أيوه خدامه

Friday, June 23, 2006

الساعة كام فى إيدك يافندى؟

الساعة كام فى ايدك يافندى؟" " طب ارجع بات مطرح ماكنت"
"البيت ده محترم و له تقاليده و لن أسمح طول مانا عايش ان النظام يتلخبط"
" ياهانم بنتك راجعه الساعه حداشر من بره و أنا ليا كلام تانى معاها"
" مانتا فاشل و أنا قلت لك ابعد عن الشلة البايظه الى انت ماشى معاها و الا هيكون ليا تصرف تانى"
" و كمان بتشرب سجاير يا كلب – دانت لسه بتاخد مصروفك منى" بالذمه سمعنا الجمل دى كام مره من بابا؟
كام مرة اتحرمت من المصروف – كام مرة اتلطخت قلم على سداغك؟ كام مرة والدتك قالتلو سماح المرة دى عشان خاطرى ؟؟!!!!!ا
غير طبيعى .... نفس السيناريو لكل الآباء و نفس العند من كل الأبناء – مش عايزين يفهموا ان الممنوع مرغوب – و ان ممكن من كتر مابيمنعونى انى ماحطش ايدى فى النار حطيتها بالعند فيهم.
دى نفس القصة القديمة – سيدنا آدم ماكلش غير من الشجرة الوحيده اللى المفروض مايقربهاش لكن نقول ايه ؟؟
طبيعى ان بابا عايزك تبقى سون ديفو (بدون عيوب) و شئ طبيعى انو عايزك تبقى مؤدب و محترم و رجل منذ نعومة أظافرك و عايز البنت تبقى طوع و منكسرة و مؤدبه جدا.. جدا.. جدا (بموت فى كاريكا) – و لكن اللى بيحصل ان التطبيق بيختلط على السواد الأعظم من الآباء و بيوصل بيهم الأمر أحيانا الى ( و العياذ بالله) أنا ربكم الأعلى أأمر فأطاع .
ليه كده؟؟ أنا أبويا لوكان شاف فى ايدى فنجان قهوه و أنا مراهقة كات ليلتى تبقى كوبيا! و بدون وعى أدمنت القهوة لما قرب يجيلى قرحة !! و مره بجرب سيجارة حلوانى كده و اتقفشت و من اللى شفتو نزلت اشتريت علبه بالعند فيه !!!
يا أبويا يا حبيبى لاهو انت فاكر ان الرذيله لا ترتكب الا بعد الساعة حداشر ؟ هأ هأ طب تعالى نشوف كام بنت فى الثانوى و الجامعة انهارده نازله من بيتها الساعة سبعة صباحا" تجرى عشان يا كبدى تلحق المحاضرة الأولى و لو بس بصيت فى شنطتها هتلاقى بيبى دول (مالوش ترجمة )
كام بنت بتنزل الصبح و أبوها بيدعيلها : ربنا يسهلك يا بنتى و ينجحلك المقاصد و مقصوفة الرقبة رايحها تقابل زميل و فى البوك(كلمة بلدى موت) بتاعها ورقة بعنوان : عقد زواج عرفى !!!!!!!!!!!!!!!!!!
أهو : ماجبتش حاجه من عندى نقرا الأحصائيات الرسمية ....
على فكرة الشياطين مابتفتحش بعد الساعة حداشر بس – الشياطين توينتى فور سيفين- مابيقفلوش.
العيال مابتغلبش – سن المراهقة ده منيل أوى و بيبقوا فاكرين انهم لو فردوا دراعاتهم هتساع الدنيا و مافيها – هما فعلا شايفين كده .
طيب واحد من الجمهور يسألنى و يقوللى ايه الحل يعنى نسيبهم على حل شعرهم؟ نطلقهم فى الشوارع عشان ترتاحى؟؟
أنا بقى أقولو لأ بس لازم شوية نتغير – لازم نركب الموجه لازم لو جالك الطوفان تنخ و تشيل ابنك على راسك
لو عملنا احصائية ولو بين الزملاء هنا :
كام واحد و واحده حب قبل سن خمستاشر سنه؟ منتظره ردود
كام واحد و واحده شرب أول سيجاره أو نفس شيشه قبل هذاالسن ؟ منتظرة ردود
كام واحد و واحده شاف فيلم فيه مناظر أو مجلات من اللى و العياذ بالله قبل هذا السن ؟ منتظرة ردود
كام واحد و واحده مارس علاقة كامله قبل سن العشرين ؟ مش منتظره حاجه و انتو و ضميركم
هيا نتكاشف – هيا نخلع الأقنعة لأننا فعلا يهمنا جيل جاى نضيف
ليه يا أمهات لما تيجي بناتكم اللى فى الجامعة و تصارحكم : انى أعرف ولد زميلى بيحبنى و أنا مياله ليه ماخدتيهاش على جنب فى حضنك و قولتى لها و مالو أنا عايزه أشوفو و أشوف مامته و أتعرف على أهل اللى خلفو امو (مش نهارك مطين دانا هطلع ميتينك انهارده يافاجرة – ده الرد الديفولت)
ليه ماتقوليش هاتيه البيت يقابلك هنا – ماهما هيتقابلوا هايتقابلوا – عايزين يحسوا بحاجات حلوه بتزغزغ الحته الجوانيه ( اللى فوق ناحية الشمال و انت طالع) - ليه ماتلاقيكيش جنبها تفطميها عالصح و الغلط و الحلال و الحرام – ليه ماتعلميهاش ازاى تصون كرامتها و ايه اللى ليها و اللى عليها ؟؟؟؟؟؟
أنا عارفة ان دى مش ثقافتنا و هتشتم لما أشبع دلوقتى بس برضو الأقمار الصناعية مش ثقافتنا – هيفا وهبى مش ثقافتنا – قناة أكس أكس معرفش كام مش ثقافتنا – أفلام ايناس الدغيدى مش ثقافتنا – البت اللى بتحمى الحصان و جابته أرضا مش ثقافتنا (على فكرة الحصان بيتعالج فى مستشفى بروك الخيرى و فاقد القدرة على الصهيل أدعولوا)
احنا دلوقتى بنتجرجر الى هاوية سحيقة محيقة بالأنفتاح على الأعلام الغربى - ديك النهار زميله بتحكيلى على سايت كلو عبارة عن كليبات لبنات صغيرة بتفض غشاء بكارتها بمعرفتها اصطناعيا و بيصوروها احتفالا بهذا الحدث المشرف!!!!!!!!!!!!!!!!!!!!!!!!ا
ها لسه لنا كام سنه عالموضوع ده؟ تفتكروا كام؟
حدش راح مارينا يا شباب – مارينا دى قطعة ساحلية تنتمى لمصر؟ اللى ماشيه هناك و صرتها مش باينة (لأ صرتها ايه دى الصرة دى فى القاهرة – كل حاجة مش باينة) بتحتقر احتقار شديد و البنات بيبصولها و يشاوروا و يكتموا الضحك .
غلفوا الدين و الفضيلة للشباب بطريقة سلسة و لذيذه تتماشى و الأطار اللى احنا فيه – حببوهم فى ربنا و الدين و الحياه و الحب و التفاؤل و قبل ده كلو حببوهم فيكو !!اكفايانا "أخرج من بيتى يا كلب" و" تسع سنين مفيش مصروف" و الهم الأزلى ده الله يمسيك بالخير ياللى قلت : نسك على بناتنا بس نسلمهم المفتاح.

Monday, June 19, 2006

القطط تأكل فى الظلام

لماذا أنت مثل القطط تأكل فى الظلام؟
لماذا تنظر الى هكذا؟
لماذا تستميت فى محاولة رفع راياتك على أشلائى؟
كل هذه الساديه؟ ربااااااااه

أنت أضعف من ذلك – فكل قوتك تستمدها من استسلامى
لن تراه ثانية
لن أمددك بسر قوتك
انظر ...... لازلت نقطة ضعفك
أنت الأضعف

لن أتركك تعبث بموازينى
فأنا لست من الأصناف الثلاثة
لازلت أملٌك... أنا
لن تصبح نارى ولا جنتى
ستغدو............ عدم

لن تقتلنى و تيتم صغارى
لن يصبح الصغار شعثا جوعى
لن أترك نازيتك تدفننى فى أفرانك
لن أصبح مسخا بعد اليوم

تريدنى نصف أمراه؟؟؟؟؟؟
تريد أن تختزلنى فى مهبل ؟؟
هيهااااااااااااااااااااات

اذا استبد بى الشوق يوما
اذا فاضت انوثتى .... سأقرأ مذكراتى
حتى لا أنسى
سأقرأها باستمتاع لأستمنى رغبتى فى ...التحرير منك
و سأصل الى نشوتى المرجوه

سأحل شعرى المعقوف و أطلقه
لن أهذب حاجباى
سأرقص رقصة الحياه و أنا حافية القدمين
على موسيقى من تأليفى أنا
أنا من سيضع اللحن و الموازين
أنا من سيحدد الأيقاع كما يروق لى
و ليذهب المشاهدين الى الجحيم

فالسماء لن تمــــطر ذهبا
فهذه وســـــيلة الضعفاء
وسيلة فتاة الأرجوحة
لن أركب أرجوحتك
لن أجعل رياحك تحركنى
لن أتقيأ دما
لن تزكم أنفى رائحتك .. كم أمقتها

سأطلق كفاى فى الهواء
سأعرض وجنتاى للشمس
و ستنبت فى كفاى و على وجنتى زهور الكاموميل
و ستكتحل عيناى ببرائتى التى لا تصدقها
ستصدقها الشمس
ستحنو على و لن تبخل مثلك
سأجد فى ضجيج الأطفال سكنى
وفى مزاحهم أعصابى


سأرحل من وطنك الى الأبد
و كلما تذكرتك ..... سأقرأ مذكراتى


Labels:

Friday, June 09, 2006

مش كل الستات شوربة


أولا – عشان يبقى الكلام على ميا بيضة – خيانة الرجل لزوجته أو خيانة الست لزوجها – اسمها زنا : زين نون ألف – و دى من أكبر الكبائر و اللى مايتوبش قبل ما يتوفى فسوف يحاسب حسابا عسيرا و لا يوجد هناك معاذير فالحرام بّين و الحلال بّين والحدود الشرعية بعيدا عن القوانين الوضعية( الأب ديتيد) أوجبت أقامة الحدود على الزانى و الزانية.
كما ان الزنا محرم فى جميع الشرائع السماوية ( متفقين؟ )

طيب دلوقتى الست ذلك الكائن الهلامى اللى قلنا عليه قبل كده فى أول تدوينه - و اللى جوزها ردئ الخلق جلنف انانىو فوق كده خاين- لو ماعرفتش تشتغل خدامه أو أى عمل آخر شريف بتعمل ايه؟ لو ماأسعدهاش الحظ ببلوج للفضفضة أو بدماغ حلوة كده لسه ماباظتش ؟

بصوا بقى: الستات أنواع – النوع الشكاى الممل و دى شويتين و كلو بينفضلها فتبتدى تكلم روحها قدام المراية و بعدين فى الشارع و بعدين تصاب بهلاوس سمعية و تشوف ناس بتكلمها فى الهوا و بتاخد و تدى معاهم وبعدين تبدأ فى أكل المشابك و بوز اللحاف و تنتهى معلقة كاتانيللا (شبشب) فى رقبتها و دايره فى شوارع العاصمة حافية القدمين (بموت فى كاظم) و هى بتتلفظ بعبارات من نوعية : نظمى ياللى امك ماتقولش لأه سيبتلك العيال فى الشقة ( و كورس أولاد الشوارع بيردوا وراها :ا لأااا لأااا ) أو مثلا جدر البطاطا هو السبب و هراس جاى و حاجات كده يعنى و فى الأخر يتقبض عليها بتهمة تفجير كنيسة أو تقطيع الأعضاء التناسلية لمية و خمسين شخص فى نفس التوقيت( يعنى برضو بتفيد الدولة).

النوعية التانية الست العاقلة أوالست البير ( السواد الأعظم من السيدات المصريات) : دى بقى العاقلة الراسية بتاعت الجواز ستره و أهو برضو ضل راجل و لا ضل حيطه و أهو برضو شحط داخل علينا و حركات من دى
الست دى مابتتكلمش أصلا و تانها مربوطه فى الساقية و هى وكاتمة فى قلبها لحد ماقلبها بوووووم يطق و يا يجيلها هارت أتاك بسبب أرتفاع ضغط مفاجئ يا انفجار فى المخ و العياذ بالله أو بارانويااااااا شيزوفرينياااا

النوعية التالته و الأخطر و اللى كترت أوى اليومين دول : الست الخاينة ( اللعوب) (راجعوا صفحات الحوادث و القضايا اليومية): الست دى بتتسم بقدر ضئيل جدا من مخافة ربنا - و ليها برضو حيثيات للخيانة من وجهة نظرها – ماهو اللى بيعمل أى حاجة غلط لازم يكون مقتنع تماما بان ده هو الصح زى الحرامى و بيسميها اعادة توزيع ثروات: يعنى أنا بشقى أكتر من الناس دى يبقى المفروض انى أعيش أحسن منهم - أو الموظف المرتشى اللى بيعوض من أصحاب المصالح قلة مرتبه و بيسميها أكرامية نظير تعبه أو الدكتور أو الصنايعى أو مدرس الدروس الخصوصية ............. و ياما بنشوف كل ساعة
فالست من دول بيبقى جواها رغبة جامحة فى أخذ حقوقها المسلوبة بمعرفتها :الحقوق المسلوبة من كرامتها : يبقى لازم امرمغ كرامة اللى خلفوه فى الوحل – و حقها فى الدفء اللى محتاجاله : يبقى لازم أتدفى لأن لبدنى على حقا – و من تقتير الزوج (و دى
حالة واطية شويتين تلاته فبتاخد أجر نظير الخيانة) و من الأهتمام و من الدلع و من ومن ومن.
و مش لازم تكون واحدة فاجرة أو من بيئة واطية أطلاقا – اللى بيعملوا كده ممكن يكونو بنات سفرا و ناس أسامى و ممكن تكون
محجبة أو مخمرة ( لابسة خمار يعنى )
الست بطبعها كائن عظيم الكيد ( ده وصف قرآنى جاء فى سورة يوسف) يعنى ممكن الأسية توصلها لقرارات هى نفسها ماتحسبلهاش حساب
ممكن جدا و هى بتخون تعرض فى دماغها شريط 8 مم سكوب ألوان فيه بعض المشاهد من حياتها مع جوزها - صورته و هو بيتريق عليها قدام الناس– صورته و هو داخل مكشر كل ليلة رازع الباب وراه – صورته و هو بيديها ضهره ليلاتى و يقوللها ماتعقلى ياوليه بلاش الهيافه دى – صورته و هو بيضربها على وشها بالقلم أو مجرجرها عالسلم بقميص النوم فى نص الليل يالا روحى على بيت أبوكى اللى بلانى بيكى – صورته و هو بيسفه من أهلها - ساعتها هتبتسم ابتسامة المنتصر و تقول ده راجل مايستاهلش الستر و ممكن تكون هيا أصلا بل و غالبا لا ترغب فى مثل هذه الخيانه و تجد ان مؤشر الحقد تجاه جوزها ينخفض بحده ليه بقى : مانا كده كده بتعاقب فعشان ماحسش بالظلم خليها بسبب – العيال الصغيرين بيفكروا كده برضو – تأبى مثل هذه المرأة بان تصف نفسها بالمومس( مع انها أصبحت على شاكلتها ) لأنها لم تتقاضى أجر بل كل ماتريده هو الزج بشرف الراجل المفترس الى منطقة شائكة
و فى هذه الحالة يصبح تقبلها لسفالات زوجها متاحا جدا و بصدر أرحب من ذى قبل.

يارجال العالم رفقا بالقوارير – حرام عليكو بقى أرجوكم الست مش ملطشة ولا حقل تجارب لتجاربكم –
لحد امتى هتنفخوا فى الزبادى ؟ مش كل الستات شوربة .



Wednesday, June 07, 2006

بالشبشب


بقى بالذمة أنا آخر انشكاح من موضوع طلعت السادات لما رفع الجزمة ( ولامؤاخذه) على النايب الوطنى أحمد عز.
ماكنتش متخيلة ان فيه نائب فى المجلس الموقر ممكن يسخن للدرجة دى عشان مصلحة الوطن (ينصر دينك ياد يا طلعت) بس الكلام ده بشرط ان طلعت ميكونش من المضاربين فى البورصة هو أو أحد الأقارب من الدرجة الأولى – و فى هذه الحالة هسحب حماسى و كأنه لم يكن.
بقى لو كان حد مصحصح رفع الجزمة على ممثل الحكومة أيام الريان و المنهبة اللى حصلت يمكن يكون الحال غير الحال .
لما راجل يقلع الجزمة عشان يضرب حد معنى كده انو محروق أوى و كأن الموضوع له علاقة بشرفه أو عرضه – و لأول مرة أسمع عن نايب بيتعامل مع البلد كأنها أمه أو بنته.
يارب حاجة تلحق تتغير لأن الشرط التالى هيبقى من ضمن شروط الترشيح القادم :
- على أن يكون مقاس حذاء المرشح أقل من 43 و يفضل لبس شبشب بفيونكه أو شبشب بصباع.- بالنسبة للمرشحات ممنوع منعا باتا لبس كعب يزيد عن سنتى و نص و يفضل جزمة رقص باليه
.

Labels:

Sunday, June 04, 2006

.........بس لينا الحلاوة



لو عملنا احصائية لعدد الشغالات اللى دخلوا بيتى أو بيوت صحباتى فممكن يحصل للبعض حالة ذهول.
مئات من الشغالات على كل لون يا باطسطا.
الشغالة اللى أصبحت دعوة ليلة القدر لكل الستات : اللهم أرزقنى بشغالة لهلوبة و شاطرة و مش حرامية و منكسرة و تكمل معايا أربع تشهر على بعض ثم : اللهم نجح أولادى و استرهم دنيا و آخرة.
حقيقي مابقلناش كلام طول النهار الا عن الشغالات :
طبعا هيهات انى أفتكرهم كلهم لأن منهم اللى قعدت أربع ساعات و منهم بالكتير اللى قعدت أسبوع
أصل فيه دلوقتر مكاتب مخدماتيه : الشرف للتخديم – الأسلامية للعمالة – التوحيد لجليسة المسنات – الرضا و النور لعاملات النظافة أل يعنى اسم يوحى بالنورانية فنروح و نبوس الأيدين و ناخد البركة و ندفع العمولة .
المهم انى اكتشفت انها تجارة على كبير أوى بيعملوا ايه بقى البشرية دول؟ بيتبعوا نظرية الشغالة الأستك ( ايوه اللى أشده يلسعنى) :
مساء الخير يا هانم و بعدين يعمل كويستشينير :
المخدماتى : طلبات سيادتك : حضرتك متجوزه؟؟
أنا : أيوه متنيلة
المخدماتى : فيه أولاد؟
أنا : أيوه فيه زفت
المخدماتى : ربنا يخللى كام ان شاء الله؟
أنا : قرد و قرده
المخدماتى : حضرتك بتشتغلى؟
أنا :( بخجل شديد) : أيوه دكتورة
المخدماتى : ( وقد تغيرت لهجته ) طيب انت عايزه ايه دلوقتى يا ست؟
أنا : محتاجه سيدة طيبة و الله هاعاملها زى أختى أو بنتى – الكتف ده زاد و الكتف ده ميا و اللى تؤمر بيه
المخدماتى : يعمل نفسه بيركز : انت كده محتاجه البت صباح استنى بقى لما أسحبهالك من اللى عندهم انتى أولى – المطلوب شهر للمكتب و شهر لأم البنت و شهر لأم البطل (معرفهاش) و شهر خلو رجل و 200 جنية حلاوه و 100 جنيه فتله.
أنا : ( بدأت فى التلعثم ببلاهه و الريالة كيلو قدامى) طيب يعنى سيادتك حضرتك السيدة الفاضلة صباح مرتبها كام؟
المخدماتى : بصى يا داكتورة عشان وشك السمح وأنا اعتبرتك زى أختى الكبيرة ( داهيه تغمك يا بعيد) و وحيات دا الصباح الطاهر - صباح دى مابتطلعش بأقل من 750 جنيه بس عشانك انتى بس و العيش و الملح و ايمانت المسلمين و المسيحيين و رحمة الميتين و الصاحيين مانتى راده لى كلمة :هاخد 650 بس ليا حلاوة اكسترا
( يعنى بالمكسرات ياخى)
و فى الأخر لازم نرضخ لطلباتهم و نكتشف فى الأخر انو ماعندوش فى الأوفيس الا البت صباح دى اللى بتدور عالجميع و فيها كل المواصفات لكل الناس - و فجأه بعد ماتيجى الصبوحة تفتكر بعد يومين انها لازم تروح البلد لأنهم حجزوا أمها فى المستشفى ( عشان جالها آلام طلق لحمل راقد من أربعتاشر سنه) أو فيه جلسة محكمة أو رايحة تكشف أشتشارة فى البلد عشان الدورة مابتنزلش أديلها ست شهور ( والله ده كلامهم) و كلمتها لاينكن تنزل أبدا و تروح صباح و تروح الفلوس و يوعدونا بغيرها و أدى وش الضيف.

شفتوا بقى لو ماكناش اتعلمنا كان زماننا مش محتارين فى موضوع الشغالات ده - روح ياقاسم يا أمين الله يسامحك