نص كيلو حلاوة شعر ....
Ann LePereنص كيلو حلاوة شعر .. أكلتهم و انبسطت.... و فجأة كأن عجلة الزمن دارت للخلف كام سنة .. و افتكرت ..
افتكرت أيام الأسكندرية لما كنا بنصيف .. كل مصيف لازم تاخدنا أمى و جدتى و خالاتى معاهم شارع النبى دانيال يشتروا جزم و شنط و كأن القاهرة عدمت أو كأنهم بيعملوا شوبنج فى دبى ياخىّ ..
القصد كان فيه محلين : نور ودبور مفيش غيرهم نقضى فيهم اليوم بحاله .. و نبقى (العيال) طهقانين و قرفانين و نبتدى نقلب الجزم عالشنط و العمال يبرقولنا .. و ماما تزغدنا .. الله ماهو محدش يشترى جزم فى تسع ساعات.
المهم .. أخيرا جدتى تختار الشنطة و تأتى اللحظة الحاسمة اللى كنا بنستناها مالسنة للسنة و نسكت و نتنح:
تيتا: لو سمحت أشوف الجزمة دى .. ورينى الأسود و البنى مقاس 39
البياع: ناظرا الى السماء كأنما يناجى المجهول : 176/84 أسود و 140/18 بنى : و بقدرة قادر تنزل علب الجزم زحلقة عالسلم لوحدها ... و نصمت (احنا العيال) فى ازبهلال منقطع الكلام انتظارا للمناجاة التالية و التى تتكرر فوق العشرين مرة حتى تستقر جدتى على ال"جوز" المناسب .
ريحة محل الجزم على ريحة رطوبة اسكندرية على كآبة تلك المحلات القديمة كانت تهيء لنا الجو الأسطورى الذى يكمل ذلك الشو .
الغريب فى الموضوع انى و حتى سن الخامسة عشر تقريبا كنت متخيلة ان الجزم بتزحلق لوحدها .. هطل صح؟
نص كيلو حلاوة شعر و انفتح بير الذكريات: افتكرت انى قعدت حتى سن المراهقة مرعوبة وانا داخلة الحمام و بحاول أنجز فى وقت قياسى – ليه بقى؟ كان فيه واحد بياع بينادى على حاجة فى الشارع و أنا بسمعه بيقول : شايفك فى الحماااااام .. شايفك فى الحماااااام.
و بعدين مرة وانا فى الشارع قفشته بينادى .. أتاريه بيقول : معانا الجاااااز معانا الجاااااااز .. ساعتها كنت عايزه آخده فحضنى من فرط سعادتى.... و بقيت آخد راحتى فى الحمااااااااام.
نص كيلو حلاوة شعر : و افتكرت كمان أول مرة أدخن فيها و كات وقعة سودة .. دخلنا فى البكونة و كانوا معلقين توم .. و جبنا كبريت و قعدنا نقطع فى عنوق (جمع عنق) التوم و نشرب الدخان اللى طالع .. طبعا كنا هنموت – الأدهى بقى اننا سمعنا صوت حد كبير فرمينا التوم المولع فى سبت الغسيل اللى جنب الأنابيب و هربنا .. و البت الشغالة المسكينة اتهموها ظلما و أخدت علقة بعصاية الغليّة لوووز .
نص كيلو حلاوة شعر و افتكرت : جدى و أخوه بيصبوا الشاى فى البلكونة بعد ماخلصوا لعب طاولة : واحد فيهم مش شايف الكوبايات فصب البراد كله فى الصينية فلما قلنا: الحق ياجدو ده دلق الشاى كله فى الصينية .. راح مزعقله : يا أخى انت ايه مابتشوفش؟ اوعى اوعى الله يسامحك و راح واخد معلقتين سكر و حطهم عالشاى اللى فى الصينية و ابتدى يقلب .
نص كيلو حلاوة شعر و افتكرت أم منال و أبو زيد و محمد فرجانى اللى كان بيقطم رقبة الفيران و هو بيموتها و روحية النصابة بتاعت الفاكهه.
نص كيلو حلاوة شعر : و افتكرت ملل اليوم المفتوح يوم الحد و العالم يغنى و اخترنا لك .. افتكرت رخامة أرنوب بتاع ماما نجوى و بابا ماجد .. افتكرت ريحة بيت الأسد و سبع البحر اللى فى الجنينة .. افتكرت ساندوتش الشاورمة بتاع أكسلسيور اللى عمره ماشبعنى بعد السينما ... افتكرت ريحة قرايبنا اللى من البلد و البتاوو العيش الشمسى .
نص كيلو حلاوة شعر : و افتكرت أيام طيبة .. هادية .. نضيفة .. لاشغل ولا سياسية ولا مسئوليات ولا..... تدوين.
افتكرت أيام الأسكندرية لما كنا بنصيف .. كل مصيف لازم تاخدنا أمى و جدتى و خالاتى معاهم شارع النبى دانيال يشتروا جزم و شنط و كأن القاهرة عدمت أو كأنهم بيعملوا شوبنج فى دبى ياخىّ ..
القصد كان فيه محلين : نور ودبور مفيش غيرهم نقضى فيهم اليوم بحاله .. و نبقى (العيال) طهقانين و قرفانين و نبتدى نقلب الجزم عالشنط و العمال يبرقولنا .. و ماما تزغدنا .. الله ماهو محدش يشترى جزم فى تسع ساعات.
المهم .. أخيرا جدتى تختار الشنطة و تأتى اللحظة الحاسمة اللى كنا بنستناها مالسنة للسنة و نسكت و نتنح:
تيتا: لو سمحت أشوف الجزمة دى .. ورينى الأسود و البنى مقاس 39
البياع: ناظرا الى السماء كأنما يناجى المجهول : 176/84 أسود و 140/18 بنى : و بقدرة قادر تنزل علب الجزم زحلقة عالسلم لوحدها ... و نصمت (احنا العيال) فى ازبهلال منقطع الكلام انتظارا للمناجاة التالية و التى تتكرر فوق العشرين مرة حتى تستقر جدتى على ال"جوز" المناسب .
ريحة محل الجزم على ريحة رطوبة اسكندرية على كآبة تلك المحلات القديمة كانت تهيء لنا الجو الأسطورى الذى يكمل ذلك الشو .
الغريب فى الموضوع انى و حتى سن الخامسة عشر تقريبا كنت متخيلة ان الجزم بتزحلق لوحدها .. هطل صح؟
نص كيلو حلاوة شعر و انفتح بير الذكريات: افتكرت انى قعدت حتى سن المراهقة مرعوبة وانا داخلة الحمام و بحاول أنجز فى وقت قياسى – ليه بقى؟ كان فيه واحد بياع بينادى على حاجة فى الشارع و أنا بسمعه بيقول : شايفك فى الحماااااام .. شايفك فى الحماااااام.
و بعدين مرة وانا فى الشارع قفشته بينادى .. أتاريه بيقول : معانا الجاااااز معانا الجاااااااز .. ساعتها كنت عايزه آخده فحضنى من فرط سعادتى.... و بقيت آخد راحتى فى الحمااااااااام.
نص كيلو حلاوة شعر : و افتكرت كمان أول مرة أدخن فيها و كات وقعة سودة .. دخلنا فى البكونة و كانوا معلقين توم .. و جبنا كبريت و قعدنا نقطع فى عنوق (جمع عنق) التوم و نشرب الدخان اللى طالع .. طبعا كنا هنموت – الأدهى بقى اننا سمعنا صوت حد كبير فرمينا التوم المولع فى سبت الغسيل اللى جنب الأنابيب و هربنا .. و البت الشغالة المسكينة اتهموها ظلما و أخدت علقة بعصاية الغليّة لوووز .
نص كيلو حلاوة شعر و افتكرت : جدى و أخوه بيصبوا الشاى فى البلكونة بعد ماخلصوا لعب طاولة : واحد فيهم مش شايف الكوبايات فصب البراد كله فى الصينية فلما قلنا: الحق ياجدو ده دلق الشاى كله فى الصينية .. راح مزعقله : يا أخى انت ايه مابتشوفش؟ اوعى اوعى الله يسامحك و راح واخد معلقتين سكر و حطهم عالشاى اللى فى الصينية و ابتدى يقلب .
نص كيلو حلاوة شعر و افتكرت أم منال و أبو زيد و محمد فرجانى اللى كان بيقطم رقبة الفيران و هو بيموتها و روحية النصابة بتاعت الفاكهه.
نص كيلو حلاوة شعر : و افتكرت ملل اليوم المفتوح يوم الحد و العالم يغنى و اخترنا لك .. افتكرت رخامة أرنوب بتاع ماما نجوى و بابا ماجد .. افتكرت ريحة بيت الأسد و سبع البحر اللى فى الجنينة .. افتكرت ساندوتش الشاورمة بتاع أكسلسيور اللى عمره ماشبعنى بعد السينما ... افتكرت ريحة قرايبنا اللى من البلد و البتاوو العيش الشمسى .
نص كيلو حلاوة شعر : و افتكرت أيام طيبة .. هادية .. نضيفة .. لاشغل ولا سياسية ولا مسئوليات ولا..... تدوين.
Labels: كان عنّا طاحون
posted by تمر حنه @ 4:37 AM
38 Comments:
At Friday, March 16, 2007,
جبهة التهييس الشعبية said…
يا شيخة وما افتكرتيش الدوم والحرنكش؟
اتقبض على ناس في مظاهرة
اظن التظاهرة التدوينية مش شغب ولا حاجة
رجاء من كل المدونين وضع هذه الأغنية في مدونتهم:
يا قبضتي دقي على الجدار
لحد ليلنا ما يتولد له نهار
يا قبضتي دقي على الحجر
لحد ما تصحي جميع البشر
مش فاهم اللي حاصل
لكن بقلبي واصل
واللي مش فاهمه عقلي
بتشرحه السلاسل
يا قلوب بتنزف دم في العتمة
يا قلوب بتنزف دم وتغني
سجنوكي والكلمة
غصبن عنها وعني
طلعت من القضبان وم الاسوار
الاكواد بتاعة الاغنية اهه
رجاء تبقى شعار المدونين في الوقت اللي بيتعرض فيه كل صاحب رأي - على اختلاف انتماءاتهم - للظلم
الاكواد بتاعتها في الموقع ده
كنت اخدتها من غزالي
تصحيح اللنك
http://www.mp3asset.com/swf/mp3/minime.swf?myid=1575758&f=3
At Friday, March 16, 2007,
maged stephen said…
بص بقى عشان تبقى عارف يا جميل أنا زرتك كتير وصبرت عليك كتير وانتى يا تمرمر ولا زيارة
شكرا يا ذوق يا أبو الذوق
كان عندى مدونة واحدة فضلت أفكر
يا واد يا ماجد
نعم يا معلمى
ياواد يا ماجد
نعم يا معلمى
ممكن تكون تمر حنة جات المدونة عندك ومعجبتهاش علشان لقيتها مش ماشية مع الطقم الجديد اللى لابساه قلت عادى دى برضه أذواق
عملت مدونة جديدة وبرضه سمعنى بودعك والتنفيض ع الكيف
لأ بجد كمية تراب مش عارف أوصفها
وأنا مش باعتبك دلوقتى
على بوست الحلاوة الشعر اللى فوق أنا بس خايف عليكى يابنتى كترها مش كويس
م الاخر الذوق مش نافع
اذا لم أجد ما يثبت زيارتك مدوناتى انهارده الجمعة
المدونة بتاعتك ستتحول الى مدونة مفخخة بأحدث ما وصل اليه الخيال العلمى والادبى من قراطيس ورق وحب الاطاليا الانشطارى ماركة الداخل مفقود ياولدى يا ولدى
وسمعينى سلام الامباليه
At Friday, March 16, 2007,
admelmasry said…
تمر حنه
ـــــ
المفاجئة اللي كنت وعدتك بيها قائمة
وهي فعلا مفاجئة
لكن عزرا للتاخير
عشان فيه بعض الانشغالات
اما بالنسبة للحلاوة الشعر بقي وذكريات الماضي الجميل
فانا احب اقولك ان قدامي دلوقتي طبق حلاوة مليان علي طمة عينه
ومش قادر افتكر حاجة
يمكن عشان الحلاوة ما ارتبتطشي معايا بذكريات
او يمكن ذكرياتي انا كانت مع العسلة والبوزو مثلا
مش عارف
لكن الاكيد
ان كلامك اثار الاشجان جوايا
فكرني بايام كان نفسي اعيشها
لك تحياتي
At Friday, March 16, 2007,
Anonymous said…
ربع براندي..
وتنسي الذكريات دي كلها..والشغل والسياسة والتدوين..
والحلاوة الشعر كمان
At Friday, March 16, 2007,
Anonymous said…
تمر حنه ..
الثائرة.. الحنونة .. الكوميدية ..الكئيبة ..القوية .. الضعيفة.. الضاحكة .. الباكية
كل هذه المتناقضات .. أنت
At Friday, March 16, 2007,
Anonymous said…
جميلة اوي اوي اوي
قد ايه الذكريات جميلة
بس كل ده من الحلاوة الشعر؟
واللي مش بيحبها يعمل ايه
؟
:)
وحشني يا جميل
sorry..your mail address is lost.. if you can send me back yours..to keep in contact!! :)
At Friday, March 16, 2007,
كلبوزة لكن سمباتيك said…
فطستيني من الضحك انت لازم تعملي الفوازير السنة الجاية
موقف جدك و صينية الشاي ينفع في فيلم الموسم و ياخد سوكسيه عجب
كنا اطفال ساذجين بيضحكوا علينا بالعصفورة اللي حتفتن علينا
بس انا كنت بحب بقلظ و ماما نجوى
اسكندرية و النبي دنيال و شارع صفية زغلول و اللاجيتيه
يااااه ذكريات جميلة
اول تدخينك كان توم و انا بقول برضه الدماغ العالية دي مش من فراخ
أول مرة اعرف ان سمعك تقيل
بقى ايش جاب معانا الجاز لشايفك في الحمام انت مدرستيش فونكس خالص
ده كان نصف كيلو حلاوة شعر و لا قرش حشيش
على راي الجسمي
بحبك وحشتيني
At Friday, March 16, 2007,
كلبوزة لكن سمباتيك said…
قلعتي الابروفل ليه يا امي كده تبردي
البسيه تاني و حطي تحتيه ورقة جرنان و فللة برقبة و متنسيش الكالسون الابيض الطويل اللي برقبة
و قولي لابو عيلاء ان كان جعان يتعشى
نياهاهاهاي
At Friday, March 16, 2007,
قاسم أفندي said…
حلاوة شعر!!!
جايز
كوز ذرة ع الكورنيش
دوم علي الرصيف قدام باب المدرسة
قصب علي السطوح
....
فيك عشرة كوتشينة في البلكونة .. افتكرتها مع الشاي اللي في الصينية
حلوة الحلاوة الشعر دي ولسه موجودة بس كل حاجه تانية راحت
وعايزنا نرجع زي زمان
قول للزمان أرجع يا زمان
At Saturday, March 17, 2007,
تمر حنه said…
جبهة التهييس الشعبية
استنى كده لما أفتكر .... لأ ماكنش فيه حرنكش .. بس ياما الدوم عذب أهالينا .. اختراع مؤذى
نوارة ..مش عارفة أنزل الأغنية ..بس هتيجى
Maged Stephen
أووف هديت حيلى ياواد يا ماجد .. لسه جايه جرى من عندك و سيبتلك اللى فيه القسمة فى البلوجتين .. و بقولك ايه يامؤذى انت روح العب انت وصحابك هناك فى مدونتك و ماتقلبليش الدنيا هنا .. واقفين على حيلنا مالصبح ننضف
آدم ابن المصرى
يادى الحوسة يا آدم عالمفاجئة .. يابنى مابنامش من ساعتها .. مفاجأة سارة .. مفاجأة سارة ,, تكونش ياواد عترت فعنوان عمك نظمى و ناوى تكرى عليه ولا تبلغ عنه؟ أهو ده الشغل التمام
و بعدين كل حلاوة انت براحتك .. شكلك كده سمباتيك و شبه الأرنوب اللى انت حاطه .. صح؟ الدور و الباقى علينا : الميه بتتخنا .. آآآآآآآه يانارى
وائل
وحياتك من غير البراندى بتاعك .. أنا كنت ناسية كل حاجة و زى ماتقول "حلاوة" روح – بقولك ايه سيبك مالبراندى و خليك فى الحلاوة
على مشالى
يعنى مالآخر .. مجنونة – ماشى
Epiiiiiii the sugar lump
ولا انا بحبها .. بس بتبفى حاجة ماحتكتش بيها من أيام الطفولة ( تلات أربع سنين يعنى) و فجأتان بتعمل حاجة أسمها : كونديشيونال ريفلكس تلاقى الحاجات طلعت و كده .. ابى أنا عملت ايميل هنا ... برجاااااء المراسلة
Sampateeeek
آه تعالى انتى كمان معايا .. أنا و انتى و نجيب معانا حجاج عبد العظيم و البت بدرية و تبقى عجبببب .. شفتى المعاناة يا أختشى .. سنين و سنين فاكرة انى متراقبة و أنا فى بيت الراحة .. الا مادقت يوم حلو لا زمان ولا دلوقتى .. على طول مزنوقة.. و بعدين انتى شايفانى منين يا طاهرة و شايفة الأمبروفل و الجرانين؟ انتو بتعملوا فيّا كده ليه ؟؟
قاسم بك
لأ مش عايزة أرجع زى زمان .. ماكنتش مبسوطة أنا بأيام زمان .. كان عندى خنوع غريب .. سبحان من نحررنى دلوقتى .. و كنت مكمكمة كده ولا بلابط و مكان مايحطونى يلاقونى .. لا عنه مارجع ياقاسم
At Saturday, March 17, 2007,
FATMA said…
تحفة
بس هو انتي كلتي نص كيلو حلاوة شعر لوحدك ؟؟؟!!!!!!!!
At Saturday, March 17, 2007,
Anonymous said…
:D:D:D...m32ola kol dh men nos kilo 7lawa sha3r...begad enty eslobe game awyy fe el ta3ber wna begad mtb3ek men zman bs awel mra ab3t...wna delw2ty mdwen 7adeth ya rab te2blony m3ako :)
At Saturday, March 17, 2007,
Anonymous said…
Kont fakra any momken akoon men demn zekrayatek al gamila....
At Saturday, March 17, 2007,
karakib said…
كل مرة أجي هنا أمشي و أنا باضحك و أحساسي حلو
شكرا
At Sunday, March 18, 2007,
جبهة التهييس الشعبية said…
اللنك ده عليه اكواد الاغنية
http://www.linux-fr34k.com/Soka/Blogger/Cod.rtf
At Sunday, March 18, 2007,
يا قلبي يا غريب said…
السلام عليكم
اول ما قرءت من مدونات كانت مدونه رئعه جميله شيقه اسمه ايوه خدامه ثم مشعارف ابتعدت عنها يمكن علشان الكلام بدء ما يعجبنيش
بس البوست ده رائع ليه ؟؟عندما يكون الكلام بصدق و احساس و الله ان هذا الكلام يتحول الي شيء مجسم يلمسه القارء بيديه
At Sunday, March 18, 2007,
البنت الشلبية said…
بوست لذيذ وفى الجون..انا بقى الحلاوة الشعر دى بتفكرنى بزكرى سئية بعيد عنك..بتفكرنى يوم ما وقعت صنية الكنافة على الارض لانى مكنتش عايزة اكلها وكنت عايزة آكل الحلاوة الشعر وساعتها ماما قالتلى كلمتين استنينى لما آجيلك لانها كانت بتتوضى او بتغسل وشها تخيلى قعدت فى رعب متجسد الدقيتين عقبال ما طلعت ولقيتها هوب جرى على اوضتها ومطلعة المسطرة الخشب الى كسرتها على اخويا هههههه احسن يستاهل ,,ما علينا خلينا فيا وخدت على ايديا كام ضربة عسل بالمسطرة وافتكر بعدها اتلسعت بالشمعة ,,يعنى زيادة تاكيد منها على العقاب ,,عشان يبقى ضميرها مستريح انها عاقبتنى صح وانى مش هوقع صينية الكنافة فى الارض تانى,,,ياخى دهدا ,,انا دلوقتى اوقع ميت صنينة ولا حد يقدر يقولى بم
وشكرا على تزكيرى بالحلاوة الشعر وزكرياتها المؤلمة ههههههه
سلام يا جميلة
At Sunday, March 18, 2007,
أُكتب بالرصاص said…
ينهاااارك مش فايييت
في أخر اربع سطور بس فكرتيني بعشرين سنة من ورا
كانك كنت بتعملي نفس الحاجات اللي كنت بأعملها، وبتكرهي نفس الحاجات
ملل اليوم المفتوح وايه اللي كان مصبرنا نقعد نتظر اليوم مله اعلشان الفيلم الابيض والاسود بتاع فريد الاطرش
واغنية ام كلثوم المملة
رخامة أرنوب، واستظراف بقلظ
وصوت بابا ماجد الاجش والنوم بيداع عيوننا وهو بيحكي لنا حكاية هايدي
ريحة بيت الاسد اللي عمره ما نضف ، وسيد قشطة اللي ما كناش بنشوفه ..اهو هاو ...هانك ..شايفه ؟. والبحيرة كلها زبالة
والاكل عند اكسلسيور بعد السينما وفيلم ملف في الاداب
العيش الشمسي والجبنة القريش اللي جاية من البلد
يوووووه
اخلع القبعة احتراما للك
واليك
22 طلقة هدية
At Sunday, March 18, 2007,
Anonymous said…
كأنك لغوصتي في تلافيف مخيخي وطلعتي الذاكرة وقلبتيها زي فردة الشراب
وكل محتوياتها اتفرشت على الأرض ولغاية دلوقتي قاعد ألم فيهم
تحياتي ..تحياتي .. تحياتي
At Sunday, March 18, 2007,
Anonymous said…
أنا لما ئريت العنوان ، ئلت حلاوة ؟ يانهار ملزَّئ ... تمرمر هتئلبها حمام التلات . بس لئيتك ف السليم ، وانا اللي أفكاري كلها شد و فرد
At Sunday, March 18, 2007,
بنوتة من وسط البلد said…
على العموم الحلاوة الشعر فى المنام نصرة والله
المرة الجاية ابقى جربي حلاوة بالقشطة
وحلو موضوع التوم ده ويا ترى لفيتوه فى ورق بفره ولا على الواقف
:)
تسلم ايديكى
At Sunday, March 18, 2007,
harmless said…
كل ده تأثير الحلاوة الشعر
اتاريهم بيقولوا فى المواقف دى
ياحلاوة
او يمكن دى اللى بيقولوا فيها
انا عندى حلاوة شعره
ساعة تروح وساعه تيجى
At Sunday, March 18, 2007,
Anonymous said…
حلو إنه الواحد يكون عنده ذكريات بس الأحلى لو أمكن إنه يعيشها مرة ثانية
بجد بوست حلو كثير
At Sunday, March 18, 2007,
الحارس said…
انتى مين ؟
مش ممكن بتجيبى الكلام ده منين
؟؟؟؟؟؟؟
أنا حاسس بكل كلمة
At Monday, March 19, 2007,
Anonymous said…
ana bst2zenek enny ha7ot comment l2eto 3andek fe post 3andy 3an el commentat argo en dh maydy2kesh ya rabb
At Monday, March 19, 2007,
خمسة فضفضة said…
السلام عليكم
بجد رجعتيني لايام جميله اوي ،
زمان كان كل فرحتنا الفيلم العربي بتاع يوم الخميس وسهرة اخترنا لك يوم الاربع وماما نجوي وبابا ماجد وسينما الاطفال يوم الجمعه
شكرا لك بوست روعه
At Monday, March 19, 2007,
Eric Matt said…
قول للزمان ارجع يا زمان
فينك يا أيام شارع النبي دانيال؟
تحياتي من ماناساس البلد
At Monday, March 19, 2007,
halwasa-masrya said…
والله مفيش مرة بدخل هنا غير لما اخرج من عندك وانا مودى عالى موت .. انتى دمك خفيف بفظاعة
At Monday, March 19, 2007,
Khalid said…
والله مفيش مرة بدخل هنا غير لما اخرج من عندك وانا مودى عالى موت .. انتى دمك خفيف بفظاعة
i second that! :D
on a more serious note, please visit my last post about the fourth year of occupation, i would appreciate some arab readers there:)
http://secretsinbaghdad.blogspot.com/2007/03/fourth-year.html
At Monday, March 19, 2007,
Khalid said…
والله مفيش مرة بدخل هنا غير لما اخرج من عندك وانا مودى عالى موت .. انتى دمك خفيف بفظاعة
i second that! :D
on a more serious note, please visit my last post about the fourth year of occupation, i would appreciate some arab readers there:)
http://secretsinbaghdad.blogspot.com/2007/03/fourth-year.html
At Tuesday, March 20, 2007,
الحصان الأسود said…
ههههههههههههههههه
كوميديا سوداء
تحياتي
At Tuesday, March 20, 2007,
Amr Ahmed said…
الذكريات ماشية زي الفل
ويجي موقف جدك ده يموتني من الضحك
تحفة تحفة
At Wednesday, March 21, 2007,
maged stephen said…
تمر حنة
من فضلك عايز أعرف رأيك فى موضوع مهم
ادخلى عندى فى مدونة شاطئ المصير وأنا رديت على تعليقاتك عندى وهتلاقى الموضوع فى الرد
متتأخريش على لأن فعلا محتاج رأيك
At Friday, March 23, 2007,
الأرمـوطــي said…
ينصر دينك ...يسلم فمك وتسلمى....عظمة على عظمة على عظمة ياست الكل ...يااااااااااااه على النعمة انتى بتفهمى والله انتى عاقله الواحد من زمان نفسه يشوف واحدة عاقلة الحمد لله ربنا نولهالى قبل مموت..معلش لو كنت دخلت كده من غير مخبط بس والله ده من فرحتى....التعليق ده بتاع البوست الى عن المساواة بس انا معرفتش ابعته هناك مش عارف ليه
معلش احنا بنتكلم
At Sunday, April 01, 2007,
Anonymous said…
احييك من الاسكندرية بلد شارع النبي دانيال انت مالكيش حل احي فيك المراة بكل معني الكلمة انت ست راجل مثقفة دمك خفيف حبوبة وطنية كل الصفات الحلوة فيك انا خايف جوزك يغير عليك مننا بالذات الرجالة
At Wednesday, April 25, 2007,
Masry said…
الحنين بيقتلني
At Saturday, June 23, 2007,
admin said…
ماهو علشان امثالنا ما يكلوش حلاوة شعر مبقاش في حاجة في شارع النبي دنيال ياختي
نفضوه
وبكرة ينفضوا كل حاجة لينا فيها ذكري حلوة
At Sunday, March 14, 2010,
mostafa said…
ayooh fakartona bayam zaman el modawwand da 3afratet sando2 el zekrayat elle arab yetredem men el torab,we ka7ratet shret el zekrayat we kloklo ma7tet el raml wel teen el shooky mosh fahem le7ad delwa2ty leeh el lamba el flurecent kanet decor 3ala 3arabeet el teen el shooky?
konna el osra el wa7eeda fi iskndreya we kan kol al a3mam wel khelan fe masr we lamma kan 7ad yege men masr yeb2a el kheer wel akl wel khroog we malahy el azareta wel dora wel ragel elle 3al ba7r yendah 3ala 7aga esmaha freska ya bonga tool 3omry a7ebaha we lamma 7ad men araybey yeshofny wlhan we 3enaya 3aleha (el freska tab3an)yendah 3al ragel aseb kol 7aga wa23od 3al ramla we a3eesh 3alam el 7ob wel hayam la7zat el mot3a mashofsh el ba7r wala al nas we tab3an kont 3ayel aroob akhtar el baskoota 3alshan kbeera ah ya zaman merci ya tamr 7enna lamasty el watar el gameel feena lel7adeeth tattemma.
Darsh
Post a Comment
<< Home