أيوه خدامه

Friday, June 29, 2007

الشردوحة ست جيرانها





أيها ألأخوات و الأخوة ..لقد أتخذت قرارا أريدكم جميعا أن تسعادونى عليه : قد قررت أن أتنحى تماما و نهائيا عن أى منصب رسمى و أى دور سياسى , و أن أعود الى صفوف الجماهير أؤدى واجبى معها كأى مواطنة أخرى .... ( هتاف ذو ألفاظ معبرة يطالبنى بعدم التنحى ).


مقدمة تاريخية شديدة بمناسبة هبوب رياح يونيو و الجو العام و الحركات .. فقد أكتشفت ان المدعو أبو عيلاء شخصية هررية بحته تنحدر من سلالة القط مشمش أبو ديل طويل اللى بياكل و يقول ماكلتش .. بعد ما سستيمنا الرجالة و دلعنا النونّا و هشتكنا النونة و أعتقدنا انهم بقوا فجيبنا الصغنن الورانى ..


كما سهرنا الليالى و عقدنا الأجتماعات السرية فى المخابئ بتاعتنا .. و صرفنا دم قلبنا : دا الست أم سارة رهنت النحاس عشان تركب شعر أصطناعى لابو حسام و البت أزأوزة سرحت ابنها بكلينكس عشان تدفع أقساط البواريك و أم نور بقت تاخد ورديات زيادة فى المستوصف عشان تجيب طقم سنان جديد عالزيرو لزوم اغراء أبو سعيد ..
وجدنا ان نأبنا جه على شونة و عاد جميع الرجال الى تدنيهم الأخلاقى و سوء المعاملة بعدما سلبونا أعز مانملك من نحاس و ألومنيوم و أشياء أخرى لا تقدر بثمن ( أهئ أهئ) .. حتى طقم الأنترية اللى كان نفسى أنجده من أربعتاشر سنه فرتكت فلوس الجمعية بتاعته لزوم الجيم لأبو عيلاء و ياريت تَمَر ..... و لذلك و لما سبق قررنا أن نتنحى تماما و نهائيا .. حد يسألنى ليه؟؟ أقوله عشان احنا ولاد ناس.


فالرجاله - أيتها الأخوات - دول عايزين الغجرية : فالغجرية .. أعزكم الله .. ست جرانها و ان ماخافوا منها يخافوا من لسانها

يعنى ولية زى كونداليزا دى يقدر جوزها يرفع عينه فيها ولا يتجوز عليها ؟؟ بستجرى يخليها تخرج فى الغزوة و يفتح روتانا كليب يتفرج على " بوس الواوا" ؟ دى كانت شردحتلو و جابتلوا خالها اللى بيضرب بانجو فى هارلم يقطعه خمسين حته عالخمسين ولاية .. آه يارجالة مالكومش الا جوانتانامو


- بلاش .. بلد زى اسرائيل .. اللى ماتجيش شعرة فـ ..ايد أى بلد فالمنطقة فاردة قلوعها و لو عيل فلسطينى رمى طوبة عالحيطة اللى بينهم تبطح نفسها عليه و هاتك يا صويت و عويل و مرمغة و هاتولى حقى ياولود اللى و اللى ... فيكوا حد قدر عليها؟
يعنى ستات زى الفل و اتقدملهم أكابر البلد و البلدان المجاورة و الواحدة مننا زى الهبلة ماخدوش يابابا ماخدوش يابابا .. ده عمر الشريف .. ولا بلاش.. و فى الآخر ييجى لافندى يتنى و يتفرد .. على ايه؟


مالصبح شقيانين و بنربيلكوا عيالكوا و نروح شغل و نصرف و نغسل ياقات و أساور لما اتهرينا و آخر الليل نقدم لكم فوازير نيللى .. طب علينا النعمة اللى عملناه نيللى نيللى ليطلع عليكم شريهان شريهان ...


أيتها الأخوات .. لقد تعودنا معا فى أوقات النصر و الأوقات المرة أن نجلس معا , و أن نتحدث بقلوب مفتوجة و أن نتصارح بالحقائق مهما كانت الظروف عصيبة و مهما كان الضوء خافت ..فلنقف وقفة ست واحدة .. و أن نتسلح بكل حاد و ثقيل .. حان وقت الشباشب و الشماعات .. فلنحاصر تلك الشرذمة فى أوكارهم و نجردهم من ملابســ .. عفوا أسلحتهم .....فلنبدأ عصر الشردحة
المهم اللعب يكون مدروس
:
- رفعة الحواجب مستمرة ( بالذات الشمال) ..الشعر منكوش و واقف أرايل مظبوطة على 1466 فيرتيكال ..


- ممنوع منعا باتا لبس الشباشب السوفت ام ترتر و يفضل أبو وردة اللى بيلسوع و يا سلام لو قبقاب تركى .. يبقى عسل

-تشفير كل قنوات الفيديو كليبز (منعا للمقارنات بينّا و بين الفاتنات الخائنات و اللى مش فى صالحنا بالقطع ) و يحظر حتى مشاهدة كليبات الأطفال بتاعت هايفة و نانسى .. دول حتى المزاغيد دولم لهفوا مننا لقب الأم المثالية حيث فازت باللقب السيدة هيفا عن أغنية نوتى نوتى .. ماهو ياختى العيال هما كمان ماينضمنوش و على رأى المثل .. جابوا الجردل و قلبوه طلع الواد لابوه .
- عدم الرضوخ لأى محاولات جصار أقتصادى و قطع للمصروف .. فمهما كانت التهديدات بالتجويع فلا تنازل فمثل الحرة : آكل الفول .. و أخرج قفايا عرض وطول - ولا آكل الكباب و وقفة أبو عيلاء ورا الباب


- لا مجاملات فى حالات الأخفاق الزوجى .. عايزين براكين أم الغضب و زلازل اتناشر ريختر و سياحة فى الأوساط العائلية و الأجتماعية والبلدان الشقيقة ( خاصة جنوب أفريقيا و ساحل العاج ) و ياريت لو الأخ بيستعين بمساعدات خارجية ابقى استبدليها فى الخبائة بحباية بانادول منقوعة فى شوية زهرة غسيل ..و ياسلام لو تسقطيله اتنين منوم فى الكاكاو ... و عليكى وعلى أعدائك يا دليلة .. تستحملى شوية يا شابّة ( كله عشان القضية).


- سيبك بقى نوهائى من الرز بلبن و الشاى أبو نعناع و الكابشتينو يا سونة .. و ياريت بالمفتشر كده تفهميه انك ليكى غرض تشيشى فى الوحم و يقوم يرصلك حجرين فى البيت بدل ماتفضحيه عالقهاوى البلدى

.
أخيرا و ليس آخرا تمسكن - أخواتى بنات جنسى - بالسيستم الجديد - و الا فلنتنحى تاركين وراءنا كل المسئوليات و الأطفال ( و لكن خدوا السيغة بتاعتكوا ) حتى يشعر الرجل بأهميتنا فى الحياة ...و تمسكن بشعارنا القومى : الله .. الوطن .. انشراح
. و الله الموفق

Labels:

56 Comments:

  • At Friday, June 29, 2007, Anonymous Anonymous said…

    مش كل الرجالة هيتعمل معاهم كدة يا تمر حنة

    والله فية ناس محترمة كتييييييييييييييير


    و فيه ناس بتدور على كعب رجل قطة بتنونو فى الشارع عشان تطبطب عليها

    سمعتي عن الطالب الازهرى اللى امن الدولة اعتقله من فترة اللى كان بيوزع ورق فى الاوتوبيسات كاتب فيه انه طالب صعيدي بجامعة الازهر بالقاهرة وعمره 24 سنة وعايز يتجوز اى ست مطلقة او ارملة وعندها شقة ومستعد يعمل ويسوى؟

    ده احد الامثلة..... شاب اعزب شاف عذاب شقق الطلبة ويوم الخدمة (بيعملوا يوم فى الاسبوع لكل واحد يغسل ويكنس و يطبخ) وكل واحد له يوم بأة

    الخلاصة: البلد مليانة غير أبو عيلاء ولو العملية قصرت.... لية منجددش؟

    فيه شباب هيموت ويتجوز........... واحنا اللى بنتأمر عليه..... نجوزه بناتنا او نتجوزه احنا ذاتنا.... اية المشكلة

    لو فكرتى فى الكلام اللظيظ ده..... هتلاقى ان العشرة مع ابو عيلاء متهونش... وربنا يخليهولك يا تمر حنة

     
  • At Friday, June 29, 2007, Blogger Unknown said…

    فلتحيا انشراح


    وسحقا للرجال

    والسلام عليكم ورحمة الله وبركاته

     
  • At Friday, June 29, 2007, Blogger جبهة التهييس الشعبية said…

    الله

    ما قلنا كده قلتوا اطلعوا م البلد

    طيب ارجعي يااوختشي كده لتدوينة سستمة الرجالة

    وشوفي انا قايلة لك ايه

    وانت قاوحتيني
    وقلتي لي لا الحالة اللي بتتكلمي عليها دي حالة مرضية

    وهو فيهم واحد مش مريض

    واحد امه مربياه بالشبشب
    يمشي ازااااااااي؟

    ايون برافو عليكي

    ولما قاوحتي

    قلت خلاص

    خلي حبيبي على هواه لما يجي ديله على قفاه

    هو احنا لازم كل واحدة فينا تتاكل على قفاها عشان تعرف ان الله حق

    ما جاية لكوا انا من ارض المعركة وقلت لكوا اللي فيها

    ما بتسمعوش الكلام ليه؟

    بصي بقى يا امورتشي واسمعي زبد الكلام

    الراجل المصري الست والدته بتفهمه انه اللية والعين الجوانية

    وانه يقعد ع البساط وياخد ست البنات

    وفي نفس ذات الوقت

    برضه نفس الست الوالد بتضربه ضرب غرائب الابل

    وفقا للاحصاءات الام المصرية من اكثر الامهات استخداما للعنف في تربية ابنائها

    قوم اييييييييه

    قوم الواد يطلع عنده عقدة اسمها

    superiority inferiority complex

    ما تعوجليش بقك كده سامعاكي وانت بتقولي: الله يرحمه اخر كلمة قالها فجل

    يعني عقدة الدونية والتفوق مع بعض

    الضرب والدلع مع بعض بيطلعوا شخصية مش سوية

    ما يجيش غير بالطرقعة

    ويبقى جواه نفسية المقهور

    تدلعيه يتمرع ويفتكر نفسه ابو الشمايل

    وكل ما تديله اهمية يتهياله انه عمر الشريف ويقعد يكيدك: دي فلانة ح تتجنن عليا

    وبما انه اخد الثقة الكاملة منك

    فمافيش مانع انه يجرب نفسه مع بقية الصنف

    وما يحسش بالواجب غير لما يترن علقة

    وطول ما انت محسساه انه بالسلامة يا قطر واللي اخدته القرعة تاخده ام الشعور

    ح يفضل لازق في شبشبك

    كمان الرجالة المصريين فيهم داء وسخ

    انه طول الوقت بيعمل بالونات اختبار

    يعني

    يكشر في وشك ويشوفك ح تعملي ايه

    لو قعدتي تحايلي فيه: مالك يا حبيبي شكلك مش عاجبني

    فيك ايه

    سلامتك

    يبتدي بقى يعلي صوته: يوووووووووووه بطلي بقى سيبيني دلوقت

    سيبتيه ورحتي عاملة له فنجان قهوة

    يقوم يعرف بقى انك كردية: انا قلت لك انا عايز قهوة؟ حاجة تقرف

    سكتي

    يقلب الصنية في وشك

    سكتي

    يبقى اشربي بقى يا حلوة

    يوم يتأخر ع الغدا

    سكتي وما خنقتيش امه ب: كنت فين ومع مين وايه التاخير ده

    تاني يوم ح يتغدى برة

    سكتي

    يتعشى برة

    سكتي

    يبات برة

    سكتي

    يتجوز عليكي

    نصيحة تانية

    ما تعمليليش بنت ناس

    كل اللي اهلك علمهولك ارميه ورا ضهرك

    دول ارتكبوا في حقنا جريمة لما ربونا ع الادب

    عايزة تخربي بيتك

    خليكي مؤدبة

    عايزة تعمري

    لازم تسني سنانك

    وتزايدي عليه في النكد

    يعني على صوته

    تعلي صوتك اكتر

    طول لسانه

    تفضحي اهله وتخلي اللي ما يشتري يتفرج عليه


    امال انت فاكراني مولودة بطحجية كده خلقة ربنا؟

    ده بنت ناس يا ناس

    بس الزمن علمني اكل الدراع

    اديني قلت لك

    عايزة تتنصحي اتنصحي مش عايزة تتنصحي ذنبك على جنبك عقلك في راسك تعرفي خلاصك

    وروقي كده

    الكوافير ده تروحيه عشان نفسك

    كبري دماغك

    وطول ما انت شايلاه من راسك

    زي ماقلت لك

    ح يلزق في جزمتك زي اللبانة

    مممممممووووووووووووووواااااااااااه

    آه

    ملحوظة تانية هامة جداااااااااا: كل معلومة الراجل يقولها عن نفسه صدقي عكسها على طول

    هم بيحبوا يلعبوا اللعبة دي: انا ما احبش النكد ابدا

    معناها انا عايز يطرقع لي كل يوم

    انا باكره البخل: يبقى جلده

    انا عمري ما اكدب: يبقى بيتنفس الفشر والمعر

    انا احب كلمتي في البيت هي اللي تمشي

    يبقى قفا ولازم تمشي رأيك عليه

    باي يا قمر

    واوعي تجيبي سيرة التنحي دي

    هو احنا لنا الا تمر حنة

     
  • At Friday, June 29, 2007, Blogger جبهة التهييس الشعبية said…

    اوختشي

    بالنسبة لتشفير القنوات

    سيبك من الكلام ده

    الستات لا تشفر ولانيلة

    هي بس تصنفر لسانها شوية

    يعني لو المقروص اتسحب من لسانه وقال لها: شايفة النسوان

    تروح قالبة على اي قناة لبنانية وتقول له: وشايف الرجالة

    ثم تنشد وتقول: ربنا مديهم ستات شبهم

    يعني الستات دول لو اتخلقوا مع الرجالة اللي شبهك كان زمانهم عنسوا

    ربنا مديلكوا ستات ترضى بنصيبها لما تصطبح بخلقكوا

    وكل فولة مسوسة لها كيال اعور ما يشوفش سوستها

    وللا انت ما بتبصش في المرايا

    تحب اجيب لك عنوان هيفاء وهبي تروح تقابلها تشوف ح ترضى انك تشيلها الشنطة وللا لا؟

    يعني دي لما تبص لراجل يبقى مال وجمال او حاجة واحدة فيهم

    انما يا حسرة

    لا مال ولا جمال الا بس لسان بينقط سم

    الستات دول عايزين معاملة معينة

    وانت يا قلبي لخمة ولا بتعرف تعامل ستات ولا حتى حيوانات

    ====

    وهكذا يا اخوتشي

    الكلمة بعشرة

    بحيث انه قبل ما ينكد عليكي او يقول كلمة مش ولابد

    يفكر الف مرة في ردود افعالك

    اصلهم ياختشي من فصيلة حسن عابدين: انا عايز حد يهزأني يهزأني يهزأني

    واسأل مجرب

    انا باقول لكوا اللي لو كنت عملته ما كانش بقى ده حالي

    هاااااااااااااا

     
  • At Friday, June 29, 2007, Blogger جبهة التهييس الشعبية said…

    آه نسيت حاجة كمان

    المسلمات في حياة اي ست لازم تاخد منها اجازة تلات ايام على الاقل

    يوم كده تروحي داخلة السرير: وتعبانة

    ما طبختش

    تعبانة

    مش ح اجيب العيال من المدرسة النهاردة
    تعبانة

    ما غسلتش

    تعبانة

    ما وديتش الهدوم عند المكوجي

    تعبانة

    مش ح اذاكر للعيال

    تعبانة

    جمدي قلبك يا زينب

    اول يوم مافيش حاجة من اللي كنتي بتعمليها ح تتعمل

    وممكن ينسى العيال في المدرسة

    تاني اليوم العيال ح تيجي معيطة عشان انضربوا في المدرسة عشان ما عملوش الواجب

    جمدي قلبك برضه

    تالت يوم البيت يضرب يقلب

    جمدي قلبك

    انت ايييييييييييه؟ ايييييييووووووووة تعباااااااااانة

    رابع يوم

    وبعد ما بطنه تنشف من اكل المحلات

    ح يقول حقي برقبتي

    هارشة

    على الله بس تعرفوا تعملوا كده

    ما عارفة قلبك ال...يا زينب

    لا جمديه

    ما جمدش

    طلعيه ودوسي عليه برجلك عشان ده اللي ح يجيب لك الكافية

    وفي الاخر برضه بيتك ح يتخرب لو فضلتي تاخدي على قفاكي وتسكتي

    النغنوغ ح يروح يدور على واحدة ما بتاخدش على قفاها وتسكت

    الا هل بلغت؟

    اللهم فاشهد

     
  • At Friday, June 29, 2007, Blogger عبدالمنعم محمود said…

    بصراحة من مدة سامع عن مدونتك بس لما دخلت قلت خسارة كل اللي فاتني عندك انتي دماغك عاليه جدا
    وعليه انا اسمي عبدالمنعم محمود صحفي وصاحب مدونة أنا اخوان وانا باحرر صفحة في جريدة الدستور عن التدوين
    وبنزل فيها كل أسبوع أجمد بوست شفته أو حد رشحه خلال الاسبوع وبصراحة أنا حموت وانزل البوست بتاعك
    فممكن تسمحي لنا ننزله بس أنا حختصر منه شويه عشان المساة
    ممكن حضرتك
    الرد يكون بسررررررررررررررررررررررعة جدا
    abdoumonem@gmail.com

     
  • At Friday, June 29, 2007, Blogger جبهة التهييس الشعبية said…

    هئ هئ هئ هئ هئ

    شاب مصري بيضرب مثل بواحد عمل اعلان عشان يعيش سفلقة على قفا الستات

    هو ده احسن حاجة عندكوا يا كابتشن؟؟؟؟؟؟؟؟؟؟؟؟؟؟؟؟؟؟؟؟

    باقول لك ايه يا تمر حنة

    عايزاكي ضروري

    خدي نمرتي من كلبوزة او شهروزة وكلميني

    باي يا قمر

     
  • At Friday, June 29, 2007, Blogger كلبوزة لكن سمباتيك said…

    فطستوني من الضحك يا تمر انت و اختشي جبهة
    انتم ملكومش حل
    انا موافقة معاكم تماما ان في نوع من الرجال - مش كلهم- ميجوش الا بالسك للاسف و الحكاية دي موجودة عند كل الرجالة بس بنسب متفاوتة
    و قال على راي المثل
    عبري ال...ينجعص لورا
    و كفاية كده لحسن ابو اكرم يزعل
    ههههههههههههه
    بحبكم
    قبلاتشي

     
  • At Friday, June 29, 2007, Blogger محمود على said…

    وانا الي كنت عايز اتجوز
    ولا هقربلوكم
    حسبنا الله ونعم الوكيل
    ايه التعقيد ده بس

     
  • At Friday, June 29, 2007, Anonymous Anonymous said…

    ايه بس داخلة شمال كده ليه ؟
    بس والله معاكى حق فللى قولتيه ..
    موافئك على حبه من اقتراحتك .. بس متزوديهاش بدل ماتقلب غم

    يعنى شد شويه اه .. علشان تاخدى حقك
    بس متعكنينيش على الراجل يعنى

    وبعدين جبهة التهييس دى مصدقت انتى حطيطى البوست ده وطلعت القديم والجديد
    براحة يا جدعان مش كده يعنى

    التعامل لو بود مش بهبل هيجيب نتيجة احسن

     
  • At Saturday, June 30, 2007, Blogger Unknown said…

    هههههههههههههههههههه

    هموت منك حرام عليكى
    ههههههههههههههههههههه

     
  • At Saturday, June 30, 2007, Blogger Desert cat said…

    شديييييييييييده يا تمرمر
    منه لله ابورحاب ولا حجه بتتمر فيهم يا اوختشى

     
  • At Saturday, June 30, 2007, Blogger Amr Ahmed said…

    ههههههههههههههههههه

    عسل والله

     
  • At Sunday, July 01, 2007, Blogger Abo Amr said…

    اللي ايده في المية مش زي اللي ايده في النار

    و مش كل الرجالة كده يا ست الكل
    بس فيه رجالة
    مايجوش غير بالسك على دماغهم
    زيهم زي بعض الستات

    مستمتع جدا بالبلوج بتاعك
    و عاجبني فيه خط السخرية السياسي
    مش سهل الكلام ده

     
  • At Sunday, July 01, 2007, Blogger الطائر الحزين said…

    السلام عليكم

    ضربت عصفورين بحجر
    مفيش راجل مش عاوز يسستم و وتكون مراتة عاملة سيستم المهم ان يكون فيه سيستم مش اى حاجة وخلاص حتى ولو كان الشعر منكوش ولا يعرف طريقة المشط والقمطة شغالة واشتكت بس المهم السيستم كل دة يهون فى سبيل السيستم

    اعتقد انك تنصحى النساء اكثر من الرجال فى هذه التدوينة لازم الستات تتجدد دوما و الا الست مش عارف مين و ابصر ايه اللى قلتى عليهم هتلاقيهم ناطين زى القضى المستعجل وخطفية الراجل المسكين من الكنبة اللى نايم عليها فى الصالة وساعتها التنحى هيكون هو الحل ولا فى عودة منه ولا دياولو وعلى رأى المثل
    اكفر القدرة على فمها مش بقى تطلع البنت لأمها لأ لأ يدلأ الفول منها

    تحياتى

     
  • At Sunday, July 01, 2007, Blogger الطائر الحزين said…

    السلام عليكم

    مش معقول كتبت بوست ولم يظهر خسارة فعلا كان معبر جدا
    المهم هحاول اكتب تانى
    اصبت عصفورين بحجر واحد بطريقة جميلة واعتقد انك بتخاطبى النساء اكثر
    اما بالنسبة لسستمة الرجالة دول نفسهم يتسستموا بس لما يبقى فى سيستم اصل وحياتك اى نظام حتى ولو واحد نظام حتى لو كان الشعر منكوش او القمطة شغالة على الرأس والشعر لا يعرف طريق المشط الا فى ايام معلومة ارجع واقول المهم يبقى فى سيستم
    والا هيبقى ذنبكم على جنبكم وهتيجى اسمها ايه اللى قلتى عليها وابصر مين التانية دى هتخطف الراجل المسكين وهو نايم على الكنبة اللى فى الصالة زى المسكين بلا عودة وساعتها قرار التنحى سينفذ ولا احد هيعبر حد والتمثيلية هتتكشف لكل غادى ورايح
    وعلى رأى المثل

    اكفى القدرة على فمها لأ لأ مش تطلع البنت لأمها

    لان الطبيعى يندلأ الفول منها

    تحياتى

     
  • At Sunday, July 01, 2007, Blogger محمود على said…


    انا رديت علي البوست بتاعك في مدونتي
    يريت تقوليلي رائيك
    http://anameshm3ahm.blogspot.com/
    انا بفكر اتجوز
    متعقدنيش

     
  • At Sunday, July 01, 2007, Anonymous Anonymous said…

    المناظر اللى زيكم دواها الأته حتى الأته خسارة فيكم كفايه عليكم الخيار وكمان الخيار خسارة انتم عايزين الخيار السماسم الفقوسى عشان لا تطولوا سما ولا أرض
    طبعا إنتم عارفينى كويس أنا مين
    أنا اللى مش بيعجبه الحال المايل
    ما هو الحق على اللى خلوكم تركبوا وتدلدلوا عشان شويه أوضاع جديدة

     
  • At Sunday, July 01, 2007, Anonymous Anonymous said…

    مالك بأة بإبن أزئوزة ؟ سرحتيه خلاص بكلينكس ؟
    وبعدين المثل بيئول : الأبيحة ست جيرانها ... خلتيه الشردوحة ؟
    تمرمر ... رجـَّعي " ياختي جمال أمه " للبيت ، أو عالأئـَل نفـَّعيه واشتري منه، وصححي المثل ، وبعدين نتفاهم

     
  • At Sunday, July 01, 2007, Blogger Unknown said…

    فلتحيا انشراح

    وليسقط الرجال
    انشراح تا تعيش تا تعيش تا تعيش

    وراكي ياتمر حنة ومعاكي

     
  • At Sunday, July 01, 2007, Blogger جبهة التهييس الشعبية said…

    anonymous

    الاتة دي تحطها فـ....ودنك

     
  • At Monday, July 02, 2007, Anonymous Anonymous said…

    كارخانة دار
    كار خانة دار كلمة لها معني سيئ فهي تعني بيت الدعارة
    في أوائل القرن العشرين كانت بيوت الدعارة نوعين بيت رسمي و له رخصة قانونية و كانت صاحبته أو مديرته تستخرج كارنية مزاولة المهنة و كان يطلق عليها اسم العايقة
    أما بيوت الدعارة غير القانونية او السرية فكانت تعرف باسم كارخانة
    المصدر
    كتاب رجال ريا و سكينة
    للأستاذ صلاح عيسى

     
  • At Monday, July 02, 2007, Blogger تمر حنه said…

    shab masry
    حدرتك أنا مش فاهمة .. يعنى تقصد ان اللى يشوف الشاب الجوجولو (معناه الشاب الصغير الذى يصطاد الحيزبونات ليروقهن و يصرفن عليه مقابل مجهوده) يهون عليه أبو عيلاء- ولا تقصد ان واحد يستر الستات مقابل استبدال السكن الجامعى و رحمته من الأعمال المنزلية الأسبوعية برضك مقابل المجهود ولا ايه؟ ماهو كل الأمثلة نيله و مايتخيروش عن أبو عيلاء ونظمى و شركاهم ليمتد .. مش بقولك لنا الله يادى الشاب - و النبى تعالى على جنب شوية

    geronimo
    جيرنوميو انتى من الأحرار

    جبهة التهييييييييييس المهلبية
    أنا و نوارة فمركب واحدة يا بنات .. ابحروا معنا .. خدوا الحكمة .. هيا انتفضن و تحررن من الرق و سأسأن فى البهاريز - الله أكبر الله أكبر
    أنا لما سستمت للألفطة عشان نبقى عملنا اللى علينا حتى الثمالة و فهيظنا البهايظ عشان أدام ربنا يوم الحساب لما نتسأل نبقى وجبنا و عملنا اللى علينا يا ستات..
    خالتكوا نوارة بتقول كلام كبير كبير : الخالة بتقول سوبريوريتى انفريوريتى كومبليكس و ده غير التروا بيتي كوشو و غير البفرواز كروتليه اللى بنكهة الفرامبواز .. كلام موز موز موووووز
    الا انتى زيى خريجة مدارس هوفا نوفا سكول الثانوية بنين برضك؟

    عبمنعم محمود
    أولا : كفارة يازينة الرجااااالة كفارة .. طب و النعمة لولا سلامك سبق كلامك ماكنت عتقتك الليلة دى عشان تجيب سيرة البت نوارة فى الجرنال و احنا لأ .. يعنى عشان قارفاك بايميلات و حقنة؟ ماهو انتو كده يارجاله تخافوا ماللى لسانها مبرد لكن المؤدبين اللطاف اللى زينا مالهمش بخت
    دى مابقتش عييييييييشة دى

    المهيسة المهلبية
    لأ و بيقولك "أرملة" أو "مطلقة" و كأنهن البضاعة البايتة المنبوذه التى يتصدق عليها بأى دكر واقع آخره يوزع اعلانات فى "أتوبيس"
    .. حقيقى ثقافة شعب تستطيع أرغام المرأة على تحمل مالا تطيقة النفس البشرية حتى تتجنب وصمها بلقب مطلقة
    آه يا أمه ضحكت من هطالتها الأمم

    sampateeka weeka
    مين أبو أكرم ده يا أوكّا؟ ضحية جديدة؟ أوعاكى تكونى رهنتى المنطلون الفيسكوس و المنخل بتوعى انتى كمان - حاكم انا سمعت عن المنطلون الأستريتش اللى اشتريتيه .. لحسن هاعلمك
    مش عارفة ليه حاسّة انك اتصرفتى فى الشمعدان بتاع ماما لحسن عندى فرح بعد بكرة

    محمود على
    بص ياحودة.. هلا هلا عالجد و اللى يتكسف من بنت عمه يتجوز بنت خاله .. هتتقى ربنا فى مراتك هتبقى محترمة و جميلة و نكتبلها بوستات خصوصى كمان .. لكن هتتعوج و تجيلك الأمراض النفسية اللى بتتكلم عنها خالتك جبهة التهييس هبعتلها نسخة من كتابنا الجديد: " دليل العروس فى دعك الفانوس " أو كتابنا الأكثر مبيعا : " أخرجى من الورطة و ادبحيله القطة " ولا الزغلول الكبير : " اتركى الدهب و الماس و ركزى عالساطور و الأكياس"

    dr karim
    يعنى هى لسة ماقلبتش يا كوكى؟ ده الستات اتهطرت و ماشية تكلم روحها فى الشوارع .. انت مش مالمنتشقة ولا ايه؟ و بعدين ماتسيب اللى يطلع يطلع .. و كويس انها قلبت بهبل لحسن أحيانا بتقلب بتوحد و شيزوفرينيا و سلس بول .. اللهم احفظنا
    ألا انت دكتور فى ايه ؟

    انسانه
    يا دكتور كريم الحق فيهواحده بتكوت هنا .. الحقنا بانبوبة أوكشيجين و تنفس اصطناعى

    desert cat
    قطيييييييييييييييييييييييييييييييييعة

    amr ahmed
    ماهو ده آخركوا .. لابس البيرية و مركب السيجار بتاع هافانا و مسخسخ مالضحك و احنا بنحتشرق هنا

    abo amr
    أحب كده الناس تعترف بالحقيقة .. ياخويا يخليلك عمرو و يتربى فى عزك

    الطائر الحزين
    يعنى ايه؟ عايشين على أعصابهم طول الوقت ؟ ماتقرا الست نوارة كاتبالك فوق اللى كانت بتعمله و لا اقرى ردها فى بوست الألفطة اللى فى اللينك و فى الآخر ايه النتيجة؟
    دى الست كانت بتعمله حتى شخصيات تاريخية لدرجو انها كانت مصاحبة ريجيسير فى مخزن ملابس استوديو مصر لزوم الأبهار و مع ذلك مفيش فايده
    يا شيخ .. حرام بقى و هو كل ماواحدة ..... تطلع تتلوى شوية قدامكوا تبيعوا الدنيا و مافيها و تعملولنا معرفش ايه ؟
    دى مابقتش عيشة دى

    الطائر الحزين
    واضح انك معندكش صبر .. الكومنتات لازم تتسيف الأول قبل ما أراجعها و أنشرها و ده لأسباب أمنية تتعلق بكرامة الست والدتى اللى اتبهدلت معايا فى المدونة دى ... سامحينى يا ماما

    محمود على
    ليه بس كده يا حودة .. انت اللى جبته لنفسك و ولعت البلوج بتاعك بكيفك و اختيارك:
    مين اللى قال ان الراجل أقوى من الست؟ تابع كده يوم من عمر الست المصرية و بعدين نبقى نتكلم
    ثانيا: الراجل ليسوا أفضل من المرأة بل المفروض قوامون عليها و تحت سيركومستانسيس معينة فقط
    و لما يرجع الراجل القوى البيت يلاقى الخادمة المطيعة فقط هى اللى منتظراه و موفرة له سبل الراحة و لكن زوجته فهى الأنسانة و الصديقة و الحبيبة و العشيقة التى يجب أن يسعى هو اليها ليتنعم برفقتها
    و يعنى ايه بقى راس براس؟ و ليه مش المفروض انهم راسهم تبقى فى مستوى واحد؟
    و النبى شوبة نصايح للرجالة ياحودة

    الأنونيموس بتاع الأته
    سماسم دى تبقى مين؟ طبعا انت عارفها كويس.. بس الفقوسى ده معرفوش .. ماخللتوش

    أزئوزتى
    معرفش المثل طلب كده معايا يا أوزة .. بلاش كلينكس يا أوزة هنسرحه بالأته بتاعت الجدع اللى فوق ده

    fanan fa2eer
    و زغرطى يانشراح .. لهجتك كده حمستنى على وقفة من بتوع ميدان التحرير بعد الصلا .. فاضية؟

    جبهة المهلبية
    هههههههههههههههه

    anonymous
    حاليا كلمة كاراخانة تطلق على مكان تربية الخيول .. ممكن تقول الزريبة ياعمدة و أكيد مش المعنى الأولانى خالص مانت شايف المكان و الزباين آخر احترام
    و ماأقصده هنا هو المكان الذى لا نظام فيه و يتناول أوضاع بزرمييييييط
    شكرا على الايضاح

     
  • At Monday, July 02, 2007, Blogger انا من اهوى ومن اهوى انا said…

    تمر حنه :

    صباح الخيرات ، انتى تغيبى تغيبى وتطلعى تفرقعى فرقيعه كبيرة والبنات تزغرد وراكى ، كل مرة تتهفو علقه من اجوازكو وتطلعوة علينا هنا شريهان شريهان ، مش كل الرجاله كدة ارحمونا نعمل ايه حظكو وقع فى رجاله نص لبه يبقى دا الحكم على كل الرجال ، دا حتى يبقى ظلم ، احنا شعارنا الاختلاف احنا مختلفين عن غير نا ( الاختلاف نخدمك باحتراف ) :( ربنا يهديكى يا تمر حنه انتى وجبهه التهييس المهلبيه ويروقلكو الحال ربو عيالكو احسن لكو ، وان مكانش هايبقى فيه جبهه مضادة ليكو

    والبادى اظلم يا معلم ،

    اة نسيت شىء

    تلميحاتك السياسيه مبدعه جدا ياريت تمشى فى الخط دا بجد عاجبنى جدا دا مجرد اقتراح ليس الا حضرتك واهو تبعدو عن الرجاله اللى مخليين حياتكو جحيم كدة
    واجعينكو احنا اوى صح :( عموما قولى منكو لله وربنا هاياخدلكو حقكو

    تحياتى يا فندم

    محمد فوزى .

     
  • At Monday, July 02, 2007, Blogger الطائر الحزين said…

    السلام عليكم
    حرام عليكى ظلمتينى ولم تفهمى قصدى
    الله يسامحك

     
  • At Monday, July 02, 2007, Blogger Unknown said…

    فاضية يا أوختشي فاضية
    وماتنسيش نبعت دعوة للأنونيموس ييجي عشان نظبطه كده ونروقه

     
  • At Monday, July 02, 2007, Blogger bahry said…

    هههههه
    اتلم المتعوس علي خايب الرجا
    نوارة وتمر في بوست واحد
    وعن إيه؟؟
    الرجالة؟؟
    ريا وسكينة اتحدوا يا رجالة

     
  • At Monday, July 02, 2007, Blogger momken said…

    يبقى الرجاله تمنع دخول الملايات البيوت ونتعامل مع الملايه بنفس منطق الساطور
    لان فرش الملايه قدام الناس فضيحه زى فضيحه المطاهر يوم مايطلع عالمعاش

    تمنع الرجاله الملايات
    والشباشب تعتبر اسلحه دمار شامل ويحب التفتيش عليها كل فتره لعدم تطويرها

    اعتبار رفع الحاجب بمسابه انظار مبكر
    وعليه يجب التعامل معه بمنطق الامن المركزى بدون تفكير يعنى
    والالله الموفق
    البوست يموت من الضحك تحياتى

     
  • At Monday, July 02, 2007, Blogger Esmeralda said…

    حاسه بوستي الاخير ابن عم بتاعك
    كونداليزا مش متجنزه ديه انسه لسه
    و الله بوست مسخرة : )
    لازم الشده برضه مينفعش حنيه كتير ديه حتى تموع النفس

     
  • At Monday, July 02, 2007, Anonymous Anonymous said…

    يا تمر حنة انا قصدي ان فيه ذكور بيقدروا الحريم ويعرفوا منزلتهم ومستعدين يضحوا بأى شىء فى سبيل اسعاد امرأة

    وطبعا اللى بيتجوزوا واحدة فى سن الضياع عشان تصرف عليه والكلام ده ....ده يبقى لا مؤاخذة****وبلاش اقولها


    فكرتيني بمشهد من الفيلم اياه........يا نحب يا نقب

    انا عايز اتجوزك يا تيتة

    روح اطلبني من الملك الاول وبعدين نشوف رأى بابا

     
  • At Tuesday, July 03, 2007, Blogger حاول تفتكرنى said…

    جميل جدا أن تضعى ملايين المتناقضات فى قالب ساخر جميل - لا يستطيع أحد محاكاته - ويجعلنا للنهاية فة قراءة مستمرة

    المشكلة أن كل شىء متغير - راجل او ست - فى الزمن ده سقطت كل الاقنعة وظهرت الملامح الحقيقة دون تزييف أو تزوير أو تلفيق

    لاادعي أن أكرر كل مرة بالاشادة بأسلوبك الفريد فى السرد والتصوير تنسينا أحيانا بعض التحيزات المطلوبة

    على فكرة
    كونداليزا لسة أنسة
    ربنا يرزقها بأبن الحراتم اللى يطين عيشتها
    تحياتي

     
  • At Wednesday, July 04, 2007, Blogger Diyaa' said…

    حلوة التدوينة الردح دي بجد ..جاية من معاميق مصر :))
    بس علي فكرة الولية كوندي مش متجوزة
    ومبروك النشر في الدستور ومتهيألي انتي ممكن تكتبي في السياسة حلو أوي...هتحببي الناس فيها والله
    تحياتي
    سلام عليكم

     
  • At Wednesday, July 04, 2007, Blogger rana 3amra said…

    اهلا اهلا اهلا ازيك يا اختشى
    بصراحة انا لسه حالا حالا قريت البوست دة ف الجرنان جامد اخر حاجات فقلت لازم لازم بقى ادور عليكى
    وادينى لقيتك وندمانةبقى و كلام اغانى بجد مدونتك جامدة اوى ربنا يخليكى :)))

     
  • At Wednesday, July 04, 2007, Blogger ابو النجوم said…

    This comment has been removed by a blog administrator.

     
  • At Wednesday, July 04, 2007, Anonymous Anonymous said…

    This comment has been removed by a blog administrator.

     
  • At Thursday, July 05, 2007, Blogger Layla said…

    اذن هي الحرب...نخوضها دفاعا عن عزتنا ورجولتنا

    يا رجال العالم...اتحدوا وتسلحوا بكل ما تطاله ايديكم....ومحدش يجري...اللي خايف يروح

    هجووووووووم

     
  • At Thursday, July 05, 2007, Blogger محمود الدوح said…

    اخيرا لقيتك
    انا بعد ما قريت التدوينة فى الدستور قررت ابحث عنك
    عشان اسال سؤال
    انتى بتكرهى الرجالة؟؟؟؟؟

     
  • At Thursday, July 05, 2007, Blogger واحد من الناس said…

    ONEFROMEGYPT.BLOGSPOT.COM
    CHEK THIS BLOG TO SEE MY OPENION ABOUT THE SERVNTS ON KSA
    WE NEED TO MAKE SOMTHING

     
  • At Friday, July 06, 2007, Blogger Unknown said…

    انا معجب باعمالك جدا وقريت منها جزء كبير واتمني تشرفيني في المدونه للتواصل

     
  • At Friday, July 06, 2007, Blogger S H A H said…

    سمعت كتير عن مدونتك و اخيرا وصلتلها

    دونا عن الموضوع, بجد الاسلوب رائع جدااااا و فقرية قوي و يا حظ ابو علياء بيكي

    يا ريت تبقي تشرفيني بالزيارة يا تمر حنة

    شهرو

     
  • At Saturday, July 07, 2007, Anonymous Anonymous said…

    بسم الله الرحمن الرحيم

    مش هقول غير انى من رائى نوارة وكل كلامها صح , انا فى الاول كنت جامدة وبعامله عادى بس بالوقت حبيته اوى اوى ولما يقول حاجة بقيت اوافق من كتر حبى او نقول هبلى وعبطى اجتمعوا مع بعض تعرفى كان بيقولى اية؟؟؟؟؟؟ انتى كدا بتحسسينى بالذنب انك عايزة ترضينى وبس حتى لو على حساب نفسك حسسينى انى بحبك فعلا وشوية شوية بقا يستهبل وبعدها قالى انا مش هقدر اكمل معاكى ههههههههههه اصلى كنت بسمع الكلام وبحبه ومؤدبة ودة طبعا ما ينفعش للشخصيات اللى زى دية ابدا دة كان عايز واحدة تهزئه وتعرفه حدوده ومقامه

    اة نسيت اقولك انا كنت احسن منه فى المستوى الاجتماعى والمادى ورضيت به اصل الحب لا يكيل بالبتنجان

    سلامات يا حـــــــــــــــــب

     
  • At Saturday, July 07, 2007, Anonymous Anonymous said…

    اة معلش نسيت حاجة مهمة اوى انى لما كنت بعامله جامد كان والله العظيم بيقولى انا مش عايز غير رضاكى بس وتفضلى جمبى و و و و ,ولما ابتديت الحنية بقا والتضحية عشان الظروف وفى عز حبى له تعرفى عمل اية ؟؟؟ عرف واحدة تانية وكان الموبايل يرن ويرد ويقولى دية اختى وسالنى قبلها وقالى اية رايك فى اللى يتجوز اتنيين قولتله يبقا عينه فارغة و ندل مدام مفيش سبب لكدا غير الرمرمة وكان رائه ان يا عينى الراجل هيعمل اية لو شاف واحدة عجبته يمشى معاه فى الحرام يعنى هههه والله اهم شىء فيه انه كان بلحية ومتدين كل ما افتكر انه بلحية وكان عايزنى اتنقب وانا رفضت اضحك
    هما دول الرجالة بقا تدين واعودى فى البيت وحركات وهو يخرج يبص على البنات براوتعجبه ,وانابشهادة الناس حلوة ولسة صغيرة , طب يا اخويا غض بصرك يا ابو لحية
    حاجة تفقع

    سلام يا قمر

     
  • At Saturday, July 07, 2007, Blogger Vampire said…

    الشردوحة ؟؟؟
    هههههههههههههه

    حلوة مووووووووووت

    و الصورة كمان تجنن
    ممكن تعرفيني نحط صور على البلوج ازاي ؟

     
  • At Saturday, July 07, 2007, Anonymous Anonymous said…

    عايزانى اخس ؟؟؟اخس عايزانى اتخن !!!موافق اطول شعرى... اقص من غير يمين موافق. كل طلباتك تتنفذ بس انت تأمرى وانا انفذ

    اللى
    هتاكليه هاكله واللى ياعكسك هاكله وطلعلك عنيه انتى عارفة.. انى واد طايش وبحبك حب جنان لو بتحبى بقى الفروسية هاجيلك كل يومين بحصان
    احنا لينا بركة غير حوا ومصايب حوا

     
  • At Sunday, July 08, 2007, Blogger جبهة التهييس الشعبية said…

    ههههههههههههههه
    بتش يا موكوسة
    اتشهرتشي يا به
    لولولولولولييييييييييي
    وجاين لك ناس من الداستور يقولوا لك انت بتكرهي الرجالة ليه

    والنبي يابني دي غلبانة ولا بتكره حد ولا تعرف الكره

    دشي قلبها زي البفتشة البيضا

    بس الصنف ما بيحبش البافتة

    ولا حتى الكريب الرعاش

    عايز خيش عشان يحك له جتته الجربانة
    لامؤاخذة

    هئ هئ هئ

    الا يا به شوفتشيني وانا حارقة لك دم الرجالة

    اي خدعة

    ما حدش بيعرف يجيلهم ع الوجيعة ويشعوطهم قدي

    سيبيني عليهم واي خناقة ابعت لي اي عيل صغير ع القهوة

    اجيلك طيران والسنجة في ايدي

     
  • At Sunday, July 08, 2007, Blogger تمر حنه said…

    أنا من أهوىو من أهوى أنا
    صباح النور يا فوزى ..و انت بقى شايف ان الكتابة لازم تعبر عن تجربة شخصية؟ يابنى احنا بننقش سطور من نور على صفحات تاريخ النساء فى محاولات منا لاذاية الجليد بين الجنسين للوصول لصيغة تفاهم مٌرضية لكلا الجانبين - و ماليش مزاج أتخانق انهاردة

    الطائر الحزين
    تتقطع ايدى لو كتبت كلمة تزعلك .. حقك عليا ماتزعلشى

    fanan fa2eer
    أوكى - دان .. ماتنسيش معاكى الكاش جلابية و الصان بلوك و خرطوم .. انها الحرب اذن


    bahry
    ماتخافيش يا شابه .. داحنا هنريحوووووووكى


    momken
    روح انضم لحركة تطوير الدكر الثورية " يالهوى يانا ياما" و هما عندهم أسلحة الردع بتاعة الرجالة

    esmeralda
    ايوه نفس النظرية : " الهيه" بس شوفتى النتيجة يا ازميرالدينيو ؟ شغبتى الشاى و انبسطتى ولا عنتغ زمانك

    shab masry
    يابنى البيت من غير الست ولا حاجة - شوف لما الراجل مراته بتموت أو بتسيبله العيال الدنيا بتبوظ ازاى؟؟ و هى فى الآخر مش عايزة الا التقدير لدورها .. عموما الغلط مردود


    حاول تفتكرنى
    أدينى بحاول أهو .. كونداليزا لسه آنسة و أظن انها ستبقى آنسه أبد الدهر

    diyaa'
    ماليش فى الكتابات السياسية - مالآخر أنا جبانة كبيرى وصلة ردح .. ربع كباب و " كانز" كوكا دايت


    rana 3amra

    الصراحة انتى اللى جامدة آخر حاجة يا رنا .. بالمناسبة عايزة تدخلى كلية ايه؟

    comment deleted
    اللى عارف نقسه و شلت الكومنت بتاعة و مش هديله حتى شرف كتابة أسمه - لما الموضوع يدخل فى معايرة و تجريحات شخصية لناس عزاز عليا أو حتى ماعرفهومش - يبقى تتزبل كده أحسن لك .. عموما أنا بلغت رسالتك - حاول تفهم معنى التواصل الأنسانى الراقى اللى بين البشر

    marvel
    هجوووم ده ايه ياسى مارفل ؟ دون كيشوت ياخى؟ وانتو تقدروا تهاجمونا ولا تعيشوا من غيرنا - الطيب أحسن

    محمود الدوح
    أكره الرجالة؟ دول نعمة يابنى - بس الرجااااااالة عارف ازاى؟ الراجل الجدع الحنين .. الطيب .. اللذيذ .. اللى بيتقى الله و فيه منهم كتير على فكرة - بس يا حوده عشان أنا بكتب هنا نقد و رغبة منى فى تحسين وضع المرأة الصنف ده مش موضوعى - أنا بكتب بس عن الوحشين الأنانيين اللى نص نص

    واحد من الناس
    حاضر هاروح و أشوف - أند آى وانت تو دو انى سينج فور ايجيبت - أى لاف هير فيرى فيرى ماتش

    a7med 3bd elfatta7
    الشرف لينا يامخرج - سعدت جدا بمدونتك بالمناسبة .. شايف البحر شو كبييييير


    s h a h
    ايه بقى دونا عن الموضوع دى؟ بلاش تجيز بقى .. و بالمناسبة عندى شوية وصفات أكل يبوظوا أجدعها ريجيم ..و تحدى


    anonymous
    انتى ليه داخلة أنونيموس؟ المهم .. ولا تتفقعى ولا حاجة - هو الخسران .. هعمل بوست جامد جدا لمرحلة مابعد الفرقعة .. هيهديكى انتطرينى

    vampire
    طبعا ممكن - الأول تختار الصورة اللى عايزها ممكن من الكومبيوتر بتاعك - أو من جوجل - بحث الصور- و بعدين قبل ماتكتب البوست فى صفحة : نيو بوست أو كرييت هيتفتحلك الويندو بتاع الكتابة هتلاقى شريط الأدوات بتاع الكتابة فوق بعد التصحيح الأملائى فيه ايكون صورة لما تدعسه (حلوة؟) هيطلعلط ويندو : أبلود ايمدج تختار اما من الجهاز أو من النت(حط اللينك) و بعدين تقوله أبلود ايمدج - قبل ماتكتب- فهمت ؟ جرب و قولى - قولى - ايه رأيك - جرب و اوصفلى


    caesar
    مش عارفة يا سيزر .. بموت فى تشريحة رونالدينيو - ماتجرب تعملها .. بقولك ايه ماتعملك بلوج بقى دانت قديم هنا أوى


    جبهة المهلبية الشعبية
    جايبالنا الكافية يخرب عقلك .. ياخوانا البنت دى كانت يوما ما خجولة .. أكاد أجزم انها كانت بتتلعثم أبان أى مواجهه.. ده و ان دل على شئ فيدل ان تحليلاتى صح .. و اللى بيدعوا ملائكية الرجالة جانبهم الصواب - و قال ايه بيقوللى بتكرهى الرجالة .. آه يانارىىىىى

     
  • At Monday, July 09, 2007, Blogger الطائر الحزين said…

    كلنا شريك فى الحزن
    والمرار

    ولا يهمك

     
  • At Friday, July 13, 2007, Blogger انحلت سيور العربه وسقط المهر من الاعياء said…

    بقى يا تمر حنه اقعد سنه ما جيش عندك ار جع الاقيكى عا مله انقلا ب؟؟؟

    تحيا تى

     
  • At Friday, July 13, 2007, Anonymous Anonymous said…

    تمرمر انتى وجبهه التهيس الشعبيه بجد ملكمش حل زى العسل ياريت لو تعلمونى شويه لانى بجد خلاص يااختشى الكيل زاد قوى الراجل يختى مهما اعمل مافيش فايدة ولا شى عاجبه رفيعه يقولى اتخنى اتخن واسمع الكلام يقولى ايه ده مش شايفه الستات نرفع تانى يرجع ياختى من الشغل يلقينى على سنجه عشره يقولى متزوقه لمين نقعد كده يقولى هو مفيش حتى دم متقومى تعملى زى الستات مبتعمل لجوازها طيب يا اختشى اعمل ايه والنبى من ساعه لما بيدخل البيت بسيب كل شى وابقى فاضيه له وبردوا ولا شى نافع بقول ياريتك يا بابا معلمتنا تعليم عالى وكنت كده زى جارتى امانى ست بس ايه ممشيه جوزها على العجين ميلغبطوش يقدر يقول لها هاتى كوبايه مايه دا كانت العماره كلها اتفرجت عليه والست امانى تنيمه برا الشقه زى مبتعمل كل شويه وهو ياختى زى العجينه الى فى اديها اه يارتنى ابقى زيك كده يا امانى هرقليز زمانى واورى الاستاذ الفرق اكتبى ياتمرمر وقولى على جوانا هو حتى الكتابه هيقفوا لنا فيها ولتحيا انشراح
    ريرى

     
  • At Friday, July 13, 2007, Blogger Dr Mohamed said…

    انا سعيد جدا و فخور بك و بكتاباتك الحرة الجريئة المليئة بالسخرية اللاذعة و الفكاهة المضحكة - قمة فى الكوميدياتضاهى كتابات كبار كتاب الكوميديا و ترقى لتكون حلقات تليفزيونية
    المهم ما تطلعيش شخصيه وهمية زى ناديه عابد وراها راجل

     
  • At Saturday, July 14, 2007, Blogger Reemo said…

    البوست دمه خفيف اوى يا تمر حنه
    بس بجد فى شويه كده كويسين وفيهم الأمل
    ادعى ربنا بس مينقرضوش :)
    تحياتى

     
  • At Tuesday, July 31, 2007, Anonymous Anonymous said…

    انتى زى العسل والله جامده جدا مع تحياتى دينا

     
  • At Wednesday, August 01, 2007, Blogger غمض عينيك said…

    يالهوووووويي
    ايه دا ياتمر حنه
    دانتي مفقوعة اوي من الرجالة


    بس انا معاكي
    احنا مانجيش الا بالعين الحمرا

    ترجعي بالسلامة
    محمد سمير

     
  • At Wednesday, January 23, 2008, Anonymous Anonymous said…

    تمر حنه ...
    تحية أهل الجنة سلام
    فالسلام السلام
    أول مرة أدخل مدونتك ، فوجدت الأبتسامة ترقص على شفاه الوقت الذي أحياه ، مع ما يحيط بنا من عبوس في ظلمات الواقع ...؟!
    فأقول رويدك على التحامل على جميع
    الرجال فمنا كما منكن ....!

    فإذا كان الجمال مطلب الرجال ،، فإن دوافع النساء تيسره
    قضى الله بالذي فينا ،، وضاعت حكمة الحكماء ..
    تحياتي واحترامي
    أسلوبك جميل في التهكم على ما يوجد في المجتمع .
    كوني بخير

     
  • At Tuesday, November 18, 2008, Anonymous Anonymous said…

    اية الهيافة دية :ٍ اعملوا كدة و هو اقل حاجة يسيبك تخبطى دماغك فى الحيطة ومتلقيش حد تهبلى علية او يمشيها هبل بهبل وساعتها اكيد انتو الخسرانين

     
  • At Tuesday, June 15, 2010, Blogger الحالم said…

    بدون سلام
    انا أول مرة أقرء مدونتك دي وللأسف اللي زيك ملقتش الراجل اللي يعرفها يعني ايه معني كلمت راجل أنت يا بنتي فاكر نفسك أنت وشويت الملحيس اللي أنت بتكتبلهوم شجرة الدر الرجاله دول اسيادكم وهيفضلو طول عمرهم اسيادكم شئتُ أم ابيتُ وهتفضل عقدة النقص اللي عندكم من نحية الرجاله مسيطره عليكم ومعقداكم في عشتكم
    عارفه لو بقيدي اعمل تمثال لكل راجل قهر ست أو عذبها في يوم من الايام مهو انت كده من جنس صحبتك الارملة السوداء لازم تلاقي اللي يفعصك ويوريك الاستمورنج بتاعك اللوان
    ونمصحتي ليكي أوعي تفكري تعملي حاجة من اللي بتقوليها مع بعلك لحسن اخواتك المتهورات اللي زيك يا حول الله يارب السراية الصفرة فتحتلهم قسم باسمهم
    بس فى النهاية مقالتك ضحكتني كتير وعرفتني اد ايه انتيواللي زيك غلابة

     

Post a Comment

<< Home