, 2007, Blogger Unknown said…

    دمك شربااااااااااااااااااااااااااااات وعندك حق في كل اللي بتقوليه هما عقلهم صغير ويضحك عليهم بكلمتين
    بس كل واحد وله مرارة واحدة يا أوكتي أفقعها عشان خاطره وأعيش أنا من غير مرارة ازاي؟

    ملحوزة:عجبتني جرئتك

     
  • At Saturday, October 13, 2007, Blogger قلوب الاحرار قبور الاسرار said…

    بسم الله الرحمن الرحيم
    ديه اول مشاركه ليا واول تعليق هكتبه انا لسا مسجل حالن علشان ابدأ مشاركه معا ساعتك ويكون ليا عظيم الشرف والفخر
    انا متابع لكتاباتك وافكارك من مده كبيره
    عجبنى جدا طريقة تفكيرك سخريتك من الحقيقه وتبسيطها واللى عجبنى اكتر سهولة الفاظك ووصولها لكل من يطلب الوصول اليها انا الحقيقه عندى كلام كتير عايز اقوله لكن مش هطول فى الكلام لوقتك الثمين والغالى

    ادخل فى الموضوع وردى عليه
    الحقيقه عجبنى جدا بداية من الفكره مرور بالعتبيرات واحداثيات تنفيذك للخطه حتى وان كانت تمثليه مدبلجه على حد قولك وعلى ما الناس فهمت
    انا كل اللى عايز اوصله ليه تعب القلب وليه الخطط الكتيره ديه ياريت يكون فى تفاهم ما بين الراجل والست الراجل ككيان ليه احترامه وتقديره ووظيفه اللى لن تستطيع المرأه ان تقوم بها حتى وان ادعت ذلك فالرجل خلق ليكون رجل ويقوم بواجبات الرجل والمرأه هى كيان وكيان ليس بالهين كما يظن البعض انما خلقت المرأه فى الاصل لايناس الرجل خلقت من اجل ادم فلمأذا الان نست هذا الدور وتبحث عن خطط وسساتم مختلف لماذا لا تقوم بهذا الدور وهى مقتنعه تمام الاقتناع انها تقوم بالدور الذى من اجله خلقها الله ان تكون اساس كل شئ ان كان الرجل سقف للبيت فالمرأة هى عمود هذا السقف والذى من دونه سقط السقف على من فيه انا احترم المرأه واقدرها وارجوا من المرأه ان تحترمنى وتقدرنى ولا تعاملنى على انى حمااار كما قلتى ولا تعاملنى على اننى طفل صغير يسهل خداعه لمجرد الحصول على فستان او جذمه او تصليح شئ
    كلا الطرفان فى الحقيقه منكوبان لماذا لا اعلم ولكن علمى ان بأمكان كل منهم ان يقدم ولو جزء صغير للطرف الاخر وبلا انتظار مقابل وعلى الطرف الاخر ان يكون على قدر من احترام النفس وان يعلم انه سوف يأتى عليه الدور ويقدم دليل عرفان ووفاء لهذا التنازل اذا حدث انااحب زوجتى واعلم انى بدونها لا استطيع ان اعيش لانها وببساطه شديده عمود حياتى وسقفه والذى من غيره اكون وحيد شريد وان كنت فى وسط ملايين فهى تعلم ماذا اريد منها بدون ان اقول او اتفوه بكلمه وانا اعلم ماذا اقدم لها نظير وفائها وحبها لى وارجوا ان لا يظن البعض ان هناك مقابل لا فهى تصنع ما تصنع بدون انتظار مقابل وانا اعلم ذلك ولتمام علمى بذلك فأنا لها اسير نظره

    ياريت ابو عيلاء يفهم ده كويس وياريت زوجة ابو عيلاء تحاول تفهمه
    وفى النهايه مش كل صوابعك ذيى بعضها وخاطبوا الناس على قدر عقولهم

    تحياتى يافنانة الكتابه

     
  • At Saturday, February 09, 2008, Anonymous Anonymous said…

    انا مش مصدقه انك محاسبة زي ما انت كاتبه في البروفيل بتاعك!!
    المهم انت جامدة جدا بغض النظر عن التوجه الاسلامي

    انا ام ومحبطة لاني مش عاوزة اتجمد عن محطة الامومة وفي نفس الوقت بحب بنتي
    وبقضي وقت طويل في القراية عن الاطفال علشان اربيها صح واضيع وقت طويل معاها في هرتله البريسكول واللعب وحكاية القصص الساذجة وبدور في ساقية بس عنيا مش مغمية علشان كده بدوخ بسرعة
    مفيش وقت اعمل ايه حاجة تانية غير الشغل وبنتي ونفسي جوزي يشوفله زوجة تانية ويريحني من الاحساس بالذنب اني مش واخدة بالي منه
    بس كفاية عليكي كدة

     

Post a Comment

<< Home