أيوه خدامه

Sunday, March 04, 2007

و لكم فى جوزيه ... أسوة حسنه



دلوقتى .. صلوابينا عالنبى .. و اللى يعرف وزير التعليم ياريت يروح يقولوا..
بقى أنا قريت ان شخصية البنى آدم بتتكون فى السنوات الأولى من عمره .. يعنى خلال الأربع خمس ست سبع سنين كده الأولى .. هيا بنا نرى مايحدث لأنسان مصرى من سواد المجتمع فى هذه المرحلة السنية:

مرحلة بداية المشى : حافى و منكوش و معمص .. بيمشى حافى فى الشارع و بينزل الغيط مع أمه بدون ملابس داخلية و ياريت بجلابيه لأ ممكن فانله و دمتم ولد بنت .. ماتفرقش

مرحلة بداية الكلام : قول لابوك يا"ابن الكلب"( ها ها ها) تف على أمك( ها ها ها) تتصورى الواد بيشتم امه و يقولها : @@##)( ^^) .. و ضرب اخته على وشها عشان ماجبتلوش الفول ..

مرحلة دخول المدرسه : الأبله فتحية بتخلينا نغنى فى الطابور : أمّه نعيمه نعمين .. خللى عليوه يكلمنى – خدتوا ايه فى العربى يا حبيبى ؟ الأبلة ماجتش من أول السنه .. طب فى الحساب : الأستاذ بيضربنا عشان ندخل المجموعة .. طب فى الأنجليش : ها؟ زى سعيد صالح .. بتاخدوا مزيكا؟ ها؟ شرحه .. طب علوم؟آه .. خدنا ازاى نعرف نعوم فى حلة الملوخية !!

و تمر السنين على المواطن المصرى الصغير .. لا أحد يتابع .. لا أحد يحاور .. لا أحد يناقش .. لا أحد ينمى .. لا أحد .. لا أحد .. فبأى منطق يمكن أن يصبح هذا المواطن أى أحد؟؟؟؟؟
و مايكتسبه فى سنينه الأولى يلازمه مدى الحياة .. فيصل لمرحلة البلوغ و هو غير مهتم الا بغرائزه الطبيعية فلا شئ جيد مكتسب .. ثم يصل لمرحلة المسئولية و هو لسه لا أحد .. فيتحول الى واحد من أرباب اللهو الخفى الذين نصادفهم كل يوم فى حياتنا و يكون أحد اسباب ضيق صدورنا بما وصلت اليه البلد.

ممكن حظنا العاثر يجعل منه موظف أو سائق ميكروباص أو واحد ممن يتسببون فى ركوبنا الذنوب بل و أحيانا الكبائر .. و احنا أساسا مش السبب .. طب مين السبب؟؟؟؟؟ هؤلاء الذين يتحكمون فى السنين الأولى .

مبدئيا : ننسى الأم و الأب لأنهم برضه حلقة فى السلسلة و مش متربيين برضه.. يبقى مين ؟؟ يبقى سياسة التعليم يا بتوع التعليم:

و لكم فى فريق الأهلى قدوة حسنة : و بما ان الأهلى هو الشئ الوحيد فى المحروسة الذى يسر الخاطر و يرفع الراس .. فلماذا لا نأخذ بتجربته فى الأستعانه بالخواجة جوزية – ربنا يكرمه و ينورهملوا كمان و كمان – و نستعين بمدربين أجانب لتدريب أشبال المحروسة ؟؟؟
أوعى حد يقوللى ميزانية .. لا هو ميزانية الأهلى أكبر من ميزانية الدوله؟ طب الجون بيعمل كام دلوقتى فى بورصة الكورة؟؟؟؟
طب بلاش الأهلى .. تعالوا نشوف ميزانية مطربة صاعده كام ؟؟ شد و نفخ و نحت و شفايف و خدود و مناخير و حواجب و مايوهات و ....... و يطلع منها صاروخ موجه بيجيب ملايين ... بقى مش التعليم و التربية أولى؟؟!!

أنا أقترح .. يا وزيييييييييير التعليم خصخصة المدارس الحكومية بالاكراه و كل رجل أعمال من التقال يلبس له قرية من اللى جوه مقابل أستمرار أعماله على أرض الوطن الحبيب على شرط أن تكون الأدارة أجنبية و فكك من الأشراف المصرى خالص و ليكن فى مرحلة التعليم الأساسى .. الأولاد يتعلموا الألتزام .. النظافة .. النظام .. يعرفوا يعنى ايه مزيكا و فن راقى .. قبل مايتعلموا أبتث جوحون .. يتعلموا أزاى يبقى عندهم مخ و ارادة و شخصية ..يتعلموا الأدب .. يتعلموا يعملوا مشاريع عالكومبيوتر .. و بلاش سفسطة و كلام من بتاع: هيعلموهم أفكار أبصر ايه و مدرك ايه .. مفيش أسوأ من اللى بيتعلموه حاليا مهما كان ..

أنا أعنى ما أقول .. لا سبيل للنجاة الا برفع مستوى الرؤوس الصغيرة و التى تدهس تحت سنابك نظام تعليمى بوهيمى خاضع لمدرسين بدرجة لموظفين كل همهم البدلات و الأجازات الأعتيادية و العارضة ... كارثة كارثة كااااارثة.
أظن يا وزير التعليم ان هناك الكثير من الطرق لتدبير الميزانية اللازمة لمشروعى هذا .. و ان لم يتدبر التمويل من المنح الخارجية و القروض التى لا أعلم فيم تصرف – على أساس يعنى انه مش أختصاصى – فيمكن الأستعانه بالمليونيرات أصحاب المدارس الدولية المفتوحة فى مصر بمصاريف قد تصل الى ستين ألف جنيه عالراس الواحدةفى السنه .. أو الأستعانه بأصحاب الجامعات الخاصة .. أو أصحاب شركات المحمول .. أظن أن حاجة البلد الى تنمية التعليم أولى من شركة محمول ثالثة فى مصر .. و قبل اللأهتمام الغير عادى بمزايا الجيل التالت و الرابع من المحمول .. فقط أهتموا بالجيل الأول من البشر
..

Labels:

52 Comments:

  • At Sunday, March 04, 2007, Blogger عبدالله said…

    كلمات ساخره تصف حال التعليم في بلدنا فعلا هوا ده الواقع بس معتقدش برضه انه الحل في كده

    الحل بقي نجيب اداره امريكي جديده و خلاص :)
    يعني مش لازم نغير اللعيبه و لا حارس المرمي و لا المدربين الصغار لو غيرنا البيج بوس كله هيتظبط
    :)))))))))

    تحياتي

     
  • At Sunday, March 04, 2007, Blogger مصر هى أمى said…

    ايوم خدامة

    طب وليه يا بنتى تعب القلب ده كله احنا العيال ديه نخليهم ينضموا للحزب الوطنى هيتلموا السرقة والبلطجة ويكونوا مستقبلهم

    وبالمرة نص العيال ديه ندخلهم الاخوان علشان النص الاولانى يلاقى حد يضربه
    وفكك بقه من التعليم والكلام الفارغ ده ونوفر مرتب الخبير الاجنبى علشان نعمل فرح كويس كده للوريث بتاعنا

     
  • At Sunday, March 04, 2007, Blogger أُكتب بالرصاص said…

    امبارح في العاشرة مسائا
    ةالتسعين دقيقة
    جابو شوية بلاوي من المحروسة
    وفي نهاية كل فقرة
    يقولا طيب مسئولية مين..؟
    مش معقوول نحمل الحكومة كل حاجة

    ودلوقت الاجابة بقت واضحة
    مسئولية جيل كامل تربى ..او لم يتربى
    على لا شيء
    جيل مدارس عمالة تخرج في امهات واباء عمالين يورثوا الجهل والتخلف والانانية للجميع

    مسئولية
    الكل



    المهم
    إزيك انت ؟
    الغدا ايه النهاردة ؟

     
  • At Sunday, March 04, 2007, Blogger karakib said…

    علي فكرة موضوع الفانلة اللي فوق ده له سبب ... لما سألت قالو لي علشان لما لا مؤاخذه يعمل علي روحه ما يوسخش هدومه ... فمش بيلبسوه هدوم خالص ... منطق برضه ... بيطبقي بعد كده علي مستويات أوسع
    المشكلة كنت لسه كاتب فيها بوست عن أنتخابات الفصل و اللي بيحصل فيها
    اللي هي برضه أول شيء بيعلم الطفل أنه له رأي و رأي مهم بس للأسف كله فاشوش و مغشوش
    للأسف
    شكرا للبسمه اللي فالبوست

     
  • At Sunday, March 04, 2007, Blogger أميرة البلطجية said…

    يسلم فمك
    والمصيبة بقي لعلمك ان صاحب المدارس ام ستنين الف جنيه في السنة بيهدوا هم كمان مش بيبنوا
    عشان لما سياتك تاخدي من ابو عيل كام الف في السنة يبقي يوم ما تفكرى تعلمى ابنه الالتزام والانضباط حيطلع عين سعاتك
    وكفاية ان الكتكوت الصغير روح الاسكول في البص.. ويلعب ويرسم ويشترى ساندوتش شرمبس من الكافيتريا بعشرة جنية وكان بيبسي ويطلع رحلة كل اسبوع ويعد طول السنه يتمرن على الاوبن داي
    open day
    ولو المستر او الميس ولا التيييت رفعوا عنه فيه
    ملهمش ديه في المدرسة ويترموا في الشارع فورااااا
    ده ده في ابتدائي بس سياتك
    في الهاي سكول في اوبشنز تانية
    زي الاي بود والبوي فرندز والبارتيز والحشيش كمان لو لزم الامر
    اسأليني انا
    وعلى فكرة بقي
    هي الفلوس موجودة
    لكن التوزيعة الهباب دي للفلوس مقصودة
    الاعلام والسياحة والهلس ياخد الملايارات عشان بيجيب مليارات
    لكن الصحة والتعليم ليه؟
    خليهم يموتوا مهم كتير واكتر م الهم ع القلب
    ههههههه
    فكيت شوية عن نفسي يا اوختشي
    ومنجلكيش في وحش

     
  • At Sunday, March 04, 2007, Anonymous Anonymous said…

    يا ساتر على تقل دمك

     
  • At Sunday, March 04, 2007, Blogger حاول تفتكرنى said…

    اهلاً تمر حنة من جديد
    فعلا وحشتني أفكارك


    بالنسبة لموضوع التعليم
    لا تنسى أن الطفل يقضى حوالي ست سنوات مع الأسرة ( مرحلة السح اندح أمبوه ) - اتعلمت اللغة - وفى هذه المرحلة واجب على الاسرة - الفاهمة - تهيئى الطفل لمرحلة البوظان فى مدارسنا يمكن يلحقوا يكونوا له شخصية لا تتأثر بسلبيات التعليم فى مصر
    أما لو كانت الأسرة كمان بايظة يبقى يلا السلامة

    تحياتى

     
  • At Sunday, March 04, 2007, Blogger admelmasry said…

    بقي انتي كنتي مستخبية عشان كدا ؟

    ماشي يا ستي موضوعك في الجون

    وبصراحه دخل نخاشيشي وليكي عندي مفاجئه بسببه

    تحياتي

     
  • At Sunday, March 04, 2007, Anonymous Anonymous said…

    بالضبط
    هو ده الحل
    زي جوزيه في الكورة..نجيب واحد أجنبي للتعليم
    عشان يدرعلنا هو كمان

     
  • At Sunday, March 04, 2007, Anonymous Anonymous said…

    أيوه فعلاً..
    زي جوزيه في الكورة
    نجيب أجنبي للتعليم
    عشان يدرعلنا هو كمان

     
  • At Monday, March 05, 2007, Anonymous Anonymous said…

    يعنى مش عارف أضحك ولا أعيط
    أنتى كلامك جامد قوى

    والله يابنتى الأخ مصر هى أمى قالك حل مبتكر


    طيب ياستى ماعندكيش اقتراحات تانيه غير اللى انتى قلتى عليها دى؟

    سلام

     
  • At Monday, March 05, 2007, Blogger قاسم أفندي said…

    هو مش برضه أعظم جيل عدي عليكي يا مصر كان خريج الكتاتيب؟
    جيل العقاد وطه حسين ومشرفة و ام كلثوم ورفاعة الطهطاوي وقاسم أمين وزكي جمعة؟
    مين زكي جمعة ده؟
    صحيح كان فيه خبراء اجانب في الثانوي والجامعات بس الاساس كان في الكتاتيب
    العيب مش فينا كجنس العيب في حاجه تانية
    وبعدين ما الجوهري وحسن شحاتة عملوا اللي محدش قدر يعمله من الاجانب
    مش عارف بس حاسس انها جات في الاوت المرة دي يا تمورة

     
  • At Monday, March 05, 2007, Blogger حاول تفتكرنى said…

    اهلا تمر حنة
    المسألة مش مسألة تعليم بس
    المهم اللي قبل مرحلة التعليم
    البيت
    لو كان البيت - بايظ- يبقى المدرسة هتكون كلية فى البوظان خصوصا ان مفيش نظام ولا سياسية تعليمية
    ولو البيت مظبوط يبقى هنلحق نعلم ولادنا حاجة يقاوموا بها سياسات التعليم الفاشلة

    وعندى رأى خاص
    اللى عاوز يعلم ولاده يذاكرلهم هو فى البيت واللى معندوش طاقة لهم يسكت

    تحياتي

     
  • At Monday, March 05, 2007, Blogger harmless said…

    بناء الدوله والانسان
    يقوم على ثلاث اعمده

    التعليم
    الصحة
    العدل

    التعليم مصيبة
    والصحة كارثة
    والعدل غائب

    يا اختنا
    نحن فى محنة

     
  • At Monday, March 05, 2007, Blogger سكينة said…

    المشكلة ان التعليم المضروب أسوا من قلته بكثير, يعني هم سابوا العيال تتعلم مهارات الحياة الأساسية من تعاملهم مع الأرض والدواب صدقيني كان الناتج أفضل بكثير مما نراه من أدمغة رقصت على السلم لا منها اتعلمت صح ولا فضلت على فطرتها الي بالتأكيد كانت ستهديها سواء السبيل في الحياة عموما. التشوه المعرفي والقيمي أسبق من الجيل الحالي فهو يطال جيل المعلمين الي الجوع هيموتهم يا تمرحنة كيف يبدع من لا يجد قوت يومه ولا ابرة الانسولين. قولي يا رب اصلح أحوالنا.

     
  • At Monday, March 05, 2007, Blogger كلبوزة لكن سمباتيك said…

    اختشي الحبيبة عواتشف
    وحشتيني يا اختشي قوي قوي و وحشني العيال و سي نظمي و خالتي وطنية و الواد كوري و كل مقاطيعنا الحلوين
    جيل اول اية يا امي اللي سعادة البيه الوزير حيهتم بيه
    يعني عايزاه يوفر كام مليون لاسمه ايه ده رفع مستوى التربية قبل التعليم ؟!!امال مهرجانات الرقص و الهجس و هز الوسط نصرف عليهم منين؟؟؟الفلوس مبتطلعش من جيب النبي حارسها الحكومة الا علشان الحاجات النغشة و التفاريح زي السياحة و الدعارة و الذي منه

    ابقي اسئليلي اختشي اميرة البلطجية ايه حكاية كان بيبسي دي
    امال دلوقتي بقت اية؟

    مين الواد معروف ده اللي بيتهجم على ابلتي في عقر دارها
    انت يا ابني متجيش هنا تاني لاقعد عليك اسفلتك فاهم؟

    اخيرا و ليس اخر مرفق طيه كنكة قهوة نحاس مصدية و فيها تعميرة بن محوج نقاوة و سوجارة كارلتون من النضيف ابو جنيه السوجارة
    عارفاكي بتموتي في الفرط زي عنيكي

    قبلاتشي

     
  • At Monday, March 05, 2007, Blogger كلبوزة لكن سمباتيك said…

    كويس انك عملتي الابروفر ده يا اختشي بس يا رب تكوني عملتيه صوف علشان الكحة و يا سلام بقى لو تحطي تحتيه جرنان يدفي صدرك و يزيح عنك
    الف سلامة
    انشالة معروف

     
  • At Tuesday, March 06, 2007, Anonymous Anonymous said…

    ماهو كادر المعلمين الجديد بيتناقش اليومين دول لإقراره ياتمرمر . وبيأملوا منه إنه يرفع دخل المدرس ، وبالتالي هتخف الدروس الخصوصية
    أما عن الاستعانة بالخبرة الأجنبية ف التعليم ، فياختي ياريت ، حد يكره ؟
    ياختي جمال أمه وهوَّ داخل عليَّ أوضة النوم الصبح ، وبيئوللي
    Good morning Mum
    ونبي لابخـَّره

     
  • At Tuesday, March 06, 2007, Blogger raspoutine said…

    دعوة عامه لكل المدونين المصريين لحضور اللقاء الثالث الذى تحدد موعده من قبل المشرفين عليه والمؤسيسن له


    وذلك يوم


    الجمعه الموافق 9/3/2007


    بدار الاوبرا المصريه


    كوفى شوب الابداع


    بجوار دار الابداع بداخل الاوبرا


    والدخول للمكان من البوابه الخلفيه للاوبرا امام النادى الاهلى


    والحضور بالملابس الشتوية


    واوجه الدعوة خاصة الى الاخوات المدونات

     
  • At Tuesday, March 06, 2007, Blogger عمر said…

    أنا متفق تماما مع تحليلك لأهمية الاهتمام بالإنسان في سنواته الأولي

    ومتفق إلي حد كبير مع الحلول اللي طرحتيها

    بس وزير مين والنبي دة يا تمر حنة اللي بتنادي عليه؟ انا عارف وانتي عارفة ان الوزرة بتوعنا - قصدي بتوعهم - كل همهم رضا ماما سوزان وياخد الأبيج من جيمي أول الشهر، ويطلع في التلافزيون يقول كله شيء مدروس

    انا بس خايف علي صحتك والله يا اختي احنا برده عايزينك.. لما ربنا يكرمنا ويبقي عندنا وزرا مستوي ذكائهم أعلي من القرد البالغ يبقي ممكن يبقي فيه أمل

     
  • At Tuesday, March 06, 2007, Blogger عمر said…

    ايه دة؟؟؟؟ انتي ركبتي فلتر؟؟؟ الف مبروك

     
  • At Tuesday, March 06, 2007, Blogger No Fear said…

    السلام عليكم
    أنا معنديش تعليق
    غير إني أحيكي علي كلامك

     
  • At Tuesday, March 06, 2007, Anonymous Anonymous said…

    كلام حلوة وجميل... والمدونة جميلة... والتصميم جميل... وكل شيء منك جميل

     
  • At Tuesday, March 06, 2007, Blogger بنوتة من وسط البلد said…


    غاليتي تمر حنة

    فى مقولة بتقولك ان التربية الطفل بتبدا قبل ولادته ب25 سنة .. وذلك بتربية ابوه وامه

    وده بفرض انهم 25 بس مش 30 ولا 40 ولا حتى 50

    وكمان مقولة تانية افتكرتها .. ان الطفل المصرى من اذكى اطفال العالم وذلك فى المرحلة والتى تسبق دخوله للمدرسة

    حطى الاتنين على بعض واضربيهم فى الخلاط
    هيعملك عصير موزامبيليه .. موز باللين يعنى

    الا هو يعنى ايه موووز ؟؟

    والتعليم والتربية عندنا علشان تتغير يبقى لازم اعدام جهاز الاعلام الموجه بتاعنا بالى موجهينه لمصالحهم فى الاول وبعد كده نستفتح ونقعد على طبلية المفاوضات

     
  • At Tuesday, March 06, 2007, Anonymous Anonymous said…

    شفتو تمر حنه و هي بتؤول "سنابك"؟
    تجنن!
    كنت فاكرك مهيضة الجناح!

    يا تمر حنه، تخاطبين الوزير و الدوله؟ اما بلغك الشاعر اليوناني القديم إذ قال: اشكيك لمين وله مين وله مين، ده الخصم انت و الحكم اشكيك لمين؟

    ثم يأتي السؤال المحير: انرضى بالواقع المؤلم، ام نسمح بتدخل اجنبي يرفع التعليم و يعمل على مسح كل ما له علاقه بالهوية الوطنية و الدينية؟ ديليما مش كده؟

    سنابك؟؟
    يخرب عئلك:)

     
  • At Tuesday, March 06, 2007, Anonymous Anonymous said…

    بما أني لست مصرية ليس لدي الحق للتعليق

    بس الكلام اللي قلتيه جامد قوي ، عيديه ثاني بليز ههههههه

     
  • At Tuesday, March 06, 2007, Blogger Tigress said…

    دى اول مرة ادخل عندك، قريت البوس الاول ثم التانى ثم الثالث ثم الرابع ولم اتوقف الا عندما وجعتنى عيناى.. اهنيكى على اسلوبك الراقى، طريقتك السهلة والاهم الموضوعات التى تحمل رموز واشارات وبعيدة عن السطحية

     
  • At Wednesday, March 07, 2007, Blogger جبهة التهييس الشعبية said…

    يا حبيبة قلبي احنا مش محتاجين لخواجة ولا دياولو

    قولي لي ليه؟

    قلتي؟


    لان دي سياسة عليا يا عنيا

    صحيح الاهلي هو الحاجة الوحيدة اللي تسر لان دي برضه سياسة عليا


    يا بنتي انا صاحبتي انطردت من مؤسسة الاحداث عشان كانت عايزة تعالج العيال نفسيا ومن الاخر مستشارين الوزير قالوا لها بالمفتشر انسى يا عمرو انسي الدار خالص يا امورة عايزة تعملي عمل خيري قدمي لنا مشروع واحنا ح نعمله بمعرفتنا وانت عارفة بقى معرفتهم يا ختشي

    الامراض اللي بتشوفيها دي مقصوووووودة


    ربي عيالك يا زينب

    قصدي حاولي تربيهم في الظروف دي والشاطرة تغزل برجل حمار لامؤاخذة

    امووووواه

     
  • At Wednesday, March 07, 2007, Blogger تمر حنه said…

    عبد الله
    كلنا وراك فى هذا الأقتراح بس أبعد عن الأمريكانى .. نفسيته مش تمام .. ايه رأيك فى الألمانى ؟ أكيد هيبقى أفضل

    مصر هى أمى
    بلاش نبرة اليأس دى يا أمى .. البلطجه موجودة موجودة من غير الحزب .. و النص الأولانى بيضرب فى النص التانى من غير مجهوداتنا المتواضعة .. بس برضه التعليم مهم لمعرفة أسس البلطجة الصحيحة و الضرب السليم

    أكتب بالرصاص
    أيوه .. جيل ماتعلمش يقف لحقه .. متعلمش يعرف اللى ليه .. و من باب الأستسهال مطنش اللى عليه .. لا ثواب و لا عقاب .. لا نظام .. ولا ضمير .. جهل .. تخلف .. أنانية .. دايره مغلقة
    أما بالنسبة للغدا استنيناك يوم الجمعة اللى فاتت .. تكون اصطادت لينا حاجة.. بس لا حس ولا خبر .. الجمعة الجاية شوفلنا لنا زرافة عتقية .. العيال عايزين زفر

    KARAKIB
    الموضوع بتاع انتخابات الفصل شئ فى منتهى الأهمية لو عومل بجدية .. حيث يبدأ الطفل يعرف ان لرأيه قيمه و لكن على رأيك :" و قد تدلت الثريات و تدعدعدت القنابير و شرب السنكفور الثري"..
    كراكيب : هل موضوع الثريات المدلدلة دى ليها علاقة بالفالنه اللى فوق؟ ولا مفيش اسقاطات؟

    أميرة البلطجية
    بصى .. نوعية التعليم التانية اللى بتتكلمى عنها افضل برضه من التعليم اللألزامى ( الديفولت) بتاع الدولة .. على الأقل بيبقوا شخصيات برضه .. وبعد كل الالم والاسي ده..اقدر اقول ان البرينسس هي السبب"...

    حاول تفتكرنى
    برضه انت يائس انت كمان؟ هى شكلها باظت بجد ولا ايه؟

    آدم المصرى
    ايه المفائجة يا آدم؟ فى الأنتظار على نااار

    وائل
    بس يا بنى .. شكلك زملكاوى حقودى .. و مالو جوزيه .. مفرحنا و مروقنا و رافع اسم بلدك .. ماحنا متبهدلين من طوب الأرض أونطه ..

    حسن محمود
    شوف يابو على .. نفذت كل الحلول و الخطط.. أنا زيك برضه طول النهار ابكى و أضحك لما وشى فلّق

    قاسم أفندى
    أيوه .. كانت عصور سمتها الأدب و الرومانسية و الفنون الجميله و خطوب اللغة .. و لكن دلوقتى ماينفعش السهوكة ولازم نحاول نلحق بأى حاجة .. بلا نيلة

    حاول تفتكرنى
    طب ينفع كده؟ لو أنا تعليمى فيفتى فيفتى عيالى يطلعوا زيي؟ عموما ده اللى بيحصل فعلا و لكن ده شئ غلط ..قال عمر ابن الخطاب: لا تعلموا أولادكم عاداتكم لأنهم مخلوقون لزمان غير زمانكم" و هكذا لن يحدث تطوير

    HARMLESS
    صدقت يا أخونا

    سكيننه
    اخطر مهنه على الإطلاق هى المعلم .. يجب ان يمر بالمصافى و الغرابيل قبل أن يتبوء هذه المكانه .. من يضع الماده نصب عينيه و تكون همه الأول .. يجب أن يُقصى فورا من موقعه ..كما يجب أن ينتقى المعلم .. وخصوصا بالمرحلة الأبتدائية و الحضانه على أفضل مايكون و ان يجازى ماديا على أعلى مستوى حتى يتفرغ للعملية الموكله اليه..و يارب يصلح أحوالنا
    مقولتيليش : ايه حكاية الأحرف الأولى بتاعت كومنتك ى البوست اللى فات؟

    Sampateeeeka
    اختشى الحبيبة إنشراح : أعرفك ان نظمى و العيال و خالتك وطنيه و المقاطيع التانيين بخير و بيبوسوا ايديكم ..برنسيسة البلطجية دى شكلها عميلة و هتطلع بنت ناس و بتشرب بيبس .. كان بيبس ده مش فعل يابنتى ده يعنى كوز .. طب بذمتك ماوحشتكيش قعدة النيل و واحد منجه و تمن شفاطات لو سمحت .. فكره الجرسون : حضراتكوا أدامن لو سمحتوا؟ ياللا بقى ارجعى عشان قعدة القهوة و الكارلتون ابو جنيه الفرط .. تعاااالى
    ايه الأبروفر ده؟

    أزئووووزتى
    آه بخريه بعوود يا أوزة .. و أحب أقولك ان المحروس الصغير لو علموه فى هارفارد برضه كبيره : صبّحك بالخير يامّه..هاتى قرش

    Raspoutine
    متشكرين عالدعوة الكريمة ..

    عمر
    بص ياعمر .. أنا هتكلم بصراحه .. قلت عايزه أغير حاجة.. حطيت عينى عالكرسى الكبير .. جيه اسمه ايه خطب .. قلت مش مشكله.. حطيت عينى على انتخابات مجلس الشعب قالولى كام مليون .. قلت مفيش مشكله .. قلت هدرب الفريق القومى .. قالولى لازم خواجات .. بس بحاول دلوقتى ياعمررر أنضم لفريق كورال زهور المستقبل بنادى مدينة نصر الرياضى .. وربنا يكرم و أخدم البلد .. يا عمررررر –
    فلتر ايه؟ انا الظاهر بعد مانضميت لفريق الكورال مبقيتش أفهمكوا!!

    No fear
    نو فير .. و أنا أحييك على روحك الرياضية .. مش ناوى تسيبك مالزمالك بقى..؟

    أغلو
    أعترف و أقر ان التصميم ليس لى .. اللى صممه هو اللى يستاهل الشكر .. يارب يخليه

    بنوتى بتاعت وسط البلد
    سيبك من الأعلام لأن ده شئ لا سبيل لأصلاحه .. و التعليم لو نضيف نضيف هيستطيع المتلقى فهم السم المدسوس فى العسل .. أما الموز فهو يختلف عندنا عن عندهم .. الموز بتاعنا أصفر و ليه شراشيب خضرا .. و بناكله عشان نحرش بيه .ز هم موزهم أصفر و بسبعة جنيه و بيحلوا بيه .. كل واحد و موزه

    Anonymus
    أولا : اطلع من الكوز و حط اسمك هموت و اعرف انت مين .. لغة الهمزة دى مابتريحنيش !!!!!
    ثانيا: استر عليا .ز هى سنابك دى ليها علاقة بالمادة 76 و انا معرفش؟ و ربنا ماقصد .. نخليها حوافر ؟ ماناكنت أقصد حوافر بس لسانى الزالف اللى عايز قطعه هو اللى فلت .. ماعنتش أعملها.. و على رأى الشاعر الأغريقى القديم ..
    ماكنتى قاعده فبيتك ياتمرمر قلتى أدوّن.. ياعينى ايه اللى نابك
    غير سهر الليالى يامّا ..و السهد صابك
    ماكنتى أحمدى و كظمانى و كلامك مفهوم و شابك
    أديكى دلوقتى لسانك اتعوج .. و بتقولى بوهيمى..و رؤوس .. و سنابك
    عجبى

    Anima
    لأ يا أنيما .. من حق أى حد يعلق على أى حد فى أى حته .. أحنا بلد ديموكراتى .. و نعيد كمان عشان المغرب .. سنابك .. سنابك .. سنابك

    Tigress
    كتاباتك حلوه أوى يا تيجريس .. بس لو دى محاولة منك لعلاج عنيكى .. فلا يا ماما .. شكرا على مجاملتك الراقية

    جبهة التهييس الشعبية
    نواره.. جيتلك فى العركة اللى عندك .. بس الكومنت بتاعى ماظهرش لأنى المفروض ساعتها انى البلوج بتاعى اتحول بيتا و مكنتش أعرف فالأكاونت بتاعى كان مش فاليد .. بس عايزاكى تطمنينى على يحيى .. على فكرة الواد ده شكله كفاءه و ينفع فى الخناقات .. ناخده نديله ربعميت جنيه و نعشيه بيتزا و نصدره فى البوستات اللى بنتخانق فيها مع الرجاله.. استبينا؟

     
  • At Wednesday, March 07, 2007, Blogger Khalid said…

    hahahah:D
    tamr 7inna 7awafiz, howwa ana katabt comment as anonymous?:DD
    sam7eeni:)
    da ana, ibn garrar! :D

     
  • At Wednesday, March 07, 2007, Blogger Khalid said…

    hahahah:D
    tamr 7inna 7awafiz, howwa ana katabt comment as anonymous?:DD
    sam7eeni:)
    da ana, ibn garrar! :D

     
  • At Wednesday, March 07, 2007, Blogger karakib said…

    كله مرتبط ببعضه يا تمر حنة صدقيني
    دلدلة الثريات و الفانلات و التعلب اللي فات

     
  • At Wednesday, March 07, 2007, Blogger maged stephen said…

    على فكرة انا توصلت الى أن لو بطلنا نحلم
    مش هنموت ولا حاجة

     
  • At Wednesday, March 07, 2007, Anonymous Anonymous said…

    تعليم مين يا ابلتي
    احنا ما ورناش حاجه الا ابتدائي اربع سنين لا نخليه خمسه طب سته طب نرجعو سبعه
    لا لا لا هوا تمنيه حلو خلى العيال تتعلم
    ثنوي تلاته لا خليها اتنين لا خليها اربعه خلى الجامعات تنضف

    الواد ده صمد ولافلح و دخل هندسه و لا العيل ده عقلو نضف وداه طب ارزعو بقا تلات سنين جيش خليه يحرم يفتح كتاب ابن اللازينه ده يستاهل قطم رقبته
    لااااااا مش بس كدا حنا كمان نديهم مرتبات تجوع

    اممم مين اللي طلعو العيال دول كدا مدرسين عندهم ضمير اقطعوا عنهم المرتبات جوعوهم حصروهم


    ولمل يجي المدري من دول يمرض و يسال على الميديكال كير قولولو كان جبر يا نانوس عين اهلك هيا مش العربخانه بتاعت باباه الباشا
    دي حكومه هتقضيكو منين نسرررررققق الفلوس كلها مصروفه على طويل العمر يطول عمره و يزهزه عصره

    هيا حكمه اللي يمشي ورا الحكومه يبيع نفسه

     
  • At Wednesday, March 07, 2007, Anonymous Anonymous said…

    ياسلااااااااااام يا تمر حنة لوفعلا اللى يمسكوا التعليم الاساسى يكونوا اجانب .... ده الواحد ساعتها يتمنى انه يرجع للمدرسة تانى .... وساعتها الواحد يسطبح بوش مستر/ جون القمر بدل وش استاذ/ عبدالتواب اللى كان يقطع الخميرة من البيت ...... تسلمنا ياختى وتسلم افكارك الجميلة
    :)

     
  • At Thursday, March 08, 2007, Anonymous Anonymous said…

    See ya tamr henna, Since I am living outside Egypt in one of the most developped countries of this planet and the most advanced (not USA), I see what you're talking about. I always think of something: why don't we declare war to the USA, then they come to occupy Egypt (immagine that): our local currency will be the US$ Dollar, we will all have american cars, infra-structures will be all re-done to perfection, education system will be one of the tops in this world and other people from Europe, Japan, latin america and even the USA will send their children to our schools and universities since we have great weather and nice people (this will cost them millions), we will have very cheap petrol, no need for the yearly american donation sice we are an american state, we might have Schwarzenegger as our governer, and life will be Bamby bamby.

    Sorry, Just dreaming of the impossible.

     
  • At Friday, March 09, 2007, Blogger دماغ ماك said…

    shayef en a3'lab kalamek eza makanshy kolo sa7...ana men awel ma bada2t fe elly ana feh da we shayef en el 7al el wa7eed en masr de tet3'ayer enna nebda2 beta3'yer tare2et tarbyet el atfal we kaman el ta3lem el fashel da yet3'yer...we feha eh lama nasta3en be7'brat agnabyea ?? mesh 3eeb..
    maho dubai elly 3amelha kolohom aganeb mesh emaratyeen,,,bas ahy ba2et andaf we a7san men 2oropa...
    lazem aham 7aga ne3'eyer el tarbia we el ta3lem beta3etna lel atfal..el kobar 7'alas maba2ash fehom fayda....lazem nel7a2 el atfal..salam

     
  • At Sunday, March 11, 2007, Blogger eldoctor said…

    نظام التعليم فى مصر .. والوطن العربى فاشل اساسا..
    ولا فائدة منه ... و لاصلاح التعليم .. لازم يبقى اللى بيفكر فى فائدة التعليم يكون بيفهم .. ودى غير موجودة فى بلادنا .. الموضوع كله مصالح ...
    تحياتى

     
  • At Tuesday, March 13, 2007, Blogger تمر حنه said…

    Khalid bin Jarrar
    قفشتك يابن جرار .. قلتلك ميت مره بلاش تعاكس فى التليفونات و تغير صوتك .. بعرفك برضك.. ازى باب الشعرية على حسك؟

    Karakib
    الله يفتح عليك .. دعك من الثريات و الدلدلة و حدثنى عن القنابير المدعدعة...

    Mageb bin Stephen
    قطيعة يا ماجد .. مين اللى بيحلم يابنى .. الحلم ده حكاية ، مش أى حد يقدر عليها .. أمكانيات الأحلام عاليه مّره ياريّال ..يعنى ايه؟ .. أوبشن مرفوع نهائيا من الخدمة ,,

    Memo yad
    لأ و من الناحية التانية .. المدرس للأسف أصبح مسخرة العيال .. قلة أدب و طجرمة و بلطجة و تهزيء عيال ولاد لذينا و وزارة سايبة .. و محدش بيسمع السوق عايز ايه ولا الأوت بوت شكل امه ايه !!ا

    Emo
    دماغ يا بت يا أيمو .. لأ و رايقة كمان أوى .. يعنى أنا دمى محروق و التعليم و الوزير و الحركات و انت عينك على مستر جونى .. آه و عندى ليكى أقتراح عبقرى .. تحية العلم بتاعت الصبح تبقى أغنية : نو يا جونى نوووو .. نوو يا تاتيس نوووووو... و دينى بحبك يا بت

    I,me and myself
    أولا واضح انك فى ليبيا .. صح؟ لأ لأ بلاش أمريكا .. دول عالم ولاد كلب لا ذمه ولا دين و اديك شايف العراق .. احنا نستفز النرويج .. ييجوا يحتلونا ..ماشى؟؟ ناس راقية .. محترمة ..يربونا من أول وجديد ..

    دماغ ماك
    بتقول فيها ايه لما نستعين؟؟ هو فيه أمل غير بدم جديد؟؟ دم نضيف مش دم زفر ملوث.. ياماك مفيهاش خير يابنى و ربنا .. آآآآآآآآآآآآآآآآآآآآآآه ألا ايها الليل الطويل ألا انجلى بصبح .. وما الأصباح منك بأمثلى

    Eldoctor
    و كان حد قالك تذاكر و تتقور عينك و تطلع دكتور ,, يا فرحتك ياخويا ,,

     
  • At Tuesday, March 13, 2007, Blogger جبهة التهييس الشعبية said…

    القصاص لأسرانا الشهداء رجاء التوقيع وارسال الرسائل

     
  • At Wednesday, March 14, 2007, Blogger FATMA said…

    انتي انقطعتي فترة عن التدوين
    كنتي فين

     
  • At Thursday, March 15, 2007, Blogger البنت الشلبية said…

    انا بحب اسلوبك لكن برده احب انتقد حاجة وده لانى عارفة ان صدرك يسيع النقد الموضوعى
    وهيا انك كتبتى
    لكم فى فريق الأهلى أسوة حسنة يا أولى الألباب

    وده حرام لانك كده لان دى فى الاساس قريبة من آية قرآنية ,,,ارجو انك تكونى تقبلتى كلامى بصدر رحب شكرا

     
  • At Friday, March 16, 2007, Blogger تمر حنه said…

    توته توته
    ماكنتش يا توتى .. بس الكلام بقى عزيز شويتين .. مش طالع

    شلبية
    حاش لله .. أنا فكرت قبل ماأكتب الجملة دى و كانت للتقريب فقط ..مالقتش لغة أفضل من كده .. و لكن أبعد مايكون عن الأستهانه .. حاش لله.. و لعدم اللبس أنا هغير الجملة دى خالص .. تحياتى يا شلبيه

     
  • At Sunday, March 18, 2007, Blogger البنت الشلبية said…

    لا بجد احييك على سعة صدرك وتفهمك,,يعنى سيادتك دلوقتى مش مجرد سيدة خفيفة الظل لا كمان سيدة متحضرة متفهمة ,,ربنا يبارك فيكى ويكتر من امثالك يارب,,,وانا شاكرة ليكة مرة تانية ,,وعلى فكرة انا بتابع البلوج بتاعتك يوميا,,متتأخريش علينا فى المواضيع الحلوة,,سلام يا سكرة

     
  • At Thursday, May 10, 2007, Blogger Unknown said…

    أظن رأيك في جوزيه دلوقتي اتغير خالص:D

     
  • At Tuesday, August 28, 2007, Blogger jinja said…

    تسلم ايدك صديقتي العزيزه علي مواضيعك المتميزه

     
  • At Sunday, September 02, 2007, Anonymous Anonymous said…

    عارفه انا كتير فكرت وتاملت ولقيت ان فتره المرحله البتدائيه اثرت في كتيييييييييييييير وتقريبا فاكره تفاصيلها كويس اوي وكمان المدرسين كمان كانوا اي حاجه بيقولوها كانت حاجه مسلم بيها عندنا وكان هو كلامهم اليي صح وبس كانو هما مصدر التلقي الوحيد وزي ماكان في مدرسين مويسين اوي كان في برده مدرسين اجارك الله و كانو بيتعاملو مع الاطفال بطريه غير ادميه علي الاطلاق وكل ده محفور في زاكرتي لا يمكن هنساه ابدا الحمد لله انا ما طالنيش حاجه من بطشهم بس فاكره كل حاجه يعين الطفل في السنه ده بيبقي عنده استعداد كبير اول للتلقي فالمفروض يبقي المدر سين او نظام التعليم متنقي علي الفرازه وانا بضم صوتي لصوتك وموافقه علي فكرتك بس تفتكري من اللي ممكن ياخد القرار ده اللي المفروض ياخدوا القرار ده من مصلحتهم ان احنا نفضل كده زي ما احنا مقهورين دايما

     
  • At Sunday, September 02, 2007, Anonymous Anonymous said…

    سمباتيك انتي زي العسل وكلامك مظبوط مظبوط يا اختشي ما تحرميناش من تعليقاتك ولا انت لك بلو ج
    انت وابلتك سكر سكر ابسط ياعم السكر بسته جنيه اليومين دول

     
  • At Sunday, October 07, 2007, Blogger a Dreamer with feet on the Floor said…

    في كت الدول تأتي ميزانيات التعليم والصحة كأول بنود الأنفاق العامزلكن مصر.....فيها الأولوية للأنفاق علي جيوش الأمن المركزي.وفي مصر يتقاضي الموظف في الكهرباء...(وقطاعات أخري...تعرفونها)أكثر من مرتب دكتور الجامعة...فما بالنا بالمدرس

     
  • At Wednesday, April 16, 2008, Anonymous Anonymous said…

    الكلام بجد محزن وانا موافقاكي ان التعليم حالته يرثى لها لكن الحل مش في الاجانب ولو تاخدي بالك هتلاحظي ان همه اللي عاوزين يفسدوا التعليم الحل ان كل واحد ربنا يعينه ويربي ولاده بس يكون مجهز عشر تلاف علبة مهديء عشان يستحمل بس هيستحمل ايه .....ولا ايه ؟؟ولا ايه

     
  • At Wednesday, May 21, 2008, Blogger Hope said…

    معاكى فى الموضوع بس حسستينى ان مصر بقت كلها كدا .. انا بعترض على حاجه زى دى لان مش كل المصريين فى سنينهم الأولى بيتعمل فيهم كدا ... والدليل وجودك هنا وكتابتك الى بجد شدتنى ليها .. الحل فينا احنا مش فى الحكومه .. الحل فى كل واحد فينا انه يفهم معنى الحياه صح .. لاننا كلنا خلطنا الامور على بعض وانتى عارفه بقى لما بتضربى اى حاجه فى الخلاط كل حاجه بتدخل فى بعض
    تحياتى
    @}->--

     
  • At Wednesday, May 12, 2010, Blogger Unknown said…

    ان ما لحقناش الجيل الجاى كلنا ها نضيع مصر كلها فى مركب واحدة الغنى و الفقير المسلم و المسيحى كلنا محتاجين نقف مع نفسنا ندافع عن كيان بلدنا ومستقبلها و علشان نبتدى نعمل الصح دايما فى امل بس خلينا نبتدى علشان خاطر ولادنا ما يتعذبوش و نرجع تانى نرفع راسنا بين الامم احنا المصريين

     

Post a Comment

<< Home